Danieli
9 Mu mwaka uwa kutandikilako uwa kuteeka kwakwe Dalyusi mwana Asuwelusi uwa mu lupwa lwa Ina Medya uwisilwe pa wene mu wene uwa Ina Kalideya, 2 mu mwaka uno watandike ukuteeka, ne Danieli nizile imanya ivyalemvilwe umu mabuku* ivyalandanga ukuti Yelusalemu wali nu kutwalilila ukuya umononeke pa myaka 70, wakwe vino Yeova wanenyile kasesema Yelemiya. 3 Fwandi nalozizye icinso cane kuli Yeova Leza wa cumi nu kupaapata kuli aliwe umwi pepo ala nkufunga, iinzwala ivyakuzwala vya kulangilamo ulanda nupya indi umwi itwi. 4 Napefile kuli Yeova Leza wane nu kumusokolwela imembu inti:
“We Yeova Leza wa cumi wemuno wakulisya nupya uwa kuzungusya, wemuno ukasunga upangano wako nu kulanga ukutemwa ukwa cumi kuli yano yakutemwa nupya aakalondela masunde yako, 5 twakuyembukila nupya twacita iviipe nu kukupondokela; twata nu kulondela masunde yako nu upinguzi wako. 6 Tutuvwilile ya kasesema aomvi yako aalandiile umwi zina lyako kuli ya mwene, kuli ya cilolo, uku vikolwe vitu, nu ku yantu yonsi umu mpanga. 7 We Yeova wewe uli mwineco wa ulungami, lelo swemo twazewana wakwe vino cili ndakai kumwi na antu ya mu Yuda, amu Yelusalemu, nu mu Izlaeli monsi, aakaikala umupiipi nu kutali, umu mpanga zyonsi muno wayasalanganyizizye pa mulandu wakuti yataali ni cisinka kuli wewe.
8 “We Yeova, twazewana pamwi na ya mwene, ya cilolo itu, ni vikolwe vitu, pano twakuyembukila. 9 We Yeova Leza witu, wewe Leza uwaya nu luse nupya ukaelela, lelo twakupondokela. 10 Tutuvwilile mazwi yako we Yeova Leza witu, kuli kuti masunde yano watupeezile ukupitila muli ya kasesema aomvi yako. 11 Aina Izlaeli yonsi yatama masunde yako nu kuta ukukuvwila, na cii calenzile ututiipe nu kulapa umulapo uwalembwa umu Masunde Yakwe Mose umuomvi wako we Leza wa cumi, pano twakuyembukila. 12 Watufikilizya vino walanzile pali sweswe na pali ya kateeka aatuteekanga, watuleta intazi ikalamba pali sweswe; intazi iyatiiza pali Yelusalemu itaatala yacitikapo umu nsi yonsi. 13 Wakwe vino calembwa umu Masunde Yakwe Mose, intazi yii yonsi iza pali sweswe lelo tutaakupaapata we Yeova Leza witu kuti utuvwile uluse, tutaata ukucita iviipe nupya tutiika mano uku cumi cako.
14 “Fwandi we Yeova watwalilile ukulola ivyacitikanga nupya watufulwile, pano nanti cakuti we Yeova Leza witu wewe mulungami muli vyonsi vino wacita; twakana ukuvwila mazwi yako.
15 “We Yeova Leza witu, wemuno wafumizye antu yako umu mpanga iya Ijipti ukuomvya ikasa lyako ilya maka nupya wemuno waipangila izina ukufika na ndakai, twayembuka nupya twacita iviipe. 16 We Yeova, ukulingana ni milimo yako yonsi ilungame twapaapata si fumya ukali wako ni cipyu pa musumba wa Yelusalemu umwamba wako uwa muzilo; pano pa mulandu ni membu zitu nu kuluvyanya kwa vikolwe vitu, Yelusalemu na swe yantu yako twazewana kuli yonsi aatuzinguluka. 17 Lyene we Yeova Leza witu, kutika ukwi pepo lino ne muomvi wako nkupepa na kuli vino nkupaapata, nupya cita icisuma uku ncende yii iya muzilo iyononeka, pakuti ucindikwe. 18 Uvwa we Leza wane, yula manso yako nu kulola vino umusumba witu uwamilwanga ukwi zina lyako ononeka; tusikukupaapata pa mulandu wakuti tukacita ivilungame lelo a pa mulandu wakuti wakwata sana uluse. 19 We Yeova, si tuvwe. We Yeova, si twelele. We Yeova, si twikeko mano nu kucitapo cimwi! Utalengela pa mulandu wi zina lyako we Leza wane, pano umusumba na antu yako vyamilwanga ukwi zina lyako.”
20 Lino ncili nkulanda nu kupepa nu kusokolola imembu zyane ni zya yantu yane Aina Izlaeli nu kuleenga ukuti Yeova Leza wane atuvwile uluse pa mulandu nu mwamba wakwe uwa muzilo, 21 ee, lino ncili nkupepa, Gabilieli umonsi wino naweni umu cilolwa cuze, wizile kuli nene ala intonta sana umupiipi ni nsita ya manguzi lino ivya upe vyapeelwanga. 22 Nupya wangazwile ukwiluka upiliulo wa vintu vivyo, watiile:
“Danieli iniza ukuti nkwazwe ukwiluka nu kumanya. 23 Lino iwatandika sile ukupaapata inapokelela mazwi ukufuma kuli Leza, nupya iniza umu kukunena mazwi yayo pano watemwikwa sana. Fwandi uwikeko sana mano pakuti umanye vino icilolwa cikupiliula.
24 “Kuli milungu 70* iyapimilwa antu yako nu musumba wako uwa muzilo, lino ukuluvyanya kulasila nu luyembu, nupya lino kulaya ukwelelwa imembu, kuleta ulungami manda pe, kufwatika pa cilolwa na pa usesemo,* nu kusonta uwa Muzilo Sana. 25 Ulinzile ukumanya nu kwiluka ukuti kufuma pano isunde lya kuwezya nu kukuula Yelusalemu cipya cipya lilapeelwa, kufika lino Mesiya* Intunguluzi alaloleka, palapita imilungu 7 ni milungu 62. Yelusalemu alaweziwa nu kukuulwa cipya cipya, kumwi ni ncende umukazanwa antu aingi, nu mufolo uwaya umu mbali yi linga, lelo vii vilacitika umu nsita iya ucuzi.
26 “Pa cisila ca milungu 62, Mesiya alakomwa nu kusyala minwe.
“Na antu ya ntunguluzi iiliza yalonona umusumba ni ncende ya muzilo. Ilaya kwati yononwa na manzi aingi. Kulaaya inkondo suka impela ice iize; ukulingana na vino Leza wapingula kulaya uwononesi.
27 “Alalenga upangano ukutwalilila ukuyako pa mulungu onga pa mulandu na antu aingi; nupya pakasi ka mulungu alalenga ukuti ivya upe na malambo vite ukupeelwa.
“Aakuleta uwononesi aliza ala watakwela pa maapa ya vintu vya winyi; nupya ivyapingulwa vilacitika na pali wino ononwa.”