Ezaya
6 Mu mwaka uno Umwene Uziya wafwile, naweni Yeova wataikala pa cilimba icitumpuke nupya icicindame, nupya icakuzwala cakwe cali icitali icakuti cazuuzile umwi tempele. 2 Ya selafi yamuzingulwike; cila wino wakweti maapa 6. Cila wino wavimvile icinso cakwe na maapa yaili ni ngazo na maapa yaili, nupya yapapukanga ukuomvya maapa yaili.
3 Nupya yapundililananga yakuti:
“Uwa muzilo, uwa muzilo, uwa muzilo a Yeova Leza wa maumba.
Insi yonsi yazula ululumbi lwakwe.”
4 Nupya mafulemu aapa milyango ya kwingilila umwa kufenela imyangazi yasunkanyile pa mulandu na vino ya selafi yapundanga, ni ng’anda yazuuzilemo icunsi.
5 Lyene nalanzile inti: “Kalanda kuli nene!
Indi wa muntu umufwe,
Pano nanti cakuti nakowela imilomo,
Nupya nkaikala na antu akowele imilomo;
Indola Umwene, Yeova wa maumba umwineco!”
6 Lino nalanzile vivyo, selafi wenga wapapwike nu kwiza kuli nene, nupya walemile ikala lya moto lino watozile pa ulambo ukuomvya ivya kulemelako umoto. 7 Lyene wankumizye pa mulomo ni ikala lilyo nu kunena ati:
“Ikala lii lyakumya imilomo yako.
Fwandi vino ukaluvyanya vyasila,
Ni membu zyako zyelelwa.”
8 Lyene nuvwile Yeova akuzya akuti: “A weni wino namatuma, nupya a weni amatuyilako?” Nani naswike inti: “Apano indi! Ntumini!”
9 Nawe wanenyile ati, “Pitanga ukanene antu yaa uti:
‘Muluvwa imiku ni miku,
Lelo mutaliluka;
Mulalola imiku ni miku,
Lelo mutalamanya ivili vyonsi.’
10 Ulenge imyenzo ya yantu yaa ukuya ikome,
Ulenge matwi yao yatauvwa,
Nupya uyale manso yao
Pakuti yatalola
Nu kuyala matwi yao pakuti yatauvwa,
Pakuti imyenzo yao itailuka,
Na pakuti yatawela kuli nene nu kupoziwa.”
11 Lyene nuzizye inti: “U kufika lilaci we Yeova?” Nawe wangaswike ati:
“Kufika lino imisumba ilononwa icakuti mutaca muye nu wa kwikalamo
Na mang’anda yace yasyale sile ivitotela
Ni mpanga ice iyononwe nu kusyala sile matongwa;
12 Kufikila lino Yeova alazingila antu ukutali
Ni mpanga ikalamba ice isyale sile matongwa.
13 “Lelo wenga pa Ina Izlaeli 10 alasyala, nomba nalyo kwene impanga ilociwa. Aina Izlaeli yaya wa cimuti icikalamba na wa cimuti ca muoaki; cino nga yaputula, icisinte cikasyala; nupya cikaiza icipuuka ulumbezu lwa muzilo.”