Ezekeli

9 Lyene wampundiliile ati: “Ama aakuti yize yafulule antu ya mu musumba, cila muntu aize ni canzo cakwe ica kononelako!”

2 Naweni aonsi 6 yakwiza ukufuma uku mpongolo ya papela, cila muntu walemile icanzo ca kononelako; nupya pali aliyo pali umonsi wenga uwazwite vyakuzwala ivisuma, uwali na kano kalemba akaikamo inki mu musana, nupya ingiile nu kwimilila uku mbali ya ulambo wakwe koopa.

3 Lyene ululumbi lwakwe Leza wakwe Izlaeli lwafumile pano lwali papela yakwe ya kelubi nu kuya pa mulyango wa ng’anda; lyene Leza watandike ukulanda nu monsi uwazwite ivyakuzwala ivisuma uwakweti kano kalemba akaikamo inki mu musana. 4 Yeova wamunenyile ati: “Ingila umu musumba wa Yelusalemu, ukiike icimanyililo pa vipuma vya yantu akucula nu kulila pa mulandu ni vintu vyonsi vya winyi ivikucitika umu musumba.”

5 Yauze nayo wayanenyile ala nkuvwako ati: “Mukonkini umu musumba nu kukoma antu. Mutuvwa uluse nupya mutaya ni cikuuku. 6 Mukome akote, alumendo, ya nacisungu, tulumendo, na anaci, mutasya nanti aumwi. Lelo mutapalama uku muntu ali wensi aakweti cimanyililo. Mutandikile umu ncende yane iya muzilo.” Fwandi yatandikiile na akalamba aali pa nkoleelo yi tempele. 7 Lyene wayanenyile ati: “Kowezini itempele nu kuzuuzya ivitumbi mu misolo. Pitangini!” Fwandi yapisile nu kuyakoma antu mu musumba.

8 Lino yayakomanga, nene sile nasiile nupya naponyile nu kufupama pansi intandika nu kulila inti: “Iyee we Yeova Mwene wa Papelapela uzye umaonona asyalapo umu Izlaeli pa mulandu na vino watusokela Yelusalemu?”

9 Lyene wanenyile ati: “Luyembu lwa yantu ya mu ng’anda yakwe Izlaeli na yakwe Yuda u lukalamba sana. Mu mpanga mwazuula uwazi nu mu musumba mwazuula ulufyengo pano yakati, ‘Yeova wasya impanga nupya Yeova asikulola.’ 10 Lelo nemo ntaluvwa uluse nanti ukuya ni cikuuku, ndayafulula pa vicitwa vyao.”

11 Lyene naweni umonsi uwazwite ivyakuzwala ivisuma uwakweti ka kusendelamo inki umu musana wawela nu kulanda ati: “Incita vyonsi vino iiwanena.”