Danieli
4 “Umwene Nebukadineza walanda uku yantu yonsi, inko, nu ku mitundu ya mu nsi yonsi wati: Umutende uye namwe! 2 Indi ni nsansa ukulanda pa vimanyililo ni vizungusyo vino Leza wa Papelapela wacita kuli nene. 3 Vimanyililo vyakwe i vikalamba ni vizungusyo vyakwe i vya maka! Uwene wakwe u wa manda pe na ukateeka wakwe wayako umu nkulo zyonsi.
4 “Nemo ne Nebukadineza natenzi umu ng’anda yane ukwaula ukusakamikwa icili consi nupya naipakizyanga umwi sano lyane. 5 Ciloto cino nalosile calenzile inje ni ntete. Lino naizi, ivintu ni vilolwa vino naweni vyalenzile inje ni ntete. 6 Fwandi natumile akuyaama aonsi yonsi aamano amu Babiloni pakuti ize yanene upiliulo wa ciloto.
7 “Pa nsita iiya ya simapepo ya vinjelengwe, ya kasapoola, na Aina Kalideya* na aakamanya ivya ku nkoleelo ukuomvya intanda iizile. Lino nayanenyile iciloto cino nalosile yafizilwe ukuneena vino capiliulanga. 8 Pa cisila Danieli uwapeezilwe izina lyakwe leza wane ilyakuti Belitesyazali nupya uwakweti umupasi wakwe ya leza ya muzilo wizile, nani namunenyile vino nalosile inti:
9 “‘We Belitesyazali umukalamba wakwe ya simapepo ya vinjelengwe namanya ukuti umupasi wakwe ya leza ya muzilo waya pali wewe. Nupya kusi inkama iingakutalila ukulondolola. Fwandi ndondolwele ivilolwa vino naweni na vino vikupiliula.
10 “‘Lino naizi naweni cimuti pakasi ka nsi, nupya cali icikulu sana. 11 Cimuti cakuzile nu kukoma nupya cafisile nu mwi yulu, calolekanga umu nsi yonsi. 12 Mafwa ya cimuti cico yalolekanga ningo, nupya cakweti vizao ivingi ni vyakulya vya yantu ni nyama zyonsi. Ivinyama vikalanga umu cisaao ca cimuti cico ni vyunyi vya mwi yulu vikalanga uku misambo, nupya ivya umi vyonsi vyalyanga uku cimuti kwene cico.
13 “‘Mu cilolwa cino naweni ala indaala, naweni umulinzi wa muzilo akwiza ukufuma umwi yulu. 14 Wapunzile ati: “Komini icimuti, putolini misambo, kuntini mafwa nu kusalanganya ivizao iviliko! Lekini ivinyama ivili umwisika lya muti ni vyunyi ivili uku misambo visalangane. 15 Lelo musye icisinte ni misisi, ale icinyepelelwa ni ca kunyepelako ica cela na cakwe koopa umwi sote lya mu mpanga. Lekini ciombe nu lumi lwa mwi yulu, nupya citwalilile ukuya pamwi ni nyama umwi sote. 16 Lekini umwenzo wa muntu uno cakwata uye wa mwenzo wa cinyama, nupya lekini insita 7 zipite ale cicili vivyo kwene. 17 Vii avino alinzi iyalanda, nupya avino amuzilo yakulonda pakuti antu aali nu umi yamanye ukuti Uwa Papelapela aali Kateeka mu wene wa yantu nupya akapeela uwene uwo kuli wino akulonda kumwi sile nu ku yantu aasuulwe.”
18 “‘Cii aali ciloto cino ne Nebukadineza nalosile; lyene naawe Belitesyazali neene vino cikupiliula pano aonsi yonsi aamano amu wene wane iyafilwa ukunena vino cikupiliula, lelo wemo umanena pano umupasi wakwe ya leza ya muzilo waya muli wewe.’
19 “Pa nsita kwene iiya Danieli wino izina lyakwe a Belitesyazali, wacintukiile nupya vino welenganyanga vyalenzile atandike ukuvwa intete.
“Umwene walanzile ati, ‘Belitesyazali utaleka iciloto na vino cikupiliula vikuvwisye intete.’
“Belitesyazali waswike ati, ‘Musambazi nga cali cazipa iciloto cii cakuma aakupata, na vino cikupiliula vikume aalwani yako.
20 “‘Icimuti cino waweni icatalimfile nu kukoma icifika nu mwi yulu nupya icalolekanga umu nsi yonsi, 21 icakweti mafwa asuma, ivizao ivingi, ni vyakulya vya yantu ni nyama, cino inyama zya mu mpanga zikalanga umwisika ni vyunyi vya mwi yulu uku misambo, 22 a wewe mwene pano wakula nupya wakwata maka nu ucindami wako wafika nu mwi yulu na ukateeka wako wafika nu ku mpela ya nsi.
23 “‘Nupya mwene waweni umulinzi wa muzilo akwiza ukufuma umwi yulu, wapundanga ati: “Komini cimuti nu kuconona, lelo musye icisinte ni misisi ala icinyepelelwa ni ca kunyepelako ica cela na cakwe koopa umwi sote lya mu mpanga. Lekini ciombe nu lumi lwa mwi yulu, lekini atwalilile ukuya pamwi ni nyama zya mu mpanga kufikila insita 7 zipite.” 24 Mwene uu aali upiliulo wa ciloto; Uwa Papelapela u watalanda ivilinzile ukukucitikila musambazi wane. 25 Ulazingwa ukufuma umu yantu nu kuyaikala pamwi ni nyama umu mpanga, nupya ulaalya isote wa ng’ombe; ulaomba nu lumi lwa mwi yulu, nupya palapita insita 7 kufikila lino ulamanya ukuti Uwa Papelapela aali Kateeka umu wene wa yantu nupya angaupeela kuli wensi wino akulonda.
26 “‘Lelo pa mulandu wakuti yalanzile ukuti icisinte ni misisi visyale, uwene uliza uye uwako nupya lino ulamanya ukuti kuli umwi aakuteeka umwi yulu. 27 Fwandi we mwene, si uvwa vino nkukupanda mano. Ute ukuyembuka nu kutandika ukucita ivisuma, nupya ute ukucita iviipe vino ukacita lelo uwaya nu luse uku yapiina. Limwi lyene ulatwalilila ukuipakizya umi pa manda aingi.’”
28 Vii vyonsi vyacitikile Umwene Nebukadineza.
29 Lino papisile imyezi 12 wapitanga api paala li sano umu Babiloni. 30 Umwene walandanga ati: “Uzye wii asi Babiloni Mukalamba wino nakuula ukuomvya amaka yane kuti aye incende yane umwa kwikala na pakuti aalangizya ukulu wane?”
31 Lino umwene acili akulanda, izwi lyuvwisile ukufuma ukwi yulu iliti: “Uvwa kuno Mwene Nebukadineza, ‘Uwene wako iupokwa, 32 nupya umazingwa ukufuma umu yantu. Umaikalanga ni nyama umu mpanga nu kulya isote wa ng’ombe, ni nsita 7 zilapita ala uli vivyo kwene kufikila lino ulamanya ukuti Uwa Papelapela aali Kateeka umu wene wa yantu nupya akaupeela kuli wensi wino akulonda.’”
33 Pa nsita iiya amazwi aalanzilwe pali Nebukadineza yafikiliziwe. Wazinzilwe ukufuma umu yantu ayatandika ukulya isote wa ng’ombe, nu mwili wakwe waomvile nu lumi lwa mwi yulu, nupya inyele zyakwe zyakuzile wa mavumbu yakwe lyang’anda ni ngala zyakwe wa ngala zya cunyi.
34 “Pa mpela ya nsita iiya, nene ne Nebukadineza nalingamiile umwi yulu na mano yane yawezile; nupya nalumbanyizye Uwa Papelapela, nalumbanyizye uwayako manda pe nu kumucindika, pano ukateeka wakwe u wa manda pe nu wene wakwe wayako umu nkulo zyonsi. 35 Antu yonsi aaya muno nsi aasile sile ngu kuyalinganya kuli Leza, nupya akacita vino akulonda uku yasilika yakwe amwi yulu nu ku yantu ya pano nsi. Nupya kusi angamulesya ukucita vino akulonda nanti ukumuzya ati, ‘I vyani vino watucita?’
36 “Pa nsita kwene iiya amano yane yawezile nu ucindami wa wene wane, ukulu wane nu kucindama kwane; aomvi yane na antu yane acindame yatandike ukunguzya pa vintu, yanswilizye pa wene, nupya nacindikwe ukucilapo.
37 “Ne Nebukadineza nkulumbanya, nkucindika nu kupeela ululumbi uku Mwene wa mwi yulu, pano vyonsi vino wacita i vya cumi, nupya waya nu mulinganya, akazewanya yonsi aaya ni cilumba.”