Ezekeli
21 Nupya kwene Yeova wanenyile ati: 2 “We mwana wa muntu, lozya icinso cako uku Yelusalemu nu kumanyisya ivilacitikila incende zya muzilo, nupya sesemela impanga ya Izlaeli. 3 Nena impanga ya Izlaeli uti, ‘Yeova walanda wati: “Inja umulwani wako, ndafumya ulupanga lwane umu cipata nu kukomola antu alungame na aipe aakaikala muli wewe. 4 Pa mulandu wakuti ndakoma antu alungame na aipe aakaikala muli wewe, ulupanga lwane lulasomolwa muno lukaikala nu kukoma antu yonsi, ukufuma uku kaeya nu kufika uku katutu. 5 Antu yonsi yalamanya ukuti nene ne Yeova, insomola ulupanga umu cipata. Lutalaswilila umu cipata nupya.”’
6 “We mwana wa muntu, futeekanga ala ukuzakaza, ee futeekanga sana pa nkoleelo yao. 7 Nupya nga yakuzya yati, ‘U mulandu ci uno ukufuteeka?’ uyanene uti, ‘A pa mulandu ni lyasi ilikwiza.’ Pano umu cumi kwene liliza, ni myenzo yonsi ilasunguluka pa mulandu ni ntete, na makasa yonsi yalasila maka nupya antu yonsi yaluvwa ulanda, yalaaitundila pa mulandu ni ntete. ‘I cumi kwene ivintu vino muvwa vilacitika,’ avino Yeova Umwene wa Papelapela walanda.”
8 Nupya kwene Yeova wanenyile ati: 9 “We mwana wa muntu, sesema nu kulanda uti, ‘Yeova walanda wati: “Landa uti, ‘Lupanga! Lupanga ilunyolwa nupya lukuyengesa. 10 Ilunyolwa pakuti lukome antu aingi; lukuyengesa wa kumyantula kwa nkuwa.’”’”
“Uzye tutalinzile ukusansamuka?”
“‘Lulaputula intuwa ya mwanane, wakwe vino lukaputula umuti uli onsi.
11 “‘Ilupeelwa kuli umwi pakuti alukuze lwayengesa na pakuti luomviwe. Lupanga luu lwanyolwa nupya lukuyengesa pakuti lupeelwe kuli wino alaluomvya ukukomelako antu.
12 “‘We mwana wa muntu loosya nu kupunda, pano ulupanga ilwiza pa yantu yane; ilwiza pa ntunguluzi zyonsi izya mu Izlaeli. Antu yaa yalakomwa uku lupanga pamwi na antu yane. Langa ukuti uli sana nu ulanda. 13 Pano antu yane iyaceecetwa, nupya i cani cilacitika lino ulupanga lulaputula intuwa? Intuwa ilalowa,’ avino Yeova Umwene wa Papelapela walanda.
14 “We mwana wa muntu, sesema nu kutoota nupya ulande pa miku itatu uti ‘Ulupanga!’ Ulupanga ulukakoma antu aingi, u lwayazinguluka. 15 Imyenzo yao ilasunguluka pa mulandu ni ntete nupya antu aingi yalakomwa pa mpongolo zya musumba; ndakoma antu ukuomvya ulupanga. Ee, lupanga lukamyantula wa nkuwa nupya lukayengesa pakuti lungaomviwa uku kukoma antu! 16 We lupanga koma ukwi lunji! Na kuli cimani! Yanga konsi kuno yakutwala! 17 Nani kwene ndatoota nu kumala icipyu cane. Nene ne Yeova indanda.”
18 Nupya kwene Yeova wanenyile ati: 19 “Naawe we mwana wa muntu, ulembe inzila ziili zino ulupanga lwa mwene uwa ku Babiloni lulizilamo. Inzila zyoili zilinzile ukufumilila umu mpanga ili imwi, nupya uwike icimanyililo pano umuseo uwaya umu misumba iili wapatukanila. 20 Ulinzile ukwika icimanyililo icikulanga inzila ino ulupanga ululiza pali Laba uwa Ina Amoni lulapita, ni cikulanga inzila ino ulupanga ululiza pa musumba ucingililwe uwa Yelusalemu uwa mu Yuda lulapita. 21 Pano umwene uwa ku Babiloni alimilila pano inzila ziili zyapatukanila, pakuti asapoole. Alasunkaanya inceto. Aluzya uku vilubi vyakwe;* alaceeceta itima. 22 Ica kusapoolelako cakwe icilaya ukwi kasa lyakwe ilya kwi lunji cilalangilila ukuti alinzile ukuya uku Yelusalemu, ukwika ivyanzo ivya kononelako, kulanda ukuti kuye ukonona, kupunda ukupunda ukwa mu ulwi, ukwika ivyanzo vya kononelako impongolo, ukwika ivya kuzanzilako, nu kukuula ilinga. 23 Lelo aalafile imilapo kuli aliyo* yalalola kwati ukusapoola kuko ukwa ufi. Lelo aliusya* iviipe vino yacisile nupya alayalema.
24 “Fwandi Yeova Umwene wa Papelapela walanda wati: ‘Imulenga ukuti imembu zinu ziusiwe ukupitila umu kuleka vino mukaluvyanya vimanyikwe ni membu zinu kulolekela muli vyonsi vino mukacita. Vino lyene imwiusiwa, mulasendwa uku maka.’
25 “Lelo uwanda watiukwizila we ntunguluzi iipe iya mu Izlaeli wemuno uli umupiipi nu kufwa, insita yako iya kufululwa yatifika. 26 Yeova Umwene wa Papelapela walanda wati: ‘Zula icitambala ni cisote cako ica wene. Vintu vitalatwalilila ukuya icili cimwi. Cindamika umusuulwe, nu kuleka umucindame aye umusuulwe. 27 Ndonona, ndonona, ndonona ukateeka. Nupya utalapeelwa uku muntu ali wensi, ukufikila lino uwakwata insambu aliza nupya ndaupeela kuli aliwe.’
28 “Naawe we mwana wa muntu, sesema uti, ‘Vii avino Yeova Umwene wa Papelapela walanda pa Ina Amoni na pa miponto yao.’ Uti, ‘Lupanga! Lupanga ilwiza umu kukoma antu; lukuyengesa nupya lukumyantula wa nkuwa. 29 Asi mulandu ni vilolwa ivya ufi, na vino yasapoozile ivya ufi pali wewe, antu yako yalakolonganikwa pamwi ni vitumbi vya yantu aalakomwa, kuli kuti antu aipe yano uwanda wao uwa kufululwa iufika. 30 Swilizya ulupanga umu cipata. Ndakupingwila umu mpanga ino wapangiilwemo, kuli kuti impanga ino wafumileko. 31 Ndaleta ukali wane pali wewe. Ndaleta umoto uwa ukali wane pali wewe, nu kukupeela uku yantu aankalwe aamanyikisya ivya konona. 32 Ulaya inkwi zya kupembela umoto; uwazi ulazwila umu mpanga, nupya utaliusiwa, pano nene ne Yeova indanda.’”