Ibuku Lyakwe Ciili Lyakwe Samweli
5 Umu kuya kwa nsita, imitundu yonsi ya Ina Izlaeli yaile kuli Devedi ku Hebuloni nu kumunena iti: “Swemo sweswe ina yako. 2 Umu manda ya ku cisila lino Saulo watuteekanga, wewe watungululanga Aina Izlaeli mu ulwi. Nupya Yeova wakunenyile ati: ‘Ulacema antu yane Aina Izlaeli nupya wewe ulaya intunguluzi yao.’” 3 Fwandi akalamba yonsi amu Izlaeli yaile uku mwene ku Hebuloni, nupya Umwene Devedi wapangine nayo upangano umu Hebuloni pa nkoleelo yakwe Yeova. Lyene yamwitulwilile mafuta pa mutwe pakuti aye umwene wa Ina Izlaeli.
4 Devedi wali ni myaka 30 lino watandike ukuteeka, nupya wateesile pa myaka 40. 5 Mu Hebuloni wateesile Ayuda pa myaka 7 ni myezi 6 nupya umu Yelusalemu wateesile Aina Izlaeli yonsi na Ayuda pa myaka 33. 6 Nupya umwene na antu yakwe yaile umu kuzanza Aina Yebusi aikalanga umu Yelusalemu. Yatumfyanga Devedi iyati: “Utalatala uwize kuno! Impafu na alemale nayo kwene yalakuzinga.” Yelenganyanga ukuti, ‘Devedi atalatala apoke umusumba.’ 7 Lelo Devedi waposile umusumba ucingililwe ni linga uwa Zioni, uno ndakai ukaamwa ukuti Musumba Wakwe Devedi. 8 Fwandi pa wanda uuwa Devedi walanzile ati: “Yonsi aakuya umu kuzanza Aina Yebusi yalinzile ukupita umukapita manzi nu kuyakoma ‘alemale ni mpafu’ yano napata!” Ali mulandu uno cikalandilwa ukuti: “Impafu na alemale yatalatala ingile umu ng’anda.” 9 Lyene Devedi watandike ukwikala umu musumba ucingililwe, nupya watandike ukwamwa* ukuti Musumba Wakwe Devedi; watandike ukukuula ukufuma pa Mulundu* kuya umukasi. 10 Fwandi Devedi wakwatilangako maka, nupya Yeova Leza wa maumba wali nawe.
11 Umwene Hilamu wa ku Tuli watumile antu kuli Devedi, nupya watumile ni mbao zya mikedali na ya kaputula ya mawe ya kukuulila iviumba. Nupya yatandike ukukuulila Devedi ing’anda.* 12 Nupya Devedi wamanyile ukuti Yeova u walenzile ukuti aye umwene wa Ina Izlaeli nu kuti u walenzile uwene wakwe ukulumbuka pa mulandu na antu yakwe Aina Izlaeli.
13 Lino Devedi wafumile uku Hebuloni aya uku Yelusalemu, waile akwata ya mama ya pa mbali aingi na aci nupya wakweti na ana aonsi aingi na akazyana. 14 Ana yano Devedi wakweti umu Yelusalemu aeya: Syamua, Syobabu, Natani, Solomoni, 15 Ibaala, Elisyua, Nefegi, Yafiya, 16 Elisyama, Eliyada, na Elifeleti.
17 Lino Aina Filisti yuvwile ukuti Devedi watasontwa ukuya umwene wa Ina Izlaeli, Aina Filisti yonsi yaile umu kumulonda. Lino Devedi uvwile vivyo, waile afisama uku ncende ya kufisamako. 18 Lyene Aina Filisti yaile nu kusalanganila umu Mukonko wa Ina Lefa. 19 Devedi uzizye kuli Yeova ati: “Uzye inje umu kulwisya Aina Filisti? Uzye umayapeela kuli nene?” Lyene Yeova waswike Devedi ati: “Yanga, pano nimapeela Aina Filisti kuli wewe.” 20 Fwandi Devedi waile uku Baali-pelazimu, nupya kuuku kwene akuno waile akomela Aina Filisti. Nupya walanzile ati: “Yeova watacimvya alwani yane pa nkoleelo yane wakwe vino manzi yakaponya iciumba.” Aali mulandu uno watemiile incende iiyo ati Baali-pelazimu. 21 Aina Filisti yasile ivilubi vyao kuuku kwene, nupya Devedi na antu yakwe yavisenzile.
22 Lino papisile insita, nupya kwene Aina Filisti yawezile nu kusalanganila umu Mukonko wa Ina Lefa. 23 Devedi uzizye Yeova, lelo waswike ati: “Utayalungama. Uye ukwi tundu lyao nu kuyalwisizya pa nkoleelo ya miti ya baka. 24 Nupya ndi cakuti uvwa icongo papela ya miti ya baka kwati antu aakupita, ucitepo vimwi zuwa zuwa pano ala Yeova watakukoleelela uku kukoma asilika ya Ina Filisti.” 25 Fwandi Devedi wacisile viivi kwene vino Yeova wamunenyile, wakomile Aina Filisti kutandikila uku Geba ukufika uku Gezeli.