Milimo ya Atumwa
21 Pa cisila ca kupaatukana nayo nanti cakuti citaangupiile, twakwezile uwato itulungama uku Kosi nupya uwanda uwalondelilepo twaile uku Lode, lino twafumile kuuku, twaile uku Patala. 2 Lino twazanyile uwato uwayanga uku Fonisya, twakwezile nu kupita. 3 Lino twaweni icilila ca Kupulo, twacisiile kuli cimani nu kupitilila uku Silya, nupya twaile itwimilila pa Tuli pano uwato walongololanga iviya. 4 Twaile itulonda asambi nu kuyazana nupya twikazile kuuku kwene amanda 7. Lelo asambi yanenyile Paulo ukuti ataya uku Yelusalemu pano ali vino umupasi wa muzilo wayanenyile. 5 Fwandi lino insita yasizile, twafumileko nu kutandika ulwendo, lelo yonsi kumwi na anaci na ana yatusukilile suka iyatufisya ukunzi ya musumba. Nupya lino twafukime mu nkumba yakwe yemba, twapefile 6 nu kupakasyanya. Lyene twakwezile uwato, nayo yaswilile ukumwao.
7 Ulwendo lwitu ulwa pali yemba lwasizile lino twafumile uku Tuli nu kuyafika uku Putolemai, nupya twalamwike aina nu kwikala nayo uwanda onga. 8 Uwanda uwalondelilepo twafumileko nu kuya uku Kesaliya, nupya twaile itwingila umu ng’anda yakwe Filipi kasimikila, uwali pa yonsi 7 atailwe, nupya twikazile nawe. 9 Umonsi wii wakweti ana akazyana 4 yano yataali atwalwe* asesemanga. 10 Nomba lino twikazile kuuku amanda aingi, kasesema uwi zina lyakuti Agabasi wizile ukufuma uku Yudeya. 11 Lyene wizile kuli sweswe nu kutola umusipi wakwe Paulo alino ainyepa makulu na makasa nu kulanda ati: “Umupasi wa muzilo ukulanda ukuti, ‘Vikwene avino yalanyepa umwineco wa musipi uu uku Yayuda umu Yelusalemu, nupya yalamupeela uku yantu amu nko.’” 12 Lyene lino tuvwile vivyo, swemo na yonsi aalipo twatandike ukumupaapata ukuti ataya uku Yelusalemu. 13 Lyene Paulo wayuzizye ati: “U mulandu ci uno mukulilila nu kwezya ukuntoovola? Injipekanya ukunyepwa alino nu kufwila umu Yelusalemu pa mulandu ni zina lya Mwene Yesu.” 14 Lino twafizilwe ukumutonsya, twatiile ukumukanya nupya twalanzile ituti: “Lekini ukulonda kwakwe Yeova kucitike.”
15 Lyene pa cisila ca manda yaa, twapekanyizye ulendo nu kuya uku Yelusalemu. 16 Twapisile na asambi yamwi ukufuma uku Kesaliya nupya yatutwazile kuli Manasoni uwa ku Kupulo umusambi wa kutandikilako wino twaile itwikala uku ng’anda ukwakwe. 17 Lino twafisile uku Yelusalemu, aina yatupokelile ni nsansa. 18 Lelo pa wanda uwalondelilepo Paulo naswe twingile umu ng’anda yakwe Yakobo, nupya mwali na ya eluda yonsi. 19 Nupya wayalamwike nu kutandika ukuyalondolwela ivintu vino Leza wacisile uku yantu ya mu nko ukupitila umu mulimo uno waombanga.
20 Lino yuvwile vivyo, yatandike ukulumbanya Leza, lelo yanenyile Paulo iyati: “Mwina witu, watulola Ayuda uwingi atiyataila nupya yonsi yakulondela sana Masunde. 21 Lelo iyuvwa pali wewe ukuti ukusambilizya Ayuda yonsi aakaikala na antu amu nko ukuti yasangukila Masunde yakwe Mose, ukuyanena ukuti yataazembulula ana yao nanti ukulondela intambi. 22 Nga fwandi lyene tumacita uli? Pano nanti ciye uli yamauvwa ukuti watuwiza. 23 Fwandi cita vii vino tumakunena: Tukweti aonsi 4 atiyalapa umulapo. 24 Senda aonsi yaa mukaisangulule kulingana nu lutambi nupya ukayalipilile ivikulondekwa, pakuti yapele inyele uku mitwe yao. Lyene yonsi yalamanya ukuti vino yuvwile pali wewe visi vya cumi, lelo yalamanya ukuti waya ni miyele isuma nupya ukalondela Masunde. 25 Lelo antu amu nko aataila, twayatumila makalata ukuyanena vino twapingula ukuti yalinzile ukutaluka ku vintu ivyapeelwa uku tulubi, kutaluka uku wazi, ku vititilwe, alino nu ku uzelele.”*
26 Lyene Paulo wasenzile aonsi uwanda uwalondelilepo nu kuya isangulula ukulingana nu lutambi, nupya wingile umwi tempele mu kulanda manda yakumalilapo ukuisangulula ukulingana nu lutambi alino nu kulanda ilambo lino cila muntu walinzile ukupeela.
27 Lyene lino amanda 7 yali umupiipi nu kusila, Ayuda afumile uku Asia lino yaweni Paulo wingila umwi tempele, yatunsile iumba lyonsi kuti limukatukile, nupya yamulemile, 28 ala yakupunda yakuti: “Mwe ina Izlaeli twavwini! Wii ali muntu aakasambilizya antu yonsi umu ncende zyonsi ukusangukila antu itu na masunde itu ni cifulo cii. Ni cipisye i cakuti wataleta Agiliki umwi tempele nupya watakowezya icifulo cii ca muzilo.” 29 Pano yaweni Tulofimo uwa ku Efeso umu musumba ala ali na Paulo, nupya yelenginye ukuti Paulo watamuleta umwi tempele. 30 Umu musumba onsi mwali icimvulunganya nupya antu yasimwile iyaya iyalema Paulo nu kumutintila ukunzi yi tempele, nupya lilyo kwene ivisaasa vyayazilwe. 31 Nupya lino yalondanga ukukoma Paulo, amazwi yafisile uku mukalamba wa yasilika akuti umu Yelusalemu muli cimvulunganya; 32 nupya lilyo kwene wasenzile asilika na akalamba ya yasilika nu kusimula ukuya kuli aliyo. Lino antu yaweni umukalamba wa yasilika na asilika, yatiile ukuma Paulo.
33 Lyene umukalamba wa yasilika wapalime nu kulema Paulo nupya wanenyile antu ukuti yamunyepe na maceni yaili; lyene watandike ukuzya ati: ‘Uzye wii a weni? I cani cino watacita?’ 34 Lelo yamwi umwi umba yapundanga ivipusanepusane. Fwandi vino wafizilwe ukuvwa ningo icikulandwapo pa mulandu ni cimvulunganya, walanzile ukuti yatwale Paulo ukwikalanga asilika. 35 Lelo lino Paulo wafisile apa masitepu pano antu yakwelelanga pa kuya pano asilika ikalanga, asilika yamunyemwile pa mulandu nu unkalwe wi umba, 36 pano antu yatwalilile ukulondela ala yakupunda yakuti: “Mukomini!”
37 Lino wali umupiipi nu kufika ukwikalanga asilika, Paulo uzizye umukalamba wa yasilika ati: “Uzye unganzumilizya ukukunenako vimwi?” Nawe wamuzizye ati: “Uzye ungalanda Icigiliki? 38 Uzye asi wewe mwina Ejipti wino pa nsita imwi wakatukiile uteeko nu kutungulula aonsi 4,000 aali ni vyanzo umu lwanga?” 39 Lyene Paulo waswike ati nene Muyuda, uwa ku Tasi umu Kilikiya, umwikazi wa mu musumba ucindame. Fwandi nkukulenga ukuti unzumilizye ukulanda uku yantu.” 40 Lino wamuzumilizye, Paulo wimilile pa masitepu nupya walesizye antu icongo ukuomvya ikasa. Lino antu yatiile ukupanga icongo, wayanenyile umu Ciebele ati: