Ezaya
25 We Yeova, wewe Leza wane.
Nkukucindika nu kulumbanya izina lyako,
Pa mulandu wakuti wacita ivintu ivisuma,
Vintu vino walavile mpiti,
Wafikilizye mazwi yako nu kulangilila ukuti wewe wa cumi.
2 Walenga umusumba ukuya umutumba wa mawe,
Nu musumba ucingililwe ononwa.
Musumba wa yantu ya ku mpanga yuze ononwa;
Nupya utalatala ukuulwe cipya cipya.
3 Ali mulandu uno antu aamaka yalakucindikila;
Musumba wa nko izyaya nu unkalwe ulaya ni ntete pa mulandu wako.
4 Antu aasuulwe yakuutukila kuli wewe,
Apiina yakwiza kuli wewe lino yali ni ntazi,
Watuya umwa kuuwa imvula iipisye,
Watuya icisaao ukufuma uku cikaye ica kwi lanzi.
Ukayacingilila lino ukali wa nko izya yankalwe uli wa mvula iipisye iikutoonyela uku ciumba,
5 Na lino ukali wao uli wa cikaye,
Ukalesya icongo ica yalwani yako.
Wakwe vino icinzingwa ci kumbi cikafumyako icikaye,
Avino nu lwimbo lwa yantu ya mu nko aaya nu unkalwe lukasila.
6 Mu mwamba uu amuno Yeova wa maumba alapangila antu yonsi
Umutebeto wa vyakulya ivilyompe,
Mutebeto wakwe waini,
Mutebeto wa vyakulya ivisuma apali ni mimfyompo,
Nu mutebeto wakwe waini umusuma nupya umwengululwe.
7 Pa mwamba kwene uu apano alafumya icisalu icavimba antu yonsi
Ni cisalu icipikule icavimba inko zyonsi.
8 Alamila* imfwa manda pe,
Nupya Yeova Umwene Uwa Papelapela alakumbula aminsozi uku yantu yonsi.
Alafumya umuzewanya pa yantu yakwe umu nsi yonsi,
Pano avino Yeova umwineco watalanda.
9 Mu wanda uuwa yalalanda yati:
“Wii ali Leza witu!
Twataila muli aliwe,
Nupya alatupususya.
Wii a Yeova!
Twataila muli aliwe.
Lekini tusansamuke nu kuzanga pali vino amatupususya.”
10 Ikasa lyakwe Yeova lilikala pa mwamba kwene uu,
Nupya Moabu alalyatolelwa pa ncende yakwe
Wakwe vino isote likalyatolwa pa mutumba wakwe citindi.
11 Alakonzolola makasa yakwe nu kuuma Moabu
Wakwe vino aakowa akauma pa manzi ukuomvya makasa,
Alamala icilumba cakwe
Kupitila umu kuomvya ningo makasa yakwe.
12 Nupya we Moabu alonona umusumba wako ucingililwe,
Nupya uwa malinga atali;
Alauwongolola suka apansi.