Mpendwa

31 Lyene Yeova wanenyile Mose ati: 2 “Landwila Aina Izlaeli pali vino Aina Midyani yayacisile. Lyene pa cisila ulafwa nu kuzikwa wa vikolwe vyako.”

3 Fwandi Mose wanenyile antu ati: “Peelini aonsi ivyanzo akuya umu kulwisya Aina Midyani nu kuleta icilanduzi cakwe Yeova pali aliyo. 4 Mutume asilika 1,000 ukufuma muli cila mutundu wa Ina Izlaeli.” 5 Fwandi ukufuma pa Ina Izlaeli aali aingi, yasoolwile asilika 1,000 ukufuma muli cila mutundu, yonsi pamwi aipekinye ukuya umu ulwi yaali 12,000.

6 Lyene Mose watumile ukufuma muli cila mutundu asilika 1,000, pamwi na Finiasi mwana Elieza simapepo uwasenzile iviya vya muzilo na mapenga ya mu ulwi. 7 Yaile iyalwa na Ina Midyani wakwe vino Yeova wanenyile Mose, nupya yakomile aonsi yonsi. 8 Kulunda pali yauze aakomilwe, yakomile na yamwene 5 aa Ina Midyani, kuli kuti Evi, Lekemu, Zuli, Huli na Leba, yakomile na Balamu mwana Beoli uku lupanga. 9 Lelo Aina Izlaeli yasenzile anaci na ana ya Ina Midyani umu uzya. Yasenzile ni viteekwa vya Ina Midyani vyonsi alino ni vintu vyonsi vino yaakweti. 10 Yosile imisumba yao yonsi ino ikalangamo kumwi ni nkambi zyao izyacingililwa na malinga. 11 Yasenzile ivintu vyonsi, antu kumwi ni nyama. 12 Lyene yatwazile azya ni vintu vino yapokolwile umu ulwi kuli Mose na Elieza simapepo nu ku Ina Izlaeli yonsi, kuli kuti ku nkambi iyayelile mu lwanga lwa Moabu umupiipi nu Luzi Lwa Yodani incende iyalozyanya na Yeliko.

13 Lyene Mose na Elieza simapepo kumwi ni ntunguluzi zyonsi, yaile umu kuyakomenkanya ukunzi ya nkambi. 14 Lelo Mose wasokiile sana asilika ni ntunguluzi izyatungululanga antu masauzandi alino ni ntunguluzi izyatungululanga maumba umuli antu 100 aawezile ukufuma uku ulwi. 15 Mose wayuzizye ati: “U mulandu ci uno mwalekela anaci yaa yonsi ukuya nu umi? 16 Lolini yakwene ayano Balamu waomvizye ku kutunka Aina Izlaeli ukupondokela Yeova lino yapefile leza wa ku Peoli, icakuti icinkunka cizile pa yantu yakwe Yeova. 17 Fwandi mulinzile ukukoma umwana wensi umonsi nu mwanaci wensi uwalaalapo nu monsi. 18 Lelo mulinzile ukusya akazyana yonsi aatalaalapo nu monsi. 19 Nupya mulinzile ukuyaikala ukunzi ya nkambi pa manda 7. Umuntu wensi muli mwemwe uwakomile umwi na wensi uwakumizye uku citumbi alinzile ukuisangulula pa wanda wakwe citatu na pa wanda uwalenga 7, kuli kuti mwemwe na yano mwasenzile umu uzya. 20 Mulinzile nu kusangulula ivyakuzwala vyonsi uku luyembu kumwi ni vintu ivyapangilwa ni mpapa, na vyonsi ivyapangilwa na mavumbu ya mbuzi alino ni viya vyonsi ivyapangilwa ni mbao.”

21 Lyene Elieza simapepo wanenyile asilika aile umu ulwi ati: “Isunde lino Yeova wapeezile Mose i lyakuti, 22 ‘Goldi sile na siuva na koopa, ivyela ni mitovwe, 23 kuli kuti consi icingengululwa nu moto, mulinzile ukucipisya umu moto, nupya cilaya icisanguluke. Lelo mulinzile nu kucisangulula umu manzi ya kusangulwilako. Consi icitanga cengululwe nu moto, mulinzile ukucipisya umu manzi. 24 Nupya mulinzile ukufula ivyakuzwala vinu pa wanda uwalenga 7 nu kuya aasanguluke, lyene alino mungiza umu nkambi.’”

25 Lyene Yeova wanenyile Mose ati: 26 “Penda ivintu ivyaposilwe umu ulwi, upende na antu aasenzilwe umu uzya pamwi ni nyama; uombele pamwi na Elieza simapepo alino ni ntunguluzi zya mitundu ya Ina Izlaeli. 27 Uwankanye paili ivintu ivyaposilwe umu ulwi, vimwi vilapeelwa kuli yano yaile uku ulwi alino vyuze navyo ku Ina Izlaeli yonsi. 28 Ulinzile ukutola ivya kupeela kuli Yeova kufuma pali vino asilika aile uku ulwi iyapeelwa, ufwile ukutola umuntu wenga ukufuma pa yantu 500, vivyo kwene avino ufwile ukucita nu ku ng’ombe kuli ya punda nu ku mfwele ni mbuzi. 29 Ulinzile ukutola ukufuma pali afu wao nu kupeela kuli Elieza simapepo ukuya umusangulo kuli Yeova. 30 Kufuma pali afu uwatapeelwa ku Ina Izlaeli, ulinzile ukutola umuntu wenga pa yantu 50 nu kupeela Aina Levi aakaomba imilimo ya pa cikuulwa ca muzilo cakwe Yeova, vivyo kwene avino ufwile ukucita nu ku ng’ombe, kuli ya punda, ku mfwele ni mbuzi alino nu ku viteekwa vyonsi.”

31 Fwandi Mose na Elieza simapepo yacisile viivi kwene vino Yeova wanenyile Mose. 32 Vyonsi vino aile umu ulwi yaposile aevi: imfwele ni mbuzi zyali 675,000, 33 ing’ombe zyali 72,000 34 na ya punda yali 61,000. 35 Anaci ataatazile yalaalepo nu monsi yaali 32,000. 36 Pali afu wa vintu vino aile umu ulwi yapeezilwe paali imfwele ni mbuzi 337,500. 37 Imfwele ni mbuzi izyapeezilwe kuli Yeova zyali 675. 38 Nupya paali ing’ombe 36,000, izyapeezilwe kuli Yeova zyali 72. 39 Paali na ya punda 30,500, nupya aapeezilwe kuli Yeova yaali 61. 40 Antu nayo yaali 16,000, aapeezilwe kuli Yeova yaali 32. 41 Lyene Mose wapeezile Elieza simapepo ivyapeezilwe kuli Yeova, wakwe vino Yeova wamunenyile.

42 Pali afu wa vintu ivyapeezilwe uku Ina Izlaeli, vino Mose wankiinye ukufuma pali vino aile umu kulwa yaali navyo, 43 paali imfwele ni mbuzi 337,500, 44 paali ni ng’ombe 36,000 45 na ya punda 30,500, 46 alino na antu 16,000. 47 Lyene ukufuma pali afu wa vintu ivyapeezilwe uku Ina Izlaeli, Mose watozile umuntu wenga pa yantu 50 nu kupeela Aina Levi aaombanga imilimo ya pa cikuulwa ca muzilo cakwe Yeova, vikwene avino wacisile nu ku nyama wakwe vino Yeova wamunenyile.

48 Lyene aonsi aasonsilwe aali pa yasilika masauzandi, yaile kuli Mose kumwi ni ntunguluzi izyangalilanga antu masauzandi alino ni ntunguluzi izyatungululanga maumba umuli antu 100, 49 yamunenyile iyati: “Aomvi yako iyapenda asilika yano tukwangalila, nupya pataponzile nanti a wenga. 50 Fwandi katupeele kuli Yeova vino twazanyile, kuli kuti iviya vyakwe goldi, maceni ya kuzwala ku makulu, vibango, imbalaminwe zya kufwatikilako, maelena ni viyembelo vyuze, pakuti tuifuutile imembu zitu kuli Yeova.”

51 Lyene Mose na Elieza simapepo yaposile goldi kuli aliyo ni viyembelo vyonsi. 52 Goldi wensi wino intunguluzi izyatungululanga antu masauzandi ni ntunguluzi izyatungululanga maumba umuli antu 100 zyasangwile kuli Yeova wali masyekele* 16,750. 53 Umusilika wenga na wenga, watozilepo ivintu vimwi pali vino yaposile umu ulwi. 54 Mose na Elieza yaposile goldi ukufuma uku ntunguluzi izyatungululanga antu masauzandi ni ntunguluzi izyatungululanga maumba umuli antu 100 nu kutwala umwi tenti lya kupepelapo pakuti aye iciusizyo ku Ina Izlaeli pali vino Yeova wayacitiile.