Ezaya
28 Kalanda uku cisote* icisuma cakwe ya cakolwa ya mu Efulemu,
Cisote cico caya wi luwa ilikuuma,
Cino umusumba uwaya papela ya mukonko uvunde wazwala muno antu aakoleka waini yakaikala!
2 Yeova ali na umwi umukome nupya uwa maka.
Alacisumba na maka pansi wa mvula ya mawe iikupangalakansya,
Kuli kuti cimuza icikaonona,
Na wakwe mulamba umwingi sana uwatauwa.
3 Visote ivisuma vyakwe ya cakolwa ya ku Efulemu
Vilalyatolwa.
4 Nupya iluwa ilikuuma ilikayemvya icisote cico,
Icaya pa musumba uwaya papela ya mukonko uvunde,
Lilaya wa masamvu aakutandikilako aakayako lino icisanya citatala catandika.
Lino umwi wayalola sile akakulula nu kulya zuwa zuwa.
5 Mu wanda uuwa, Yeova wa maumba alaya wa cisote icicindame nupya wa ciyembelo ca ku mutwe icisuma kuli yano yalasyalako pa yantu yakwe. 6 Nupya alalenga aakupingula ukuya nu mulinganya nu kupeela maka kuli yayo aakucingilila impongolo uku yalwani.
7 Ya simapepo na ya kasesema yakaluvyanya pa mulandu na waini;
Uwengwa uno yakamwa ukaleenga yapempezyoka.
Yakaluvyanya pa mulandu nu wengwa;
Nupya waini akayavulunganya,
Yakapempezyoka pa mulandu nu wengwa;
Ivilolwa vino yakalola vikayaponzya,
Nupya yakafilwa ukupingula ningo.
8 Pa matebo yao pazuula sile malusi
Kusi nanti apamwi apasyala.
9 Yakati a weni wino alapeela mano,
Nupya a weni wino alalondolwela mazwi yakwe?
Uzye uku yana aakuti yacisumuka,
Yano yacita sile ukukonka?
10 Pano wene umu milandile yakwe “a masunde yatupu, a masunde yatupu,
U musilwa pa musilwa, u musilwa pa musilwa,
Akacita nga walanda tunono paa nupya aiza alanda tunono.”
11 Leza alaomvya antu aakaomvya ululimi lwa ku mpanga yuze nupya ulutamanyikwa pa kulanda uku yantu yaa. 12 Ku cisila watazile ayanenapo ati: “Yii incende ya kupuuzilapo. Lekini atiyatonta yapuuze; yii incende ya kupuuzilapo,” lelo yatuuvwile. 13 Fwandi kuli aliyo amazwi yakwe Yeova yalaya kwati:
“A masunde yatupu, a masunde yatupu,
U musilwa pa musilwa, u musilwa pa musilwa,
Cilaya kwati akulanda tunono paa nupya aiza alanda tunono,”
Pakuti lino yakupita
Yace yapumike nu kuponela uku cisila,
Yalavunika nu kuitwala umu citeyo nupya yalalemya.
14 Fwandi uvwini amazwi yakwe Yeova mwemuno mwaya ni cilumba,
Mwemuno mukateeka antu ya mu Yelusalemu,
15 Mwemo mukalanda imuti:
“Twapangana upangano ni imfwa,
Nupya tukauvwana na Malindi.*
Lino mulamba aali nu mukuku aliza
Atalatuzana,
Pano tukafisama umu ufi uno tukabepa,
Pano tukabepa pakuti tupusuke nupya ufi kwene aali ca kufisamamo citu.”
16 Fwandi Yeova Umwene wa Papelapela walanda wati:
“Nkwika iwe ilyeziwa mu mufula wa pa Zioni
Iwe lya pa koona ilya mutengo mu mufula ukome.
Kusi ali wensi uwaya nu utailo aalasakamikwa.
17 Nupya ndalenga umulinganya ukuya ica kupimilako
Nu ulungami ukuya ica kulinganyizizyako.
Imvula ya mawe ilonona muno aufi yakafisama,
Na manzi yalaunzya incende iya kufisamamo.
18 Upangano uno mwapangana ni imfwa ulasila,
Nupya mulata ukuvwana na Malindi.*
Lino mulamba wa mukuku aliza
Alamonona.
19 Lyonsi lino wiza,
Alaamusenda;
Pano alaapita cila katondo,
Nu musanya nu usiku.
Intete zitupu i zilalenga ukuti iluke vino yuvwile.”
20 Ya bedi yao aiipi icakuti yatanga yatambalale pa kulaala,
Nupya ivya kuvimbala vyao i vinono vitanga viyakumane.
21 Yeova alakatuka wakwe vino wacisile pa Mwamba wa Pelazimu;
Nupya alacita wakwe vino wacisile umu mukonko umupiipi nu ku Gibyoni,
Pakuti acite vino akulonda vino ataatala wacitapo,
Na pakuti aombe umulimo wakwe uno ataatala waombapo.
22 Fwandi mutaaseka,
Pakuti imyando ino mwanyepelwako itazutika sana,
Pano inuvwa uku Mwene wa Papelapela Yeova wa maumba,
Ukuti watapingula ukonona impanga yonsi.
23 Teini matwi nu kukutika ukwi zwi lyane;
Ikiniko mano nu kuvwa kuli vino akulanda.
24 Uzye aakulima na pulao, akatwalilila sile ukulima uwanda onsi ukwaula ukukomela?
Uzye akaikalila sile ukupumola nu kulinganya umusili?
25 Lino wamala ukulinganya umusili,
Uzye asita kumini mutifi nu kukomela kumini muze?
Uzye asita ingaano, malezi, na baale umu ncende muno vifwile ukuya
Nu kuta umusango uze uwa ngaano mu mbali ya calo?
26 Pano Leza akamusambizya vino alinzile ukuomba;
Nupya aliwe akamutungulula.
27 Pano kumini mutifi yasimupuula ukuomvya ica kupuulilako ica kutinta,
Ni teyala lyakwe wangoni yasilipisya pali kumini.
Lelo kumini mutifi yakamupuula ukuomvya mupuulilo,
Kumwi na kumini muze kwene.
28 Uzye umuntu akavungola ingaano lino akupuula?
Awe, asitwalilila sile ukupuula;
Nupya lino akupisya wangoni wino imfwalasi zyakwe zikutinta pa ngaano,
Asizivungola.
29 Mazwi yaa nayo kwene yafuma kuli Yeova wa maumba,
Wino ukulonda kwakwe u kusuma
Nupya wino vyonsi vino akacita vikatunguluka.