Danieli

11 “Mu mwaka wa kutandikilako uwa kuteeka kwakwe Dalyusi Umwina Medya, nakomelizye nu kwazwilizya Mikaeli. 2 Vino nimakunena i vya cumi:

“Ya mwene na yauze yatatu yalateeka umu Pesya, nu walenga 4 alakwata sana ivyuma ukucila yonsi. Nupya lino alakwata amaka pa mulandu ni vyuma vyakwe, alaomvya vyonsi uku kulwisizyako umwene wa ku Gilisi.

3 “Nupya kulakatuka umwene wa maka aalateeka na maka aingi, nupya alaacita vino akulonda. 4 Lelo lino alakatuka uwene wakwe ulononwa nupya ulankanyiziwa uku miza 4 iya mwi yulu, nomba uwene uwo utalapeelwa uku ya mu lupwa lwakwe nanti ukukwata amaka wakwe vino wali lino wateekanga; pano ulipulwa nu kupeelwa kuli yauze.

5 “Nupya umwene wa ku katutu, kuli kuti wenga pali ya cilolo yakwe alakwata amaka; lelo umuntu muze alamucimvya nupya alateeka na maka aingi ukucila wiyo akuteeka.

6 “Pa cisila ca myaka imwi yalapangana upangano, nupya umwana umukazyana uwa mwene wa ku kaeya alaya uku mwene wa ku katutu pakuti yakazumilizyanye. Lelo maka ya mwana wiyo umukazyana yalasila; nu mwene kwene alasila maka yonsi; lelo umwana umukazyana, aamuleesile nu wamuviile kumwi nu wamulenzile ukuya na maka pa nsita iiyo yalapeelwa kuli yauze. 7 Nupya umwi aalafuma umu lupwa lwa mukazyana alapyana umwene, alaya umu kulwisya asilika ni misumba ya malinga iya mwene wa ku katutu nupya alacimvya. 8 Alasenda na ya leza yao, vilubi vyao, viya vyakwe siuva na vyakwe goldi vino yatemwa na azya yao nu kuya uku Ijipti. Pa myaka imwi atalapalama uku mwene wa ku katutu, 9 umwene wa ku katutu alaya umu kulwisya umwene wa ku kaeya lelo alaswilila uku mpanga yakwe.

10 “Lelo ana yakwe yalaipekanya ukuya umu kulwa, nupya yalapanga iumba lya yasilika ilikalamba. Alafuma akucimvya wakwe mulamba. Lelo alaswilila nu kufuma akulwa ukufika nu ku misumba yakwe iya malinga.

11 “Nupya umwene wa ku kaeya alasoka sana nu kuya umu kumulwisya, kuli kuti ukulwisya umwene wa ku katutu; alakolonganika antu aingi, lelo antu yayo yalacimviwa uku mwene wiyo. 12 Nupya antu yayo yalasendwa. Lyene umwene alaya ni cilumba, nupya alakoma antu aingi sana; lelo atalaomvya icifulo cakwe ica maka.

13 “Umwene wa ku katutu alaswilila, nupya alakolonganika antu aingi ukucila yano wakolonganike pa kutandika; lyene lino palapita insita pa cisila ca myaka imwi aliza na asilika aingi ni vyuma ivingi. 14 Pa nsita iiya aingi yalakatukila umwene wa ku kaeya.

“Nupya antu ya unkalwe aaya umu yantu yako yalakonkelezya yauze pakuti yezye ukufikilizya usesemo; lelo yalafilwa.

15 “Umwene wa ku katutu aliza nu kupanga ivya kuzanzilako umusumba ucingililwe nupya alaupoka. Nupya asilika ya mwene wa ku kaeya na aonsi yakwe yano wasoolola yatalakwata maka ya kulwisizya aalayazanza. 16 Aaliza umu kumulwisya alacita vino watemwa nupya kusi aalamucimvya. Alimilila umu Mpanga Iyembe nupya alaya na maka ya konona antu. 17 Alalondesya ukwiza na asilika ya mu wene wakwe yonsi, lelo yalapangana upangano nu mwene wiyo nupya alacita vino akulonda. Lyene alazumiliziwa ukonona umwana wa yanaci umukazyana. Umwanaci alafilwa ukuzizimizya nupya atalatwalilila ukuya uwakwe. 18 Lyene alaswilila uku ncende zya mu mbali yakwe yemba nu kupoka incende izingi. Nupya umukalamba wa yasilika alafumyapo umuzewanya uwaya pali aliwe. Alaleka wiyo kwene aliwe azewane. 19 Lyene alaya uku misumba icingililwe iya mu mpanga yakwe, nupya alapumika nu kupona, atalatala aloleke nupya.

20 “Nupya kulaya umwene muze aalamupyana, alalenga umuntu uwa kupoka imisonko ukupita umu wene ucindame, lelo pa cisila ca manda yanono alafwa, nomba asi pa mulandu wakuti umwi alamucita iciipe nanti pa mulandu wakuti waile uku nkondo.

21 “Lyene umuntu wino antu yasuula aalamupyana, nupya atalapeelwa uwene wa maka; aliza umu nsita ino kulaya umutende* nupya alapoka uwene ukuomvya usomvi. 22 Alacimvya asilika aaya wa manzi aingi, nupya yalakomwa; wakwe vino Intunguluzi ya upangano ilakomwa. 23 Nupya pa mulandu nu upangano uno yalapangana nawe, alatwalilila ukuya nu ucenjezi nupya aliza aye na maka ukuomvya uluko ulunono. 24 Mu nsita ino kulaya umutende aliza umu citungu umwaya sana ivyuma, nupya alacita vino ya isi ni vikolwe vyao yataatazile yacitepo. Alayankanya ivintu vino alapokolola na vino alasenda; nupya alapangila incende izicingililwe, lelo alacita sile vivyo pa nsita inono.

25 “Alasipa nu kuomvya maka yakwe ukuya umu kulwisya umwene wa ku kaeya ale ali ni umba lya yasilika ilikalamba, nupya umwene wa ku kaeya alaipekanya ukulwa ale ali ni umba lya yasilika ya maka ilikalamba sana. Nupya pa mulandu wakuti yalamupangila* atalacimvya. 26 Antu aakalya ivyakulya vyakwe ivisuma aliyo yalamuletelela.

“Na asilika yakwe yalacimviwa, nupya aingi yalakomwa.

27 “Ya mwene yaa yaili yalaalondesya ukucita iviipe nupya yalikala pamwi ale yakubepana. Lelo vino yakulonda vitalacitika pano impela yao iliza pa nsita isoololwe.

28 “Lyene umwene wa ku katutu alaswilila uku mpanga yakwe ni vintu ivingi sana, nupya alaalondesya ukulwisya upangano wa muzilo. Alacita vino akulonda nu kuswilila uku mpanga yakwe.

29 “Pa nsita isoololwe alawela umu kulwisya umwene wa ku kaeya. Lelo pa nsita yii yene citalaya wakwe vino cali pa kutandika, 30 pano mawato ya ku Kitimu yaliza umu kumulwisya nupya alacefiwa.

“Alaswilila nu kuyafumizya icipyu cakwe pa upangano wa muzilo, nupya alakwanisya ukucita vivyo; alaswilila nu kuyatungilila aalasya upangano wa muzilo. 31 Nupya asilika yalafuma kuli aliwe nu kuyakowezya incende ya muzilo ni misumba icingililwe, nupya yalalesya malambo aakapeelwa lyonsi.

“Lyene yalikako ica winyi icikaleta uwononesi.

32 “Alaomvya mazwi ya ucenjezi nu kulenga antu aakatama upangano ukuya asangu. Lelo antu amanya Leza wao yalacimvya nupya yalatunguluka. 33 Antu aaya na mano yalalenga antu aingi ukulailuka. Nupya yalacuziwa uku lupanga, ku cimbilimbili ca moto, kusendwa umu uzya nu kupokololwa ivintu pa manda yamwi. 34 Lelo lino yalacula yalazwiwa panono; nupya aingi yalayatungilila lelo asi kutungilila kwa cumi. 35 Nupya aamano yamwi pali yayo yalacuziwa pakuti antu yace yeziwe nu kusangululwa nu kuswefiwa ukufika nu ku mpela; pano vili nu kucitika pa nsita isoololwe.

36 “Umwene alaacita vino akulonda, alaikuzya nu kuicindamika ukucila ya leza yonsi; alaalanda ni viipe pali Leza uwacila ya leza yonsi. Alatunguluka ukufika lino insita ya ukali wakwe Leza ilasila; pano vino Leza akalonda ukucita vilinzile ukucitika. 37 Atalacindika Leza wa vikolwe vyakwe; nanti ukwika amano kuli vino anaci yakalonda nanti ya leza yauze, lelo alaikuzya ukucila ali wensi. 38 Nupya alacindika leza wa nkondo; kuli kuti leza wino ivikolwe vyakwe vitaamanyile, nupya alamupeela goldi, siuva, mawe ya mutengo ni vintu ivicindame. 39 Alacimvya imisumba icingililwe sana ala akwazwiwa na leza wa ku mpanga yuze. Alacindamika antu aakamutungilila, nupya alaleka ukuti yateeke antu aingi; alankanya ni mpanga kuli wensi uwalipila.

40 “Mu nsita ya ku mpela umwene wa ku kaeya alaasunkana nawe* nupya umwene wa ku katutu alaya umu kumulwisya ale ali na maceleta, aonsi aakakwela pa mfwalasi na mawato aingi; alingila umu mpanga nu kupyela antu aingi kwati a mulamba. 41 Alingila nu mu mpanga Iyembe, nupya impanga izingi zilacimviwa. Lelo impanga izilapusuka aezi: impanga ya Edomu ni ya Moabu ni mpanga icindame iya Ina Amoni. 42 Alatwalilila ukuomvya maka yakwe pa kulwisya impanga; ni mpanga ya Ijipti italapusuka. 43 Alaasakamala ivyuma vyakwe goldi, vyakwe siuva ni vintu vyonsi ivicindame ivya mu Ijipti ivyafiswa. Nupya Aina Libya na Ina Etiopia yalamulondela.

44 “Lelo malyasi yano aluvwa ukufuma uku ufumondaka nu ku katutu yalamuvulunganya, nupya alapita ala watasoka kuti akonone nu kulovya antu aingi. 45 Nupya alapangila matenti yakwe aku wene pakasi kakwe yemba mukalamba nu mwamba wa muzilo uyembe, lino acili kuuku kwene impela yakwe ilamuzana nupya atalakwata nu wa kumwazwa.