Ezekeli
12 Nupya kwene Yeova wanenyile ati: 2 “We mwana wa muntu, ukaikala na ya cipondoka. Yakwata manso lelo yasilola, yakwata matwi lelo yasiuvwa, pano aacipondoka. 3 Lelo wemo we mwana wa muntu, upekanye ivya kusenda kwati ukuya umu uzya. Lyene umu nsita ya kasanya uye umu uzya uku ncende yuze ale yakulolako. Limwi yamailuka muno cii cikupiliula nanti cakuti aacipondoka. 4 Ufumye ivintu vyako usende mu uzya umu nsita ya musanya ale yakulolako, lyene manguzi lino yacili yakulola uwapita wa muntu wino yakusenda umu uzya.
5 “Lino yacili yakulola utulule iciumba nu kufumizyapo iviya vyako. 6 Uwike ivintu vyako pa ciye nu kuvisenda umu mfinzi ale yakulolako. Uvimbe icinso cako pakuti utaalola pansi, pano nkukulenga ukuya icimanyililo uku ya mu ng’anda yakwe Izlaeli.”
7 Nacisile ukulingana na vino wanenyile. Umusanya nafumizye ivintu vyane kwati nkuya umu uzya, nupya manguzi natulwile iciumba ukuomvya makasa. Lino kwafisile, natozile ivintu vyane imvika pa ciye ala na antu yakulolako.
8 Mu nsita iya katondo nupya kwene Yeova wanenyile ati: 9 “Uzye amu ng’anda yakwe Izlaeli yataakuzizye iyati, ‘I vyani vino ukucita?’ 10 Uyanene uti, ‘Yeova Umwene wa Papelapela walanda wati: “Vikwene i vilacitikila intunguluzi ya mu Yelusalemu na amu ng’anda yakwe Izlaeli yonsi umu musumba.”’
11 “Uyanene uti, ‘Nene icimanyililo kuli mwemwe. Vikwene vino incita ivilayacitikila. Yalasendwa umu uzya. 12 Intunguluzi yao ilasendela ivintu pa ciye nu kupita umu mfinzi. Ilatulula icipongo umu ciumba nu kufumizyapo ivintu. Ilavimba pa manso kuti itaalola pansi.’ 13 Ndateya isumbo pa ntunguluzi, nayo ilalemya. Lyene ndaitwala uku Babiloni uku mpanga iya Ina Kalideya, lelo italalola impanga iiyo; nupya kuuku kwene akuno ilafwila. 14 Nupya asilika ya ntunguluzi iiyo, aakayazwa, kuli kuti yonsi aizinguluka, ndayasalanganyizizya umu ntunga zyonsi; nupya ndatola ulupanga nu kuyazinganya. 15 Nupya yalamanya ukuti nene Yeova lino ndayasalanganyizizya umu nko nu mu mpanga izipusanepusane. 16 Lelo ndapususya yamwi uku lupanga, uku cipowe nu ku cikuko pakuti yace yasimikila antu ya mu nko zyonsi zino yalayako pa vintu vya winyi vyonsi vino yaacita; nupya yalamanya ukuti nene Yeova.”
17 Nupya kwene Yeova wanenyile, ati: 18 “We mwana wa muntu, ulinzile ukulya ivyakulya ala ukuzakaza nu kumwa manzi ala uli ni ntete nupya ala watusakamikwa. 19 Unene antu uti, ‘Yeova Umwene wa Papelapela walanda uku yantu ya mu Yelusalemu aikala umu mpanga iya Izlaeli wati: “Yalalya ivyakulya vyao ala iyasakamikwa nu kumwa manzi ala yali ni ntete, pano impanga yao ilasyala umwaula icili consi pa mulandu nu unkalwe wa yantu aakaikalamo. 20 Imisumba umwikala antu ilononwa, ni mpanga ilasyala umwaula icili consi; nupya mulamanya ukuti nene Yeova.”’”
21 Nupya kwene Yeova wanenyile ati: 22 “We mwana wa muntu mwakwata ipinda ilikati, ‘Manda yakupita lelo icilolwa cisikufikiliziwa.’ 23 Fwandi uyanene uti, ‘Yeova Umwene wa Papelapela walanda wati: “Ndalenga ipinda lilyo lite ukuyako, nupya yatalaaliomvya umu Izlaeli.”’ Lelo uyanene uti, ‘Manda iyapalama lino ivilolwa vyonsi vilafikiliziwa.’ 24 Kutalaya nupya ivilolwa vya ufi nanti aakasapoola umu ng’anda yakwe Izlaeli. 25 ‘“Pano nene ne Yeova ndalanda. Consi cino nalanda cilacitika ukwaula ukucelwa. Umu manda inu mwe ya cipondoka, ndaalanda nu kucita vino nalanda,” avino Yeova Umwene wa Papelapela walanda.’”
26 Nupya kwene Yeova wanenyile ati: 27 “We mwana wa muntu antu ya mu Izlaeli yakulanda iyati, ‘Ivilolwa vino akalola na vino akasesema vilacitika uku nkoleelo sana.’ 28 Fwandi uyanene uti, ‘Yeova Umwene wa Papelapela walanda wati: “‘Kusi cili consi cino nalanda icitalacitika; vyonsi vino nalanda vilacitika,’ avino Yeova Umwene wa Papelapela walanda.”’”