Ezekeli

20 Lyene umu mwaka uwalenga 7, mu mwezi uwalenga 5, pa wanda uwalenga 10, akalamba yamwi amu Izlaeli izile nu kwikala umupiipi nani pakuti yuzye kuli Yeova. 2 Lyene Yeova wanenyile ati: 3 “We mwana wa muntu, nena akalamba ya mu Izlaeli uti, ‘Yeova Umwene wa Papelapela walanda wati: “Uzye imwiza umu kuzya kuli nene? ‘Nkulapa ukuti, nsikwasuka vino mukulenga,’ avino Yeova Umwene wa Papelapela walanda.”’

4 “Uzye watuipekanya ukuyapingula? We mwana wa muntu, uzye watuipekanya ukuyapingula? Leka yamanye pa vintu vya winyi vino ivikolwe vyao vyacisile. 5 Uyanene uti, ‘Yeova Umwene wa Papelapela walanda wati: “Mu wanda uno nasoolwile Aina Izlaeli, nalafile uku ya mu ng’anda yakwe Yakobo, nupya naisokolwile kuli aliyo umu mpanga ya Ijipti. Nalafile nu kuyanena inti, ‘Nene Yeova Leza winu.’ 6 Mu wanda uuwa nalafile ukuti ndayafumya umu mpanga ya Ijipti nu kuyatwala umu mpanga ino nayasoolwelile, impanga umwaya umukaka nu uci. Yaali i mpanga isuma sana ukucila impanga zyonsi. 7 Lyene nayanenyile inti, ‘Cila muntu alinzile ukusumba ivintu vya winyi; mutaaikowezya uku vilubi vya winyi* vya mu Ijipti. Nene Yeova Leza winu.’

8 “‘“Lelo yampondokiile nupya yatalondanga ukuvwa kuli nene. Yataasumvile ivintu vya winyi, nupya yataatiile ukupepa ivilubi vya winyi ivya mu Ijipti. Fwandi nalavile ukuti ndaleta ukali wane pali aliyo umu mpanga ya Ijipti ala indi ni cipyu. 9 Lelo nacisile ukulingana ni zina lyane pakuti litasaalulwa uku yantu ya mu nko zino iikalangamo. Pano naimanyisizye uku Ina Izlaeli ala ni nko zii zikulolako lino nayafumizye umu mpanga ya Ijipti. 10 Nayafumizye umu mpanga ya Ijipti nu kuyatwala umu lwanga.

11 “‘“Lyene nayapeezile masunde nu kuleka yamanye upinguzi wane, pakuti umuntu aakuvwila upinguzi wane angaya nu umi. 12 Nupya nayapeezile masabata aakuya icimanyililo pali nene na aliyo, pakuti yamanye ukuti nene ne Yeova nkuyalenga ukuya aamuzilo.

13 “‘“Lelo amu ng’anda yakwe Izlaeli yampondokiile umu lwanga. Yatalondelanga masunde yane, nupya yakanyile upinguzi wane uwali nu kulenga umuntu ukuya nu umi. Yasuuzile sana masabata yane. Fwandi nalavile ukuti ndaleta ukali wane pali aliyo umu lwanga pakuti njalovye. 14 Nomba nacisile ukulingana ni zina lyane pakuti litasaalulwa uku yantu ya mu nko zino nayafumizyeko. 15 Nupya nalafile kuli aliyo umu lwanga ukuti ntalayatwala umu mpanga ino nayalavile; impanga umwaya umukaka nu uci, impanga isuma sana ukucila impanga zyonsi— 16 pa mulandu wakuti yakanyile upinguzi wane, yatalondelanga masunde yane, nupya yasuuzile masabata yane, pano yatemilwe ukupepa ivilubi vyao ivya winyi.

17 “‘“Lelo nayuvwilile uluse nupya ntayononyile; ntayalovizye umu lwanga. 18 Nanenyile ana yao umu lwanga inti, ‘Mutalondela masunde nu upinguzi wa vikolwe vinu nanti ukuikowezya uku vilubi vyao ivya winyi. 19 Nene Yeova Leza winu. Mwalondela masunde yane nu kuvwila upinguzi wane. 20 Mwaleka masabata yane yaaya aamuzilo, nupya yalaya icimanyililo kuli mwemwe ica kumwiusyako ukuti nene Yeova Leza winu.’

21 “‘“Lelo ana yao yampondokiile. Yatalondelanga masunde yane nu upinguzi wane uwali nu kulenga umuntu ukuya nu umi. Yasuuzile masabata yane. Fwandi nalavile ukuti ndaleta ukali wane pali aliyo umu lwanga ala indi ni cipyu. 22 Lelo nasuuzileko nu kucita ukulingana ni zina lyane pakuti litasaalulwa uku yantu ya mu nko zino nayatwazileko. 23 Nupya nalafile kuli aliyo umu lwanga ukuti ndayasalanganyizizya umu nko nu mu mpanga zyuze, 24 pano yatuvwilanga upinguzi wane nupya yakanyile masunde yane, yasuuzile masabata yane nupya yapepanga ivilubi vya winyi vya vikolwe vyao. 25 Nupya nalesile ukuti yalondela masunde aataali ningo nu upinguzi uutaali nu kuyalenga ukuya nu umi. 26 Nalesile ukuti yakoweziwe na malambo yao lino yocanga ana yao mayeli umu moto, pakuti njafulule nu kuleka yamanye ukuti nene Yeova.”’

27 “We mwana wa muntu, fwandi nena amu ng’anda yakwe Izlaeli uti, ‘Yeova Umwene wa Papelapela walanda wati: “Lino ivikolwe vinu vyacitanga ivintu vii, vyansaalulanga ukupitila umu kukanaya ni cisinka kuli nene. 28 Nayatwazile umu mpanga ino nalafile ukuti ndayapeela. Nga yalola kamwamba akali konsi katumpuke ni miti iilembe, yapeelelangapo malambo ni vya upe ivyansosyanga. Yapeelelangapo ni vinunkile ivyafumanga pa malambo yao ni vyakumwa. 29 Fwandi nayuzizye inti, ‘U mulandu ci uno mukaila uku ncende yii itumpuke? (Na ndakai kwene ikaamwa ukuti Ncende Itumpuke.)’”’

30 “Lyene nena amu ng’anda yakwe Izlaeli uti, ‘Yeova Umwene wa Papelapela walanda wati: “Uzye mumaikowezyanga wakwe vino ivikolwe vinu vyacitanga ukupitila umu kulondela ivilubi vyao ivya winyi nu kuvipepa? 31 Nupya uzye na likwene mucili mukuikowezya ukupitila umu kupeela malambo uku vilubi vinu vyonsi ivya winyi nu koca ana inu umu moto? Uzye pa nsita ili imwi ninguvwa kuli vino mukulenga mwe ya mu ng’anda yakwe Izlaeli?”’

“Yeova Umwene wa Papelapela walanda wati, ‘Nkulapa, ntaluvwa kuli vino mukulenga. 32 Mukaelenganya imuti, “Katuye wa yantu ya mu nko, wa yantu ya mu mpanga zyuze aakapepa ivimiti na mawe,” lelo cico citalacitika.’”

33 “Yeova Umwene wa Papelapela walanda wati, ‘Nkulapa ukuti ndaamuteeka, ndakonzolola ikasa lyane ilya maka nu kumufulula, ndaleta ukali pali mwemwe. 34 Ndamufumya umu yantu nupya ndamukolonganika ukufuma umu mpanga zino namusalanganyizizyemo ukuomvya ikasa lyane ilya maka, ilikonzololwe nupya ala indi nu ukali. 35 Ndamutwala umu lwanga lwa yantu nupya mumu kwene amuno ndamupingwila.’

36 “Yeova Umwene wa Papelapela walanda wati, ‘Wakwe vino napingwile ivikolwe vinu umu lwanga umu mpanga iya Ijipti, avino namwe kwene ndamupingula. 37 Ndaleka ukuti mupite umwisika lya ntuwa yakwe kacema nu kuleka mwasunga upangano. 38 Lelo ndafumya ya cipondoka na antu aakanjembukila muli mwemwe. Ndayafumya umu mpanga ino yakaikalamo iisi yao, lelo ntalaleka ukuti ingile umu mpanga iya Izlaeli; nupya mulamanya ukuti nene Yeova.’

39 “Lelo mwemo mwe ya mu ng’anda yakwe Izlaeli, Yeova Umwene wa Papelapela walanda wati: ‘Mwensi kwene yangini mukaombela ivilubi vinu ivya winyi. Lelo pa cisila nga mutaluvwa kuli nene, ndamukana nupya mutalatala musaalulepo nupya izina lyane ukuomvya malambo inu ni vilubi vinu ivya winyi.’

40 “Yeova Umwene wa Papelapela walanda wati, ‘Mu mwamba wane uwa muzilo, pa mwamba utali uwa mu Izlaeli apano amu ng’anda yakwe Izlaeli yonsi yalaambombela. Paapa kwene apano ndasansamukila muli aliyo, nupya apano ndalonda ukuti mwampeelela imisangulo inu ni vizao vinu ivyatandikilapo ukuca, kuli kuti vintu vinu vyonsi ivya muzilo. 41 Pa mulandu ni vinunkile ivikafuma pa malambo inu, ndaya ni nsansa lino ndamufumya umu yantu nu kumukolonganika ukufuma umu mpanga zino mwasalanganilamo; nupya ndailenga ukuya uwa muzilo muli mwemwe ale ni nko zikulolako.’

42 “‘Nupya mulamanya ukuti nene Yeova lino ndamutwala umu mpanga iya Izlaeli, kuli kuti impanga ino nalafile ukupeela uku vikolwe vinu. 43 Kuuku kwene akuno muliusya imiyele ino mwakweti ni vintu vino mwaikowizyeko, nupya muluvwa uyi pa mulandu ni viipe vyonsi vino mwacisile. 44 Lyene mulamanya ukuti nene Yeova lino ndacita kuli mwemwe ukulingana ni zina lyane, asi ukulingana ni viipe vino mwe ya mu ng’anda yakwe Izlaeli mwacisile,’ avino Yeova Umwene wa Papelapela walanda.”

45 Nupya kwene Yeova wanenyile ati: 46 “We mwana wa muntu, lozya icinso cako uku kaeya nu kulanda uku kaeya, nupya usesemele umutengo wa ku kaeya. 47 Unene umutengo wa ku kaeya uti, ‘Uvwa mazwi yakwe Yeova. Yeova Umwene wa Papelapela walanda wati: “Nimakozya umoto muli wewe, nupya uloca umuti onsi ulembe nu uume. Kusi aalazimya umoto uwo, umuntu wensi aluvwa icikaye ca moto ukufuma uku kaeya ukufika uku katutu. 48 Nupya antu yonsi yalalola ukuti ne Yeova nene inkozya umoto uwo pakuti kutaya uwa kuuzimya.”’”

49 Nupya natiile: “Iyee, we Yeova Mwene wa Papelapela! Yakulanda pali nene iyati, ‘Uzye asikulanda sile utucole?’”