KUFUMA

1 Lino Yakobo, kuli kuti Izlaeli, waile uku Ijipti, anakwe aonsi nayo kwene yapisile pamwi ni ndupwa zyao. Mazina ya yana yakwe aonsi aeya: 2 Lubeni, Simyoni, Levi na Yuda; 3 Isakali, Zebuluni na Benjamini; 4 Dani na Nafutali; Gadi na Aseli. 5 Nupya yonsi aafumile muli Yakobo yaali 70, lelo Jozefu wene ala waya mpiti umu Ijipti. 6 Umu kuya kwa nsita Jozefu wafwile, kumwi na ina yakwe yonsi alino ni nkulo iiya yonsi. 7 Nupya Aina Izlaeli* yaatandike ukuvyalana nu kuvula sana, nupya yavulilangako nu kukwatilako sana maka, icakuti yazuuzile umu mpanga iiya yonsi.

8 Umu kuya kwa nsita umwene muze aatamanyile Jozefu, watandike ukuteeka umu Ijipti. 9 Fwandi wanenyile antu yakwe ati: “Lolini! Aina Izlaeli iyavulisya nupya iyakwatisya maka ukutucila. 10 Lekini tuomvye mano. Pano ukwaula vivyo, yalatwalilila ukuvulilako, nupya nga kwaya inkondo, yaluminkana na alwani itu, yalatulwisya nu kufuma umu mpanga itu.”

11 Fwandi yayasontiile akuti yayangalila, pakuti yayacuzya ukupitila umu kuyapeela imilimo ikome, nupya yayapatikizye ukukuulila Falao imisumba ya Pitomu na Lamesesi muno wasungilanga ivintu. 12 Lelo lino yayacuzyanga, alino yavulilangako sile nupya alino yatwalilile ukusalangana sana umu mpanga ya Ijipti, fwandi Aina Ijipti yuvwile intete pa mulandu na Ina Izlaeli. 13 Lyene Aina Ijipti yaatandike ukupatikizya Aina Izlaeli ukuomba umulimo ukome sana uwa yazya. 14 Yalenzile ukuti yacula sana lino yakuomba umulimo ukome uwa kutama injelwa nu kuomba umulimo onsi uwa yazya umu mpanga. Yalenzile ukuti yaombesya sana imilimo yonsi iya yazya.

15 Pa cisila, umwene wa ku Ijipti walanzile na ya nacimbuza Aebele, kuli kuti Syifula na Puwa, 16 wayanenyile ati: “Lino mukupaapisya umwanaci Umuebele nupya mwalola ukuti akupaapa umwana umonsi, mulinzile ukukoma umwana wiyo; lelo ndi cakuti u mwanaci, mutalinzile ukumukoma.” 17 Lelo ya nacimbuza yayo yatiinanga Leza wa cumi, nupya yatacitanga vino umwene wa ku Ijipti wayanenyile. Yatakomanga ana aonsi. 18 Mu kuya kwa nsita umwene uwa ku Ijipti wamile ya nacimbuza yayo nu kuyuzya ati: “U mulandu ci uno musikukomela ana aonsi?” 19 Nayo yaswike Falao iyati: “Anaci Aebele yataaya wa yanaci Aina Ijipti. Yene yakoma nupya yakapaapa na lino nacimbuza atali aye kuli aliyo.”

20 Fwandi Leza wapaazile ya nacimbuza yaaya, nupya Aina Izlaeli yatwalilile ukuvulilako nu kukwatilako sana maka. 21 Nupya pa mulandu wakuti ya nacimbuza yaaya yatiinanga Leza wa cumi, pa cisila wizile ayapeela indupwa. 22 Lyene Falao wakonkomizye antu yakwe yonsi ati: “Umwana wensi umonsi uwavyalwa uku Yaebele mwamusumbila umu Luzi Lwa Naelo, lelo umukazyana wene mwamuleka.”

2 Pa nsita kwene iiya, umonsi umwi uwa mu lupwa lwakwe Levi watwazile mwana Levi. 2 Nupya umwanaci wiyo wizile aya pa ukulu nu kukwata umwana umonsi. Lino waweni vino umwana wiyo wali umusuma, wamufisile pa myezi itatu. 3 Lino waweni ukuti lyene atanga atwalilile ukumufisa, watozile basiketi nu kupakako manenekela amuno aika umwana nupya wisile basiketi wiyo umu matete umu mbali ya Luzi Lwa Naelo. 4 Lelo nyinalenzi wa mwana wiyo, wimilile akatalamukila pakuti alole ivyali nu kucitikila umwana.

5 Lino mwana Falao umukazyana waile umu kufulala umu Luzi Lwa Naelo, aomvi yakwe akazyana yapitanga umu mbali ya luzi. Nupya mwana Falao waweni basiketi ala ali pakasi ka matete. Lilyo kwene watumile umuzya wakwe umukazyana kuti akatole. 6 Lino mwana Falao wayuzile basiketi, wawenimo umwana, nupya umwana wiyo walilanga. Wamuvwilile uluse, lelo walanzile ati: “Umwana wii u wa Yaebele.” 7 Lyene nyinalenzi wa mwana uzizye mwana Falao ati: “Uzye ningaya nkaame umwanaci Umuebele uwakuti aonsya nu kumusungila umwana wii?” 8 Nawe walanzile ati: “Kamwame!” Lilyo kwene umukazyana wiyo wapisile nu kuya ama nyina wa mwana. 9 Lyene mwana Falao wanenyile nyina wa mwana ati: “Senda umwana wii, uwamonsya nu kumusakamala, ndakulipila.” Nawe watozile umwana nu kutandika ukumusakamala. 10 Lino umwana wiyo wakuzile, wamutwazile kuli mwana Falao, nupya wizile aya umwanakwe. Nawe wamutemiile ni zina ilyakuti Mose* nupya walanzile ati: “A pa mulandu wakuti namufumizye umu manzi.”

11 Lyene umu manda yaaya, pa cisila cakuti Mose wakula,* waile uku ina yakwe umu kulola vino yaombanga imilimo ikome, nupya waweni umwinakwe Umuebele yakumuma uku Mwina Ijipti. 12 Fwandi lino walolekisye konsi konsi nu kulola ukuti kusi umuntu ali wensi, wakomile Umwina Ijipti nu kumuziika umu mucanga.

13 Nupya kwene waswilile uwanda uwalondelilepo nu kuzana aonsi Aebele yaili ala yakulwa. Lyene uzizye uwali nu mulandu ati: “U mulandu ci uno ukumila umuzo?” 14 Nawe wamuzizye ati: “Uzye a weni uwakusonta ukuya intunguluzi nupya kapingula witu? Uzye ukulonda ukunkoma wakwe vino wakomile Umwina Ijipti?” Lyene Mose watiinyile nu kwelenganya ukuti: “Icumi kwene ilyasi lii ilimanyikwa!”

15 Lyene Falao uvwile ilyasi lilyo, nupya walondanga ukukoma Mose; lelo Mose utwike nu kuya umu kwikala uku Midyani, nupya waile aikala umupiipi ni cisima ca manzi. 16 Lyene simapepo umwina Midyani wakweti ana akazyana 7, nupya yaile umu kutapa manzi ya kwika umu milangu pakuti iviteekwa vyakwe isi vimwe. 17 Lelo wakwe vino cayanga lyonsi, ya kacema iizile nu kuyazinga. Lino Mose waweni vivyo wazwilizye akazyana nu kumwesya iviteekwa vyao. 18 Lino yafisile uku ng’anda kuli isi Leweli,* wazungwike nu kuyuzya ati: “Ngi ilelo mwawela uli zuwa?” 19 Nayo yaswike iyati: “Umwina Ijipti umwi uwatupususya kuli ya kacema, uwatutapila na manzi nu kumwesya iviteekwa.” 20 Nawe wayuzizye ati: “Nga ali kwi? Nupya u mulandu ci uno imumusiila? Kamwamini pakuti twize tuliile pamwi nawe ivyakulya.” 21 Pa cisila, Mose wazumiile ukwikala na Leweli, nupya Leweli watozile Zipola umwanakwe amupeela kuli Mose kuti aye amamakwe. 22 Pa cisila Zipola wizile akwata umwana, nupya Mose wamutemiile izina lyakuti Gesyomu,* pano walanzile ati, “Nene mwenyi umu mpanga yii.”

23 Lino papisile insita itali, umwene wa ku Ijipti wafwile, lelo Aina Izlaeli yatwalilile ukuya umu uzya, yatwalilile ukulila nu kuilizyanya, nupya yalililanga kuli Leza wa cumi pakuti ayaazwe pa mulandu wakuti yaali umu uzya. 24 Mu kuya kwa nsita, Leza uvwile ukulila kwao, nupya wiwisye upangano uno wapangiine na Abulahamu, Isaki, na Yakobo. 25 Fwandi Leza wiwisye Aina Izlaeli; nupya waweni vino yaculanga.

3 Mose watandike ukucema iviteekwa vyakwe Yetulo isivyala uwali simapepo wa ku Midyani. Lino watwalanga iviteekwa umu lwanga lwa ku uwondaka,* wasusile afika uku mwamba wakwe Leza wa cumi uku Holebu. 2 Lyene malaika wakwe Yeova walolekiile kuli Mose umu cimbilimbili ca moto icakanga umu cimpuza. Lino walolekisye, waweni ukuti icimpuza cikwaka, lelo citapyanga. 3 Fwandi Mose welenginye ati: “Cii i cizungusyo, nkanjeko pakuti nkalole umulandu uno icimpuza cisikupyela.” 4 Lino Yeova waweni ukuti Mose watandika ukupalama uku cimpuza, wamwamile ukufuma umu cimpuza ati: “Mose! Mose!” nawe waswike ati: “Mukwai.” 5 Lyene Leza wamunenyile ati: “Utapalama umupiipi. Zula indyatu, pano incende ino watuwimililapo i ya muzilo.”

6 Nupya Leza wamunenyile ati: “Nene Leza wa vikolwe vyako, Leza wakwe Abulahamu, Leza wakwe Isaki nupya Leza wakwe Yakobo.” Lyene Mose wafisile icinso cakwe pa mulandu wakuti watiinanga ukulola Leza wa cumi. 7 Yeova walanzile nu kuti: “Indola vino antu yane aali umu Ijipti yakucula, nupya inuvwa ukulila kwao pa mulandu na yayo aakuyapatikizya ukuomba; imanya vino yakucula. 8 Nimaya nkayapususye uku Ina Ijipti nupya nimaya nkayafumyemo nu kuyatwala uku mpanga isuma nupya ikalamba, umwaya umukaka nu uci, umukaikala Aina Kenani, Aina Hiti, Aina Amoli, Aina Pelizi, Aina Hivi, na Ina Yebusi. 9 Lola! Inuvwa ukulila kwa Ina Izlaeli, nupya indola na vino yakuyacuzya sana uku Ina Ijipti. 10 Lyene nimakutuma kuli Falao, nupya ulafumya antu yane Aina Izlaeli umu Ijipti.”

11 Lelo Mose wanenyile Leza wa cumi ati: “Nene weni uwa kuya kuli Falao nu kuyafumya Aina Izlaeli umu Ijipti?” 12 Leza nawe wamunenyile ati: “Ndaya naawe, nupya icimanyililo icikulangilila ukuti nene inkutuma aeci: Lino ulafumya Aina Izlaeli umu Ijipti, muliza mwaombela Leza wa cumi pa mwamba kwene uu.”

13 Lelo Mose wanenyile Leza wa cumi ati: “Nga naca naya uku Ina Izlaeli nu kuyanena ukuti, ‘Leza wa vikolwe vinu watantuma kuli mwemwe,’ nayo yanguzya ukuti, ‘Izina lyakwe a weni?’ Ince njanene ntuli?” 14 Leza nawe wanenyile Mose ati: “Ndaya Vino Nkulonda Ukuya.”* Nupya walanzile nu kuti: “Uce unene Aina Izlaeli uti, ‘Ndaya watantuma kuli mwemwe.’” 15 Nupya kwene Leza wanenyile Mose ati:

“Uce unene Aina Izlaeli ukuti, ‘Yeova Leza wa vikolwe vinu, Leza wakwe Abulahamu, Leza wakwe Isaki, nupya Leza wakwe Yakobo, u watantuma kuli mwemwe.’ Lii ali zina lyane amanda pe, nupya likwene ali zina lino inkulo zyonsi zilanjiusizyako. 16 Lyene pitanga nupya ukakolonganike akalamba amu Izlaeli nu kuyanena ukuti, ‘Yeova Leza wa vikolwe vinu iwalolekela kuli nene, Leza wakwe Abulahamu, Isaki, na Yakobo nupya uwanena wati: “Imwiusya nupya indola ivikumucitikila umu Ijipti. 17 Fwandi nkumunena ukuti, ndamukulula uku ucuzi uno mukuculako pa mulandu na Ina Ijipti nupya ndamutwala uku mpanga iya Ina Kenani, Aina Hiti, Aina Amoli, Aina Pelizi, Aina Hivi, na Ina Yebusi, impanga umwaya umukaka nu uci.”’

18 “Yaluvwa kuli wewe, nupya uce upite na akalamba ya mu Izlaeli uku mwene uwa ku Ijipti, muce mukamunene ukuti: ‘Yeova Leza uwa Yaebele watalanda naswe. Fwandi leka tupite ulwendo lwa manda yatatu nu kuya umu lwanga pakuti tukapeele ilambo kuli Yeova Leza witu.’ 19 Lelo nemo imanya ukuti umwene wa ku Ijipti atalamuzumilizya ukupita suka sile ndi cakuti waca wapatikiziwa. 20 Fwandi ndakonzolola ikasa lyane nu kuma Aina Ijipti ukuomvya ivizungusyo vyane vyonsi vino ndaleta pali aliyo, nupya pa cisila alamuzumilizya ukupita. 21 Nupya ndalenga ukuti Aina Izlaeli yatemwikwe uku Ina Ijipti, nupya lino mulapita, mutalapita minwe. 22 Cila mwanaci ace alenge iviyembelo vyakwe siuva na vyakwe goldi alino ni vyakuzwala ku mwinamupalamano nu ku mwanaci wino akaikala nawe umu ng’anda, muce muzwike ana inu aonsi na akazyana ivintu vivyo; nupya mulasenda ivyuma ivya Ina Ijipti.”

4 Lelo Mose uzizye ati: “Nomba ndacita uli ndi cakuti yakana ukuzumila nu kuvwa kuli nene? pano yalalanda yati, ‘Yeova ataalolike kuli wewe.’” 2 Lyene Yeova wamuzizye ati: “I cani cico cino ulemile umu minwe?” Nawe waswike ati: “I ntuwa.” 3 Leza wamunenyile ati: “Sumba intuwa iyo pansi.” Nawe waisumvile, nayo yasangwike inzoka; nupya Mose wasempwike. 4 Lyene Yeova wanenyile Mose ati: “Konzolola ikasa lyako nu kulema inzoka iiyo uku musinda.” Nawe wakonzolwile ikasa nu kuilema, nupya yasangwike intuwa. 5 Lyene Leza walanzile ati: “Cikwene icilalenga yazumile ukuti Yeova Leza wa vikolwe vyao, Leza wakwe Abulahamu, Leza wakwe Isaki, nupya Leza wakwe Yakobo walolike kuli wewe.”

6 Nupya Yeova wamunenyile ati: “Ingizya ikasa umu cakuzwala cako lwa pa cisao.” Nawe wingizye ikasa umu cakuzwala cakwe. Lino walifumizye, lyakweti tembwe nupya lyalolike kwati usu wa mvula! 7 Lyene Leza wamunenyile ati: “Nupya kwene ingizya ikasa lyako umu cakuzwala.” Nawe wingizye. Lino walifumizye, lyapozile! 8 Leza wamunenyile ati: “Ndi cakuti yataluvwa kuli wewe nanti ukwika mano uku cizungusyo ca kutandikilapo, lyene yaluvwa ku cizungusyo cakwe ciili. 9 Ndi cakuti yaca yakana ukuzumila nu ku vizungusyo vii viili nu kukana ukuvwa kuli wewe, uce utape manzi umu Luzi Lwa Naelo nu kwitila pa musili uume, nupya manzi yano ulitila pa musili yalasanguka uwazi.”

10 Lyene Mose wanenyile Yeova ati: “Unjelele, we Yeova, nemo nsilanda ningo ukufuma na mpiti, nanti sile aepa kwene pano ukulanda nani, pano nafina kanwa nu lulimi.” 11 Yeova uzizye Mose ati: “Uzye a weni uwapanzile kanwa ka muntu, nanti aakalenga antu ukuya ya ciulu, ya cipuuli, nu kulenga ukuti yalola nanti ukuya impafu? Uzye asi nene kwene ne Yeova? 12 Fwandi pitanga, ndaaya naawe lino ukulanda, nupya ndaakunena ivya kulanda.” 13 Lelo Mose waswike ati: “Napaapata, we Yeova, tuma muze.” 14 Lyene Yeova wasokiile Mose nu kumunena ati: “Uzye utakwata umwinako Aloni umwina Levi? Nimanya ukuti angavwanga ningo sana. Nupya ali umu nzila akwiza kuli wewe. Nga wakulola, amatemwa sana. 15 Fwandi ulinzile ukulanda nawe nu kumunena ivya kulanda, Ndaaya namwe lino mulaalanda nupya ndaamunena ivya kucita. 16 Alaakulandilako uku yantu, naawe ulaya wakwe Leza kuli aliwe. 17 Nupya uce usende intuwa yii nu kucacitilako ivizungusyo.”

18 Mose waile kuli Yetulo isivyala nu kumunena ati: “Nkulonda nswilile uku ina yane ali umu Ijipti pakuti nkalole ndi cakuti yacili nu umi.” Yetulo nawe wamunenyile ati: “Upite umutende.” 19 Yeova wanenyile Mose umu Midyani ati: “Swilila uku Ijipti, pano antu yonsi aalondanga ukukukoma yafwa.”

20 Lyene Mose wakwezizye umuci na anakwe pali punda nu kuswilila uku Ijipti. Nupya wasenzile ni ntuwa yakwe Leza wa cumi. 21 Lyene Yeova wanenyile Mose ati: “Ndi cakuti waswilila uku Ijipti, ukasininkizye ukuti wacita ivizungusyo vyonsi kuli Falao vino inkupeela maka ya kucita. Nupya ndalenga ukuti Falao akome umwenzo, nupya atalaleka antu yane yapite. 22 Uce ukanene Falao uti, ‘Yeova walanda wati: “Izlaeli u mwanane nupya i yeli lyane. 23 Leka umwanane apita pakuti akambombele. Ndi cakuti wakana, ndakoma umwanako iyeli.”’”

24 Lyene lino yafisile pa ncende ya kupuuzilapo, Yeova wakomenkinye Mose nupya walondanga ukumukoma.* 25 Lyene Zipola watozile iwe ilikalipe nu kuzembulula umwanakwe nupya walesile ukuti inkanda ya ku mpela ya onsi ikumye uku ngazo zyakwe* nu kulanda ati: “Wewe siwinga wane uwa wazi.” 26 Lyene Leza wamusiile. Nupya Zipola walanzile ati, “wewe siwinga wane uwa wazi,” pa mulandu wa kuzembululwa.

27 Pa cisila Yeova wanenyile Aloni ati: “Yanga umu lwanga ukakomenkanye Mose.” Nawe wapisile aya amukomenkanya pa mwamba wakwe Leza wa cumi, nupya wamulamwike nu kumutonsola. 28 Nupya Mose wanenyile Aloni vyonsi vino Yeova uwamutumile walanzile, kumwi ni vizungusyo vyonsi vino wamunenyile ukucita. 29 Pa cisila, Mose na Aloni yapisile nu kuyakolonganika akalamba yonsi aa Ina Izlaeli. 30 Aloni wayanenyile vyonsi vino Yeova wanenyile Mose, nupya wacisile ni vizungusyo ala na antu yakulolako. 31 Lyene antu yaataile. Lino yuvwile ukuti Yeova wataiusya Aina Izlaeli nu kuti watalola ukucula kwao, yafukime nu kucindika Leza.

5 Pa cisila, Mose na Aloni yaile kuli Falao nu kumunena iyati: “Yeova Leza wa Ina Izlaeli watalanda ati, ‘Leka antu yane yapita, pakuti yakazevye umutebeto wane umu lwanga.’” 2 Lelo Falao walanzile ati: “Nga Yeova kwene ali weni, uwakuti nuvwe ukwi zwi lyakwe nu kuleka Aina Izlaeli yapite? Yeova ntamumanya, nupya ntalaleka Aina Izlaeli yapite.” 3 Lelo yalanzile iyati: “Leza wa Yaebele walanzile naswe. Twapaapata, tukulonda ukupita ulwendo lwa manda yatatu nu kuya umu lwanga pakuti tukapeele ilambo kuli Yeova Leza witu; pano nga cisi vivyo alatukoma uku ulwale nanti uku lupanga.” 4 Umwene wa ku Ijipti waswike Mose na Aloni ati: “U mulandu ci uno mukulekela ukuti antu yataomba imilimo? Swililini uku milimo!” 5 Nupya Falao watwalilile ukuyanena ati: “Lolini vino imuvula umu mpanga yii, alino mukulonda kuti antu yataomba imilimo.”

6 Pa wanda kwene uwa, Falao wakonkomizye apeelanga Aina Izlaeli imilimo ikome na yano yayangalilanga ati: 7 “Tiini ukupeela antu isote aakutama injelwa. Lekini yaya umu kuilondela aineco. 8 Lelo muleke yatama icipendo ca njelwa icilingine na cino yakatama lyonsi. Mutezya ukuyacefezya pano yakucita ukasu. Ali mulandu uno yakulilila yakuti, ‘Tukulonda twapita, tukulonda tukapeele ilambo kuli Leza witu!’ 9 Muleke yaombesya, yataapuuza, pakuti yataika mano uku malyasi ya ufi.”

10 Fwandi apeelanga antu imilimo ikome alino na angalilanga yapisile nu kuyanena antu iyati: “Falao watalanda ukuti, ‘Nata ukumupeela isote. 11 Pitangini mukailondele isote konsi kuno mumalizana, lelo icipendo ca njelwa cene cisikucefiwa.’” 12 Lyene antu yaile umu mpanga yonsi iya Ijipti mu kulonda isote. 13 Nupya apeelanga imilimo ikome yatwalilile ukuyakonkomezya iyati: “Cila wanda cila muntu afwile aakumanizya icipendo cakwe, wakwe vino cali lino mwapeelwanga isote.” 14 Nupya apeelanga imilimo ikome yatandike ukuma angalilanga Aina Izlaeli, yayuzizye iyati: “U mulandu ci uno musikukumanizya icipendo ca njelwa cino mukatama lyonsi? Vikwene avino cali mutondo ni lelo.”

15 Fwandi angalilanga Aina Izlaeli yaile kuli Falao nu kuyailizyanya iyati: “Musambazi, u mulandu ci uno ukucitila vii uku yaomvi yako? 16 Swe yaomvi yako tutakupeelwa isote, lelo yakutunena iyati, ‘Tamangini injelwa!’ Antu yako yakutuuma lino aliyo yali nu mulandu.” 17 Lelo Falao wayanenyile ati: “Yakasu mwe, mwemwe yakasu! Ali mulandu uno mukulandila mukuti, ‘Tukulonda twapita, tukulonda tukapeele ilambo kuli Yeova.’ 18 Pitangini, swililini umu kuomba! Mutakutala mupeelwe isote, lelo mulinzile mwakumanizya icipendo ca njelwa.”

19 Lyene angalilanga Aina Izlaeli yaweni ukuti yaali umu ntazi ikalamba pa mulandu na vino yayanenyile ukuti: “Mutafwile ukucefya icipendo ca njelwa cakwe cila wanda.” 20 Pa cisila, yakomenkine na Mose na Aloni, aimilile kuti yayakomenkanye lino yakufuma kuli Falao. 21 Lyene yanenyile Mose na Aloni iyati: “Si Yeova amulolekesye nu kumupingula, pano imulenga Falao na aomvi yakwe ukuti yatupate nupya imuyapeela ulupanga kuti yatukome.” 22 Lyene Mose wapefile kuli Yeova ati: “We Yeova, u mulandu ci uno watulekela antu yaa ukucula? Nupya u mulandu ci uno wantumiile? 23 Kufuma lino naile kuli Falao uku kulandila umwi zina lyako, alino wene wacila napo ukucuzya antu yaa nupya utaayapususya.”

6 Yeova wanenyile Mose ati: “Umalola vino nimacita kuli Falao. Pa mulandu na maka yane alapatikiziwa ukuleka antu yane ukupita, nupya alapatikiziwa ukuzinga antu yane umu mpanga yakwe.”

2 Nupya Leza wanenyile Mose ati: “Nene Yeova. 3 Nene ne Leza uwa Maka Yonsi nalolekelanga kuli Abulahamu, Isaki, na Yakobo, lelo ntatazile injamanyisye izina lyane ilyakuti Yeova. 4 Nupya napangine nayo upangano uwa kuyapeela impanga ya Kenani, impanga ino ikalangamo wa enyi. 5 Lyene inuvwa ukulila kwa Ina Izlaeli yano Aina Ijipti yakucuzya, nupya iniusya upangano wane.

6 “Fwandi unene Aina Izlaeli uti: ‘Nene Yeova, ndamukulula uku Ina Ijipti nu kumufumya umu uzya, ndamupususya ukuomvya maka yane nupya upinguzi wa Ina Ijipti ulipisya. 7 Mulaya antu yane, nani ndaya Leza winu, nupya mulamanya ukuti nene indi Yeova Leza winu alamufumya umu Ijipti nu kumukulula uku uzya. 8 Ndamwingizya nu mu mpanga ino nalafile ukupeela Abulahamu, Isaki, na Yakobo; ndamupeela impanga iiyo kuti ice iye inu. Nene Yeova.’”

9 Pa cisila, Mose wanenyile Aina Izlaeli mazwi yayo, lelo yatuvwile kuli aliwe pa mulandu wakuti yaali nu ulanda nupya yaculanga sana umu uzya.

10 Lyene Yeova wanenyile Mose ati: 11 “Yanga kuli Falao umwene wa ku Ijipti ukamunene ukuti aleke Aina Izlaeli yafume umu mpanga yakwe.” 12 Lelo Mose waswike Yeova ati: “Lola! Aina Izlaeli yatuvwile kuli nene; nga lyene Falao aanguvwa kuli nene nemuno cikantalila nu kuvwanga?” 13 Nomba nupya kwene Yeova wanenyile Mose na Aloni ivya kunena Aina Izlaeli na Falao umwene wa ku Ijipti, pakuti Aina Izlaeli yafume umu Ijipti.

14 Aali imitwe ya ndupwa iya vikolwe vyao mazina yao aeya: Ya mwana Lubeni iyeli lyakwe Izlaeli, a Hanoki, Palu, Heziloni, na Kami. Yaa yonsi yafumile umu lupwa lwakwe Lubeni.

15 Ya mwana Simyoni a Yemueli, Yamini, Ohadi, Yakini, Zoyali, na Syauli umwana wa mwanaci umwina Kenani. Yaa yonsi yafumile umu lupwa lwakwe Simyoni.

16 Yaa ali mazina yakwe ya mwana Levi aonsi, ukulingana ni ndupwa zino yafumilemo: Gesyoni, Koati, na Melali. Levi wikazile imyaka 137.

17 Ya mwana Gesyoni aonsi a Libini na Syimei, ukulingana ni ndupwa zyao.

18 Ya mwana Koati aonsi a Amulamu, Izali, Hebuloni, na Uzieli. Koati wikazile imyaka 133.

19 Ya mwana Melali aonsi a Maali na Musyi.

Yakwene aafumile umu ndupwa zya Ina Levi, ukulingana ni ndupwa zyao.

20 Amulamu watwazile Yokebedi kaci wakwe isi. Ana yano Yokebedi wavyaliile Amulamu a Aloni na Mose. Nupya Amulamu wikazile imyaka 137.

21 Ya mwana Izali aonsi a Kola, Nefegi, na Zikilai.

22 Ya mwana Uzieli aonsi a Misyeali, Elizafani, na Sitili.

23 Aloni watwazile Elisyeba mwana Aminadabu kaci wakwe Nasyoni. Ana yano Elisyeba wavyaliile Aloni a Nadabu, Abihu, Elieza, na Itamali.

24 Ya mwana Kola aonsi a Asili, Elikana, na Abiasafi. Yakwene afumile umu lupwa lwa Ina Kola.

25 Elieza mwana Aloni, watwazile mwana Petieli. Nupya mamakwe wamuvyaliile Finiasi.

Yakwene ali mitwe ya ndupwa zya Ina Levi, ukulingana ni ndupwa zyao.

26 Aloni na Mose yafumile umu mutundu kwene uu. Yeova wayanenyile ati: “Mufumye Aina Izlaeli umu mpanga ya Ijipti ukulingana na maumba yao.” 27 Mose kwene na Aloni aliyo yanenyile Falao umwene wa ku Ijipti ukuti aleke Aina Izlaeli yafume umu Ijipti.

28 Pa wanda uwa lino Yeova walanzile na Mose umu mpanga ya Ijipti, 29 Yeova wamunenyile ati: “Nene Yeova. Unene Falao umwene wa ku Ijipti vyonsi vino inkunena.” 30 Lyene Mose wanenyile Yeova ati: “Lola! Cikantalila ukuvwanga, uzye lyene Falao aluvwa uli kuli nene?”

7 Lyene Yeova wanenyile Mose ati: “Lola, inkucita ukuya wakwe Leza kuli Falao, nupya Aloni umwinako alaya a kasesema wako. 2 Wewe ulaanena Aloni vyonsi vino nimakunena, nawe alalanda kuli Falao, nupya Falao alaleka Aina Izlaeli ukufuma umu mpanga yakwe. 3 Nani ndalenga Falao ukukoma umwenzo, nupya ndacita ivimanyililo ni vizungusyo ivingi umu mpanga ya Ijipti. 4 Lelo Falao ataluvwa kuli mwemwe, nupya ndafulula Aina Ijipti ukuomvya ikasa lyane, nu kufumya maumba ya yantu yane Aina Izlaeli umu mpanga ya Ijipti, nupya upinguzi uno ndaleta pa Ina Ijipti ulipisya. 5 Nupya Aina Ijipti yalamanya ukuti nene Yeova lino ndayafulula ukuomvya ikasa lyane nu kufumya Aina Izlaeli muli aliyo.” 6 Mose na Aloni yacisile vino Yeova wayanenyile; viivi kwene avino yacisile. 7 Mose wali ni myaka 80, Aloni nawe wali ni myaka 83 lino yalanzile na Falao.

8 Lyene Yeova wanenyile Mose na Aloni ati: 9 “Ndi cakuti Falao waca wamunena ukuti, ‘Citini icizungusyo,’ lyene uce unene Aloni uti, ‘Tola intuwa yako nu kuisumba pansi pa nkoleelo yakwe Falao.’ Nayo ilasanguka inzoka ikalamba.” 10 Fwandi Mose na Aloni yaile kuli Falao nupya yacisile viivi kwene vino Yeova wayanenyile. Aloni wasumvile intuwa yakwe pansi pa nkoleelo yakwe Falao na aomvi yakwe, nayo yasangwike inzoka ikalamba. 11 Lelo Falao wamile aonsi aamano, ya kacita ya maleele, na ya simapepo ya vinjelengwe amu Ijipti, nupya nayo kwene yacisile icili cimwi ukuomvya maleele yao. 12 Cila muntu wasumvile intuwa yakwe pansi, nupya intuwa zyao zyasangwike inzoka izikalamba; lelo intuwa yakwe Aloni yamizile intuwa zyao. 13 Nalyo kwene, Falao watwalilile ukukoma umwenzo, nupya atuvwile kuli aliyo, wakwe vino Yeova walanzile.

14 Lyene Yeova wanenyile Mose ati: “Falao watakoma umwenzo. Nupya watakana ukuti antu yane yapite. 15 Katondo uce uye kuli Falao. Nawe alaya uku Luzi Lwa Naelo! Nupya uce ukimilile umu mbali ya luzi pakuti ukamukomenkanye; uce usende ni ntuwa iyasangwike inzoka. 16 Lyene uce ukamunene uti, ‘Yeova Leza uwa Yaebele watantuma kuli wewe, nupya watalanda ati: “Leka antu yane yapita pakuti yakambombele umu lwanga,” lelo wakana ukuvwa kufika na ndakai. 17 Yeova walanda wati: “Kuli cikwene akuno umamanyila ukuti nene Yeova. Nimauma intuwa ino ndemile umu Luzi Lwa Naelo, na manzi yamasanguka uwazi. 18 Ni nswi izyaya umu Luzi Lwa Naelo zimafwa, nupya uluzi lumanunkanga, na Ina Ijipti yamafilwanga ukumwa manzi amu luzi luu.”’”

19 Lyene Yeova wanenyile Mose ati: “Nena Aloni uti, ‘Tola intuwa yako nu kutambalika ikasa lyako pa manzi yonsi amu Ijipti, pa nguzi izyayamo, pa mifoolo,* pa vifula alino na pa ncende zyonsi apakaikalila manzi, pakuti yaye uwazi.’ Mumaya uwazi umu mpanga yonsi iya Ijipti, kumwi sile nu mu manzi ali umu mbeketi nu mu nsembo.” 20 Lilyo kwene sile Mose na Aloni yacisile vino Yeova wayanenyile. Aloni wakatwisye intuwa nu kuma pa manzi ya mu Luzi Lwa Naelo pa nkoleelo yakwe Falao na aomvi yakwe, nupya manzi yonsi amu luzi yasangwike uwazi. 21 Ni inswi izyali umu luzi zyafwile, nu luzi lwatandike ukununka, Aina Ijipti yafilwanga ukumwa manzi ali umu Luzi Lwa Naelo, nupya umu mpanga yonsi iya Ijipti mwali uwazi.

22 Lelo ya simapepo ya vinjelengwe amu Ijipti nayo kwene yacisile icili cimwi kwene ukuomvya mano yao aa maleele, fwandi Falao watwalilile ukukoma umwenzo, nupya atuvwile kuli Mose na Aloni, wakwe vino Yeova walanzile. 23 Lyene Falao waswilile uku ng’anda yakwe, nupya ataacisilepo icili consi pali cii icacitike. 24 Fwandi Aina Ijipti yonsi imbanga manzi ya kumwa umu ncende iyazingulwike Luzi Lwa Naelo, pano yafilwanga ukumwa manzi aali umu Luzi Lwa Naelo. 25 Nupya manda 7 yapisile ukufuma pano Yeova wasangwilile amanzi ya mu Luzi Lwa Naelo ukuya uwazi.

8 Lyene Yeova wanenyile Mose ati: “Yanga kuli Falao ukamunene uti, ‘Yeova walanda wati: “Leka antu yane yapita pakuti yakambombele. 2 Ndi cakuti watwalilila ukukana ukuti yapita, nimaleta icinkunka cakwe ya cula umu mpanga yako yonsi. 3 Nupya umu Luzi Lwa Naelo mulaya ya cula aingi, yalaiza yakwingila nu mu ng’anda yako, umu muputule uno ukalaalamo, pali bedi yako nu mu mang’anda ya yaomvi yako, pa yantu yako, mu vitofu vyako alino nu mu viya vino ukapangilamo umukate. 4 Nupya yalaiza na pali wewe na pa yantu yako alino na pa yaomvi yako yonsi.”’”

5 Pa cisila Yeova wanenyile Mose ati: “Nena Aloni uti, ‘Tambalika intuwa yako pa nguzi, pa mifoolo ya Luzi Lwa Naelo na pa vifula, nu kuleka ukuti ya cula iize umu mpanga ya Ijipti.’” 6 Aloni nawe watambaliike ikasa lyakwe pa nguzi zya mu Ijipti, nupya ya cula yatandike ukufuma nu kukumana impanga ya Ijipti. 7 Lelo ya simapepo ya vinjelengwe nayo kwene yacisile icili cimwi kwene ukuomvya mano yao aa maleele, nayo kwene yalesile ya cula ukufuma nu kuya umu mpanga ya Ijipti. 8 Lyene Falao wamile Mose na Aloni nu kuyanena ati: “Papaatini kuli Yeova pakuti ya cula yafume pali nene na pa yantu yane, pano nkulonda antu inu yapita pakuti yakapeele ilambo kuli Yeova.” 9 Lyene Mose wanenyile Falao ati: “Musambazi, wewe nene lino ningaca nkupaapatileko kuli Leza pakuti ya cula yafume pali wewe, pa yaomvi yako, pa yantu yako na pa mang’anda yako. Yalasyala sile umu Luzi Lwa Naelo.” 10 Falao walanzile ati: “Ukacite vivyo mutondo.” Mose nawe walanzile ati: “Ndacita ukulingana na vino walanda pakuti umanye ukuti kutaya na muze uwaya wakwe Yeova Leza witu. 11 Ya cula yalafuma pali wewe, pa mang’anda yako, pa yaomvi yako na pa yantu yako. Yalasyala sile umu Luzi Lwa Naelo.”

12 Fwandi Mose na Aloni yafumile pali Falao, nupya Mose wapaapasile kuli Yeova pali ya cula yano walesile pali Falao. 13 Lyene Yeova wacisile vino Mose walenzile, nupya ya cula yatandike ukufwa umu mang’anda, mu misolo alino nu mu mpanga. 14 Aina Ijipti yakolonganikanga ya cula umu mitumba iingi sana, nupya impanga ya Ijipti yatandike ukununka. 15 Lino Falao waweni ukuti ivintu vyayako ningo, wakomizye umwenzo, nupya wakanyile ukuvwa kuli Mose na Aloni, wakwe vino Yeova walanzile.

16 Lyene Yeova wanenyile Mose ati: “Nena Aloni uti, ‘Tambalika intuwa yako nu kuma pa lukungu lwa pa musili, nalo lumasanguka ya undu umu mpanga yonsi iya Ijipti.’” 17 Nayo yacisile viivi kwene. Aloni watambaliike intuwa yakwe nu kuma ulukungu lwa pa musili, nupya ya undu iizile pa yantu na pa nyama. Ulukungu lonsi ulwa pa musili lwasangwike ya undu umu mpanga yonsi iya Ijipti. 18 Ya simapepo ya vinjelengwe yezizye ukucita icili cimwi pakuti yaleke kuye ya undu ukuomvya mano yao aa maleele, lelo yafizilwe. Nupya ya undu yatwalilile ukuya pa yantu na pa vinyama. 19 Fwandi ya simapepo ya vinjelengwe yanenyile Falao iyati: “Cii icicitika pa mulandu na maka yakwe Leza!”* Lelo Falao watwalilile ukukoma umwenzo, nupya atuuvwile kuli Mose na Aloni, wakwe vino Yeova walanzile.

20 Lyene Yeova wanenyile Mose ati: “Uce uye katondotondo uku luzi nu kuyaimilila lino Falao atatala wiza. Nupya uce umunene uti, ‘Yeova walanda wati: “Leka antu yane yapita pakuti yakambombele. 21 Lelo ndi cakuti utalesile kuti antu yane yapite, nimaleta ivizyembele* pali wewe, pa yaomvi yako na pa yantu yako nupya vilaingila nu mu mang’anda yako; vilazuula nu mu mang’anda ya Ina Ijipti, nupya vilakumana ponsi pano pali Aina Ijipti. 22 Pa wanda uwo, ndacingilila impanga ya Gosyeni umukaikala antu yane. Mwene mutalaya ivizyembele, nupya kuli cikwene akuno ulamanyila ukuti, ne Yeova, naya umu mpanga yii. 23 Nupya ndalenga ukuti paye upusano pa yantu yane na pa yantu yako. Mutondo icizungusyo cii cilacitika.”’”

24 Yeova wacisile vivyo kwene, ivizyembele ivingi sana vyatandike ukwingila umu ng’anda yakwe Falao nu mu mang’anda ya yaomvi yakwe nupya vyasalangine umu mpanga yonsi iya Ijipti. Vyononyile impanga ya Ijipti. 25 Lyene Falao wasusile aama Mose na Aloni nu kuyanena ati: “Pitangini mukapeele ilambo kuli Leza winu umu mpanga kwene yii.” 26 Lelo Mose walanzile ati: “Citanga cizipe ukucita vivyo, pano Aina Ijipti yangalola ukuti ilambo lino tukupeela kuli Yeova Leza witu i lya winyi. Uzye Aina Ijipti yatanga yatutame na mawe ndi cakuti yatatemilwe ilambo lino tukupeela? 27 Tulapita ulwendo lwa manda yatatu nu kuya uku lwanga, nupya kuuku kwene akuno tulaya tukapeelele ilambo kuli Yeova Leza witu, wakwe vino watatunena.”

28 Lyene Falao walanzile ati: “Nimaleka ukuti mupite pakuti mukapeele ilambo kuli Yeova Leza winu umu lwanga. Lelo mutalinzile sile ukuya ukutali sana. Mumpaapatileko.” 29 Lyene Mose walanzile ati: “Nimapita nu kuyapaapata kuli Yeova, nupya mutondo ivizyembele vilafuma pali wewe Falao, pa yaomvi yako na pa yantu yako. Lelo ulinzile ukuta ukutubepa nu kuta ukukaanya antu itu ukupita kuti yakapeele ilambo kuli Yeova.” 30 Lyene Mose wafumile pali Falao nu kuyapaapata kuli Yeova. 31 Fwandi Yeova wacisile ukulingana na vino Mose walanzile, nupya ivizyembele vyafumile pali Falao, pa yaomvi yakwe na pa yantu yakwe. Kutaasile nanti a conga. 32 Nomba nupya kwene Falao wakomile umwenzo, ataalesile Aina Izlaeli ukupita.

9 Lyene Yeova wanenyile Mose ati: “Yanga kuli Falao nu kuyamunena uti, ‘Yeova Leza uwa Yaebele walanda wati: “Leka antu yane yapita pakuti yakambombele. 2 Lelo ndi cakuti wakana kuti yapite nupya watwalilila ukuyalesya, 3 lola! Ne Yeova, ndaleta icinkunka pa viteekwa vyako ivili umu mpanga. Paliza icinkunka iciipisye pa mfwalasi, pali ya punda, pa ngamali, pa ng’ombe na pa mfwele. 4 Nupya Yeova alalenga paye upusano pa viteekwa vya Ina Izlaeli ni viteekwa ivya Ina Ijipti, kusi iciteekwa ica Ina Izlaeli icilafwa.”’” 5 Yeova wimike insita isoololwe, watiile: “Ne Yeova, ndacita cii mutondo umu mpanga yii.”

6 Yeova wacisile vivyo kwene uwanda uwalondelilepo, iviteekwa vyonsi ivya Ina Ijipti vyatandike ukufwa, lelo kusi iciteekwa ica Mwina Izlaeli icafwile. 7 Lino Falao walondelizye, wazanyile ukuti kusi iciteekwa nanti conga ica Mwina Izlaeli icafwile. Lelo Falao watwalilile ukukoma umwenzo nupya ataalesile Aina Izlaeli ukupita.

8 Lyene Yeova wanenyile Mose na Aloni ati: “Zuzyini itwi lya mu cibili umu makufi inu, nupya Mose afwile ukulisumbila umupela ale na Falao akulolako. 9 Nupya itwi lilyo lilasanguka ulukungu umu mpanga yonsi iya Ijipti, nupya lilalenga antu ni nyama ukuya ni vipute umu mpanga yonsi iya Ijipti.”

10 Fwandi yatozile itwi lya mu cibili nu kuyaimilila pa nkoleelo yakwe Falao, nupya Mose walisumbiile umupela, nalyo lyalenzile antu ni nyama ukuya ni vipute. 11 Ya simapepo ya vinjelengwe yafizilwe ukwimilila pa nkoleelo yakwe Mose pa mulandu ni vilonda, pano yene na Ina Ijipti yonsi yakweti vipute. 12 Lelo Yeova walesile umwenzo wakwe Falao ukuya ukome, nupya atuuvwile kuli aliyo wakwe viivi kwene vino Yeova wanenyile Mose.

13 Lyene Yeova wanenyile Mose ati: “Katondotondo uce uye ukimilile kuli Falao nu kumunena uti, ‘Yeova Leza uwa Yaebele walanda wati: “Leka antu yane yapite pakuti yakambombele. 14 Lyene nimaleta ivinkunka vyane vyonsi pali wewe, pa yaomvi yako na pa yantu yako, pakuti umanye ukuti kutaya muze uwaya wakwe nene umu nsi yonsi. 15 Nupya ukufika ndakai, nga naomvya mpiti maka yane nu kuleta ivinkunka pali wewe na pa yantu yako nupya nga ononwa. 16 Lelo naaleka kuti utwalilile ukuya nu umi pakuti nkulange maka yane nu kuleka izina lyane limanyikwe umu nsi yonsi. 17 Uzye ucili ukweti icilumba pa yantu yane vino usikulonda kuti yapite? 18 Mutondo pa nsita wakwe ikwene, ndaleta imvula iya mawe ikalamba, iitaatala yatoonyapo umu Ijipti ukufuma pano impanga yii yayelileko ukufika na ndakai kwene. 19 Fwandi peela isunde lyakuti iviteekwa vyako vyonsi ni vintu vyako vyonsi ivili umu mpanga yaviwezye nu kuvika umu vikuulwa. Umuntu wensi ni nyama ili yonsi ivilazanwa panzi ukwaula ukwikala umu ng’anda vilafwa uku mvula ya mawe.”’”

20 Umuntu wensi pa yaomvi yakwe Falao uwacindike vino Yeova walanzile, lilyo kwene waile awezya aomvi yakwe nu kuingizya umu mang’anda nupya wawezizye ni viteekwa vyakwe nu kuvingizya umu vikuulwa, 21 lelo wino ataacindike vino Yeova walanzile, walesile aomvi yakwe ni viteekwa kusyala umu mpanga.

22 Lyene Yeova wanenyile Mose ati: “Konzolola ikasa lyako nu kusonta ukwi yulu, pakuti imvula ya mawe iize umu mpanga yonsi iya Ijipti, pa muntu, pa nyama na pa vilimwa vyonsi ivili umu mpanga ya Ijipti.” 23 Fwandi Mose walozizye intuwa yakwe ukwi yulu, lyene Yeova walenzile kuye ukupangalakansya nupya imvula ya mawe nu moto* vyaponyile pano nsi, Yeova watwalilile ukuleta imvula ya mawe umu mpanga ya Ijipti. 24 Kwali imvula ya mawe nupya kwali umoto uwamyantulanga umu mvula iiyo. Yaali ikalamba sana; nupya kutatazile kuye imvula ya musango uwo ukufuma pano antu iikaliile umu mpanga ya Ijipti. 25 Imvula ya mawe yononyile vyonsi ivyali umu mpanga ya Ijipti, ukutandikila pa muntu ukufika uku nyama, nupya yononyile ivilimwa vyonsi nu kuwisya imiti yonsi. 26 Suka sile uku mpanga ya Gosyeni ukwikalanga Aina Izlaeli, u kutaali imvula ya mawe.

27 Fwandi Falao watumile akuya ama Mose na Aloni nu kuyanena ati: “Umuku uu injembuka. Yeova u mulungami, nupya nemo na antu yane ituluvyanya. 28 Papaatini kuli Yeova pakuti ukupangalakansya ni mvula ya mawe vite. Lyene nimaleka kuti mupite, nupya mutakutwalilila ukwikala muno.” 29 Fwandi Mose wanenyile Falao ati: “Nga nafuma sile umu musumba, nimaya nkakatusye makasa nu kupepa kuli Yeova. Lyene ukupangalakansya kumata nupya imvula ya mawe itakutwalilila, pakuti umanye ukuti insi i yakwe Yeova. 30 Lelo imanya ukuti nanti ciye vivyo, wemo na aomvi yako mutakutiina Yeova Leza.”

31 Nupya fulakisi* na baale vyononyilwe, pa mulandu wakuti ale baale waca nupya fulakisi ale wafukula. 32 Lelo kusi ingano izyononyilwe pa mulandu wakuti ala zitali zice. 33 Lyene Mose wafumile umu musumba kuli Falao nupya waile akatusya makasa nu kupepa kuli Yeova, nupya ukupangalakansya na mawe ya mvula vyatile ni mvula yatile ukutoonya. 34 Lino Falao waweni ukuti imvula na mawe ya mvula alino nu kupangalakansya vyata, wayembwike nupya kwene nu kukoma umwenzo kumwi na aomvi yakwe kwene. 35 Nupya umwenzo wakwe Falao watwalilile ukuya ukome, atalesile kuti Aina Izlaeli yapite, wakwe vino Yeova walanzile ukupitila muli Mose.

10 Lyene Yeova wanenyile Mose ati: “Yanga kuli Falao, pano indenga umwenzo wakwe ni myenzo ya yaomvi yakwe ukuya ikome, pakuti incite ivizungusyo kuli aliwe, 2 na pakuti uce unene ana yako na izikulu yako pali vino imfulula Aina Ijipti ni vizungusyo vino incita kuli aliyo; nupya mulamanya ukuti nene indi Yeova.”

3 Fwandi Mose na Aloni yaile kuli Falao nu kuyamunena iyati: “Yeova Leza uwa Yaebele walanda wati, ‘Uzye imiku inga ino ulatwalilila ukukoma umwenzo kuli nene? Leka antu yane yapita pakuti yakambombele. 4 Ndi cakuti watwalilila ukukana kuti antu yane yapite, mutondo ndaleta ya makanta umu ncende yako. 5 Yalakumana umusili onsi nupya utalaaloleka. Yalalya na vyonsi ivyapuswike uku mvula ya mawe, yalalya ni miti yonsi iya mu mpanga iikulemba. 6 Yalazuula umu mang’anda yako, mu mang’anda ya yaomvi yako yonsi nu mu mang’anda ya Ina Ijipti yonsi nupya ivikolwe vyako vitaatala vyalola ya makanta ya musango uwo ukufuma pano vyayelile umu mpanga ya Ijipti ukufika na ndakai.’” Lyene Mose wafumile pali Falao.

7 Lyene aomvi yakwe Falao yanenyile Falao iyati: “Uzye umuntu wii amatwalilila ukutwika umu uzanzo ukufika lilaci? Musambazi, leka antu yaa yapita pakuti yakaombele Yeova Leza wao. Uzye na likwene utali uwiluke ukuti impanga ya Ijipti yationoneka?” 8 Fwandi Falao wamile Mose na Aloni nu kuyanena ati: “Pitangini mukaombele Yeova Leza winu. Nomba uzye ale aaweni aamapita?” 9 Mose nawe wamwaswike ati: “Tumapita na acance, aikolo, ana itu aonsi na akazyana, imfwele zitu alino ni ng’ombe zitu, pano tulaya tukakwate umutebeto kuli Yeova.” 10 Falao nawe wayanenyile ati: “Ndi cakuti naleka mwapita pamwi na ana inu ale lyene Yeova ali namwe! Nupya iciilanga paswe ukuti mukulonda ukucita iciipe. 11 Ntakuzumilizya ica musango uwo! Mumapita sile na onsi pakuti mukaombele Yeova, pano cikwene acino mwalondanga.” Lyene yayazinzile pali Falao.

12 Lyene Yeova wanenyile Mose ati: “Tambalika ikasa lyako pa mpanga ya Ijipti pakuti makanta aize umu mpanga ya Ijipti nu kulya ivimelwa vyonsi ivya mu mpanga ivyasyazile uku mvula ya mawe.” 13 Lilyo kwene sile Mose watambaliike intuwa yakwe pa mpanga ya Ijipti, nupya Yeova walesile umuza uwa ku uwondaka utandike ukupungila umu mpanga ya Ijipti pa wanda kwene uwa umusanya nu usiku. Lino cafisile katondo umuza uwo waleesile ya makanta. 14 Nupya ya makanta iizile umu mpanga yonsi iya Ijipti nu kwikala umu ncende yonsi. Iipisye sana; kutatazile kuye ya makanta aingi wakwe yaaya, nupya kutalatala kuye ya makanta aingi wakwe yaaya. 15 Yakumine impanga yonsi iya Ijipti, nupya impanga yafiisile pa mulandu na ya makanta; yaliile ivimelwa vyonsi ivya mu mpanga iiya alino ni vizao vyonsi ivya ku miti ivyasyazile uku mvula ya mawe; kusi amafwa asyazile uku miti nanti ku vimelwa ivya mu mpanga yonsi iya Ijipti.

16 Fwandi Falao wamile zuwa zuwa Mose na Aloni nu kuyanena ati: “Injembukila Yeova Leza winu kumwi namwe kwene. 17 Napaapata njelelini pa luyembu lwane pa muku kwene uu, nupya papaatini kuli Yeova Leza winu pakuti afumye icinkunka cii iciipisye pali nene.” 18 Fwandi Mose wafumile pali Falao nu kuyapaapata kuli Yeova. 19 Lyene Yeova walesile ukuti umuza uwa ku uwondaka utandike ukupunga sana, nupya umuza uwo wasenzile ya makanta nu kuyatwala muli Yemba Muyenzu. Kutaasile makanta nanti a wenga umu mpanga yonsi iya Ijipti. 20 Lelo Yeova walesile ukuti umwenzo wakwe Falao uye ukome, nupya Falao ataalesile Aina Izlaeli ukupita.

21 Lyene Yeova wanenyile Mose ati: “Konzolola ikasa lyako nu kusonta ukwi yulu pakuti umu mpanga ya Ijipti muye imfinzi, kuli kuti imfinzi ikalamba.” 22 Lilyo kwene sile Mose wakonzolwile ikasa lyakwe nu kusonta ukwi yulu, nupya umu mpanga yonsi iya Ijipti mwali imfinzi ikalamba pa manda yatatu. 23 Aina Ijipti yatalolananga, nupya pa manda yatatu kusi uwakatwike pano watenzi; lelo Aina Izlaeli yonsi yene yakweti uluswepo. 24 Lyene Falao wamile Mose nu kumunena ati: “Pitangini mukaombele Yeova. Musye sile ing’ombe zinu ni mfwele zinu. Ana inu yene mungapita nayo.” 25 Lelo Mose wanenyile Falao ati: “Wewe kwene ulatupeela na malambo nupya tulaya tukayapeele kuli Yeova Leza witu. 26 Tumasenda ni viteekwa vitu kwene. Kusi inyama iimasyala, pano tulaaomvya iviteekwa vimwi uku kupepa Yeova Leza witu, nupya tutamanyile vino tulapeela Yeova ukufikila twaca twafika kuuku kwene.” 27 Lelo Yeova walesile umwenzo wakwe Falao ukuya ukome, nupya Falao ataalesile kuti Aina Izlaeli yapite. 28 Falao wanenyile Mose ati: “Fuma pano! Nupya utaca uwelepo kuno, pano uwanda uno ulawela kuno ulafwa.” 29 Mose nawe walanzile ati: “I cisuma, ntalakulolapo.”

11 Lyene Yeova wanenyile Mose ati: “Kwasyala icinkunka conga cino nimaleta pali Falao nu mu Ijipti. Pa cisila, alaleka ukuti mufumemo. Nupya pa kuleka kuti mupite, alamuzinga sile. 2 Lyene nena Aina Izlaeli aonsi na anaci yonsi kuti yalenge ivintu ivyapangilwa na siuva na goldi ku inamupalamano.” 3 Yeova walenzile Aina Izlaeli ukutemwikwa uku Ina Ijipti. Nupya Mose wizile aya umucindikwe sana umu mpanga ya Ijipti ku yaomvi yakwe Falao alino nu ku Ina Izlaeli.

4 Lyene Mose walanzile ati: “Yeova watalanda ukuti, ‘Usiku pakasi, nimaya umu Ijipti, 5 nupya iyeli lyonsi ilya mu mpanga ya Ijipti limafwa, ukutandikila pi yeli lyakwe Falao uwikala pa cilimba ca wene ukufika nu kwi yeli lya muomvi umukazyana aakasya pi we, kumwi sile ni yeli lyonsi ilya viteekwa. 6 Umu mpanga yonsi iya Ijipti mumaya ukuloosya ukukalamba u kutatala kwayako nupya kutalatala kuyeko. 7 Lelo kusi nanti a simbwa alaosela Aina Izlaeli nanti ukuosela iviteekwa vyao, pakuti umanye ukuti Yeova angalenga paye upusano pa Ina Ijipti na Ina Izlaeli.’ 8 Nupya aomvi yako yonsi yaliza kuli nene nu kumfukamila, nupya yalalanda yati, ‘Pitanga kumwi na antu yako yonsi.’ Lyene nani ndapita.” Pa cisila, Mose wafumile pali Falao ala watasoka sana.

9 Yeova wanenyile Mose ati: “Falao ataluvwa kuli wewe, pakuti ince incite ivizungusyo ivingi umu mpanga ya Ijipti.” 10 Mose na Aloni yacisile ivizungusyo vii vyonsi kuli Falao, lelo Yeova walesile umwenzo wakwe Falao ukuya ukome, nupya Falao ataalesile Aina Izlaeli ukufuma umu mpanga yakwe.

12 Lyene Yeova wanenyile Mose na Aloni umu mpanga ya Ijipti ati: 2 “Umwezi uu umaya ali wa kutandikilako umu myezi kuli mwemwe. Umaya ali mwezi wa kutandikilako umu myezi ya mu mwaka kuli mwemwe. 3 Munene Aina Izlaeli yonsi muti, ‘Pa wanda uwalenga 10 umu mwezi uu, cila lupwa lufwile ukutola imfwele ukulingana na muno lwavyalilwa, cila lupwa lufwile ukutola imfwele yonga. 4 Lelo ndi cakuti amu lupwa yacepa sana icakuti yatanga yalye yonga imfwele yonsi, yafwile ukwankana na inamupalamano imfwele iiyo ukulingana ni mpendwa ya yantu yayo. Yafwile ukulola impendwa ya yantu alino nu wingi wa nyama ino cila muntu angalya. 5 Imfwele iiyo ilinzile ukuya isuma, ilinzile ukuya iya mwaka onga. Mungasoolola imfwele ya kalume nanti imbuzi. 6 Mulinzile ukusunga imfwele iiyo nanti imbuzi ukufikila pa wanda uwalenga 14 umu mwezi uu, nupya Aina Izlaeli yonsi yalinzile kukoma imfwele iiyo nanti imbuzi manguzi lino kutali kufiite sana. 7 Yalinzile ukutola uwazi umwi nu kuusansa umu mbali zyoili izya mafulemu ya visaasa, alino na papela yi fulemu lya cisaasa mu mang’anda muno yalaaliila ucilo.

8 “‘Yalinzile ukulya inyama usiku kwene uwo. Yalinzile ukuyoca pa moto nu kuiliila pamwi nu mukate uwaula icitutumusi kumwi nu musalu ulule. 9 Mutafwile ukulya inyama iisi nanti iyeleke, lelo mulinzile ukuyoca umu moto kumwi nu mutwe, vimbombo alino ni vya munda. 10 Mutalinzile ukusunga icili consi uku nyama iiyo kuti cifike katondo, lelo ndi cakuti kuli ivili vyonsi ivyasyala ukufika katondo mulinzile ukuvyoca. 11 Nupya vino mulinzile ukucita lino mukulya aevi, mulinzile ukuinyepa imisipi umu misana, kuzwala indyatu nu kulema intuwa; mulinzile nu kukalauka pa kulya. Pano Uucilo Wakwe Yeova. 12 Pano usiku kwene uu nimapita umu mpanga iya Ijipti nu kukoma mayeli yonsi aayamo, ukutandikila pa muntu ukufika uku nyama; nupya nimapingula na ya leza yonsi amu Ijipti. Nene indi Yeova. 13 Uwazi umaya icimanyililo cinu umu mang’anda yano mutenzimo; nupya nizalola uwazi nu kumuciluka, nupya mutakwiza mufwe uku cinkunka cino nimaleta pa Ina Ijipti.

14 “‘Muce mwaiusya uwanda uu, nupya muce mwauzevya wa mutebeto kuli Yeova umu nkulo zinu zyonsi. Isunde lii i lya manda pe, muce mwaiusya uwanda uu. 15 Pa manda 7 muce mwalya umukate usi ni citutumusi. Nupya pa wanda wa kutandikilako mufwile ukufumya icitutumusi umu mang’anda inu, pano wensi uwalya icitutumusi pa wanda wa kutandikilapo ukufika pa wanda uwalenga 7, alinzile ukukomwa umu Izlaeli. 16 Pa wanda uwa kutandikilako mulaakwata ukongano wa muzilo, na pa wanda uwalenga 7 napo kwene mulaakwata ukongano wa muzilo na uze. Kusi umulimo uulinzile ukuombwa pa manda yaayo. Mulaapekanya sile ivyakulya vino mungakwanisya ukulya.

17 “‘Mulinzile Ukuzevya Umukate Uwaula Icitutumusi, pano pa wanda kwene uu, nimafumya maumba inu mu mpanga ya Ijipti. Nupya mwaiusya uwanda uu umu nkulo zinu zyonsi pano i sunde lya manda pe. 18 Umu mwezi wa kutandikilako pa wanda uwalenga 14 manguzi, muce mwalya umukate uwaula icitutumusi ukufika manguzi pa wanda uwalenga 21. 19 Kusi icitutumusi icilinzile ukuzanwa umu mang’anda inu pa manda 7, pano ndi cakuti ali wensi walya icitutumusi, aye umwenyi nanti umwikazi wa mu mpanga, alinzile ukukomwa pakuti afumiziwe umu Izlaeli. 20 Mutalinzile ukulya icitutumusi icili consi. Muce mwalya umukate uwaula icitutumusi umu mang’anda inu yonsi.’”

21 Lyene zuwa zuwa Mose wamile akalamba yonsi amu Izlaeli nu kuyanena ati: “Yangini mukasoolwele indupwa zinu zyonsi inyama* nu kukoma inyama zizyo pakuti muziomvye pa kuzevya Ucilo. 22 Lyene mulinzile ukutimpika kamwanzi kakwe isopu mu wazi uli muli beseni nu kukanyizya uwazi uwo papela yi fulemu alino nu mu mbali zyoili zya mafulemu; nupya kusi ali wensi muli mwemwe aalinzile ukufumila panzi ukufikila katondo. 23 Lyene lino Yeova amapita umu Ijipti nu kuleta icinkunka nupya walola uwazi uli papela yi fulemu nu mu mbali ya mafulemu yoili, Yeova amaiza aciluke umulyango uwo, nupya atakwiza aleke ali umu mang’anda inu ukufwa uku cinkunka.

24 “Muce mwazevya uwanda uu pamwi na ana inu, pano lii i sunde ilya manda pe. 25 Nupya lino mulingila umu mpanga ino Yeova alamupeela wakwe vino walanzile, muce mwazevya uwanda uu. 26 Ndi cakuti ana inu yaca yamuzya ukuti, ‘Uzye ukuzevya kuu kukupiliula cani?’ 27 muce muyanene muti, ‘I lambo lya Ucilo kuli Yeova, uwacilwike mang’anda ya Ina Izlaeli umu Ijipti lino waleesile icinkunka pa Ina Ijipti, lelo wasiile mang’anda itu.’”

Lyene antu yafukime nu kutaizya kuli Leza. 28 Aina Izlaeli yapisile nu kuyacita viivi kwene vino Yeova wanenyile Mose na Aloni. Viivi kwene avino yacisile.

29 Lyene usiku pakasi, Yeova wakomile mayeli yonsi umu mpanga ya Ijipti, ukutandikila pi yeli lyakwe Falao uwali pa cilimba ca wene ukufika ukwi yeli lya muzya uwali umu cifungo, alino na mayeli yonsi aa nyama. 30 Falao wakatwike usiku kwene uwa kumwi na aomvi yakwe yonsi alino na Ina Ijipti yauze yonsi, nupya kwali ukuloosya ukukalamba uku Ina Ijipti, pano kutali ing’anda nanti a yonga muno umwi ataafwile. 31 Lilyo kwene usiku Falao wamile Mose na Aloni nu kuyanena ati: “Pitangini, fumini umu yantu yane kumwi na Ina Izlaeli yonsi. Pitangini mukaombele Yeova wakwe vino mwalanzile. 32 Musende ni mfwele zinu kumwi ni ng’ombe nu kupita, wakwe vino mwalanzile. Lelo nani kwene mufwile ukumpaala.”

33 Nupya Aina Ijipti yatandike ukupatikizya Aina Izlaeli kuti yafume zuwa umu mpanga ya Ijipti ala yakulanda yakuti, “pano swensi tuli wa yantu afwe!” 34 Fwandi Aina Izlaeli yasenzile umunya wakwe fulaulo ala utali ututumuke, kumwi ni viya vino yakasilangamo, yavinyefile umu nsalu nu kuvisenda pa viye. 35 Aina Izlaeli yacisile vino Mose wayanenyile nupya yalenzile uku Ina Ijipti ivintu ivyapangwa na siuva na goldi kumwi sile ni vyakuzwala. 36 Yeova walenzile Aina Izlaeli ukutemwikwa uku Ina Ijipti, icakuti yayapeezile na vino yalenzile, nupya Aina Izlaeli yasenzile ivyuma ivya Ina Ijipti.

37 Lyene Aina Izlaeli yakatwike ukufuma uku Lamesesi nu kuya uku Sukoti, yaali aonsi umupiipi na 600,000 ukufumyako ana. 38 Nupya impendwa ikalamba iya yantu yauze* nayo kwene yapisile nayo, kumwi sile ni mfwele izingi, imbuzi alino ni ng’ombe. 39 Yatandike ukupanga imikate iulungane iyaula icitutumusi ukuomvya umunya uno yafumile nao umu Ijipti. Mikate iiyo itaali itutumuke, pano yayazinzile zuwa zuwa umu Ijipti ukwaula ukuti yasende ivyakulya ivili vyonsi.

40 Aina Izlaeli ikazile umu Ijipti imyaka 430. 41 Pa mpela ya myaka 430, pa wanda kwene uu, antu yakwe Yeova yonsi* yafumile umu mpanga ya Ijipti. 42 Wali usiku uwakuti yazevye pali vino Yeova wayafumizye umu mpanga ya Ijipti. Nupya usiku kwene uwo, Aina Izlaeli yonsi yali nu kulazevya kuli Yeova umu nkulo zyao zyonsi.

43 Lyene Yeova wanenyile Mose na Aloni ati: “Isunde lya Ucilo aeli: Kusi umwenyi afwile ukulya icakulya ca ucilo. 44 Lelo ndi cakuti umwi wakwata umuzya umonsi wino wakazile ni mpiya, mulinzile ukumuzembulula. Lyene nga wazembululwa alino angalya. 45 Umwenyi akaikala namwe nu muomvi uwafuma uku mpanga yuze yatalinzile ukulya icakulya ca ucilo. 46 Cakulya ca ucilo mufwile ukuciliila umu ng’anda yonga. Mutalinzile ukufumya inyama ili yonsi panzi, nupya mutalinzile ukuvuna ifupa ili lyonsi uku nyama iiyo. 47 Aina Izlaeli yonsi yafwile ukuzevya ucilo. 48 Ndi cakuti umwenyi akaikala namwe nupya akulonda ukuzevyako Ucilo kuli Yeova, umonsi wensi uwa mu ng’anda yakwe alinzile ukuzembululwa. Lyene alino angazevyako, nupya alaya wa mwikazi wa mu mpanga iiyo. Lelo umonsi wensi aatazembululwa atalinzile ukulyako icakulya ca ucilo. 49 Isunde lyonga kwene ililaomba uku mwikazi wa mu mpanga, i lilaomba nu ku mwenyi wino akaikala namwe.”

50 Fwandi Aina Izlaeli yonsi yacisile wakwe vino Yeova wanenyile Mose na Aloni. Viivi kwene avino yacisile. 51 Pa wanda kwene uu, Yeova wafumizye Aina Izlaeli kumwi na maumba yao umu mpanga ya Ijipti.

13 Nupya kwene Yeova wanenyile Mose ati: 2 “Mpatwile mayeli yonsi aonsi umu Ina Izlaeli. Umonsi wensi aalatandikilapo ukuvyalwa nanti inyama iya kalume iilatandikilapo ukuvyalwa, i vyane.”

3 Lyene Mose wanenyile antu ati: “Mwaiusya uwanda uu uno mwafumile umu Ijipti lino mwali umu uzya, pano Yeova wamuleesile kuu pa mulandu na maka yakwe. Fwandi mutaalya icitutumusi icili consi. 4 Mwafumile umu Ijipti pa wanda kwene uu, umu mwezi wakwe Abibu.* 5 Lino Yeova alamwingizya umu mpanga iya Ina Kenani, iya Ina Hiti, iya Ina Amoli, iya Ina Hivi, ni ya Ina Yebusi, ino walafile uku vikolwe vinu ukuti alamupeela, kuli kuti impanga umwaya umukaka nu uci, muce mwazevya uwanda uu mu mwezi kwene uu. 6 Pa manda 7 muce mwalya umukate uwaula icitutumusi, nupya uwanda uwalenga 7 ulaya uwanda wa mutebeto kuli Yeova. 7 Muce mwalya umukate uwaula icitutumusi pa manda 7; nupya kusi icitutumusi icili consi icilinzile ukuzanwa muli mwemwe, nu munya ututumuke utalinzile ukuzanwa muli mwemwe umu ncende inu yonsi. 8 Nupya pa wanda uwo mulinzile ukunena ana inu ukuti, ‘Kuzevya kuu kuyelileko pa mulandu na vino Yeova watucitiile lino twafumile umu Ijipti.’ 9 Nupya ukuzevya kuu kulaya wa cimanyililo ca pi kasa linu nupya kulaya wa ciusizyo ca pa vipuma vinu, pakuti isunde lyakwe Yeova likaye umu tunwa twinu, pano Yeova wamufumizye umu Ijipti pa mulandu na maka yakwe. 10 Cila mwaka muce mwalondela isunde lii uwanda uwo nga wafika.

11 “Lino Yeova alamwingizya umu mpanga iya Ina Kenani, ino walafile ukupeela kuli mwemwe nu ku vikolwe vinu, 12 muce mupeele Yeova amayeli yonsi aonsi, kumwi ni viteekwa vinu vyonsi ivya kalume ivilatandikilapo ukuvyalwa. Iviteekwa vinu ivya kalume i vyakwe Yeova. 13 Punda wensi uwatandikilapo ukuvyalwa mulinzile kumupyanikizyapo ni mfwele, ndi cakuti mutamupyanikizye ni mfwele, ale lyene mulinzile ukumuvuna insingo. Nupya ana inu aonsi mayeli mulinzile ukuyakulula.

14 “Ndi cakuti ana inu yaca yamuzya ukuti, ‘Uzye cii cikupiliula cani?’ muce muyanene ukuti, ‘Yeova watufumizye umu Ijipti umu uzya pa mulandu na maka yakwe. 15 Lino Falao wakomile umwenzo nu kukana ukuti tufume umu Ijipti, Yeova wakomile mayeli yonsi amu Ijipti, ukutandikila pi yeli lya muntu ukufika nu ku nyama. Ali mulandu uno tukupeela kuli Yeova amayeli yonsi aonsi, nu kukulula ana itu aonsi mayeli.’ 16 Cii cilaya wa cimanyililo ca kwi kasa linu, nupya cilaya wa cimanyililo ca pa vipuma vinu, pano Yeova watufumizye umu Ijipti pa mulandu na maka yakwe.”

17 Lyene lino Falao walesile kuti Aina Izlaeli yapite, Leza atayatungulwile umu nzila iyapita umu mpanga iya Ina Filisti, nanti icakuti yaali iipi. Pano Leza walanzile ati: “Aina Izlaeli yangalanguluka ndi cakuti alwani yao yayazanza, nupya yangaswilila uku Ijipti.” 18 Fwandi Leza walenzile Aina Izlaeli ukuzinguluka pa kupita umu museo wa ku lwanga ulwaya umupiipi na Yemba Muyenzu. Nomba yafumile umu mpanga ya Ijipti ala yali umu maumba, kwati amaumba ya yasilika. 19 Nupya Mose wasenzile na mafupa yakwe Jozefu, pano Jozefu walenzile ya mwana Izlaeli ukulapa lino walanzile ati: “Leza alamwazwa, nupya pa kufuma muno muce musende na mafupa yane.” 20 Lyene yakatwike uku Sukoti nupya yaile iyapanga inkambi pa Etamu, ku mpela ya lwanga.

21 Yeova wayatungululanga umusanya ukuomvya ikumbi, nupya usiku wayatungululanga ukuomvya icimbilimbili ca moto pakuti yakwate uluswepo, cico calenzile ukuti yapita umusanya nu usiku. 22 Ikumbi litafumanga pa Ina Izlaeli umu nsita ya kasanya, ni cimbilimbili ca moto citafumanga pali aliyo umu nsita ya usiku.

14 Lyene Yeova wanenyile Mose ati: 2 “Nena Aina Izlaeli ukuti yaweluluke nu kuyapanga inkambi umupiipi na Pihailoti, pakasi kakwe Migidoli na yemba, incende iyalozyanya na Baali-zefoni. Mupange inkambi ukulozyanya na Baali-zefoni mupiipi na yemba. 3 Lyene Falao alalanda pa Ina Izlaeli ati, ‘Iyaponga, yakululumba sile umu mpanga. Mu lwanga musi inzila.’ 4 Ndalenga umwenzo wakwe Falao ukuya ukome, nupya alayakonka, lyene ndaicindamika lino ndacimvya Falao na asilika yonsi; nupya Aina Ijipti yalamanya ukuti nene indi Yeova.” Aina Izlaeli yacisile vino yanenyilwe.

5 Pa cisila umwene wa ku Ijipti uvwile ukuti Aina Izlaeli iyutuka. Lilyo kwene sile Falao na aomvi yakwe yacinjizye mano, nupya yalanzile iyati: “I cani cino twacita? U mulandu ci uno twalekela Aina Izlaeli kuti yate ukutuombela wa yazya?” 6 Lyene wapekinye maceleta yakwe ankondo, nupya wasenzile na antu yakwe. 7 Wasenzile maceleta yakwe asuma 600 alino na maceleta yauze yonsi amu Ijipti, nupya umu maceleta yonsi mwali asilika. 8 Fwandi Yeova walenzile umwenzo wakwe Falao umwene wa ku Ijipti ukuya ukome, nupya Falao wakonsile Aina Izlaeli, lelo Aina Izlaeli yapitanga ukwaula intete. 9 Aina Ijipti kumwi sile na maceleta yonsi yakwe Falao, imfwalasi, aakwezilepo alino na asilika yakwe, yakonsile Aina Izlaeli kuno yapanzile inkambi umu mbali yakwe yemba, umupiipi ni ncende ya Pihailoti iyalozyanya na Baali-zefoni.

10 Lino Falao wapaliime Aina Izlaeli yaweni Aina Ijipti yakuyakonka. Lyene yuvwile intete nupya yatandike ukulilila kuli Yeova. 11 Lyene yuzizye Mose iyati: “Uzye ale a pa mulandu wakuti umu Ijipti mutaya incende iyakuziikamo ali cino watuletiile kuno pakuti twize tufwile umu lwanga? U mulandu ci uno watufumizye umu Ijipti? 12 Uzye vikwene asi ali vino twakunenyile umu Ijipti ukuti, ‘Tuleke, pakuti twaombela Aina Ijipti’? Pano cazipa twaombela Aina Ijipti ukucila tufwile umu lwanga.” 13 Lyene Mose wanenyile Aina Izlaeli ati: “Mutuvwa intete. Imililini ndi nu kulola vino Yeova amamupususya ilelo. Pano Aina Ijipti yano mukulola ilelo, mutalatala muyalolepo nupya. 14 Yeova umwineco aamamulwila, mwemo mwikale sile mya.”

15 Lyene Yeova wanenyile Mose ati: “U mulandu ci uno ukulilila kuli nene? Nena Aina Izlaeli ukuti yatwalilile nu ulendo. 16 Lelo wemo katusya intuwa yako nu kutambalika ikasa pali yemba nu kupaatukanya yemba, pakuti Aina Izlaeli yapite pali yemba pa musili uume. 17 Nani nimaleka Aina Ijipti ukukoma imyenzo, nupya yamakonka Aina Izlaeli; vikwene avino nimaicindamika lino nimacimvya Falao na asilika yakwe yonsi, maceleta yakwe ankondo, alino na akwezile pa mfwalasi. 18 Nupya Aina Ijipti yamamanya ukuti nene indi Yeova lino nimaicindamika ukupitila umu kucimvya Falao, maceleta yakwe ankondo alino na akwezile pa mfwalasi.”

19 Lyene malaika wakwe Leza wa cumi uwakoleelelanga Aina Izlaeli wawelile icisila cao, ni kumbi ilyali pa nkoleelo yao lyawezile nu kwimilila icisila cao. 20 Fwandi ikumbi lilyo lizile ilimilila pakasi ka Ina Ijipti na Aina Izlaeli. Ku lusansa lwa Ina Ijipti ikumbi lilyo lyapeelanga imfinzi. Lelo ku lusansa lwa Aina Izlaeli lyapeelanga uluswepo. Fwandi Aina Ijipti yatapaliime uku Ina Izlaeli usiku onsi.

21 Lyene Mose watambaliike ikasa lyakwe pali yemba; nupya Yeova walenzile umuza ukome uwa ku ufumondaka ukupungila pali yemba usiku onsi, manzi yankanikiine nu musili wa pansi pali yemba umile. 22 Fwandi Aina Izlaeli yapisile pali yemba pa musili uume, ala manzi iyapanga iciumba ukwi lunji lya Ina Izlaeli na kuli cimani. 23 Aina Ijipti yakonsile Aina Izlaeli ni mfwalasi zyakwe Falao zyonsi, maceleta yakwe ankondo na akwezile pa mfwalasi nayo kwene yakonsile Aina Izlaeli muli yemba. 24 Lyene uku macaca* Yeova waweni Aina Ijipti ala ali umu cimbilimbili ca moto ni kumbi, nupya waleesile icimvulunganya pali aliyo. 25 Leza watwalilile ukusokola matayala ya maceleta aa Ina Ijipti cakuti cayatalilanga ukuyapisya, nupya Aina Ijipti yalandanga yakuti: “Lekini tuutuke Aina Izlaeli, pano Yeova akulwa naswe pakuti ayacingilile.”

26 Lyene Yeova wanenyile Mose ati: “Tambalika ikasa lyako pali yemba pakuti amanzi yawele pa Ina Ijipti, pa maceleta yao ankondo, alino na pali yano yakwezile pa mfwalasi.” 27 Lilyo kwene Mose watambaliike ikasa lyakwe pali yemba, nupya lino kwayanga kukuca, yemba waswilile vino wali. Lino Aina Ijipti yezizye ukuutuka, Yeova walenzile kuti yaponele muli yemba. 28 Manzi awelanga yavimbilikizye maceleta ya nkondo na aonsi akwezile pa mfwalasi alino na asilika yonsi yakwe Falao aakonsile Aina Izlaeli muli yemba. Kutaali nanti a wenga pali aliyo uwapuswike.

29 Lelo Aina Izlaeli yapisile pali yemba pa musili uume, nupya manzi yapanzile iciumba ukwi lunji lya Ina Izlaeli na kuli cimani. 30 Vikwene avino Yeova wapuswisye Aina Izlaeli pa wanda uuwa ku Ina Ijipti nupya Aina Izlaeli yaweni Aina Ijipti umu mbali yakwe yemba ala iyafwa. 31 Yaweni na maka yakwe Yeova aingi yano waomvizye uku Ina Ijipti, nupya antu yatandike ukutiina Yeova nu kutaila Yeova kumwi na Mose umuomvi wakwe.

15 Pa nsita kwene iiya Mose na Ina Izlaeli imbiile Yeova ulwimbo luu iyati:

“Nkanimbile Yeova pano watacindamikwa sana.

Watasumbila imfwalasi muli yemba kumwi nu wakwezilepo.

 2 Jah* ali maka yane, pano watampususya.

Ali Leza wane, nupya nimamulumbanyanga; ali Leza wakwe tata, nupya nimamucindikanga.

 3 Yeova u musilika wa maka. Izina lyakwe a Yeova.

 5 Amanzi aingi yaayavimbilikizye; yaatuwile ukufika na pansi wakwe vino iwe likatuwila.

 9 Mulwani walanzile ati: ‘Nimayazinganya! Nu kuyazana!

Nimaankanya vino nimayapoka nu kutola vino nkulonda!

Nimaomvya ulupanga lwane! Ikasa lyane limayacimvya!’

11 A weni muli ya leza uwaya wakwe wewe, we Yeova?

A weni uwaya uwa muzilo sana wakwe wewe?

Wemuno walinga ukutiina ukupitila umu kukwimbila inyimbo zya kulumbanya, wemuno ukacita ivizungusyo.

12 Wakonzolwile ikasa lyako ili lunji, nupya insi yayamizile.

Aikazi ya mu Kenani yonsi yalatoovoka.

16 Intete zilayalema nupya yalazakaza.

18 Yeova alateeka manda pe.

20 Lyene Milyamu kasesema umwanaci, kaci wakwe Aloni, watozile kangoma nupya anaci yonsi yamulondiile ala yali nu tungoma nupya ala yakucina. 21 Milyamu wimbanga ala akutolelezya aonsi ati:

“Imbilini Yeova, pano watacindamikwa sana.

Watasumbila imfwalasi muli yemba kumwi nu wakwezilepo.”

22 Pa cisila Mose watungulwile Aina Izlaeli ukufuma kuli Yemba Muyenzu, nupya yaile umu lwanga lwa Syuli, yapisile manda yatatu umu lwanga, lelo yataazanyile manzi. 23 Yafisile uku Mara,* lelo yataakwanisye ukumwa manzi aku Mara pano yaali alule. Uli mulandu uno watemiile incende iiyo ati Mara. 24 Fwandi antu yatandike ukuilizyanya kuli Mose iyati: “Tumamwa cani?” 25 Mose waliliile kuli Yeova, Yeova nawe wamutungulwile uku kamuti. Lino wasumbiile kamuti kako umu manzi, manzi yasangwike iyaya asuma.

Paapa kwene apano Leza wayapeeliile isunde lya kulondela nupya apano wayezizye. 26 Leza wayanenyile ati: “Ndi cakuti mwakulauvwa kuli nene ne Yeova Leza winu nu kucita icisuma umu manso yane nupya ndi cakuti mwakulaikisya mano uku masunde yane nu kucita vyonsi vino nkumunena, ntalamuletela indwala zino nalesile pa Ina Ijipti, pano ne Yeova, ndalenga muye nu umi usuma.”

27 Lyene yafisile uku Elimu, ukwali utufukoka twa manzi 12 ni miti ya tuncindu 70. Kuuku kwene akuno yapanzile inkambi umupiipi na manzi.

16 Pa cisila Aina Izlaeli yonsi yafumile umu Elimu, nupya yasusile iyafika umu lwanga lwa Sini, ulwayela pakasi kakwe Elimu na Sinai, pa wanda uwalenga 15 umu mwezi wakwe ciili ukufuma pano yafumiile umu mpanga iya Ijipti.

2 Lyene Aina Izlaeli yonsi yatandike ukuilizyanya kuli Mose na Aloni umu lwanga. 3 Aina Izlaeli yatwalilile ukunena Mose na Aloni iyati: “Yeova nga watukomiile sile umu Ijipti muno twalyanga inyama, nupya muno twalyanga imikate nu kwikuta. Nomba lyene imutuleta umu lwanga luu, pakuti swensi tufwe uku cipowe.”

4 Lyene Yeova wanenyile Mose ati: “Nimamuponyezyanga imikate ukufuma ukwi yulu, nupya cila muntu wakulakolonganika ukulingana na ino angalya cila wanda, pakuti njezye indole ndi cakuti yalauvwila isunde lyane nanti foo. 5 Lelo pa wanda uwalenga 6 yace yaatola imikate ukulingana na ino yangatola pa manda yaili, nu kupekanyizizya limwi.”

6 Lyene Mose na Aloni yanenyile Aina Izlaeli yonsi iyati: “Amanguzi mumamanya ukuti Yeova u wamufumizye umu mpanga ya Ijipti. 7 Katondo mulalola ululumbi lwakwe Yeova, pano Yeova watauvwa vino mukuilizyanya pali aliwe. Uzye sweswe yaweni akuti mwailizyanyako?” 8 Mose watwalilile ukulanda ati: “Lino Yeova amamupeela inyama manguzi nu kumupeela umukate katondo pakuti mulye nu kwikuta, alino mumamanya ukuti Yeova watauvwa ukuilizyanya kuno mukuilizyanya kuli aliwe. Uzye sweswe yaweni akuti mwailizyanyako? Musikuilizyanya kuli sweswe, lelo mukuilizyanya kuli Yeova.”

9 Lyene Mose wanenyile Aloni ati: “Nena Aina Izlaeli ukuti iize pa nkoleelo yakwe Yeova, pano watauvwa ukuilizyanya kwao.” 10 Lino sile Aloni wanenyile Aina Izlaeli yonsi, yapiliwike nu kulozya manso ku lwanga, nupya ululumbi lwakwe Yeova lwalolike umwi kumbi.

11 Nupya kwene Yeova wanenyile Mose ati: 12 “Inuvwa ukuilizyanya ukwa Ina Izlaeli. Yanene ukuti, ‘Mumalya inyama manguzi lino kutali kufiite sana, nupya katondo mulalya umukate, lyene alino mumamanya ukuti nene indi Yeova Leza winu.’”

13 Uwanda kwene uwa manguzi inkwale zizile pa ncende yonsi ino yapangiilepo inkambi, nupya katondo kwali ulumi pa ncende iiya yonsi. 14 Lino ulumi lwasizile, kwalolike tumwi umu lwanga ututiswe, utwalolekanga kwati a kungwi ali pansi. 15 Lino Aina Izlaeli yaweni utuntu tuto yatandike ukuzyanya iyati: “I vyani vii?” pano yataavimanyile. Mose wayanenyile ati: “U mukate uno Yeova watamupeela kuti mulye. 16 Yeova watalanda ukuti, ‘Cila muntu alinzile ukukolonganika ukulingana na vino angakwanisya ukulya. Cila muntu ace akolonganika icipimo cakwe oma* conga ukulingana ni mpendwa ya yantu yano akaikala nayo umwi tenti.’” 17 Aina Izlaeli yatandike ukukolonganika ivintu vivyo; yamwi yakolonganikanga ivingi yauze nayo ivinono. 18 Nanti icakuti yakolonganika ivingi nanti ivinono, cila muntu wakwatanga ivikumanile nga yavipima muli oma. Fwandi cila muntu wakolonganikanga vino angakwanisya ukulya.

19 Lyene Mose wayanenyile ati: “Kusi aalinzile kusyako ivyakulya vimwi pali vivyo ukufika katondo.” 20 Lelo yatuvwile kuli vino Mose wayanenyile. Lino antu yamwi yasiileko ivyakulya vimwi ukufika katondo, vyaozile nu kutandika ukununka nupya Mose wayasokiile. 21 Cila katondo yatolanga ivyakulya vivyo, nupya cila muntu watolanga ukulingana na vino angakwanisya ukulya. Ndi cakuti kasanya kawala, vyasungulukanga.

22 Pa wanda uwalenga 6, yaakolonganike imikate ino yangaomvya pa manda yaili, cila muntu wakolonganike ivipimo viili vyakwe oma. Fwandi intunguluzi zyonsi izya Ina Izlaeli zyaile izinena Mose pali vivyo. 23 Mose nawe wanenyile intunguluzi ati: “Avino Yeova watalanda ukuti, ‘Mutondo ulaya uwanda uwa kupuuza, kuli kuti isabata lya muzilo kuli Yeova. Fwandi mupange imikate ino mungakwanisya ukulya nu kweleka vino mungakwanisya ukulya; lyene ivyasyalapo muvisunge ukufika katondo.’” 24 Nayo yavisunzile ukufika katondo wakwe vino Mose wayanenyile, nupya vitanunsile nanti ukukwata ingonyo. 25 Lyene Mose walanzile ati: “Muvilye ilelo, pano ilelo isabata kuli Yeova. Nupya musikuvizana pansi. 26 Mwakulakolonganika pa manda 6, lelo pa wanda uwalenga 7, kuli kuti pa wanda wi Sabata, kutakulaya icili consi.” 27 Lelo yamwi yaile umu kukolonganika na pa wanda uwalenga 7, nomba yataazanyile icili consi.

28 Fwandi Yeova uzizye Mose ati: “Uzye mulatwalilila ukukanauvwila masunde yane ukufika lilaci? 29 Manyini ukuti ne Yeova namupeela Isabata. Ali mulandu uno pa wanda uwalenga 6 nkumupeelela imikate iya kuomvya pa manda yaili. Wensi alinzile ukwikala apakwe; kusi aalinzile ukufuma pakwe pa wanda uwalenga 7.” 30 Fwandi antu yapuuzile pa wanda wi Sabata, kuli kuti pa wanda uwalenga 7.

31 Aina Izlaeli yaamanga umukate uwo yakuti “mana.”* Wali umutiswe nupya walolekanga wa tumbezu utunono,* nupya wali umulyompe kwati a keke wino iikako uci. 32 Lyene Mose walanzile ati: “Yeova walanda wati, ‘Muzuuzye mana muli oma wenga nu kusungila inkulo zinu zyonsi, pakuti yace yalole ivyakulya vino namupeezile umu lwanga lino namufumizye umu mpanga ya Ijipti.’” 33 Fwandi Mose wanenyile Aloni ati: “Tola insembo nu kwikamo oma wenga wakwe mana nupya umwike pa nkoleelo yakwe Yeova pakuti asungwe umu nkulo zinu zyonsi.” 34 Aloni wacisile wakwe vino Yeova wanenyile Mose, wisile mana pa nkoleelo ya Kambokosi ka Ciusizyo pakuti asungwe. 35 Aina Izlaeli yaliile mana pa myaka 40, ukufikila lino yafisile umu mpanga umwikalanga antu. Yalyanga mana suka na lino yafisile umupiipi ni mpanga ya Kenani. 36 Oma ikaingila imiku 10 muli efa wenga.*

17 Aina Izlaeli yonsi yafumile umu lwanga lwa Sini, yacitanga nga ikala pa ncende imwi nupya iyafumapo kulingana na vino Yeova wayanenanga, nupya yaile iyapanga inkambi uku Lefidimu. Lelo kutaali manzi yano antu yangamwa.

2 Fwandi antu yatandike ukulemanizya Mose nu kumunena iyati: “Tupeele manzi akuti tumwe.” Lelo Mose wayuzizye ati: “U mulandu ci uno mukundemanizya? Nupya i cani cino mukwezezya Yeova?” 3 Lelo antu yaali sana nu lusala, nupya yatwalilile ukuilizyanya kuli Mose ala yakuti: “Uzye watufumizye ku Ijipti kuti uwize utukome uku lusala kumwi na ana itu ni viteekwa vitu?” 4 Lyene Mose waliliile kuli Yeova ati: “Nimacita uli na antu yaa? Pano yasya yantame na mawe!”

5 Lyene Yeova wanenyile Mose ati: “Koleelela antu yaa, nupya upite na akalamba amu Izlaeli yamwi, usende ni ntuwa ino umiile pa Luzi Lwa Naelo. 6 Lola! Nayaimilila pa nkoleelo yako kuuku kwene pa ciliwe ca mu Holebu. Ukume intuwa umu ciliwe kwene cico, na manzi yayafuma umu ciliwe cico nupya antu yamamwa.” Mose wacisile vivyo kwene ala na akalamba ya mu Izlaeli yakulolako. 7 Fwandi Mose watemiile incende iyo ati Masa* na Meliba* pa mulandu nu kulemanila kwa Ina Izlaeli na pali vino yezizye Yeova lino yalanzile iyati: “Uzye Yeova ali naswe nanti foo?”

8 Lyene Aina Amaleki izile umu kulwisya Aina Izlaeli umu Lefidimu. 9 Lyene Mose wanenyile Yoswa ati: “Tusoolwele aonsi nupya upite nayo umu kulwa na Ina Amaleki. Mutondo ndimilila pa mwamba papela ala ndemile ni ntuwa yakwe Leza wa cumi umu minwe.” 10 Lyene Yoswa wacisile wakwe vino Mose wamunenyile, nupya waile umu kulwa na Ina Amaleki. Nupya Mose, Aloni, na Huli yaile pa mwamba papela.

11 Ndi cakuti Mose watwalilila ukukatusya makasa, Aina Izlaeli yakwatilangako maka, lelo ndi cakuti waponya makasa, Aina Amaleki aakwatilangako maka. 12 Lino makasa yakwe Mose yatonsile, yatozile iwe nu kwika pano wali, nawe wikazilepo. Lyene Aloni na Huli yali umu mbali yakwe Mose, nupya yatungilile makasa yakwe icakuti makasa yakwe Mose yatwalilile ukukatuka mpaka ilanzi iliwa. 13 Vikwene avino Yoswa wacimvizye Amaleki na antu yakwe ukuomvya ulupanga.

14 Lyene Yeova wanenyile Mose ati: “Lemba vii umwi buku pakuti antu yace yaiusya nupya unene Yoswa ukuti, ‘Ndalovya Aina Amaleki umu nsi yonsi nupya yatalatala iusiwepo.’” 15 Lyene Mose wakuuzile ulambo nu kuutemela ukuti Yeova-nisi,* 16 nupya walanzile ati: “Pa mulandu wakuti Aina Amaleki iyalwisya ukateeka wakwe Jah, Yeova alaalwa nayo umu nkulo zyao zyonsi.”

18 Lyene Yetulo simapepo uwa ku Midyani, isivyala wakwe Mose, uvwile vyonsi vino Leza wacitiile Mose na antu yakwe Aina Izlaeli, na vino Yeova wafumizye Aina Izlaeli umu Ijipti. 2 Yetulo isivyala wakwe Mose, alanga wapokelela Zipola umuci wakwe Mose lino Mose walesile kuti aswilile kuli aliwe, 3 kumwi na ana yakwe yaili aonsi. Mose watemiile umwanakwe wenga umonsi ati Gesyomu,* pano walanzile ati, “Nene mwenyi umu mpanga yii,” 4 muze nawe wamutemiile ati Elieza,* pano walanzile ati, “Leza wakwe tata ali kaazwa wane, uwampuswisye kuli Falao uwalondanga ukunkoma.”

5 Fwandi Yetulo isivyala wakwe Mose, kumwi na ya mwana Mose na mamakwe, yaile kuli Mose umu lwanga muno watenzi pa mwamba wakwe Leza wa cumi. 6 Lyene watumile mazwi kuli Mose akuti: “Ne Yetulo sovyala, nkwiza kuli wewe pamwi na mamako na anako yaili alumendo.” 7 Lilyo kwene Mose waile umu kukomaanya isivyala, nupya waile afukama nu kumutonsola. Yalamukiine nupya pa cisila yaile umwi tenti.

8 Mose walondolwelile isivyala vyonsi vino Yeova wacisile kuli Falao nu ku Ina Ijipti pa mulandu wa Ina Izlaeli, alino ni ntazi zyonsi izyayacitikile umu nzila, na vino Yeova wayapuswisye. 9 Yetulo wasansamwike pali vyonsi ivisuma vino Yeova wacitiile Aina Izlaeli pa kuyapususya uku Ina Ijipti. 10 Yetulo walanzile ati: “Alumbanyiziwe Yeova uwamupuswisye ukufuma uku Ina Ijipti na kuli Falao, nupya uwapuswisye antu yakwe ukufuma umu uzya umu Ijipti. 11 Lyene namanya ukuti Yeova u mukalamba ukucila ya leza yonsi asyala, pa mulandu na vino wacisile kuli yayo aali ni cilumba uku yantu yakwe.” 12 Lyene Yetulo isivyala wakwe Mose, waleesile ilambo lya koca na malambo yauze kuli Leza, nupya Aloni na akalamba yonsi amu Izlaeli iizile nu kuliila pamwi icakulya na isivyala wakwe Mose pa nkoleelo yakwe Leza wa cumi.

13 Pa wanda uwalondelilepo, Mose wikazile wakwe vino wacitanga lyonsi nu kutandika ukupingula antu, nupya antu yayanga nu kwimilila pa nkoleelo yakwe Mose ukufuma katondo ukufika manguzi. 14 Lino isivyala wakwe Mose waweni vyonsi vino Mose wacitilanga antu, uzizye ati: “I cani cii cino ukucita uku yantu? U mulandu ci uno uwikalile pano wenga, na antu yonsi iimilila pa nkoleelo yako ukufuma katondo ukufika manguzi?” 15 Mose waswike isivyala ati: “Yakaiza kuli nene umu kuzya pakuti yamanye ukulonda kwakwe Leza. 16 Nga kwacitika umulandu, yakauleta kuli nene, nani nkapingula antu yayo nupya nkayanena upinguzi wakwe Leza wa cumi na masunde yakwe.”

17 Yetulo wanenyile Mose isivyala ati: “Cino ukucita citazifile. 18 Umatontanga sana pamwi na antu yano uli nayo, pano umulimo uu, iukukulila sana nupya utanga uuombe wenga. 19 Nomba uvwa kuno. Nimakupanda mano, nupya Leza amayanga naawe. Wakulalandilako antu pa nkoleelo yakwe Leza wa cumi nupya wakulatwala imilandu kuli Leza wa cumi. 20 Ulinzile ukuyasambilizya pa upinguzi na pa masunde yakwe Leza nu kuyamanyisya inzila ino yalinzile ukupitamo alino nu mulimo uno yafwile ukuomba. 21 Lelo ufwile ukusoolola aonsi aafikepo aakatiina Leza, aatailwe, aonsi aapata ulonsi wa ucenjezi, nupya uyasonte ukuti yaangalila maumba umuli antu masauzandi, yauze nayo yaangalila maumba umuli antu 100, yauze nayo yaangalila maumba umuli antu 50, alino yauze nayo yaangalila maumba umuli antu 10. 22 Yalinzile yapingula antu lyonsi lino kwakatuka imilandu, nupya umulandu onsi ukome yalaaleta kuli wewe, lelo umulandu onsi unono aliyo yalaapingula. Uleke yaombela pamwi naawe pakuti cikwangukile. 23 Ndi cakuti wacita vivyo, nupya ndi cakuti icilingana nu kulonda kwakwe Leza, utalaatonta sana nupya antu yonsi yalaaswilila ukumwao umu mutende.”

24 Lilyo kwene Mose uvwile kuli isivyala nupya wacisile vyonsi vino wamunenyile. 25 Mose wasoolwile aonsi aafikepo ukufuma umu Ina Izlaeli yonsi nupya wayasonsile kuti yaangalila antu; pakuti yamwi yaangalila maumba umuli antu masauzandi, yauze nayo yaangalila maumba umuli antu 100, yauze umuli antu 50 alino na yauze umuli antu 10. 26 Fwandi yapingulanga antu lino kwakatuka imilandu. Mulandu ukome, yautwalanga kuli Mose, lelo umulandu unono yapingulanga aineco. 27 Lyene pa cisila, Yetulo wapakisye Mose isivyala nu kuswilila ukwakwe.

19 Mu mwezi wakwe citatu ukufuma pano Aina Izlaeli yafumiile umu Ijipti, yafisile umu lwanga lwa Sinai pa wanda uli umwi kwene. 2 Yafumile uku Lefidimu nu kuya ku lwanga lwa Sinai nupya yaile iyapanga inkambi kuuku kwene. Aina Izlaeli yapangiile inkambi umupiipi nu mwamba.

3 Lyene Mose wakwezile umwamba nu kuya kuli Leza wa cumi, nupya Yeova wamwamile ukufuma pa mwamba nu kumunena ati: “Nena amu ng’anda yakwe Yakobo, kuli kuti Aina Izlaeli uti, 4 ‘Mwailoliile vino nacisile Aina Ijipti pakuti imusende wakwe vino lyang’anda akasenda utwana twakwe nu kumuleta kuli nene. 5 Lyene ndi cakuti mwakulauvwila mazwi yane nu kusunga upangano wane, mulaya antu yane aiyele ukufuma umu yantu yonsi, pano insi yonsi i yane. 6 Mulaya ya simapepo ya wene nupya uluko lwa muzilo kuli nene.’ Yaa ali mazwi yano unene Aina Izlaeli.”

7 Mose wapisile nu kuyaama akalamba ya Ina Izlaeli nupya wayanenyile vyonsi vino Yeova wamunenyile. 8 Pa cisila antu yonsi yasukiile pamwi iyati: “Twakulacita vyonsi vino Yeova watalanda.” Lilyo kwene Mose wanenyile Yeova vino antu yalanzile. 9 Nupya Yeova wanenyile Mose ati: “Lola! Namaiza kuli wewe umwi kumbi ilitifi, pakuti antu yuvwe lino nkulanda naawe na pakuti naawe kwene yakutaila lyonsi.” Lyene Mose wanenyile Yeova vino antu yalanzile.

10 Lyene Yeova wanenyile Mose ati: “Yanga uku yantu ukayasangulule ilelo na mutondo, nupya yalinzile ukufula ivyakuzwala vyao. 11 Nupya yalinzile ukuipekanya pa wanda uwalenga citatu, pano pa wanda uwo Yeova aliza pa mwamba uwa Sinai ale na antu yonsi yakulolako. 12 Uce uwike umupaka pa yantu ukuzinguluka umwamba onsi nupya uce uyanene uti, ‘Mucenjele pakuti mutaaya uku mwamba nanti ukukumya umupaka. Ali wensi uwakumya umwamba alafwa. 13 Kusi alinzile ukulema umuntu wiyo, lelo alinzile ukutamwa na mawe nanti ukumulasa nu ulapwa. Iye inyama nanti umuntu, vitalinzile ukutwalilila ukuya nu umi. Lelo antu yalaya uku mwamba lino yaluvwa ukulila kwi penga.”*

14 Lyene Mose wafumile pa mwamba nu kuya uku yantu, nupya watandike ukuyasangulula, nayo yaafuzile ivyakuzwala vyao. 15 Wanenyile antu ati: “Muipekanyizizye calimwi lino uwanda uwalenga citatu utali ufike. Nupya mutalinzile ukupanga icupo.”

16 Pa wanda wakwe citatu katondo, kwali ukupangalakansya nu kumyantula kwa nkuwa nupya pa mwamba paali kumbi ilifine ni ciunda icikalamba ica kulila kwi penga, na antu yonsi aali umu nkambi yatandike ukuzakaza. 17 Lyene Mose wafumizye antu umu nkambi pakuti yakakomenkanye Leza wa cumi, nayo yaile iimilila umwisika lya mwamba. 18 Umwamba wa Sinai onsi wasuukanga icunsi, pano Yeova wizile pa mwamba uwo umu moto; nupya icunsi casuukanga kwati cikufuma umu cibili nu mwamba onsi wateentanga sana. 19 Lino ukulila kwi penga kwayanga kukukulilako, Mose wavwanzile, nupya Leza wa cumi wamwaswike.

20 Yeova wizile pa mwamba wa Sinai papela. Nupya Yeova wamile Mose papela ya mwamba, Mose nawe waileko. 21 Lyene Yeova wanenyile Mose ati: “Yanga nu kuyacelula antu uti yataaciluka umupaka wao nu kwizalola ne Yeova, ndi cakuti yakwezya ukucita vivyo, yamafwa. 22 Nupya uleke ya simapepo aakapalama kuli nene ne Yeova lyonsi yaisangulule aineco, pakuti ne Yeova ntayakoma.” 23 Lyene Mose wanenyile Yeova ati: “Antu yatanga yakwele umwamba wa Sinai pa mulandu na vino watucelwile lino wanenyile uti, ‘Ika umupaka ukuzinguluka umwamba nu kuulenga ukuya uwa muzilo.’” 24 Lelo Yeova wanenyile Mose ati: “Pitanga, telemuka umwamba nupya uwele kuno pamwi na Aloni, lelo utaleka ya simapepo na antu yaciluke umupaka wao nu kwiza kuli nene ne Yeova, pakuti ntayakoma.” 25 Fwandi Mose watelemwike umwamba nu kuya uku yantu nupya wayanenyile vino Leza walanzile.

20 Lyene Leza walanzile amazwi yaa yonsi ati:

2 “Nene indi Yeova Leza wako, uwakufumizye umu uzya umu Ijipti. 3 Utaapepa ya Leza yauze suka sile nene.

4 “Utalinzile ukuipangila icilubi nanti icintu consi icakolana ni ca mwi yulu nanti icaya umu nsi nanti umu manzi. 5 Utalinzile ukuvifukamila nanti ukutunkwa ukuviombela, pano ne Yeova Leza wako, nene Leza aakalonda ukupepwa sile wenga, aakafulula ana na izikulu ni vizikulula pa membu zyakwe ya isi ampata, 6 lelo wino akalanga ukutemwa kwa cisinka uku nkulo masauzandi yakwe yayo aantemwa nupya aakakonka masunde yane.

7 “Utaomvya izina lyakwe Yeova Leza wako umu nzila iipe, pano Yeova atalalekapo sile ukwaula ukufulula yayo akaomvya izina lyakwe umu nzila iipe.

8 “Uwaiusya uwanda wi Sabata nu kuulola ukuti uwa muzilo. 9 Uwaomba imilimo yako yonsi umu manda 6, 10 lelo uwanda uwalenga 7 i sabata kuli Yeova Leza wako. Utaomba umulimo uli onsi, wewe, nanti umwanako umulumendo nanti umwanako umukazyana nanti umuzya wako umonsi nanti umuzya wako umukazyana nanti iciteekwa cako nanti sile umwenyi wako aakaikala umu musumba uno nawe ukaikalamo. 11 Pano mu manda 6 amuno Yeova wapanzile mayulu ni nsi, na yemba alino na vyonsi ivyayamo, nupya watandike ukupuuza pa wanda uwalenga 7. Uli mulandu uno Yeova wapaaliile uwanda wi Sabata nu kuulenga ukuya uwa muzilo.

12 “Wacindika tata wako na mayo wako, pakuti uwikale manda aingi umu mpanga ino Yeova Leza wako akukupeela.

13 “Utaakoma.

14 “Utaacita ucende.

15 “Utaiya.

16 “Utaapeela ukambone wa ufi pa muzo.

17 “Utaakumbwa ing’anda ya muzo. Utaakumbwa umuci wa muzo nanti umuzya wakwe umonsi nanti umuzya wakwe umukazyana nanti a cipambasi wakwe nanti a punda wakwe nanti sile i cili consi cino wakwata.”

18 Antu yonsi apano yaali lino kwali ukupangalakansya nu kumyantula kwa nkuwa nu kulila kwi penga na lino icunsi casuukanga pa mwamba; nupya lino yaweni vii yuvwile sana intete nupya iimilile katalamukila. 19 Fwandi yanenyile Mose iyati: “Wewe landa naswe, nupya tumauvwa, lelo utaleka Leza alande naswe, pano tukutiina ukuti tungafwa.” 20 Mose wanenyile antu ati: “Mutuvwa intete, pano Leza wa cumi wataiza umu kumwezya, pakuti mutwalilile ukumutiina mutayembuka.” 21 Fwandi antu yatwalilile ukwimilila katalamukila, lelo Mose wapaliime umupiipi ni kumbi ilitifi ukwali Leza wa cumi.

22 Lyene Yeova wanenyile Mose ati: “Unene Aina Izlaeli uti, ‘Imuilolela mweineco ukuti indanda namwe ukufuma kwi yulu. 23 Mutaapanga ya leza yakwe siuva pano mulinzile kupepa sile nene, nupya mutaaipangila ya leza yakwe goldi. 24 Muce mumpangile ulambo nupya apano mulaapeelela malambo inu aakoca na malambo inu amutende, ukufuma pa mfwele zinu na pa ng’ombe zinu. Pa ncende ili yonsi ino nasoolola ukuti apano mwaiusizya izina lyane, ndiza papo kwene nu kumupaala. 25 Pa kumpangila ulambo wa mawe, mutaakuula ukuomvya mawe yano mwaputula ukuomvya iviombelo vya kuputwilako. Pano ndi cakuti mwaomvya cizulo ale mwakowezya ulambo. 26 Nupya mutafwile ukukwela pa ulambo wane ukuomvya masitepu, pakuti ivyanzwalo vinu vitaloleka pa ulambo.’

21 “Yaa ali masunde yano ulinzile ukunena Aina Izlaeli:

2 “Ndi cakuti wakala umuzya Umuebele, alakuombela pa myaka 6, lelo umu mwaka uwalenga 7 alaya umuntungwa ukwaula ukulipila icili consi. 3 Ndi cakuti wizile wenga, alaswilila wenga. Lelo ndi cakuti wizile na mamakwe ale alinzile ukuswilila na mamakwe. 4 Ndi cakuti umusambazi wamupeela umwanaci kuti aye amamakwe nupya nga wamuvyalila ana aonsi nanti anaci, mamakwe na ana yakwe yalaya aa musambazi wakwe, nupya umuzya wiyo alaswilila wenga. 5 Lelo ndi cakuti umuzya wakomapo ukulanda ukuti, ‘Natemwa umusambazi wane, mamane na ana; nsikulonda ukuya umuntungwa,’ 6 umusambazi wakwe alinzile ukumutwala pa nkoleelo yakwe Leza wa cumi. Lyene alamusintilizya pa cisaasa nanti ukwi fulemu, nupya umusambazi wakwe alamutulula ikutwi, nawe alatwalilila ukuya umuzya wakwe umi wakwe onsi.

7 “Ndi cakuti umuntu wakazya umwanakwe umukazyana umu uzya, mukazyana wiyo atalaya umuntungwa wakwe vino cifwile ukuya uku muzya umonsi. 8 Ndi cakuti musambazi wakwe atamutemilwe nupya atalesile kuti aye a mamakwe lelo akulonda ukumukazya uku muntu muze, atalinzile ukumukazya uku mwenyi pano ala watamufyenga. 9 Ndi cakuti wamupeela ku mwanakwe umonsi kuti aye amamakwe, alinzile ukulamulola kwati umwanakwe umukazyana. 10 Ndi cakuti umonsi wiyo watwala mama na muze, alinzile ukulapeela mamakwe uwa nkoleelo ivyakulya ni vyakuzwala nupya alinzile ukulamupeela ivikalondekwa umu cupo. 11 Ndi cakuti atalaamucitila ivintu vivyo vitatu, lyene ale alaya umuntungwa ukuswilila ukwaula ukulipila impiya izili zyonsi.

12 “Umuntu uuma umuze suka wafwa, nawe kwene alinzile ukukomwa. 13 Lelo ndi cakuti wacita cico umu kukanamanya na ne Leza wa cumi nacizumilizya ukuti cicitike, ndamusoolwela incende kuno umuntu wiyo alinzile ukuutukila. 14 Ndi cakuti umuntu umwi wasokela sana umuze nupya wamukoma uku mufulo sile, umuntu wiyo alinzile ukukomwa nanti cakuti wezya ukupusukila pa ulambo wane. 15 Uuma isi nanti nyina alinzile ukukomwa.

16 “Ndi cakuti umuntu umwi wasenda umuze ku maka nu kuyamukazya nanti ndi cakuti yamuzana watamulema, umuntu wiyo alinzile ukukomwa.

17 “Umuntu wensi uwatiipwila isi nanti nyina, alinzile ukukomwa.

18 “Ndi cakuti antu yakulwa nupya umwi watama umuze ni we nanti wamuma ikofi nu kumucisa nomba atafwile nupya watandika ukwikala sile pa bedi, vino cifwile ukuya aevi: 19 Ndi cakuti akukatuka nu kuya umu kuzinguluka panzi ukuomvya intuwa, lyene ale uwamumiile atalinzile ukufululwa. Lelo alinzile ukumulipila sile pa nsita ino wikazile ukwaula ukuomba ukufikila lino wapolelekela.

20 “Ndi cakuti umuntu uuma umuzya wakwe umonsi nanti umuzya wakwe umukazyana ukuomvya umukota nupya wafwila umu minwe yakwe, umuntu wiyo afwile ukufululwa. 21 Lelo ndi cakuti wafwa lino papita uwanda onga nanti yaili, umuntu wiyo atalinzile ukufululwa pano u wamukazile ukuomvya impiya zyakwe.

22 “Ndi cakuti aonsi yakulwa yapunka umwanaci aali pa ukulu nupya wakwata nu mwana lino insita yakwe iya kupaapa itatala yafika lelo kusi aafwile,* uwa mulandu alinzile ukulipila pa mulandu uno watacita ukulingana na vino iya wa mwanaci wiyo wamupingula; nupya alinzile ukulipila ukupitila muli ya kapingula. 23 Lelo ndi cakuti umwi wafwa, uwakoma umuze nawe kwene alinzile ukufwa, 24 ilinso pi linso, ilino pi lino, ikasa pi kasa, ikulu pi kulu, 25 koca pa koca, icilonda pa cilonda nu kucisa pa kucisa.

26 “Ndi cakuti umuntu umwi uma umuzya wakwe umonsi nanti umukazyana pi linso icakuti lyononeka nu kononeka, alinzile ukuleka umuzya wiyo ukupita, pano ala ali malipilo pi linso lyakwe. 27 Nupya ndi cakuti uuma umuzya wakwe umonsi nanti umukazyana nu kumusokola ilino, alinzile ukuleka umuzya wiyo ukupita, pano ala ali malipilo pi lino lyakwe.

28 “Ndi cakuti ing’ombe yapuma umonsi nanti umwanaci nupya wafwa, ilinzile ukutamwa na mawe mpaka ifwe nupya italinzile ukuliiwa; lelo umwineco wa ng’ombe atalinzile ukufululwa. 29 Nomba ndi cakuti ing’ombe yapumanga sana antu nupya umwineco yamucelwile lelo ataisakamalanga nupya yapuma umonsi nanti umwanaci, ing’ombe iiyo ilinzile ukutamwa na mawe suka ifwe nupya umwineco wa ng’ombe iiyo nawe kwene alinzile ukukomwa. 30 Ndi cakuti umwineco wa ng’ombe iiyo yamupingula ukulipila pakuti atakomwa, alinzile ukulipila vyonsi vino yamupingula. 31 Vikwene avino cilinzile ukuya nanti cakuti ing’ombe yapuma umulumendo nanti umukazyana, mulinzile ukulondela isunde kwene lii nu kucita vikwene uku mwineco wa ng’ombe. 32 Ndi cakuti ing’ombe yapuma umuzya umonsi nanti umuzya umukazyana, umwineco wa ng’ombe alalipila impiya masyekele* 30 ku musambazi wa muzya wiyo, nupya ing’ombe ifwile ukutamwa na mawe suka ifwe.

33 “Ndi cakuti umuntu wacilula nanti ukwimba iciwina ukwaula ukucilikapo nupya ing’ombe yaponelamo nanti punda, 34 umwineco wa ciwina alinzile ukulipila. Alalipila uku mwineco wa citeekwa, nupya iciteekwa icati cifwa cilaya icakwe. 35 Ndi cakuti ing’ombe yakwe umwi yapuma ing’ombe ya muze nupya yafwa, yalinzile ukukazya ing’ombe ipuma nu kwankana impiya; yalinzile nu kwankana ing’ombe iyatifwa. 36 Lelo nga camanyikwe ukuti ing’ombe iiyo yali ni ciyelezyo ca kupuma lelo umwineco ataisakamalanga, alinzile ukulipila ing’ombe pa ng’ombe, nupya ing’ombe iyatifwa iilasyala iyakwe.

22 “Ndi cakuti umwi wiya ing’ombe nanti imfwele nupya waikoma nanti ukuikazya, alinzile ukulipila ing’ombe 5 pa ng’ombe yonga ni mfwele 4 pa mfwele yonga.

2 (“Ndi cakuti umupuupu yamuzanikizya akwiya usiku nupya yamuma nu kumukoma, ale uwatamukoma atakweti umulandu wa wazi. 3 Lelo ndi cakuti cacitika umu nsita ya musanya, ale uwakoma umuntu wiyo alinzile ukupeelwa umulandu wa wazi.)

“Umupuupu alinzile ukulipila. Ndi cakuti ataakwata icili consi, yalinzile ukumukazya pakuti alipile ivintu vino wataiya. 4 Ndi cakuti cazanikwa ukuti cino wivile ali naco nupya cicili nu umi, ciye ing’ombe, punda nanti imfwele, alinzile ukulipililapo viili.

5 “Ndi cakuti ali wensi waleka iviteekwa vyakwe vyaya vyalya umu calo ca muze, alinzile ukumulipila icalo umuli ivyakulya ivisuma sana nanti umuli imyangazi isuma sana.

6 “Ndi cakuti umoto watandika ukupya nupya wasalangana umu mpanga icakuti oca ni myanzi ya ngano iituulike nanti ingano izitatala zyazombolwa nanti icalo, uwali wasonteka umoto uwo alinzile ukulipila pali vyonsi ivyati vipya.

7 “Umwi nga wapeela umuze ulupiya nanti iviya pakuti amusungile nupya nawe yamwiila ivintu vivyo nupya umupuupu wiyo wazanwa, ale umupuupu wiyo alinzile ukulipila imiku iili pa vintu vivyo. 8 Ndi cakuti yatazanyile umupuupu, ale umwineco wa ng’anda yalinzile ukumutwala pa nkoleelo yakwe Leza wa cumi pakuti yakalole ndi cakuti walemile pa vintu vya muze nanti foo. 9 Mu milandu yonsi iyakukwata ivintu ivya kwiya, ivili wa ng’ombe, punda, imfwele, icakuzwala, nanti icili consi icaponga cino umwi walanda ukuti, ‘I cane!’ yonsi yoili yalinzile ukutwala umulandu uwo pa nkoleelo yakwe Leza wa cumi. Wino Leza wazana nu mulandu alinzile ukulipila umuze imiku iili pa vintu vivyo.

10 “Ndi cakuti umwi wapeela umuze punda nanti ing’ombe nanti imfwele nanti iciteekwa icili consi kuti amusungile naco cafwa nanti calemala nanti ukusendwa nupya kusi aakulolako, 11 umuntu wino yapeezile iciteekwa alinzile ukulapa pa nkoleelo yakwe Yeova ukuti ataalemile pa citeekwa ca muze; nupya umwineco wa citeekwa alinzile ukuzumila. Lyene umuntu wiyo atalinzile ukulipila. 12 Lelo ndi cakuti iciteekwa cico yaciivile kuli aliwe, alinzile ukulipila uku mwineco. 13 Ndi cakuti iciteekwa cico caliisile uku cilyanyi ca mu mpanga, ale umuntu wiyo alinzile ukuleta icasyazilepo pakuti ciye usininkizyo. Atalinzile ukulipila pa cintu icaliisile uku cilyanyi.

14 “Lelo ndi cakuti umwi wazima iciteekwa uku muze naco calemala nanti ukufwa lino umwineco asi naco, umuntu wiyo alinzile ukulipila. 15 Ndi cakuti umwineco ali naco, umuntu wiyo atalinzile ukulipila. Lelo nga walipiile pa kwazima ale impiya kwene zizyo izingaya ali malipilo.

16 “Ndi cakuti umonsi walyombeleka nacisungu wino yatali yataisye nu kulaala nawe, ale umonsi wiyo alinzile ukulipila impango pakuti umwanaci aye amamakwe. 17 Ndi cakuti isi wa mwana wakanilila ukupeela umukazyana wiyo uku monsi, umonsi wiyo alinzile ukulipila umutengo wa mpango izikalipilwa kuli nacisungu.

18 “Utalinzile ukuzumilizya umwanaci aakacita ivya maleele ukuya nu umi.

19 “Wensi uwalaala ni nyama alinzile ukukomwa.

20 “Wensi uwapeela malambo kuli ya leza yauze ukucila ukupeela sile kuli Yeova alinzile ukukomwa.

21 “Mutaacuzya aenyi, pano namwe kwene mwali aenyi umu mpanga ya Ijipti.

22 “Mutaacuzya mukamfwilwa ali wensi nanti umwana wa nsiwa. 23 Ndi cakuti mukumucuzya, nawe walilila kuli nene, nduvwa ukulila kwakwe; 24 nupya ndasoka sana nu kumukoma nu lupanga nupya ya mama inu yalaya aamukamfwilwa na ana inu yalaya ana ya nsiwa.

25 “Ndi cakuti wakongwesya umupiina ali wensi ulupiya umu yantu yane, kuli kuti wino mukaikala nawe, utalinzile ukucita kwati u muntu aakakongwesya kaloba. Utalinzile ukumunena ukuti alundepo na zyuze.

26 “Ndi cakuti walemelamo icakuzwala ca muzo pali cino wakukongola, ulinzile ukumuswilizizya lino ilanzi litali liwe. 27 Pano ali cakuvimbala sile cino wakwata nupya cico kwene acino akazwala; pano nga caya vivyo, uzye angavimbala cani usiku nga walaala? Ndi cakuti walilila kuli nene, nduvwa, pano naya nu luse.

28 “Utalinzile kupontela Leza nanti ukutiipwila intunguluzi inu.

29 “Utaawayawaya ukupeela malambo ukufuma pa vilimwa vyako ivingi alino nu kufuma pali waini na mafuta aingi. Mulinzile ukumpeela ana inu aonsi mayeli. 30 Vino mulinzile ukucita ku ng’ombe zinu ni mfwele zinu aevi: Pa cisila cakuti yavyalwa, ilinzile ukwikala na nyina pa manda 7. Lyene pa wanda uwalenga 8, mulinzile ukumpeela.

31 “Mulinzile ukuya amuzilo kuli nene, nupya mutalinzile ukulya inyama ili yonsi ino mwazana iyakoma uku cinyama ca mu mpanga. Mulinzile ukupeela ya simbwa.

23 Utaasalanganya ilyasi lya ufi. Utaaya kambone wa muntu mwipe aakulonda ukucitila umuze iviipe. 2 Utaakonkelela antu aingi umu kucita iviipe, utaanyonganya upinguzi ukupitila umu kupeela ukambone wa ufi pakuti sile uzanzye antu aingi. 3 Utaaya na kapaatulula pa kupingula umupiina.

4 “Ndi cakuti walola ing’ombe ya mulwani wako nanti punda wataponga, ulinzile ukumutwalila. 5 Ndi cakuti walola punda wakwe wino wakupata watapona ni cisendo, utalinzile ukusuulako sile nu kupita. Ulinzile ukwavwilizya umuntu wiyo ukusapula icisendo.

6 “Mutalinzile ukufyenga umupiina pa kupingula.

7 “Utaaika umu milandu ya ufi, nupya utaakoma umuntu uwa kaele nu mulungami, pano ntalata sile umuntu umwipe ukwaula ukumufulula.

8 “Utaapoka mafisakanwa, pano mafisakanwa yakalenga umuntu ukukanaika mano uku kucita icilungame, nupya yakanyonganya mazwi ya yalungami.

9 “Mutaacuzya aenyi. Mwamanya vino cikauvwika ukuya aenyi, pano namwe kwene mwali aenyi umu mpanga ya Ijipti.

10 “Uwakomela imbezu umu calo cako nu kuzombola umu myaka 6. 11 Lelo umu mwaka uwalenga 7 mutalinzile ukulima umu vyalo vinu nupya apiina yano mwaya nayo yalaalyamo, nupya vino yasya, inyama zya mu mpanga zilaalya. Vikwene avino mulinzile ukucita uku vyalo vinu ivya myangazi ni vya miolivi.

12 “Uwaomba umu manda 6; lelo pa wanda uwalenga 7, utalinzile ukuomba imilimo yako, pakuti ing’ombe yako na punda wako vingapuuza na pakuti umuzya wako nu mwenyi nayo kwene yangapuuza.

13 “Mwacita vyonsi vino imunena, nupya mutalumbula mazina yakwe ya leza yauze; yatalinzile nu kuvwika pa tunwa twinu.

14 “Cila mwaka mwazevya imitebeto itatu kuli nene. 15 Muce mwazevya Umutebeto wa Mukate Uwaula Icitutumusi. Mulaalya umukate uwaula icitutumusi pa manda 7, pa nsita isoololwe umu mwezi wakwe Abibu* wakwe vino namunenyile, pano pa nsita kwene iiyo alino mwafumile umu Ijipti. Kusi aalinzile ukwiza kuli nene minwe. 16 Nupya mwazevya Umutebeto wa Uzombozi* uwa vyakulya vya kutandikilapo ukuca vino mwalimile, vino mwakomiile umu vyalo vinu; nu Mutebeto wa Kukolonganika* pa mpela ya mwaka, nga mwakolonganika vino mwalimile ukufuma umu vyalo. 17 Imiku itatu cila mwaka aonsi inu yonsi yalinzile ukulolekela kuli Yeova Umwene wa cumi.

18 “Lino ukupeela ilambo lya wazi kuli nene, utaalipeelela pamwi nu mukate uli ni citutumusi. Nupya mutaaleka malambo ya mafuta yano mukupeela pa mitebeto yane yaikala usiku onsi suka akatondo.

19 “Mwaleta ivyakulya ivisuma sana ivya mu vyalo vinu ivyatandikilapo ukuca uku ng’anda yakwe Yeova Leza winu.

Utaeleka kana ka mbuzi umu mukaka wakwe nyina.

20 “Nimakutumila malaika aamakukoleelela, uwakukucingilila umu nzila nu kukwingizya umu ncende ino napeekanya. 21 Uwakutika kuli aliwe nu kumuvwila. Utalinzile ukumupondokela pano atalakwelela pa membu zyako, pa mulandu wakuti akwimililako izina lyane. 22 Lelo ndi cakuti ukumuvwila nu kucita vyonsi vino nkulanda, ndapata alwani yako nu kukaanya aakakukaanya. 23 Pano malaika wane alakukoleelela nu kukutwala uku Ina Amoli, Aina Hiti, Aina Pelizi, Aina Kenani, Aina Hivi, na Ina Yebusi, nupya ndayalovya. 24 Utalinzile ukufukamila ya leza yao nanti ukutunkwa ukuyapepa, nupya utaakolanya ivicitwa vyao. Ulinzile ukonona ivilubi vyao nu kutamoola ivipilala vyao ivya kupepelapo. 25 Mwaombela ne Yeova Leza winu, nupya ndapaala ivyakulya vinu na manzi inu. Ndafumya indwala pali mwemwe. 26 Anaci amu mpanga inu yatalaaya ing’umba, nupya nga yaya pa ukulu, iviya vyao vitalaononeka, ndamulenga nu kwikala manda aingi.

27 “Ndalenga antu ukuntiina lino mutatala mwafika kuli aliyo, nupya ndavulunganya antu yonsi aalamulwisya nu kulenga alwani inu yonsi ukuutuka, pano mulayacimvya. 28 Ndalenga antu ukuvwa intete lino mutatala mwafika kuli aliyo, nupya cico cilalenga ukuti Aina Hivi, Aina Kenani, na Ina Hiti yutuke. 29 Ntalayazinga sile umu mwaka onga, pano nga caya vivyo umu mpanga mungasyala ukwaula antu, nupya inyama zya mu mpanga zingavulisya nu kumucisa. 30 Ndaayazinga panono panono ukufikila muce muvule nu kupyana impanga.

31 “Ndika umupaka winu ukufuma kuli Yemba Muyenzu kufika kuli yemba wa Ina Filisti, nupya ulafuma uku lwanga ukufika uku Luzi;* pano aikazi ya mu mpanga iiyo ndayapeela umu minwe inu, nupya namwe mulayazinga. 32 Mutalinzile ukupangana nayo upangano nanti ukupangana na ya leza yao. 33 Nupya yatalinzile ukwikala umu mpanga inu, pakuti yataca yalenge ukuti munjembukile. Ndi cakuti mwaombela ya leza yao, cilaya wa citeyo kuli mwemwe.

24 Lyene Yeova wanenyile Mose ati: “Yanga uku mwamba kumwi na Aloni, Nadabu, na Abihu alino na akalamba ya mu Izlaeli 70, nupya mukafukame katalamukila nu kumpepa. 2 Wewe sile ulinzile ukupalama kuli ne Yeova; lelo aonsi yaayo yatalinzile ukumpalama, nupya antu asyala yatalinzile ukukwela umwamba pamwi naawe.”

3 Lyene Mose waile anena antu vyonsi vino Yeova walanzile kumwi na masunde yonsi, nupya antu yonsi yasukiile pamwi iyati: “Twakulacita vyonsi vino Yeova watalanda.” 4 Fwandi Mose walemvile vyonsi vino Yeova walanzile. Lyene wakatwike katondotondo nu kukuula ulambo umwisika lya mwamba nupya wimike na mawe 12 aimililangako imitundu 12 iya Ina Izlaeli. 5 Pa cisila watumile alumendo Aina Izlaeli, nupya yaile iyapeela malambo ya koca na malambo yakwe ya cipambasi ukuya malambo ya mutende kuli Yeova. 6 Lyene Mose watozile afu wa wazi nu kwika umu mbale, nupya afu yuze iya wazi wasansile pa ulambo. 7 Lyene watozile ibuku lya upangano nu kubelengela antu. Nayo yalanzile iyati: “Twakulacita vyonsi vino Yeova watalanda nupya twakulamuvwila.” 8 Mose watozile uwazi nu kusansila antu nupya walanzile ati: “Uu u wazi wa upangano uno Yeova watapangana namwe ukulingana na mazwi yaa yonsi.”

9 Mose na Aloni, Nadabu, na Abihu alino na akalamba ya mu Izlaeli 70 yakwezile umwamba, 10 nupya yaweni Leza wa Ina Izlaeli. Nupya pano walyasile palolekanga kwati iwe lyakwe safilo ilipapatane, nupya lyali iliswepe kwati amayulu. 11 Ataakomile intunguluzi zya Ina Izlaeli, nupya yaweni icilolwa cakwe Leza wa cumi nupya yaliile nu kumwa.

12 Lyene Yeova wanenyile Mose ati: “Iza kuno uku mwamba akuno uwize uwikale. Nizakupeela mawe pano nimalemba masunde yano antu yalinzile yalondela.” 13 Fwandi Mose wakatwike kumwi na Yoswa umuomvi wakwe, nupya Mose waile pa mwamba wakwe Leza wa cumi. 14 Lelo wanenyile akalamba ya mu Izlaeli ati: “Mutuloleele pakwene ukufikila lino tulawela. Mumasyala na Aloni na Huli. Wensi aakweti umulandu angaya kuli aliyo.” 15 Lyene Mose waile pa mwamba ale ikumbi iliuvimbilikizya.

16 Lulumbi lwakwe Yeova lwatwalilile ukuya pa mwamba wa Sinai, nupya ikumbi lyavimbilikizye umwamba pa manda 6. Lyene pa wanda uwalenga 7, Leza wamile Mose ukufuma umwi kumbi. 17 Aina Izlaeli aatambanga yalolanga ululumbi lwakwe Yeova kwati umoto uukupya papela pa mwamba. 18 Lyene Mose wingile umwi kumbi nu kuya pa mwamba. Nupya waile aikala pa mwamba manda 40 musanya nu usiku.

25 Lyene Yeova wanenyile Mose ati: 2 “Nena Aina Izlaeli uti yaleta umusangulo kuli nene; uwampokela umusangulo kuli wensi uwaitemelwa ukusangwilako. 3 Musangulo uno ulaapoka kuli aliyo aewu: goldi, siuva, koopa, 4 kotoni yakwe bulu, iyenzulukile, iyenzu, insalu isuma sana, mavumbu ya mbuzi, 5 impapa ya mfwele ino yasangula ukuya iyenzu, impapa itontekane, imbao zya muti wakwe akasya, 6 mafuta akuomvya muli ya lampi, basamu uwa kupangilako mafuta ya muzilo ni vinunkile, 7 na mawe yakwe onikisi alino na mawe yauze aakwika kuli efodi nu ku cakuzwala ca pa cisao. 8 Yace yampangile incende ya muzilo nupya ndikala pamwi nayo. 9 Uce upange itenti lya kupepelapo kumwi ni viya vyonsi ivya kuomvya umwi tenti kwene lilyo, uce ulondele vikwene vino nkukunena.

10 “Yace yapange imbokosi ukuomvya imbao zyakwe akasya, mu utali ikaye masentimita mupiipi na 110* nu mu wipi masentimita mupiipi na 70, alino ukuya umupela masentimita umupiipi na 70. 11 Lyene uce upakeko goldi umwengululwe ningo. Uce upake umukasi nu kunzi, nupya uce uzingulusye kamulaini kakwe goldi papela. 12 Nupya uce upange utumipeto 4 twakwe goldi nu kutulematika papela ya makulu 4 aa mbokosi, twili uku lusansa longa na twili uku lusansa luze. 13 Uce uwaze utumiti ututali twakwe akasya nu kutupakako goldi. 14 Uce usomeke utumiti tuto umu tumipeto twa mu mbali ya Mbokosi, pakuti twaomviwa ukusendelako Imbokosi. 15 Tumiti tuce twaikala umu tumipeto twa Mbokosi; mutaca mwatufumyako. 16 Uce uwike umu Mbokosi mawe apapatane yano ndakupeela aalembwapo masunde.

17 “Uce upange ni ntupiko yakwe goldi umwengululwe ningo, mu utali ice iye umupiipi na masentimita 110, mu wipi namo ice iye masentimita umupiipi na 70. 18 Uce upange ya kelubi yaili yakwe goldi; uce uomvye inondo pa kuyapanga nupya uce uike pa mpela zyoili izya ntupiko. 19 Uce upange ya kelubi aakwika ku mpela zyoili izya ntupiko, wenga uku mpela yonga nu muze uku mpela yuze. 20 Ya kelubi yace yavungulule maapa umupela, maapa yao yace yavimbe intupiko, nupya yace yalozyanye ivinso. Ivinso vyakwe ya kelubi vice vilozye pa ntupiko. 21 Uce uwike intupiko pa Mbokosi, nupya umu Mbokosi uce uwikemo mawe apapatane yano ndakupeela apalembwa masunde. 22 Ndaalolekela kuli wewe pa ntupiko ya Mbokosi, nupya apano ndaalandila naawe. Nupya pakasi kakwe ya kelubi yaili aali pa mbokosi ya upangano, apano ndaakunenela vyonsi vino ulinzile ukunena Aina Izlaeli.

23 “Uce upange na tebo ukuomvya imbao zyakwe akasya, umu utali ice iye masentimita umupiipi na 90, umu wipi namo masentimita mupiipi na 45 alino ukuya umupela masentimita umupiipi na 70. 24 Uce upakeko na goldi umwengululwe ningo nupya uce upisye kamulaini kakwe goldi ukuzingulusya tebo. 25 Mu mbali yakwe tebo uce uzingulusye ifulemu ilisaalale umupiipi na masentimita 7.4, nupya uce upisye kamulaini kakwe goldi umu mbali yi fulemu. 26 Uce upange utumipeto 4 twakwe goldi nu kutwika umu makoona 4 yakwe tebo, kuli kuti ukutulematika uku makulu 4 yakwe tebo. 27 Tumipeto tuto tulinzile ukupalama ukwi fulemu, amuno mulinzile ukupisya utumiti ututali pa kusenda tebo. 28 Uce uwaze utumiti ututali ukuomvya imbao zyakwe akasya nupya uce utupakeko na goldi, utulaaomviwa pa kusenda tebo.

29 “Uce upange imbale izisaalale, makapu, insembo alino ni mbale izifunkane umwa kwitulwila upe wa vyakumwa. Uce uvipange ukuomvya goldi umwengululwe ningo. 30 Nupya lyonsi uce uwanjikila umukate wane pali tebo.

31 “Uce upange ica kuteekapo lampi cakwe goldi umwengululwe ningo. Uce uomvye inondo pa kucipanga. Cice cikwate iciikalilo, umulundi, tumisambo, tumikonti, tuulungwa na maluwa. 32 Nupya mu mbali ya ca kuteekapo lampi muce mufume tumisambo 6, ku mbali yonga kuce kufume tutatu, nu ku mbali yuze nako kuce kufume tutatu. 33 Cila kamusambo kace kakwate utumikonti tutatu utukoline na maluwa ya muomondi, kumwi nu tuulungwa na maluwa. Vikwene avino tumisambo 6 utulafuma uku mulundi wa ca kuteekapo lampi tuce tuye. 34 Umulundi wa ca kuteekapo lampi uce ukwate utumikonti 4 utukoline na maluwa ya muomondi, kumwi nu tuulungwa alino na maluwa. 35 Kaulungwa konga kalaaya pisika ya cila misambo iili, vikwene avino cilaaya uku misambo yonsi 6 iilafuma ku mulundi wa ca kuteekapo lampi. 36 Tuulungwa, misambo ni ca kuteekapo lampi consi, vice vilemenkane, nupya vice vipangilwe na goldi umwengululwe ningo, uce uomvye inondo pa kuvipanga. 37 Uce upange ya lampi 7 aakwika pa twa kuteekapo, ndi cakuti ya lampi yaaka, yalaaswefya incende ya pa nkoleelo. 38 Ivya kulemelako umoto vice viye ivyakwe goldi umwengululwe ningo. 39 Ica kuteekapo lampi kumwi ni viya vii vyonsi, vilinzile ukupangwa ukufuma kuli goldi umwengululwe ningo aangafina italanti lyonga.* 40 Ukasininkizye ukuti wapanga ivintu vivyo ukulingana na vino inkulanga pa mwamba.

26 “Uce upange itenti lya kupepelapo ukuomvya insalu 10 izisuma, kotoni yakwe bulu, kotoni iyenzulukile, na kotoni iyenzu. Pa nsalu zizyo uce uwikepo ivikope vyakwe ya kelubi. 2 Insalu yonga na yonga ice iye mamita 12 umu utali* nu mu wipi mamita mupiipi na yaili. Insalu zyonsi zice ziye izilingane. 3 Uce usuminkanye insalu 5 pakuti zipange insalu yonga, nupya insalu na zyuze 5 uce uzisuminkanye zipange insalu yonga. 4 Uce uwike utumikowelo twakwe kotoni yakwe bulu umu mbali ku mpela ya nsalu izilundinkanye, vikwene avino uce ucite nu ku mpela ya nsalu zyuze. 5 Uce uwike utumikowelo 50 uku nsalu yonga, alino nu tumikowelo na tuze 50 uku mbali ya nsalu yuze, pakuti tuce tulozyanye muno tulalundinkanila. 6 Uce upange tuvyela 50 twakwe goldi nu kutuomvya ku kulundinkanya insalu, pakuti itenti likapangwe lyonga.

7 “Uce upange ni nsalu 11 ukuomvya mavumbu ya mbuzi izya kuvimba pi tenti lya kupepelapo. 8 Insalu yonga na yonga ice iye mamita 13 umu utali alino umu wipi namo ice iye mamita mupiipi na yaili. Insalu zyonsi 11 zice ziye izilingane. 9 Uce ulundinkanye insalu 5, nupya uce ulundinkanye insalu na zyuze 6, nupya uce upete insalu iyalenga 6 iya pa nkoleelo yi tenti. 10 Nupya uce upange tumikowelo 50 uku mbali ya nsalu, nu tumikowelo tuze 50 uku mbali ya nsalu na yuze pano zikulundinkanila. 11 Uce upange tuvyela 50 twakwe koopa utwa kukowekamo, nupya uce utwike umu mikowelo nu kulemenkanya insalu, nayo ilaya insalu yonga iya kuvimba pi tenti. 12 Insalu izilasyalako zilanyinyinda. Nupya afu wa nsalu iilasyalako ilanyinyinda ku nsizi yi tenti lya kupepelapo. 13 Insalu izilasyalako, zilanyinyinda ukwi tenti lya kupepelapo, zilaya masentimita mupiipi na 45 ku lusansa longa na longa, izilaavimba itenti lilyo.

14 “Uce upange insalu na yuze iya kuvimba pi tenti lya kupepelapo ukuomvya impapa ya mfwele ino yasangula ukuya iyenzu nupya uce upange insalu na yuze ukuomvya impapa izitontekane iya kuvimba pi tenti lya kupepelapo.

15 “Uce upange mafulemu aakwimika umu mbali yi tenti lya kupepelapo ukuomvya imbao zyakwe akasya. 16 Ifulemu lyonga na lyonga lice likwate mamita 4 ukuya umupela alino umu wipi namo lice likwate masentimita mupiipi na 70. 17 Cila fulemu lice lyakwata utumakulu twili. Vikwene avino uce upange mafulemu yonsi aapi tenti lya kupepelapo. 18 Uce upange mafulemu 20 ku kaeya ki tenti lya kupepelapo, yace yalozye uku kaeya.

19 “Uce upange utwa kwingizyamo utumakulu twa mafulemu utuli 40 twakwe siuva pa mafulemu 20: cila fulemu lice likwate paili apa kwingizya utumakulu. 20 Ku mbali yuze iyi tenti lya kupepelapo, kuli kuti uku katutu, nako uce upange mafulemu 20, 21 uce upange nu twa kwingizyamo utumakulu twa mafulemu twakwe siuva utuli 40, cila fulemu lice likwate pa kwingizya utumakulu paili. 22 Ku nsizi yi tenti lya kupepelapo, kuli kuti uku uwondaka, uce upange mafulemu 6. 23 Uce upange mafulemu yaili aalaya uku makoona yaili ukwi tundu li tenti lya kupepelapo. 24 Yafwile ukuya yaili aalundinkane ukufuma pansi ukufika pa tumipeto twa papela. Vikwene avino cifwile ukuya uku mafulemu ya mu makoona yoili. 25 Nupya uce upange mafulemu 8 nu twakusomekamo mafulemu twakwe siuva utuli 16, cila fulemu lice lyakwata utwakusomekamo twili.

26 “Uce uwaze nu tumiti ututali ukuomvya imbao zyakwe akasya, utuli 5 tulaya uku mafulemu ya ku lusansa longa ulwi tenti lya kupepelapo, 27 nupya utuli 5 tukaye ku mafulemu uku lusansa luze ulwi tenti lya kupepelapo, tuze nato 5 tukaye uku mafulemu ya kwi tenti lya kupepelapo uku uwondaka, kuli kuti uku nsizi. 28 Kamuti akatali akalapita pakasi ka mafulemu kalinzile ukufumilila ku mpela ukufika uku mpela yuze.

29 “Uce upake goldi uku mafulemu, nupya uce upange utumipeto twakwe goldi umulapita utumiti ututali, uce upakeko na goldi uku tumiti ututali. 30 Uce upange itenti lya kupepelapo ukulingana na vino inkulanga pa mwamba kwene uu.

31 “Uce upange ketani ukuomvya kotoni yakwe bulu, kotoni iyenzulukile, kotoni iyenzu alino ni nsalu isuma. Pace paye ni vikope vyakwe ya kelubi. 32 Uce uikoweke pa ncesi 4 zyakwe akasya izipakweko goldi. Tumikowelo tuce tuye utwakwe goldi. Incesi zice zisomekwe umu twakusomekako 4 twakwe siuva. 33 Uce ukoweke ketani umu tuvyela twakukowekamo, nupya muli ketani kwene wii amuno uce uwingizye Imbokosi ya Upangano. Aalapaatukanya Umuputule wa Muzilo nu Muputule wa Muzilo Sana. 34 Uce uwike intupiko pa mbokosi ya Upangano mu Muputule wa Muzilo Sana.

35 “Uce uwike tebo umu muputule wa muzilo ni ca kuteekapo lampi cice cilozyanye na tebo uku kaeya ki tenti lya kupepelapo; nupya tebo uce umwike uku lusansa lwa ku katutu. 36 Uce upange ketani wa pa mulyango wi tenti lya kupepelapo ukuomvya kotoni yakwe bulu, kotoni iyenzulukile, kotoni iyenzu alino ni nsalu isuma. 37 Uce upange incesi 5 zyakwe akasya ukwakupisya ketani, nupya uce upakeko goldi. Tumikowelo tuce tuye utwakwe goldi, nupya uce upange nu twakwikamo incesi zizyo twakwe goldi utuli 5.

27 “Uce upange ulambo ukuomvya imbao zyakwe akasya; uce ucile panono pa mamita* yaili umu utali, alino nu kucila panono mamita yaili umu wipi. Ulambo uce ulingane umu utali nu mu wipi nupya uce utalimpe umupiipi na mita wenga ukuya papela. 2 Uce upange utukoline ni mpembe apa makoona 4; tupembe tuto tuce tuye uku ulambo, nupya uce upakeko koopa uku ulambo. 3 Uce upange mabaketi umwa kuzyolela itwi,* pamwi na mafosyolo, ya beseni, mafoloko ni vya kulemelako umoto, nupya vyonsi uce uvipange ukuomvya koopa. 4 Uce upange waya wakwe koopa uwa pa ulambo uwa kocelapo, nupya uce uwike utumipeto twakwe koopa 4 mu makoona 4 aa ulambo. 5 Uce uwike waya wiyo pakasi ka ulambo. 6 Uce uwaze utumiti ututali utwa mbao zyakwe akasya utwa pa ulambo nupya uce upakeko koopa. 7 Muce mwaingizya utumiti tuto umu tumipeto twa ku ulambo ku mbali zyoili pa kuusenda. 8 Uce upange ulambo ukoline ni cimbokosi ca mbao iciyulike papela na pansi. Uce ucipange wakwe vino nakulangilile pa mwamba.

9 “Uce upange umusolo wa pi tenti lya kupepelapo. Uku kaeya, umusolo uce uzingulukwe na maketani asuma, umu utali ulusansa longa luce luye mamita 44 na afu. 10 Umusolo uce ukwate incesi* 20 nu twakwimikapo incesi twakwe koopa utuli 20. Tumikowelo nu twakulemanya incesi tuce tuye utwakwe siuva. 11 Ku katutu nako kwene maketani yace iikwe pa musolo, mu utali mamita 44 na afu pamwi ni ncesi 20 nu twakwimikapo incesi twakwe koopa utuli 20 alino nu tumikowelo twakwe siuva nu twakulemanya incesi. 12 Ku uwondaka wa musolo ukulaya mamita 22, kuce kuye maketani ni ncesi 10 nu twakwimikapo incesi utuli 10. 13 Umu wipi wa musolo ukukafumilila ilanzi kulaya mamita 22. 14 Ku lusansa longa kuce kuye maketani aalatalimpa umupiipi na mamita 7, nupya kuce kuye incesi zitatu nu twakwimikapo incesi nato tutatu. 15 Nupya uku lusansa luze nako kuce kuye maketani aalatalimpa mupiipi na mamita 7 ni ncesi zitatu nu twakwimikapo incesi tutatu.

16 “Pa mulyango uwa kwingilila umu musolo pace paye ketani aalatalimpa mupiipi na mamita 9, uwapangilwa na kotoni yakwe bulu, kotoni iyenzulukile, kotoni iyenzu alino na kotoni itiswe, pace paye incesi 4 nu twakwimikapo incesi utuli 4. 17 Incesi zyonsi izilazinguluka umusolo zice zikwate utwakunyepelako nu tumikowelo twakwe siuva, lelo utwakwimikapo incesi twene tuce tuye utwakwe koopa. 18 Umu utali, umusolo uce uye mamita 44 na afu, umu wipi uce uye mamita 22 nupya maketani yace yaye mamita yaili ukuya umupela aapangilwa ni nsalu isuma, nupya umusolo uce ukwate utwakwimikapo incesi twakwe koopa. 19 Iviya vyonsi alino ni viombelo ivya kuomvya pi tenti lya kupepelapo alino ni mpopo zi tenti ni mpopo zyonsi izya pa musolo, vice viye ivyakwe koopa.

20 “Uce unene Aina Izlaeli ukuti yace yakuletele mafuta ya muolivi ayengululwe ningo aakuomvya uku luswepo pakuti ya lampi yace yaaka lyonsi. 21 Umwi tenti lya kupepelapo umu muputule wa muzilo uwaya ukunzi yakwe ketani uwaya apiipi ni Mbokosi ya Upangano, amuno Aloni na ana yakwe aonsi yace yapekanye ukuti ya lampi yaaka pa nkoleelo yakwe Yeova ukufuma manguzi ukufika katondo. Vikwene avino Aina Izlaeli amu nkulo zyonsi yace yacita.

28 “Uce uleke Aloni pamwi na anakwe ukufuma umu Ina Izlaeli, yace yambombela umulimo wa usimapepo, kuli kuti Aloni kwene pamwi na Nadabu na Abihu na Elieza pamwi na Itamali. 2 Uce upangile Aloni umwinako ivyakuzwala vya muzilo, ivyakuti vice vyamucindamika nu kumuyemvya. 3 Uce unene yonsi amanyikisya milimo yano napeela umupasi wa mano, yace yapangile Aloni ivyakuzwala ivyakulangilila ukuti watasangululwa, pakuti angaambombela mulimo wakwe usimapepo.

4 “Vyakuzwala vino yalapanga aevi: cakuzwala pa cisao, efodi, icakuzwala icaula makasa, umwingila, citambala nu musipi wa nsalu; yalapangila Aloni umwinako na ana yakwe ivyakuzwala vii ivya muzilo pakuti ace ambombela mulimo wakwe usimapepo. 5 Aomvi amanyikisya milimo yalaomvya goldi, kotoni yakwe bulu, kotoni iyenzulukile, kotoni iyenzu alino ni nsalu isuma.

6 “Yalapanga efodi ukuomvya goldi, kotoni yakwe bulu, kotoni iyenzulukile, kotoni iyenzu alino na kotoni itiswe, nupya alinzile ukuyemviwa. 7 Ace akwate insalu ziili izilemenkane izilapita pa viye izilalundinkana uku mpela zyoili zyakwe efodi. 8 Umusipi uwa kunyepa muli efodi nao kwene uce upangwe ukuomvya goldi, kotoni yakwe bulu, kotoni iyenzulukile, kotoni iyenzu alino ni nsalu isuma.

9 “Uce utole utumawe twakwe onikisi twili nu kulembapo mazina ya yana yakwe Izlaeli, 10 mazina 6 yace yaye pa kaliwe konga nupya mazina 6 asyala yace yaye pa kaliwe kauze, ukulingana na muno ya mwana Izlaeli yakonkaniile umu kuvyalwa. 11 Aakalemba pa mawe, alalemba mazina yakwe ya mwana Izlaeli pa mawe yaili wakwe vino angafwatikapo icimanyililo. Lyene uce uwike utumawe tuto umu twakwikamo twakwe goldi. 12 Uce uwike utumawe twili pa viye vya cakuzwala cakwe efodi, utumawe tuto tulaya icakwiusizyako Ina Izlaeli, na Aloni alaasenda mazina yao pa viye pa nkoleelo yakwe Yeova aalaya wa cakwiusizyako. 13 Uce upange utuntu twakwe goldi utwakwikamo utumawe 14 nupya uce upange tumaceni twili twakwe goldi umwengululwe ningo utukoline nu mwando, nu kutulundinkanya uku twakwikamo twakwe goldi.

15 “Uce uleke aakaomba mulimo wa kusuma, apange icakuzwala ca pa cisao ica upinguzi. Cice cipangwe wakwe efodi, ukuomvya goldi, kotoni yakwe bulu, kotoni iyenzulukile, kotoni iyenzu alino ni nsalu isuma. 16 Cice cilingane monsi monsi nga mwacipeta, umu utali cice ciye masentimita mupiipi na 22.2, mu wipi namo kwene cice cikwate masentimita mupiipi na 22.2* 17 Uce uwikemo utumawe, uce utwike mu milaini 4. Mu mulaini wa kutandikilako muce muye lubi, topazi na emalodi. 18 Mu mulaini wakwe ciili muce muye tokwasi, safilo na jasipa. 19 Mu mulaini wakwe citatu muce muye kaliwe kakwe lesyemu,* agate na ametusiti. 20 Mu mulaini wakwe 4 namo muce muye kilisoliti, onikisi na jadi. Tumawe tonsi tufwile ukwikwa mu twakwikamo twakwe goldi. 21 Tumawe tulalingana na mazina 12 aa yana yakwe Izlaeli. Cila kaliwe kace kalembwepo izina wakwe vino ungafwatikapo icimanyililo, izina lyonga na lyonga lilaimililako umutundu onga pa mitundu 12.

22 “Uce upange tumaceni utupombane utwa pa cakuzwala ca pa cisao, utukoline nu mwando wakwe goldi umwengululwe ningo. 23 Uce upange tumipeto twili twakwe goldi utwakwika ku cakuzwala ca pa cisao, uce utulemanye uku mpela zyoili izya cakuzwala ca pa cisao. 24 Uce uwingizye utumyando twili twakwe goldi mu tumipeto twili utuli uku mpela ya cakuzwala ca pa cisao. 25 Uce uwingizye utumyando twili umu tupongo twili utuli pa ca kwikapo utumawe, uce utusomeke pa viye vya cakuzwala cakwe efodi lwa pa nkoleelo. 26 Uce upange utumipeto twili twakwe goldi nu kutwika uku mpela zyoili kwisika ya cakuzwala ca pa cisao lwa mukasi, icaticikonkana na efodi. 27 Uce upange utumipeto na tuze twili twakwe goldi pa nkoleelo yakwe efodi lwa pisika, mupiipi nu musipi wa nsalu. 28 Cakuzwala ca pa cisao cice cileme ku tutambo twakwe bulu, nupya tumipeto twa ku tutambo tuto tuce tuleme ku tumipeto twakwe efodi. Cico cilalenga ukuti icakuzwala ca pa cisao ciikale pali efodi lwa papela ya musipi.

29 “Aloni ace aasenda mazina ya yana yakwe Izlaeli pa cakuzwala ca pa cisao ica upinguzi, ace aacizwala pa cisao lino akwingila umu muputule wa muzilo pakuti Yeova ace aiusya Aina Izlaeli lyonsi. 30 Uce uwike Ulimu na Tumimu* mu cakuzwala ca pa cisao ica upinguzi, nupya vice vyaya pa cisao cakwe Aloni lino wiza pa nkoleelo yakwe Yeova mu muputule wa muzilo, nupya lyonsi lino akupingwilako Aina Izlaeli pa nkoleelo yakwe Yeova, vice vyaya pa cisao cakwe.

31 “Uce upange ikoti ilyaula makasa lyakwe efodi ukuomvya kotoni yakwe bulu itupu. 32 Ikoti lilyo lice likwate umwakwingizya insingo. Nupya aakapikula ace apikule ukuzingulusya insingo yonsi. Insingo yi koti lilyo ikaye wa nsingo yi koti lya mpapa pakuti itaca ilepuke. 33 Uce upange ivyakolana ni vizao vya mapomegilaneti ukuomvya kotoni yakwe bulu, kotoni iyenzulukile na kotoni iyenzu ukuzingulusya uku mpela yi koti ilyaula makasa, uce uwikeko na tumbelu pakasi ka mapomegilaneti. 34 Uce uwaika pomegilaneti alino ukonkezyapo na kambelu kakwe goldi, ukuzingulusya ukwisika ili koti ilyaula makasa. 35 Aloni alaazwala icakuzwala cico lino akumbombela, nupya icongo ca kuli tumbelu cice cauvwika lino akwingila umu miputule ya muzilo kuli Yeova na lino akufuma, pakuti ataca afwe.

36 “Uce upange ciyembelo cakwe goldi umwengululwe ningo iciyengese nupya uce ulembepo wakwe vino umwi angafwatikapo icimanyililo ukuti: ‘Yeova ali mwineco wa muzilo.’ 37 Uce ucinyepelele uku citambala ukuomvya katambo kakwe bulu; cice ciye pa nkoleelo ya citambala. 38 Cilaaya pa cipuma cakwe Aloni, nupya Aloni aalapeelwa umulandu lino umwi wayembukila ivya muzilo vino Aina Izlaeli yalasangulula lino yakuvipeela ngi vya upe vya muzilo. Lyonsi iciyembelo cice caya pa cipuma cakwe Aloni, pakuti antu yangapokelelwa kuli Yeova.

39 “Uce usume umwingila ni citambala ukuomvya insalu isuma, nupya uce upange nu musipi wa nsalu.

40 “Nupya uce usumile na ya mwana Aloni imingila, imisipi ni vyakuzwala uku mitwe, pakuti yace yacindamikwe nu kuyemviwa. 41 Uce uzwike Aloni umwinako ivintu vivyo kumwi na ana yakwe aonsi, uce uitile mafuta nu kuyasonta ukuya ya simapepo nupya uce uyasangulule pakuti yambombela umulimo wa usimapepo. 42 Uce uyapangile na ya kaputula aa nsalu isuma pakuti yace yafisa ivyanzwalo vyao. Yace yafumilile umu misana ukufika umu mpamba. 43 Aloni na anakwe yace yazwala ya kaputula yaa lino yakwingila umwi tenti lya kupepelapo nanti lino yakupalama uku ulambo uku kuombela umu ncende ya muzilo, pakuti yataca yaye nu mulandu nu kufwa. Lii i sunde lya manda pe kuli aliwe alino nu ku yana yakwe aalalondelelapo.

29 “Vii avino uce ucite pa kusangulula Aloni na ana yakwe aonsi pakuti yace yambombela umulimo wa usimapepo: Uce utole cipambasi wenga, ya suuku yaili aula ulema, 2 umukate uwaula icitutumusi, imikate iulungane iyaula icitutumusi iikweti icipongo iisakanye na mafuta ni mikate ipapatane iyaula icitutumusi iisanswepo na mafuta. Uce uipange ukuomvya fulaulo wa ngano umusuma, 3 nupya uce uike muli basiketi nu kuileta kuli nene pamwi na cipambasi na ya suuku* yaili.

4 “Uce utwale Aloni na ana yakwe aonsi pa mulyango wi tenti lya kupepelapo nu kuyafula na manzi. 5 Lyene uce uzwike Aloni umwingila,* ikoti lyakwe efodi ilyaula makasa, efodi ni cakuzwala ca pa cisao, nupya uce umunyepele ningo umusipi wa nsalu yakwe efodi umu musana. 6 Uce umuzwike icitambala uku mutwe nupya ku citambala uce uwikeko cimanyililo ca muzilo ica kuipeela; 7 nupya uce utole mafuta ya muzilo* nu kumwitila pa mutwe pakuti asontwe pali usimapepo.

8 “Lyene uce ulete anakwe pa nkoleelo yane nu kuyazwika imingila 9 nupya uce uyanyepe imisipi ya nsalu umu misana, kumwi na Aloni kwene, uce uyazwike ni nsalu uku mitwe; nupya yalaomba usimapepo amanda yonsi. Vikwene avino ulinzile ukusonta Aloni na anakwe pali usimapepo.

10 “Lyene uce utwale cipambasi pa nkoleelo yi tenti lya kupepelapo, nupya Aloni na anakwe yace iike makasa yao pa mutwe wakwe cipambasi. 11 Uce ukome cipambasi pa nkoleelo yakwe Yeova, pa mulyango wi tenti lya kupepelapo. 12 Uce utimpike umunwe umu wazi wakwe cipambasi nu kupaka uwazi uwo uku mpembe zya ulambo, nupya uwazi onsi uwasyala uce uwitile umwisika lya ulambo. 13 Lyene uce utole mafuta yonsi akunzi ya mala, mafuta ya kwi tima, ni mfyo ziili alino na mafuta ya ku mfyo kwene zizyo, uce uvyoce pakuti vyasuuka pa ulambo. 14 Lelo umunyefu wakwe cipambasi pamwi ni mpapa na citindi, uce uvyoce umu moto ukunzi ya nkambi. Vilaya i lambo lya pa luyembu.

15 “Lyene uce utole suuku wenga, nupya Aloni na ana yakwe yace iike makasa yao pa mutwe wakwe suuku wiyo. 16 Uce ukome suuku wiyo nu kutola uwazi nupya uce uusanse umu mbali zyonsi izya ulambo. 17 Uce umuputole umu vimpilinsya nupya uce ufule mala kumwi ni vimbombo, uce utantike ivimpilinsya pamwi nu mutwe. 18 Uce uoce suuku wensi nu kuleka ukuti aasuuka pa ulambo. Uce uye upe wa koca kuli Yeova uununkile. Ulaya uupe wa kocela Yeova.

19 “Nupya kwene uce utole suuku na muze, nupya Aloni na ana yakwe aonsi yace iike makasa yao pa mutwe wakwe suuku wiyo. 20 Uce ukome suuku wiyo nupya uce utole uwazi umwi nu kuupaka uku nsongo yi kutwi lyakwe Aloni ilya kwi lunji nu ku nsongo zya matwi ya kwi lunji aa yana yakwe alino nu ku vyala vyao ivya kwi lunji nu ku vikando vyao ivikalamba ivya kwi lunji, nupya uce usanse uwazi umu mbali zyonsi izya ulambo. 21 Lyene uce utole uwazi umwi uli pa ulambo alino na mafuta yamwi amuzilo uce usansile Aloni nu ku vyakuzwala vyakwe nu kusansila ana yakwe aonsi nu ku vyakuzwala vyao, pakuti Aloni na ana yakwe yakaye amuzilo kumwi ni vyakuzwala vyao.

22 “Lyene uce utole mafuta ya kuli suuku wiyo, mafuta ya ku musinda, mafuta ya kunzi ya mala, mafuta ya kwi tima, imfyo ziili na mafuta ya ku mfyo kwene zizyo alino ni kulu lya kwi lunji, pano alaya a suuku wa kusontelako ya simapepo. 23 Uce utole nu mukate uulungane uwaula icitutumusi alino nu mukate uulungane uwaula icitutumusi uli ni cipongo uusakaanye na mafuta alino nu mukate upapatane uwaula icitutumusi kufuma muli basiketi ili pa nkoleelo yakwe Yeova. 24 Vyonsi kwene uce uviike umu makasa yakwe Aloni nu mu makasa ya yana yakwe, nupya uce uvizulunzye pa nkoleelo yakwe Yeova wa upe wa kuzulunzya. 25 Lyene uce uvitole nu kuvyoca pa ulambo papela ya upe wa koca, vilaanunkila pa nkoleelo yakwe Yeova. Ulaya uupe wa kocela Yeova.

26 “Lyene uce utole icisao cakwe suuku uwa kusontelapo ya simapepo, aalapeelwa pa mulandu wakwe Aloni, uce ucizulunzye pa nkoleelo yakwe Yeova wa ca upe ca kuzulunzya, nupya cilaya i cako. 27 Uce usangulule icisao ca upe wa kuzulunzya ni kulu lya muzilo ilya kuli suuku wa kusontelapo ya simapepo ililazulunziwa, kufuma pali vino vilapeelwa pa mulandu wakwe Aloni na ana yakwe aonsi. 28 Vilaya ivyakwe Aloni na ana yakwe aonsi nupya lilaya isunde lino Aina Izlaeli yalalondela manda yonsi, pano i vya muzilo ivilinzile ukupeelwa ukufuma ku Ina Izlaeli. I vintu vyao ivya muzilo kuli Yeova ukufuma pa malambo yao amutende.

29 “Ivyakuzwala vya muzilo vyakwe Aloni vilaaomviwa na ana yakwe aonsi aalalondelelapo lino yalasoololwa nu kupeelwa umulimo wa usimapepo. 30 Aalapyana Aloni pali usimapepo ukufuma umu yana yakwe aonsi nupya aalaingila umwi tenti lya kupepelapo uku kuombela umu ncende ya muzilo, aliwe alaavizwala pa manda 7.

31 “Uce utole suuku uwa kusontelapo ya simapepo nu kweleka umunyefu wakwe suuku wiyo umu ncende ya muzilo. 32 Aloni na ana yakwe aonsi yalalya umunyefu uwo nu mukate ulaya muli basiketi pa mulyango wi tenti lya kupepelapo. 33 Yalalya ivintu ivyapeelwa lino yakusontwa pali usimapepo pakuti yelelwe imembu, na lino yakusangululwa. Lelo umuntu aatazumiliziwa atalalyako, pano i vya muzilo. 34 Lelo ndi cakuti umunyefu umwi uwa kusontelapo usimapepo nu mukate vyasyala ukufika katondo, lyene mulinzile ukuvyoca umu moto. Vitalinzile ukuliiwa, pano i vya muzilo.

35 “Vikwene avino uce ucite kuli Aloni nu ku yana yakwe aonsi, kulingana na vyonsi vino inkunena. Cilakusendela manda 7 pa kuyapeela umulimo wakwe usimapepo. 36 Cila wanda uce uwapeela cipambasi pakuti imembu zingelelwa, nupya uce uwapeela ilambo lya kwelela imembu pakuti ulambo uce uye uwa muzilo, nupya uce uwaitila mafuta pa ulambo pakuti uye usanguluke. 37 Cilakusendela manda 7 pa kusangulula ulambo, ulausangulula pakuti uce uye uwa muzilo sana. Wensi uwalemako alaya uwa muzilo.

38 “Vino ulaapeela pa ulambo aevi: cila wanda uce uwapeela ya suuku yaili aa mwaka onga. 39 Uce uwapeela suuku wenga katondo nu muze manguzi lino patali pafiite. 40 Icipimo conga cakwe efa* pa vipimo 10 vyakwe fulaulo umusuma ivisaakanye na lita wenga uwa mafuta asuma alino na lita wenga wakwe waini uwa vya upe vya kumwa cilaomviwa pamwi na suuku wenga uwa kutandikilapo. 41 Uce uwapeela suuku wakwe ciili amanguzi lino patatala pafiita, pamwi ni vya upe vya ngano alino ni vya kumwa, wakwe vino cilinzile ukuya katondo. Vilaya ivinunkile nupya ivya upe vyakocela Yeova. 42 Vilaapeelwa wa vya upe vya koca uku nkulo zinu zyonsi pa mulyango wi tenti lya kupepelapo kuli Yeova, pano ndaalolekela kuli wewe pa kulanda naawe.

43 “Ndaalolekela ku Ina Izlaeli pa ncende iiya, nupya palasangululwa pa mulandu nu lulumbi lwane. 44 Ndasangulula itenti lya kupepelapo alino nu ulambo, nupya ndasangulula Aloni na ana yakwe aonsi pakuti yakambombela umulimo wa usimapepo. 45 Ndikala umu Ina Izlaeli, nupya ndaya Leza wao. 46 Yalamanya ukuti nene indi Yeova Leza wao, uwayafumizye umu mpanga ya Ijipti pakuti nikale nayo. Nene indi Yeova Leza wao.

30 “Uce upange ulambo apa kocela ivinunkile; uce uupange ukuomvya imbao zyakwe akasya. 2 Uce ulingane umu utali nu mu wipi, mu utali uce uye umupiipi na masentimita 44.5, mu wipi namo kwene uce uye umupiipi na masentimita 44.5, nupya ukuya umupela uce uye umupiipi na masentimita 90. Impembe zice zileme uku ulambo. 3 Papela uce upakepo goldi umwengululwe ningo, nu mu mbali zyonsi ukuzinguluka, nu ku mpembe; nupya uce uzingulusye kamulaini kakwe goldi papela. 4 Uce upange tumipeto twili twakwe goldi pisika lya kamulaini kakwe goldi umu mbali zyoili, nupya u mulaingila utumiti ututali utwa kuomvya pa kunyemula ulambo. 5 Uce upange utumiti ututali ukuomvya imbao zyakwe akasya nupya uce utupakeko na goldi. 6 Uce utwike pa nkoleelo yakwe ketani aali apiipi ni mbokosi ya Upangano, mupiipi ni ntupiko ya pa mbokosi ya Upangano, pano ndaalolekela kuli wewe.

7 “Aloni alaoca ivinunkile pa ulambo, alaleka ukuti vyasuuka lino akupekanya ya lampi cila katondo. 8 Nupya lino Aloni wakozya ya lampi manguzi lino patatala pafiita, alaoca ivinunkile. Ulaya upe wa vinunkile kuli Yeova umu nkulo zinu zyonsi. 9 Mutaca mwapeela ivinunkile ivitazumiliziwa pa ulambo nanti upe wa koca nanti sile upe wa ngano, nupya mutaca mwaitila upe wa vya kumwa pa ulambo. 10 Aloni ace aasangulula ulambo pa mpembe umuku onga pa mwaka. Pa kuusangulula alaaomvya uwazi umwi uwa pa vya upe vya pa luyembu, alausangulula umuku onga pa mwaka umu nkulo zinu zyonsi. Ulambo u wa muzilo sana kuli Yeova.”

11 Lyene Yeova wanenyile Mose ati: 12 “Lyonsi lino ukupenda Aina Izlaeli, cila muntu ace aapeela ilambo pa umi wakwe kuli Yeova pa nsita ya kupenda. Vikwene avino cice caaya, pakuti cinkunka citaca cize pali aliyo lino yapendwa. 13 Vino yonsi aapendwa yalaapeela aevi: afu wakwe syekele* ukulingana ni cipimo cakwe syekele wenga ica pa ncende ya muzilo. Magela* 20 aalingine na syekele wenga. Afu wakwe syekele u musangulo kuli Yeova. 14 Muntu wensi uwapendwa ali ni myaka 20 ukuya papela, alaapeela umusangulo kuli Yeova. 15 Umukankala atalinzile ukupeela ivingi nu mupiina atalinzile ukupeela ivinono ivicefile pali afu wakwe syekele ukuya musangulo kuli Yeova pa kupeela ilambo lya kwelela pa maumi inu. 16 Uce upoke impiya zyakwe siuva izya kwelela imembu kufuma uku Ina Izlaeli nu kuzipeela pa mulandu nu mulimo wa pi tenti lya kupepelapo, pakuti zice ziye ica kwiusizyako Aina Izlaeli pa nkoleelo yakwe Yeova nu kupeela ilambo lya kwelela pa maumi inu.”

17 Nupya kwene Yeova wanenyile Mose ati: 18 “Uce upange beseni wakwe koopa uwa kufulalilamo alino ni ca kuteekapo; lyene uce umwike pakasi ki tenti lya kupepelapo nu ulambo uce uwikemo na manzi. 19 Apano Aloni na anakwe aonsi yalaafulala makasa na makulu. 20 Lino yakwingila umwi tenti lya kupepelapo nanti ukupalama uku ulambo uku kuomba imilimo yao nu kupeela ivya upe vya koca alino nu kufutumula kuli Yeova, yace yafulala pakuti yataca yafwe. 21 Yace yafulala uku makasa nu ku makulu pakuti yataca yafwe, nupya lilaya isunde lino yalaalondela lyonsi, kuli kuti Aloni na ana yakwe umu nkulo zyao zyonsi.”

22 Yeova watwalilile ukunena Mose ati: 23 “Ivinunkile ivisuma sana vino uce utole aevi: makilogilamu 6 yakwe mule, makilogilamu yatatu yakwe sinamoni na makilogilamu yatatu yakwe kalamasi, 24 na makilogilamu 6 yakwe kasya ukulingana ni cipimo cakwe syekele wenga ica pa ncende ya muzilo, alino na malita yatatu na afu aa mafuta ya miolivi. 25 Lyene uce upangemo mafuta ya muzilo; uce uvisaakanye ningo sana. Yalaya a mafuta ya muzilo.

26 “Uce uomvye mafuta yayo ukupaka itenti lya kupepelapo ni mbokosi ya Upangano, 27 alino na tebo na vyonsi ivikaikalapo, ica kuteekapo lampi na vyonsi ivyayapo, ulambo wa kocelapo ivinunkile, 28 ulambo wa kupeelelapo upe wa koca na vyonsi ivyayapo, na beseni alino ni ca kuteekapo. 29 Ulinzile ukuvisangulula pakuti viye ivya muzilo sana. Wensi uwalemako alaya uwa muzilo. 30 Nupya uce uwitile Aloni na ana yakwe aonsi mafuta pa mitwe nu kuyasangulula pakuti yambombela usimapepo.

31 “Uce unene Aina Izlaeli uti, ‘Yaa yalatwalilila ukuya mafuta yane aamuzilo ku nkulo zinu zyonsi. 32 Kusi umuntu aalinzile ukupakala mafuta yaa, nupya mutalinzile ukupanga mafuta aakoline na mafuta yaa, pano aamuzilo. Yalatwalilila ukuya icintu ca muzilo kuli mwemwe. 33 Wensi uwapanga mafuta aakoline na yaa nu kupaka umuntu aatazumiliziwa, alinzile ukukomwa.

34 Lyene Yeova wanenyile Mose ati: “Tola ivintu vii ivinunkile ivilingane: Sitakite, onika, gabanamu nu ubani usuma sana. 35 Upangile ivintu ivinunkile; ulinzile ukuvisaakanya ningo sana, ukwikamo umusilya pakuti viye ivisanguluke nupya ivya muzilo. 36 Uce uponde vimwi viye usu utonyoleke nu kwika vimwi pa nkoleelo ya mbokosi ya Upangano umwi tenti lya kupepelapo, pano ndaalolekela kuli wewe. Vifwile ukuya ivya muzilo sana kuli mwemwe. 37 Mutalinzile ukuomvya mweineco ivinunkile vino mwapanga ukuomvya ivintu vivyo. Pano ivya muzilo kuli Yeova. 38 Wensi uwapanga ivili wakwe vii pakuti auvwa ningo ukununkila alinzile ukukomwa.”

31 Yeova watwalilile ukunena Mose ati: 2 “Lola, insoolola Bezalele mwana Uli nupya umwizikulu wakwe Huli uwa mu mutundu wakwe Yuda. 3 Ndamupeela umupasi wane, amano, nu kwiluka, nupya ndalenga amanye ivya kupangapanga, 4 alamanya vino ivintu vilinzile ukupangwa, ukuomvya goldi, siuva na koopa, 5 alamanya ni vya kuputula mawe ni vya kuyatantika, nupya alamanya ivya kupanga ivintu ivipusanepusane ukuomvya imbao. 6 Nupya insoolola aalaazwa Bezalele, kuli kuti Olyabu mwana Aisamaki uwa mu mutundu wakwe Dani, nupya namapeela mano kuli yonsi aamanyikisya ivya kupangapanga, pakuti yace yapange vyonsi vino inkunena. 7 Yalapanga itenti lya kupepelapo, imbokosi ya Upangano kumwi ni ntupiko, ni viya vyonsi ivya mwi tenti, 8 tebo ni viya ivikaikalapo, ica kuteekapo lampi cakwe goldi umwengululwe ningo ni viya vyonsi ivikaikalapo, ulambo wa kocelapo ivinunkile, 9 ulambo wa kupeelelapo ivya upe vya koca ni viya vyonsi ivikaikalapo, beseni ni ca kuteekapo, 10 ivyakuzwala ivisume ningo, ivyakuzwala vya muzilo vyakwe Aloni simapepo, ivyakuzwala vya yana yakwe aalaomba usimapepo, 11 mafuta ya muzilo ni vinunkile ivya pa ncende ya muzilo. Yalaomba vyonsi vino inkunena.”

12 Nupya kwene Yeova wanenyile Mose ati: 13 “Nena Aina Izlaeli uti, ‘Mwaikisya mano uku kusunga masabata yane, pano ali cimanyililo pali mwemwe nani umu nkulo zinu zyonsi pakuti mumanye ukuti nene ne Yeova nkumusangulula. 14 Mufwile ukulasunga Isabata, pano ilya muzilo kuli mwemwe. Wensi uwalisaalula alinzile ukukomwa. Ndi cakuti umwi waomba umulimo pa wanda wi Sabata alinzile ukukomwa. 15 Mungaomba umulimo umu manda 6, lelo uwanda uwalenga 7 u wanda wi sabata uwa kupuuza. Uwanda uu u wa muzilo kuli Yeova. Wensi uwaomba umulimo pa wanda wi Sabata alinzile ukukomwa. 16 Aina Izlaeli yafwile ukulasunga Isabata; yafwile ukulasunga Isabata umu nkulo zyao zyonsi. Upangano uu u wa manda pe. 17 I cimanyililo ica manda pe pali nene na Ina Izlaeli, pano umu manda 6 amuno Yeova wapanzile mayulu ni nsi nupya pa wanda uwalenga 7 apano wapuuzile nu kusansamuka.’”

18 Lyene lino Leza wamazile ukulanda na Mose pa mwamba wa Sinai, wamupeezile mawe yaili apapatane aa Upangano, kuli kuti mawe yano Leza walemvilepo umwineco ukuomvya umunwe wakwe.

32 Lyene antu yaweni ukuti Mose walengela ukuwela uku mwamba. Fwandi yakolongine iyazinguluka Aloni nu kumunena iyati: “Tupangile Leza uwakuti aatutungulula, pano tutamanyile icaticicitika kuli Mose uwatutungulwile ukufuma umu mpanga ya Ijipti.” 2 Lyene Aloni wayanenyile ati: “Tolini maelena yakwe goldi aali ku matwi yakwe ya mama inu, ku yana inu aonsi, nu ku yana inu akazyana nu kundetela.” 3 Fwandi antu yonsi yatandike ukuzuula maelena yakwe goldi aali ku matwi yao nu kuyatwala kuli Aloni. 4 Lyene waposile goldi ukufuma kuli aliyo, nupya waomvizye cizulo ukupanga icalolekanga wa kana ka ng’ombe. Antu yatandike ukulanda iyati: “We Izlaeli, wikwene ali leza wako uwakufumizye umu mpanga ya Ijipti.”

5 Lino Aloni waweni vivyo, wapanzile ulambo pa nkoleelo ya kana ka ng’ombe. Lyene wapunzile ati: “Mutondo kulaya umutebeto kuli Yeova.” 6 Lyene yakatwike katondotondo pa wanda uwalondelilepo nu kutandika ukupeela malambo ya koca na malambo ya mutende. Pa cisila antu iikazile nu kutandika ukulya nu kumwa. Lyene yakatwike iyatandika nu kusansamuka.

7 Lyene Yeova wanenyile Mose ati: “Pitanga, tentemuka umwamba, pano antu yako yano wafumizye umu mpanga ya Ijipti iyacita ivintu iviipisye. 8 Iyafuma umu nzila ino nayanenyile ukuti yalondela. Iyapanga icikoline na kana ka ng’ombe, nupya yakucifukamila nu kucipeela malambo nupya yakulanda iyati, ‘We Izlaeli, wikwene ali leza wako uwakufumizye umu mpanga ya Ijipti.’” 9 Yeova watwalilile ukunena Mose ati: “Indola ukuti antu yaa yakoma imyenzo. 10 Insoka sana, leka njonone, nupya ndapanga uluko luze ulukalamba ukufuma muli wewe.”

11 Lyene Mose wapaapasile kuli Yeova Leza wakwe ati: “We Yeova, u mulandu ci uno wasokela antu yako yano wafumizye uku mpanga ya Ijipti ukuomvya amaka yako? 12 Utaleka Aina Ijipti yace yalande ukuti, ‘Wali ni pange iliipe lino wayafumizye umu mpanga yii. Walondanga ukuyakomela umu myamba nu kuyalovya umu nsi.’ Utatwalilila ukuyasokela nupya senuka muli vino watupingula, pakuti utonona antu yako. 13 Iusya Abulahamu, Isaki, na Izlaeli aomvi yako, yano walafileko umulapo uti: ‘Ndavuzya ana alafuma umu yana inu wa ntanda zya mwi yulu, nupya impanga yii yonsi ndaipeela uku yana inu, pakuti ice iye iyao amanda pe.’”

14 Fwandi Yeova wasenwike muli vino wapingwile, nupya atononyile antu yakwe.

15 Lyene Mose watentemwike umwamba ala ali na mawe yaili aa Upangano apapatane umu minwe. Amawe yayo yalemvilwe uku mbali zyonsi zyoili. 16 Leza u wapanzile mawe yayo apapatane nupya u walemvilepo mazwi yakwe. 17 Lino Yoswa watandike ukuvwa icongo ca yantu pa mulandu wakuti yapundanga, wanenyile Mose ati: “Cikuvwika kwati antu yakulwa inkondo.” 18 Lelo Mose walanzile ati:

19 Lino Mose wafisile umupiipi ni nkambi waweni icakoline na kana ka ng’ombe ala na antu yakucina, wasosile sana nupya wasumvile mawe apapatane aali umu minwe yakwe nu kuyavungola umwisika lya mwamba. 20 Watozile icakoline na kana ka ng’ombe cino yapanzile nu kucoca umu moto nupya wacitamozile iciya uusu; lyene wasumbiile usu uwo umu manzi nu kuleka ukuti Aina Izlaeli yamwe manzi yaayo. 21 Nupya Mose uzizye Aloni ati: “I cani cino antu yaa iyacita kuli wewe, pakuti ulete uluyembu ulukalamba pali aliyo?” 22 Aloni nawe waswike ati: “Utasoka musambazi wane. Wamanya ningo vino antu yaa yatemwa ukucita iviipe. 23 Yanenyile iyati, ‘Tupangile leza uwakuti aatutungulula, pano tutamanyile icaticicitika kuli Mose uwatufumizye umu mpanga ya Ijipti.’ 24 Fwandi nayanenyile inti: ‘Wensi aazwite maelena yakwe goldi azuule nu kumpeela.’ Lyene natozile goldi wiyo nu kumusumbila umu moto nu kupangamo icikoline na kana ka ng’ombe.”

25 Mose waweni ukuti Aloni wayatazyezile, fwandi yaizewanyizye uku yalwani yao. 26 Lyene Mose waile aimilila pa nzila ya kwingilila umu nkambi nu kulanda ati: “A weni ali uku lusansa lwakwe Yeova? Aize kuli nene!” Nupya Aina Levi yonsi yakolongine iyamuzinguluka. 27 Lyene wayanenyile ati: “Yeova Leza wa Ina Izlaeli watalanda ati, ‘Cila muntu atole ulupanga nu kupita umu nkambi yonsi, akome umwinakwe, umwinamupalamano alino na cuzakwe.’” 28 Aina Levi yacisile cino Mose wayanenyile. Nupya aonsi umupiipi na 3,000 yakomilwe pa wanda kwene uwa. 29 Lyene Mose walanzile ati: “Ipeelesyini kuli Yeova ilelo, pano mwensi kwene cila muntu watakatukila umwanakwe nu mwinakwe; ilelo Leza amamupaala.”

30 Uwanda uwalondelilepo, Mose wanenyile antu ati: “Mwacisile uluyembu ulukalamba sana, lyene nimaya kuli Yeova indole ndi cakuti ningacitapo cimwi pakuti amwelele.” 31 Fwandi waswilile kuli Yeova nu kuyamunena ati: “Antu yaa iyacita uluyembu ulukalamba sana! Yaipangiile leza wakwe goldi! 32 Lelo ndi cakuti ungatemwa, yeleele pa luyembu lwao; nomba nga cisi vivyo ufuute izina lyane lino walemba umwi buku lyako.” 33 Lelo Yeova wanenyile Mose ati: “Umuntu wensi uwanjembukiile ali wino ndafuuta izina lyakwe umwi buku lyane. 34 Pitanga, twala antu uku ncende ino nakunenyile. Lola! Malaika wane amakukoleelela, nupya pa wanda uno ndayapingula alino ndayafulula pa luyembu lwao.” 35 Lyene Yeova wafulwile antu pa mulandu wakuti yapanzile icakoline na kana ka ng’ombe, kuli kuti cino Aloni wayapangiile.

33 Nupya kwene Yeova wanenyile Mose ati: “Pitanga ufume kuno pamwi na antu yano wafumizye umu Ijipti. Muye uku mpanga ino nalafile ukupeela Abulahamu, Isaki, na Yakobo, ino nalanzile inti, ‘Ndaipeela uku yana inu.’ 2 Ndatuma malaika aalamukolelela nupya ndazinga Aina Kenani, Aina Amoli, Aina Hiti, Aina Pelizi, Aina Hivi, na Ina Yebusi. 3 Yangini umu mpanga umwaya umukaka nu uci. Lelo ntakupita namwe, pano mwemwe yantu akome imyenzo, nupya limwi ningamukomela umu nzila.”

4 Lino antu yuvwile mazwi yayo aakusakamika, yatandike ukulila, nupya kusi ali wensi uwazwite iviyembelo vyakwe. 5 Yeova wanenyile Mose ati: “Nena Aina Izlaeli uti, ‘Mwemwe yakome imyenzo. Mu kasita sile akanono ningiza muli mwemwe nu kumukoma. Fwandi mutatala muzwale iviyembelo vinu lino nkulola vino nimacita kuli mwemwe.’” 6 Ukufuma pa mwamba wa Holebu Aina Izlaeli yataatazile yazwalepo iviyembelo.

7 Lyene Mose watozile itenti lyakwe nu kulitanika ukunzi ya nkambi, walitalwisye uku nkambi, nupya watandike ukulyama ukuti itenti lya kupepelapo. Wensi aakulonda ukuzya Yeova, wayanga ukwi tenti lya kupepelapo ilyali ukunzi ya nkambi. 8 Lyonsi lino Mose akuya ukwi tenti, antu yonsi yakatukanga nu kwimilila pa milyango ya matenti yao, nupya yalolekesyanga kuno Mose akupita ukufikila wingila umwi tenti. 9 Lyonsi sile lino Mose wingila umwi tenti, ikumbi liizanga nu kwimilila pa mulyango wi tenti ala Leza akulanda na Mose. 10 Lyonsi lino antu yonsi yalola ikumbi limilila pa mulyango wi tenti, cila muntu wakatukanga nu kufukama pa mulyango wi tenti lyakwe. 11 Yeova walandanga na Mose ala iyalozyanya ivinso, wakwe vino umuntu angalanda uku muntu muze. Lino Mose waswililanga uku nkambi, Yoswa mwana Nuni umuomvi wakwe nupya uwamwazwilizyanga, wene ataafumanga pi tenti lya kupepelapo.

12 Lyene Mose wanenyile Yeova ati: “Ukulanda ukuti ntungulule antu yaa, lelo utaanenyile wino nimapita nawe. Nupya ukuti, ‘Nakumanya izina* nu kuti wantemwa.’ 13 Fwandi ndi cakuti wantemwa, leka imanye vino ukacita, pakuti ningakumanya nu kutwalilila ukutemwikwa kuli wewe. Uwaiusya ukuti na yakwene antu yako.” 14 Leza nawe wamunenyile ati: “Nene nimapita naawe, nupya nimakupeela umutende.” 15 Lyene Mose wanenyile Leza ati: “Ndi cakuti utakupita pamwi naswe, utatufumya pano. 16 Uzye cingamanyikwa uli ukuti wantemwa nu kuti watemwa na antu yako kwene? Cingamanyikwa ndi cakuti wapita pamwi naswe, pakuti nemo na antu yako tupusaneko na antu yonsi aya pano nsi.”

17 Yeova watwalilile ukunena Mose ati: “Nimacita na vikwene vino watulenga, pano nakutemwa nupya nakumanya izina.” 18 Lyene Mose walanzile ati: “Ndange ululumbi lwako.” 19 Lelo Leza walanzile ati: “Nimaleka ukuti ulole usuma wane onsi, nupya nimakunena izina lyane ilyakuti Yeova; nupya ndaya ni cikuuku nu luse kuli wino nkulonda.” 20 Walanzile nu kuti: “Utanga ulole icinso cane, pano kusi umuntu aangandola nu kuya nu umi.”

21 Nupya Yeova walanzile ati: “Lola incende aeyi umupiipi nani. Imilila pa ciliwe. 22 Lino nkupita nu kukulanga ululumbi lwane, nimakwika umwi cele lya ciliwe, nupya nimakufisa ni ikasa lyane ukufikila impite. 23 Lyene pa cisila nimafumyapo ikasa pakuti ulole insizi yane. Lelo icinso cane cene usikucilola.”

34 Lyene Yeova wanenyile Mose ati: “Panga mawe apapatane yaili, aakoline na akutandikilapo, nupya ndalembapo amazwi aali pa mawe ya kutandikilapo yano watamile. 2 Uipekanye pakuti katondo ukaye pa Mwamba wa Sinai nu kwimilila pa nkoleelo yane pa mwamba papela. 3 Nomba kusi aalinzile ukupita naawe, nupya kusi ali wensi aalinzile ukulolekela umu ncende ili yonsi iya mwamba uu. Nanti sile imfwele nanti ing’ombe vitalinzile ukuliila umupiipi nu mwamba.”

4 Fwandi Mose wapanzile mawe yaili apapatane aakoline na akutandikilapo nupya wakatwike katondotondo nu kuya pa Mwamba wa Sinai, wakwe vino Yeova wamunenyile, wasenzile na mawe apapatane umu minwe. 5 Lyene Yeova wizile umwi kumbi nu kwimilila apaali Mose nupya wamanyisizye izina lyakwe ilyakuti Yeova. 6 Yeova wapitanga pa nkoleelo yakwe Mose ala akupunda akuti: “Yeova, Yeova, Leza wa luse ni cikuuku, aasisoka zuwa, nupya uwaya sana nu kutemwa kwa cisinka ni cumi, 7 aakalanga ukutemwa kwa cisinka uku yantu masauzandi, aakaelela akaluvyanya, aakaelela ataaya ni cuvwila kumwi na akacita uluyembu, lelo atalata sile antu aipe ukwaula ukuyafulula, aakafulula ana na izikulu ni vizikulula pa membu zyakwe ya isi.”

8 Zuwa zuwa Mose winime nu kufukama. 9 Lyene Mose walanzile ati: “We Yeova, ndi cakuti natemwikwa kuli wewe, napaapata, Yeova, upite naswe nanti cakuti twakoma imyenzo, nupya utwelele pa kuluvyanya kwitu na pa membu zitu nu kutusenda wa yantu yako.” 10 Leza nawe wamwaswike ati: “Nkupangana upangano namwe: Ndacita ivizungusyo pa manso ya yantu yonsi vino ntaatala nacita umu nsi yonsi nanti umu nko zyonsi, nupya antu yonsi yano ukaikala nayo yalalola imilimo yakwe Yeova, pano nkucita icipezya mano kuli wewe.

11 “Mwike sana mano kuli vino nkumunena ilelo. Pano nkuzinga Aina Amoli, Aina Kenani, Aina Hiti, Aina Pelizi, Aina Hivi na Ina Yebusi. 12 Mucenjele pakuti mutaca mupange upangano na ikazi ya mu mpanga ino mukuyako, pano limwi yangaca yaye iciteyo kuli mwemwe. 13 Lelo muce muwisye maulambo yao, muce mutamoole ivimawe vyao ivya kupepelapo, nu kukomoola ivipilala vyao ivya kupepelapo. 14 Mutalinzile ukufukamila leza muze, pano Yeova wamanyikwa ukuti wene a Leza aakalonda ukupepwa sile wenga. Mu cumi a Leza aakalonda ukupepwa sile wenga. 15 Mucenjele pakuti mutaca mupange upangano na ikazi ya mu mpanga iiyo, pano lino yacita uluyembu ukupitila umu kupepa ya leza yao nu kupeela malambo kuli ya leza yao, umwi alamwama nupya mulalya ilambo lyakwe. 16 Lyene mulaleka ana inu aonsi yatwale ana yao akazyana, nupya ana yao akazyana yalaapepa ya leza yao nu kulenga ana inu aonsi ukutandika ukupepa ya leza yao.

17 “Mutaapanga ya leza ya vyela vya kwengulula.

18 “Muce mwazevya Umutebeto wa Mukate Uwaula Icitutumusi. Mulaalya umukate uwaula icitutumusi, wakwe vino namunenyile; muce mwacita vivyo pa manda 7 pa nsita isoololwe umu mwezi wakwe Abibu,* pano umu mwezi kwene uwo alino mwafumile umu Ijipti.

19 “Umonsi wensi aalatandikilapo ukuvyalwa kumwi ni viteekwa vinu vyonsi ivyatandikilapo ukuvyalwa, aye a cipambasi nanti imfwele, i vyane. 20 Punda wensi uwatandikilapo ukuvyalwa mulinzile ukumupyanikizyapo ni mfwele. Ndi cakuti mutamupyanikizye ni mfwele, ale lyene mulinzile ukumuvuna insingo. Nupya ana inu aonsi mayeli mulinzile ukuyakulula. Kusi aalinzile ukulolekela kuli nene ni minwe itupu.

21 “Mulaaomba imilimo pa manda 6, lelo pa wanda uwalenga 7 mulaapuza.* Nanti sile umu nsita ya kulima ni ya kuzombola mulaapuza.

22 “Nupya muce mwazevya Umutebeto wa Milungu ukuomvya ingano zino mwatandikilapo ukuzombola, muce mwazevya nu Mutebeto wa Kukolonganika* ku mpela ya mwaka.

23 “Imiku itatu umu mwaka, aonsi inu yonsi yace yalolekela kuli Yeova Umwene wa cumi, Leza wakwe Izlaeli. 24 Pano ndazinga inko ukufuma kuli mwemwe, nupya ndamukuzizya impanga inu, kusi aalakumbwa impanga inu lino mulaaya umu kulolekela kuli Yeova Leza winu imiku itatu umu mwaka.

25 “Lino ukupeela ilambo lya wazi kuli nene, utaalipeelela pamwi nu mukate uli ni citutumusi. Ilambo lya mutebeto wa Ucilo litalinzile ukusungwa usiku onsi suka akatondo.

26 “Mwaleta ivyakulya ivisuma sana ivya mu vyalo vinu ivyatandikilapo ukuca uku ng’anda yakwe Yeova Leza winu.

“Utaeleka kana ka mbuzi umu mukaka wakwe nyina.”

27 Yeova watwalilile ukunena Mose ati: “Lemba mazwi yaa, pano nkupangana upangano naawe na Ina Izlaeli ukulingana na mazwi kwene yaa.” 28 Nupya wikazile na Yeova paapa kwene pa manda 40 umusanya nu usiku. Atalyanga nanti a cimwi nanti ukumwa manzi. Nupya walemvile mazwi ya upangano, kuli kuti Masunde 10, pa mawe apapatane.

29 Lyene Mose watentemwike ukufuma pa mwamba wa Sinai, nupya wasenzile na mawe yaili aa Upangano umu minwe. Lino Mose watentemwike pa mwamba, ataamanyile ukuti icinso cakwe cayengesanga pa mulandu wakuti wafumile umu kulanda na Leza. 30 Lino Aloni na Ina Izlaeli yonsi yaweni Mose, yaweni ukuti icinso cakwe cikuyengesa nupya yuvwile intete zya kupalama kuli aliwe.

31 Lelo Mose wayamile, lyene Aloni na akalamba yonsi aa Ina Izlaeli yaile kuli aliwe, nupya Mose walanzile nayo. 32 Pa cisila Aina Izlaeli yonsi yaile kuli aliwe, nupya wayanenyile masunde yonsi yano Yeova wamupeezile pa Mwamba wa Sinai. 33 Lyonsi lino Mose wamala ukulanda nayo, waivimbanga insalu pa manso. 34 Lelo lyonsi lino Mose wingila umwi tenti lya kupepelapo uku kulanda na Yeova, wafumyanga insalu pa manso ukufikila wafumamo. Lyene wayanga anena Aina Izlaeli vino Leza wamunena. 35 Nupya Aina Izlaeli yalolanga ukuti icinso cakwe Mose cayengesanga; lyene Mose waivimbanga insalu pa manso ukufikila waya umwi tenti lya kupepelapo uku kulanda na Leza.

35 Pa cisila Mose wakolonganike Aina Izlaeli yonsi capamwi nu kuyanena ati: “Vii avino Yeova watalanda ukuti i vilinzile ukucitwa: 2 Imilimo ilinzile ukuombwa umu manda 6, lelo uwanda uwalenga 7 ulaya uwanda wa muzilo kuli mwemwe, i sabata lya kupuuza kuli Yeova. Wensi aalaomba umulimo pa wanda uwo, alakomwa. 3 Mutalinzile ukupemba umoto umu mang’anda inu yonsi pa wanda wi Sabata.”

4 Lyene Mose wanenyile Aina Izlaeli yonsi aakolongine pamwi ati: “Vii avino Yeova watalanda, 5 ‘Peelini umusangulo kuli Yeova. Lekini wensi uwaitemelwa apeele umusangulo kuli Yeova, kuli kuti goldi, siuva, koopa, 6 kotoni yakwe bulu, kotoni iyenzulukile, kotoni iyenzu, kotoni itiswe, mavumbu ya mbuzi, 7 impapa zyakwe ya suuku zino yasangula ukuya iziyenzu, impapa izitontekane ni mbao zyakwe akasya, 8 mafuta amuli ya lampi, basamu iya kupangilako mafuta ya muzilo ni vinunkile, 9 mawe yakwe onikisi, alino na mawe yauze aakwika muli efodi nu ku cakuzwala ca pa cisao.

10 “Lekini yonsi aamanyikisya imilimo muli mwemwe yace yapange vyonsi vino Yeova watalanda, 11 kuli kuti itenti lya kupepelapo ni nsalu alino ni ca kuvimbapo, tumikowelo alino na mafulemu, tumiti ututali, incesi alino nu twakwimikapo mafulemu ni ncesi; 12 Imbokosi ya upangano nu tumiti ututali, intupiko na ketani uwa kucinga; 13 tebo nu tumiti ututali alino ni viya vyonsi ni mikate ya muzilo; 14 ica kuteekapo ya lampi aakuomvya uku luswepo ni viya vya kuomvya pa ca kuteekapo ya lampi alino na ya lampi na mafuta ya kwikamo; 15 ulambo wa kocelapo ivinunkile kumwi nu tumiti ututali; mafuta ya muzilo ni vinunkile; ketani wa pa mulyango wi tenti lya kupepelapo; 16 ulambo wa kocelapo malambo kumwi na waya wakwe koopa uwa kocelapo, utumiti ututali ni viya vyonsi ivya pa ulambo; beseni ni ca kuteekapo; 17 yace yapange maketani aakucingilizya umusolo, incesi ni vya kwimikapo; ketani wa pa mulyango wa kwingilila pa musolo; 18 Impopo zya kwi tenti lya kupepelapo ni mpopo zya mu misolo kumwi ni ntambo; 19 Ivyakuzwala ivipikulwe ningo ivya kuomvya umu ncende ya muzilo, ivyakuzwala vya muzilo vyakwe Aloni simapepo, ni vyakuzwala vya yana yakwe lino yakuomba usimapepo.’”

20 Lyene Aina Izlaeli yonsi yafumile pa nkoleelo yakwe Mose. 21 Yonsi yano yaali nu mwenzo wa kuitemelwa na yonsi yano umupasi wacincizye, iizile nu kupeela umusangulo kuli Yeova uwa kuomvya ukwi tenti lya kupepelapo nu ku mulimo onsi uwa pi tenti kwene lilyo nu kuuomvya uku kupangilako ivyakuzwala vya muzilo. 22 Aonsi yonsi na anaci aali nu mwenzo wa kuitemelwa, yaatwalilile ukwiza ala yali ni viyembelo vya ku vyakuzwala, maelena, imbalaminwe,* ni viyembelo vyuze, alino ni viya ivipusanepusane ivyapangilwa na goldi. Yonsi yapeezile ivya upe vyao vyakwe goldi kuli Yeova. 23 Nupya yonsi aakweti kotoni yakwe bulu, kotoni iyenzulukile, kotoni iyenzu, kotoni itiswe, mavumbu ya mbuzi, impapa zyakwe ya suuku zino yasangula ukuya iziyenzu alino ni mpapa izitontekane, yaavilesile. 24 Yonsi aitemiilwe ukusangwilako siuva na koopa yasangwilile kuli Yeova na yonsi aakweti imbao zyakwe akasya izya kuomvya ku mulimo uli onsi uwa pi tenti lya kupepelapo, yaazilesile.

25 Anaci aacenjele umu vya kupangapanga, yapanzile kotoni yakwe bulu, iyenzulukile, iyenzu ni itiswe nupya yasangwile kuli Leza. 26 Nupya anaci yonsi aamanya ivya kupangapanga aitemiilwe, yapanzile kotoni ukuomvya mavumbu ya mbuzi.

27 Nupya intunguluzi zyalesile mawe yakwe onikisi alino na mawe yauze aakwika kuli efodi nu ku cakuzwala ca pa cisao, 28 na basamu na mafuta aakuomvya muli ya lampi nu ku kupangilako mafuta ya muzilo alino nu kupangilako ivinunkile. 29 Aonsi yonsi na anaci aitemiilwe ukupeela, yasangwilileko ku mulimo uno Yeova walanzile ukuti uombwe ukupitila muli Mose; Aina Izlaeli yalesile upe wa kuitemelwa kuli Yeova.

30 Lyene Mose wanenyile Aina Izlaeli ati: “Lolini, Yeova watasoolola Bezalele mwana Uli nupya umwizikulu wakwe Huli uwa mu mutundu wakwe Yuda. 31 Leza watamupeela umupasi wakwe, amano nu kwiluka, nupya watalenga ukuti amanye ivya kupangapanga, 32 watamanya vino ivintu vilinzile ukupangwa ukuomvya goldi, siuva na koopa, 33 watalenga nu kuti amanye ivya kuputula mawe ni vya kuyatantika, nupya watamanya ivya kupanga ivintu ivipusanepusane ukuomvya imbao. 34 Nupya Leza watalenga Bezalele na Olyabu mwana Aisamaki uwa mu mutundu wakwe Dani ukumanya ivya kusambilizya yauze. 35 Watayapeela mano aakumanya ivya kupangapanga vyonsi, kuli kuti ivya kuyemvya, ivya kupikula ukuomvya kotoni yakwe bulu, kotoni iyenzulukile, kotoni iyenzu, kotoni itiswe nu kuomba imilimo yuze yonsi iya vya kupangapanga. Aonsi yaa yalaomba imilimo ipusanepusane nu kupanga ivintu ivipusanepusane.

36 Bezalele alaombela pamwi na Olyabu alino na onsi yonsi aamanyikisya imilimo yano Yeova watapeela mano nu kwiluka pakuti yamanye ivya kuomba imilimo yonsi iya pi tenti lya kupepelapo, wakwe vino Yeova watalanda.”

2 Lyene Mose wamile Bezalele na Olyabu na aonsi yonsi aamanyikisye imilimo yano Yeova wapeezile mano, kuli kuti aaipeelisye ukwazwilizyako umulimo. 3 Lyene yaposile imisangulo yonsi kuli Mose ino Aina Izlaeli yasangwilile uku mulimo wa pi tenti lya kupepelapo. Lelo Aina Izlaeli yatwalilile ukutwala ivya upe vya kuitemelwa kuli Mose cila wanda.

4 Lino mulimo wa pi tenti lya kupepelapo watandike, aomvi yonsi aamanyikisye imilimo yayanga wenga wenga kuli Mose 5 ala yakumunena ukuti: “Ivintu vino antu yakuleta ivivulisya kucila na pali vino vikulondekwa uku mulimo uno Yeova watalanda ukuti uombwe.” 6 Fwandi Mose walanzile ukuti yamanyisye antu umu nkambi yonsi amazwi akuti: “Tiini ukuleta ivya upe vya kuomvya pi tenti lya kupepelapo.” Lino antu yuvwile vivyo, yatiile ukutwala ivya upe. 7 Vintu vino yasangwilile, vyali nu kukumana uku milimo yonsi iyaali nu kuombwa nupya vimwi vyali nu kusyalapo.

8 Fwandi aomvi yonsi aamanyikisye imilimo yapanzile itenti lya kupepelapo ukuomvya insalu 10 izisuma, kotoni yakwe bulu, kotoni iyenzulukile, na kotoni iyenzu; Bezalele wayemvizye insalu zizyo ni vikope vyakwe ya kelubi. 9 Insalu yonga na yonga yali amamita 12* umu utali, umu wipi namo yaali amamita umupiipi na yaili. Nupya insalu zyonsi zyali izilingane. 10 Lyene wasuminkinye insalu 5 izipanga insalu yonga, insalu na zyuze 5 nazyo kwene wazisuminkinye izipanga insalu yonga. 11 Nupya wisile utumikowelo twakwe kotoni yakwe bulu uku mpela ya nsalu izisuminkanye. Nupya vikwene avino wacisile nu ku mpela ya nsalu zyuze. 12 Wisile utumikowelo 50 uku nsalu yonga alino nu tumikowelo na tuze 50 uku mbali ya nsalu yuze pakuti tulozyanye nu tuze. 13 Lyene wapanzile utuvyela 50 twakwe goldi nu kutuomvya uku kulundanyako insalu icakuti itenti lya kupepelapo lizile ilipangika iliya icintu conga.

14 Lyene wapanzile ni nsalu 11 ukuomvya mavumbu ya mbuzi izya kuvimba pi tenti lya kupepelapo. 15 Insalu yonga na yonga yaali mamita 13 umu utali alino umu wipi namo yaali mupiipi na mamita yaili. Insalu zyonsi 11 zyalingine. 16 Lyene walundinkinye insalu 5 izipanga insalu yonga, nupya walundinkinye insalu na zyuze 6 nazyo izipanga insalu yonga. 17 Nupya wapanzile utumikowelo 50 uku mbali ya nsalu nu tumikowelo tuze 50 uku mbali ya nsalu na yuze pano zyalundinkaniile. 18 Nupya wapanzile utumikowelo twakwe koopa 50 utwakulemanya itenti lya kupepelapo pakuti liye icintu conga.

19 Wapanzile insalu iya kuvimba pi tenti ukuomvya impapa zyakwe ya suuku zino yasangula ukuya iziyenzu nupya wapanzile insalu na yuze ukuomvya impapa izitontekane iya kuvimba pi tenti.

20 Nupya wapanzile mafulemu yi tenti lya kupepelapo aimiikwe, wayapanzile ukuomvya imbao zyakwe akasya. 21 Ifulemu lyonga na lyonga lyatalimfile mamita 4 ukuya umupela, mu wipi namo lyakweti masentimita umupiipi na 70. 22 Cila fulemu lyakweti utumaulu twili, vivyo kwene avino wapanzile mafulemu yonsi aapi tenti lya kupepelapo. 23 Wapanzile na mafulemu 20 aakwika uku kaeya ki tenti lya kupepelapo nupya yalozizye uku kaeya. 24 Wapanzile utwa kwingizyamo utumaulu twa mafulemu utuli 40 twakwe siuva, pa mafulemu 20, cila fulemu lyakweti paili apa kwingizya utumaulu. 25 Ku lusansa luze ulwi tenti lya kupepelapo kuli kuti uku katutu, nako wapanzile mafulemu 20 26 nu twakwingizyamo tumaulu twa mafulemu twakwe siuva utuli 40, cila fulemu lyakweti apa kwingizya tumaulu paili.

27 Ku nsizi yi tenti lya kupepelapo, kuli kuti uku uwondaka, wapanzile mafulemu 6. 28 Wapanzile mafulemu yaili uku makoona yaili ku nsizi yi tenti lya kupepelapo. 29 Mafulemu yayanga yaili aalundinkane ukufuma pansi ukufika pa tumipeto twa papela. Vikwene avino wacisile uku mafulemu ya ku makoona yoili. 30 Fwandi mafulemu yaali 8 nu twakwingizyamo mafulemu twakwe siuva twali 16, cila fulemu lyakweti utwakwingizyamo twili.

31 Lyene wapanzile utumiti ututali ukuomvya imbao zyakwe akasya, utuli 5 twali utwakwika uku mafulemu ya ku lusansa longa ulwi tenti lya kupepelapo 32 nupya utuli 5 twali nu kuya uku mafulemu ya ku lusansa luze ulwi tenti lya kupepelapo, tuze nato 5 twali nu kuya uku mafulemu ya kwi tenti lya kupepelapo uku uwondaka, kuli kuti uku nsizi. 33 Lyene wapanzile kamuti akatali akakupisya pakasi ka mafulemu ukufumilila uku mpela ukufika uku mpela yuze. 34 Wapasile goldi uku mafulemu nupya wapanzile utumipeto twakwe goldi umwakupisya utumiti ututali, wapasileko na goldi uku tumiti ututali.

35 Lyene wapanzile ketani ukuomvya kotoni yakwe bulu, kotoni iyenzulukile, kotoni iyenzu alino na kotoni itiswe. Nupya wayemvizye ketani wiyo ni vikope vyakwe ya kelubi. 36 Wapanzile incesi 4 ukwa kwika ketani nupya wazipasile na goldi, kumwi nu tumikowelo twakwe goldi, nupya wapanzile nu twakwimikapo incesi twakwe siuva utuli 4. 37 Nupya wapanzile ketani wa pa mulyango wi tenti lya kupepelapo ukuomvya kotoni yakwe bulu, kotoni iyenzulukile, kotoni iyenzu, alino na kotoni itiswe, 38 wapanzile ni ncesi 5 izya kwikako ketani nu tumikowelo. Kupela ya ncesi zizyo alino nu ku twakulemanya incesi, wapasileko goldi, lelo utwakwimikapo incesi utuli 5 twali utwakwe koopa.

37 Lyene Bezalele wapanzile Imbokosi ya Upangano ukuomvya imbao zyakwe akasya. Mu utali yaali masentimita mupiipi na 110* nu mu wipi masentimita umupiipi na 70 alino ukuya umupela namo masentimita umupiipi na 70. 2 Lyene umukasi nu kunzi, wapasile goldi umwengululwe ningo nupya wazingulwisye kamulaini kakwe goldi papela. 3 Pa cisila wapanzile utumipeto 4 twakwe goldi nu kutulematika papela ya makulu 4 aa Mbokosi, twili uku lusansa longa na twili uku lusansa luze. 4 Nupya wawazile utumiti ututali ukuomvya imbao zyakwe akasya nu kupakako goldi. 5 Lyene wingizye utumiti tuto umu tumipeto twa mu mbali ya Mbokosi ya Upangano pakuti twaomviwa ukusendelako Imbokosi iiyo.

6 Wapanzile intupiko ukuomvya goldi umwengululwe ningo. Mu utali yaali masentimita umupiipi na 110, mu wipi namo yaali masentimita umupiipi na 70. 7 Lyene wapanzile ya kelubi yaili yakwe goldi umwengululwe ningo, waomvizye inondo pa kuyapanga nupya waisile pa mpela zyoili izya ntupiko. 8 Wenga wamwisile uku mpela yonga, muze nawe uku mpela yuze. Wapanzile ya kelubi nu kuika uku mpela ziili izya ntupiko. 9 Ya kelubi yaili yavungulwile maapa umupela nu kuvimba intupiko. Yalozyanyizye ivinso, nupya ivinso vyakwe ya kelubi vyalozizye pa ntupiko.

10 Lyene wapanzile tebo ukuomvya imbao zyakwe akasya. Mu utali yaali masentimita umupiipi na 90, mu wipi namo yaali masentimita umupiipi na 45 alino ukuya umupela masentimita umupiipi na 70. 11 Nupya waipasile na goldi umwengululwe ningo, wazingulwisye na kamulaini kakwe goldi papela. 12 Lyene mu mbali yakwe tebo wazingulwisyemo ifulemu ilisaalale umupiipi na masentimita 7.4, wapisizye na kamulaini kakwe goldi ukuzingulusya ifulemu. 13 Lyene wapanzile utumipeto 4 twakwe goldi nu kutwika umu makoona 4 yakwe tebo, kuli kuti ukutulematika uku makulu 4 yakwe tebo. 14 Tumipeto tuto twapalime ukwi fulemu, amuno yapisyanga utumiti ututali pa kusenda tebo. 15 Lyene wawazile utumiti ututali ukuomvya imbao zyakwe akasya nupya wapasileko goldi, utumiti tuto twaomviwanga pa kusenda tebo. 16 Pa cisila wapanzile iviya ivya pali tebo, kuli kuti imbale, makapu, insembo, alino ni mbale izifunkane umwa kwitulwila upe wa vya kumwa, wavipanzile ukuomvya goldi umwengululwe ningo.

17 Lyene wapanzile ica kuteekapo lampi cakwe goldi umwengululwe ningo. Waomvizye inondo pa kucipanga. Cakweti iciikalilo, umulundi, tumikonti, tuulungwa na maluwa. 18 Mu mbali ya ca kuteekapo lampi, mwafumile utumisambo 6, ku mbali yonga kwafumile tutatu nu ku mbali yuze nako kwafumile tutatu. 19 Cila kamusambo kakweti utumikonti tutatu utwakoline na maluwa ya mu omondi, kumwi nu tuulungwa na maluwa. vikwene avino tumisambo 6 utwafumile ku mulundi wa ca kuteekapo lampi twali. 20 Mulundi wa ca kuteekapo ya lampi wakweti tumikonti 4 utwakoline na maluwa ya mu omondi, kumwi nu tuulungwa alino na maluwa. 21 Kaulungwa konga kayanga pisika lya cila misambo iili, vikwene avino cali ku misambo yonsi 6 iyafumile ku mulundi wa ca kuteekapo ya lampi. 22 Tuulungwa ni misambo ni ca kuteekapo ya lampi, vyali i vilemenkane nupya vyapanzilwe na goldi umwengululwe ningo, waomvizye inondo pa kuvipanga. 23 Lyene wapanzile ya lampi 7 ni vya kulemelako umoto vyakwe goldi umwengululwe ningo. 24 Wapanzile ica kuteekapo ya lampi ni viya vyonsi ivya kuomvya pa ca kuteekapo ya lampi, ukufuma kuli goldi umwengululwe ningo aangafina italanti lyonga.*

25 Nupya wapanzile ulambo wa kocelapo ivinunkile, waupanzile ukuomvya imbao zyakwe akasya. Wali ulingane umu utali nu mu wipi, mu utali wali masentimita 44.5, mu wipi namo kwene wali masentimita 44.5 nupya ukuya umupela wali umupiipi na masentimita 90. Wakweti nu twakoline ni mpembe. 26 Nupya papela ya ulambo nu mu mbali zyonsi ukuzinguluka alino nu ku mpembe, wapasileko goldi umwengululwe ningo nupya wazingulwisye kamulaini kakwe goldi papela. 27 Wapanzile utumipeto twili twakwe goldi pisika lya kamulaini kakwe goldi umu mbali zyoili, nupya u mwingilanga tumiti ututali utwa kuomvya pa kunyemula ulambo. 28 Pa cisila wawazile utumiti ututali twakwe akasya nu kupakako goldi. 29 Wapanzile na mafuta ya muzilo alino ni vinunkile ivisuma sana ivisaakanye ningo.

38 Wapanzile ulambo ukuomvya imbao zyakwe akasya, uwa kocelapo malambo. Wali ulingane umu utali nu mu wipi, mu utali wacizile panono mamita yaili,* mu wipi namo kwene wacizile panono mamita yaili, nupya ukuya umupela watalimfile ukucila panono pali mita wenga. 2 Lyene wapanzile ivyakoline ni mpembe pa makoona 4 aa ulambo. Impembe zizyo zyali uku ulambo kwene. Nupya wapasileko koopa uku ulambo. 3 Pa cisila wapanzile iviya vya pa ulambo vyonsi, kuli kuti mabaketi, mafosyolo, ya beseni, mafoloko, ni vya kulemelako umoto. Iviya vyonsi ivya pa ulambo, wavipanzile ukuomvya koopa. 4 Wapanzile na waya wakwe koopa uwa kocelapo, wisile waya wiyo lwa pakasi ka ulambo. 5 Wisile utumipeto 4 umu makoona 4 aa ulambo umupiipi na waya wakwe koopa umwakupisya tumiti ututali. 6 Pa cisila wawazile utumiti ututali utwa mbao zyakwe akasya nupya watupasileko na koopa. 7 Wingizye utumiti tuto umu tumipeto twa ku ulambo uku mbali zyoili pakuti twaomviwa pa kusenda ulambo. Wapanzile ulambo uwakoline ni cimbokosi ca mbao iciyulike papela na pansi.

8 Lyene wapanzile beseni wakwe koopa alino ni ca kuteekapo beseni cakwe koopa; wavipanzile ukuomvya ya miila yakwe koopa yano anaci aombelanga pa mulyango wi tenti lya kupepelapo yaomvyanga.

9 Lyene wapanzile umusolo. Wapanzile maketani asuma aakwika uku kaeya ka musolo, incende iiyo yaali mamita 44 na afu. 10 Umusolo wakweti incesi 20 nu twakwimikapo incesi twakwe koopa twali 20, nupya tumikowelo nu twakulemanya maketani uku ncesi twali utwakwe siuva. 11 Ku katutu nako kwene kwali maketani aatalimfile mamita 44 na afu. Incesi zya maketani 20 nu twakwimikapo incesi 20 vyali ivyakwe koopa. Nupya utumikowelo twa ku ncesi nu twakulemanya maketani uku ncesi twali utwakwe siuva. 12 Lelo uku uwondaka wa musolo kwali maketani aatalimfile mamita 22. Kwali incesi 10 nu twakwimikapo incesi nato twali 10, nupya utumikowelo twa ku ncesi nu twakulemanya maketani uku ncesi twali utwakwe siuva. 13 Umu wipi wa musolo, ukukafumilila ilanzi, kwali amamita 22. 14 Ku lusansa longa kwali maketani aatalimfile umupiipi na mamita 7, nupya kwali ni ncesi zitatu nu twakwimikapo incesi nato twali tutatu. 15 Nu ku lusansa luze ulwa mulyango wa musolo, kwali maketani aatalimfile umupiipi na mamita 7, nupya kwali ni ncesi zitatu nu twakwimikapo incesi nato twali tutatu. 16 Maketani yonsi aazingulwike umusolo, yaali aa nsalu isuma sana. 17 Utwakwimikapo incesi twali utwakwe koopa, tumikowelo twa ku ncesi nu twakulemanya maketani uku ncesi twali utwakwe siuva, papela ya ncesi papasilwe siuva, utwakunyepela maketani uku ncesi zyonsi izya mu musolo twali utwakwe siuva.

18 Ketani wa pa mulyango wa kwingilila umu musolo, wapanzilwe na kotoni yakwe bulu, kotoni iyenzulukile, kotoni iyenzu na kotoni itiswe. Ketani wiyo umu utali wakweti mamita umupiipi na 9, ukuya umupela namo wakweti mamita ukucila panono pali yaili, walingine na maketani aazingulwike umusolo. 19 Incesi 4 zyakwe ketani kwene wiyo alino nu twakwimikapo incesi 4 vyali ivyakwe koopa. Tumikowelo twali utwakwe siuva, nupya papela ya ncesi alino nu twakulemanya ketani uku ncesi twapasilweko siuva. 20 Impopo zyonsi izya pa cikuulwa ca muzilo ni zya pa musolo zyali izyakwe koopa.

21 Mose walanzile ukuti ivyaomviwe pa kupanga icikuulwa ca muzilo umwali Mbokosi ya Upangano vipendwe, Aina Levi aaomvile umulimo uwo, yatungululwanga na Itamali mwana Aloni simapepo. 22 Bezalele mwana Uli nupya umwizikulu wakwe Huli uwa mu mutundu wakwe Yuda wacisile vyonsi vino Yeova wanenyile Mose. 23 Wali na Oliyabu mwana Aisamaki uwa mu mutundu wakwe Dani, uwamanyikisye ivya kupangapanga, ivya kuyemvya, ni vya kupikula ukuomvya kotoni yakwe bulu, kotoni iyenzulukile, kotoni iyenzu na kotoni itiswe.

24 Goldi wensi uwaomviwe uku milimo yonsi iya pa ncende ya muzilo, wali a wiya kwene uwapeezilwe wa upe wa kuzulunzya, kuli kuti matalanti* 29 na masyekele* 730 ukulingana ni cipimo cakwe syekele icaomviwanga pa ncende ya muzilo. 25 Nupya siuva wino antu aalembesizye mazina yao yatwazile, wali matalanti 100 na masyekele yali 1,775 ukulingana ni cipimo cakwe syekele icaomviwanga pa ncende ya muzilo. 26 Umuntu wensi uwalembesizye izina, ukutandikila pa wa myaka 20 ukuya papela, watwazile afu wakwe syekele ukulingana ni cipimo cakwe syekele icaomviwanga pa ncende ya muzilo, nupya antu yayo yaali 603,550.

27 Utwakwimikapo mafulemu akwi tenti lya kupepelapo nu twakwimikapo incesi izya kukowekako ketani twalingine na matalanti 100; kuli kuti utwakwimikapo incesi na mafulemu utuli 100 twalingine na matalanti 100, italanti lyonga lyaomviwanga uku kupanga akakwimikapo ulucesi longa nanti akakwimikapo ifulemu lyonga. 28 Mu masyekele 1,775 wapanzilemo utumikowelo twa ku ncesi nupya uku ncesi ukupela wapasileko siuva nu kuzilemanya.

29 Koopa wino yapeezile* wali matalanti 70 na masyekele 2,400. 30 Vikwene avino waomvizye pa kupanga utwakwimikapo incesi pa mulyango wi tenti lya kupepelapo, na pa kupanga ulambo wakwe koopa na waya wakwe koopa uwa kocelapo, viya vyonsi ivya pa ulambo, 31 utwakwimikapo incesi ukuzinguluka umusolo, utwakwimikapo incesi zya pa mulyango wa kwingilila pa musolo, ni mpopo zyonsi izya pi tenti lya kupepelapo kumwi ni mpopo zyonsi izyazingulwike umusolo.

39 Yapikwile ivyakuzwala ivisuma ivya kuzwala pa kuomba umu ncende ya muzilo, ukuomvya kotoni yakwe bulu, kotoni iyenzulukile, na kotoni iyenzu. Yapanzile ni vyakuzwala vya muzilo vyakwe Aloni, wakwe viivi kwene vino Yeova wanenyile Mose.

2 Bezalele wapanzile efodi ukuomvya goldi, kotoni yakwe bulu, kotoni iyenzulukile, kotoni iyenzu alino na kotoni itiswe. 3 Yasuzile goldi ukuomvya inondo, aya u tumalata utupapatane, lyene Bezalele waputozile utumalata tuto ituya kwati a kotoni pakuti tuomviwe pamwi na kotoni yakwe bulu, kotoni iyenzulukile, kotoni iyenzu na kotoni itiswe, nupya efodi wayemviwe. 4 Yapanzile insalu izilemenkane, izyapisile pa viye nupya zyalundinkiine uku mpela zyoili zyakwe efodi. 5 Yapanzile nu musipi wa kunyepa muli efodi, yaupanzile ukuomvya goldi, kotoni yakwe bulu, kotoni iyenzulukile, kotoni iyenzu na kotoni itiswe, wakwe viivi kwene vino Yeova wanenyile Mose.

6 Lyene isile utumawe twakwe onikisi mu twakwikamo twakwe goldi, nupya pa tumawe tuto yalemvilepo mazina ya yana yakwe Izlaeli wakwe vino yangafwatikapo icimanyililo. 7 Wisile tumawe tuto pa viye vya cakuzwala cakwe efodi, twali utwakwiusizyako Aina Izlaeli wakwe vino Yeova wanenyile Mose. 8 Lyene wapanzile icakuzwala ca pa cisao icayemviwe wakwe efodi nupya capanzilwe ukuomvya goldi, kotoni yakwe bulu, kotoni iyenzulukile, kotoni iyenzu na kotoni itiswe. 9 Nga capetwa calingananga monsi monsi. Yapanzile icakuzwala ca pa cisao cino nga capetwa umu utali cali masentimita mupiipi na 22, mu wipi namo kwene cali mupiipi na masentimita 22.* 10 Iisile utumawe umu milaini 4. Mu mulaini wa kutandikilako mwali lubi, topazi, na emalodi. 11 Mu mulaini wakwe ciili mwali tokwasi, safilo, na jasipa. 12 Mu mulaini wakwe citatu mwali kaliwe kakwe lesyemu, agate, na ametusiti. 13 Mu mulaini wakwe 4 mwali kilisoliti, onikisi, na jadi. Tumawe tonsi yatwisile umu twakwikamo twakwe goldi. 14 Tumawe twalingine na mazina 12 aa yana yakwe Izlaeli, nupya cila kaliwe kalemvilwepo izina wakwe vino ungafwatikapo icimanyililo, izina lyonga na lyonga limililangako umutundu onga pa mitundu 12.

15 Lyene yapanzile utumaceni tupombane utwa pa cakuzwala ca pa cisao, utwakoline nu mwando wakwe goldi umwengululwe ningo. 16 Yapanzile utwakwingizyamo twakwe goldi twili nu tumipeto twili twakwe goldi nupya yatulemenkinye uku mpela ziili izya cakuzwala ca pa cisao. 17 Pa cisila iingizye utumyando twili twakwe goldi umu tumipeto twili utwali ku makoona ya cakuzwala ca pa cisao. 18 Lyene iingizye utumyando twili umu tupongo twili utwali pa cakwikapo utumawe, yatusomike pa viye vya cakuzwala cakwe efodi lwa pa nkoleelo. 19 Yapanzile nu tumipeto twili twakwe goldi nu kutwika uku mpela zyoili kwisika ya cakuzwala ca pa cisao lwa mukasi, icakonkiine na efodi. 20 Lyene yapanzile tumipeto na tuze twili twakwe goldi nu kutwika pa nkoleelo yakwe efodi lwa pisika umupiipi nu musipi wa nsalu. 21 Na pa kusyalikizya yanyepeliile icakuzwala ca pa cisao ukuomvya katambo kakwe bulu ukufuma uku tumipeto twa cakuzwala ca pa cisao ukuya uku tumipeto twakwe efodi, pakuti icakuzwala ca pa cisao ciikale pali efodi papela ya musipi wa nsalu, wakwe viivi kwene vino Yeova wanenyile Mose.

22 Lyene Bezalele wapanzile ikoti ilyaula makasa lyakwe efodi ukuomvya kotoni yakwe bulu itupu. 23 Ikoti lilyo lyakweti umwakwingizya insingo nupya mwakoline nu mwakwingizya insingo ukwi koti lya mpapa. Mu mbali mwapikwilwe ningo pakuti litalepuka. 24 Nupya uku mpela yi koti ilyaula makasa, yapanzile ivyakoline ni vizao vya mapomegilaneti ukuomvya kotoni yakwe bulu, kotoni iyenzulukile, na kotoni iyenzu. 25 Nupya yapanzile tumbelu ukuomvya goldi umwengululwe ningo nu kutwika pakasi ka mapomegilaneti ukuzingulusya uku mpela yi koti ilyaula makasa; 26 iikangako pomegilaneti alino iyakonkezyapo na kambelu ukuzingulusya ukwi koti ilyaula makasa ilyaomviwanga umu mulimo wa usimapepo, wakwe viivi kwene vino Yeova wanenyile Mose.

27 Nupya yasumiile Aloni na ana yakwe aonsi imingila* isuma, 28 yapanzile icitambala ica nsalu isuma cakwe simapepo mukalamba alino ni vitambala vya nsalu isuma vyakwe ya simapepo yauze, na yakaputula aa nsalu isuma, 29 Nupya yapanzile umusipi ukuomvya insalu isuma, kotoni yakwe bulu, kotoni iyenzulukile na kotoni iyenzu wakwe viivi kwene vino Yeova wanenyile Mose.

30 Nu mu kusyalikizya yapanzile iciyembelo cakwe goldi umwengululwe ningo, iciyengese, kuli kuti cimanyililo ca muzilo ica kuipeela, nupya yalemvilepo wakwe vino umwi angafwatika icimanyililo, yalemvile iyati: “Yeova ali mwineco wa muzilo.” 31 Yacinyepelile uku citambala ukuomvya katambo kakwe bulu, wakwe vino Yeova wanenyile Mose.

32 Fwandi imilimo yonsi iya pa cikuulwa ca muzilo, kuli kuti api tenti lya kupepelapo yasizile, nupya Aina Izlaeli yacisile vyonsi vino Yeova wanenyile Mose. Viivi kwene avino yacisile.

33 Lyene yatwazile iviya vyonsi ivya ku cikuulwa ca muzilo kuli Mose, kuli kuti insalu zya kuvimba pi tenti lya muzilo, tumikowelo, tumiti ututali, incesi nu twakwimikapo incesi na mafulemu; 34 ni nsalu izya kuvimba pi tenti izyapangiilwe ni mpapa zyakwe ya suuku zino yasangwile ukuya iziyenzu, insalu iya kuvimba pi tenti iyapangilwa ni mpapa izitontekane, ketani wa mukasi; 35 Mbokosi ya Upangano nu tumiti ututali utwakuisendelako ni ntupiko; 36 tebo ni viya vyonsi ivya pa tebo nu mukate wa muzilo; 37 ica kuteekapo ya lampi cakwe goldi umwengululwe ningo, na ya lampi aatantikwe ningo umu mulaini, ni viya vyonsi ivya kuomvya pa ca kuteekapo ya lampi na mafuta ya kuomvya muli ya lampi; 38 ulambo wakwe goldi, mafuta ya muzilo, ivinunkile, na ketani wa pa mulyango wi tenti lya kupepelapo; 39 ulambo wakwe koopa na waya wakwe koopa uwa pa ulambo, kumwi nu tumiti ututali ni viya vyonsi ivya pa ulambo, beseni kumwi ni ca kuteekapo; 40 maketani ya kuzingulusya umusolo, incesi kumwi nu twakwimikapo, ketani wa pa mulyango wa kwingilila umu musolo, intambo zya kwi tenti kumwi ni mpopo, ni viya vyonsi ivya kuomvya pa cikuulwa ca muzilo, kuli kuti api tenti lya kupepelapo; 41 vyakuzwala ivisuma ivya kuomvya pa ncende ya muzilo, ivyakuzwala vya muzilo vyakwe Aloni simapepo, ni vyakuzwala vya yana yakwe lino yakuomba umulimo wa usimapepo.

42 Aina Izlaeli yaomvile imilimo yonsi kulingana na vino Yeova wanenyile Mose. 43 Lino Mose waceecesile imilimo yonsi, waweni ukuti yaiomvile wakwe vino Yeova walanzile; nupya Mose wayapaazile.

40 Lyene Yeova wanenyile Mose ati: 2 “Pa wanda wa kutandikilapo umu mwezi wa kutandikilako, uce upange icikuulwa ca muzilo, kuli kuti itenti lya kupepelapo. 3 Uce uwikemo Imbokosi ya Upangano na ketani wa mukasi. 4 Uce uwingizyemo na tebo nu kwika ningo ivya kuomvya pa tebo, nupya uce uwingizye ni ca kuteekapo ya lampi nu kukozya ya lampi yayo. 5 Uce uwike ulambo wakwe goldi uwa kocelapo ivinunkile umupiipi ni Mbokosi ya Upangano, uce uwike na ketani pa mulyango wa cikuulwa ca muzilo.

6 “Uce uwike ulambo uwa kocelapo malambo apiipi nu mulyango wa cikuulwa ca muzilo, kuli kuti itenti lya kupepelapo. 7 Nupya uce uwike beseni pakasi ki tenti lya kupepelapo nu ulambo nu kwikamo manzi. 8 Lyene uce uwike maketani ukuzingulusya umusolo wa cikuulwa ca muzilo, uce uwike na ketani pa mulyango wa kwingilila umu musolo. 9 Lyene uce utole mafuta ya muzilo nu kupaka uku cikuulwa ca muzilo na kuli vyonsi ivilimo, nupya uce ucisangulule kumwi ni viya vyonsi ivilimo, pakuti vice viye ivya muzilo. 10 Uce upake ulambo uwa kocelapo malambo kumwi ni viya vyonsi ivya pa ulambo, nupya uce uusangulule pakuti uce uye uwa muzilo sana. 11 Nupya uce upake beseni kumwi ni ca kuteekapo nu kuvisangulula.

12 “Lyene uce upalamike Aloni na anakwe aonsi ku mulyango wi tenti lya kupepelapo, nupya uce uyafule na manzi. 13 Nupya uce uzwike Aloni ivyakuzwala vya muzilo nu kumwitila mafuta pa mutwe, nupya uce umusangulule pakuti ace ambombela umulimo wakwe usimapepo. 14 Pa cisila uce upalamike ana yakwe nu kuyazwika imingila. 15 Nupya uce uitile mafuta pa mitwe yao wakwe vino ulacita kuli Aloni isi wao, pakuti yace yambombela usimapepo, ukusontwa kwao kulapiliula ukuti yene pamwi na ana yao yalaambombela usimapepo umu nkulo zyao zyonsi.”

16 Mose wacisile vyonsi ukulingana na vino Yeova wamunenyile. Viivi kwene avino wacisile.

17 Icikuulwa ca muzilo capanzilwe pa wanda wa kutandikilako umu mwezi wa kutandikilako umu mwaka wakwe ciili. 18 Pa kupanga icikuulwa ca muzilo, Mose wisile utwakwimikapo mafulemu pansi, wimiikepo na mafulemu, wingiizyemo nu tumiti ututali nupya wimiike ni ncesi. 19 Wakonzolwile insalu nu kuvimba pa cikuulwa ca muzilo, wakwe vino Yeova wamunenyile.

20 Pa cisila watozile mawe apapatane nu kuika umu Mbokosi ya Upangano, nupya wisileko nu tumiti ututali uku Mbokosi ya Upangano alino ni ntupiko. 21 Wisile Imbokosi iiyo umu cikuulwa ca muzilo nupya wacinzileko na ketani pakuti Imbokosi ya Upangano itaaloleka, wakwe vino Yeova wamunenyile.

22 Lyene wisile tebo umwi tenti lya kupepelapo ku katutu ka cikuulwa ca muzilo umu muputule wa muzilo,* 23 watantike ni mikate pali tebo iya kulangizya kuli Yeova, wakwe vino Yeova wamunenyile.

24 Wisile ni ca kuteekapo ya lampi umwi tenti lya kupepelapo pa nkoleelo yakwe tebo uku kaeya ka cikuulwa ca muzilo. 25 Wakoziizye na ya lampi pa nkoleelo yakwe Yeova, wakwe vino Yeova wamunenyile.

26 Lyene wisile nu ulambo wakwe goldi umwi tenti lya kupepelapo umu muputule wa muzilo apiipi na ketani, 27 apa kocela ivinunkile, wakwe vino Yeova wamunenyile.

28 Lyene wacinzile ketani pa mulyango wa cikuulwa ca muzilo.

29 Mose wisile nu ulambo wa kocelapo malambo pa mulyango wa cikuulwa ca muzilo, kuli kuti api tenti lya kupepelapo, pakuti angaapeelelapo malambo ya koca nu upe wa vyakulya, wakwe vino Yeova wamunenyile.

30 Lyene wisile beseni pakasi ki tenti lya kupepelapo nu ulambo, wisilemo na manzi akufulala. 31 Mose na Aloni kumwi na ya mwana Aloni aonsi yafulilemo uku makasa nu ku ngazo. 32 Lyonsi lino Aloni na ana yakwe ingila umwi tenti lya kupepelapo nanti lino yapalama uku ulambo, yafulalanga wakwe vino Yeova wanenyile Mose.

33 Na pa kusyalikizya Mose wacinzile maketani kuzingulusya icikuulwa ca muzilo nu ulambo nupya wacinzile na ketani pa mulyango wa kwingilila umu musolo.

Fwandi Mose wamazile imilimo yonsi. 34 Nupya ikumbi lyatandike ukuvimba itenti lya kupepelapo, nu lulumbi lwakwe Yeova lwazuzile umu cikuulwa ca muzilo. 35 Mose wafizilwe ukwingila umwi tenti lya kupepelapo pa mulandu wakuti ikumbi lyatwalilile ukuya pa ncende iiyo, nupya ululumbi lwakwe Yeova lwazuzile umu cikuulwa ca muzilo.

36 Nupya lyonsi lino ikumbi lyafuma pa cikuulwa ca muzilo, Aina Izlaeli yapangululanga inkambi nu kutwalilila nu ulendo wao. 37 Lelo ndi cakuti ikumbi litafumilepo, yatakusizyanga inkambi kuze ukufikila uwanda uno lyafumapo. 38 Pano mu lwendo lwao lonsi, Aina Izlaeli yonsi yalolanga ikumbi lyakwe Yeova pa cikuulwa ca muzilo umusanya, nupya usiku yalolangapo umoto.