AINA LEVI

1 Nupya Yeova wamile Mose nu kulanda nawe pi tenti lya kupepelapo, ati: 2 “Nena Aina Izlaeli uti, ‘Ndi cakuti ali wensi muli mwemwe akulonda ukupeela ilambo kuli Yeova ukufuma pa viteekwa, alinzile ukupeela ing’ombe, imfwele nanti imbuzi.

3 “‘Ndi cakuti ilambo lino akupeela i ng’ombe, alinzile ukupeela cipambasi umusuma. Alinzile ukupeela kuli Yeova umukuitemelwa pa mulyango wi tenti lya kupepelapo. 4 Alika makasa yakwe pa mutwe wi lambo lilyo ilya koca, nupya Leza alazumilizya pakuti umuntu wiyo aelelwe imembu zyakwe.

5 “‘Lyene cipambasi alakomwa pa nkoleelo yakwe Yeova, nupya ya simapepo ya mwana Aloni yalatola uwazi nu kusansa umu mbali zyonsi izya ulambo uwayela pa mulyango wi tenti lya kupepelapo. 6 Inyama zino mukupeela wa malambo ya koca mulinzile ukuzifuwa impapa nu kuziputola umu vimpilinsya. 7 Ya simapepo ya mwana Aloni, yalaapemba umoto pa ulambo nu kwikapo inkwi. 8 Ya simapepo ya mwana Aloni yalaatola ivimpilinsya vi lambo kumwi nu mutwe na mafuta ya ku mfyo nu kuvika pa nkwi izili pa moto wa pa ulambo. 9 Mala kumwi ni vimbombo vice vyafulwa umu manzi, nupya simapepo alaavyoca vyonsi pa ulambo ukuya ilambo lya koca, lilaya i lambo lya koca ilinunkile kuli Yeova.

10 “‘Ndi cakuti umwi akulonda ukupeela suuku nanti sawe ukuya ilambo lya koca, ale suuku wiyo nanti sawe alinzile ukuya umusuma. 11 Inyama iiyo ilinzile ukukomelwa uku katutu ka ulambo pa nkoleelo yakwe Yeova, nupya ya simapepo ya mwana Aloni yalasansa uwazi wa nyama iiyo uku mbali zyonsi izya ulambo. 12 Ice iputolwe umu vimpilinsya nupya simapepo ace atole umutwe na mafuta ya ku mfyo nu kuvika vyonsi pa nkwi izili pa moto wa pa ulambo. 13 Mala kumwi ni vimbombo vice vyafulwa umu manzi, nupya simapepo ace avyoce vyonsi pa ulambo. Lilaya i lambo lya koca ilinunkile kuli Yeova.

14 “‘Lelo ndi cakuti akulonda ukupeela ivyunyi ukuya ilambo lya koca kuli Yeova, ace apeele inkunda nanti ivipeele. 15 Simapepo alatwala icunyi cico pa ulambo nu kuciputula umutwe nu kucocela pa ulambo kwene, lelo uwazi ulinzile ukuzwila uku mbali ya ulambo. 16 Alinzile ukufumya icizaizyo na mavumbu nu kuvisumbila uku mbali ya ulambo, ku ufumondaka ukulaaya itwi.* 17 Alacilepula pakasi ka maapa lelo kusi kucankanya paili. Alacoca pa nkwi izili pa moto uli pa ulambo. Lilaya i lambo lya koca ilinunkile kuli Yeova.

2 “‘Lyene ndi cakuti umwi akulonda ukupeela upe wa ngano kuli Yeova, afwile ukupeela fulaulo umusuma, nupya alinzile ukwitilapo mafuta pali fulaulo wiyo alino nu kwikapo ubani. 2 Lyene ace atwale kuli ya simapepo ya mwana Aloni, nupya simapepo ace atapule fulaulo wiyo ukuzuuzya ikufi lyakwe umusaakanye na mafuta nu ubani, nupya alavyoca pa ulambo pakuti Leza apokelele upe uwo onsi, ulaya upe wa koca uununkile kuli Yeova. 3 Vyonsi ivyasyalako pa upe wa ngano, vilaya ivyakwe Aloni na ana yakwe nupya vilaya ivya muzilo sana ukufuma pa upe wakwe Yeova uwa koca.

4 “‘Ndi cakuti ukupeela upe wa ngano uno iyapangila umu citofu, ulinzile ukuya uwakwe fulaulo umusuma, imikate iulungane iyaula icitutumusi iikweti icipongo iisaakanye na mafuta nanti mikate ipapatane iyaula icitutumusi iisanswepo na mafuta.

5 “‘Ndi cakuti ukupeela upe wa ngano uukupangilwa pali pani, ufwile ukuya usuma, kuli kuti fulaulo uwaula icitutumusi umusaakanyemo na mafuta. 6 Ufwile ukumokoolwa nupya mulinzile ukwitilapo mafuta. Ulaya uupe wa ngano.

7 “‘Ndi cakuti ukupeela upe wa ngano uukupangilwa umu mpoto, ulinzile ukupangwa ukuomvya fulaulo umusuma umuminkanye na mafuta. 8 Ulinzile ukutwala upe wa ngano kuli Yeova uwapangilwa ni vintu kwene vii, nupya ulapeelwa kuli simapepo aalaupalamika uku ulambo. 9 Nupya simapepo alatolapo ingano zimwi pa upe uwo pakuti Leza aupokelele onsi, alavyoca pa ulambo pakuti uye upe wa koca uununkile kuli Yeova. 10 Vyonsi ivyasyalako pa upe wa ngano vilaya ivyakwe Aloni na ana yakwe nupya vilaya ivya muzilo sana ukufuma pa upe wakwe Yeova uwa koca.

11 “‘Upe wa ngano onsi uno ukupeela kuli Yeova utalinzile ukukwata icitutumusi, pano mutalinzile ukupeela icitutumusi icili consi nanti uci ukuya upe wa koca kuli Yeova.

12 “‘Mungapeela ivintu vivyo kuli Yeova pakuti viye ivyakulya vya nkoleelo, lelo mutalinzile ukuvitwala pa ulambo pakuti viye ivyakulya ivinunkile.

13 “‘Mulinzile ukwika umusilya umu vyakulya vyonsi vino mukupeela; nupya mulinzile ukusininkizya ukuti mu vyakulya vivyo muli umusilya uukamwiusya upangano wakwe Leza winu. Nu mu malambo inu yonsi yano mukupeela, muce mwaikamo umusilya.

14 “‘Nga mukupeela ingano ukuya ali upe wa vyakulya ivyatandikilapo ukuca kuli Yeova, mulinzile ukupeela imitwe ya ngano iisalulwe ino itatala yuma, iisokolwe panono pakuti uye upe wa ngano uwa vyakulya ivyatandikilapo ukuca. 15 Mulinzile ukwikako mafuta nu ubani. Ulaya uupe wa ngano. 16 Lyene simapepo alatolapo vimwi, kuli kuti ingano izyatizyuminkana na mafuta nu ubani, nu kuvyoca pa moto pakuti Leza apokelele upe uwo onsi, ulaya uupe wa koca kuli Yeova.

3 “‘Ndi cakuti umuntu akupeela ilambo lya mutende ukufuma pa ng’ombe, iye iya kalume nanti iya kaci, alinzile ukupeela isuma kuli Yeova. 2 Aliika ikasa pa mutwe wa ng’ombe iiyo, nupya ilakomelwa pa mulyango wi tenti lya kupepelapo; na ya simapepo ya mwana Aloni yalasansa uwazi uku mbali zyonsi izya ulambo. 3 Alatolapo vimwi api lambo lya mutende nu kuvyoca kuli Yeova, kuli kuti mafuta aavimba mala na mafuta yonsi aazinguluka mala, 4 alino ni mfyo ziili kumwi na mafuta aku mfyo kwene zizyo. Nupya alafumya mafuta ya kwi tima kumwi ni mfyo. 5 Ya mwana Aloni yalavyocela pa ulambo papela yi lambo lya koca ilili apa nkwi izili pa moto; lilaya ilambo lya koca ilinunkile kuli Yeova.

6 “‘Ndi cakuti umuntu akupeela ilambo lya mutende kuli Yeova, kuli kuti imfwele nanti imbuzi, alinzile ukupeela iya kalume nanti iya kaci isuma. 7 Ndi cakuti ilambo lino akupeela a suuku, ale lyene afwile ukumupeela pa nkoleelo yakwe Yeova. 8 Aliika ikasa pa mutwe wa nyama iiyo, nupya ilakomelwa pa nkoleelo yi tenti lya kupepelapo. Na ya simapepo ya mwana Aloni yalasansa uwazi ku mbali zyonsi izya ulambo. 9 Nupya mafuta ya kwi lambo lya mutende alayapeela ukuya ilambo lya koca kuli Yeova. Alafumya mafuta yonsi aku musinda mupiipi nu mongololo, mafuta aavimba mala na mafuta yonsi aazinguluka mala, 10 alino ni mfyo ziili kumwi na mafuta aku mfyo kwene zizyo. Nupya alafumya mafuta ya kwi tima kumwi ni mfyo. 11 Nupya simapepo alavyoca pa ulambo ukuya ivyakulya, lilaya ilambo lya koca kuli Yeova.

12 “‘Ndi cakuti ilambo lino akupeela i mbuzi lyene ale alaipeela pa nkoleelo yakwe Yeova. 13 Aliika ikasa pa mutwe wa nyama iiyo, nupya ilakomelwa pa nkoleelo yi tenti lya kupepelapo, na ya mwana Aloni aonsi yalasansa uwazi uku mbali zyonsi izya ulambo. 14 Vino alapeela ukuya ilambo lya koca kuli Yeova aevi: Amafuta aavimba mala, amafuta yonsi aazinguluka mala, 15 alino ni mfyo ziili kumwi na mafuta aku mfyo kwene zizyo. Nupya alafumya mafuta ya kwi tima kumwi ni mfyo. 16 Nupya simapepo alavyoca pa ulambo ukuya ivyakulya, lilaya ilambo lya koca ilinunkile. Mafuta yonsi akwe Yeova.

17 “‘Isunde ilya manda pe umu nkulo zinu zyonsi umu ncende zyonsi zino mulaikalamo i lyakuti: Mutalinzile ukulya mafuta ali yonsi nanti uwazi uli onsi.’”

4 Yeova watwalilile ukunena Mose ati: 2 “Nena Aina Izlaeli uti, ‘Ndi cakuti umwi wacita uluyembu umu kukanamanya ukupitila umu kucita ivintu vino Yeova wakaanya, vino cifwile ukuya aevi:

3 “‘Ndi cakuti simapepo mukalamba* wayembuka nu kuletelela antu, alinzile ukupeela cipambasi umusuma kuli Yeova ukuya ilambo lya pa luyembu luno watacita. 4 Ace atwale cipambasi wiyo pa mulyango wi tenti lya kupepelapo pa nkoleelo yakwe Yeova nu kwika ikasa pa mutwe wakwe cipambasi, nupya ace amukomele pa nkoleelo yakwe Yeova. 5 Lyene simapepo wiyo alatolako uwazi umwi kuli cipambasi nu kuwingizya umwi tenti lya kupepelapo; 6 nupya simapepo alatimpika umunwe umu wazi nu kusansa uwazi umwi pa nkoleelo yakwe Yeova imiku 7 apiipi na ketani umu muputule wa muzilo. 7 Nupya simapepo aliika uwazi umwi uku mpembe zya ulambo wa kocelapo ivinunkile, uuli pa nkoleelo yakwe Yeova umwi tenti lya kupepelapo; nupya uwazi onsi wakwe cipambasi uwasyala alawitila umwisika lya ulambo wa kocelapo malambo uuli pa mulyango wi tenti lya kupepelapo.

8 “‘Lyene simapepo alafumya mafuta yonsi muli cipambasi uwi lambo lya pa luyembu, kumwi na mafuta aavimba mala alino na mafuta aazinguluka mala, 9 ni mfyo ziili kumwi na mafuta aku mfyo kwene zizyo. Nupya mafuta ya kwi tima alayafumizya pamwi ni mfyo. 10 Alacita wakwe viivi kwene vino cifwile ukuya kuli cipambasi uwa pi lambo lya mutende. Nupya alavyocela pa ulambo wa kocelapo malambo.

11 “‘Lelo impapa yakwe cipambasi wiyo kumwi nu munyefu onsi, umutwe, ivimbombo, amala na citindi, 12 kuli kuti cipambasi sile wensi, simapepo alamutwala ukunzi ya nkambi uku ncende iya usaka kuno yakasumbila itwi,* nupya alamocela pa moto wa nkwi. Alinzile ukocelwa uku ncende ino yakasumbilako itwi.

13 “‘Ndi cakuti Aina Izlaeli yonsi yaya nu mulandu pa mulandu wa kucita uluyembu ukwaula ukumanya, lelo yonsi yatamanyile ukuti iyacita cino Yeova wakaanya, 14 lyene uluyembu lulo lwiza lwamanyikwa, yalinzile ukupeela cipambasi uwa kulipila pa luyembu lulo nupya yalinzile ukumutwala pa nkoleelo yi tenti lya kupepelapo. 15 Akalamba yaliika makasa yao pa mutwe wakwe cipambasi pa nkoleelo yakwe Yeova, nupya cipambasi wiyo alakomelwa pa nkoleelo yakwe Yeova.

16 “‘Lyene simapepo mukalamba alatwala uwazi umwi wakwe cipambasi wiyo umwi tenti lya kupepelapo. 17 Nupya simapepo alatimpika umunwe umu wazi nu kusansa uwazi umwi pa nkoleelo yakwe Yeova imiku 7 apiipi na ketani umu muputule wa muzilo. 18 Nupya simapepo aliika uwazi umwi uku mpembe zya ulambo uuli pa nkoleelo yakwe Yeova umwi tenti lya kupepelapo; nupya uwazi onsi wakwe cipambasi uwasyala alawitila umwisika lya ulambo wa kocelapo malambo, uuli pa mulyango wi tenti lya kupepelapo. 19 Alafumya mafuta yonsi kuli cipambasi wiyo nu kuyoca pa ulambo. 20 Alacita ukulingana na vino wacisile kuli cipambasi uwa pi lambo lya pa luyembu. Vivyo kwene avino alacita, nupya simapepo alayafuutila uluyembu lulo, nayo yalelelwa. 21 Alatwala cipambasi wiyo ukunzi ya nkambi nu kuyamoca, wakwe vino osile cipambasi wa kutandikilapo. Lilaya ilambo lya pa luyembu uku Ina Izlaeli yonsi.

22 “‘Ndi cakuti intunguluzi imwi yayembuka ukwaula ukumanya pa mulandu wa kucita icintu cimwi cino Yeova wakaanya nupya yazanikwa nu mulandu, 23 nanti ndi cakuti intunguluzi iiyo yamanya umulandu uno yacisile, lyene ilinzile ukupeela sawe umusuma ukuya ilambo. 24 Iliika ikasa pa mutwe wa mbuzi iiyo nu kuikomela pa ncende ino malambo yakakomelwapo pa nkoleelo yakwe Yeova. Lilaya ilambo lya pa luyembu. 25 Simapepo alatola uwazi umwi uwa pi lambo lya pa luyembu uku munwe nu kuwika uku mpembe zya ulambo uwa kocelapo malambo, nupya uwazi onsi uwasyala alawitila umwisika lya ulambo. 26 Aloca mafuta yonsi pa ulambo wakwe vino cifwile ukuya uku mafuta ya kwi lambo lya mutende; nupya simapepo alamufuutila uluyembu lwakwe, nawe alelelwa.

27 “‘Ndi cakuti Umwina Izlaeli ali wensi wacita uluyembu umu kukanamanya nupya wapeelwa umulandu wa kucita vino Yeova wakaanya, 28 nanti ndi cakuti wamanya uluyembu luno watacita, lyene alinzile ukupeela imbuzi iya kaci pakuti alipile pa luyembu lulo. 29 Aliika ikasa pa mutwe wa mbuzi iiyo nu kuikomela pano malambo ya koca yakakomelwa. 30 Simapepo alatola uwazi umwi wa pi lambo lya pa luyembu uku munwe nu kuwika uku mpembe zya ulambo uwa kocelapo malambo, nupya uwazi onsi uwasyala alawitila umwisika lya ulambo. 31 Alafumyamo mafuta yonsi wakwe vino afwile ukufumya mafuta umwi lambo lya mutende, nupya simapepo aloca mafuta yayo pa ulambo pakuti yanunkile kuli Yeova; nupya alafuutila umuntu wiyo uluyembu, nawe alelelwa.

32 “‘Lelo ndi cakuti akupeela imfwele pa luyembu luno watacita, ale afwile ukupeela imfwele iya kaci isuma. 33 Aliika ikasa pa mutwe wa mfwele iiyo nupya ilakomelwa pano malambo ya koca yakakomelwa. 34 Simapepo alatola uwazi umwi uwa pi lambo lya pa luyembu uku munwe nu kuwika ku mpembe zya ulambo uwa kocelapo malambo, nupya uwazi onsi uwasyala alawitila umwisika lya ulambo. 35 Alafumyamo mafuta yonsi umu mfwele iiyo wakwe vino cifwile ukuya uku mafuta ya ku mfwele yi lambo lya mutende, nupya simapepo aloca mafuta yayo pa ulambo papela ya malambo yakwe Yeova aakoca; alafuutila umuntu wiyo uluyembu, nupya alelelwa.

5 “‘Ndi cakuti umwi walola umuze akuyembuka nanti wamanya pa luyembu lulo nupya uvwa ukuti yakulonda ya kambone aakupeela usininkizyo pa luyembu lulo, lelo wakana ukulanda, ale nawe kwene wayembuka, nupya alafululwa pa luyembu lulo.

2 “‘Nanti ndi cakuti umuntu wakumya icintu icili consi icikowele, ciye i citumbi ca nyama iya mu mpanga iikowele, icitumbi ca citeekwa icikowele, nanti citumbi ca twa umi utunono utukapita umu maumba utukowele, ala wakowela nupya ala ali nu mulandu nanti icakuti atamanyile kuti watacita vivyo. 3 Nanti ndi cakuti umwi umu kukanamanya wakumya icintu cimwi icikowele icikumile umuntu, kuli kuti icili consi icikowele icingalenga umuntu wiyo ukuya umukowele, nupya wiza wamanya vivyo pa cisila, lyene ala ali nu mulandu.

4 “‘Nanti ndi cakuti umwi walapa zuwa umulapo uwa kucita icintu icili consi umu kukanamanya, ciye icisuma nanti iciipe, nupya pa cisila wamanya ukuti walafile zuwa, ala waya nu mulandu.*

5 “‘Ndi cakuti umwi ali nu mulandu umwi pa milandu yii yonsi, alinzile ukuilandila vino wayembwike. 6 Alapeela ni lambo lya pa mulandu kuli Yeova pa luyembu luno wacisile, kuli kuti imfwele iya kaci nanti imbuzi iya kaci. Lyene simapepo alafuuta uluyembu lwa muntu wiyo pakuti Leza amwelele.

7 “‘Lelo ndi cakuti atanga akwanisye ukupeela imfwele, alinzile ukupeela inkunda ziili nanti ivipeele viili kuli Yeova ukuya ilambo lya pa mulandu pa luyembu lwakwe, conga cilaya i lambo lya pa mulandu cuze naco cilaya i lambo lya koca. 8 Ace avitwale kuli simapepo, nawe alatola conga ici lambo lya pa luyembu nupya alacicemba pa nsingo, ukwaula ukuciputula umutwe. 9 Alasansa uwazi umwi uwi lambo lya pa luyembu umu mbali zya ulambo, lelo uwasyala alawitila umwisika lya ulambo. Lilaya i lambo lya pa luyembu. 10 Alacita icili cimwi nu kwi lambo lya koca ukulingana ni vikacitwa lyonsi; nupya simapepo alafuuta uluyembu luno umuntu wiyo wacisile, na Leza alamwelela.

11 “‘Nomba ndi cakuti atanga akwanisye ukupeela inkunda ziili nanti ivipeele viili, alinzile ukupeela umupiipi na kilogilamu wenga wakwe fulaulo umusuma ukuya upe wa pa luyembu. Atalinzile ukwikamo mafuta nanti ubani, pano uupe wa pa luyembu. 12 Alatwala kuli simapepo, nawe simapepo alatapulapo ikufi lyonga ukwimililako upe uwo onsi nupya aloca fulaulo wiyo pa ulambo papela ya malambo yakwe Yeova aakoca. Ulaya uupe wa pa luyembu. 13 Simapepo alafuuta uluyembu lwa muntu wiyo ululi lonsi pa membu zizyo, nupya Leza alamwelela. Ivilasyala pa vya upe vilaya ivyakwe simapepo, wakwe vino cilaya nu ku upe wa ngano.’”

14 Yeova watwalilile ukunena Mose ati: 15 “Ndi cakuti umwi umu kukanamanya watama isunde ilikalanda pa vya muzilo vyakwe Yeova, ace atwale kuli Yeova suuku musuma kufuma pa viteekwa vyakwe ukuya ilambo lya pa mulandu; umutengo wakwe suuku wiyo ulalingana ni mpiya zya masyekele yakwe siuva ukulingana ni cipimo cakwe syekele icikaomviwa pa ncende ya muzilo. 16 Nupya alalipila pa luyembu luno wacisile ulwa kuyembukila ivya muzilo, alalundapo ni cipendo icalenga 5 ica mpiya* kwene zizyo zino watalipila. Alapeela simapepo malipilo yayo pakuti amufuutile uluyembu ukuomvya suuku uwa pi lambo lya mulandu, nupya alelelwa.

17 “Ndi cakuti umwi wayembuka ukupitila umu kucita vimwi vino Yeova walesya, nanti cakuti atamanyile, ale ali nu mulandu nupya alafululwa pa luyembu lulo. 18 Afwile ukutwala suuku umusuma kuli simapepo ukulingana nu mutengo wi lambo lya pa mulandu. Lyene simapepo alamufuutila uluyembu luno wacisile umu kukanamanya, nupya alelelwa. 19 Lilaya ilambo lya pa mulandu. Pano ala ali nu mulandu wa kuyembukila Yeova.”

6 Yeova watwalilile ukunena Mose ati: 2 “Ndi cakuti umwi wacita uluyembu nu kukanaya uwa cisinka kuli Yeova ukupitila umu kubepa umuze pali cimwi cino wamuseekizye, nanti pali cimwi cino wamupeezile ukuti amusungileko nanti nga wamupoka icintu cimwi nanti ukumwiyila, 3 nanti nga wazana cimwi icaponzile nu kusenda alino nu kubepa, nupya walapa ivya ufi pa luyembu lulo, vino alinzile ukucita aevi: 4 Ndi cakuti wayembwike nupya wazanwa nu mulandu, alinzile ukuswilizya cino wivile, cino waposile uku maka, cino wasenzile umu ucenjezi, cino yamuseekizye, nanti cintu icaponzile cino wazanyile nu kusenda, 5 nanti icili consi cino walapiilepo umulapo wa ufi. Alinzile ukulipila malipilo aakumanile pa cintu cico, alinzile nu kulundapo mapesenti 20 pa malipilo yayo. Nupya alinzile ukupeela umwineco icintu cico pa wanda uno umulandu wakwe ulasininkiziwa. 6 Nupya alatwala suuku musuma kuli simapepo uwa kupeela kuli Yeova wi lambo lya pa mulandu kulingana nu mutengo wi lambo lya pa mulandu. 7 Simapepo alafuutila umuntu wiyo umulandu pa nkoleelo yakwe Yeova, nupya alelelwa pa mulandu uli onsi uno wacita.”

8 Yeova watwalilile ukunena Mose ati: 9 “Nena Aloni na ana yakwe uti, ‘Isunde lya kulondela pi lambo lya koca aeli: Ilambo lya koca lilinzile ukuya pa moto wa pa ulambo usiku onsi ukufika katondo, nupya umoto ulinzile ukutwalilila ukwaka pa ulambo. 10 Simapepo ace azwale icakuzwala cakwe ica usimapepo na kaputula. Lyene alafumya itwi* ili lambo lya koca ilyatilipya pa ulambo nu kuliika uku mbali ya ulambo. 11 Lyene ace azule ivyakuzwala vyakwe nu kuzwala ivyakuzwala vyuze, nupya ace asende itwi lilyo uku ncende ya usaka ukunzi ya nkambi. 12 Moto uce waaka lyonsi pa ulambo utaca wazima. Simapepo ace aaikapo inkwi cila katondo nu kwikapo malambo ya koca, nupya ace aocelapo mafuta ya malambo ya mutende. 13 Moto uce waaka lyonsi pa ulambo. Utaca wazima.

14 “‘Lyene vino mulinzile ukulondela pa kupeela upe wa ngano aevi: Mwe ya mwana Aloni muce mwapeela upe uwo kuli Yeova pa nkoleelo ya ulambo. 15 Wenga muli mwemwe ace aatapula fulaulo umusuma uwa upe wa ngano ukuzuuzya ikufi alino na mafuta kumwi nu ubani onsi ivili pa upe wa ngano, ace avyoce pa ulambo ukwimililako upe uwo onsi, pakuti vikaye upe uununkile kuli Yeova. 16 Aloni na ana yakwe yalalya ivyasyala. Yalapanga umukate uwaula icitutumusi ukuomvya fulaulo wiyo nu kuuliila umu ncende ya muzilo, kuli kuti umu musolo wi tenti lya kupepelapo. 17 Umukate uwo utalinzile ukwikwamo icitutumusi icili consi. Injapeela ukuti yace yalyako malambo yane aakoca. Malambo yayo aa muzilo sana, wakwe vino na malambo ya pa luyembu yaaya aa muzilo kumwi na malambo ya pa mulandu. 18 Aonsi yonsi muli ya mwana Aloni yalinzile ukulyako. Amalambo yakwe Yeova aakoca yalaya ali malipilo yao umu nkulo zyao zyonsi amanda pe. Icintu consi icakumya malambo cilaya ica muzilo.

19 Nupya kwene Yeova wanenyile Mose ati: 20 Ilambo lino Aloni na ana yakwe yalapeela kuli Yeova pa wanda uno Aloni alasontwa ukuya simapepo mukalamba aeli: fulaulo umusuma aangalingana mupiipi na kilogilamu wenga,* icikwimililako upe wa ngano uukapeelwa lyonsi, afu wa upe uwo alapeelwa katondo nupya afu muze amanguzi. 21 Mulamuminkanya na mafuta alino nu kupanga umukate ukuomvya pani wa kocelapo. Lyene mulasansako mafuta uku mukate uwo nu kuumokoola alino muupeele kuli Yeova pakuti uye upe wa mukate uununkile. 22 Simapepo mukalamba uwapyana ukufuma umu lupwa lwakwe Aloni aalapeela ilambo lilyo. Muce mwaoca ilambo lyonsi kuli Yeova. Vikwene avino cice caya manda pe. 23 Upe wa ngano uli onsi wakwe simapepo mufwile ukuoca onsi. Kusi aalinzile ukulya upe uwo.

24 Nupya kwene Yeova wanenyile Mose ati: 25 “Nena Aloni na ana yakwe uti, ‘Ivya kulondela pa kupeela ilambo lya pa luyembu aevi: Pa ncende ino ilambo lya koca likakomelwapo apano ni lambo lya pa luyembu lifwile ukukomelwa, pa nkoleelo yakwe Yeova. Ilambo lya pa luyembu i cintu cimwi ica muzilo sana. 26 Simapepo uwapeela ilambo lya pa luyembu aalalyako ni ciputulwa cimwi ica nyama iiyo. Alaliila umu ncende ya muzilo, kuli kuti umu musolo wi tenti lya kupepelapo.

27 “‘Icili consi icakumya umu munyefu wa nyama iiyo cilaya ica muzilo, nupya ndi cakuti umwi waikanyizya uwazi wa nyama iiyo uku cakuzwala cakwe, mulinzile ukufulila icakuzwala cico umu ncende ya muzilo. 28 Inyungu muno inyama iiyo yelekiilwe, ilinzile ukutamoolwa. Ndi cakuti yelekiilwe umu civiya cakwe koopa, lyene ale iciviya cico mulinzile ukucikuuza nu kucifula na manzi.

29 “‘Aonsi yonsi muli ya simapepo yalalyako inyama iiyo. Ilambo lya pa luyembu i cintu cimwi ica muzilo sana. 30 Lelo kusi alinzile ukulya ilambo lya pa luyembu ndi cakuti uwazi umwi uwi lambo lilyo iyautwala umwi tenti lya kupepelapo pakuti uomviwe umu ncende ya muzilo uku kufuutilako imembu. Mulinzile ukoca ilambo lilyo umu moto.

7 Isunde li lambo lya pa mulandu lino mulinzile ukulondela aeli: Ilambo lii i lya muzilo sana. 2 Yalaakomela ilambo lya pa mulandu pa ncende ino yalaakomelapo na malambo ya koca, nupya yalasansa uwazi wi lambo lilyo uku mbali zyonsi izya ulambo. 3 Simapepo* alaapeela mafuta yonsi akwi lambo lilyo, mafuta yonsi aku musinda, mafuta aavimba mala, 4 alino ni mfyo ziili kumwi na mafuta aku mfyo zizyo. Nupya mafuta ya kwi tima alayafumizya pamwi ni mfyo. 5 Simapepo alavyoca pa ulambo pakuti likaye i lambo lya koca kuli Yeova. Lilaya i lambo lya pa mulandu. 6 Umonsi wensi simapepo alaalyako ilambo lilyo, nupya alinzile ukuliliila umu ncende ya muzilo. Lilaya i lambo lya muzilo sana. 7 Vino mufwile ukulondela pa kupeela ilambo lya pa luyembu avino mufwile nu kucita pa kupeela ilambo lya pa mulandu; inyama yi lambo lilyo ilaya iyakwe simapepo aakufuuta umulandu.

8 “‘Ndi cakuti simapepo wapeelelako umwi ilambo lya koca, impapa yi lambo lilyo ilaya iyakwe simapepo.

9 “‘Upe onsi uwa ngano uwapangilwa umu citofu nanti umu mpoto nanti muli pani ulaya uwakwe simapepo uwaupeela kuli Leza. 10 Lelo upe onsi uwa ngano uusakaanye na mafuta nanti uusi usakaanye na mafuta, ulaya uwa yana yakwe Aloni yonsi aonsi; yonsi yalakwata ivilingane.

11 “‘Vino umwi afwile ukulondela pa kupeela ilambo lya mutende kuli Yeova aevi: 12 Ndi cakuti akulipeela ukuya ilambo lya kutaizya, alalipeelela pamwi ni mikate iulungane iikweti cipongo pakasi iyaula icitutumusi iisakaanye na mafuta, ni mikate ipapatane iyaula icitutumusi iisanswepo na mafuta, ni mikate iulungane iikweti cipongo pakasi iyapangilwa na fulaulo umusuma umusaakanye ningo umuli na mafuta. 13 Alapeela ilambo lyakwe kumwi ni mikate iulungane iikweti cipongo pakasi iyaula icitutumusi alino ni lambo lya kutaizya ukufuma pa malambo yakwe amutende. 14 Alaatola umukate onga na onga ukufuma pa mikate iiyo nu kuipeela kuli Yeova ukuya upe wa muzilo; nupya imikate iiyo ilaya iyakwe simapepo uwasansa uwazi wa malambo ya mutende. 15 Inyama yi lambo lya kutaizya ukufuma pa malambo ya mutende ilaliiwa pa wanda kwene uno yapeelwa. Italinzile ukusungwa ukufika katondo.

16 “‘Ndi cakuti umwi akupeela ilambo pa mulandu wakuti walafile umulapo nanti nga akupeela ilambo lya kuitemelwa, upe uwo ulaliiwa pa wanda kwene uno waupeela, nupya ivyasyala vilaliiwa pa wanda uwalondelelapo. 17 Lelo inyama iyasyala ukufuma api lambo lilyo pa wanda wakwe citatu, ilociwa umu moto. 18 Nomba ndi cakuti inyama ili yonsi iyi lambo lya mutende yaliiwa pa wanda uwalenga citatu, aakupeela ilambo lilyo atalapokelelwa kuli Leza. Ilambo lilyo litalazumiliziwa; i lya winyi, nupya umuntu uwalyako ukwi lambo lilyo alafululwa. 19 Inyama iyakumya uku cintu icili consi icikowele italinzile ukuliiwa. Ilinzile ukociwa umu moto. Umuntu wensi umusanguluke angalya inyama yonsi isanguluke.

20 “‘Lelo umuntu wensi umukowele uwalya ukwi lambo lya mutende, kuli kuti ilambo lyakwe Yeova, alinzile ukukomwa. 21 Ndi cakuti umwi wakumya icintu icili consi icikowele icikafuma umu muntu nanti inyama ikowele nanti icili consi ica winyi icikowele, nupya walya inyama imwi iyi lambo lya mutende, kuli kuti ilambo lyakwe Yeova, umuntu wiyo alinzile ukukomwa.’”

22 Yeova watwalilile ukunena Mose ati: 23 Nena Aina Izlaeli ukuti yatafwile ukulya mafuta aali yonsi, aa ng’ombe nanti aa mfwele nanti aa mbuzi. 24 Mafuta ya nyama iyazanwa ukuti yatifwa na mafuta ya nyama ino yakoma uku yuze yangaomviwa kuli vyuze ivyasyala, lelo mutalinzile ukuyalya. 25 Pano wensi uwalya mafuta ya nyama iyatipeelwa ukuya ilambo lya koca kuli Yeova, afwile ukukomwa.

26 “‘Mutalinzile ukulya uwazi uli onsi umu ncende zinu zyonsi, uye uwazi wa vyunyi nanti uwa nyama. 27 Wensi uwalya uwazi uli onsi, alinzile ukukomwa.’”

28 Yeova watwalilile ukunena Mose ati: 29 Nena Aina Izlaeli uti, ‘Wensi uwapeela ilambo lya mutende kuli Yeova, alatolapo iciputulwa cimwi ici lambo lilyo nu kupeela kuli Yeova. 30 Umwineco kwene ace atwale mafuta kumwi ni cisao ukuya ilambo lya koca kuli Yeova, ace akazulunzye icisao ci lambo lilyo ukuya uupe wa kuzulunzya kuli Yeova. 31 Simapepo aloca mafuta pa ulambo, lelo icisao cilaya icakwe Aloni na ana yakwe.

32 “‘Muce mwapeela simapepo ikulu lya kwi lunji ukuya upe wa muzilo ukufuma pa malambo inu amutende. 33 Mwana Aloni wino wapeela uwazi wa malambo ya mutende na mafuta aalaya umwineco wi kulu lilyo. 34 Icisao ca upe wa kuzulunzya ni kulu lya upe wa muzilo ukufuma pa malambo ya mutende aa Ina Izlaeli, navipeela kuli Aloni simapepo nu ku yana yakwe aonsi, lii lilaya isunde lya manda pe uku Ina Izlaeli.

35 “‘Cii cali ica upe ukufuma pa malambo ya koca yakwe Yeova apeelwanga kuli ya simapepo, kuli kuti Aloni na ana yakwe, pa wanda uno yapeezilwe ukuya ya simapepo yakwe Yeova. 36 Yeova walanzile ukuti yafwile ukupeelwa upe uwo ukufuma ku Ina Izlaeli pa wanda uno yasonsilwe pali usimapepo. Lyali nu kuya isunde lya manda pe uku nkulo zyao zyonsi.’”

37 Vikwene avino yalondelanga pa kupeela ilambo lya koca, upe wa ngano, ilambo lya pa luyembu, ilambo lya pa mulandu, ilambo lya pa kusontwa pali usimapepo na pi lambo lya mutende, 38 wakwe vino Yeova wanenyile Mose pa Mwamba wa Sinai pa wanda uno wanenyile Aina Izlaeli ukupeela ivya upe vyao kuli Yeova umu lwanga lwa Sinai.

8 Yeova watwalilile ukunena Mose ati: 2 “Tola Aloni na ana yakwe, ivyakuzwala, mafuta ya muzilo, cipambasi wi lambo lya pa luyembu, ya suuku yaili na basiketi umuli imikate iyaula icitutumusi, 3 nupya ukolonganike antu yonsi pa mulyango wi tenti lya kupepelapo.”

4 Mose wacisile wakwe vino Yeova wamunenyile, nupya antu yonsi yakolongine pa mulyango wi tenti lya kupepelapo. 5 Lyene Mose wanenyile antu yonsi ati: “Vii avino Yeova watatunena ukucita.” 6 Fwandi Mose wapalamike Aloni na ana yakwe umupiipi nupya wayafuzile na manzi. 7 Pa cisila wazwisile Aloni umwingila,* wamuzwisile nu musipi wa nsalu umu musana, wamuzwisile ni koti ilyaula makasa, nupya wamwikiile na efodi nu kunyepelela efodi wiyo ningo nu musipi uyemviwe wakwe efodi. 8 Wamuzwisile ni cakuzwala ca pa cisao, nupya umu cakuzwala cico wisilemo Ulimu na Tumimu.* 9 Lyene wamuzwisile icitambala uku mutwe, nupya pa nkoleelo ya citambala paali iciyembelo cakwe goldi icayengesanga icali icimanyililo ca muzilo ica kuipeela, wakwe vino Yeova wanenyile Mose.

10 Lyene Mose watozile mafuta ya muzilo nu kupaka icikuulwa ca muzilo na vyonsi ivyalimo nupya wavisangulwile. 11 Pa cisila wasansile mafuta yamwi uku ulambo imiku 7, nupya wapasile ulambo ni viya vyonsi ivya pa ulambo na beseni ni ca kuteekapo beseni pakuti visangululwe. 12 Lyene pa cisila witulwile mafuta yamwi pa mutwe wakwe Aloni pakuti asontwe nu kusangululwa.

13 Lyene Mose wapalamike Aloni na ana yakwe nupya wayanyepiile imisipi ya nsalu umu misana, wayazwisile ni vitambala wakwe vino Yeova wamunenyile.

14 Mose waleesile cipambasi uwi lambo lya pa mulandu, nupya Aloni na ana yakwe iisile makasa yao pa mutwe wakwe cipambasi wiyo. 15 Mose wamukomile nu kutola uwazi ku munwe nupya wapasile uwazi uwo uku mpembe zya ulambo uku mbali zyonsi, nupya wasangulwile nu ulambo uku luyembu, lelo uwazi uwasyala witiile umwisika lya ulambo, ukucita vivyo kwalenzile ukuti uye usanguluke pakuti malambo ya kufuutilapo imembu yangaapeelelwa pa ulambo uwo. 16 Pa cisila watozile mafuta yonsi aali uku mala, mafuta ya kwi tima, ni mfyo ziili kumwi na mafuta ya ku mfyo zizyo, nupya wavyosile pa ulambo. 17 Lyene cipambasi wensi kumwi ni mpapa, umunyefu na citindi, vyosilwe umu moto ukunzi ya nkambi, wakwe vino Yeova wanenyile Mose.

18 Lyene Mose wapalamike suuku wi lambo lya koca, nupya Aloni na ana yakwe iisile makasa yao pa mutwe wakwe suuku wiyo. 19 Mose wakomile suuku nu kusansa uwazi umu mbali zyonsi izya ulambo. 20 Wamuputozile umu vimpilinsya, nupya osile umutwe, ivimpilinsya, na mafuta ya ku mfyo. 21 Wafuzile mala ni vimbombo umu manzi, nupya suuku wensi wamosile pa ulambo. Lyali i lambo lya koca ilinunkile kuli Yeova, wakwe vino Yeova wanenyile Mose.

22 Lyene watozile suuku wakwe ciili, kuli kuti suuku uwa kupeela pa kusontwa kwakwe ya simapepo, nupya Aloni na ana yakwe iisile makasa pa mutwe wakwe suuku wiyo. 23 Mose wakomile suuku nupya watozileko uwazi umwi nu kuwika uku nsongo yi kutwi lyakwe Aloni ilya kwi lunji nu ku cala cakwe ica kwi kasa lya kwi lunji alino nu ku cikando ica kwi kulu lyakwe ilya kwi lunji. 24 Lyene Mose watwazile ya mwana Aloni pa nkoleelo nupya wisile uwazi umwi uku nsongo zya ku matwi yao akwi lunji, nu ku vyala vyao ivya ku makasa ya kwi lunji alino nu ku vikando vyao ivya ku makulu ya kwi lunji; lelo uwazi onsi uwasyala Mose wausansiile umu mbali zyonsi izya ulambo.

25 Lyene watozile mafuta, kuli kuti mafuta yonsi aku musinda, mafuta yonsi aku mala, mafuta ya kwi tima, imfyo ziili kumwi na mafuta ya ku mfyo zizyo, alino ni kulu lya kwi lunji. 26 Watozile umukate onga uwa cipongo pakasi uwaula icitutumusi ukufuma muli basiketi wa mikate iyaula icitutumusi uwali pa nkoleelo yakwe Yeova, nupya watozilemo umukate na uze uwakweti icipongo uusakaanyemo na mafuta alino nu mukate na uze upapatane. Lyene wisile imikate iiyo pa vimpilinsya vya mafuta ya ku nyama alino na pi kulu lya kwi lunji. 27 Pa cisila wisile vyonsi umu makasa yakwe Aloni nu mu makasa ya yana yakwe Aloni nu kutandika ukuvizulunzya pakuti viye ilambo lya kuzulunzya pa nkoleelo yakwe Yeova. 28 Lyene Mose wavifumizye umu makasa yao nu kuvyoca pa ulambo papela ya malambo ya koca. Ilambo lilyo lyapeezilwe pa kusontwa kwakwe ya simapepo. Lyali ilambo lya koca ilinunkile kuli Yeova.

29 Lyene Mose watozile icisao cakwe suuku nu kucizulunzya pakuti ciye ilambo lya kuzulunzya kuli Yeova. Icisao cakwe suuku wa pa kusontwa kwakwe ya simapepo cizile iciya icakwe Mose, wakwe vino Yeova wanenyile Mose.

30 Nupya Mose watozile mafuta yamwi amuzilo alino nu wazi umwi uwali pa ulambo nu kusansila Aloni ni vyakuzwala vyakwe nupya wasansiile na ya mwana Aloni ni vyakuzwala vyao. Vikwene avino Aloni wasangulwilwe kumwi ni vyakuzwala vyakwe na ana yakwe kumwi ni vyakuzwala vyao.

31 Lyene Mose wanenyile Aloni na ana yakwe ati: “Elekini umunyefu pa mulyango wi tenti lya kupepelapo, nupya mumauliila papo kwene kumwi ni mikate ino ili muli basiketi aakuomviwa pa kusontwa kwakwe ya simapepo, wakwe vino Leza wanenyile ati, ‘Aloni na ana yakwe aalalya ivintu vivyo.’ 32 Ivimasyala pa munyefu uwo nu mukate muvyoce umu moto. 33 Mutalinzile ukufuma pa mulyango wi tenti lya kupepelapo pa manda 7, muloleele manda ya kusontwa kwinu yakumane, pano palapita manda 7 pakuti muye ya simapepo. 34 Yeova walanzile ukuti tucite vikwene vino itucita uwanda wi lelo pakuti imembu zinu zifuutwe. 35 Mumaikalanga pa mulyango wi tenti lya kupepelapo umusanya nu usiku pa manda 7 nupya mwakulaombela Yeova pakuti mutafwa; pano vikwene avino Leza wanenyile.”

36 Lyene Aloni na ana yakwe yacisile vyonsi vino Yeova wanenyile Mose.

9 Pa wanda uwalenga 8, Mose wamile Aloni na ana yakwe na akalamba ya mu Izlaeli. 2 Wanenyile Aloni ati: “Tola ing’ombe ya pa luyembu iisuma na suuku wa pi lambo lya koca umusuma, nupya uvipeele pa nkoleelo yakwe Yeova. 3 Lelo uce unene Aina Izlaeli uti, ‘Tolini sawe uwa kupeela pi lambo lya pa luyembu ni ng’ombe na suuku ivya mwaka onga nupya ivisuma, kuti viye ilambo lya koca, 4 nupya mutole cipambasi na suuku kuti viye amalambo ya mutende, pakuti muvipeele kuli Yeova, alino nu upe wa ngano uusakaanye na mafuta, pano ilelo Yeova amalolekela kuli mwemwe.’”

5 Fwandi yatwazile ivintu vivyo pa nkoleelo yi tenti lya kupepelapo, wakwe vino Mose walanzile. Lyene antu yonsi yaile iimilila pa nkoleelo yakwe Yeova. 6 Nupya Mose walanzile ati: “Vii avino Yeova watamunena kuti mucite, pakuti ululumbi lwakwe Yeova lungaloleka kuli mwemwe.” 7 Lyene Mose wanenyile Aloni ati: “Yanga pa ulambo nu kuyapeela ilambo lyako ilya pa luyembu alino ni lambo lyako ilya koca, nupya uifuutile uluyembu lwako nu kufuutilako amu ng’anda yako; nupya upeeleleko na antu malambo nu kuyafuutilako imembu zyao, wakwe vino Yeova watalanda.”

8 Papo kwene sile Aloni waile pa ulambo nu kuyakoma ing’ombe iya kupeela ilambo lyakwe ilya pa luyembu. 9 Lyene ya mwana Aloni aonsi yamutwaliile uwazi, nawe watimpike umunwe umu wazi nu kuupaka uku mpembe zya ulambo, nupya uwasyala wawitiile umwisika lya ulambo. 10 Lyene mafuta ni mfyo na mafuta ya kwi tima ivya kwi lambo lya pa luyembu wavyosile pa ulambo, wakwe vino Yeova wanenyile Mose. 11 Nupya waile aocela inyama iyasyala kumwi ni mpapa ukunzi ya nkambi.

12 Lyene Aloni wakomile ilambo lya koca, nupya anakwe yamupeezile uwazi, nawe wausansile umu mbali zyonsi izya ulambo. 13 Yamupeezile ivimpilinsya vi lambo lya koca pamwi nu mutwe, nawe wavyosile pa ulambo. 14 Nupya wafuzile mala ni vimbombo nu kuvyocela pamwi ni lambo lya koca pa ulambo.

15 Lyene wapeezile malambo ya yantu nu kutola imbuzi iyi lambo lya pa luyembu iya yantu, nupya waikomile nu kupeela ilambo lya pa luyembu wakwe vino wacisile ukwi lambo lya kutandikilako. 16 Nupya wapeezile ilambo lya koca ukulingana na vino yalondelanga pa kupeela ilambo lilyo.

17 Lyene wapeezile upe wa ngano, watapwilepo zimwi ukuzuuzya ikufi nu kuzyoca pa ulambo, ukulunda pi lambo lya koca ilya katondo.

18 Pa cisila wakomile cipambasi na suuku vino antu yasangwile ukuti viye ilambo lya mutende. Nupya anakwe yamupeezile uwazi, nawe wausansile umu mbali zyonsi izya ulambo. 19 Lelo mafuta yakwe cipambasi, mafuta ya ku musinda wakwe suuku, mafuta aavimba ivya munda, imfyo na mafuta ya kwi tima, 20 yaisile yonsi pa cisao cakwe cipambasi na cakwe suuku, lyene pa cisila wizile aoca mafuta yayo pa ulambo. 21 Lelo visao na makulu ya kwi lunji, Aloni wavizulunzizye kuti viye upe wa kuzulunzya kuli Yeova, wakwe vino Mose walanzile.

22 Lyene Aloni walozizye makasa uku yantu nu kuyapaala, nupya wafumile pano wapeelelanga ilambo lya pa luyembu ni lambo lya koca na malambo ya mutende. 23 Nupya pa cisila Mose na Aloni iingile umwi tenti lya kupepelapo, nupya iizile iyafumamo nu kupaala antu.

Lyene ululumbi lwakwe Yeova lwalolekiile uku yantu yonsi, 24 nupya umoto wafumile kuli Yeova nu koca malambo na mafuta ivyali pa ulambo. Lino antu yonsi yaweni vivyo, yatandike ukupunda nupya yaponyile ale iyalozya ivinso vyao pansi.

10 Pa cisila ya mwana Aloni, kuli kuti Nadabu na Abihu cila wino watozile ica kocelapo ivinunkile nu kwikapo umoto ni vinunkile. Lyene yatandike ukupeela ivinunkile vivyo kuli Yeova pa moto uutazumiliziwe, cintu cino Leza ataayanenyile ukucita. 2 Lilyo kwene sile umoto wafumile kuli Yeova nu kuyoca, nupya yafwilile pa nkoleelo yakwe Yeova. 3 Lyene Mose wanenyile Aloni ati: “Yeova watalanda ati, ‘Nimaya uwa muzilo kuli yano yali umupiipi nani, nupya nimacindamikwa uku yantu yonsi.’” Aloni nawe wali mya.

4 Fwandi Mose wamile Misyaeli na Elizafani ya mwana Uzieli nyinalume wakwe Aloni nu kuyanena ati: “Izini kuno mwize mufumye aina inu umu ncende ya muzilo nu kuyatwala ukunzi ya nkambi.” 5 Nayo yaile iyasenda aonsi ala yali umu mingila yao ino yaazwite nu kuyatwala ukunzi ya nkambi, wakwe vino Mose wayanenyile.

6 Lyene Mose wanenyile Aloni na ana aonsi yauze, kuli kuti Elieza na Itamali ati: “Mutalekelezya inyele zinu nanti ukulepula ivyakuzwala vinu, pakuti mutafwa na pakuti Leza atasokela antu yonsi. Aina inu, kuli kuti Aina Izlaeli yonsi yamaloosya pali yano Yeova watakoma ukuomvya umoto. 7 Mutalinzile ukufuma pa mulyango wi tenti lya kupepelapo, nga mwacita vivyo mulafwa, pano Yeova wamusonta ukuomvya mafuta ya muzilo.” Fwandi yacisile ukulingana na vino Mose walanzile.

8 Lyene Yeova wanenyile Aloni ati: 9 “Mutaamwa waini nanti ivyakumwa vyuze ivikakola lino mukuya umwi tenti lya kupepelapo wewe pamwi na ana yako aonsi, pakuti mutaca mufwe. Lii i sunde lya manda pe uku nkulo zinu. 10 Isunde lii lyakulapusanya ivintu vya muzilo ni vintu ivisi vya muzilo nupya lyakulapusanya ivintu ivikowele ni vintu ivisanguluke, 11 nupya lyakulasambilizya Aina Izlaeli masunde yonsi yano Yeova wayanena ukupitila muli Mose.”

12 Lyene Mose wanenyile Aloni na ana yakwe aasyazilepo, kuli kuti Elieza na Itamali ati: “Tolini ivyasyazilepo pa upe wa ngano ukufuma pa malambo yakwe Yeova aakoca nu kuviliila umupiipi nu ulambo wa mukate uwaula icitutumusi, pano ilambo lilyo i lya muzilo sana. 13 Mulinzile ukuliliila umu ncende ya muzilo pano yakwene ali malipilo yako na malipilo ya yana yako ukufuma pa malambo yakwe Yeova aakoca, pano vikwene ali vino Leza wanenyile. 14 Nupya icisao ca upe wa kuzulunzya ni kulu lya upe wa muzilo muce muviliile umu ncende ya usaka, wewe pamwi na anako aonsi na akazyana, pano ivintu vii a malipilo yako na malipilo ya yana yako aonsi ukufuma pa malambo ya mutende aa Ina Izlaeli. 15 Yalaleta ikulu lya upe wa muzilo ni cisao ci lambo lya kuzulunzya pamwi na malambo ya mafuta aakoca, pakuti upe wa kuzulunzya kuli Yeova ukazulunziwe; nupya ulaya a malipilo yako manda pe alino na malipilo ya yana yako aonsi, wakwe vino Yeova walanzile.”

16 Nupya Mose walondelizye ningo imbuzi yi lambo lya pa luyembu, nu kuzana ukuti yatiyociwa. Fwandi wasokiile sana Elieza na Itamali ya mwana Aloni aasyazilepo, nupya uzizye ati: 17 “U mulandu ci uno mutaliilile ilambo lya pa luyembu umu ncende ya muzilo? Pano ilambo lilyo i lya muzilo sana nupya Leza watamupeela pakuti mufumye uluyembu lwa Ina Izlaeli nu kulufuuta pa nkoleelo yakwe Yeova. 18 Lolini! Kusi uwatatwala uwazi wi lambo umu ncende ya muzilo. Imulinzile ukuliila ilambo lilyo umu ncende ya muzilo, wakwe vino Leza wanenyile.” 19 Aloni waswike Mose ati: “Lola! Ilelo iyapeela malambo yao aapa luyembu na malambo yao aakoca kuli Yeova, nomba ivintu iviipe ivincitikila. Uzye Yeova nga watatemwa ndi cakuti ilelo indya ilambo lya pa luyembu?” 20 Lino Mose uvwile vivyo, watemilwe.

11 Lyene Yeova wanenyile Mose na Aloni ati: 2 “Nena Aina Izlaeli uti, ‘Ivya umi vino mungalya ivyaya pano nsi* aevi: 3 Inyama yonsi iyapanduka inkamba nupya iikasyetulula ingaliiwa.

4 “‘Lelo inyama izikasyetulula nanti izyapanduka inkamba zino mutafwile ukulya aezi: ingamali ikasyetulula lelo itaapanduka inkamba. Mwailola ukuti ikowele. 5 Alino na piimbi, pano akasyetulula lelo ataapanduka inkamba. Mwamulola ukuti umukowele. 6 Na kalulu, pano akasyetulula lelo atakwata inkamba izipanduke. Mwamulola ukuti umukowele. 7 Na kapoli, pano wakwata inkamba izipanduke lelo asisyetulula. Mwamulola ukuti umukowele. 8 Mutalinzile ukulya inyama zizyo nanti ukukumya ivitumbi vya nyama zizyo. Mwazilola ukuti izikowele.

9 “‘Pali vyonsi ivyaya umu manzi, vino mungalya aevi: Consi ica mu manzi icakwata imyangalala na mamba, ciye ica muli yemba nanti mu luzi, mungalya. 10 Lelo vyonsi ivyaya muli yemba nu mu luzi ivitakwata imyangalala na mamba, kuli kuti ivya umi vyonsi ivikapita umu maumba alino ni vya umi vyuze ivyaya umu manzi, mwavilola ukuti ivikowele. 11 Nupya pa mulandu wakuti ivikowele, mutalinzile ukulya ivintu vivyo, ni vitumbi vya vintu vivyo mwavilola ukuti ivikowele. 12 Vyonsi ivyaya umu manzi ivitakwata imyangalala na mamba mwavilola ukuti ivikowele.

13 “‘Ivikapapuka vino mutafwile ukulya pa mulandu wakuti ivikowele aevi: cipungu, inkwazi, icikozi citifi, 14 mweye muyenzu ni misango yonsi yakwe ya mweye yatifi, 15 misango yonsi yakwe ya mwankole, 16 imbuni, icipululu, inkokoluzi, nu musango onsi uwa kakozi, 17 kapululu kanono, ivyunyi vya muli yemba ivyakolana ni mbataluzi, sinsimwe, 18 imbataluzi, mukanga, cikozi, 19 inkowa, ni misango ya tunga yonsi, pupute, na kasusu. 20 Ivya umi vyonsi ivyakwata maapa ivikapitila na makulu yonsi 4, mwavilola ukuti ivikowele.

21 “‘Pa vya umi ivyakwata maapa ivikapita ukuomvya makulu yonsi 4, mungalya sile ivyakwata makulu aalundinkane aakalenga kuti vyatolooka pa musili. 22 Pali vivyo vino mungalya aevi: imisango ipusanepusane yakwe makanta, ya enza, inyenze, na yambala. 23 Ivya umi vyuze vyonsi ivyasyala ivyakwata maapa alino na makulu 4, mwavilola ukuti ivikowele. 24 Ivintu vii vingamukowezya. Wensi uwalema icitumbi ca vintu vii alaya umukowele ukufika manguzi. 25 Wensi uwasenda icitumbi ca vintu vii alinzile ukufula ivyakuzwala vyakwe; alaya umukowele ukufika manguzi.

26 “‘Inyama yonsi iyapanduka inkamba lelo iisisyetulula, mwailola ukuti ikowele. Wensi uwalema inyama iiyo alaya umukowele. 27 Inyama zyonsi izitakwata inkamba pa nyama zyonsi izikapitila na makulu 4, mwazilola ukuti izikowele. Wensi uwalema icitumbi ca nyama zizyo alaya umukowele ukufika manguzi. 28 Wensi uwasenda icitumbi ca nyama zizyo, alinzile ukufula ivyakuzwala vyakwe, nupya alaya umukowele ukufika manguzi. Mwazilola ukuti izikowele.

29 “‘Ivya umi vyonsi ivikasela umu nsi vino mulinzile ukulola ukuti ivikowele aevi: tunko, kuza, musango uli onsi wakwe mususwe, 30 kamususwe kanono, insamba, mususwe mukalamba, mpulumusi, na lumvu. 31 Ivya umi vii mwavilola ukuti ivikowele. Wensi uwalema ivitumbi vya vintu vivyo alaya umukowele ukufika manguzi.

32 “‘Ponsi pano icitumbi ca vintu vivyo caponela palaya apakowele, paye apa civiya icapangilwa ni mbao, pa cakuzwala, pa mpapa, nanti pa cisalu icapangilwa na masaaka. Asi mulandu ni milimo ino icintu cico cikaomviwako mulinzile ukuciombeka umu manzi, nupya cilaya icikowele ukufika manguzi; lyene alino cilaya icisanguluke. 33 Ndi cakuti vyaponela pa nyungu, mufwile ukutama inyungu iiyo, na consi icilimo cilaya icikowele. 34 Ivyakulya vyonsi vino manzi ya mu civiya cico itikilapo vilaya ivikowele, ni vyakumwa vyonsi ivya mu civiya cico vilaya ivikowele. 35 Ponsi pano icitumbi ca vya umi vivyo caponela palaya apakowele. Paye apa citofu nanti pa kakwelekelapo akanono, vilinzile ukutamoolwa. I vikowele, nupya mufwile ukutwalilila ukuvilola ukuti ivikowele. 36 Akafukoka sile ni cifula ivilatwalilila sile ukuya ivisanguluke, lelo wensi uwakumya uku citumbi ca vya umi vivyo alaya umukowele. 37 Ndi cakuti icitumbi ca vya umi vivyo caponela pa mbezu zya kukomela, imbezu zizyo zilatwalilila ukuya izisanguluke. 38 Lelo ndi cakuti umwi witilapo manzi pa mbezu zizyo nupya icitumbi ca vya umi vivyo caponelapo, muce mwalola imbezu zizyo ukuti izikowele.

39 “‘Ndi cakuti inyama ino mukalya yafwa, wensi uwakumya icitumbi ca nyama iiyo alaya umukowele ukufika manguzi. 40 Wensi uwalya inyama iiyo alinzile ukufula ivyakuzwala vyakwe, nupya alaya umukowele ukufika manguzi. Na wensi uwasenda icitumbi cico alinzile ukufula ivyakuzwala vyakwe, nupya alaya umukowele ukufika manguzi. 41 Ica umi consi icikasela umu nsi, i cikowele. Citafwile ukuliiwa. 42 Mutafwile ukulya ica umi icili consi icikaselela pa lunda, nanti icikasela na makulu 4, nanti ivya umi ivili vyonsi ivikasela umu nsi na makulu aingi, pano i vikowele. 43 Mutaaikowezya uku vya umi vyonsi ivikasela, pakuti mutaya akowele. 44 Pano nene Yeova Leza winu, nupya mufwile ukuya aasanguluke nupya amuzilo, pano nene wa muzilo. Fwandi mutafwile ukuikowezya uku vya umi vyonsi ivikasela umu nsi. 45 Nene indi Yeova uwamufumizye umu mpanga iya Ijipti pakuti imulange ukuti nene indi Leza winu, nupya mufwile ukuya amuzilo, pano nemo nene wa muzilo.

46 “‘Lii ali sunde lyakulondela pa nyama, pa vya umi ivikapapuka, ivya umi vyonsi ivya mu manzi, ni vya umi vyonsi ivikasela umu nsi, 47 pakuti paye upusano pa cikowele ni cisanguluke na pa vya umi ivingaliiwa ni vya umi ivitanga viliiwe.’”

12 Yeova watwalilile ukunena Mose ati: 2 “Nena Aina Izlaeli uti, ‘Ndi cakuti umwanaci waya pa ukulu nupya wakwata umwana umonsi, umwanaci wiyo alaya umukowele pa manda 7, wakwe vino cikaya lino ali ku mwezi. 3 Lyene umwana wiyo alazembululwa pa wanda uwalenga 8. 4 Umwanaci wiyo alatwalilila ukuisangulula pa manda 33 pa mulandu nu wazi uwafumile. Atalinzile ukulema icintu ca muzilo icili consi, nupya atalinzile ukwingila umu ncende ya muzilo ukufikila lino manda ya kuisangulula kwakwe yakumana.

5 “‘Ndi cakuti wakwata umwana umukazyana, lyene alinzile ukuya umukowele pa manda 14, wakwe vino cikaya lino ali ku mwezi. Alatwalilila ukuisangulula pa manda 66 pa mulandu nu wazi uwafumile. 6 Lino manda yakwe aakuisangulula pa mulandu wa kukwata umwana umonsi nanti umukazyana yakumana, ace alete suuku wa mwaka onga ukuya ilambo lya koca ni cipeele nanti inkunda ukuya ilambo lya pa luyembu, ace atwale ivintu vivyo kuli simapepo pa mulyango wi tenti lya kupepelapo. 7 Simapepo nawe alapeela ilambo lilyo kuli Yeova nupya alafuutila umwanaci wiyo uluyembu lwakwe, nawe alaya umusanguluke uku wazi. Likwene ali sunde ilya pa mwanaci uwakwata umwana umonsi nanti umukazyana. 8 Lelo ndi cakuti atanga akwanisye ukupeela imfwele, alinzile ukupeela inkunda ziili nanti ivipeele viili, conga cifwile ukuya ilambo lya koca ni cuze ukuya ilambo lya pa luyembu, nupya simapepo alamufuutila uluyembu lwakwe, nawe alaya umusanguluke.’”

13 Yeova watwalilile ukunena Mose na Aloni ati: 2 “Ndi cakuti umuntu watandika ukuvimba pa mwili, nanti ndi cilonda cumilila nu kukwata ufila, nanti wakwata icilonda ca kuipuukila, limwi ungaya uulwale wakwe tembwe,* yafwile ukumutwala kuli Aloni simapepo nanti kuli wenga pali ya mwana Aloni, ya simapepo. 3 Simapepo alaceeceta icilonda icili pa nkanda ya muntu wiyo. Ndi cakuti upipi uuli pa cilonda ukuloleka utiswe nupya ni cilonda cikuloleka icizike, ale uulwale wakwe tembwe. Simapepo alaceeceta icilonda cico nu kumanyisya antu ukuti umuntu wii u mukowele. 4 Lelo ndi cakuti icilonda ca kuipuukila i citiswe nupya cisikuloleka ukuzika nu upipi usi utiswe, lyene simapepo aliika umuntu wiyo wenga pa manda 7. 5 Simapepo alamuceeceta pa wanda uwalenga 7, nupya ndi cakuti caloleka ukuti ulwale uwo utatwalilile nupya utasalangine pa nkanda, simapepo aliika umuntu wiyo wenga pa manda na yauze 7.

6 “Simapepo alinzile ukumuceeceta nupya kwene pa wanda uwalenga 7, nupya ndi cakuti ulwale uwo iutandika ukupola nupya utasalangine pa nkanda, simapepo alamanyisya antu ukuti umuntu wiyo u musanguluke; cino wakweti cali sile icilonda. Lyene umuntu wiyo alafula ivyakuzwala vyakwe nu kuya umusanguluke. 7 Lelo ndi cakuti ulwale wasalangana pa nkanda pa cisila cakuti simapepo wamunena ukuti u musanguluke, nupya kwene alaswilila kuli simapepo umuku wakwe ciili. 8 Simapepo alaceeceta ulwale uwo, nupya ndi cakuti iusalangana umu nkanda, alamanyisya antu ukuti umuntu wiyo u mukowele. Akweti tembwe.

9 “Ndi cakuti umuntu wakwata tembwe, yalinzile ukumutwala kuli simapepo, 10 nupya simapepo alamuceeceta. Ndi cakuti akweti icivimbe icitiswe pa nkanda nupya icivimbe cico icisangula upipi ukuya utiswe nupya iciyulika, 11 ale uulwale wakwe tembwe aasipola, nupya simapepo alamanyisya antu ukuti umuntu wiyo u mukowele. Atafwile nu kumwika wenga, pano ale icimanyikwa ukuti u mukowele. 12 Lyene ndi cakuti ulwale wakwe tembwe wasalangana uku nkanda yonsi iya muntu wiyo nupya tembwe wakumana umwili onsi ukufuma uku mutwe suka uku tukando, icakuti na simapepo angalola, 13 nupya simapepo wamuceeceta nu kulola ukuti tembwe watakumana umwili onsi, alamanyisya antu ukuti umuntu wiyo u musanguluke.* Umuntu wiyo u musanguluke pa mulandu wakuti inkanda yakwe yonsi yatisanguka itiswe. 14 Lelo lyonsi lino icilonda caloleka pa mwili wakwe, alaya u mukowele. 15 Lino simapepo walola icilonda cico, alamanyisya antu ukuti umuntu wii u mukowele. Icilonda cico i cikowele. Uulwale wakwe tembwe. 16 Lelo ndi cakuti icilonda cico caya icitiswe nupya kwene, umuntu wiyo alaswilila kuli simapepo. 17 Simapepo alamuceeceta, nupya ndi cakuti icilonda cico icisanguka icitiswe, simapepo alamanyisya antu ukuti umuntu wiyo u musanguluke.

18 “Ndi cakuti umuntu wakwata icipute nupya nu kupola capola, 19 lelo apaali icipute paloleka cimwi icivimbe icitiswe nanti papuuka icilonda iciyenzulukile, umuntu wiyo alinzile ukuya kuli simapepo. 20 Simapepo alaceeceta icilonda cico, nupya ndi cakuti icizike alino nu upipi wa pa cilonda cico iusanguka utiswe, lyene simapepo alamanyisya antu ukuti umuntu wiyo u mukowele. Ulwale wakwe tembwe u watiufuma pa cipute. 21 Lelo ndi cakuti simapepo waceeceta icilonda nu kulola ukuti pasi upipi utiswe nupya citazisile alino cikuloleka ukupola, lyene simapepo aliika umuntu wiyo wenga pa manda 7. 22 Ndi cakuti icilonda cico icisalangana pa nkanda, simapepo alamanyisya antu ukuti umuntu wiyo u mukowele. U mulwale tembwe. 23 Lelo ndi cakuti icilonda cili sile pali pamwi citasalangine, ale u kuvimba sile ukwa cipute, nupya simapepo alamanyisya antu ukuti umuntu wiyo u musanguluke.

24 “Nanti ndi cakuti umwi akweti iciyazi ica kupya nu moto nupya inkanda ya pa ciyazi yatandika ukuloleka iyenzulukile nanti itiswe, 25 simapepo alaceeceta iciyazi cico. Ndi cakuti upipi wa pa cilonda iusanguka ukuya utiswe nupya cikuloleka icizike, ale ulwale wakwe tembwe uwatiufuma pa ciyazi, nupya simapepo alamanyisya antu ukuti umuntu wiyo u mukowele. Akweti ulwale wakwe tembwe. 26 Lelo ndi cakuti simapepo waceeceta icilonda cico nu kulola ukuti pasi upipi utiswe nupya citazisile nu kupola cikupola, lyene aliika umuntu wiyo wenga pa manda 7. 27 Simapepo alaceeceta umuntu wiyo pa wanda uwalenga 7, ndi cakuti icilonda icisalangana pa nkanda, alamanyisya antu ukuti umuntu wiyo u mukowele. Akweti ulwale wakwe tembwe. 28 Lelo ndi cakuti icilonda cili sile pali pamwi nupya citasalangine pa nkanda nupya nu kupola cikupola, ale kuko u kuvimba sile ukwa ciyazi, nupya simapepo alamanyisya antu ukuti umuntu wiyo u musanguluke.

29 Ndi cakuti umonsi nanti umwanaci wakwata icilonda pa mutwe nanti pa cilezu, 30 simapepo alaceeceta icilonda cico. Ndi cakuti icizike nupya inyele nanti ivilezu vikuloleka vyakwe yelo nupya ivisalangane, simapepo alamanyisya antu ukuti umuntu wiyo u mukowele; akweti ulwale wa pa nkanda ya ku mutwe nanti uwa ku vilezu. A tembwe wa ku mutwe nanti pa cilezu. 31 Lelo ndi cakuti simapepo walola ukuti cilonda cisi cizike nupya citakweti ni nyele izitifi, aliika umuntu wiyo wenga pa manda 7. 32 Simapepo alaceeceta icilonda cico pa wanda uwalenga 7, ndi cakuti icilonda cico citasalangine pa nkanda nupya citakweti ni nyele zyakwe yelo nupya citazisile nu kuzika, 33 umuntu wiyo alinzile ukupelwa inyele nanti ivilezu, lelo atalinzile ukupelwa apali icilonda. Lyene simapepo alamwika wenga pa manda 7.

34 “Simapepo alaceeceta icilonda nupya kwene pa wanda uwalenga 7, nupya ndi cakuti icilonda cico citasalangine pa nkanda nupya citazisile, lyene simapepo alamanyisya antu ukuti umuntu wiyo u musanguluke, nawe afwile ukufula ivyakuzwala vyakwe nu kuya umusanguluke. 35 Lelo ndi cakuti icilonda cico icisalangana pa nkanda pa cisila cakuti umuntu wiyo wasanguluka, 36 simapepo alamuceeceta, nupya ndi cakuti icilonda icisalangana pa nkanda, simapepo atalalondekwa nu kulola inyele zyakwe yelo nanti ivilezu; umuntu wiyo u mukowele. 37 Lelo ndi cakuti caloleka ukuti icilonda citasalangine nupya ni nyele zitifi izimelapo, ale icilonda icipola. Umuntu wiyo ale umusanguluke, nupya simapepo alamanyisya antu ukuti u musanguluke.

38 “Ndi cakuti umonsi nanti umwanaci wapuuka ivilonda pa mwili nupya ivilonda i vitiswe, 39 simapepo alaceeceta ivilonda vivyo. Ndi cakuti vikuloleka ivitiswe lino vikupola, ale u kufukuka kwa vipuzu ukutanga kulete uzanzo. Umuntu wiyo ale u musanguluke.

40 “Ndi cakuti umwi wasusoka inyele umu mutwe nu kusyala ni pala, ale umuntu wiyo u musanguluke. 41 Ndi cakuti wasusoka inyele lwa pa cipuma nupya wasyala ni pala, ale umusanguluke. 42 Lelo ndi cakuti umwi wakwata ivilonda iviyenzulukile pi pala nanti pa cipuma, ale ulwale wakwe tembwe uukufuma api pala nanti pa cipuma. 43 Simapepo alamuceeceta, nupya ndi cakuti icikuvimba api pala nanti pa cipuma cikuloleka iciyenzulukile nupya cikuloleka kwati ulwale wakwe tembwe, 44 umuntu wiyo ale umulwale tembwe. U mukowele, nupya simapepo alamanyisya antu ukuti umuntu wiyo umukowele pa mulandu nu ulwale uli pa mutwe wakwe. 45 Umuntu ali nu ulwale wakwe tembwe, alinzile ukuzwala ivyakuzwala ivilepoke nupya inyele zyakwe zitalinzile ukusaakulwa nupya alinzile ukuvimba pa kanwa alino nu kupunda ukuti, ‘Nene mukowele, nene mukowele!’ 46 Alaya u mukowele pa nsita yonsi ino ali nu ulwale uwo. Pa mulandu wakuti u mukowele, alinzile ukwikala wenga. Alaikala ukunzi ya nkambi.

47 “Ndi cakuti ulwale wakwe tembwe wakowezya icakuzwala, ciye icakuzwala icapangilwa na mavumbu nanti insalu isuma, 48 nanti insalu iyapangilwa na kotoni nanti iya mavumbu nanti impapa nanti cili consi icapangilwa ni mpapa, 49 nupya vimwi ivyafuma uku ulwale ivikwetimo yelo na gilini nanti iviyenzulukile vyakowezya icakuzwala, impapa, insalu iyapangilwa na kotoni, iyapangilwa na mavumbu, nanti icili consi icapangilwa ni mpapa, ale icintu cico icikowela na tembwe, nupya cilinzile ukutwalwa kuli simapepo. 50 Simapepo alaceeceta icakuzwala cico icikweti ulwale, nupya alaciika conga pa manda 7. 51 Ndi cakuti simapepo waceeceta ulwale pa wanda uwalenga 7 nu kulola ukuti ulwale iusalangana uku cakuzwala cico, ku nsalu yakwe kotoni, nanti icakuzwala ca mavumbu nanti icapangilwa ni mpapa (usi mulandu ni mpapa iyaomviwa), ale ulwale uwo a tembwe umwipisye, nupya icakuzwala cico caticikowela. 52 Alinzile ukoca icakuzwala nanti insalu iyapangilwa na kotoni nanti icapangilwa na mavumbu nanti icapangilwa ni nsalu isuma nanti icili consi icapangilwa ni mpapa icikweti ulwale uwo, pano ale cikweti ulwale uwipisye. Mulinzile ukucoca umu moto.

53 “Lelo ndi cakuti simapepo waciceeceta nupya ulwale utasalangine uku cakuzwala cico nanti uku nsalu iyapangilwa na kotoni nanti uku nsalu iyapangilwa na mavumbu nanti uku cili consi icapangilwa ni mpapa, 54 simapepo alanena antu ukuti yafule insalu iiyo iyatikowela, nupya alaika yonga pa manda 7. 55 Lyene pa cisila cakuti insalu iiyo yafulwa ningo, simapepo alaiceeceta. Ndi cakuti icikowele citafumileko usi mulandu ulwale utasalangine, ale insalu iiyo iikowele. Mulinzile ukuyoca umu moto pa mulandu wakuti yatiliika, usi mulandu yatiliika umukasi nanti ukunzi.

56 “Lelo ndi cakuti simapepo waceeceta icakuzwala cico nanti insalu nupya icikowele icicepa pa cisila ca kufulwa ningo, alalepula apali icikowele uku cakuzwala cico nanti uku mpapa nanti uku nsalu yakwe kotoni nanti uku nsalu ya mavumbu. 57 Lelo ndi cakuti icikowele caloleka pauze uku cakuzwala nanti uku nsalu iyapangilwa na kotoni nanti iyapangilwa na mavumbu nanti uku cili consi icapangilwa ni mpapa, ale icikowele cico cikusalangana, nupya mufwile ukoca insalu yonsi iikweti icikowele. 58 Lelo ndi cakuti cikowele cata ukuloleka pa cisila ca kufula icakuzwala nanti insalu iyapangilwa na kotoni nanti iyapangilwa na mavumbu nanti icili consi icapangilwa ni mpapa, icintu cico cifwile ukufulwa nupya kwene umuku wakwe ciili, lyene alino cilaya icisanguluke.

59 “Vii ali vya kulondela uku ulwale wakwe tembwe uwa ku cakuzwala icapangilwa na mavumbu nanti ni nsalu isuma, nanti ni nsalu iyapangilwa na kotoni nanti consi icapangilwa ni mpapa, pakuti cimanyikwe ukuti i cisanguluke nanti i cikowele.”

14 Yeova watwalilile ukunena Mose ati: 2 “Lii ali sunde lino mulinzile ukulondela pa muntu wakwe tembwe pa nsita ya kusangululwa kwakwe, lino mwamutwala kuli simapepo. 3 Simapepo alaya ukunzi ya nkambi nu kuyamuceeceta. Ndi cakuti umulwale wakwe tembwe watapola, 4 simapepo alamunena ukutwala ivyunyi viili ivipuma nupya ivisanguluke, kamusambo ka mukedali, insalu iyenzu, na kamuti kakwe isopu pakuti asangululwe. 5 Simapepo alalanda ukuti yakomele icunyi conga umu nsembo umuli amanzi atiyatapwa mu luzi ulukupita. 6 Lelo afwile ukutola icunyi ca umi kumwi na kamusambo ka mukedali, insalu iyenzu na kamuti kakwe isopu nu kuvitimpika umu wazi wa cunyi icaticikomelwa umu manzi atiyatapwa umu luzi ulukupita. 7 Lyene simapepo alasansila uwazi imiku 7 pa muntu aakusangululwa kuli tembwe nupya alanena antu ukuti u musanguluke, alaleka ni cunyi icili nu umi ukuya umu mpanga.

8 “Umuntu aakusangululwa afwile ukufula ivyakuzwala vyakwe nu kupela inyele zyonsi alino nu kufulala, lyene alino alaya u musanguluke. Pa cisila alaya ku nkambi, lelo alikala ukunzi yi tenti lyakwe pa manda 7. 9 Pa wanda uwalenga 7, alinzile ukupela inyele zyakwe zyonsi uku mutwe ni vilezu kumwi ni nkopyo. Pa cisila ca kupela inyele zyonsi, alafula ivyakuzwala vyakwe nupya alafulala, alino alaya umusanguluke.

10 “Pa wanda uwalenga 8, alatwala ya suuku asuma yaili kuli simapepo, imfwele yonga isuma iya kaci iili nu mwaka onga, makilogilamu yatatu na afu yakwe fulaulo umusuma umusaakanye na mafuta ukuya upe wa ngano, alino ni cipimo conga pa vipimo vitatu vyakwe lita wa mafuta; 11 nupya simapepo aakusangulula umuntu wiyo, alamupeela kuli Yeova kumwi ni vya upe pa mulyango wi tenti lya kupepelapo. 12 Simapepo alatola suuku wenga nu kumupeela ukuya ilambo lya pa mulandu kumwi ni cipimo conga pa vipimo vitatu vyakwe lita wa mafuta, nupya alavizulunzya ukuya upe wa kuzulunzya kuli Yeova. 13 Nupya alakomela suuku pa ncende ino ilambo lya pa luyembu ni lambo lya koca vikakomelwapo, kuli kuti umu ncende ya muzilo, pano ilambo lya pa mulandu i lyakwe simapepo, wakwe vino caya na pi lambo lya pa luyembu. Ilambo lilyo i lya muzilo sana.

14 “Lyene simapepo alatola uwazi umwi uwi lambo lya pa mulandu, nu kupaka uku nsongo yi kutwi lya kwi lunji ilya muntu aakusangululwa alino nu ku cala cakwe ica kwi kasa lya kwi lunji nu ku cikando ca kwi kulu lya kwi lunji. 15 Nupya simapepo alatola mafuta yamwi nu kuitila umwi kufi lyakwe ilya kuli cimani. 16 Lyene alatimpika umunwe wakwe uwa kwi lunji umu mafuta ali umwi kufi lyakwe ilya kuli cimani nupya alasansa mafuta yamwi ukuomvya umunwe wakwe imiku 7 pa nkoleelo yakwe Yeova. 17 Nupya alatola mafuta yamwi asyala umwi kufi lyakwe nu kupaka ku nsongo ya kwi kutwi lya kwi lunji ilya muntu aakusangululwa nu ku cala ca kwi kasa lya kwi lunji alino nu ku cikando ca kwi kulu lya kwi lunji papela ya wazi uwi lambo lya pa mulandu. 18 Simapepo alatola mafuta asyala umwi kufi lyakwe nu kuika pa mutwe wa muntu aakusangululwa, nupya alafuuta uluyembu lwa muntu wiyo pa nkoleelo yakwe Yeova.

19 “Simapepo alapeela ilambo lya pa luyembu nupya alafuuta uluyembu lwa muntu aakusangululwa, lyene pa cisila ilambo lya koca lilakomwa. 20 Nupya simapepo alapeela ilambo lya koca nu upe wa ngano pa ulambo, nupya alafuuta nu luyembu lwa muntu wiyo, alino alaya u musanguluke.

21 “Lelo ndi cakuti aakusangululwa umupiina nupya atakweti ivintu vivyo, lyene alatola suuku wenga ukuya ilambo lya pa mulandu pakuti uye upe wa kuzulunzya, pakuti uluyembu lwa muntu wiyo lufuutwe, afwile nu kupeela kilogilamu wenga wakwe fulaulo umusuma umusaakanye na mafuta ukuya upe wa ngano, kumwi ni cipimo conga pa vipimo vitatu ica muli lita wa mafuta, 22 alino ni nkunda ziili nanti vipeele viili, kulingana na vino akweti. Conga cilaya ici lambo lya pa luyembu cuze naco cilaya ici lambo lya koca. 23 Pa wanda uwalenga 8, alavileta kuli simapepo pakuti asangululwe pa mulyango wi tenti lya kupepelapo pa nkoleelo yakwe Yeova.

24 “Simapepo alatola suuku uwi lambo lya pa mulandu alino na mafuta, nupya alavizulunzya ukuya upe wa kuzulunzya pa nkoleelo yakwe Yeova. 25 Lyene alakoma suuku uwi lambo lya pa mulandu, nupya simapepo alatola uwazi umwi uwi lambo lya pa mulandu nu kupaka uku nsongo yi kutwi lya kwi lunji ilya muntu aakusangululwa alino nu ku cala cakwe ica kwi kasa lya kwi lunji nu ku cikando ca kwi kulu lya kwi lunji. 26 Simapepo alitila mafuta yamwi umwi kufi lyakwe ilya kuli cimani, 27 nupya alasansa mafuta yamwi aali umwi kufi lyakwe ilya kuli cimani imiku 7 pa nkoleelo yakwe Yeova ukuomvya umunwe wa kwi kasa lya kwi lunji. 28 Lyene simapepo alatola mafuta yamwi asyala umwi kufi lyakwe nu kuika uku nsongo yi kutwi lya kwi lunji ilya muntu aakusangululwa nu ku cala ca kwi kasa lya kwi lunji alino nu ku cikando ca kwi kulu lya kwi lunji paapa kwene pano wali wika uwazi uwi lambo lya pa mulandu. 29 Lyene simapepo alatola mafuta asyala umwi kufi lyakwe nu kuika pa mutwe wa muntu aakusangululwa, pakuti amufuutile uluyembu pa nkoleelo yakwe Yeova.

30 “Alapeela ivipeele viili nanti inkunda ziili, ukulingana na vino angakwanisya, 31 conga cilaya ilambo lya pa luyembu, cuze naco cilaya ilambo lya koca, alavipeelela pamwi nu upe wa ngano; nupya simapepo alafuuta uluyembu lwa muntu aakusangululwa pa nkoleelo yakwe Yeova.

32 “Vikwene avino mulinzile ukulondela pali wino walwile tembwe aatanga akwanisye ukupeela malambo aakulondekwa lino akusangululwa.”

33 Lyene Yeova wanenyile Mose na Aloni ati: 34 “Lino mulafika umu mpanga ya Kenani ino nkumupeela ukuya impanga inu, nga naleka ing’anda yakwe umwi yakwata ulwale wakwe tembwe, 35 umwineco wa ng’anda iiyo ace aye kuli simapepo nu kumunena ukuti, ‘Umu ng’anda yane muli vimwi ivikowele.’ 36 Simapepo alalanda ukuti yafumyemo iviya ivilimo lino atatala waya umu kuiceeceta, pakuti atalanda ukuti vyonsi ivili umu ng’anda ivikowele; lyene pa cisila alaya akingile umu ng’anda iiyo nu kuiceeceta. 37 Alaceeceta incende ikowele, nupya ndi cakuti iviumba vya ng’anda ivikwata vyakwe yelo na gilini nanti iviyenzulukile nupya vikuloleka ukuti ivilya iciumba, 38 lyene simapepo alafumamo nu kuiyala pa manda 7.

39 “Lyene simapepo alaswilila pa wanda uwalenga 7 nu kuyaceeceta ing’anda iiyo. Ndi cakuti ukukowela ikusalangana uku viumba vya ng’anda, 40 simapepo alalanda ukuti yafumye mawe akowele aku ng’anda iiyo nu kuyasumbila kunzi ya musumba uku ncende ikowele. 41 Lyene simapepo alaleka ukuti yapale ningo iviumba vya mu ng’anda, nupya vyonsi vino yalapala yalavisumbila kunzi ya musumba uku ncende ikowele. 42 Lyene yaliika mawe yauze muno mwali mawe yano yafumizye, nupya yalaomvya ivu lyuze nu kutakaasa iviumba vya ng’anda.

43 “Lelo ndi cakuti ukukowela kwawela pa cisila ca kufumya amawe nu kupala iviumba alino nu kuvitakaasa, 44 lyene simapepo alingila nu kuiceeceta. Ndi cakuti ukukowela ikusalangana umu ng’anda, ale muli tembwe umwipisye. Ing’anda iiyo ale iikowele. 45 Lyene simapepo alaleka ukuti iongololwe, kuli kuti mawe, imbao, ni ivu lyonsi ilili uku ng’anda nu kuvitwala ukunzi ya musumba ku ncende ikowele. 46 Lelo wensi uwingilamo mu manda yano yaiyala alaya umukowele ukufika manguzi; 47 nupya wensi uwalaalamo alinzile ukufula ivyakuzwala vyakwe, na wensi uwaliilamo alinzile ukufula ivyakuzwala vyakwe.

48 “Lelo ndi cakuti simapepo waya umu ng’anda iiyo nu kulola ukuti ivikowele vitasalangine pa cisila ca kutakaasa iviumba, alalanda ukuti iisanguluke, pano ala ukukowela iikusila. 49 Pa kusangulula ing’anda ikowele, ace atole ivyunyi viili, kamusambo ka mukedali, insalu iyenzu na kamuti kakwe isopu. 50 Ace akomele icunyi conga umu nsembo umuli manzi aatafilwe umu luzi ulukupita. 51 Lyene alatola kamusambo ka mukedali, kamuti kakwe isopu, insalu iyenzu ni cunyi ica umi nu kuvitimpika umu wazi wa cunyi icaticikomelwa umu manzi atiyatapwa umu luzi ulukupita, nupya afwile ukusansa uwazi uku ng’anda iiyo imiku 7. 52 Nupya alasangulula ing’anda ikowele ukuomvya uwazi wa cunyi, amanzi atiyatapwa umu luzi ulukupita, icunyi ica umi, kamusambo ka mukedali, kamuti kakwe isopu, ni nsalu iyenzu. 53 Lyene alaleka icunyi ca umi ukuya umu mpanga, ukucita vivyo kulalenga afumye uluyembu umu ng’anda, nayo ilaya isanguluke.

54 “Vikwene avino mulinzile ukulondela pa ulwale onsi wakwe tembwe, ulwale wa ku nkanda ya ku mutwe nanti pa cilezu, 55 tembwe wa ku vyakuzwala nanti umu ng’anda, 56 alino ni ndwala zya kuvimba pa mwili, ivilonda ivyumilile ivili nu ufila, ni vilonda vya kuipuukila, 57 pakuti cimanyikwe ndi cakuti icintu cimwi i cikowele nanti i cisanguluke. Vikwene avino mulinzile ukulondela pa ulwale wakwe tembwe.”

15 Yeova watwalilile ukunena Mose na Aloni ati: 2 “Nenini Aina Izlaeli muti, ‘Ndi cakuti umonsi akufuma vimwi uku onsi, vilamulenga ukuya umukowele. 3 Alaya umukowele pa mulandu na vino vikufuma muli aliwe, nanti vyatwalilila ukufuma uku vya nzwalo vyakwe nanti vyacilikilwa, nalyo kwene alaya umukowele.

4 “‘Icintu icili consi pano aakufuma vimwi walaala, cilaya icikowele na consi cino wikalapo cilaya icikowele. 5 Umuntu uwakumya pali cino umuntu wiyo akalaalapo alinzile ukufula ivyakuzwala vyakwe, afwile ukufulala nupya alaya umukowele ukufika manguzi. 6 Ali wensi uwikala pali cino aakufuma vimwi wali wikalapo afwile ukufula ivyakuzwala vyakwe nu kufulala nupya alaya umukowele ukufika manguzi. 7 Wensi uwakumya aakufuma vimwi, afwile ukufula ivyakuzwala vyakwe nu kufulala, nupya alaya umukowele ukufika manguzi. 8 Ndi cakuti aakufuma vimwi waswila umuntu umwi umusanguluke, umuntu wiyo afwile ukufula ivyakuzwala vyakwe nu kufulala nupya alaya umukowele ukufika manguzi. 9 Ni ca kwikalapo consi cino aakufuma vimwi wikalapo ica kuomvya pi tundu lya nyama cilaya icikowele. 10 Wensi uwakumya icili consi cino aakufuma vimwi wali atenzipo alaya umukowele ukufika manguzi, nupya wensi uwasenda ivintu vivyo alafula ivyakuzwala vyakwe nu kufulala, nupya alaya umukowele ukufika manguzi. 11 Ndi cakuti aakufuma vimwi atafulile ku makasa nupya wakumya umwi, umuntu wiyo alinzile ukufula ivyakuzwala vyakwe nu kufulala, nupya alaya umukowele ukufika manguzi. 12 Iciviya consi cino yamata ni ivu cino aakufuma vimwi wakumya cifwile ukutamoolwa, ni civiya consi cino yapangila ni mbao cino wakumyako cilinzile ukufulwa na manzi.

13 “‘Ndi cakuti ivikufuma vyata, nupya umuntu waya umusanguluke, alalolela manda 7 aakusangululwa kwakwe, nupya alinzile ukufula ivyakuzwala vyakwe nu kufulala umu manzi atiyatapwa umu luzi ulukupita, alino alaya umusanguluke. 14 Pa wanda uwalenga 8, afwile ukutola inkunda ziili nanti vipeele viili nu kuya pa nkoleelo yakwe Yeova pa mulyango wi tenti lya kupepelapo nu kuvipeela kuli simapepo. 15 Nupya simapepo alavipeela ukuya ilambo, conga cilaya i lambo lya pa luyembu cuze naco cilaya i lambo lya koca, nupya alamufuutila nu luyembu pa nkoleelo yakwe Yeova pa mulandu na vino vyafumanga kuli aliwe.

16 “‘Ndi cakuti umonsi wafumya manzi ya onsi, alinzile ukufulala umwili onsi nupya alaya umukowele ukufika manguzi. 17 Alinzile ukufula icakuzwala icili consi na consi icapangilwa ni mpapa apatonela manzi ya onsi, nupya vilaya ivikowele ukufika manguzi.

18 “‘Ndi cakuti umonsi walaala nu mwanaci nupya wafumya manzi ya onsi, yonsi yoili yafwile ukufulala nupya yalaya aakowele ukufika manguzi.

19 “‘Ndi cakuti umwanaci ali ku mwezi, alatwalilila ukuya umukowele pa manda 7. Wensi uwamukumya alaya umukowele ukufika manguzi. 20 Consi cino walaalapo lino ali ku mwezi cilaya icikowele, na consi cino wikalapo naco kwene cilaya icikowele. 21 Wensi uwakumya bedi wino aali uku mwezi akulaalapo afwile ukufula ivyakuzwala vyakwe nu kufulala, nupya alaya umukowele ukufika manguzi. 22 Wensi uwakumya cino ali ku mwezi iwikalapo alinzile ukufula ivyakuzwala vyakwe nu kufulala, nupya alaya umukowele ukufika manguzi. 23 Ndi cakuti ali ku mwezi iwikala pali bedi nanti pa cintu cuze, lyene umwi wakumya ku vintu vivyo, alaya umukowele ukufika manguzi. 24 Nupya ndi cakuti umonsi walaala nu mwanaci wiyo, nu wazi wa ku mwezi wasyala kuli aliwe, umonsi wiyo alaya umukowele pa manda 7, na bedi yonsi ino walaalapo ilaya iikowele.

25 “‘Ndi cakuti umwanaci wafuma uwazi pa manda aingi lino asi ku mwezi, nanti nga wafuma uwazi ukucila pa manda ya ku mwezi, alaya umukowele umu manda yonsi yano akufuma uwazi, wakwe vino cikaya umu manda yano ali ku mwezi. 26 Bedi yonsi ino walaalapo umu manda yano akufuma uwazi ilaya wakwe bedi ino akalaalapo lino ali ku mwezi, na consi cino wikalapo cilaya icikowele, wakwe vino cikaya lino ali ku mwezi. 27 Wensi uwakumya ivintu vivyo alaya umukowele, alinzile ukufula ivyakuzwala vyakwe nu kufulala, nupya alaya umukowele ukufika manguzi.

28 “‘Lelo ndi cakuti uwazi wata ukufuma, alalolela manda 7, nupya pa cisila alaya umusanguluke. 29 Pa wanda uwalenga 8, alinzile ukutola inkunda ziili nanti ivipeele viili nu kuvitwala kuli simapepo pa mulyango wi tenti lya kupepelapo. 30 Simapepo alapeela conga ukuya ilambo lya pa luyembu ni cuze naco ukuya ilambo lya koca, nupya alafuuta uluyembu lwa mwanaci wiyo pa nkoleelo yakwe Yeova pali vino wali umukowele lino wafumanga uwazi.

31 “‘Vikwene avino mufwile ukwavwa Aina Izlaeli ukuya aasanguluke, pakuti yataca yafwe pa mulandu nu kukowezya icikuulwa ca muzilo, icili pakasi kao.

32 “‘Vikwene avino mufwile ukulondela ku monsi aakufuma vimwi uku onsi, ku monsi umukowele pa mulandu wa kufumya manzi ya onsi, 33 ku mwanaci ali ku mwezi, ku monsi ali wensi nanti umwanaci aakufuma vimwi uku mwili, nu ku monsi uwalaala nu mwanaci umukowele.’”

16 Yeova walanzile na Mose pa cisila ca mfwa yakwe ya mwana Aloni aonsi yaili aafwile pa mulandu wa kupalama kuli Yeova umu nzila ino ataazumilizye. 2 Yeova wanenyile Mose ati: “Nena Aloni umwina wako ukuti ataingila umu muputule wa muzilo sana,* pa nsita ili yonsi ino akulonda, kuli kuti pa nkoleelo ya ntupiko ya Upangano, pakuti ataca afwe, pano ndaalolekela pa ntupiko umwi kumbi.

3 “Vino Aloni alinzile ukwiza navyo lino akwingila umu ncende ya muzilo aevi: cipambasi uwi lambo lya pa luyembu na suuku uwi lambo lya koca. 4 Alinzile ukuzwala umwingila wa muzilo uwa nsalu isuma, na kaputula wa nsalu isuma, nupya alinzile nu kuzwala umusipi wa nsalu isuma alino ni citambala ca nsalu isuma. Ivyakuzwala vivyo i vya muzilo. Ace afulale uku mwili alino azwale ivyakuzwala vivyo.

5 “Alinzile ukutola ya sawe yaili ukufuma uku Ina Izlaeli ayi lambo lya pa luyembu alino na suuku wenga uwi lambo lya koca.

6 “Aloni afwile ukupeela cipambasi ukuya ilambo lya pa luyembu lwakwe, nupya alinzile ukufuuta uluyembu lwakwe ni membu zyakwe yayo amu ng’anda yakwe.

7 “Lyene alatola imbuzi ziili nu kuziimika pa nkoleelo yakwe Yeova pa mulyango wi tenti lya kupepelapo. 8 Aloni alapendoola pa mbuzi zizyo, imbuzi yonga ilaya iyakwe Yeova yuze nayo ilaya iya kusenda imembu zya yantu.* 9 Aloni alatola imbuzi ino iyapendoola ukuti iye iyakwe Yeova, nupya alaipeela ukuya ilambo lya pa luyembu. 10 Lelo imbuzi ino iyapendoola ukuti iye iya kusenda imembu zya yantu, ifwile ukuletwa ale iya umi pa nkoleelo yakwe Yeova pakuti iye iya kufuutilako imembu, alino nu kuileka ukuti iye umu lwanga isende imembu zya yantu.

11 Aloni alapeela cipambasi ukuya ilambo lya pa luyembu lwakwe nu luyembu lwakwe yayo amu ng’anda yakwe; pa cisila alakoma cipambasi uwa kupeela pa luyembu lwakwe.

12 “Lyene alatola ica kulemelako umoto icaticizula umoto wa malasya uufumile pa ulambo pa nkoleelo yakwe Yeova, nupya alatapula ivinunkile ukuzuuzya makufi yaili, nu kuvitwala umu muputule wa muzilo sana. 13 Nupya aliika ivinunkile pa moto pa nkoleelo yakwe Yeova, nupya icunsi ca vinunkile cilavimba intupiko ya Mbokosi ya Upangano, pakuti ataca afwe.

14 “Alatola uwazi umwi wakwe cipambasi nu kuusansa ukuomvya umunwe uku nkoleelo ya ntupiko uku ufumondaka, nupya alasansa uwazi umwi imiku 7 pa nkoleelo ya ntupiko ukuomvya umunwe.

15 “Lyene alakoma imbuzi yi lambo lya pa luyembu, iya kupeela pa luyembu lwa yantu, nupya alatwala uwazi umu muputule wa muzilo sana, nupya viivi kwene vino alacita uku wazi wakwe cipambasi avino alacita nu ku wazi wa mbuzi, alasansa uwazi uwo lwa pa nkoleelo ya ntupiko.

16 “Ace afuute uluyembu umu ncende ya muzilo pa mulandu ni vicitwa vya Ina Izlaeli vikowele na pa mulandu nu kuluvyanya kwao alino ni membu zyao, wene avino alinzile ukucita ukwi tenti lya kupepelapo ilyaya pakasi ka Ina Izlaeli aakacita ivintu ivikowele.

17 “Kusi umuntu alinzile ukwingila umu ncende ya kupepelapo pa nsita ino Aloni alafuuta uluyembu umu ncende ya muzilo suka ace afume. Alafuuta uluyembu lwakwe ni membu zyakwe yayo amu ng’anda yakwe, nupya alafuutilako na Ina Izlaeli yonsi imembu zyao.

18 “Lyene alafuma umu muputule wa muzilo sana nu kuya uku ulambo uli pa nkoleelo yakwe Yeova, alausangulula, nupya alatola uwazi umwi wakwe cipambasi nu wazi wa mbuzi nu kuwika uku mpembe zya ulambo umu mbali zyonsi. 19 Nupya alasansa uwazi umwi imiku 7 uku ulambo ukuomvya umunwe nupya alausangulula uku vicitwa vya Ina Izlaeli ivikowele.

20 “Ndi cakuti wamala ukusangulula incende ya muzilo, itenti lya kupepelapo alino nu ulambo, alapeela ni mbuzi ili nu umi. 21 Aloni aliika makasa yakwe yaili pa mutwe wa mbuzi iiyo nu kusokolola iviipe vya Ina Izlaeli, kuluvyanya kwao konsi ni membu zyao zyonsi, cilaya kwati wika imembu zizyo zyonsi pa mutwe wa mbuzi, lyene alapeela imbuzi iiyo uku muntu uwasoololwa, pakuti aitwale umu lwanga. 22 Nawe alaleka ukuti imbuzi iiyo ipite, nupya ilasenda imembu zyonsi izya Ina Izlaeli umu lwanga.

23 “Lyene Aloni alingila umwi tenti lya kupepelapo nupya alazuula ivyakuzwala ivisuma vino walazwite pa kwingila umu muputule wa muzilo sana, nupya alavisya mumu kwene. 24 Alinzile ukufulalila uku mwili umu ncende ya muzilo nu kuzwala ivyakuzwala vyakwe; lyene alafuma nu kupeela ilambo lyakwe ilya koca alino ni lambo lya koca ilya Ina Izlaeli, alafuuta nu luyembu lwakwe nu kufuutilako Aina Izlaeli imembu. 25 Aloca mafuta yi lambo lya pa luyembu pa ulambo.

26 “Uwatwazile imbuzi ya kusenda imembu umu lwanga, alinzile ukufula ivyakuzwala vyakwe nu kufulala uku mwili, lyene pa cisila angaya umu nkambi.

27 “Nupya cipambasi uwi lambo lya pa luyembu ni mbuzi yi lambo lya pa luyembu vino yafumizyemo uwazi nu kuutwala umu ncende ya muzilo kuti uomviwe uku kufuuta uluyembu, vilatwalwa ukunzi ya nkambi, nupya impapa, iminyefu na citindi wa nyama zizyo vilociwa umu moto. 28 Uoca ivintu vivyo alinzile ukufula ivyakuzwala vyakwe nu kufulala uku mwili, lyene pa cisila alino angaya umu nkambi.

29 “Isunde ilya manda pe lino mulaalondela aeli: Umu mwezi uwalenga 7, pa wanda uwalenga 10, mulinzile ukuikaanya,* nupya mutalinzile ukuomba umulimo uli onsi, asi mulandu a mwemwe nanti umuntu aakaikala namwe uwafuma uku mpanga yuze. 30 Pa wanda kwene uu ali pano imembu zinu zilaafuutwa, pakuti muye aasanguluke. Mulaya asanguluke kuli Yeova uku membu zinu zyonsi. 31 Lilaya isabata lya kupuuza kuli mwemwe, nupya mulinzile ukuikaanya. Lii i sunde lya manda pe.

32 “Simapepo aakwitulwilwa mafuta, nupya aakusontwa ukuti aye simapepo mukalamba pakuti apyane isi, alaomba umulimo wa kufuuta imembu nupya alazwala ivyakuzwala ivya nsalu isuma, kuli kuti ivyakuzwala vya muzilo. 33 Alasangulula incende ya muzilo sana, itenti lya kupepelapo nu ulambo; nupya alafuuta imembu zyakwe ya simapepo alino ni membu zya Ina Izlaeli yonsi. 34 Lii lilaya isunde lya manda pe kuli mwemwe, pakuti imembu zya Ina Izlaeli yonsi zice zyafuutwa umuku onga pa mwaka.”

Aloni wacisile viivi kwene vino Yeova wanenyile Mose.

17 Yeova wanenyile Mose ati: 2 “Nena Aloni na ana yakwe aonsi na Ina Izlaeli yonsi uti, ‘Yeova walanda wati:

3 “‘“Ndi cakuti umuntu ali wensi Umwina Izlaeli wakoma cipambasi nanti suuku nanti imbuzi umu nkambi nanti wakomela inyama iiyo ukunzi ya nkambi, 4 mu cifulo ca kuitwala pa mulyango wi tenti lya kupepelapo nu kuipeela ukuya ilambo kuli Yeova pa nkoleelo ya cikuulwa ca muzilo cakwe Yeova, umuntu wiyo alaya nu mulandu wa wazi. Ale watakoma inyama umu nzila iitazumiliziwa, nupya afwile ukukomwa umu Ina Izlaeli. 5 Cilinzile ukuya vivyo pakuti Aina Izlaeli yate ukukomela inyama umu mpanga, lelo yace yazitwala kuli Yeova pa mulyango wi tenti lya kupepelapo kuli simapepo. Yace yapeela inyama zizyo ukuya malambo ya mutende kuli Yeova. 6 Nupya simapepo alasansa uwazi pa ulambo wakwe Yeova pa mulyango wi tenti lya kupepelapo, aloca na mafuta kuti yaye upe uununkile kuli Yeova. 7 Fwandi yafwile ukuleka ukupeela malambo ku viwa ivyaya wa mbuzi vino yakapepa. Lii lilaya isunde lya manda pe uku nkulo zinu zyonsi.”’

8 “Ulinzile ukuyanena ukuti, ‘Umuntu wensi Umwina Izlaeli nanti wensi uwafuma uku mpanga yuze aakaikala namwe uwapeela ilambo lya koca nanti ilambo ilili lyonsi 9 nupya atalitwazile pa mulyango wi tenti lya kupepelapo ukuti akalipeele kuli Yeova, alinzile ukukomwa.

10 “‘Ndi cakuti umuntu ali wensi Umwina Izlaeli nanti ali wensi uwafuma uku mpanga yuze aakaikala namwe walya uwazi uli onsi, ndakana umuntu wiyo nupya ndamukoma. 11 Pano umi wa ciumbwa waya umu wazi, nupya naamupeela uwazi kuti mwawika pa ulambo pakuti imembu zinu zingelelwa, pano uwazi uukafuuta imembu pa mulandu wakuti umu wazi u mwaya umi.” 12 Ali cino nkunenela Aina Izlaeli ukuti: “Kusi ali wensi muli mwemwe afwile ukulya uwazi, nupya kusi uwafuma ku mpanga yuze aakaikala namwe aafwile ukulya uwazi.”

13 “‘Ndi cakuti Umwina Izlaeli umwi nanti uwafuma uku mpanga yuze aakaikala namwe akulunga nupya walema inyama ya mpanga nanti icunyi ivingaliiwa, alinzile ukufumyamo uwazi nu kuuziika. 14 Umi wa ciumbwa consi u wazi, pano umi waya mu wazi. Acino naneniile Aina Izlaeli ukuti: “Mutalinzile ukulya uwazi wa ciumbwa icili consi pa mulandu wa kuti umi wa ciumbwa icili consi u wazi. Umuntu wensi uwalya uwazi alinzile ukukomwa.” 15 Ndi cakuti Umwina Izlaeli ali wensi nanti umuntu uwafuma uku mpanga yuze walya inyama iyatiifwila nanti iyatikomwa uku cilyanyi, afwile ukufula ivyakuzwala vyakwe nu kufulala nupya alaya umukowele ukufika manguzi; lyene alino alaya u musanguluke. 16 Lelo ndi cakuti atafuzile ivyakuzwala vyakwe nu kufulala, alafululwa.’”

18 Yeova watwalilile ukunena Mose ati: 2 “Nena Aina Izlaeli uti, ‘Nene Yeova Leza winu. 3 Mutaacita wakwe vino antu ya mu mpanga iya Ijipti ino mwikalangamo yakacita, nupya mutaacita wakwe vino antu ya mu mpanga ya Kenani yakacita, kuli kuti impanga ino nkumutwalamo. Nupya mutaalondela intambi zyao. 4 Mwalondela nu kusunga masunde yane, nene Yeova Leza winu. 5 Mulinzile ukulalondela masunde yane; wensi akulondela masunde yane alaya nu umi. Nene Yeova.

6 “‘Kusi umonsi ali wensi muli mwemwe aafwile ukupanga icupo na lupwa wakwe. Nene Yeova. 7 Utalinzile ukupanga icupo na ya tata yako, nupya utalinzile ukupanga icupo na ya mayo yako. Pano yene aa mayo yako, nupya utalinzile ukupanga icupo nayo.

8 “‘Utalinzile ukupanga icupo na muka ya tata yako. Pano ala ukuzewanya ya tata yako.

9 “‘Utalinzile ukupanga icupo na kaci wako, aye a mwana ya tata yako nanti ya mayo yako, asi mulandu mwavyalwa nawe umu ng’anda ili imwi nanti foo.

10 “‘Utalinzile ukupanga icupo nu mwizikulu wako umukazyana uwafuma umu mwanako umonsi nanti uwafuma umu mwanako umukazyana, pano ukucita vivyo ale ukuizewanya.

11 “‘Utafwile ukupanga icupo nu mukazyana uwavyalwa umu muci wakwe ya tata yako, umwana wakwe ya tata yako, pano wene a kaci wako.

12 “‘Utalinzile ukupanga icupo na kaci wakwe ya tata yako. Pano a lupwa umupalamisye wakwe ya tata yako.

13 “‘Utalinzile ukupanga icupo na kaci wakwe ya mayo yako, pano a lupwa umupalamisye wakwe ya mayo yako.

14 “‘Utalinzile ukupanga icupo nu muci wa mwina wakwe ya tata yako. Pano aa mayo yako.

15 “‘Utalinzile ukupanga icupo na nyokovyala. Pano wene umuci wa mwanako.

16 “‘Utalinzile ukupanga icupo nu muci wa mwinako, pano ale ukuzewanya umwinako.

17 “‘Utalinzile ukupanga icupo nu mwana umukazyana wakwe mamako. Nupya utalinzile ukupanga icupo nu mwizikulu wakwe mamako uwavyalwa umu mwanakwe umonsi nu mukazyana uwafuma umu mwanakwe umukazyana. Pano aa lupwa yako aapalamisye, nupya i ca winyi ukucita vivyo.

18 “‘Utalinzile ukutola umuto nanti nyinalenzi wakwe mamako kuti aye a mamako wakwe ciili, nupya utalinzile ukupanga nawe icupo lino mamako acili nu umi.

19 “‘Utalinzile ukupanga icupo nu mwanaci lino ali ku mwezi.

20 “‘Utalinzile ukupanga icupo nu muci wa muzo, pano ukucita vivyo ale ukuikowezya.

21 “‘Utalinzile ukuleka ukuti umwanako ali wensi apeelwe kuli Moleki. Nupya utalinzile ukukowezya izina lyakwe Leza wako umu nzila iiyo. Nene Yeova.

22 “‘Utalinzile ukupanga icupo nu monsi muzo wakwe vino ungapanga icupo nu mwanaci. Pano icintu cico i ca winyi.

23 “‘Umonsi atalinzile ukulaala ni nyama, pano cico cingalenga aye umukowele, nu mwanaci kwene atalinzile ukulaala ni nyama. Pano cico cisi ca civyalilwa.

24 “‘Mutaaikowezya uku vintu vivyo, pano vikwene i vyakowezya inko zino nkuzinga umu mpanga ino mukuyako. 25 Impanga iiyo iikowele, nupya ndafulula antu akaikalamo pa mulandu ni vicitwa vyao iviipe, yalazingwa nu mu mpanga iiyo. 26 Lelo mwemo mulinzile ukulakonka masunde yane, mutalinzile ukulacita ivintu vivyo ivya winyi, mwemwe kwene kumwi na afuma ku mpanga zyuze yano yakaikala namwe. 27 Pano ivintu vivyo ali vino antu aakaikala umu mpanga ino mukuyako yakacita, nupya ndakai impanga iiyo iikowele. 28 Mwemo mutalazingwa umu mpanga iiyo pa mulandu wa kuikowezya wakwe vino inko izili umu mpanga iiyo zikuzingwa. 29 Wensi aakucita ivintu vivyo ivya winyi, alinzile ukukomwa. 30 Mulinzile ukulalondela masunde yane ukupitila umu kukanacita intambi zya winyi zino antu yayo yakacita, pakuti mutaya aakowele pa mulandu wa kucita ivintu vivyo. Nene Yeova Leza winu.’”

19 Nupya kwene Yeova wanenyile Mose ati: 2 “Nena Aina Izlaeli yonsi uti, ‘Mufwile ukuya amuzilo, pano ne Yeova Leza winu, nene wa muzilo.

3 “‘Umuntu wensi muli mwemwe alinzile ukucindika nyina na isi, nupya mulinzile ukusunga masabata yane. Nene Yeova Leza winu. 4 Mutaapepa ya leza ya sile sile nanti ukuipangila ya leza ya vyela ivyengululwe. Nene Yeova Leza winu.

5 “‘Ndi cakuti mukupeela ilambo lya mutende kuli Yeova, mufwile ukulipeela umu nzila iizumiliziwe pakuti Leza alipokelele. 6 Lifwile ukuliiwa pa wanda uno mukulipeela na pa wanda uwalondelelapo, lelo ivyasyala ukufika pa wanda wakwe citatu mufwile ukuvyoca umu moto. 7 Lelo ndi cakuti inyama ili yonsi iya kwi lambo lilyo yaliiwa pa wanda wakwe citatu, ala ilambo lilyo ilya winyi nupya litanga lipokelelwe. 8 Uwalya ilambo lilyo alafululwa pano ala watasuula ica muzilo cakwe Yeova, nupya alakomwa.

9 “‘Lino mukuzombola ivyakulya vinu umu calo, mutalinzile ukumala vyonsi ivya mu mbali ya calo nupya mutafwile ukutolelezya ivyasyala. 10 Mutalinzile ukukolonganika imyangazi iyatisyala umu calo nanti ukutola iyatipona pansi. Mufwile ukusiila apiina na afuma ku mpanga zyuze. Nene Yeova Leza winu.

11 “‘Mutalinzile ukwiya, kubepa, nanti ukucenjezyanya. 12 Mutalinzile ukulapila umwi zina lyane lino mukubepa, pano ale mukusaalula izina lyakwe Leza winu. Nene Yeova. 13 Utalinzile ukucenjezya umuzo, nupya utalinzile ukupokolola umwi ivintu uku maka. Utalinzile ukusunga malipilo ya muomvi wako usiku onsi ukufika katondo.

14 “‘Utalinzile ukutiipwila cipuuli nanti ukwika ica kupumikako pa nkoleelo ya mpafu, nupya ufwile uwatiina Leza wako. Nene Yeova.

15 “‘Utalinzile ukuya nu lufyengo pa kupingula. Utalinzile ukuya na kapatulula uku mupiina nanti ukucindikisya umukankala. Uwaya nu mulinganya lino ukupingula umuntu muzo.

16 “‘Utalinzile ukulapitaana ale ukusalanganya ilyasi lya ufi umu yantu yako. Utafwile ukucita icingalenga umi wa muzo ukuya umu uzanzo. Nene Yeova.

17 “‘Utafwile ukupata umwinako umu mwenzo. Ufwile ukulungika umuzo pakuti naawe utayembuka wakwe aliwe.

18 “‘Utaalandula nanti ukutwalilila ukupata antu yauzo, nupya uwatemwa umuzo wakwe vino waitemwa. Nene Yeova.

19 “‘Mulinzile ukulasunga masunde yane: Mutalinzile ukuleka imisango iili iya viteekwa ivipusane ukukwelana. Mutalinzile ukukomela imisango iili iya mbezu umu calo conga, nupya mutalinzile ukuzwala icakuzwala icapangilwa ni misango iili yakwe kotoni.

20 “‘Ndi cakuti umonsi walaala nu mwanaci nupya umwanaci wiyo u muomvi wa monsi muze, lelo atatala wakululwa nanti ukupeelwa untungwa, yonsi yoili yafwile ukufululwa. Lelo yatafwile ukukomwa, pano ale umwanaci atatala wakululwa. 21 Umonsi afwile ukutwala suuku wi lambo lya pa mulandu kuli Yeova pa mulyango wi tenti lya kupepelapo. 22 Simapepo alamufuutila uluyembu ukuomvya suuku wi lambo lya pa mulandu pa nkoleelo yakwe Yeova pa luyembu luno wacisile, nupya alelelwa uluyembu luno wacisile.

23 “‘Lino mulafika umu mpanga ino mukuyamo nu kulema imiti ya vizao vyakulya, mufwile ukulalola ivizao vivyo ukuti i vikowele nupya i viindwe. Pa myaka itatu vilaya iviindwe. Vitafwile ukuliiwa. 24 Lelo umu mwaka uwalenga 4, ivizao vyonsi ivya ku muti uwo vilaya ivya muzilo, nupya mulavipeela kuli Yeova ni nsansa. 25 Lyene umu mwaka uwalenga 5, mungalya ivizao vya ku miti iiyo nupya vino mulazombola vilavulilako. Nene Yeova Leza winu.

26 “‘Mutafwile ukulya icili consi icikwetimo uwazi.

“‘Mutafwile ukusapola nanti ukucita ivinjelengwe.

27 “‘Mutaapela inyele umu mbali ya mitwe inu nanti ukupela ivilezu umu mbali.

28 “‘Mutalinzile ukuicemboola uku mwili pa mulandu wakuti umuntu watafwa, nupya mutalinzile ukuilemboola uku mili inu. Nene Yeova.

29 “‘Utafwile ukulenga umwanako umukazyana ukuya cizelele pano ala ukumuzewanya, pakuti umu mpanga ino mukuyamo mutazuula ucizelele ni miyele ya winyi.

30 “‘Mwasunga masabata yane, nupya mwacindika incende yane iya muzilo. Nene Yeova.

31 “‘Mutaaya kuli yano yakauvwana ni mipasi, nupya mutauzya kuli yano yakasapola, pakuti yatamukowezya. Nene Yeova Leza winu.

32 “‘Uwaimilila pali wino aakweti imvwi pa kulanga umucinzi, nupya uwacindika uwikolo nu kutiina Leza wako. Nene Yeova.

33 “‘Ndi cakuti umuntu uwafuma uku mpanga yuze akwikala umu mpanga inu, mutalinzile ukumucuzya. 34 Umuntu uwa ku mpanga yuze aakwikala namwe mulinzile mwamulola wa Mwina Izlaeli muzo; nupya mulinzile ukumutemwa wakwe vino mwaitemwa, pano namwe kwene mwali aenyi umu mpanga ya Ijipti. Nene Yeova Leza winu.

35 “‘Mutalinzile ukuomvya ivipimo vya ucenjezi pa kupima utali, kufina nanti uwingi wa vintu. 36 Mulinzile ukulaomvya masikelo ya cumi, ivya kupimilamo ukufina ivya cumi, vintini vya cumi, ni vya kupimilamo mafuta ivya cumi. Nene Yeova Leza winu uwamufumizye umu mpanga ya Ijipti. 37 Mulinzile ukulasunga masunde yane yonsi nu kuyalondela. Nene Yeova.’”

20 Yeova watwalilile ukunena Mose ati: 2 “Unene Aina Izlaeli uti, ‘Umwina Izlaeli ali wensi nu wafuma uku mpanga yuze ali wensi aakaikala umu Izlaeli uwapeela umwanakwe ali wensi kuli Moleki, alinzile ukukomwa. Antu amu mpanga iiyo yalinzile ukumutama na mawe suka afwe. 3 Ndakana umuntu wiyo nupya ndamukoma, pa mulandu wakuti ala watapeela umwanakwe kuli Moleki nu kukowezya incende yane iya muzilo nupya ala watazewanya izina lyane ilya muzilo. 4 Ndi cakuti antu ya mu mpanga iiyo yasuula uku mufulo sile pali vino umwi watapeela umwanakwe kuli Moleki, nupya yakana nu kumukoma, 5 lyene ale nene kwene ndakana umuntu wiyo kumwi nu lupwa lwakwe. Nupya ndakoma umuntu wiyo kumwi na yonsi aakumulondela umu kupepa kuli Moleki.

6 “‘Ndi cakuti umwi wafilwa ukuya ni cisinka kuli nene pa mulandu wa kuya kuli yano yakauvwana ni mipasi alino na aakasapola, ndakana umuntu wiyo nupya ndamukoma.

7 “‘Mulinzile ukuisangulula nu kuya amuzilo, pano nene Yeova Leza winu. 8 Nupya mulinzile ukulasunga masunde yane nu kuyalondela. Nene Yeova aakumusangulula.

9 “‘Wensi uwatiipwila isi nanti nyina, alinzile ukukomwa. Pa mulandu wakuti watiipwila isi nanti nyina, ala uwazi wakwe uli pali aliwe.

10 “‘Vino cilinzile ukuya uku monsi uwacita ucende na muka mwineco aevi: Uwacita ucende nu muci wa muze alinzile ukukomwa, kuli kuti yoili kwene atiyacita ucende yalinzile ukukomwa. 11 Umonsi uwalaala na muka isi ala wazewanya isi. Alinzile ukukomwa kumwi na muka isi kwene. Uwazi wao ulaya pali aliyo. 12 Ndi cakuti umonsi walaala na nyinavyala, kuli kuti umuci wa mwanakwe, yonsi yoili yalinzile ukukomwa. Pano ala yacita icisi ca civyalilwa. Uwazi wao ulaya pali aliyo.

13 “‘Ndi cakuti umonsi walaala nu monsi muze wakwe vino umwi angalaala nu mwanaci, ale yonsi yoili iyacita icintu ca winyi. Yalinzile ukukomwa. Uwazi wao ulaya pali aliyo.

14 “‘Ndi cakuti umuntu umwi watwala umwanaci kumwi na nyina wa mwanaci wiyo, ala wacita icintu cimwi ica winyi. Yonsi yotatu yalinzile ukuyoca umu moto, pakuti vicitwa vya winyi vitatwalilila muli mwemwe.

15 “‘Ndi cakuti umonsi walaala ni nyama, alinzile ukukomwa nupya mulinzile ukukoma ni nyama kwene iiyo. 16 Ndi cakuti umwanaci waya uku nyama ili yonsi kuti alaale nayo, mulinzile ukukoma umwanaci wiyo kumwi ni nyama. Uwazi wao ulaya pali aliyo.

17 “‘Ndi cakuti umonsi walaala na kaci wakwe uwavyalwa muli isi nanti muli nyina nupya yonsi yalolana ivyanzwalo vyao, ale icintu cico i ca winyi. Yalinzile ukukomelwa pa manso ya yantu. Pano umonsi ale wazewanya kaci wakwe. Alinzile ukufululwa pali vino watacita.

18 “‘Ndi cakuti umonsi wapanga icupo nu mwanaci ali ku mwezi, ale yonsi yatacindike uwazi wa ku mwezi. Yonsi yoili yalinzile ukukomwa.

19 “‘Utalinzile ukulaala na kaci muze wakwe ya mayo yako nanti kaci wakwe ya tata yako, pano ukucita vivyo u kuzewanya lupwa wao umupalamisye. Umuntu uwacita vivyo alinzile ukufululwa kumwi na wiyo kwene uwatalaala nawe. 20 Umonsi uwalaala na muka nyinalume ale wazewanya nyinalume. Yoili kwene yalinzile ukufululwa pa luyembu lwao. Yalinzile ukufwa ukwaula ukukwata umwana. 21 Ndi cakuti umonsi watwala umuci wa mwinakwe, ala wacita icintu iciipisye. Ala wazewanya umwinakwe. Yalinzile ukufwa ukwaula umwana.

22 “‘Mulinzile mwasunga masunde yane yonsi nu kuyalondela, pakuti mutakazingwe umu mpanga ino nkumutwalamo. 23 Mutalinzile ukulondela intambi zino inko zino nkuzinga umu mpanga ino mukuyamo zikalondela; pano antu ya mu nko zizyo yene yakacita ivintu vii vyonsi nupya nayapata sana. 24 Ali mulandu uno nalandiile ukuti: “Mulatola impanga yao, nupya ndaipeela kuli mwemwe kuti iye iinu, kuli kuti impanga umwaya umukaka nu uci. Nene Yeova Leza winu uwamupaatula ukufuma umu yantu yonsi aasyala.” 25 Mulinzile ukupusanya inyama isanguluke ni nyama ikowele, icunyi icikowele ni cisanguluke; mutalinzile ukuikowezya uku nyama nanti uku cunyi nanti uku cili consi icikasela pa musili cino namunena ukuti mwacilola ukuti icikowele. 26 Mulinzile ukuya amuzilo kuli nene, pano ne Yeova, nene wa muzilo, nupya nkumupaatula ukufuma umu yantu yonsi pakuti muye antu yane.

27 “‘Umonsi wensi nanti umwanaci aakauvwana ni mipasi nanti aakasapola, alinzile ukukomwa. Antu yalinzile ukuyatama na mawe suka yafwe. Uwazi wao ulaya pali aliyo.’”

21 Yeova watwalilile ukunena Mose ati: “Nena ya simapepo, kuli kuti ya mwana Aloni uti, ‘Kusi ali wensi alinzile ukuikowezya ku citumbi ca mu yantu yakwe. 2 Lelo angacita vivyo kuli lupwa wakwe umupalamisye, kuli kuti kuli nyina, kuli isi, ku mwanakwe umonsi, ku mwanakwe umukazyana, ku mwinakwe, 3 alino na kuli kaci wakwe umupalamisye aatatala watwalwa. 4 Atalinzile ukuikowezya nu kuizewanya uku mwanaci uwatwalwa uku monsi uwa mu yantu yakwe. 5 Yatalinzile ukupela mapala nanti ukupela ivilezu umu mbali nanti ukuicemboola uku mili yao. 6 Yalinzile ukuya amuzilo kuli Leza wao, nupya yatalinzile ukuzewanya izina lyakwe Leza wao, pano aakapeela malambo ya koca kuli Yeova, kuli kuti upe wa vyakulya uukapeelwa kuli Leza wao, nupya yafwile ukuya amuzilo. 7 Yatafwile ukutwala cizelele, umwanaci uwakoweziwa, nanti umwanaci wino yaata kuli iya, pano simapepo u wa muzilo kuli Leza wakwe. 8 Mulinzile ukulola simapepo ukuti uwa muzilo, pano aliwe akapeela upe wa vyakulya uukapeelwa kuli Leza winu. Mulinzile ukulamulola ukuti uwa muzilo, pano ne Yeova, nemuno nkumisangulula, nene wa muzilo.

9 “‘Ndi cakuti mwana simapepo umukazyana waizewanya pa mulandu wa kuya cizelele, ale wazewanya isi. Mufwile ukumoca umu moto.

10 “‘Simapepo umukalamba pa ina yakwe, wino witulwilwa mafuta uku mutwe nupya uwasontwa ukuzwala ivyakuzwala vyakwe usimapepo, alinzile ukulasaakula inyele nupya atalinzile ukulepoola ivyakuzwala vyakwe. 11 Atalinzile ukupalama uku citumbi ca muntu ali wensi; nupya atafwile ukuikowezya nanti sile u ku citumbi cakwe isi nanti nyina. 12 Atalinzile ukufuma umu ncende ya muzilo nupya atalinzile ukukowezya incende ya muzilo yakwe Leza wakwe, pano icimanyililo ca kuipeela, kuli kuti mafuta ya muzilo yakwe Leza wakwe caya pali aliwe. Nene Yeova.

13 “‘Simapepo afwile ukutwala umwanaci nacisungu. 14 Atalinzile ukutwala mukamfwilwa, umwanaci wino yaata, umwanaci umukoweziwe, nanti cizelele; lelo afwile ukutwala nacisungu ukufuma umu yantu yakwe. 15 Atalinzile ukuzewanya ana yakwe, pano ne Yeova, nene nkusangulula simapepo wiyo.’”

16 Yeova watwalilile ukunena Mose ati: 17 “Nena Aloni uti, ‘umonsi ali wensi umu yana yakwe nu mu nkulo zyao zyonsi ali nu ulema atafwile ukupalama uku ulambo pakuti apeele upe wa vyakulya kuli Leza. 18 Kusi umonsi ali wensi ali nu ulema aafwile ukupalama uku ulambo, kuli kuti umonsi uwapafula, nanti uwalemala, nanti uwalepuka impuno nanti uwatalimpa ikulu lyonga nanti ikasa, 19 umonsi uwavunika ikulu nanti ikasa, 20 uwa ng’ongo nanti umutuze, nanti umonsi aakweti intazi ili yonsi iya manso nanti aakweti ulwale wa kufukuka pa nkanda nanti aakweti iviseseya nanti uononeka ivyanzwalo. 21 Kusi umonsi ali wensi uwa mu yana yakwe Aloni simapepo uwalemala aalinzile ukupalama ku ulambo pakuti apeele malambo ya koca kuli Yeova. Pa mulandu wakuti walemala, atafwile ukupalama uku ulambo pakuti apeele ivyakulya ivikapeelwa kuli Leza. 22 Angalya ivyakulya ivikapeelwa kuli Leza, kuli kuti ivyakulya ivya muzilo sana ni vyakulya ivya muzilo. 23 Lelo atalinzile ukupalama umu ncende ya muzilo, nupya atalinzile ukupalama uku ulambo, pano u mulemale; atalinzile nu kuzewanya incende yane iya muzilo, pano ne Yeova, nene nkuyasangulula.’”*

24 Fwandi Mose wanenyile Aloni na ana yakwe kumwi na Ina Izlaeli yonsi amazwi yayo yonsi.

22 Nupya kwene Yeova wanenyile Mose ati: 2 “Nena Aloni na ana yakwe aonsi ukuti yalinzile ukucenjela lino yakuomba ni vintu vya muzilo ivya Ina Izlaeli nupya yatalinzile ukusaalula izina lyane ilya muzilo ukulozya uku vintu vino yakupeela kuli nene. Nene Yeova. 3 Uyanene uti, ‘Umu nkulo zinu zyonsi, wensi uwa mu lupwa lwinu aacili umukowele, uwapalama uku vintu vya muzilo vino Aina Izlaeli yakupeela kuli Yeova, umuntu wiyo alakomwa. Nene Yeova. 4 Umonsi wensi uwa mu lupwa lwakwe Aloni uwalwala tembwe nanti aakufuma vimwi uku onsi, atalinzile ukulya ivya muzilo ukufikila lino waya umusanguluke kumwi sile nu monsi uwakumya umwi uwakowile pa mulandu wa kulema icitumbi, nanti umonsi uwafuma manzi ya onsi, 5 nanti umonsi uwakumya iciumbwa ca umi icikowele kumwi sile nu wakumya umuntu umukowele. 6 Umuntu uwakumya ivintu vivyo alaya umukowele ukufika manguzi nupya atanga alye ivintu vya muzilo ivili vyonsi, lelo afwile ukufulala umu manzi. 7 Lino ilanzi lyawa alaya umusanguluke, nupya pa cisila angalya ivyakulya vimwi pa vyakulya vya muzilo pano ala ivyakulya vyakwe. 8 Nupya atalinzile ukulya inyama ili yonsi iyatiifwila nanti icili consi icaticikomwa ni cilyanyi, pakuti ataya umukowele. Nene Yeova.

9 “‘Yalinzile ukuvwila masunde yane pakuti yatayembuka nu kufwa pa mulandu wa kusaalula ivya muzilo. Nene Yeova, ne muno nkuyasangulula.

10 “‘Umuntu aatazumiliziwa* atanga alyeko ivya muzilo ivili vyonsi. Umwenyi wakwe simapepo nanti umuomvi nawe kwene atanga alye ivya muzilo. 11 Lelo ndi cakuti simapepo wakala umuntu umwi ukuomvya impiya zyakwe, umuntu wiyo angalyako ivya muzilo. Azya aavyalilwa mu ng’anda yakwe simapepo nayo kwene yangalyako ivyakulya vyakwe. 12 Ndi cakuti umukazyana mwana simapepo watwalwa uku monsi aasi simapepo, atanga alyeko uku vya upe vya muzilo. 13 Lelo ndi cakuti umukazyana mwana simapepo waya mukamfwilwa nanti ndi cakuti yamuta nupya atakweti umwana alino waswilila uku ng’anda yakwe isi, wakwe vino cali lino wali umwance, angaalyako ivyakulya vimwi vyakwe isi; lelo umuntu aatazumiliziwa* wene atanga alyeko.

14 “‘Lyene ndi cakuti umwi walya ica muzilo ukwaula ukumanya, alinzile ukwikilapo icalenga 5 pa mutengo wa cintu cico ica muzilo nupya alinzile ukupeela nu upe wa muzilo kuli simapepo. 15 Fwandi ya simapepo yatalinzile ukukowezya ivya muzilo vino Aina Izlaeli yakapeela kuli Yeova 16 nu kuletela Aina Izlaeli upinguzi pa mulandu wa kuluvyanya kwao* pa kulya ivya muzilo; pano nene Yeova, ne muno nkuyasangulula.’”

17 Yeova watwalilile ukunena Mose ati: 18 “Nena Aloni na ana yakwe aonsi kumwi na Ina Izlaeli yonsi uti, ‘Ndi cakuti Umwina Izlaeli umonsi nanti uwafuma uku mpanga yuze aakaikala umu Izlaeli akupeela ilambo lya koca kuli Yeova pakuti afikilizye imilapo yakwe nanti akupeela upe wa kuitemelwa, 19 alinzile ukupeela cipambasi umusuma, suuku nanti sawe, pakuti ilambo lipokelelwe. 20 Mutalinzile ukupeela inyama ili yonsi ilemale, pano italapokelelwa kuli Leza.

21 “‘Ndi cakuti umwi akupeela ilambo lya mutende kuli Yeova pakuti afikilizye umulapo nanti ukupeela upe wa kuitemelwa, afwile ukupeela ing’ombe isuma nanti imfwele nanti imbuzi, pakuti ilambo lilyo lipokelelwe. Inyama iiyo itafwile ukukwata ulema uli onsi. 22 Inyama iikupeelwa ukuya ilambo, itafwile ukuya iipafule, iivunike, iicisike, iikweti impuli, iikweti vinkwemba, nanti iviseseya; mutafwile ukupeela inyama ili yonsi iya musango uwo kuli Yeova nanti ukupeela inyama ya musango uwo pa ulambo kuli Yeova. 23 Mungapeela cipambasi nanti imfwele iikweti ikulu ilitali sana nanti iliipi sana ukuya upe wa kuitemelwa, lelo italapokelelwa ukuya upe wa mulapo. 24 Mutalinzile ukupeela kuli Yeova inyama ino ivilundwa vya onsi vyononeka nanti ukutamwa nanti ukutungulwa, nupya mutalinzile ukupeela inyama zya musango uwo umu mpanga inu. 25 Mutalinzile nu kupeela inyama zya musango uwo izili zyonsi izifumile uku yantu aafuma uku mpanga zyuze ukuya upe wa vyakulya uwa kupeela kuli Leza, pano ale inyama zizyo izyononeke nupya ala zikweti ulema. Zitalapokelelwa kuli Leza.’”

26 Nupya kwene Yeova wanenyile Mose ati: 27 “Lino kana ka ng’ombe nanti kana ka mfwele nanti kana ka mbuzi kavyalwa, kalatwalilila ukuya na nyina pa manda 7, lelo pa wanda uwalenga 8 nu kuya inkoleelo kalazumiliziwa ukupeelwa ukuya ilambo lya koca kuli Yeova. 28 Lelo ing’ombe nanti imfwele, mutalinzile ukuikomela pamwi na kana pa wanda uli umwi.

29 “Lino mukupeela ilambo lya kutaizya kuli Yeova, mulinzile ukulipeela umu musango wakuti lingapokelelwa kuli Leza. 30 Lifwile ukuliiwa pa wanda kwene uwo. Mutafwile ukusyapo icili consi ukufikila katondo. Nene Yeova.

31 “Mufwile ukulasunga masunde yane nu kuyalondela. Nene Yeova. 32 Mutalinzile ukusaalula izina lyane ilya muzilo, pakuti Aina Izlaeli yamanye ukuti nene wa muzilo. Nene Yeova, aakumusangulula, 33 nemuno namufumizye umu mpanga ya Ijipti pakuti cimanyikwe ukuti nene indi Leza winu. Nene Yeova.”

23 Yeova watwalilile ukunena Mose ati: 2 “Nena Aina Izlaeli ukuti, ‘Maukongano ya muzilo ali manda ya kuzevya mitebeto yakwe Yeova yano mulinzile ukumanyisya antu. Ukuzevya kuko aeku:

3 “‘Mungaomba imilimo umu manda 6, lelo uwanda uwalenga 7 i sabata lya kupuuza, kuli kuti ukulongana kwa muzilo. Mutanga muombe mulimo uli onsi pa wanda uwo. U wanda wi sabata kuli Yeova umu ncende zyonsi zino mukaikalamo.

4 “‘Amanda ya mitebeto iya kuzevya kuli Yeova, kuli kuti maukongano ya muzilo yano mufwile ukumanyisya antu lino insita zizyo izyasoololwa zyafika aeya: 5 Mu mwezi wa kutandikilapo, pa wanda uwalenga 14 manguzi lino kutali kufiite sana, ulaya uwanda wa Ucilo kuli Yeova.

6 “‘Pa wanda uwalenga 15 umu mwezi kwene uwo, ulaya uwanda wa kuzevya Umutebeto wa Mukate Uwaula Icitutumusi kuli Yeova. Pa manda 7 mufwile ukulya umukate uwaula icitutumusi. 7 Pa wanda wa kutandikilako, muce mwakwata ukongano wa muzilo. Mutalinzile ukuomba umulimo uli onsi ukome. 8 Lelo muce mwapeela malambo ya koca kuli Yeova pa manda 7. Pa wanda uwalenga 7 kulaya ukongano wa muzilo. Mutalinzile ukuomba umulimo uli onsi ukome.’”

9 Yeova watwalilile ukunena Mose ati: 10 “Nena Aina Izlaeli uti, ‘Lino mulingila umu mpanga ino nkumupeela nupya lino mulazombola ivyakulya vinu, muce mutwale kuli simapepo umwanzi onga uwa vyakulya vino mwatandikilapo ukuzombola. 11 Nawe alazulunzya umwanzi uwo pa nkoleelo yakwe Yeova pakuti upokelelwe. Alauzulunzya pa wanda uwalondelelapo pa cisila ci Sabata. 12 Pa wanda wa kuzulunzya umwanzi, mulinzile ukupeela ka suuku ka mwaka onga ukuya ilambo lya koca kuli Yeova. 13 Upe wa vyakulya uce uye makilogilamu yaili yakwe fulaulo umusuma umusaakanye na mafuta, ulaya uupe wa koca kuli Yeova uununkile. Nu upe wa vyakumwa nao ulaya lita wenga wakwe waini. 14 Mutalinzile ukulya ivyakulya ivili vyonsi, ingano izisalule,* nanti izyacica ukufikila pa wanda kwene uwo uno mukuleta upe kuli Leza winu. Lii lilaya isunde lya manda pe uku nkulo zinu zyonsi konsi kuno mulikala.

15 “‘Muce mupende milungu 7* ukufuma pa wanda uwalondelelapo pa cisila ci Sabata, lino mwatwazile umwanzi wa upe wa kuzulunzya. Ifwile ukuya imilungu iikumanile. 16 Palapita manda 50, kuli kuti ukufika pa wanda uwalondelela Isabata ilyalenga 7, lyene alino mulinzile ukupeela ingano izyacica kuli Yeova. 17 Mulinzile ukutola imikate iili ukufuma umu mang’anda inu pakuti iye upe wa kuzulunzya. Ilinzile ukupangilwa na makilogilamu yaili yakwe fulaulo umusuma. Nupya mulinzile ukwikamo icitutumusi, pakuti iye ivyakulya vya kutandikilapo ukuzombola ivya kupeela kuli Yeova. 18 Nupya mulinzile ukupeela imikate iiyo pamwi nu twana twa mfwele utwa kalume 7 utusuma utwa mwaka onga, alino na ka cipambasi konga na ya suuku yaili. Lilaya ilambo lya koca kuli Yeova ililapeelelwa pamwi nu upe wa vyakulya alino nu upe wa vyakumwa, kuli kuti upe wa koca kuli Yeova uununkile. 19 Nupya mulinzile ukupeela akana ka mbuzi konga ukuya ilambo lya pa luyembu alino nu twana twa mfwele utwa kalume twili utwa mwaka onga ukuya ilambo lya mutende. 20 Simapepo alavizulunzya pamwi ni mikate iyatipangwa ukuomvya ivyakulya ivyatandikilapo ukuzombolwa, ulaya uupe wa kuzulunzya kuli Yeova pamwi nu twana twa mfwele twili. Vilaya ivya muzilo ivyativipeelwa kuli Yeova nupya vilaya ivyakwe simapepo. 21 Nupya pa wanda kwene uu, mulamanyisya antu pa ukongano winu uwa muzilo. Mutalinzile ukuomba umulimo uli onsi ukome. Lii i sunde lya manda pe umu vifulo vinu vyonsi uku nkulo zinu zyonsi.

22 “‘Lino mukuzombola ivyakulya vinu umu calo, mutalinzile ukumala vyonsi ivya mu mbali ya calo nupya mutafwile ukutolelezya ivyasyala. Mulinzile ukusiila apiina na afuma uku mpanga zyuze. Nene Yeova Leza winu.’”

23 Yeova watwalilile ukunena Mose ati: 24 “Nena Aina Izlaeli uti, ‘Pa wanda wa kutandikilapo umu mwezi uwalenga 7, muce mwapuuza, ulaya uwanda wa kwiusya, mapenga nga yalila muce mwakolongana umu kupepa Leza. 25 Mutaca mwaomba imilimo ikome ili yonsi, nupya muce mwapeela ilambo lya koca kuli Yeova.’”

26 Nupya kwene Yeova wanenyile Mose ati: 27 “Lelo uwanda uwalenga 10, umu mwezi uwalenga 7, ulaya Uwanda wa Kwelelwa Imembu. Mulinzile ukukwata ukongano wa muzilo nupya mulinzile nu kuikaanya,* mulinzile nu kupeela ilambo lya koca kuli Yeova. 28 Mutaca mwaomba umulimo uli onsi pa wanda uwo pano ulaya uwa kwelelwa imembu zinu pa nkoleelo yakwe Yeova Leza winu. 29 Wensi aatalaikaanya pa wanda uwo, alakomwa. 30 Nupya ndonona umuntu ali wensi aalaomba umulimo pa wanda uwo. 31 Mutaca mwaomba umulimo uli onsi. Lii i sunde lya manda pe uku nkulo zinu zyonsi mu vifulo vinu vyonsi. 32 Lilaya isabata lya kupuuza, muce mwaikaanya pa wanda uwalenga 9 manguzi umu mwezi uwo. Mulinzile ukusunga isabata ukufuma manguzi ukufika manguzi.”

33 Yeova watwalilile ukunena Mose ati: 34 “Nena Aina Izlaeli uti, ‘Pa wanda uwalenga 15 umu mwezi uwalenga 7 mulaakwata Umutebeto wa Nsakwe kuli Yeova pa manda 7. 35 Mulaakwata ukongano wa muzilo pa wanda wa kutandikilako, nupya mutaca mwaomba umulimo uli onsi ukome. 36 Pa manda 7 muce mwapeela malambo ya koca kuli Yeova. Pa wanda uwalenga 8 muce mwakwata ukongano wa muzilo, nupya muce mwapeela malambo ya koca kuli Yeova. Ulaya uwanda uiyele uwa kukolongana uku kupepa. Mutalinzile ukuomba umulimo uli onsi ukome.

37 “‘Yii ali mitebeto yakwe Yeova ino mufwile ukumanyisya antu ukuti a maukongano ya muzilo nupya ino mufwile ukupeelelapo malambo ya koca kuli Yeova, kuli kuti ilambo lya koca nu upe wa vyakulya alino nu upe wa vyakumwa ukulingana ni vikalondekwa cila wanda. 38 Malambo yayo yakulundwa pa malambo aakapeelwa pa masabata yakwe Yeova alino na pa vya upe vinu, pa malambo ya milapo inu, na pa malambo ya kuitemelwa yano mukapeela kuli Yeova. 39 Lelo pa wanda uwalenga 15 umu mwezi uwalenga 7, lino mwakolonganika vino mwazombola umu vyalo vinu, mulinzile ukuzevya umutebeto kuli Yeova pa manda 7. Pa wanda wa kutandikilako na pa wanda uwalenga 8 muce mwapuuza. 40 Pa wanda wa kutandikilako, muce mwatola ivizao vya ku miti inu isuma, misambo ya tuncindu, misambo ya miti iyakwata sana mafwa, ni misambo ya miti iikamela umu mikonko, nupya muce musansamuke pa manda 7 pa nkoleelo yakwe Yeova Leza winu. 41 Muce mwazevya umutebeto kuli Yeova pa manda 7 umu mwaka. Lii lilaya i sunde lya manda pe uku nkulo zinu zyonsi, umu mwezi uwalenga 7 amuno muce mwazevya. 42 Muce mwaikala umu nsakwe pa manda 7. Aina Izlaeli yonsi yace yaikala umu nsakwe, 43 pakuti amu nkulo zinu izilalondelelapo yakamanye ukuti nene nalenzile ukuti Aina Izlaeli yaikala umu nsakwe lino nayafumizye umu mpanga ya Ijipti. Nene Yeova Leza winu.’”

44 Fwandi Mose wanenyile Aina Izlaeli amanda ya kuzevya imitebeto kuli Yeova.

24 Yeova watwalilile ukunena Mose ati: 2 “Nena Aina Izlaeli ukuti yalete kuli wewe mafuta ya muolivi ayengululwe ningo, aakuomvya muli ya lampi pakuti yaaka lyonsi. 3 Mwi tenti lya kupepelapo umu muputule wa muzilo uwaya ukunzi yakwe ketani uwaya apiipi ni Mbokosi ya Upangano, amuno Aloni ace aapekanya ukuti ya lampi yaaka lyonsi pa nkoleelo yakwe Yeova ukufuma manguzi ukufika katondo. Lii lilaya i sunde lya manda pe uku nkulo zinu zyonsi. 4 Lyonsi ace asakamala ya lampi ali pa ca kuteekapo cakwe goldi umwengululwe ningo pa nkoleelo yakwe Yeova.

5 “Uce uwatola fulaulo umusuma nu kupanga imikate 12 iulungane ili ni cipongo pakasi. Uce uwaomvya makilogilamu yaili yakwe fulaulo pa kupanga umukate onga na onga. 6 Uce uwaika umu mitumba iili, cila mutumba uce wakwata imikate 6, uce uwaika pali tebo uwapangilwa na goldi umwengululwe ningo pa nkoleelo yakwe Yeova. 7 Uce uwaika ivinunkile sana pa mutumba onga na onga, vilapeelwa ukuya upe wa koca kuli Yeova ukwimililako imikate. 8 Lyonsi pa wanda wi Sabata, ace aika imikate pa nkoleelo yakwe Yeova. Uu ulaya uupangano wa manda pe na Izlaeli. 9 Ilaya iyakwe Aloni na ana yakwe aonsi, yalailiila umu ncende ya muzilo pano iya muzilo sana kuli aliwe ukufuma pa malambo ya koca yakwe Yeova, lii lilaya i sunde lya manda pe.”

10 Lyene umu Ina Izlaeli mwali umonsi umwi umwana wa mwanaci Umwina Izlaeli alino isi wali u Mwina Ijipti, nupya pakatwike ulwete umu nkambi pali aliwe nu monsi Umwina Izlaeli. 11 Umwana umonsi uwa mwanaci Umwina Izlaeli watandike ukusaalula izina lyakwe Leza nu kulipontela. Fwandi yamutwazile kuli Mose. Nyina wa monsi wi wali a Syelomiti, mwana Dibili uwa mu mutundu wakwe Dani. 12 Yamusunzile ukufikila lino Yeova wayanenyile ivya kucita.

13 Lyene Yeova wanenyile Mose ati: 14 “Umonsi uwali akuponta mutwalini ukunzi ya nkambi, nupya yonsi aliyuvwa imiponto yakwe yalinzile ukwika makasa pa mutwe wakwe, lyene Aina Izlaeli yonsi yafwile ukumutama na mawe. 15 Nupya ulinzile ukunena Aina Izlaeli ukuti, ‘Umuntu ali wensi uwapontela Leza, alafululwa pa luyembu lwakwe. 16 Uwapontela izina lyakwe Yeova alinzile ukukomwa. Aina Izlaeli yonsi yalinzile ukumutama na mawe. Umuntu uwafuma uku mpanga yuze uwapontela izina lyakwe Leza, nawe kwene alinzile ukukomwa wakwe vino nu Mwina Izlaeli kwene angakomwa.

17 “‘Ndi cakuti umuntu wakoma umuntu muze, alinzile ukukomwa. 18 Wensi uwakoma iciteekwa ca muze alinzile ukulipila iciteekwa kwene cico, kuli kuti umi pa umi. 19 Ndi cakuti umuntu wacisa umuntu muze, nawe kwene mufwile ukumucita vivyo kwene. 20 Kuvuna pa kuvuna, ilinso pi linso, ilino pi lino, vino umwi wacisa umuze avino nawe kwene mulinzile ukumucisa. 21 Umuntu uwakoma iciteekwa ca muze alinzile ukulipila iciteekwa kwene cico, lelo umuntu uwakoma umuntu muze alinzile ukukomwa.

22 “‘Upinguzi onga kwene uulaomba kuli mwemwe, kuli kuti kuli wino wafuma uku mpanga yuze nanti uku Mwina Izlaeli, pano nene Yeova Leza winu.’”

23 Mose wanenyile Aina Izlaeli vii vyonsi, nupya umuntu uwaponsile yamutwazile ukunzi ya nkambi nu kuyamutama na mawe. Fwandi Aina Izlaeli yacisile viivi kwene vino Yeova wanenyile Mose.

25 Yeova watwalilile ukunena Mose pa Mwamba wa Sinai ati: 2 “Nena Aina Izlaeli uti, ‘Lino mulafika umu mpanga ino nkumupeela, mutaca muombe mulimo umu mpanga iiyo, pano lilaya isabata kuli Yeova. 3 Muce mwakomela imbezu umu vyalo vinu mu myaka 6, nupya umu myaka kwene iiyo 6 amuno muce mwatungwila imyangazi umu vyalo vinu alino nu kuzombola ivilimwa vinu. 4 Lelo umu mwaka uwalenga 7 impanga ilinzile ukupuuza, lilaaya i sabata kuli Yeova. Mutalinzile ukukomela imbezu nanti ukutungwila imyangazi umu vyalo vinu. 5 Mutalinzile ukuzombola ivyakulya ivyaimelela pa cisila ca kuzombola, nupya mutalinzile ukuzombola imyangazi inu ino mutaatungwila. Impanga ilinzile ukupuuza umwaka uwo. 6 Lelo mungalya ivyakulya ivyamela umu nsita ino impanga ikupuuza, kuli kuti mwemwe, azya inu aonsi na akazyana, aomvi inu alino na afuma uku mpanga zyuze akaikala namwe, 7 kumwi sile ni viteekwa vinu navyo kwene vingalyako alino ni nyama zya mu mpanga. Vyonsi ivyamela umu mpanga vingaliiwa.

8 “‘Muce mwapenda imyaka ya masabata 7, kuli kuti imyaka 7 ukutaimuzya na 7, nupya cilaamupeela imyaka 49. 9 Lyene muce mwalizya ipenga ilikuvwika sana umu mwezi uwalenga 7 pa wanda uwalenga 10; pa Wanda wa Kwelelwa Imembu, mulinzile ukuleka iciunda ci penga ukuvwika umu mpanga inu yonsi. 10 Mulinzile ukulola umwaka uwalenga 50 ukuti u wa muzilo nu kumanyisya antu yonsi amu mpanga iiyo ukuti umwaka uwo uwa kukululwa. Ulaya umwaka wa untungwa kuli mwemwe, nupya cila muntu alaswilila uku mpanga yakwe na kuli ya lupwa yakwe. 11 Umwaka uwalenga 50 ulaya ali mwaka wa untungwa. Mutalaakomela imbezu nanti ukuzombola ivyakulya ivyaimelile pa cisila ca kuzombola nanti ukuzombola imyangazi ino mutatungwilile. 12 Pano uwo ulaya umwaka wa untungwa. Ulaya umwaka wa muzilo kuli mwemwe. Muce mwalya sile ivyakulya ivyaimelela umu musili.

13 “‘Umu mwaka kwene uu uwa untungwa, cila muntu afwile ukuswilila uku mpanga yakwe. 14 Ndi cakuti ukukazya icili consi uku muzo nanti ukukala cimwi kuli aliwe, mutalinzile ukucenjezyanya. 15 Lino ukukala impanga uku muzo, ulinzile ukupenda imyaka iyatipitapo ukufuma pano kwayelile umwaka wa untungwa, aakukazya nawe alinzile ukwika umutengo ukulingana ni myaka iyasyalako kuti kuye umwaka wa untungwa. 16 Ndi cakuti kucili imyaka iingi, aakukazya impanga iiyo angaikazya pa mutengo ukome, lelo ndi cakuti imyaka iyatisyala inono, alinzile ukucefyako umutengo, pano ala akukukazya ivilimwa ivilazombolwa. 17 Kusi ali wensi muli mwemwe aalinzile ukucenjezya umuze, nupya mulinzile ukutiina Leza winu, pano nene Yeova Leza winu. 18 Ndi cakuti mukulondela masunde yane nu kuyasunga, mulaikala umutende umu mpanga. 19 Impanga ilaamupeela ivyakulya, nupya mulaalya nu kwikuta, mulaikala nu mutende.

20 “‘Lelo ndi cakuti muuzya ukuti: “Uzye tulalya vyani umu mwaka uwalenga 7 ndi cakuti tutakomiile imbezu nanti ukuzombola ivilimwa vitu?” 21 Mutaca musakamale, ndamupaala umu mwaka uwalenga 6, nupya impanga ilamupeela ivyakulya vino mulalya umu myaka itatu. 22 Lyene mulakomela imbezu umu mwaka uwalenga 8, nupya mulaalya ivyakulya vya mpiti ukufikila umwaka uwalenga 9. Mulaalya ivyakulya vya mpiti ukufikila insita ya kuzombola yafika.

23 “‘Impanga italinzile ukukaziwa kuli umwi pakuti iye iyakwe amanda pe, pa mulandu wakuti i yane. Pano kuli nene muli wa yantu aafuma uku mpanga yuze nupya aenyi. 24 Mu mpanga inu yonsi ino mwapeelwa, uwakazya impanga yakwe alinzile ukukwata insambu zya kuikala nupya kwene.

25 “‘Ndi cakuti Umwina Izlaeli muzo waya umupiina nupya wakazya impanga yakwe imwi, kakulula wino a lupwa wakwe umupalamisye aalinzile ukucakala impanga ino umwinakwe wakazizye. 26 Ndi cakuti umwi atakweti kakulula, lelo wakwata impiya izilinge izyakukalila impanga iiyo, 27 alinzile ukupenduluka umutengo wa mpanga iiyo ukulingana ni myaka iyapitapo ukufuma pano waikazizye nu kulipila umuntu uwakazile impanga iiyo. Lyene alino ilasyala i mpanga yakwe.

28 “‘Lelo ndi cakuti atakweti impiya izya kukalila impanga iiyo uku muntu wiyo, impanga ilatwalilila ukuya iya muntu uwaikala ukufikila mwaka wa untungwa; nupya ilawelela uku muntu wiyo umu mwaka wa untungwa, nupya ilaya impanga yakwe.

29 “‘Ndi cakuti umwi wakazya ing’anda iyaya umu musumba uno yazingulusya ilinga, insambu zyakwe izya kukala ing’anda iiyo zilatwalilila pa mwaka onsi upuma ukufuma pano waikazizye. 30 Lelo ndi cakuti ataikazile lino umwaka onga upuma wasila, ale ing’anda iiyo ilatwalilila ukuya iya muntu uwaikala umu nkulo zyakwe zyonsi. Italinzile ukupeelwa uku mwineco umu mwaka wa untungwa. 31 Lelo mang’anda atakweti malinga, yalinzile ukulolwa wa vyalo. Insambu zya kukala ing’anda iiyo zilatwalilila, nupya ing’anda ifwile ukupeelwa uku mwineco umu mwaka wa untungwa.

32 “‘Lelo mang’anda ya Ina Levi aya umukasi ka misumba, Aina Levi yalatwalilila ukukwata insambu zya kuyakala cipya cipya. 33 Ndi cakuti impanga ya Ina Levi itakazilwe cipya cipya, ale ing’anda iya Ina Levi iyakaziiwe umu musumba nayo kwene ilapeelwa uku Ina Levi umu mwaka wa untungwa, pano mang’anda aya umu misumba ya Ina Levi umu mpanga ya Ina Izlaeli a mang’anda yao. 34 Nupya impanga iyakwata umulemvwe iyazinguluka imisumba ya Ina Levi, italinzile ukukaziwa, pano i mpanga yao amanda pe.

35 “‘Ndi cakuti Umwina Izlaeli muzo aakaikala mupiipi naawe waya umupiina icakuti atanga aisakamale umwineco, ulinzile ukumusakamala wakwe vino ungasakamala umuntu uwafuma uku mpanga yuze, pakuti angatwalilila ukuya nu umi. 36 Utalinzile ukumukongwesya kaloba nanti ukumunena ukuti akulundilepo pali vino wamukongwesya. Uwatiina Leza wako, nupya umuzo alatwalilila ukuya nu umi. 37 Utaakongwesya umuzo impiya pali kaloba nanti ukumukongwesya ivyakulya pali kaloba. 38 Nene Yeova Leza winu, uwamufumizye umu mpanga ya Ijipti nu kumupeela impanga ya Kenani, pakuti musininkizye ukuti nene Leza winu.

39 “‘Ndi cakuti Umwina Izlaeli muzo aakaikala umupiipi naawe waya umupiina nupya waikazya kuli wewe, utalinzile ukumupatikizya kuti aomba wa muzya. 40 Alinzile ukulolwa wa muomvi nanti wa muntu uwafuma uku mpanga yuze. Alinzile uku kuombela ukufika umu mwaka wa untungwa. 41 Lyene alakusya nu kuswilila na ana yakwe uku lupwa lwakwe. Alinzile ukuswilila uku mpanga ya vikolwe vyakwe. 42 Pano aazya yane yano nafumizye umu mpanga ya Ijipti. Yatalinzile ukuikazya wakwe vino umuzya akakaziwa. 43 Utalinzile ukuya nu unkalwe uku muntu wiyo, uwatiina Leza wako. 44 Ungaca uwakala azya aonsi nanti aakazyana, ukufuma umu nko izyamuzinguluka. 45 Nupya nu mu yantu aafuma uku mpanga zyuze aakaikala namwe, alino nu mu ndupwa zyao izyavyalilwa umu mpanga inu, namo kwene mungakalamo azya, yalaya azya inu. 46 Mungaca musiile ana inu azya yayo pakuti yakaye aazya yao amanda pe. Mungayaomvya wa yazya, lelo mutalinzile ukuya nu unkalwe uku Ina Izlaeli yauzo.

47 “‘Lelo ndi cakuti umuntu uwafuma uku mpanga yuze aakaikala namwe waya umukankala nupya Umwina Izlaeli muzo aakaikala umupiipi nawe waya umupiina, nupya waikazya kuli aliwe nanti kuli lupwa wa muntu kwene wiyo umukankala, 48 alatwalilila ukuya ni nsambu zya kukalwa cipya cipya pa cisila ca kuikazya. Umwi pa Ina yakwe angamukala nupya kwene, 49 nanti isi mukalamba nanti isi munono nanti umwana umonsi uwavyalwa muli isi umukalamba nanti muli isi munono, angamukala, nanti lupwa ali wensi umupalamisye angamukala.

“‘Nanti ndi cakuti umuntu wiyo wataya umukankala, angaikala umwineco. 50 Alinzile ukupenduluka pamwi nu wamukazile insita iyapitapo ukufuma umu mwaka uno waikazizye ukufika umu mwaka wa untungwa, nupya impiya zino waikazizyepo zilinzile ukulingana ni myaka iyatipitapo. Mulimo uno waomvile umu myaka kwene iiyo ulalingana na malipilo yano umuomvi akapeelwa. 51 Ndi cakuti ikusyala imyaka iingi pakuti umwaka wa untungwa ufike, alinzile ukulipila ukulingana ni myaka iyatisyalako. 52 Lelo ndi cakuti ukusyala sile imyaka inono kuti umwaka wa untungwa ufike, ale umwineco alinzile ukupenduluka imyaka iyatisyalako nu kulipila ukulingana ni myaka kwene iiyo. 53 Lyonsi lino akuombela umusambazi wakwe, alinzile ukulasakamalwa wa muomvi; nupya atalinzile ukusungwa umu unkalwe. 54 Lelo ndi cakuti atanga akwanisye ukuikala umwineco cipya cipya ukuomvya inzila zizyo, ale lyene alakululwa umu mwaka wa untungwa kumwi na ana yakwe.

55 “‘Pano Aina Izlaeli aazya yane. Aazya yane yano nafumizye umu mpanga ya Ijipti. Nene Yeova Leza winu.

26 “‘Mutalinzile ukuipangila ya leza ya sile sile, nupya mutalinzile ukwimika ivinkolanya nanti ivimawe vya kupepelapo, nupya mutalinzile ukwika ivinkolanya ivyapangilwa na mawe umu mpanga inu pakuti mwavipepa; pano nene Yeova Leza winu. 2 Mulinzile ukusunga masabata yane nupya mwacindika incende yane iya muzilo. Nene Yeova.

3 “‘Ndi cakuti mwatwalilila ukulondela masunde yane nu kuyasunga, 4 Ndaamupeela imvula pa nsita ilinge, nupya umusili ulaamezya ivyakulya ni miti ilaaseeka ivizao. 5 Insita inu iya uzombozi ilatwalilila ukufika insita ya kuzombola imyangazi, nupya insita ya kuzombola imyangazi ilatwalilila ukufika insita ya kukomela; nupya mulalya nu kwikuta nu kwikala umu mutende umu mpanga inu. 6 Ndaleta umutende umu mpanga, nupya mulaalala ukwaula ali wensi uwa kumutiinya; ndazinga ni vilyanyi umu mpanga, nupya umu mpanga inu mutalaya inkondo. 7 Mulazinganya alwani inu, nupya mulayakoma uku lupanga. 8 Antu 5 muli mwemwe yalazinganya alwani 100, na antu 100 muli mwemwe yalazinganya alwani 10,000, nupya mulakoma alwani inu uku lupanga.

9 “‘Ndamupaala nupya ndalenga ukuti musandane nu kuvula, ndasunga nu upangano uno napangana namwe. 10 Lino mucili mukulya ivyakulya ivya mwaka uwafumako, mulaalondekwa ukufumya ivyakulya vinu ivya mpiti muno vyasungilwa nu kuvisumba pakuti mukwate incende apa kwika ivipya. 11 Ndika icikuulwa cane ica muzilo pali mwemwe, nupya ntalamukana. 12 Ndaya namwe nupya ndaya Leza winu, namwe mulaya antu yane. 13 Nene Yeova Leza winu, uwamufumizye umu mpanga ya Ijipti pakuti mutatwalilila ukuya azya yao, naputozile iyoko linu ilya uzya nu kuleka kuti mwapita wa yantu antungwa.

14 “‘Lelo nga mutalauvwa kuli nene nanti ukusunga masunde yaa yonsi, 15 nupya nga mulaakana nu kusuula masunde yane yonsi alino nu kutama upangano wane, 16 vino ndacita kuli mwemwe aevi: Ndamulenga ukuya ni ntete, ndamuletela ulwale wakwe TB nu ulwale wa mpepo, ndalenga ukuti mupafule nupya ndamumala maka inu yonsi. Nga mwakomela imbezu mulaaicuzya sile, pano alwani inu aliyo yalaalya. 17 Ndamukana, nupya mulacimviwa uku yalwani inu; na yayo aamupata yalaamucuzya, nupya mulautuka lino kusi nanti aumwi aakumuzinganya.

18 “‘Ndi cakuti mutaluvwa kuli nene nanti vivyo vyamucitikila, ndamufulula imiku 7 pa membu zinu. 19 Ndamumala icilumba, ndalenga iyulu linu ukuya wa cela* nupya ndalenga impanga inu ukuya wakwe koopa.* 20 Mulaonona sile maka inu, pano impanga inu italaamumezezya ivyakulya, ni miti ya mu mpanga italaaseeka ivizao.

21 “‘Lelo nga mwatwalilila ukunkana, mwakana nu kuvwa kuli nene, lyene ndamufulula imiku 7 ukulingana ni membu zinu. 22 Ndamutumila ivilyanyi vya mu mpanga, nupya vilalya ana inu, vilakoma ni viteekwa vinu nu kucefya impendwa inu, nupya imiseo inu ilasyala sile.

23 “‘Ndi cakuti mutaluvwa lino namulungika na lino vii vyonsi ivimucitikila, nupya mwatwalilila ukunkana, 24 lyene nani kwene ndamukana, nupya ndamufulula imiku 7 pa membu zinu. 25 Ndamutumila alwani inu pakuti yamuzanze nu kumufulula pa mulandu wa kutama upangano. Nga mwakolongana umu misumba inu, ndamuletela indwala, nupya mulacimviwa uku yalwani inu. 26 Lino ndalenga ukuti mutakwata ivyakulya, anaci 10 yalaapangila umukate umu citofu conga sile, lyene yalapima umukate nu kumwankanya kanono kanono; nupya mulalya lelo mutalikuta.

27 “‘Lelo ndi cakuti mutaluvwa kuli nene na lino vii vyonsi vyamucitikila nu kutwalilila ukunkana, 28 Ndamusokela sana, nupya ndamufulula imiku 7 pa membu zinu. 29 Fwandi mulalya ana inu aonsi na akazyana. 30 Ndonona incende zinu izya kupepelapo nupya ndonona pano mukateeka ivinunkile, ndalonga ni vitumbi vinu pa vilubi vinu ivya winyi ivitakwata umi, nupya ndamukana pa mulandu wakuti mukanguvwisya uwinyi. 31 Ndonona imisumba inu ku lupanga, nupya ndaleka ukuti incende zinu izya muzilo zikasyale sile ukwaula cimwi, ntaluvwa nu kununkila kwa malambo inu. 32 Ndonona impanga inu, nupya alwani aikala umu mpanga inu yalazunguka ukuvwa vivyo. 33 Ndamusalanganyizizya umu nko zyuze, nupya ndamukoma uku lupanga; ni mpanga inu ilasyala umwaula antu ni misumba inu nayo kwene ilononwa.

34 “‘Lino mulaya umu mpanga ya yalwani inu, impanga inu ilapuuza pa mulandu wakuti itaatazile ipuuze. 35 Impanga inu ilapuuza pa mulandu wakuti mutalaya antu, pano itapuuzanga umu nsita ino mwikalangamo.

36 “‘Lelo ndalenga ukuti antu aalapusuka yace yaye ni ntete umu mpanga iya yalwani yao; icongo ca mafwa aakusendwa nu muza cilalenga yutuke, nupya yalutuka wa muntu aakuutuka inkondo, yalapona lino kusi ali wensi akuyazinganya. 37 Yalaapunkana wa yantu aakuutuka inkondo, nanti cakuti kusi aakuyazinganya. Mutalakwata maka ya kulwisya alwani inu. 38 Mulafwila mu yantu amu nko umu mpanga ya yalwani inu. 39 Aalasyala pali mwemwe yalaacula umu mpanga ya yalwani inu pa mulandu wa membu zinu. Yalaacula pa mulandu wa membu zya vikolwe vyao. 40 Lyene yalasokolola imembu zyao, yalasokolola ni membu na ucintuvwa wa vikolwe vyao nu kuzumila ukuti yaluvyanyizye pa kunkana. 41 Lyene nani nayakanyile nu kuyatwala uku mpanga ya yalwani yao.

“‘Lelo cilalenga ukuti yaicefye nu kulipila pa membu zyao. 42 Nupya ndiusya upangano uno napangine na Yakobo, ndiusya nu upangano uno napangine na Isaki alino nu upangano uno napangine na Abulahamu, ndiusya ni mpanga. 43 Lino yafumile umu mpanga, impanga yasyazile ikupuuza nupya yasyazile umwaula antu, yalipilanga pa membu zyao pa mulandu wakuti yakanyile nu kusuula masunde yane. 44 Lelo asi mulandu na vii vyonsi, lino yacili umu mpanga ya yalwani yao ntalayakanilila nanti ukuyapata sana icakuti njalovye, pano ukucita vivyo cingaya u kutama upangano uno napangine nayo, pano nene Yeova Leza wao. 45 Pa mulandu na aliyo ndiusya upangano uno napangine ni vikolwe vyao vino nafumizye umu mpanga ya Ijipti ala na antu ya mu nko zyuze yakulolako, pakuti yasininkizye ukuti nene indi Leza wao. Nene Yeova.’”

46 Yaa ali masunde yano Yeova wapeezile Aina Izlaeli pa Mwamba wa Sinai ukupitila muli Mose.

27 Yeova watwalilile ukunena Mose ati: 2 “Nena Aina Izlaeli uti, ‘Ndi cakuti umuntu walapa umulapo uiyele uwa kupeela kuli Yeova impiya izilingine nu mutengo wa muntu, 3 mutengo wa monsi ali ni myaka 20 ukufika kuli 60, ulaaya masyekele* 50 ukulingana ni cipimo cakwe syekele icikaomviwa pa ncende ya muzilo. 4 Lelo ndi cakuti u mwanaci, umutengo wakwe ulaaya masyekele 30. 5 Ndi cakuti umonsi nanti umwanaci ali ni myaka 5 ukufika kuli 20, umutengo wa monsi ulaaya masyekele 20 nu mutengo wa mwanaci ulaaya masyekele 10. 6 Ndi cakuti umonsi nanti umwanaci ali nu mwezi onga ukufika uku myaka 5, umutengo wa monsi ulaaya masyekele yakwe siuva 5, umwanaci nawe umutengo ulaaya masyekele yakwe siuva yatatu.

7 “‘Ndi cakuti umonsi nanti umwanaci ali ni myaka 60 nu kucilapo, mutengo wa monsi ulaaya masyekele 15 nu mutengo wa mwanaci nao ulaaya masyekele 10. 8 Lelo ndi cakuti umupiina sana icakuti atanga akwanisye ukulipila impiya zizyo, alaya akimilile pa nkoleelo yakwe simapepo, simapepo nawe alapingula umutengo wa muntu wiyo. Alapingula ukulingana na vino uwalapa umulapo uwo angakwanisya.

9 “‘Ndi cakuti umulapo uno walafile u wa kupeela inyama iingalingana ukupeela kuli Yeova, inyama ili yonsi iyapeelwa kuli Yeova ilaya iya muzilo. 10 Atanga aipyanikizyepo nanti ukukauzya inyama isuma ni nyama iipe nanti ukukauzya inyama iipe ni isuma. Lelo ndi cakuti waikauzya ni nyama yuze, inyama iiyo na ino wakauzya zyonsi zilaya izya muzilo. 11 Ndi cakuti inyama iiyo iikowele nupya itanga ipeelwe ilambo kuli Yeova, lyene alaisenda nu kuyaimika pa nkoleelo yakwe simapepo. 12 Simapepo alapingula umutengo wa nyama iiyo asi mulandu iisuma nanti iipe. Umutengo uno alapingula uulakonkwa. 13 Lelo nga akulonda ukukala inyama iiyo nupya kwene, alinzile ukulundapo icipendo icalenga 5* ica mpiya izyatizipingulwa.

14 “‘Ndi cakuti umuntu wapeela ing’anda yakwe kuli Yeova ukuya iya muzilo, simapepo alapingula umutengo wa ng’anda iiyo asi mulandu iisuma nanti iipe. Mutengo uno alapingula uulakonkwa. 15 Lelo ndi cakuti uwapeela ing’anda yakwe akulonda ukuikala nupya, alinzile ukulundapo icipendo icalenga 5 ica mpiya izyatizipingulwa, nupya ing’anda iiyo ilaya iyakwe.

16 “‘Ndi cakuti umuntu wapeela icalo cakwe cimwi kuli Yeova, mutengo wa calo ulapingulwa ukulingana nu wingi wa mbezu izilakomelwa umu calo cico: oma* wenga wakwe baale alaakaziwa pa masyekele yakwe siuva 50. 17 Ndi cakuti wapeela icalo ukufuma umu mwaka wa untungwa, mutengo uwatiupingulwa uulakonkwa. 18 Ndi cakuti wapeela icalo cakwe pa cisila ca mwaka wa untungwa, simapepo alapingula umutengo unono ukulingana ni myaka iyatisyalako kuti kuye mwaka wa untungwa na uze. 19 Lelo ndi cakuti uwapeezile icalo akulonda ukucikala nupya, alinzile ukulundapo icipendo icalenga 5 ica mpiya izyatizipingulwa, nupya icalo cilatwalilila ukuya icakwe. 20 Ndi cakuti atakazile icalo cico cipya cipya lelo cakaziwa uku muntu muze, citanga cice cikalwe nupya cipya cipya. 21 Ndi cakuti icalo cakululwa umu mwaka wa untungwa, cilaya ica muzilo kuli Yeova, kuli kuti icapeelwa kuli aliwe. Nupya cilaya icakwe ya simapepo.

22 “‘Ndi cakuti umuntu wapeela kuli Yeova icalo cino wakazile, kuli kuti cino ataapyanyile, 23 simapepo alapingula umutengo ukulingana ni myaka iyatisyalako kuti kuye umwaka wa untungwa, nupya alamunena umutengo pa wanda kwene uwo. Icalo cico cilaya ica muzilo kuli Yeova. 24 Umu mwaka wa untungwa, icalo cilaswilila kuli wino wacikazizye, kuli kuti uku mwineco.

25 “‘Umutengo onsi ulinzile ukuya mu cipimo cakwe syekele wenga ica pa ncende ya muzilo. Syekele wenga alinzile ukulingana na magela* 20.

26 “‘Lelo kusi aalinzile ukupeela mayeli ya nyama, pano yakaya aakwe Yeova lino yavyalwa sile. Aye a cipambasi nanti imfwele, yakaya aakwe Yeova. 27 Ndi cakuti inyama iiyo yaya pa nyama izikowele nupya waikala cipya cipya ukulingana nu mutengo uwatiupingulwa, alinzile ukulundapo icipendo icalenga 5 ica mpiya izyatizipingulwa. Lelo ndi cakuti itakazilwe cipya cipya, ilakaziwa ukulingana nu mutengo uwatiupingulwa.

28 “‘Lelo kusi icintu icapeelwa kuli Yeova icingakaziwa nanti ukukalwa cipya cipya, ciye u muntu nanti inyama nanti icalo. Icili consi icapeelwa cilaya ica muzilo sana kuli Yeova. 29 Nupya kusi umuntu uwapingulwa ukukomwa aangakululwa. Alinzile sile ukukomwa.

30 “‘Ici kumi consi ica vilimwa ivya mu calo, i cakwe Yeova. I ca muzilo kuli Yeova. 31 Ndi cakuti umuntu akulonda ukukala cipya cipya ici kumi cakwe icili consi, alinzile ukulundapo icipendo icalenga 5 ica mutengo uwo. 32 Inyama iyalenga 10 pa ng’ombe, imfwele nanti imbuzi, kuli kuti inyama zyonsi izikapita umwisika lya ntuwa yakwe kacema lino zikupendwa, iyalenga 10 ilinzile ukuya i ya muzilo kuli Yeova. 33 Atalinzile ukuiceeceta kuti alole ngi isuma nanti iipe, nupya atalinzile ukuikauzya. Lelo ndi cakuti akulonda ukuikauzya, inyama iiyo kumwi na ino wakauzya, zyonsi kwene zilaya izya muzilo. Zitanga zikalwe cipya cipya.’”

34 Yaa ali masunde yano Yeova wapeezile Mose pa Mwamba wa Sinai kuti anene Aina Izlaeli.