MALANGO

1 Yaa ali mazwi yano Mose walanzile uku Ina Izlaeli yonsi mu ncende ya Yodani umu lwanga, pa lwanga ulwalozyanya na Sufi pakasi ka ncende zii: Palani, Tofeli, Labani, Hazeloti na Dizahabu. 2 Cikasenda manda 11 kupita ukufuma uku Holebu ukufika uku Kadesyi-banea ukuomvya inzila ya mu Mwamba wa Seili. 3 Mu mwaka uwalenga 40, umu mwezi wakwe 11 pa wanda wa kutandikilako, Mose wanenyile Aina Izlaeli vyonsi vino Yeova walanzile ukuti ayanene. 4 Cii cacitike pa cisila cakuti Mose wacimvya Sihoni umwene wa Amoli uwikalanga umu Hesyiboni nu kucimvya Ogi umwene wa Basyani umu Edilei, uwikalanga umu Asyitaloti. 5 Mu citungu ca Yodani mu mpanga ya Moabu, amuno Mose walondolwile Masunde yakwe Leza ati:

6 “Yeova Leza witu watunenyile umu Holebu ati, ‘Imwikala sana umu ncende yii iya myamba. 7 Konekini nu kuya uku ncende ya Ina Amoli iya myamba nu ku inamupalamano yao yonsi umu Alaba ku ncende ya myamba nu ku Syefela nu ku Negebu nu mu mbali yakwe yemba ku mpanga ya Ina Kenani nu ku Lebanoni,* nu kuyafika uku luzi ulukalamba, kuli kuti uluzi lwa Yufuleti. 8 Lolini, imupeela impanga. Yangini mukikale umu mpanga ino Yeova walavile uku vikolwe vinu, kuli kuti ino walavile ukupeela Abulahamu, Isaki na Yakobo nu ku yana yao.’

9 “Nani namunenyile pa nsita iiya inti, ‘Ntanga imutungulule nenga. 10 Yeova Leza winu walenga ukuti muvule, nupya lyene imuvula sana wa ntanda zya mwi yulu. 11 Si Yeova Leza wa vikolwe vinu alenge ukuti muvule ukufika uku miku 1,000, nupya amupaale wakwe vino wamulavile. 12 Ntanga nkwanisye ukumutungulula nenga, umulimo wakulisya, mwacilamo ukuilizyanya. 13 Soololini aonsi aamano, acenjele nupya aamanyikisya imilimo ukufuma umu mitundu inu, nupya nimayasonta ukuya intunguluzi zinu.’ 14 Namwe mwangaswike imuti, ‘Vino watunena ukucita vili sile ningo.’ 15 Nani natozile intunguluzi zya mitundu inu, aonsi aamano nupya aamanyikisya imilimo nu kuyasonta ukuti yamutungulula, yamwi yaali nu kulaangalila maumba umuli antu 1,000, yauze umuli antu 100, yauze umuli antu 50, yauze nayo umuli antu 10, yamwi nayo yaali nu kuya intunguluzi zya yantu.

16 “Pa nsita iiya nanenyile ya kapingula inu inti, ‘Lino muvwa umulandu pa ina inu, mwapingwila umu ulungami, upinguzi uli umwi kwene ulinzile ukuomba pa ina inu nanti kuli wino wafuma uku mpanga yuze. 17 Mutaaya na kapaatulula pa kupingula. Mwauvwa uku muntu musuulwe wakwe vino munguvwa uku muntu umucindame. Mutalinzile ukutiina antu, pano upinguzi u wakwe Leza; ndi cakuti umulandu wamukomela sana, mwanena nani nduvwa.’ 18 Pa nsita iiya namunenyile ivintu vyonsi vino mulinzile ukucita.

19 “Lyene twakatwike ukufuma uku Holebu nu kupita umu lwanga ulukalamba nupya ulwa kutiinya luno mwaweni ala mukuya uku ncende ya myamba iya Amoli, wakwe vino Yeova Leza witu watunenyile, nupya twasusile itufika uku Kadesyi-banea. 20 Lyene namunenyile inti. ‘Imufika ku ncende ya myamba iya Amoli ino Yeova Leza witu amatupeela. 21 Lolini, Yeova Leza winu watamupeela impanga. Yangini mukikalemo, wakwe vino Yeova Leza wa vikolwe vinu wamunenyile. Mutuvwa intete nanti ukutiina.’

22 “Lelo mwensi mwizile kuli nene nu kulanda ukuti, ‘Lekini tutume aonsi akuyaceeceta impanga nu kwizatunena inzila ino tungapita na vino imisumba ino tulazana yaya.’ 23 Vino mwalanzile vyali ningo, fwandi nasoolwile aonsi 12, nasoolwile umonsi wenga muli cila mutundu. 24 Yakatwike nu kuya uku ncende ya myamba, nupya yaile iyafika umu Mukonko wa Esyikoli nu kuceeceta impanga iiyo. 25 Yatozile ivizao vimwi ivya mu mpanga iiyo nu kuleta kuli sweswe, nupya izile iyatunena iyati, ‘Impanga ino Yeova Leza amatupeela iisuma.’ 26 Lelo mwakanyile ukuyako, nupya mutuvwilile vino Yeova Leza winu wamunenyile. 27 Mwatwalilile ukuilizyanya umu matenti inu ala mukuti, ‘Pa mulandu wakuti Yeova watupasile acino watufumizye umu Ijipti pakuti ace atupeele uku Ina Amoli yakatulovye. 28 I ncende ya musango ci ino tukuyako? Aina itu yalenzile tuvwe intete lino yalanzile iyati, “Kwaya antu aamaka nupya atali ukutucila, nupya imisumba yao ikulu nupya yakwata malinga atali sana, kuuku kwene akuno twaweni na ya mwana Anaki aonsi.”’

29 “Fwandi namunenyile inti, ‘Mutuvwa intete nupya mutatiina pa mulandu na aliyo. 30 Yeova Leza winu alamukoleelela nupya alamulwila, wakwe vino wacisile umu Ijipti ala mukulola nako. 31 Nupya mwaweni umu lwanga vino Yeova Leza winu wamusenzile konsi kuno mwayanga suka nu kufika uku ncende kwene yii wakwe vino isi akasenda umwanakwe umonsi.’ 32 Lelo asi mulandu na vyonsi vii, mutaataile Yeova Leza winu, 33 uwamukoleelelanga nu kulola incende pano mungapangila inkambi. Walangililanga ukuti wayanga namwe lino waomvyanga umoto usiku nu kuomvya ikumbi umusanya pakuti amulange inzila umwa kupita.

34 “Lyonsi Yeova uvwanga vino mwalandanga, nupya wasosile sana nu kulapa ati, 35 ‘Kusi umuntu nanti awenga umu nkulo yii iipe aalalola impanga isuma ino nalavile ukupeela ku vikolwe vinu, 36 suka sile Kalebu mwana Yefune. Wene alailola, ndapeela impanga ino wapisilemo kuli aliwe nu ku yana yakwe, pano walondiile Yeova nu mwenzo onsi. 37 (Nani kwene Yeova wansokiile pa mulandu namwe, nupya walanzile ati, ‘Naawe kwene utalingilamo. 38 Yoswa mwana Nuni aakaimilila pa nkoleelo yako, ali wino alingilamo. Umukomye* pano alalenga Aina Izlaeli ukupyana impanga iiyo.”) 39 Nupya ana inu yano mwatangi yalatupoka, yano ndakai yatamanya icisuma ni ciipe, yene yalingilamo, ndapeela ni mpanga iiyo kuli aliyo. 40 Lelo mwemo swililini umu lwanga, mupite inzila ya kuli Yemba Muyenzu.’

41 “Lino muvwile vivyo mwanenyile imuti, ‘Ituyembukila Yeova. Tumaya tukalwe, wakwe vino Yeova Leza witu watunenyile!’ Fwandi cila muntu watozile ivyanzo vya ulwi, nupya mwelenganyanga ukuti i cintu icanguke ukuya uku mwamba. 42 Lelo Yeova wanenyile ati, ‘Uyanene uti: “Mutalinzile ukuya umu kulwa, pano ntalaya namwe. Nga mwayako, mulacimviwa uku yalwani inu.”’ 43 Nalanzile namwe, nomba mwakanyile ukuvwa. Mwakanyile ukuvwa kuli vino Yeova walanzile nupya pa mulandu wakuti mwali ni cilumba mwaile uku mwamba. 44 Lyene Aina Amoli aikalanga umu mwamba uwa, izile nu kumukomenkanya nupya yamuzinginye wakwe vino inzimu zikazinganya, yamusalanganyizizye uku Seili ukufika nu ku Holima. 45 Fwandi mwawezile nu kutandika ukulila pa nkoleelo yakwe Yeova, lelo Yeova atuvwile kuli mwemwe nanti ukumwikako mano. 46 Ali mulandu uno mwatwalilile ukwikala umu Kadesyi pa manda aingi.

2 “Lyene twapiliwike nu kuya ku lwanga ukupita inzila ya kuli Yemba Muyenzu, wakwe vino Yeova wanenyile, nupya twapisile pa manda aingi ukuzinguluka Umwamba wa Seili. 2 Lyene pa cisila Yeova wanenyile ati, 3 ‘Manda yano mwazinguluka umwamba uu yavula. Lyene lungamini uku katutu. 4 Nupya nena antu ukuti: “Mulapita mu mupaka wa ina inu, kuli kuti amu lupwa lwakwe Esau, aakaikala umu Seili, nupya yaluvwa intete pa mulandu namwe, lelo mulinzile ukucenjela sana. 5 Mutaca muyalwisye, pano ntalamupeela impanga yao ili yonsi, nanti sile akacende kanono apa kulyata ulwazo, pa mulandu wakuti napeela Esau Umwamba wa Seili ukuya impanga yakwe. 6 Muce muyalipile impiya pa vyakulya vino mulalya na pa manzi yano mulamwa. 7 Pano Yeova Leza winu wamupaala muli vyonsi vino mwacita. Wamanya ningo ulwendo luno mwapita umu lwanga luu ulukalamba. Yeova Leza winu watwalilila ukuya namwe pa myaka yii yonsi 40, nupya mutuulizya nanti acimwi.”’ 8 Fwandi twapisile umupiipi na ina itu, kuli kuti amu lupwa lwakwe Esau, aakaikala umu Seili, twasiile inzila ya ku Alaba ni ya ku Elati ni ya ku Ezioni-gebeli.

“Lyene twapisile uku nzila ya ku lwanga lwa Moabu. 9 Nupya Yeova wanenyile ati, ‘Mutazanza nanti ukulwisya Aina Moabu, pano ntalamupeela impanga yao ili yonsi pa mulandu wakuti napeela amu lupwa lwakwe Loti impanga ya Ali. 10 (Mpiti aikalangamo aa Ina Emimu, yaali aamaka, aingi nupya yaali atali wa Ina Anaki. 11 Aina Lefaimu nayo kwene yayalolanga wa Ina Anaki, nupya Aina Moabu yamanga Aina Lefaimu yakuti Aina Emimu. 12 Ku cisila Aina Holi a ikalanga umu Seili, lelo amu lupwa lwakwe Esau yayacimvizye nu kupoka impanga ya Seili, nupya aliyo yatandike ukwikalamo, wakwe vino Aina Izlaeli yalacita uku mpanga ino yalikalamo ino Yeova alayapeela.) 13 Lyene pitangini nu kulamba umukonko wa Zeledi.’ Fwandi twalamvile umukonko wa Zeledi. 14 Catusendiile imyaka 38 pakuti tupite ukufuma uku Kadesyi-banea, kufikila na lino twalamvile umukonko wa Zeledi, mpaka inkulo yonsi iya yonsi ya ulwi ilowa umu nkambi, wakwe vino Yeova walafile kuli aliyo. 15 Ikasa lyakwe Yeova lyatwalilile ukuya pali aliyo pakuti yononwe umu nkambi ukufikila yonsi yafwa.

16 “Pa cisila sile icakuti aonsi yonsi aulwi yafwa, 17 Yeova wanenyile nupya kwene ati, 18 ‘Ilelo mumapita umu ncende ya Moabu, kuli kuti mu Ali. 19 Nga mwaca mwapalamila uku Ina Amoni, mutaca muyacuzye nanti ukuyasonka, pano ntalamupeela impanga yao ili yonsi, pa mulandu wakuti naipeela ku ya mu lupwa lwakwe Loti. 20 Antu yalolanga ukuti impanga iiyo nayo kwene iya Ina Lefaimu. (Mpiti Aina Lefaimu a ikalangamo, nupya Aina Amoni yamanga Aina Lefaimu yakuti Aina Zamuzumimu. 21 Yaakweti sana maka nupya yaali aingi, yaali atali kwati a Ina Anaki; lelo Yeova wavwile Aina Amoni ukuyacimvya, Aina Amoni yazinzile Aina Lefaimu nu kutandika ukwikala umu mpanga yao. 22 Vikwene avino wacisile nu ku ya mu lupwa lwakwe Esau yano ndakai yakaikala umu Seili, lino wayavwilizye ukucimvya Aina Holi, yazinzile Aina Holi nu kutandika ukwikala umu mpanga yao ukufika na ndakai. 23 Lelo Aina Avimu iikalanga umu mizi ino yakuuzile ukufika nu ku Gaza kufikila lino Aina Kafitoli aafumile uku Kafitoli* yayacimvizye nu kwikala umu ncende yao.)

24 “‘Katukini nu kulamba umukonko wa Alinoni. Lolini, imupeela Sihoni Umwina Amoli umwene uwa ku Hesyiboni. Fwandi tandikini ukupoka impanga yakwe nupya mumulwisye. 25 Ilelo nimalenga antu yonsi aya umu nsi auvwa pali mwemwe ukuvwa intete nu kumutiina. Yalapeziwa mano nupya yalazakaza pa mulandu namwe.’

26 “Lyene natumile antu ukufuma umu lwanga lwa Kedemoti nu kuya kuli Sihoni umwene wa ku Hesyiboni, natumile mazwi ya mutende inti, 27 ‘Leka impite umu mpanga yako. Ndapita sile umu museo, ntalapalukila ukwi lunji nanti kuli cimani. 28 Ndalya sile ivyakulya nu kumwa manzi yano ulankazya. Nzumilizye sile ukupita umu mpanga yako. 29 Vikwene avino amu lupwa lwakwe Esau aikalanga umu Seili na Ina Moabu aikalanga umu Ali yacisile kuli nene, kufikila nalamba Uluzi Lwa Yodani nu kuya umu mpanga ino Yeova Leza witu akutupeela.’ 30 Lelo Sihoni umwene wa ku Hesyiboni ataatuzumilizye ukupita umu mpanga yakwe, pano Yeova Leza winu walesile ukuti aye ni cilumba nu kuleka ukuti umwenzo wakwe uye ukome, pakuti amupeele umu makasa inu wakwe vino cili ndakai.

31 “Lyene Yeova wanenyile ati, ‘Inkupeela Sihoni kumwi ni mpanga yakwe. Poka impanga yakwe.’ 32 Lino Sihoni watukomenkinye kumwi na antu yakwe yonsi kuti yatulwisye pa Yahazi, 33 Yeova Leza witu wamupeezile kuli sweswe, icakuti twamucimvizye kumwi na ana yakwe na antu yakwe yonsi. 34 Twaposile imisumba yakwe yonsi ino wakweti pa nsita iiya nupya twayononyile kumwi na onsi, anaci alino na ana. Kutaali uwapuswike. 35 Twasenzile sile iviteekwa kumwi ni viya vyuze vino twazanyile umu misumba ino twaposile. 36 Kutandikila ku Aloeli incende iyayela mu mbali ya mukonko uwa Alinoni (kumwi nu musumba uwaya umu mukonko), kufika uku Gilyadi, kusi umusumba uno tutaafisileko. Yeova Leza witu watupeezile imisumba yonsi. 37 Lelo mutaaile ku mpanga ya Ina Amoni, ku mukonko onsi uwa Yaboki nu ku misumba iya ku ncende zya myamba, nanti ku ncende ili yonsi ino Yeova Leza witu walesizye.

3 “Lyene twapisile umu nzila iyaya ku Basyani. Nupya Ogi umwene wa ku Basyani wizile na antu yakwe yonsi uku kulwa naswe pa Edilei. 2 Nupya Yeova wanenyile ati, ‘Utamutiina, pano namamupeela umu minwe yako pamwi na antu yakwe yonsi ni mpanga yakwe, nupya umacita kuli aliwe wakwe vino wacisile kuli Sihoni umwene wa Ina Amoli uwikalanga umu Hesyiboni.’ 3 Fwandi Yeova Leza witu wapeezile umwene Ogi uwa ku Basyani pamwi na antu yakwe yonsi umu minwe itu, nupya twayakomile icakuti kusi nanti a wenga uwapuswike. 4 Lyene twaposile imisumba yakwe yonsi. Kutaali musumba nanti a onga uno tutaaposile pa misumba yonsi 60, kuli kuti incende yonsi iya Aligobu ino Ogi umwene wa ku Basyani wateekanga. 5 Misumba yii yonsi yakweti malinga atali, impongolo ni mifiikilo, alino ni misumba iingi iyaula malinga. 6 Lelo tononyile vyonsi vii wakwe vino twacisile uku mwene Sihoni uwa ku Hesyiboni, tononyile imisumba yonsi ukwikako na onsi, anaci kumwi na ana. 7 Nupya twaposile iviteekwa vyonsi ni vyuma ivya mu misumba.

8 “Pa nsita kwene iiya twaposile impanga yakwe ya mwene yaili Aina Amoli aikalanga umu ncende iya Yodani, kufuma ku mukonko wa Alinoni ukufika uku Mwamba wa Helimoni 9 (umwamba uno Aina Sidoni yamanga yakuti Silioni, nupya uno Aina Amoli yamanga yakuti Senili), 10 misumba yonsi iyaya mu mpanga itambalale, mpanga yonsi iya Gilyadi, ni mpanga yonsi iya Basyani kufika nu ku Saleka nu ku Edilei, kuli kuti misumba yonsi ino Ogi umwene wa ku Bashani wateekanga. 11 Pano Ogi umwene wa ku Basyani u wasyazile sile pa Ina Lefaimu. Imbokosi yakwe yapanzilwe ni cela,* nupya nalikwene icili yaya ku Laba mu mpanga iya Ina Amoni. Mu utali yali mamita 4, mu wipi namo yali mupiipi na mamita yaili kulingana ni cipimo icaomviwe. 12 Pa nsita iiya twaposile impanga yii, kutandikila uku Aloeli incende iyayela mupiipi nu mukonko uwa Alinoni alino na afu wa ncende ya myamba iya Gilyadi, nupya napeezile Aina Lubeni na Ina Gadi imisumba iiyo. 13 Nupya impanga ya Gilyadi iyasyazile ni mpanga yonsi iya Basyani ino umwene Ogi wateekanga napeezile afu wa mutundu wakwe Manase. Incende yonsi iya Aligobu iyali umu Basyani yamanyikwe ukuti i ya Ina Lefaimu.

14 “Jaili mwana Manase waposile incende yonsi iya Aligobu kufika nu ku mupaka uwa Ina Gesyuli na Ina Maakati, nupya watemiile imizi iiyo iya mu Basyani ukuti Havoti-jaili,* nupya na ndakai kwene ali vino yakayama. 15 Nupya napeezile impanga ya Gilyadi kuli Makili. 16 Nupya Aina Lubeni na Ina Gadi nayapeezile impanga ukufuma uku Gilyadi ukufika uku mukonko wa Alinoni, pakasi ka mukonko ali mupaka ukufika nu ku Yaboki, kuli kuti umukonko uwapakana ni mpanga iya Ina Amoni, 17 ni ncende iya Alaba ni ya Yodani alino ni ncende iya ku mupaka ukufuma ku Kineleti kufika kuli yemba wa Alaba, kuli kuti Yemba wa Musilya,* uwayela ku ncende isuluke iya Pisiga lwa ku ufumondaka.

18 “Lyene namunenyile inti: ‘Yeova Leza winu watamupeela impanga yii pakuti iye iinu. Aonsi inu yonsi aamaka yalatola ivyanzo, nupya yalakoleelela aina yako, kuli kuti Aina Izlaeli. 19 Suka sile ya mama inu na ana inu aalatwalilila ukwikala mu misumba ino imupeela, kumwi ni viteekwa vinu (namanya ukuti mwakwata iviteekwa ivingi sana), 20 kufikila lino Yeova alalenga aina inu ukupuuza, wakwe vino watacita kuli mwemwe, suka nayo kwene yace yakwate impanga ino Yeova Leza winu alayapeela ku mbalama ya Luzi Lwa Yodani. Lyene mulawela cila muntu pa ncende yakwe ino imupeela.’

21 “Pa nsita iiya nanenyile Yoswa inti: ‘Watuilolela vino Yeova Leza winu watacita kuli ya mwene yaa yaili. Vikwene avino Yeova alacita uku yantu na ya mwene yao yonsi yano mulazana. 22 Mutalinzile ukuyatiina, pano Yeova Leza winu aakumulwilako.’

23 “Pa nsita iiya napapaasile kuli Yeova inti, 24 ‘We Yeova Mwene wa Papelapela, watutandika ukulanga umuomvi wako ukulu wako na maka yako, uzye a leza ci umwi yulu nanti pano nsi, aangacita ivintu vii vya maka wakwe wewe? 25 Si leka impite nu kuyalola impanga isuma ili uku mbalama ya Luzi Lwa Yodani, impanga isuma iya myamba alino na Lebanoni.’ 26 Lelo walanga Yeova acili watansokela sana pa mulandu winu, nupya atuvwile kuli nene. Yeova wanenyile ati, ‘Walanda vyavula! Utaca uswilizye nupya ukunena pa mulandu uu. 27 Yanga pa mwamba uwa Pisiga ukalole impanga, ulole uku uwondaka, ku katutu, ku kaeya nu ku ufumondaka, pano utalalamba uluzi luu lwa Yodani. 28 Sonta Yoswa ukuya intunguluzi, umukomelezye nupya umukomye, pano aaliwe alatungulula antu yaa, nupya aliwe alalenga ukuti yakingile umu mpanga ino umalola.’ 29 Vii vyonsi vyacitike lino twikalanga umu mukonko uwalozyanya nu musumba uwa Beti-peoli.

4 “Lyene mwe Ina Izlaeli, uvwini masunde yano nkumusambilizya ukuti mwalondela, pakuti muye nu umi nu kucaingila umu mpanga ino Yeova Leza wa vikolwe vinu akumupeela. 2 Mutalinzile ukulundapo nanti ukufumyapo pa mazwi yano nkumunena, pakuti mwasunga masunde yakwe Yeova Leza winu.

3 “Mwailoliile vino Yeova wacisile kuli Baali uwa ku Peoli; Yeova Leza winu, ononyile antu yonsi apefile Baali uwa ku Peoli. 4 Lelo mwensi mwemuno mwatwalilile ukuvwila Yeova Leza winu, muli nu umi ndakai. 5 Lolini, namisambilizya masunde yonsi wakwe vino Yeova Leza wane wanenyile, pakuti muce mwayalondela umu mpanga ino mulikalamo. 6 Mwaikisya mano ku kuyalondela pano alino antu aaluvwa masunde yaa yonsi, yalalola ukuti mwaya na mano nupya mukailuka, nupya yalalanda yati, ‘Antu yaa yaya na mano nupya yakailuka.’ 7 Uzye u luko ci ulukalamba ulwakwata ya leza aya umupiipi nalo wakwe vino Yeova Leza witu waya umupiipi naswe lyonsi lino twalilila kuli aliwe? 8 Nupya uzye u luko ci ulukalamba ulwakwata masunde alungame wakwe yaa yano nkumupeela ilelo?

9 “Mucenjele nupya mwaisakamala sana, pakuti mutaca mwilile ivintu vino mwailoliile, na pakuti vitaca vifume umu myenzo inu manda inu yonsi. Nupya mulinzile ukunena ana inu na izikulu inu ivintu vii. 10 Pa wanda uno mwimilile pa nkoleelo yakwe Yeova Leza winu ku Holebu, Yeova wanenyile ati, ‘Kolonganika antu ize kuli nene pakuti njanene mazwi yane, kuti yasambilile ukuntiina manda yonsi yano yali nu umi na pakuti yace yasambilizye ana yao.’

11 “Lyene mwizile umupiipi nu kwimilila umwisika lya mwamba nupya umwamba wapyanga, umoto wafikanga nu mwi yulu; kwali mfinzi na makumbi. 12 Nupya Yeova watandike ukumuvwanzya ukufuma umu moto. Muvwanga umwi akuvwanga, lelo mutaweni nanti acimwi, muvwanga sile izwi. 13 Nupya wapangine upangano namwe, uno wamunenyile ukulasunga kuli kuti Masunde 10. Pa cisila, wayalemvile pa mawe yaili apapatane. 14 Pa nsita iya Yeova wanenyile ukuti musambilizye masunde, yano mulalondela umu mpanga ino mulingilamo.

15 Fwandi, mwaisakamala sana pano mutaaweni cili consi pa wanda uno Yeova wavwanzile kuli mwemwe ku Holebu kufuma umu moto 16 pakuti mutaca mucite iciipe ukupitila umu kuipangila cilubi icikoline na cimwi, kuli kuti icikoline nu monsi nanti mwanaci, 17 icikoline ni nyama ili yonsi nanti icunyi cili consi icikapapuka, 18 icikoline ni cintu icili consi icikasela pa musili nanti icikoline ni nswi ili yonsi. 19 Nupya nga mwalingamila umwi yulu nu kulola ilanzi, umwezi ni ntanda kuli kuti vyonsi ivya mwi yulu, mutalinzile ukubepwa nu kuvifukamila alino nu kuviombela. Yeova Leza winu wavipeela uku yantu yonsi aya umu nsi. 20 Lelo mwemwe Yeova watozile nu kumufumya umwi lungu lino yakasungulwila ivyela, kuli kuti ukufuma umu Ijipti, pakuti muye antu yakwe, wakwe vino muli ilelo.

21 “Yeova wansokiile pa mulandu namwe nupya walafile ati ntalalamba Uluzi Lwa Yodani, nanti ukwingila umu mpanga ino Yeova Leza winu akumupeela pakuti iye iinu. 22 Fwandi namafwila umu mpanga kwene yii, ntalalamba Uluzi Lwa Yodani, lelo mwemo mulalamba nu kuyaikala umu mpanga yii isuma. 23 Mucenjele pakuti mutaca mwilile upangano uno Yeova Leza winu wapangine namwe, nupya mutalinzile ukuipangila icinkolanya iciwaze kuli kuti cinkolanya icili consi cino Yeova Leza winu wamulesizye. 24 Pano Yeova Leza winu waya wa moto uukaoca, a Leza akalonda ukumupepa sile wenga.

25 “Ndi cakuti mwaca mwakwata ana na izikulu nu kwikala imyaka ingi umu mpanga nupya mwaca mwacita ivingamuletelela, nu kupanga ivinkolanya ivya misango ipusanepusane nu kucita iviipe kuli Yeova Leza winu pakuti mumusosye, 26 ilelo aya umwi yulu nu mu nsi aakambone yane, nkumunena ukuti i cumi mulononwa zuwa mu mpanga ino mulikalamo nga mwalamba uluzi Lwa Yodani. Mutalalengelamo, lelo mulacimviwa. 27 Yeova alamusalanganyizizya umu yantu, nupya anono sile muli mwemwe aalapusuka, mu nko zino Yeova alamuzingilamo. 28 Kuko akuno mulaya mukaombele ya leza ya miti na amawe apangwa na antu kuli kuti ya leza aasilola nanti ukuvwa nanti ukulya nanti ukununsya.

29 “Ndi cakuti mwaca mwalonda Yeova Leza winu kuuku kwene, mulamuzana kuli kuti nga mwaca mwamulonda ni myenzo inu yonsi nu umi winu onsi. 30 Lino mulaya umu ntazi ikalamba nupya pa cisila vii vyonsi vyaca vyamucitikila, lyene alino mulawela kuli Yeova Leza winu, nu kuvwa ukwi izwi lyakwe. 31 Pano Yeova Leza winu, a Leza uwaya nu luse. Atalamusya nanti ukumonona nanti ukwilila upangano uno walafile uku vikolwe vinu.

32 “Elenganyini pa manda ya ku cisila ukufuma pano Leza waumbiile umuntu pano nsi, londelezyini ukufuma uku mpela iiyulu kufika uku mpela yuze iiyulu. Uzye icintu cili consi cikalamba catala cacitikapo nanti ukuvwikapo? 33 Uzye kwaya antu yauze aatala yuvwapo izwi lyakwe Leza ukufuma umu moto wakwe vino mwemo muvwile nu kutwalilila ukuya nu umi? 34 Nanti uzye Leza, watala wezya ukutola uluko ukufuma umu luko luze ukuomvya upinguzi,* vimanyililo, vizungusyo, inkondo, amaka, ni vintu vya kutiinya, wakwe vino Yeova Leza winu wacisile kuli mwemwe umu Ijipti ala mukulola nako? 35 Mwemo mwaweni vintu vii pakuti mumanye ukuti Yeova ali Leza wa cumi kutaya na muze. 36 Walesile ukuti muvwe izwi lyakwe ukufuma ukwi yulu pakuti amulungike, nupya walesile ukuti mulole umoto ukalamba umu nsi, muvwile na mazwi yakwe ukufuma umu moto.

37 “Pa mulandu wakuti watemilwe ivikolwe vinu nupya wasoolwile ana yao, wayanga namwe lino wamufumizye umu Ijipti uku maka yakwe. 38 Wazinzile inko izikalamba nupya izya maka ukumucila ala mukulola nako nu kumwingizya umu mpanga yao, alino nu kuipeela kuli mwemwe kuti iye inu, wakwe vino cili ndakai. 39 Fwandi ilelo mumanye nupya mwaiusya ukuti, Yeova ali Leza wa cumi umwi yulu na pano nsi. Kutaya na muze. 40 Mwasunga masunde yakwe yano nkumupeela ilelo, pakuti vintu vimuzipile kumwi na ana inu na pakuti mwikale manda aingi umu mpanga ino Yeova Leza winu akumupeela.”

41 Pa nsita iya Mose wapatwile imisumba itatu ku ufumondaka wa luzi lwa Yodani. 42 Ndi cakuti umwi wakoma umuze lelo kusi uku mufulo nupya uku cisila atamupasile, alinzile ukuutukila uku musumba onga pa misumba iyo, nu kuyaikala kuko kwene. 43 Aina Lubeni yalautukila uku musumba wa Bezeli uku lwanga ulwayela pa ncende itambalale, Aina Gadi nayo yalautukila uku Lamoti mu Gilyadi alino Aina Manase nayo yalautukila uku Golani mu Basyani.

44 Yakwene ali Masunde yano Mose wapeezile Aina Izlaeli. 45 Vikwene ali vya kwiusya, upinguzi na masunde yano Mose wapeezile Aina Izlaeli lino yafumile umu Ijipti, 46 mu ncende iya Yodani umu mukonko uwalozyanya na Beti-peoli umu mpanga yakwe Sihoni umwene uwa Ina Amoli uwikalanga uku Hesyiboni, wino Mose na Ina Izlaeli yacimvizye pa cisila ca kufuma umu Ijipti. 47 Nupya yaposile impanga yakwe ni mpanga iya mwene Ogi uwa ku Basyani, kuli kuti aene yaili a Ina Amoli aikalanga umu ncende ya ku ufumondaka wa Yodani, 48 ukufuma uku musumba wa Aloeli uwayela umu mbali ya mukonko wa Alinoni, kufika nu ku mwamba wa Siyoni kuli kuti Helimoni, 49 ni ncende yonsi ya Alaba iyaela uku ufumondaka wa Yodani kufika na kuli yemba uwa Alaba umwisika ya ncende ya Pisiga.

5 Lyene Mose wamile Aina Izlaeli yonsi nu kuyanena ati: “Mwe Ina Izlaeli, uvwini masunde yano nkumunena ilelo, nupya mulinzile ukuyasambilila nu kulayalondela sana. 2 Yeova Leza witu wapangiine upangano naswe umu ncende ya Holebu. 3 Yeova ataapangiine upangano uu ni vikolwe vitu, lelo wapangiine naswe, swensi swemuno tuli nu umi ndakai. 4 Yeova walanzile namwe ukufuma umu moto pa mwamba ala imulozyanya nawe ivinso. 5 Pa nsita iiya nimilile pakasi kakwe Yeova namwe, ala nkumunena vino Yeova walandanga, pano mwatiinanga umoto nupya mutaaile pa mwamba. Leza walanzile ati:

6 “‘Nene indi Yeova Leza wako, uwakufumizye umu uzya umu Ijipti. 7 Utaapepa ya leza yauze suka sile nene.

8 “‘Utalinzile ukuipangila icilubi nanti cintu consi icakolana ni ca mwi yulu nanti icaya mu nsi nanti mu manzi. 9 Utalinzile ukuvifukamila nanti ukutunkwa ukuviombela, pano ne Yeova Leza wako, nene Leza aakalonda ukupepwa sile wenga, aakafulula ana na izikulu ni vizikulula pa membu zyakwe ya isi ampata, 10 lelo wino akalanga ukutemwa kwa cisinka uku nkulo masauzandi yakwe yayo aantemwa nupya akakonka masunde yane.

11 “‘Utaomvya izina lyakwe Yeova Leza wako umu nzila iipe, pano Yeova atalalekapo sile ukwaula ukufulula yayo akaomvya izina lyakwe umu nzila iipe.

12 “‘Wasunga uwanda wi Sabata nu kuulola ukuti uwa muzilo, wakwe vino Yeova Leza wako wakunenyile. 13 Uwaomba imilimo yako yonsi umu manda 6, 14 lelo uwanda uwalenga 7 i sabata kuli Yeova Leza wako. Utaaomba umulimo uli onsi, wewe, umwanako umulumendo nanti umwanako umukazyana, nanti umuzya wako umonsi nanti umuzya wako umukazyana nanti a cipambasi wako nanti a punda nanti i citeekwa cako icili consi nanti sile u mwenyi wako aakaikala umu musumba uno naawe ukaikalamo, pakuti umuzya wako umonsi nu muzya wako mukazyana yapuuze pamwi naawe. 15 Mwaiusya ukuti mwali azya umu mpanga iya Ijipti nu kuti Yeova Leza winu wamufumizyemo ukuomvya ikasa lyakwe ilya maka. Ali mulandu uno Yeova Leza winu wamuneniile ukuti mwasunga uwanda uwi Sabata.

16 “‘Wacindika tata wako na mayo wako, wakwe vino Yeova Leza wako wakunenyile, pakuti uwikale manda aingi na pakuti ivintu vyakuzipila umu mpanga ino Yeova Leza wako akukupeela.

17 “‘Utaakoma.

18 “‘Utaacita ucende.

19 “‘Utaiya.

20 “‘Utaapeela ukambone wa ufi pa muzo.

21 “‘Nupya utaakumbwa umuci wa muzo. Nanti ukukumbwa ing’anda ya muzo nanti icalo cakwe nanti umuzya wakwe umonsi nanti umuzya wakwe umukazyana nanti a cipambasi wakwe nanti a punda wakwe nanti sile i cili consi cino wakwata.’

22 “Yeova walanzile masunde yaa kuli mwensi pa mwamba, nupya izwi ilikalamba lyafumanga umu moto, mwi kumbi nu mu mfinzi ikalamba, nupya ataalanzile mazwi na yauze; lyene walemvile masunde pa mawe yaili apapatane nu kuyapeela kuli nene.

23 “Lelo lino muvwile sile izwi likuvwanga ukufuma umu mfinzi, ala nu mwamba ukupya, intunguluzi zyonsi izya mu mitundu inu pamwi na akalamba iizile kuli nene. 24 Lyene mwalanzile imuti, ‘Yeova Leza witu watatulanga ululumbi lwakwe nu ukulu wakwe, nupya ituvwa izwi lyakwe ukufuma umu moto. Ilelo twailolela ukuti Leza angalanda nu muntu, nupya umuntu wiyo angatwalilila ukuya nu umi. 25 Nga lyene u mulandu ci uno tumafwila? Pano tumapya nu moto. Nga twatwalilila ukuvwa ukwi zwi lyakwe Yeova Leza witu, tumafwa. 26 Pano uzye kwatala kwaya uuvwa Leza akuvwanga ukufuma umu moto wakwe vino ituvwa nu kutwalilila ukuya nu umi? 27 Wewe kwene yanga umupiipi pakuti ukuvwe vyonsi vino Yeova Leza witu amalanda, nupya wewe kwene wizatunena vino Yeova Leza witu amakunena, naswe tumaiza tuvwe nu kucita vivyo kwene.’

28 “Yeova uvwile vino mwanenyile, nupya Yeova wanenyile ati, ‘Inuvwa vino antu yaa iyakunena. Vyonsi vino iyalanda vili sile ningo. 29 Ndi cakuti yalantiina lyonsi nu kulondela masunde yane yonsi; lyene ivintu vilaayazipila kumwi na ana yao amanda pe! 30 Pitanga ukayanene uti: “Swililini uku matenti inu.” 31 Lelo wemo usyale nani pakwene, nimakunena masunde yonsi nu upinguzi, vino ulinzile ukuyasambilizya nupya vino yalalondela mu mpanga ino nkuyapeela ukuti yaikalamo.’ 32 Mwe Ina Izlaeli mulinzile ukwikisya mano uku kucita vino Yeova Leza winu watamunena. Mutalinzile ukupaalukila ukwi lunji nanti kuli cimani. 33 Mulinzile ukulondela vyonsi vino Yeova Leza winu watamunena, pakuti ivintu vikamuzipile nu kwikala manda aingi umu mpanga ino mukuyamo.

6 “Yaa ali masunde yano Yeova Leza winu wamupeela kuti amusambilizye, kuti muce mwayalondela lino mulingila umu mpanga ino mulikalamo, 2 pakuti mwatiina Yeova Leza winu nu kusunga masunde yakwe yonsi yano nkumunena, kuli kuti mwemwe na ana inu na izikulu inu manda yonsi yano muli nu umi, pakuti mwikale manda aingi. 3 Uvwini mwe Ina Izlaeli, nupya mwaikisya mano uku kulondela masunde pakuti ivintu vyamuzipila na pakuti muvule sana umu mpanga umwaya umukaka nu uci, wakwe vino Yeova Leza wa vikolwe vinu wamulavile.

4 “Uvwini mwe Ina Izlaeli: Yeova Leza witu a Yeova wenga. 5 Mwatemwa Yeova Leza winu ni myenzo inu yonsi nu umi winu onsi alino na maka inu yonsi. 6 Mazwi yaa yano nkumunena ilelo yalinzile ukuya umu myenzo inu, 7 nupya mulinzile mwayasambilizya uku yana inu nu kuyalandapo lino mutenzi umu mang’anda inu, lino muli pa lwendo, pa kulaala na pa kuzyuka. 8 Muyanyepelele uku makasa inu pakuti yaye iciusizyo, nupya yafwile ukuya wa cimanyililo pa vipuma vinu. 9 Muyalembe pa mafulemu ya ku visaasa vya mang’anda inu na pa mpongolo zinu.

10 “Lino Yeova Leza winu alamwingizya umu mpanga ino walafile ukupeela uku vikolwe vinu, kuli kuti kuli Abulahamu, Isaki na Yakobo, impanga iyakwata imisumba ikalamba nupya isuma ino mutaakuuzile, 11 mang’anda umwaya ivintu visuma vya misango yonsi vino mutaaombiile, vifula vya manzi vino mutiimvile, alino ni vyalo vya myangazi ni miti ya miolivi ino mutaalemile, nupya mulaalya nu kwikuta, 12 muce mucenjele pakuti mutaca mwilile Yeova uwamufumizye umu mpanga ya Ijipti muno mwali azya. 13 Yeova Leza winu awino mulinzile ukutiina, awino mulinzile ukuombela, nupya umwi zina lyakwe amuno mulinzile ukulapila. 14 Mutalinzile ukulaombela ya leza yauze, ya leza ali yonsi aa yantu aamuzinguluka, 15 pano Yeova Leza winu aali namwe akalonda ukupepwa sile wenga. Nga cisi vivyo, ukali wakwe Yeova Leza winu uliza pali mwemwe, nupya alamulovya umu nsi.

16 “Mutalinzile ukwezya Yeova Leza winu wakwe vino mwamwezizye pa Masa. 17 Mwaikisya mano uku kulondela masunde yano Yeova Leza winu atamunena ukuti mwalondela. 18 Mwacita ivilungame nupya vino Yeova akalola ukuti ivisuma, pakuti ivintu vyamuzipila na pakuti muce mwingile umu mpanga isuma ino Yeova walafile ukuti alapeela ivikolwe vinu, 19 ukupitila umu kuzinga alwani inu yonsi wakwe vino Yeova walavile.

20 “Uku nkoleelo lino ana inu yalaamuzya ukuti, ‘U mulandu ci uno Yeova Leza witu wamupeeliile masunde?’ 21 Muce muyanene muti, ‘Twali azya yakwe Falao umu Ijipti, lelo Yeova watufumizyemo uku maka yakwe. 22 Fwandi twailoliile lino Yeova wacitanga vimanyililo ni vizungusyo ivikalamba nupya ivya kutiinya pa Ina Ijipti, pali Falao alino na pa ya mu ng’anda yakwe yonsi. 23 Nupya watufumizyemo nu kutuleta kuno pakuti atupeele impanga ino walafile ukupeela ivikolwe vitu. 24 Lyene Yeova watunenyile ukulalondela masunde yaa yonsi nu kutiina Yeova Leza witu kuti ivintu vitwalilile ukutuzipila, pakuti tuye nu umi wakwe vino cili ndakai. 25 Nupya tulaya alungami ndi cakuti tukwikisyako mano ukulondela masunde yaa yonsi lino tukuvwila Yeova Leza witu, wakwe vino watunenyile.’

7 “Lino Yeova Leza winu alamupeela impanga ino mukuyamo pakuti iye iinu, alamuzingila ni nko izikalamba, kuli kuti Aina Hiti, Aina Giligasi, Aina Amoli, Aina Kenani, Aina Pelizi, Aina Hivi na Ina Yebusi, kuli kuti inko izikalamba 7 nupya izya maka ukumucila. 2 Yeova Leza winu, alapeela inko zii kuli mwemwe, nupya mulazicimvya. Muce musininkizye ukuti mwazyonona. Mutaca mupangane upangano uli onsi nazyo nanti ukuzyuvwila uluse. 3 Mutalinzile ukutwalizyanya nayo. Mutalinzile ukupeela ana inu akazyana uku yana yao aonsi nanti ukuleka ana inu aonsi yatwale ana yao akazyana. 4 Pano yalalenga ana inu aonsi ukuta ukuombela Leza nu kutandika ukuombela ya leza yauze; lyene ukali wakwe Yeova uliza pali mwemwe, nawe alamonona lilyo kwene sile.

5 “Lelo vino mulinzile ukucita aevi: Mulinzile ukonona maulambo yao, ukutamoola ivipilala vyao vino yakapepa, kukomoola incesi zyao zino yakapepa alino nu koca ivilubi vyao. 6 Pano mwemwe yantu ya muzilo kuli Yeova Leza winu, nupya pa yantu yonsi aaya pano nsi, Yeova Leza winu wamusoolola ukuya antu yakwe aiyele.

7 “Icalenzile ukuti Yeova amutemwe nu kumusoolola asi pa mulandu wakuti mwali antu aingi sana pa yantu yonsi, mwemwe mwali antu anono sana pa yantu yonsi. 8 Lelo Yeova waomvizye maka yakwe ukumufumya umu uzya kuli Falao umwene wa ku Ijipti pa mulandu wakuti Yeova wamutemilwe nupya walondanga ukufikilizya umulapo uno walafile uku vikolwe vinu. 9 Mwamanya ningo ukuti Yeova Leza winu ali Leza wa cumi, Leza uwaya ni cisinka, aakasunga upangano wakwe nupya uwaya nu kutemwa kwa cisinka uku nkulo masauzandi aa yantu aamutemwa nupya aakasunga masunde yakwe. 10 Lelo antu aamupata alayonona. Atalasumba ni nsita ukufulula yano yamupata; alayacitila iviyalinzile. 11 Fwandi mwaikisya mano uku kusunga masunde yano nkumupeela ilelo, pakuti mwayalondela.

12 “Ndi cakuti mwatwalilila ukuvwila masunde yaa nu kuyasunga alino nu kuyalondela, Yeova Leza winu alasunga upangano nu kutemwa ukwa cisinka vino walafile uku vikolwe vinu. 13 Alamutemwa nupya alamupaala nu kulenga ukuti muvule. Alalenga ukuti mukwate ana aingi nu kuleka ukuti mwazombola ivyakulya ivingi, ingano, waini umupya na mafuta, mulakwata ni ng’ombe izingi ni mfwele umu mpanga ino Leza walafile uku vikolwe vinu ukuti alaipeela kuli mwemwe. 14 Mulaya antu aapaalwe sana pa yantu yonsi; kusi umonsi nanti umwanaci muli mwemwe aatalakwatapo umwana, nupya kutalaya iviteekwa vinu ivitalakwata utwana. 15 Yeova alafumya indwala zyonsi pali mwemwe, nupya atalamuletela indwala izili zyonsi izipisye zino mwamanyile umu Ijipti. Lelo alazitwala pali yayo yonsi aamupata. 16 Muce monone antu yonsi yano Yeova Leza winu alamupeela. Mutaca muyuvwile uluse, nupya mutaca mwaombela ya leza yao, pano cico cingaya iciteyo kuli mwemwe.

17 “Ndi cakuti waca welenganya ukuti, ‘Antu yaa yavulisya ukutucila. Uzye ningayazinga uli?’ 18 utalinzile ukuyatiina. Uwaiusya vino Yeova Leza wako wacisile kuli Falao na Ina Ijipti yonsi 19 nu upinguzi ukalamba uno waweni alino ni vimanyililo ni vizungusyo na maka aingi yano Yeova Leza wako waomvizye pa kukufumya umu Ijipti. Vikwene avino Yeova Leza wako alacita uku yantu yonsi yano ukatiina. 20 Yeova Leza wako alalenga ukuti yaye ni ntete kufikila yonsi aalasyala na alafisama kuli wewe yace yafwe. 21 Utuvwa intete pa mulandu na aliyo, pano Yeova Leza wako ali naawe, Leza uwaya na maka nupya uwa kutiinya.

22 “Yeova Leza winu alaamuzingila inko zii panono panono. Mutalazumiliziwa ukuzyonona pa nsita sile inono, pakuti ivilyanyi vya mu mpanga vitaca vivule nu kuleka kuti muye umu uzanzo. 23 Yeova Leza winu alazipeela kuli mwemwe nu kuzicimvya ukufikila zice zilowe. 24 Alamupeela ya mwene aa nko zizyo, nupya mulafuuta mazina yao umu nsi. Kusi aalacimvyanya namwe ukufikila muce muyonone. 25 Mulinzile ukoca ivinkolanya vyakwe ya leza yao umu moto. Mutalinzile ukukumbwa siuva nanti goldi uwaya uku vintu vivyo nanti ukumutola ukuti aye uwinu, pakuti ataca aye iciteyo kuli mwemwe, pano i ca winyi kuli Yeova Leza winu. 26 Mutalinzile ukwingizya icintu cimwi ica winyi umu mang’anda inu, pakuti mutalinga ukononwa wa cintu kwene cico. Mulinzile ukucipatisya nu kucilola ukuti ica winyi, pano icintu cico cilinzile ukononwa.

8 “Mwaikisya mano umu kulondela masunde yonsi yano nkumupeela ilelo, pakuti mutwalilile ukuya nu umi nu kuvula alino nu kwikala umu mpanga ino Yeova walavile ukupeela uku vikolwe vinu. 2 Mwaiusya umuseo utali uno Yeova Leza winu walenzile ukuti mupitemo pa myaka 40 umu lwanga, pakuti amulenge ukuya aicefye nu kumwezya pakuti alole ivyali umu myenzo inu, nga mwali nu kutwalilila ukulondela masunde yakwe nanti foo. 3 Fwandi wamulenzile ukuya aicefye nu kuleka kuti muye ni nzala nupya wamuliisizye mana wino mwemo ni vikolwe vinu mutaamanyile, pakuti mumanye ukuti umuntu atanga aye nu umi uku cakulya citupu suka nu ku mazwi yonsi aakafuma umu kanwa kakwe Yeova. 4 Ivyakuzwala vinu vitaatazile visilepo nupya mutaatazile mukwate ivilonda uku ngazo pa myaka 40. 5 Mwamanya ningo umu myenzo inu ukuti wakwe viivi kwene vino isi akalungika umwanakwe umulumendo, avino na Yeova Leza winu wamulungikanga.

6 “Mwasunga masunde yakwe Yeova Leza winu ukupitila umu kucita ukulonda kwakwe nu kuya na katiina kuli aliwe. 7 Pano Yeova Leza winu akumutwala umu mpanga isuma, impanga iyakwata inguzi, tufukoka ni vifula ivyaya umu nyika nu mu ncende ya myamba, 8 impanga umwaya ingano na baale, imiti ya myangazi, miti ya masamvu na mapomegilaneti, impanga umwaya mafuta ya miolivi nu uci, 9 impanga muno ivyakulya vitalatala visile nupya muno mutalulizya icili consi, impanga umwaya mawe aakupangilamo ivyela nupya muno mulaimba koopa umu myamba.

10 “Lino mulaalya nu kwikuta, muce mwalumbanya Yeova Leza winu pa mulandu ni mpanga isuma ino alamupeela. 11 Muce mucenjele pakuti mutaca mwilile Yeova Leza winu kupitila umu kufilwa ukusunga masunde yakwe yano nkumupeela ilelo. 12 Lino mulaalya nu kwikuta nu kukuula mang’anda asuma nu kwikalamo, 13 lino ing’ombe zinu ni mfwele ni mbuzi vilasandana nupya lino mulakwata siuva na goldi umwingi ni vintu vyuze ivingi, 14 mutaca muleke imyenzo inu iye ni cilumba nu kumulenga ukwilila Yeova Leza winu uwamufumizye umu mpanga ya Ijipti umu uzya, 15 uwalenzile ukuti mupite umu lwanga ulukalamba nupya ulwa kutiinya, umwali inzoka zya usungu na makalela nupya muno impanga yaali iyume umwaula manzi. Walenzile ukuti manzi yafume umu ciliwe icikome 16 nupya wamuliisizye mana umu lwanga wino ivikolwe vinu vitaamanyile, kuti amulenge ukuya aicefye alino nu kumwezya pakuti ivintu vice vimuzipile uku nkoleelo. 17 Ndi cakuti mulelenganya ukuti, ‘Amaka yane aalenga ukuti nkwate ivyuma vii,’ 18 muce mwaiusya ukuti Yeova Leza winu aakamupeela maka pakuti mukwate ivyuma, kuti afikilizye upangano uno walafile uku vikolwe vinu, wakwe vino cili ndakai.

19 “Ndi cakuti mulilila Yeova Leza winu nu kutandika ukulondela ya leza yauze nu kuyaombela alino nu kuyapepa, nkumunena ilelo ukuti i cumi mulafwa. 20 Mulononwa wa nko zino Yeova akonona, pa mulandu wa kukanauvwila izwi lyakwe Yeova Leza winu.

9 “Uvwini mwe Ina Izlaeli, ilelo mukulamba Yodani nu kuyapoka impanga umwaya inko izikalamba nupya izya maka ukumucila, umwaya imisumba ikalamba nupya iya malinga atali sana, 2 mwaya antu atali nupya amaka ya mwana Anaki, yano mwamanya nupya yano muvwa calandwa pali aliyo ukuti, ‘Uzye a weni aangalwisya ya mwana Anaki?’ 3 Fwandi ilelo mulinzile ukumanya ukuti Yeova Leza winu amamukoleelela. Wene waya wa moto uukaoca, nupya alayalovya. Alayacimvya ale mukulola nako pakuti muce muyazinge zuwa nu kuyonona, wakwe viivi kwene vino Yeova wamulavile.

4 “Lino Yeova Leza winu alazinga antu yaa ukufuma kuli mwemwe, mutaca mulande umu myenzo inu muti, ‘Yeova wandeesile ukuti nikale umu mpanga yii pa mulandu nu ulungami wane.’ Lelo Yeova akuzinga inko zii ukufuma kuli mwemwe pa mulandu ni miyele iipe ino zyakwata. 5 Icilalenga ukuti mwikale umu mpanga yao, asi pa mulandu nu ulungami winu nanti usuma wa myenzo inu. Lelo a pa mulandu ni miyele iipe iya nko zii acino Yeova Leza winu akuzizingila ukufuma kuli mwemwe na pakuti Yeova afikilizye mazwi yano walavile uku vikolwe vinu, Abulahamu, Isaki na Yakobo. 6 Manyini ukuti Yeova Leza winu asikumupeela impanga yii isuma kuti mwikalemo, pa mulandu wakuti mwemwe yalungami, mwemo mwakoma imyenzo.

7 “Iusyini vino mwasosizye Yeova Leza winu umu lwanga. Kufuma pano mwafumiile umu mpanga ya Ijipti ukufika pano mwingiliile umu ncende yii, mukapondokela Yeova. 8 Nanti sile a pa mwamba wa Holebu mwasosizye Yeova, nupya Yeova wamusokiile sana icakuti walondanga nu kumulovya. 9 Lino naile pa mwamba pakuti nkapoke mawe apapatane, mawe ya upangano uno Yeova wapangine namwe, nikazile pa mwamba manda 40 musanya nu usiku ukwaula ukulya ivyakulya nanti ukumwa manzi. 10 Lyene Yeova wampeezile mawe yaili apapatane pano walemvile nu munwe wakwe, nupya pa mawe yayo paali amazwi yonsi yano Yeova wamunenyile ukufuma umu moto lino mwakolongine pa mwamba. 11 Pa cisila ca manda 40, Yeova wampeezile mawe yaili apapatane, kuli kuti mawe ya upangano, 12 nupya Yeova wanenyile ati, ‘Katuka, ikilila umwamba zuwa zuwa, pano antu yano wafumizye umu Ijipti iyacita icintu icipiisye. Iyasenuka zuwa nu kuta ukulondela vino nayanenyile. Iyaipangila icilubi ca cela.’ 13 Nupya Yeova wanenyile ati, ‘Indola ukuti antu yaa aakome imyenzo. 14 Leka indovye antu yaa nu kufuuta izina lyao umu nsi, nupya leka mpange uluko lwa maka ukufuma muli wewe umulaya antu aingi ukucila vino yali.’

15 “Lyene napiliwike nu kwikilila umwamba ala ukupya, nupya ala insenda mawe yaili apapatane aa upangano umu minwe yane. 16 Lyene naweni ukuti imuyembukila Yeova Leza winu! Mwaipangiile icilubi ca kana ka ng’ombe ica cela. Mwasenwike zuwa nu kuta ukulondela vino Yeova wamunenyile. 17 Fwandi natozile mawe yaili apapatane nu kuyasumba pansi nupya nayatamile ala mukulola nako. 18 Lyene nafukime pa nkoleelo yakwe Yeova pa manda 40 musanya nu usiku, wakwe vino nacisile pa kutandika. Ntaliilepo ivyakulya nanti ukumwa manzi, pa mulandu ni membu zinu zyonsi zino mwacisile ukupitila umu kucita iviipe kuli Yeova nu kumusosya. 19 Pano nuvwile intete pa mulandu na vino Yeova wamusokiile sana nupya wakasi ukumulovya, lelo Yeova uvwile kuli nene na pa nsita kwene iiya.

20 “Yeova wasokiile sana Aloni nupya walondanga ukumulovya, lelo namupaapatiileko na pa nsita kwene iiya. 21 Lyene natozile icintu ica luyembu cino mwapanzile, kuli kuti umwana wa ng’ombe nu kucoca umu moto; nacitamozile nu kucivungoola ukufikila iciya ulukungu, lyene nasumbiile ulukungu lulo umu kaluzi akakapita ukufuma pa mwamba.

22 “Nupya pa Tabela, pa Masa na pa Kibuloti-hataava napo kwene mwasosizye Yeova. 23 Lino Yeova wamufumizye uku Kadesyi-banea nu kulanda ukuti, ‘Yangini nu kuyaikala umu mpanga ino ndamupeela!’ nupya kwene mwapondokile Yeova Leza winu, mutaamutaile nupya mutaamuvwilile. 24 Mukapondokela Yeova ukufuma pano namumanyila.

25 “Fwandi natwalilile ukufukama pa nkoleelo yakwe Yeova pa manda 40 umusanya nu usiku, nacitanga vivyo pano Yeova walanzile ukuti wali nu kumulovya. 26 Natandike ukupaapata kuli Yeova nu kulanda ukuti, ‘We Yeova Mwene wa Papelapela, utonona antu yako. Yene aantu yako yano wakulwile ukuomvya maka yako nu kuyafumya umu Ijipti. 27 Iusya aomvi yako, kuli kuti Abulahamu, Isaki na Yakobo. Utiika mano kuli vino antu yaa yakoma imyenzo, ku miyele yao iipe nu ku luyembu lwao. 28 Pano antu amu mpanga ino watufumizyeko yangalanda ukuti: “Yeova wafizilwe ukuingizya umu mpanga ino wayalavile, nupya pa mulandu wakuti wayapasile, wayafumizye mu Ijipti pakuti akayakomele umu lwanga.” 29 Pano yene aantu yako nupya uupyanyi wako, wayafumizye umu Ijipti na maka yako aingi.’

10 “Pa nsita iya Yeova wanenyile ati, ‘Panga mawe yaili apapatane aakoline na akutandikilako nupya uwize kuli nene pa mwamba, upange ni mbokosi ya upangano ukuomvya imbao. 2 Nupya ndalembapo amazwi aali pa mawe ya kutandikilapo yano watamile, nupya uce uike umu mbokosi ya upangano.’ 3 Fwandi napanzile imbokosi ya upangano ukuomvya imbao zyakwe akasya, napanzile na mawe yaili apapatane aali wa mawe ya kutandikilapo, nupya naile pa mwamba ala nsenzile na mawe yayo yaili umu minwe. 4 Lyene Yeova walemvile pa mawe yayo amazwi yano walemvile pa mawe ya kutandikilapo kuli kuti Masunde 10, yano Yeova wamunenyile pa mwamba ukufuma mu moto pa wanda uno mwakolongine nupya wampeezile mawe yayo. 5 Lyene natentemwike umwamba nu kuyaika mawe yayo mu mbokosi ino napanzile muno yaaya ukufika na ndakai, wakwe vino Yeova wanenyile.

6 “Lyene Aina Izlaeli yafumile uku Beeloti Beni-yakani, nu kuya uku Mosela. Kuuku kwene akuno Aloni waile afwila nu kuziikwa nupya Elieza umwanakwe u wamupyanyile pali usimapepo. 7 Ukufuma kuuku yaile uku Gudugoda nupya lino yafumile uku Gudugoda yaile uku Yotibata, impanga iyakweti utunguzi utwingi.

8 “Pa nsita iiya Yeova wasoolwile amu mutundu wakwe Levi kuti ayano yasenda imbokosi yakwe Yeova iya upangano, pakuti yaimilila pa nkoleelo yakwe Yeova uku kumuombela nu kupaalila antu umwi zina lyakwe, wakwe vino yakacita ukufika na ndakai. 9 Ali mulandu uno Aina Levi yatapeelelwa impanga ukupusanako ni mitundu yuze. Yeova aakayasakamala wakwe vino Yeova Leza winu wayanenyile. 10 Nemo nikazile pa mwamba amanda 40 musanya nu usiku wakwe vino nacisile pa muku wa kutandikilapo, nupya Yeova uvwile kuli nene na pa nsita kwene iiya. Yeova atalondanga ukumonona. 11 Lyene Yeova wanenyile ati, ‘Ipekanye ukupita nu kutungulula antu, pakuti yaye umu kwikala umu mpanga ino nalafile ukupeela ivikolwe vyao.’

12 Mwe Ina Izlaeli, uzye i vyani vino Yeova Leza winu akulonda ukuti mwacita? Vino mulinzile ukucita aevi: mwatiina Yeova Leza winu, ukulondela masunde yakwe yonsi nu kumutemwa nupya mwaombela Yeova Leza winu ni myenzo inu yonsi nu umi winu onsi, 13 alino nu kuvwila masunde yakwe Yeova yano nkumunena ilelo, pakuti vintu vyamuzipila. 14 Yeova Leza winu ali mwineco wi yulu, kumwi ni yulu lya papelapela, alino ni insi na vyonsi ivyayamo. 15 Lelo Yeova watemilwe ivikolwe vinu, nupya pa yantu yonsi wasoolola mwemwe mwe yana yao, wakwe vino cili ndakai. 16 Fwandi lyene mulinzile ukusangulula imyenzo inu nu kuta ukuya ni cilumba. 17 Pano Yeova Leza winu ali mukalamba ukucila ya leza yonsi nupya ali Mwene ukucila aene yonsi, a Leza umukalamba uwa maka nupya uwa kutiinya, wene ataya na kapatulula nupya asipoka mafisakanwa. 18 Waya nu mulinganya uku yana ya nsiwa na ya mukamfwilwa nupya watemwa afuma uku mpanga zyuze, akayapeela ivyakulya ni vyakuzwala. 19 Namwe kwene mulinzile ukutemwa antu afuma uku mpanga zyuze pano namwe mwali aenyi umu mpanga iya Ijipti.

20 “Yeova Leza winu ali wino mulinzile ukutiina, nupya ali wino mulinzile ukuombela, mulinzile ukupalama kuli aliwe, nupya mulinzile ukulapa ukuomvya izina lyakwe. 21 Ali wino mulinzile ukulalumbanya. Wene ali Leza winu uwamucitila vii vyonsi ivya maka nupya ivya kutiinya vino mwailolela. 22 Vikolwe vinu vyali 70 lino vyaile umu mpanga iya Ijipti, nomba lyene Yeova Leza winu walenga ukuti muvule wa ntanda zya mwi yulu.

11 “Mulinzile ukutemwa Yeova Leza winu, nu kulauvwila masunde yakwe lyonsi. 2 Mumanyile ukuti nkulanda kuli mwemwe ilelo, asi uku yana inu yano yataamanya nanti ukulola ukulu wakwe Yeova Leza winu, maka yakwe nu kusalapula ukukafuma kuli aliwe. 3 Yataaweni ivizungusyo vyakwe na vino wacisile umu Ijipti kuli Falao umwene wa ku Ijipti nu mu mpanga yakwe yonsi; 4 nanti vino wacisile uku yasilika ya mu Ijipti, uku mfwalasi zyakwe Falao nu ku maceleta yakwe aankondo yano yaunzilwe muli Yemba Muyenzu lino yamuzinganyanga nupya Yeova wayononyile pa muku onga sile. 5 Yataaweni vino Leza wamucitiile umu lwanga mpaka lino mwizile kuno, 6 nanti vino wacisile kuli Datani na Abilamu ya mwana Eliabu mwana Lubeni, lino umusili wayulike nu kuyamila, kumwi ni ndupwa zyao, matenti yao na antu yonsi ayakonsile alino ni viteekwa, ala na Ina Izlaeli yakulolako. 7 Mwailoliile ivintu vyonsi vya maka vino Yeova wacisile.

8 “Mulinzile ukuvwila masunde yonsi yano nkumupeela ilelo, pakuti muye akome nu kulamba Uluzi Lwa Yodani nu kuyapoka impanga, 9 nupya pakuti mukikale amanda aingi umu mpanga ino Yeova walafile ukupeela ivikolwe vinu na ana yao, impanga umwaya umukaka nu uci.

10 “Impanga ino mukuya umukupoka isi wa mpanga ya Ijipti ino mwafumilemo, muno mwakomelanga imbezu nu kuombesya pa kuzikontelela, wakwe vino mungakontelela ivyalo vya misalu. 11 Lelo impanga ino mukuya umukupoka, i mpanga umwaya imyamba ni nyika. Ikakontelelwa ni imvula iikafuma ukwi yulu; 12 nupya Yeova Leza winu aakaisakamala. Yeova Leza winu akacingilila impanga yii lyonsi, ukufuma pa kutandika kwa mwaka kufika pa mpela ya mwaka.

13 “Nupya ndi cakuti mulauvwila masunde yane yano nkumupeela ilelo nu kutemwa Yeova Leza winu nu kumuombela ni myenzo inu yonsi nu umi winu onsi, 14 ndaamupeela imvula umu mpanga inu pa nsita ino ilinzile ukwizilapo, imvula iya kutandikilako ni ya kusyalikizyako, nupya mulaazombola ivyakulya nu kukwata waini umupya na mafuta. 15 Ndaamezya ni vimelwa umu vyalo vinu pakuti viteekwa vinu vice vyalya, nupya mulaalya nu kwikuta. 16 Muce mucenjele pakuti mutakabepwe nu kupumbuka nu kutandika ukupepa ya leza yauze. 17 Nga mwacita vivyo Yeova alamusokela sana, nupya alaleka ukuti imvula ite ukutoonya nu musili ulata ukumezya ivimelwa nupya mulononwa zuwa umu mpanga isuma ino Yeova akumupeela.

18 “Mazwi yaa yano nkumunena mulinzile ukuyasunga umu myenzo inu nu kuyaomvya umu umi winu nupya muyanyepelele uku makasa inu pakuti yaye iciusizyo nupya yafwile ukuya wa cimanyililo pa vipuma vinu. 19 Muce mwayasambilizya uku yana inu nu kuyalandapo lino mutenzi umu mang’anda inu, lino muli pa lwendo, pa kulaala na pa kuzyuka. 20 Muce muyalembe pa mafulemu ya ku visaasa vya mang’anda inu na pa mpongolo zinu, 21 pakuti mwemo na ana inu muce mwikale manda aingi umu mpanga ino Yeova walafile ukupeela ivikolwe vinu, mulikala manda aingi wakwe vino iyulu likala papela ya nsi.

22 “Ndi cakuti mulauvwila masunde yaa yano nkumupeela nu kuyalondela, nu kutemwa Yeova Leza winu, kucita ukulonda kwakwe nu kupalama sana kuli aliwe, 23 Yeova alazinga inko zii zyonsi kufuma kuli mwemwe, nupya mulacimvya inko izya maka nupya izingi ukumucila. 24 Impanga yonsi ino mwayamo ilaya inu. Umupaka winu ulatandikila umu lwanga ukufika uku Lebanoni, ukufuma uku luzi lwa Yufuleti kufika kuli yemba wa ku uwondaka.* 25 Kusi ali wensi aalamulwisya. Yeova Leza winu alalenga antu yonsi amu mpanga ino mukuyamo yaye ni ntente, wakwe vino wamulavile.

26 “Ilelo namaika ipaalo ni citiipu pali mwemwe: 27 mulapaalwa ndi cakuti mukuvwila masunde yakwe Yeova Leza winu yano nkumupeela ilelo, 28 nupya mulatiipwa nga mwafuma umu nzila ino nkumunena ukulondela ilelo nu kutandika kulondela ya leza yano mutamanya nu kukanauvwila masunde yakwe Yeova Leza winu.

29 “Lino Yeova Leza winu alamutwala umu mpanga ino mulikalamo, mulinzile ukupaala antu pa Mwamba uwa Gelizimu nu kutiipa antu pa Mwamba uwa Ebali. 30 Imyamba yii yayela uku mbalama ya Luzi Lwa Yodani lwa ku uwondaka,* mu mpanga ya Ina Kenani aakaikala umu Alaba, incende iyalozyanya na Giligali mupiipi ni miti ikalamba iya ku Mole. 31 Pano mukulamba Uluzi Lwa Yodani nu kuya umukupoka impanga ino Yeova Leza winu akumupeela. Lino mulapoka impanga iyo nu kwikalamo, 32 muce mwalondela masunde yonsi nu upinguzi vino nkumupeela ilelo.

12 “Yaa ali masunde nu upinguzi vino mulinzile ukulondela manda yonsi yano muli nu umi umu mpanga ino Yeova Leza wa vikolwe vinu alamupeela kuti mwikalemo. 2 Muce mukonone incende zyonsi zino amu nko zino mulacimvya yakapepelapo ya leza yao, asi umulandu incende zizyo zyaela pa myamba, nanti pa milundu nanti umwisika lya cimuti cili consi. 3 Muce muwisye maulambo yao, kutamoola ivipilala vyao vino yakapepa, koca incesi zyao zino yakapepa,* nupya muce mukomoole ivinkolanya vyako ya leza yao nu kusisya mazina yao yonsi umu ncende iiyo.

4 “Mutaca mwapepa Yeova Leza winu mu nzila ya musango uwo. 5 Lelo muce mwalonda Yeova Leza winu uku ncende ili yonsi ino alasoolola ukwikako izina lyakwe nu kwikala mu mitundu inu yonsi, nupya kuko kwene akuno mulinzile ukuya. 6 Kuko kwene akuno muce mwatwala malambo inu, malambo inu aakoca, ivikumi vinu, misangulo yuze ino mukulonda ukupeela, malambo inu aapa milapo, malambo inu aakuitemelwa, na mayeli ya ng’ombe zinu, aambuzi alino na amfwele. 7 Mwemo na amu ng’anda inu muce mwaliila kuuku kwene pa nkoleelo yakwe Yeova Leza winu nu kusansamuka muli vyonsi vino mukucita pano Yeova Leza winu watamupaala.

8 “Mutaca mwacita wakwe vino tukucita ndakai kuli kuti, kucita vino cila muntu akulola ukuti ali vilungame, 9 pano mutatala mwafika umu ncende ino mulikalamo nu mu mpanga ino Yeova Leza winu akumupeela. 10 Lino mulalamba uluzi lwa Yodani nu kwikala umu mpanga ino Yeova Leza winu akumupeela, alalenga ukuti mupuuze uku yalwani inu yonsi nupya mulacingililwa. 11 Muce mwatwala vyonsi vino namunena uku ncende ino Yeova Leza winu alasoolola ukwikako izina lyakwe kuli kuti, malambo inu, malambo inu aakoca, ivikumi vinu, imisangulo yuze ino mukulonda ukupeela, alino na malambo inu yonsi aapa mulapo yano mwalaya ukupeela kuli Yeova. 12 Mulaasansamuka pa nkoleelo yakwe Yeova Leza winu, mwemwe na ana inu alumendo na akazyana, azya inu aonsi na anaci, alino na Ina Levi pano yene yatakwata impanga nanti ica upyanyi pamwi namwe. 13 Mutaca mwapeela malambo inu aakoca umu ncende yuze ili yonsi ino mwalola. 14 Umu ncende sile ino Yeova alasoolola umu mitundu inu ali muno muce mwapeelela malambo inu akoca, nupya mumo kwene amuno muce mwacitila vyonsi vino nkumunena.

15 “Lelo nga mukulonda ukulya inyama, mungaifyula nu kulya, ukulingana na vino Yeova Leza winu watamupaala umu misumba inu yonsi. Umuntu umukowele na asi umukowele angalyako wakwe vino mungalya mpombo nanti inswela. 16 Lelo mutalinzile ukulya uwazi; mulinzile ukuwitila pansi wa manzi. 17 Mutalazumiliziwa ukuliila umu misumba inu icikumi ca pa vilimwa vinu, waini umupya, mafuta, mayeli ya ng’ombe, aambuzi na amfwele, malambo ali yonsi aapa milapo ino mwalapa, malambo ya kuitemelwa nanti imisangulo yuze ino mukulonda ukupeela. 18 Vii mulaaviliila pa nkoleelo yako Yeova Leza winu, umu ncende ino Yeova Leza winu alasoolola, mwemwe na ana inu alumendo na akazyana, aomvi inu aonsi na anaci alino na Ina Levi aakaikala umu misumba inu; nupya mulaasansamuka pa nkoleelo yakwe Yeova Leza winu muli vyonsi vino mulaacita. 19 Muce mucenjele pakuti mutakalekelezye Aina Levi amanda yonsi yano mulaikala umu mpanga inu.

20 “Lino Yeova Leza winu alamupeela impanga ikulu wakwe vino wamulaya nupya mwalanda ukuti, ‘Nkulonda ukulya inyama pa mulandu wakuti muvwa umusu wa kulya inyama, mungalya inyama pa nsita ili yonsi ino mukulonda. 21 Ndi cakuti incende ino Yeova Leza winu wasoolola ukwikako izina lyakwe ili ukutali na kuno mukaikala, lyene muce mwakoma inyama zimwi pa viteekwa vinu wakwe vino namunenyile, kuli kuti ing’ombe, imbuzi nanti imfwele zino Yeova wamupeela, nupya mulinzile ukuliila umu misumba inu pa nsita ili yonsi ino mwalonda. 22 Mungalya inyama zizyo wakwe vino mungalya mpombo ni nswela, umuntu umukowele na asi umukowele angalyako inyama zizyo. 23 Mutakezye ukulya uwazi, pano uwazi ali umi nupya mutalinzile ukulya umi pamwi nu munyefu. 24 Mutalinzile ukulya uwazi. Mulinzile ukuwitila pansi wa manzi. 25 Mutaca mwalya uwazi pakuti vintu vikaamuzipila pamwi na ana inu, pano ala mukucita ivisuma kuli Yeova. 26 Muce mwasenda sile ivya upe vinu ivya muzilo na malambo inu aapa milapo lino mukuya uku ncende ino Yeova alasoolola. 27 Kuko kwene akuno mulaapeelela malambo inu akoca, munyefu nu wazi pa ulambo wakwe Yeova Leza winu, nupya uwazi wa malambo inu ulinzile ukwitilwa pa ulambo wakwe Yeova Leza winu, lelo umunyefu wene mungalya.

28 “Mukacenjele ukuti mwauvwila mazwi yaa yonsi yano nkumunena, pakuti lyonsi vintu vice vyamuzipila na ana inu, pano ala mukucita ivintu visuma nupya ivilungame kuli Yeova Leza winu.

29 “Lino Yeova Leza winu alonona inko zino mukuya umu kucimvya nupya mwatandika ukwikala umu mpanga yao, 30 mukacenjele pakuti mutakalemwe uku citeyo pa cisila cakuti yononwa. Mutakuzye pali ya leza yao ukuti, ‘Uzye antu yaa yaombelanga uli ya leza yao? Naswe kwene avino tumacitanga.’ 31 Mutaakacita vivyo kuli Yeova Leza winu, pano yene yakacitila ya leza yao ivintu vyonsi ivya winyi vino Yeova wapata, kumwi sile nu kupeela ana yao alumendo na akazyana kuli ya leza yao, ukupitila umu kuyoca umu moto. 32 Vyonsi vino nkumunena avino muce mwacita. Mutaca mulundeko nanti ukufumyako.

13 “Ndi cakuti muli mwemwe mwaya kasesema nanti aakasoowela ukupitila umu viloto nupya wamucitila icimanyililo nanti icizungusyo, 2 nupya vino walanzile vyacitika lino akulanda ukuti: ‘Lekini tukonke ya leza yauze, ya leza yano mutamanyile nu kuyaombela,’ 3 mutalinzile ukuvwa kuli kasesema wiyo nanti kalota wa viloto, pano nga caya vivyo ala Yeova Leza winu akumwezya pakuti cimanyikwe ndi cakuti mwatemwa Yeova Leza winu ni myenzo inu yonsi nu umi winu onsi. 4 Mwalondela Yeova Leza winu, mwamutiina, mwasunga masunde yakwe, mwauvwa ukwi zwi lyakwe, mwapalama sana kuli aliwe nupya awino mulinzile ukuombela sile wenga. 5 Lelo kasesema wiyo nanti kalota wa viloto alinzile ukukomwa, pano ala akumukomelezya ukupondokela Yeova Leza winu uwamufumizye umu uzya umu mpanga iya Ijipti nupya ala akumufumya umu nzila ino Yeova Leza winu wamunenyile ukupitamo. Mulinzile ukufumya icintu ciipe pali mwemwe.

6 “Ndi cakuti umwinako nanti umwanako umulumendo nanti umukazyana, nanti mamako wino watemwa sana nanti cuzako umupalamisye, yakulyombeleka umu nkama yati, ‘Leka tukaombele ya leza yauze,’ ya leza yano wemo utamanya nupya yano ivikolwe vyako vitaamanyile, 7 kuli kuti ya leza ya yantu amuzinguluka aaya umupiipi nanti ukutali, aaya umu ncende ili yonsi, 8 utalinzile ukumuvwila nanti ukukutika kuli aliwe nupya utalinzile ukumuvwila uluse nanti ukumucingilila; 9 lelo ulinzile ukumukoma nupya wewe kwene ulinzile ukutandikilapo ukumutama ni iwe alino antu yonsi aasyala pa cisila. 10 Nupya alinzile ukutamwa na mawe suka afwe pano ala walondanga ukukufumya kuli Yeova Leza wako, uwakufumizye umu uzya umu mpanga ya Ijipti. 11 Lyene Aina Izlaeli yonsi yaluvwa nu kuya ni ntete nupya yatalatala yacite icintu cili consi ciipe wakwe cii.

12 “Ndi cakuti mu musumba umwi pa misumba ino Yeova Leza winu akumupeela muvwika mazwi aakuti, 13 ‘Aonsi iviwelewele yakunena antu ya mu musumba ukuti: “Twapiteni mu kuombela ya leza yauze” kuli kuti ya leza yano mutamanya,’ 14 mutalinzile ukulekapo sile, mulinzile ukulondelezya ningo sana nu kuuzilizya nupya ndi cakuti cazanikwa ukuti i cacumi icintu cii ica winyi icicitika muli mwemwe, 15 mulinzile ukukoma antu ya mu musumba uwo nu lupanga. Mulinzile ukonona umusumba uwo na vyonsi ivilimo kumwi ni viteekwa. 16 Lyene muce mukolonganike ivintu vya mutengo vyonsi vya mu musumba uwo pakasi ka musumba nu koca umusumba, ivintu vivyo vilaya uupe wa kupeela kuli Yeova Leza winu. Musumba uwo ulatwalilila ukuya vivyo kwene. Utalinzile ukukuulwa cipya cipya. 17 Mutalinzile ukusenda icili consi pali vino vifwile ukononwa, pakuti Yeova atamusokela lelo aye nu luse ni cikuuku kuli mwemwe nu kumuvuzya wakwe vino walafile uku vikolwe vinu. 18 Mulinzile ukuvwila Yeova Leza winu ukupitila umu kulondela masunde yakwe yonsi yano nkumunena ilelo, nga mukucita vivyo ala mukucita icisuma kuli Yeova Leza winu.

14 “Mwemo mwemwe yana yakwe Yeova Leza winu. Mutaaicembola nanti ukupela inkopyo pa mulandu wakuti umwi watafwa. 2 Pano mwemwe yantu ya muzilo kuli Yeova Leza winu, nupya pa yantu yonsi aaya pano nsi, Yeova wamusoolola ukuya antu yakwe aiyele.

3 “Mutalinzile ukulya ica winyi icili consi. 4 Inyama zino mungalya aezi: ing’ombe, imfwele, imbuzi, 5 inswela, mpombo, cisongo, imbuzi ya mpanga, mpelembe, imfwele ya mpanga alino ni mfwele ya mu myamba. 6 Mungalya inyama ili yonsi iyapanduka inkamba paili nupya ino ikasyetulula. 7 Lelo inyama izikasyetulula nanti izyapanduka inkamba zino mutafwile ukulya aezi: ingamali, kalulu na pimbi, pano zikasyetulula lelo zitakwata inkamba izipanduke. Mwazilola ukuti i zikowele. 8 Kapoli nawe kwene mwamulola ukuti u mukowele pano wakwata inkamba izipanduke lelo asisyetulula. Mutalinzile ukulya inyama zii nanti ukukumya ivitumbi vya nyama zizyo.

9 “Pali vyonsi ivyaya umu manzi vino mungalya aevi: mungalya consi icakwata imyangalala na mamba. 10 Lelo mutalinzile ukulya ivili vyonsi ivitakwata imyangalala na mamba. Mwavilola ukuti i vikowele.

11 “Mungalya icunyi cili consi cisanguluke. 12 Lelo mutalinzile ukulya ivyunyi vii: cipungu, inkwazi, icikozi citifi, 13 mweye muyenzu, mweye mutifi, ni misango yonsi yakwe ya mweye asyala, 14 misango yonsi yakwe ya mwankole, 15 imbuni, icipululu, inkoko luzi, nu musango onsi uwa kakozi, 16 icipululu icinono, sinsimwe, imbata luzi, 17 mukanga, cikozi, ivyunyi vya muli yemba ivyakolana ni imbata luzi, 18 inkowa, ni misango ya tunga yonsi, pupute na kasusu. 19 Utwa umi tonsi utunono utwakwata maapa utukapita umu maumba nato kwene mwatulola ukuti u tukowele. Mutalinzile ukulya. 20 Mungalya ivya umi vyonsi visanguluke ivikapapuka.

21 “Mutalinzile ukulya inyama ili yonsi ino mwazana yatiifwila. Mungapeela umuntu uwafuma uku mpanga yuze inyama iyo aakaikala umu misumba inu, nawe angalya, nanti mungakazya umuntu uwafuma uku mpanga yuze. Pano mwemo mwemwe yantu ya muzilo kuli Yeova Leza winu.

“Utaeleka kana ka mbuzi umu mukaka wakwe nyina.

22 “Cila mwaka mulinzile mwapeela icikumi ukufuma pa vyakulya vyonsi vino mwazombola umu vyalo vinu. 23 Mulaaliila icikumi ca pa vyakulya vinu, waini winu umupya, mafuta inu, na mayeli ya ng’ombe zinu na ambuzi alino na amfwele pa nkoleelo yakwe Yeova Leza winu umu ncende ino alasoolola ukwikamo izina lyakwe, pakuti mungamanya ivya kutiina Yeova Leza winu lyonsi.

24 “Nomba ndi cakuti ulwendo lwinu lwatalimpa nupya mwafilwa ukukwanisya ukusenda ivintu vivyo uku ncende ino Yeova Leza winu alasoolola ukwikako izina lyakwe pa mulandu wakuti u kutali (pano Yeova Leza winu alamupaala), 25 lyene mungakazya ivintu vivyo nupya mukasende impiya zizyo uku ncende ino Yeova Leza winu alasoolola. 26 Lyene mungaomvya impiya zizyo kukukalila ivili vyonsi vino mukulonda kuli kuti ing’ombe, imfwele, imbuzi, waini, ivyakumwa vyuze ivikakola, alino ni cili consi cino mukulonda; nupya kuuku kwene akuno mukaliile nanti ukumwela ivintu vii pa nkoleelo yakwe Yeova Leza winu nu kusansamukila pamwi na amu ng’anda inu. 27 Nupya mutalinzile ukulekelezya Aina Levi aakaikala umu misumba inu, pano yene yatapeelwa ica upyanyi nanti impanga ukupusanako namwe.

28 “Lyonsi pa cisila ca myaka itatu mulinzile ukutola icikumi consi ukufuma pa vyakulya vino mwazombola umwaka kwene uwo nu kucika umu misumba inu. 29 Lyene Aina Levi aataapeelwa ica upyanyi nanti impanga ukupusanako namwe, na antu aafuma uku mpanga yuze, ana ya nsiwa alino na ya mukamfwilwa aakaikala umu misumba inu yaliza yalye ivyakulya vivyo, pakuti Yeova Leza winu ace amupaala muli vyonsi vino mukucita.

15 “Lyonsi pa mpela ya myaka 7, muce mwakulula Aina Izlaeli yauzo uku nkongole zino yamukwatila. 2 Vino cifwile ukuya pa kukulula aevi: Uwakongwesizye Umwina Izlaeli muze alamukulula uku nkongole zizyo. Atalinzile ukumulifya pano ukulingana ni sunde lyakwe Yeova ulaya umwaka wa kukulula. 3 Mungalifya inkongole kuli yano yafuma uku mpanga zyuze, lelo mutalinzile ukulifya inkongole zino Umwina Izlaeli muzo wamukwatila. 4 Nomba kusi ali wensi pali mwemwe aalinzile ukuya umupiina pano Yeova alamupaala umu mpanga ino Yeova Leza winu akumupeela ukuti iye inu, 5 lelo cilaya sile vivyo ndi cakuti mukuvwila Yeova Leza winu nu kulondela masunde yaa yonsi yano nkumupeela ilelo. 6 Pano Yeova Leza winu alamupaala wakwe vino wamulaya, mulaakongwesya inko izingi lelo mwemo mutalaalondekwa ukukongola; nupya mulaatungulula inko izingi lelo mwemo zitalaamutungulula.

7 “Ndi cakuti Umwina Izlaeli muzo waya umupiina umu musumba umwi pa misumba iyaya umu mpanga ino Yeova Leza winu akumupeela, mulinzile ukuya nu luse kuli aliwe. 8 Mulinzile ukuvungulula ikasa nu kulanga ukapekape uku muntu wiyo nupya mulinzile ukwezya na maka ukumukongwesya consi cino akulondekwa nanti cino wataulizya. 9 Mulinzile ukucenjela pakuti mutakelenganye ukuti, ‘Umwaka uwalenga 7 uwa kukulwa iupalama,’ nu kukanalanga ukapekape uku Mwina Izlaeli muzo umupiina alino nu kukanamupeela icili consi. Ndi cakuti walilila kuli Yeova pa mulandu winu mulaya nu mulandu. 10 Mulinzile ukumupeela ukwaula ukupatikiziwa pano ukwene ali mulandu uno Yeova Leza winu alamupaalila muli vyonsi vino mukucita. 11 Pano apiina mulaya nayo lyonsi. Ali muladu uno nkumunenela ukuti, ‘Mulinzile ukuya na ukapekape nu kuvungulula ikasa uku Ina Izlaeli yauzo aakucuula nupya apiina yano mulaikala nayo umu mpanga inu.’

12 “Ndi cakuti wakala Umuebele muzo, umonsi nanti umwanaci, nupya watakuombela pa myaka 6, ulinzile ukumukulula umu mwaka uwalenga 7. 13 Nupya ndi cakuti wamukulula, utalinzile ukuleka ukuti apite sile minwe. 14 Ulinzile ukumupeelako vimwi pa viteekwa vyako, ivilimwa, mafuta, na waini. Ulinzile ukumupeela ukulingana na vino Yeova Leza wako wakupaala. 15 Uwaiusya ukuti wali umu uzya umu Ijipti nu kuti Yeova Leza wako wakukulwile. Ali mulandu uno nkukunenela ukucita vivyo ilelo.

16 “Lelo ndi cakuti wakunena ukuti: ‘Nsikulonda ukupita!’ pa mulandu wakuti wakutemwa kumwi na amu ng’anda yako nupya wali ni nsansa lino wakuombelanga, 17 lyene ulinzile ukutola icakutulwila nu kumutulula ikutwi ala watusintilizya ikutwi lyakwe uku cisaasa, nupya alaya umuzya wako umi wakwe onsi. Vikwene avino ulinzile ukucita nu ku muzya wako umukazyana. 18 Utalinzile ukulola kwati cisi ningo nga wakulula umuzya wiyo nu kumuleka ukuti aapita, pano ala umulimo uno wakuombela pa myaka 6 iulingana na malipilo yano ungalipila umuomvi miku iili, nupya Yeova Leza wako wakupaala muli vyonsi.

19 “Mulinzile ukupaatula mayeli aonsi aa ng’ombe zinu, aa mfwele ni mbuzi, nu kuyapeela kuli Yeova Leza winu. Mutalinzile ukuomvya mayeli ya ng’ombe uku mulimo uli onsi nanti ukupela mayeli ya mfwele mavumbu. 20 Mwemo pamwi na amu ng’anda inu mulinzile ukuliila inyama zizyo pa nkoleelo yakwe Yeova Leza winu cila mwaka umu ncende ino Yeova alasoolola. 21 Lelo ndi cakuti ikweti ulema, kuli kuti kulemala, kupafula, nanti ulema uli onsi uwipisye, mutafwile ukuipeela kuli Yeova Leza winu. 22 Mulinzile ukuliila inyama iiyo umu misumba inu, yonsi yangalya umuntu mukowele na asi mukowele, wakwe vino mungalya mpombo nanti inswela. 23 Lelo mutalinzile ukulya uwazi wa nyama iiyo, mulinzile ukuwitila pansi wa manzi.

16 “Muce mwaiusya umwezi wakwe Abibu* nupya muce mwazevya Ucilo kuli Yeova Leza winu, pano umu mwezi wakwe Abibu ali muno Yeova Leza winu wamufumizye umu Ijipti usiku. 2 Nupya muce mwapeela ilambo lya Ucilo kuli Yeova Leza winu, mulaapeela imfwele, imbuzi ni ng’ombe, umu ncende ino Yeova alasoolola ukwikamo izina lyakwe. 3 Mutaca mwaliila malambo yayo pamwi ni cili consi umuli citutumusi, pa manda 7 muce mwalya umukate uwaula icitutumusi, kuli kuti mukate uwa kucuziwa, pano mwafumile umu mpanga ya Ijipti lwilo lwilo. Muce mwacita vivyo lyonsi lino muli nu umi pakuti muce mwaiusya uwanda uno mwafumile umu mpanga ya Ijipti. 4 Kusi citutumusi cili consi icilinzile ukuzanwa umu ncende inu yonsi pa manda 7, nupya inyama yonsi ino mwapeela ukuya ilambo manguzi pa wanda wa kutandikilako mutalinzile ukuisunga usiku onsi kufika katondo. 5 Mutalazumiliziwa ukupeela ilambo lya Ucilo umu musumba uli onsi uno mukulonda pa misumba ino Yeova Leza winu akumupeela. 6 Nomba mulinzile ukupeela ilambo lii umu ncende ino Yeova Leza winu alasoolola ukwikamo izina lyakwe. Mulinzile ukupeela ilambo lii manguzi lino sile ilanzi lyawa, kuli kuti pa nsita isoololwe ino mwafumiilepo umu Ijipti. 7 Mulinzile ukweleka ilambo lilyo nu kuliliila umu ncende ino Yeova Leza winu alasoolola nupya katondo mungaswilila uku matenti inu. 8 Pa manda 6 mulaalya umukate uwaula icitutumusi, nupya pa wanda uwalenga 7 mulaakongana uku kucindika Yeova Leza winu. Mutalinzile ukuomba umulimo uli onsi pa wanda uu.

9 “Mulinzile ukupenda imilungu 7. Mulinzile ukutandika ukupenda imilungu iiyo ukufuma pa nsita ino mwatandikilapo ukuzombola baale. 10 Lyene muce mwazevya umutebeto wa milungu kuli Yeova Leza winu, ala imusenda nu upe wa kuitemelwa ukulingana na vino Yeova Leza winu wamupaala. 11 Nupya muce mwasansamuka pa nkoleelo yakwe Yeova Leza winu umu ncende ino Yeova Leza winu alasoolola ukwikamo izina lyakwe, pamwi na ana inu alumendo, ana inu akazyana, azya inu aonsi, azya inu anaci, Aina Levi, aafuma uku mpanga zyuze, ana ya nsiwa, alino na ya mukamfwilwa aaya umu misumba inu. 12 Mwaiusya ukuti mwali azya umu Ijipti, fwandi muce mwalondela ningo masunde yaa.

13 “Muce mwazevya mutebeto wa nsakwe pa manda 7 lino mwakolonganika ivilimwa vinu, mafuta alino na waini. 14 Muce mwasansamuka lino mukuzevya, pamwi na ana inu alumendo, ana inu akazyana, azya inu aonsi, azya inu anaci, Aina Levi, aafuma uku mpanga zyuze, ana ya nsiwa, alino na ya mukamfwilwa aaya umu misumba inu. 15 Pa manda 7 mulaazevya umutebeto kuli Yeova Leza winu umu ncende ino Yeova alasoolola, pano Yeova Leza winu alapaala vyonsi vino mulaazombola na vyonsi vino mulaacita, nupya mulaya sana ni nsansa.

16 “Miku itatu umu mwaka, aonsi inu yonsi yace yalolekela kuli Yeova Leza winu umu ncende ino alasoolola, kuli kuti pa mutebeto wa mukate uwaula icitutumusi, pa mutebeto wa milungu na pa mutebeto wa nsakwe, nupya kusi ali wensi aalinzile ukulolekela kuli Yeova minwe. 17 Upe uno cila muntu alaatwala ulinzile ukulingana na vino Yeova Leza winu wamupaala.

18 “Mulinzile ukusonta ya kapingula na akwangalila cila mutundu mu misumba yonsi ino Yeova Leza winu akumupeela, nupya yalinzile ukupingula antu mu ulungami. 19 Mutalinzile ukunyonganya upinguzi, kuya na kapaatulula nanti ukupoka mafisakanwa pano mafisakanwa yakapafuzya na antu ya mano nupya yakanyonganya mazwi ya yalungami. 20 Mulinzile ukwezya na maka ukuya nu mulinganya pakuti mutwalilile ukuya nu umi nu kwikala umu mpanga ino Yeova Leza winu akumupeela.

21 “Mutaca mwalemeka umuti uli onsi kuti uye ulucesi lwa kupepa* umupiipi nu ulambo uno mulapangila Yeova Leza winu.

22 “Nupya mutaca mwimike icipilala ca kupepa pano Yeova Leza winu wapata icintu ca musango uwo.

17 “Mutalinzile ukupeela kuli Yeova Leza winu ing’ombe nanti imfwele iikweti ulema uli onsi, pano i ca winyi kuli Yeova Leza winu.

2 “Ndi cakuti cazanwa ukuti umonsi umwi nanti umwanaci uwa mu musumba umwi pa misumba ino Yeova Leza winu akumupeela, akucita vino Yeova Leza winu wapata nu konona upangano wakwe, 3 nupya wapumbuka nu kutandika ukupepa ya leza yauze nanti ukupepa ilanzi nanti umwezi nanti ivintu vyuze ivya mwi yulu, icintu cino ntamunenyile ukucita. 4 Nupya nga yamunena nanti muvwa pi lyasi lilyo, mulinzile ukulondelezya ningo umulandu. Ndi cakuti cazanwa ukuti i cacumi cintu cii ca winyi icicitika umu Izlaeli, 5 mulinzile ukutwala umonsi nanti umwanaci uwatacita icintu cico ciipe kunzi ya musumba, nupya mulinzile ukutama umuntu wiyo na mawe suka afwe. 6 Umuntu alinzile sile ukukomwa ndi cakuti pali ya kambone yaili nanti yatatu. Atalinzile ukukomwa ndi cakuti pali sile kambone wenga. 7 Kambone aliwe alinzile ukutandikilapo ukumutama na mawe. Alino antu yonsi asyala pa cisila. Mulinzile ukufumya cintu ciipe pali mwemwe.

8 “Ndi cakuti kwaya umulandu utale ukupingula umu musumba umwi pa misumba inu, kuli kuti mulandu wa kukoma nanti milandu ya ku cilye nanti unkalwe nanti imilandu yuze iya kupusana, mulinzile ukuya uku ncende ino Yeova Leza winu alasoolola. 9 Muce mwaya kuli ya simapepo Aina Levi na ya kapingula yano yalaaomba umu manda yayo nu kuyalondolwela, nayo yalaamunena ivya kucita. 10 Lyene mulinzile ukucita ukulingana na vino yamunena umu ncende ino Yeova alasoolola. Muce mwacita vyonsi vino yalaamunena. 11 Mulinzile ukucita ukulingana ni sunde lino yamupeela alino nu kulingana na vino iyapingula. Mutalinzile ukufuma muli vino yalaamunena. 12 Umuntu uwakana ukuvwa kuli simapepo aakaombela Yeova Leza winu nanti kuli kapingula pa mulandu ni cilumba alinzile ukukomwa. Mulinzile ukufumya icintu ciipe umu Izlaeli. 13 Kucita vivyo kulalenga antu yonsi ukuvwa nu kuya ni ntete. Nupya yatalaya ni cilumba.

14 “Ndi cakuti mwaca mwingila umu mpanga ino Yeova Leza winu akumupeela, nupya mwaipoka nu kutandika ukwikalamo, alino mwati, ‘Katuisontele umwene wakwe vino caya uku nko zyonsi izyatuzinguluka,’ 15 nga caya vivyo, mulinzile ukusonta umwene wino Yeova Leza winu alasoolola. Afwile ukuya Umwina Izlaeli. Mutafwile ukusonta uwafuma uku mpanga yuze asi Umwina Izlaeli. 16 Lelo atalinzile ukukwata imfwalasi izingi, nanti ukutuma antu yakwe uku Ijipti pakuti yakamuletele imfwalasi na zyuze, pano Yeova wamunenyile ukuti, ‘Mutalinzile ukuswilila uku Ijipti.’ 17 Nupya atalinzile ukutwala ya mama aingi pakuti atata ukulondela masunde yane; atalinzile nu kukwata sana siuva na goldi. 18 Ndi cakuti watandika ukuteeka, alinzile ukukopolola isunde lii ukufuma umu lupapulo luno ya simapepo Aina Levi yasunga.

19 “Ace asunge ulupapulo lulo nu kulalubelengamo manda yonsi aumi wakwe, pakuti ace asambilile ivya kutiina Yeova Leza wakwe ni vya kulondela masunde yonsi. 20 Na cico cilalenga ataya ni cilumba pa Ina Izlaeli yauze, nupya atalata ukulondela masunde nanti ukufuma umu nzila, nupya wene na ana yakwe aonsi yalatwalilila ukuteeka Aina Izlaeli pa nsita itali.

18 “Ya simapepo Aina Levi alino na yonsi amu mutundu wakwe Levi, yatalapeelwa impanga nanti ica upyanyi pamwi na Ina Izlaeli yauze. Yalaalya pa malambo ya koca aalapeelwa kuli Yeova, malambo yayo yalaya ali ca upyanyi cao. 2 Fwandi yatalinzile ukukwata ica upyanyi icili consi pamwi na Ina Izlaeli yauze. Yeova ali ca upyanyi cao wakwe vino wayaneyile.

3 “Vino antu yalaapeela kuli ya simapepo aevi: Wensi aakupeela ilambo, ingaya ing’ombe nanti imfwele alinzile ukupeela simapepo cisao, ivyamvu ni cituka. 4 Nupya mulinzile nu kumupeela ivyakulya vinu ivyatandikilapo ukuca, waini mupya, mafuta, alino na mavumbu ya mfwele zinu yano mwatandikilapo ukupela. 5 Yeova Leza winu wayasoolola ukufuma umu mitundu inu yonsi kumwi na ana yao pakuti yaombela umwi zina lyakwe Yeova manda yonsi.

6 “Lelo ndi cakuti Umwina Levi umwi akulonda ukufuma umu musumba wa mu Izlaeli muno akaikala nu kuya uku ncende ino Yeova wasoolola,* 7 angaya akaombela umwi zina lyakwe Yeova Leza wakwe kuuku kwene wakwe vino Aina Levi yauze aakaombela Yeova kuuku kwene yakacita. 8 Alaapeelwa ivyakulya wakwe vino yene yakapeelwa kulunda pa mpiya zino wazanyile umu vintu vino wakazizye, ivyali ivya vikolwe vyakwe.

9 “Lino mulingila umu mpanga ino Yeova Leza winu akumupeela, mutalinzile ukusambilila ivicitwa vya winyi vino inko izyaya umu mpanga iyo zikacita. 10 Muli mwemwe mutalinzile ukuzanwa ali wensi akoca umwanakwe umonsi nanti umwanakwe umukazyana umu moto,* ali wensi aakauvwana ni vya mipasi, aakacita ivya maleele, aakasapoola, sing’anga, 11 aakavina, aakauzya uku mipasi, nanti aakasowela, nanti ali wensi aakauzya uku yafwe. 12 Pano wensi aakacita ivintu vii u wa winyi kuli Yeova, nupya pa mulandu ni vicitwa kwene vii ivya winyi, acino Yeova Leza winu akuzingila inko zii kufuma kuli mwemwe. 13 Mulinzile ukuya akaele kuli Yeova Leza winu.

14 “Pano inko zii zino mukuya umukupoka impanga zyuvwananga na aakacita ivya maleele na aakauvwana ni mipasi, lelo Yeova Leza winu watamulesya ukucita ivintu vya musango uu. 15 Yeova Leza winu alamusontela kasesema uwaya wakwe nene ukufuma umu ina inu. Mulinzile ukumuvwila. 16 Cii cilacitika pa mulandu na vino mwalenzile kuli Yeova Leza winu pa wanda uno mwakolongine umu ncende iya Holebu lino mwalanzile imuti, ‘Utaleka tuvwe ukwi izwi lyakwe Yeova Leza witu nanti ukulola umoto ukalamba nupya, pakuti tutafwa. 17 Lyene Yeova wanenyile ati, ‘Vino yalanda vili sile ningo. 18 Ndayasoolwela kasesema ukufuma umu ina yao uwaya wakwe wewe nupya ndika mazwi yane umu kanwa kakwe, nawe alaayanena vyonsi vino namunena. 19 Cumi kwene ndapeela umuntu ali wensi umulandu aataluvwila mazwi yane yano kasesema wiyo alalandila umwi zina lyane.

20 “‘Ndi cakuti kasesema ali wensi pa mulandu ni cilumba walandila umwi zina lyane mazwi yamwi yano ntamunenyile nanti walandila umwi zina lyakwe ya leza yauze, kasesema wiyo alinzile ukukomwa. 21 Limwi mungelenganya muti: “Uzye tulamanya uli ukuti mazwi yayo yatafumile kuli Yeova?” 22 Ndi cakuti kasesema walandila umwi zina lyakwe Yeova nupya mazwi yano walanda yatafikiliziwe, ala mazwi yayo yatafumile kuli Yeova. Kasesema wiyo ala walanzile pa mulandu ni cilumba, mutalinzile ukumutiina.

19 “Lino Yeova Leza winu alonona inko izikaikala umu mpanga ino Yeova Leza winu akumupeela nupya lino mulacimvya antu nu kutandika ukwikala umu misumba yao nu mu mang’anda yao, 2 muce musoolole misumba itatu umu mpanga ino Yeova Leza winu akumupeela. 3 Muce mwankanye impanga ino Yeova Leza winu watamupeela mu viputulwa vitatu, nupya mukazifye umiseo pakuti aliwensi uwakoma umuntu angutukila uku musumba onga pa misumba iiyo.

4 “Vino cifwile ukuya uku muntu uwakoma umuze nupya wino utukiile uku ncende iiyo pakuti atwalilile ukuya nu umi aevi: Ndi cakuti umwi wakoma umuze ukwaula ukwenekela nupya ataamupasile; 5 wakwe ndi cakuti waya nu muze umu mpanga umu kutiya inkwi nupya wazunzula impasa kuti akome umuti nomba impasa yasokoka umu mupinyi nu kuyakoma umuze nu kufwa wafwa, umuntu uwakoma umuze alinzile ukuutukila uku musumba onga pa misumba iiyo pakuti atwalilile ukuya nu umi. 6 Nga atacisile vivyo, kalandula wa wazi angamuzinganya pa mulandu wakuti watasoka sana, nupya nga wamuzana angamukoma pano ala ukuyelile umusumba ikutalimpisya, nomba atalinzile ukukomwa pa mulandu wakuti ataapasile umuze. 7 Ali mulandu uno nkumunenela ukuti soololini misumba itatu.’

8 “Yeova Leza winu alamupeela impanga ikulu wakwe vino walafile uku vikolwe vinu nupya alamupeela impanga yonsi ino wayalavile, 9 lelo pakuti cico cicitike mulinzile ukuvwila masunde yaa yonsi yano nkumupeela ilelo, kuli kuti ukutemwa Yeova Leza winu nu kulondela masunde yakwe lyonsi. Lino mulapeelwa impanga ikulu muce musoolole imisumba itatu kulunda pa misumba yuze iya kuutukilako. 10 Nga caya vivyo kusi umuntu uwa kaele alakomwa umu mpanga inu ino Yeova Leza winu akumupeela kuti mupyane, nupya mutalaya nu mulandu wa wazi.

11 “Lelo ndi cakuti umwi wapasile umuze nupya walolenga insita ilinge iya kumucisa, lyene wamuma nu kufwa wafwa, nu muntu wiyo uutukila uku musumba onga pa misumba iyo, 12 lyene akalamba ya mu musumba uno wafumileko yalinzile ukumwama nu kumutwala kuli kalandula wa wazi, nupya alinzile ukukomwa. 13 Mutalinzile ukuvwila umuntu wiyo uluse nupya mulinzile ukufumya umulandu wa kukoma umuntu uwa kaele umu Izlaeli pakuti vintu vyamuzipila.

14 “Ndi cakuti mwaca mwapeelwa incende umu mpanga ino Yeova Leza winu akumupeela, mutaca musezye imipaka ya yauzo ino ivikolwe visile.

15 “Kambone wenga atanga asinile umuze pa mulandu uli onsi nanti pa luyembu luli lonsi luno watacita. Mulandu ulinzile ukusininkiziwa ukuti u wa cumi ndi cakuti pali ya kambone yaili nanti yatatu. 16 Ndi cakuti kambone umwipe wasinila umuze nu kumupeela umulandu, 17 antu yayo yoili atiyapusana yalaimilila pa nkoleelo yakwe Yeova na pali ya simapepo na ya kapingula yano yalaaomba umu manda yayo. 18 Ya kapingula yalalondelezya ningo nupya ndi cakuti cazanwa ukuti muntu uwapeezile umuze umulandu a kambone wa ufi nu kuti mulandu uno wapeezile umuze u wa ufi, 19 mulinzile ukumucitila vino walinzile ukucitila umuze nupya mulinzile ukufumya iciipe umu Izlaeli. 20 Yonsi asyala yaluvwa nu kuya ni ntete nupya yatalatala yacite icintu cili consi iciipe wakwe cii umu Izlaeli. 21 Mutalinzile ukuvwa uluse: mulinzile ukukoma uwakoma muze, ilinso pi linso, ilino pi lino, ikasa pi kasa, nu lwazo pa lwazo.

20 “Ndi cakuti mwaya umu kulwa na alwani inu nupya mwalola ukuti mfwalasi zino yakweti, maceleta na asilika ivivula ukucila ivinu, mutalinzile ukuya ni ntete pano Yeova Leza winu uwamufumizye umu mpanga ya Ijipti alaya namwe. 2 Lino imwaya uku ulwi, simapepo alinzile ukulanda na antu. 3 Alinzile ukuyanena ati, ‘Uvwini mwe Ina Izlaeli, imwaya umu kulwa na alwani inu. Mutuvwa intete nupya mutatiina nanti ukuzakaza pa mulandu wao, 4 pano Yeova Leza winu amaya namwe lino mumaya umu kulwa na alwani inu nupya amamupususya.’

5 “Akalamba ya yasilika nayo kwene yalinzile ukunena antu kuti, ‘Wensi uwatakuula ing’anda nupya atatala watandika ukwikalamo, lekini aswilile ukwakwe. Pano nga atacisile vivyo angafwila umu ulwi nupya umuntu muze angatandika ukwikala umu ng’anda yakwe. 6 Nupya wensi uwalima icalo ca myangazi wino atatala watandika ukuzombola, lekini aswilile ukwakwe. Pano nga atacisile vivyo, angafwila umu ulwi nupya umuntu muze angasyala atandike ukuzombola. 7 Na wensi atatala watwala umwanaci wino wataisya, lekini aswilile ukwakwe. Pano nga atacisile vivyo, angafwila umu ulwi nupya umonsi muze angasyala atwale umwanaci wiyo.’ 8 Nupya ya cilolo yalinzile ukunena antu ukuti, ‘Wensi aali ni ntete aswilile ukwakwe, pakuti atalenga na yauze ukuvwa intete. 9 Lino akalamba ya yasilika yamala ukulanda na antu, yalinzile ukusonta aakutungulula asilika.

10 “Ndi cakuti mwafika umu musumba uno mukuya umukulwisya, mulinzile ukuyanena ukuti nga yakulonda mungapanga umutende. 11 Ndi cakuti yazumila ukupanga umutende nupya yamuyulila impongolo, antu yonsi alimo yalaya azya inu nupya yalaamuombela. 12 Lelo ndi cakuti yakana ukupanga umutende nupya yazumila ukulwa namwe, mulinzile ukuzinguluka umusumba pakuti muuzanze, 13 nupya Yeova Leza winu alamwavwa ukucimvya, muce mukome aonsi yonsi amu musumba uwo. 14 Nomba muce musende anaci, ana, iviteekwa, ivintu vyonsi ivyaya umu musumba ni viya vyonsi, nupya mukasende ivintu vyonsi visuma ivya yalwani inu vino Yeova Leza winu watamupeela.

15 “Vikwene avino mulinzile ukucita uku misumba yonsi iyaya ukutali sana iitaaya pa misumba ya mu nko izili umupiipi. 16 Lelo mulinzile ukonona consi ica umi icaya umu misumba ya nko zii ino Yeova Leza winu akumupeela. 17 Mulinzile ukonona yonsi amu nko zii, Aina Hiti, Aina Amoli, Aina Kenani, Aina Pelizi, Aina Hivi na Ina Yebusi, wakwe vino Yeova Leza winu watamunena; 18 pakuti yataca yamusambilizye ukucita ivintu vyonsi ivya winyi vino yene yakacita kuli ya leza yao, nu kuleka ukuti muyembukile Yeova Leza winu.

19 Lino mwazinguluka umusumba pakuti muucimvye nu kuulwisya pa manda aingi, mutalinzile ukukomola imiti iyayamo. Mungalya ivizao vya ku miti iiyo, lelo mutalinzile ukuikoma. Mutalinzile ukuzanza imiti wakwe vino mungazanza antu. 20 Mungonona sile imiti ino mumanyile ukuti isiseeka ivizao vino antu yangalya. Mungaikoma nu kuiomvya uku kupangila ilinga lino mukuzanza umusumba uukulwisyanya namwe kufikila mwaucimvya.

21 “Ndi cakuti cazanwa ukuti umwi watakomwa mu mpanga ino Yeova Leza winu akumupeela nupya citamanyikwe uwatamukoma, 2 akalamba na ya kapingula yalinzile ukuyapima intamfu kufuma apayeliile icitumbi ukuyafika uku misumba iyayela umupiipi. 3 Lyene akalamba amu musumba uli apiipi sana ni citumbi yalinzile ukutola ing’ombe iya kaci icili inono iitatala yakulikwa ukwi yoko* nanti itatala yaomviwa uku mulimo uli onsi, 4 nupya akalamba ya mu musumba uwo yalinzile ukutwala ing’ombe ku mukonko uutatala walimwamo nanti ukukomelwamo umwaya manzi aakapita, nupya mumo kwene amuno yalinzile ukuputwila insingo ya ng’ombe iiyo pakuti ifwe.

5 “Ya simapepo Aina Levi yaliza pa mulandu wakuti Yeova Leza winu u wayasoolola ukuti awino yaombela nu kulandila mapaalo umwi zina lyakwe Yeova. Nupya yalalanda vino umulandu uli onsi umuli unkalwe ulinzile ukuombelwapo. 6 Lyene akalamba yonsi amu musumba uyelile apiipi sana nu kuyelile icitumbi yalinzile ukufulalila iminwe pa ng’ombe iyatiputwilwa insingo umu mukonko, 7 nupya yalinzile ukulanda ukuti, ‘Tutaakomile umuntu wii nupya tutaaweniko lino vii vyacitikanga. 8 We Yeova utasokela antu yako Aina Izlaeli yano wakulwile nupya utaleka umulandu wa kukoma umuntu wa kaele uye pali aliyo.’ Lyene yatalaya nu mulandu wa wazi. 9 Nga mwacita vivyo mulafumya umulandu wa kukoma umuntu wa kaele pali mwemwe ukupitila umu kucita ivisuma kuli Yeova.

10 “Ndi cakuti mwaya umu nkondo umu kulwisya alwani inu nupya Yeova Leza wamwazwa ukuyacimvya mwayasenda nu mu uzya, 11 nupya umwi pali mwemwe walola umwanaci umusuma pa yazya yayo wamutemwa nupya akulonda ukumutwala, 12 angamusenda uku ng’anda ukwakwe. Lyene umwanaci wiyo alinzile ukupela inyele, kutema ingala, 13 nu kuzula ivyakuzwala vya uzya alino nu kwikala umu ng’anda yakwe wino watamusenda. Alaloosya isi na nyina pa mwezi onga, lyene pa cisila umonsi uwatamusenda angapanga nawe icupo, nupya alaya a mamakwe. 14 Lelo ndi cakuti umonsi atatemilwe umwanaci wiyo, alinzile ukumuleka ukuti aye konsi kuno akulonda. Nomba atalinzile ukumukazya ni mpiya nanti ukumucuzya pano ala watamuzewanya.

15 “Ndi cakuti umonsi wakwata ya mama yaili nupya watemwisyapo mama wenga ukucila umuze na yonsi yoili yamuvyalila ana onsi nupya mama wino atatemwa aliwe wamuvyalila iyeli, 16 pa wanda uno alaapeela ana yakwe ca upyanyi cakwe atalazumiliziwa ukulalola umwana wino wavyala kuli mama wino watemwa kuti ali yeli, pa mulandu wakuti iyeli lyavyalwa kuli mama wino atatemwa. 17 Alinzile ukumanya ukuti umwana uwavyalwa kuli mama wino atatemwa ali yeli nupya ica upyanyi cino alinzile ukumupeela pali vyonsi vino wakwata cilinzile ukuya imiku iili ukucila umuze pano ali mwana wino watandikilepo ukukwata. Nupya aliwe alinzile ukupeelwa vino iyeli lilinzile ukupeelwa.

18 “Ndi cakuti umuntu umwi wakwata umwana umonsi wa cilumba nupya cipondoka aasiuvwila isi nanti nyina, yezya ukumusalapula lelo asiuvwa, 19 avyazi yakwe yalinzile ukumulema nu kumutwala uku yakalamba pa mpongolo ya musumba uno akaikalamo 20 nu kunena akalamba ya mu musumba uwo ukuti, ‘Umwana witu wii u wa cilumba, a cipondoka nupya asituvwila. Wapunuka nupya a cakolwa.’ 21 Lyene antu yonsi amu musumba uno akaikalamo yalinzile ukumutama na mawe suka afwe. Mulinzile ukufumya icintu ciipe umu Izlaeli, nupya Aina Izlaeli yonsi aaluvwa yalaya ni ntete.

22 “Ndi cakuti umwi wacita uluyembu lwa kufwilapo nupya wakomwa nu kumukoweka pa cimuti, 23 citumbi cakwe citalinzile ukutwalilila ukuya pa cimuti usiku onsi. Lelo mulinzile ukumuziika uwanda kwene uwo, pano wensi aakakulikwa pa cimuti u mutiipwe kuli Leza, nupya mutalinzile ukukowezya impanga ino Yeova Leza winu akumupeela kuti iye inu.

22 “Ndi cakuti walola ing’ombe ya muzo nanti imfwele yatiponga, utalinzile ukuisya sile uku mufulo. Ulinzile ukuitwala uku muzo. 2 Lelo ndi cakuti umuzo asiikala apiipi nanti utamumanyile, ulinzile ukusenda inyama iiyo ukwako nupya ulatwalilila ukuisunga ukufikila lino umwineco aliza umukuilonda. Lyene ulinzile ukumupeela. 3 Vikwene avino ulinzile ukucita na kuli punda wakwe, ku cakuzwala cakwe, na kuli consi cino wazana ukuti umuzo wataponzya. Utalinzile ukusuulako sile.

4 “Ndi cakuti walola punda wa muzo nanti cipambasi watapona pa museo, utalinzile ukusuulako sile. Ulinzile ukumwazwilizya ukukatusya inyama iiyo.

5 “Umwanaci atalinzile ukuzwala ivyakuzwala vya monsi, umonsi nawe kwene atalinzile ukuzwala ivyakuzwala vya mwanaci. Pano wensi aakacita vii u wa winyi kuli Yeova Leza winu.

6 “Ndi cakuti wazana icinsanzo ca cunyi uku muti nanti apansi, ala muli nu twana nanti amayai nupya nyina apano ali, utalinzile ukusenda nyina kumwi nu twana. 7 Ulinzile ukuzinga nyina, lelo utwana twene ungatusenda. Uwacita vivyo pakuti vintu vyakuzipila nu kwikala amanda aingi.

8 “Ndi cakuti wakuula ing’anda, ulinzile ukukuulilila umumbali yi paala,* pakuti utakwata umulandu wa wazi ndi cakuti umwi wapona nu kufwa.

9 “Utalinzile ukukomela imbezu na zyuze umu calo ca myangazi. Pano nga caya vivyo, vyonsi ivyazombolwa umu calo cico vilapeelwa ukuti vyaomviwa pa ncende ya muzilo.

10 “Utalinzile ukukulika ukuli kumwi ing’ombe na punda lino ukulima.

11 “Utalinzile ukuzwala icakuzwala icapangilwa ni nsalu ziili, kuli kuti insalu ya mavumbu, ni nsalu itelepe.

12 “Ulinzile ukupanga masenkebele mu makona 4 aa cakuzwala cako.

13 “Ndi cakuti umonsi watwala mama nupya wapanga nawe icupo lelo pa cisila wamukana 14 nu kumupeela umulandu wakuti a cintuvwa, nupya wamononela izina pa kulanda ukuti: ‘Natwazile umwanaci wii lelo lino napanzile nawe icupo ntaweni usininkizyo ukulangilila ukuti a nacisungu,’ 15 ya isi na ya nyina ya mukazyana wiyo yalinzile ukupeela usininkizyo uku yakalamba pa mpongolo ya musumba uukulangilila ukuti a nacisungu. 16 Ya isi ya mukazyana yalinzile ukunena akalamba ukuti, ‘Napeezile umuntu wii umwanane ukuti aye a mamakwe, nomba watamukana 17 nupya akumupeela umulandu wakuti a cintuvwa, akuti: “Ntazanyile usininkizyo uli onsi uwakuti umwaninu a nacisungu.” Usininkizyo uukulangilila ukuti umwanane a nacisungu aewu.’ Lyene avyazi yalanza insalu pa nkoleelo ya yakalamba ya mu musumba iikulangilila usininkizyo. 18 Lyene akalamba ya mu musumba yalalema umonsi wiyo nu kumusalapula. 19 Yalamulifya impiya zyakwe siuva masyekele* 100 nu kupeela ya isi ya mukazyana pano ala umonsi wiyo watazewanya nacisungu wa mu Izlaeli nupya alatwalilila ukuya a mamakwe. Atalazumiliziwa ukumuta umi wakwe onsi.

20 “Ndi cakuti mulandu u wa cumi nupya kusi usininkizyo uukulangilila ukuti mukazyana wiyo wali a nacisungu, 21 akalamba ya mu musumba yalafumizya umukazyana wiyo pa mulyango wa ng’anda yakwe isi nupya antu ya mu musumba uno umukazyana akaikalamo yalinzile ukumutama na mawe suka afwe, pano ala watacita icintu ca winyi mu Izlaeli pa kucita uzelele lino acili akwikala pa ng’anda yakwe isi. Fwandi mulinzile ukufumya iciipe umu Izlaeli.

22 “Ndi cakuti mwazana ukuti monsi umwi akucita ucende na muka mwineco, yonsi kwene yoili yalinzile ukukomwa, kuli kuti umonsi kumwi nu mwanaci. Mulinzile ukufumya iciipe umu Izlaeli.

23 “Ndi cakuti umonsi umwi wakobekela nacisungu, nupya umonsi muze wazana umwanaci wiyo mu musumba nupya wacita nawe uzelele, 24 yonsi yoili mulinzile ukuyafumizya ukunzi ya musumba nu kuyatama na mawe suka yafwe, pano ala umukazyana atapunzile umu musumba, umonsi nawe ala watazewanya umuci* wa muze. Mulinzile ukufumya iciipe umu Izlaeli.

25 “Lelo ndi cakuti umonsi wazana umukazyana umukobekelwe ukunzi ya musumba nupya wamulema uku maka nu kucita nawe uzelele, umonsi wiyo alinzile ukukomwa, 26 nupya mutalinzile ukucita icili consi ku mukazyana wiyo. Mukazyana wiyo atacisile uluyembu luli lonsi lwa kufwilapo. Vino umonsi wiyo watacita, i cili cimwi na vino cingaya ndi cakuti umonsi umwi wazana umonsi muze nu kumukoma. 27 Pano ala watamukomaanya ukunzi ya musumba nupya umukazyana umukobekelwe iwapunda nomba patali pali ali wensi wa kumupususya.

28 “Ndi cakuti umonsi umwi wazana nacisungu aatakobekelwa nupya wamusenda nu kucita nawe uzelele lyene camanyikwa, 29 umonsi uwacisile uzelele nu mukazyana alinzile ukupeela isi wa mukazyana impiya zyakwe siuva masyekele 50 nupya nawe alaya a mamakwe. Pa mulandu wakuti wamuzewanyizye, atalazumiliziwa ukumuta umi wakwe onsi.

30 “Kusi ali wensi alinzile ukutwala umuci wakwe isi pakuti atazewanya isi.

23 “Umonsi wensi uwatungulwa nanti uwaputulwa icilundwa ca onsi atalinzile ukuya pa yantu yakwe Yeova.

2 “Mwana wensi uwa kupula atalinzile ukuya pa yantu yakwe Yeova. Na yonsi alafuma muli aliwe, nayo kwene yatalinzile ukuya pa yantu yakwe Yeova.

3 “Umwina Amoni nanti Umwina Moabu atalinzile ukuya pa yantu yakwe Yeova. Na yonsi alafuma muli aliwe yatalinzile ukuya pa yantu yakwe Yeova, 4 pano yataamupeezile ivyakulya na manzi lino mwali pa lwendo pa cisila ca kufuma umu Ijipti, nupya yalipiile Balamu mwana Beoli uwa ku Petoli ya ku Mesopotamya pakuti amutiipe. 5 Nomba Yeova Leza winu wakanyile ukukutika kuli Balamu. Lelo Yeova Leza winu wasenwile icitiipu ukuya ipaalo pano Yeova Leza winu wamutemilwe. 6 Mutalinzile ukuyazwa kuti yaye nu mutende nanti ukuleka ivintu viyazipile manda inu yonsi.

7 “Mutalinzile ukupata Aina Edomu pano a ina inu.

“Mutalinzile ukupata Aina Ijipti pano mwali aenyi umu mpanga yao. 8 Ana ya izikulu yao yangaya pa yantu yakwe Yeova.

9 “Ndi cakuti mwapanga inkambi kuti mulwisye alwani inu, mutalinzile ukuikowezya. 10 Ndi cakuti umonsi waya umukowele pa mulandu wa kufumya manzi ya onsi uku tulo, alinzile ukufuma umu nkambi nupya atalinzile ukuswililamo. 11 Nga cafika manguzi, alinzile ukufulala nupya angaswilila umu nkambi lino ilanzi lyawa. 12 Mulinzile ukukwata incende ifisame ukunzi ya nkambi ino mungaomvya nupya kuko kwene akuno mulinzile mwaya. 13 Lino mukuya ukunzi ya nkambi mulinzile ukusenda icakwimbilako. Nga mwafika mulinzile ukwimba iciwina, alino imuyazwilizya, nga mwamala imusya mwaziika usaali. 14 Pano Yeova Leza winu ali umu nkambi inu pakuti amupususye nu kupeela alwani inu kuli mwemwe, nupya inkambi inu ifwile ukuya iya muzilo pakuti ataalola icili consi ca winyi muli mwemwe.

15 “Mutalinzile ukutwala umuzya uku musambazi wakwe ndi cakuti utuuka ukufuma uku musambazi wakwe nu kwiza kuli mwemwe. 16 Angikala namwe umu musumba uli onsi uno wasoolola kuli konsi kuno watemwa. Mutalinzile ukulamucuzya.

17 “Umwana umukazyana uwa mu Izlaeli atalinzile ukuya cizelele wa pi tempele, nanti umwana umonsi uwa mu Izlaeli nawe kwene atalinzile ukuya cizelele wa pi tempele. 18 Mutalinzile ukutwala malipilo yano yalipila cizelele umwanaci nanti cizelele umonsi mu ng’anda yakwe Yeova Leza winu pakuti mufikilizye umulapo, pano malipilo yonsi yoili aa winyi kuli Yeova Leza winu.

19 “Mutalinzile ukuleka Umwina Izlaeli muzo alundepo lino akuwezya vino mwamukongwesya, ciye apa mpiya, ivyakulya, nanti cili consi cino mwamukongwesya. 20 Mungaleka uwa ku mpanga yuze ukulundapo lino akuwezya vino mwamukongwesya, nomba mutalinzile ukuleka Umwina Izlaeli muzo ukucita vivyo, pakuti Yeova Leza winu akaamupaala muli vyonsi vino mulaacita mu mpanga ino mulapoka.

21 “Nga mwalaya umulapo kuli Yeova Leza winu, mutalinzile ukucelwa ukuufikilizya. Pano Yeova Leza winu alalonda mufikilizye vino mwalapa; nga mutacisile vivyo ala mwayembuka. 22 Nomba nga mutalafile umulapo, mutalakwata umulandu wa luyembu. 23 Mulinzile ukucita vyonsi vino mwalaya, nu kufikilizya vyonsi vino mwalapa ukuya upe wa kuitemelwa kuli Yeova Leza winu.

24 “Ndi cakuti wingila umu calo ca muzo ica myangazi, ungalya suka uwikute nomba utalinzile ukulonga imwi umu civiya.

25 “Ndi cakuti waya umu calo ca muzo ica ngano, ungatinkola izice ukuomvya ikasa nomba utalizile ukuomvya cikwakwa.

24 “Ndi cakuti umonsi watwala mama nupya atamutemilwe pa mulandu wakuti wazana cimwi muli aliwe cino atatemilwe, alinzile ukumulembela kalata wa kumuteelapo nu kumupeela, nupya alinzile ukumuzinga. 2 Pa cisila ca kufumapo angaya akatwalwe kuze. 3 Ndi cakuti umonsi wakwe ciili wamupata, wamulembela kalata wa kumuteelapo nu kumupeela nupya wamuzinga pa ng’anda pakwe nanti ndi cakuti umonsi wakwe ciili uwamutwazile wafwa, 4 iya uwa kutandikilapo uwamuzinzile atalazumiliziwa ukumutwala nupya pa cisila cakuti wakoweziwa pano ukucita vivyo i ca winyi kuli Yeova. Mutalinzile ukuleta uluyembu mu mpanga ino Yeova Leza winu akumupeela ukuti mupyane.

5 “Ndi cakuti umonsi alino wacitwazile, atalinzile ukuya ku nkondo nanti ukupeelwa imilimo yuze ili yonsi. Alinzile ukuya nu untungwa pa mwaka onga nu kwikala pa ng’anda pakuti azanzye mamakwe.

6 “Kusi aliwensi alinzile ukulemelamo iwe lya kusiilapo nanti umwanansyo pa nkongole zino umwi wamukongola, pano ukucita vivyo kungalenga cimutalile ukupekanya ivyakulya pakuti aye nu umi.

7 “Ndi cakuti mwazana umwi wataiya Umwina Izlaeli muze nupya wamucuzya nu kumukazya, umuntu wiyo alinzile ukukomwa. Mulinzile ukufumya icintu ciipe umu Izlaeli.

8 “Ndi cakuti kwaya ulwale wakwe tembwe,* mulinzile ukwikako sana mano nu kucita vyonsi vino ya simapepo Aina Levi yalaamunena. Mwaikako sana mano pakuti mwacita vivi kwene vino nayanenyile. 9 Muce mwaiusya vino Yeova Leza winu wacisile kuli Milyamu lino mwafumanga umu Ijipti.

10 “Ndi cakuti mwakongwesya umwi cintu cili consi, mutalinzile ukwingila umu ng’anda yakwe nu kutola cintu cino watalanda ukuti mungalemelamo. 11 Mulinzile ukwimilila panzi nupya umuntu wiyo alingila umu ng’anda nu kumuletela icintu cino watalanda ukuti acino mungalemelamo. 12 Nupya ndi cakuti umuntu wiyo u mupiina, mutalinzile ukuya umu kulaala ala muli ni cintu cino imulemelamo. 13 Mulinzile ukumuswilizizya cino watamupeela ukuti mulemelemo lino ilanzi lyawa sile, nupya alaya umu kulaala ala watazwala icakuzwala cakwe nupya alamupaala, nga mwacita vivyo Yeova Leza winu alalola ukuti imucita cintu cilungame.

14 “Mutalinzile ukucenjezya umuomvi uwataulizya nupya umupiina, asi mulandu u mwina Izlaeli muzo nanti uwafuma uku mpanga yuze aakaikala umu mpanga inu mu misumba inu kwene. 15 Mulinzile ukumupeela malipilo yakwe pa wanda kwene uwo lino ilanzi litatala lyawa, pano ala ataulizya nupya asintilile pa malipilo kwene yayo. Nga mutacisile vivyo alalilila kuli Yeova pa mulandu winu nupya mulaya nu mulandu.

16 “Ya isi yatalinzile ukukomwa pa mulandu ni vicitwa vya yana yao, na ana yatalinzile ukukomwa pa mulandu ni vicitwa vyakwe ya isi. Umuntu alinzile ukukomwa pa mulandu sile nu luyembu lwakwe.

17 “Mutalinzile ukufyenga umuntu uwafuma uku mpanga yuze nanti umwana wa nsiwa lino mukupingula, nupya mutalinzile ukupoka icakuzwala cakwe mukamfwilwa kuti ciye ica kulemelamo pali vino wakongola. 18 Mwaiusya ukuti mwali azya umu Ijipti, nupya Yeova Leza winu wamukulwile. Ali mulandu uno nkumunenela ukucita vii.

19 “Lino mwazombola umu vyalo vinu nupya mwilila umwanzi, mutalinzile ukuswilila umu kuusenda. Mulinzile ukusiila antu afuma uku mpanga yuze, ana ya nsiwa na ya mukamfwilwa, pakuti Yeova Leza winu akaamupaala muli vyonsi vino mukucita.

20 “Ndi cakuti mwakulula imiolivi mutalinzile ukuswilila umu kukulula iyatisyala uku misambo. Iyatisyala i ya yantu afuma uku mpanga yuze, ana ya nsiwa na ya mukamfwilwa.

21 “Ndi cakuti mwazombola imyangazi umu calo, mutalinzile ukuswilila umu kukolonganika iyatisyala. Iyatisyala ilinzile ukuya iya yantu afuma uku mpanga zyuze, ana ya nsiwa na ya mukamfwilwa. 22 Mwaiusya ukuti mwali azya umu mpanga ya Ijipti. Ali mulandu uno nkumunenela ukucita vii.

25 “Ndi cakuti antu yaili yapusana, yalaya kuli ya kapingula, nayo yalayapingula nu kulanda uwa kaele na aakweti umulandu. 2 Ndi cakuti cazanwa ukuti aakweti umulandu alinzile ukuumwa, kapingula alamunena ukulambalala pansi, nupya aluumwa ala kapingula akulola nako. Ivikoti vino alumwa vilinzile ukulingana ni vicitwa vyakwe. 3 Yangamuma ivikoti 40, lelo yatalinzile ukucizyapo. Ndi cakuti yatwalilila ukumuma ivikoti ukucila pali vii, Umwina Izlaeli muzo angazewana.

4 “Utaanyepa cipambasi ku kanwa lino ukumuomvya pa kupuula ingano.

5 “Ndi cakuti aina yakaikala pamwi nupya wenga wafwa ukwaula ukukwata umwana umonsi, umuci wakwe wino watafwa atalinzile ukutwalwa uku monsi uwa mu lupwa luze. Mulamu wakwe alinzile ukumutola pakuti aye mamakwe, nu kwingila umu cupo ca pali umulamu. 6 Umwana uwa kutandikilako wino umwanaci wiyo alakwata, alatola izina lya mufwe pakuti izina lya mufwe litakalowe umu Izlaeli.

7 “Ndi cakuti umonsi wakana ukutwala mulamu wakwe, mulamu wakwe alinzile ukuya uku yakalamba pa mpongolo ya musumba nu kuyanena ukuti, ‘Mulamu watakana ukusungilila izina lya mwinakwe umu Izlaeli. Watakana ukutwalana nani cupo ca pali umulamu.’ 8 Akalamba ya mu musumba yalamwama nu kulanda nawe. Ndi cakuti watwalilila ukulanda ukuti, ‘Nsikulonda ukumutwala,’ 9 lyene umwanaci wiyo alapalama pali mulamu wakwe ala na akalamba yakulolako, alamuzula indyatu nu kumuswila pa manso nu kulanda ukuti, ‘Vikwene avino cilinzile ukuya uku muntu uwakana ukuvyalila umwinakwe umwana.’ 10 Lyene pa cisila ulupwa lwa muntu wiyo lulaamwa umu Izlaeli ukuti, ‘Ulupwa lwakwe wino yazuzile indyatu.’

11 “Ndi cakuti aonsi yaili yakulwa lyene umuci waya umu kutaasya iya pakuti amucingilile nu kufyanta ivyanzwalo vya monsi aakulwa na iya, 12 mulinzile ukumuputula icizanza. Mutalinzile ukumuvwila uluse.

13 “Mutalinzile ukukwata mawe ya kupimilako yaili apusane mu tuvyola twinu, kuli kuti ilikalamba ni linono. 14 Mutalinzile ukukwata ivyakupimilamo viili vipusane umu ng’anda, kuli kuti icikalamba ni cinono. 15 Mulinzile ukukwata ivyakupimilako ukufina ni vyakupimilamo ivintu vyuze ivya cumi, pakuti mukikale manda aingi mu mpanga ino Yeova Leza winu akumupeela. 16 Pano umuntu wensi aakacita vii u wa ucenjezi nupya u wa winyi kuli Yeova Leza winu.

17 “Iusyini vino Aina Amaleki yacisile kuli mwemwe lino mwali umu nzila ala mukufuma uku Ijipti, 18 vino yamukomenkinye umu nzila nu kuzanza yonsi aali uku cisila lino mwatonsile sana. Yatatiinyile Leza. 19 Lino Yeova Leza winu alamulenga ukupuuza uku yalwani inu yonsi aalamuzinguluka umu mpanga ino Yeova Leza winu akumupeela ukuti mwaikalamo, muce mulovye Aina Amaleki yonsi umu nsi pakuti yataca iusiwepo. Mutaca mwilile ukucita vii.

26 “Lino mulingila umu mpanga ino Yeova Leza winu akumupeela ukuti mwaikalamo nupya lino mulaipoka nu kutandika ukwikalamo, 2 mukatole ivyakulya vimwi ivyatandikilapo ukuca, ukufuma pa vilimwa vyonsi vino mulazombola, umu mpanga ino Yeova Leza winu akumupeela, mukavike umu muse nu kuya uku ncende ino Yeova Leza winu alasoolola ukwikako izina lyakwe. 3 Mukaye kuli simapepo alaaomba umu manda yayo nu kumunena ukuti, ‘Ilelo nkunena Yeova Leza wako ukuti iniza umu mpanga ino Yeova walafile uku vikolwe vitu ukuti alatupeela.’

4 “Simapepo alatola umuse uwo nu kwika pa nkoleelo ya ulambo wakwe Yeova Leza winu. 5 Lyene mulinzile ukulanda pa nkoleelo yakwe Yeova Leza winu muti, ‘Tata wali Umwina Alamu uwapitananga sile, nupya waile uku Ijipti nu kuyaikala wa mwenyi, wakweti sile ulupwa ulunono. Nomba lino wali kuuku wizile aya uluko ulukalamba, ulwa maka nupya umwali antu aingi sana. 6 Nupya Aina Ijipti yatucuzyanga sana nu kutulenga ukuya azya yao. 7 Lyene twatandike ukulilila kuli Yeova Leza wa vikolwe vitu, nupya Yeova watuvwile nu kulola vino twaculanga. 8 Nupya Yeova watufumizye umu Ijipti ukuomvya ikasa lyakwe ilya maka, imilimo ya kuzungusya, ivimanyililo alino ni vizungusyo. 9 Lyene watuleesile kuno nu kutupeela impanga yii, kuli kuti impanga umwaya umukaka nu uci. 10 Fwandi naleta ivyakulya vii ivyatandikilapo ukuca ukufuma pa vyakulya vino nazombola umu mpanga ino Yeova wampeela.’

“Mulinzile ukuvika pa nkoleelo yakwe Yeova Leza winu nu kufukama pa nkoleelo yakwe Yeova Leza winu. 11 Lyene muce musansamuke pa visuma vyonsi vino Yeova Leza winu wamupeela pamwi na amung’anda inu, Aina Levi, alino na antu afuma uku mpanga yuze aakaikala namwe.

12 “Nga mwamala ukukolonganika icikumi consi ca pa vilimwa vinu umu mwaka wakwe citatu, kuli kuti umwaka wa kupeela icikumi, mukapeele Aina Levi, antu afuma uku mpanga zyuze, ana ya nsiwa, na ya mukamfwilwa, nayo yalaliila umu misumba inu. 13 Lyene mulanena Yeova Leza winu muti, ‘Imfumya ica muzilo consi umu ng’anda yane nu kupeela Aina Levi, antu afuma uku mpanga zyuze, ana ya nsiwa na ya mukamfwilwa, wakwe vino wanenyile, ntatamile masunde yako. 14 Ntaalilepo icili consi lino naloosyanga nanti ukufumyapo icili consi lino nali umukowele nanti ukupeelapo cili consi pa mulandu wa yafwe. Inuvwila izwi lyako we Yeova Leza wane nu kucita vyonsi vino wanenyile. 15 Fwandi lola ukufuma ukwi yulu, kuli kuti ncende ya muzilo kuno ukaikala nu kupaala antu yako Aina Izlaeli ni mpanga ino watupeela, kuli kuti impanga umwaya umukaka nu uci wakwe vino walafile uku vikolwe vitu.’

16 Ilelo Yeova Leza winu akumunena ukuti mwalondela masunde yaa. Mulinzile ukuyalondela ni myenzo inu yonsi nu umi winu onsi. 17 Ilelo Yeova watamunena ukuti alaya a Leza winu nu kuti mulinzile ukusunga masunde yakwe nu kuvwa ukwi izwi lyakwe. 18 Nupya namwe ilelo imulaya Yeova ukuti mulaya antu yakwe, kuli kuti antu yakwe aiyele wakwe vino wamulavile, nu kuti mulaalondela masunde yakwe yonsi 19 nupya wakwe vino wamulavile, alamucindamika ukucila inko zyonsi zino wapanga, yalaamulumbanya nu kumucindika ndi cakuti mwatwalilila ukuya antu ya muzilo kuli Yeova Leza winu.

27 Lyene Mose kumwi na akalamba ya mu Izlaeli yanenyile antu ukuti: “Mwalondela masunde yonsi yano nkumunena ilelo. 2 Nupya pa wanda uno mulalamba Uluzi Lwa Yodani nu kwingila umu mpanga ino Yeova Leza winu akumupeela, muce mwimike mawe akalamba nu kwikako pulasita.* 3 Lyene muce mulembepo masunde yaa yonsi lino mulalamba Uluzi Lwa Yodani, pakuti mukingile umu mpanga ino Yeova Leza winu akumupeela, kuli kuti impanga umwaya umukaka nu uci, wakwe vino Yeova Leza wa vikolwe vinu wamulavile. 4 Lino mulalamba Uluzi Lwa Yodani muce mwimike mawe yaa pa Mwamba wa Ebali nu kwikako pulasita, wakwe vino nkumunena ilelo. 5 Nupya papa kwene a pano muce mukuulile Yeova Leza winu ulambo, ukuomvya mawe. Mutakaomvye ivyela pa kuputula mawe yayo. 6 Muce mukuulile Yeova Leza winu ulambo kuomvya mawe apuma aula ukuputula nupya a pano muce mwapeelela malambo ya koca kuli Yeova Leza winu. 7 Mulaapeelelapo malambo ya mutende nu kuyalila papa kwene, nupya mulaasansamuka pa nkoleelo yakwe Yeova Leza winu. 8 Nupya muce mulembe ningo masunde yaa yonsi pa mawe yayo.”

9 Lyene Mose na ya simapepo Aina Levi yanenyile Aina Izlaeli yonsi ukuti: “Mwe Ina Izlaeli uvwini kuno nupya kutikisyini. Ilelo imuya antu yakwe Yeova Leza winu. 10 Mwauvwila Yeova Leza winu nu kulondela masunde yakwe yano nkumupeela ilelo.”

11 Pa wanda uwa Mose wanenyile Aina Izlaeli ati: 12 “Mitundu iilimilila pa Mwamba wa Gelizimu pa kupaala antu lino mwalamba Uluzi Lwa Yodani aeyi: Mutundu wakwe Simyoni, wakwe Levi, wakwe Yuda, wakwe Isakali, wakwe Jozefu, alino nu mutundu wakwe Benjamini. 13 Nupya imitundu iilimila pa Mwamba wa Ebali pa kutiipa antu aeyi: Mutundu wakwe Lubeni, wakwe Gadi, wakwe Asyeli, wakwe Zebuluni, wakwe Dani, alino nu mutundu wakwe Nafutali. 14 Lyene Aina Levi yalalanda uku Ina Izlaeli yonsi ni izwi lyuvwike ukuti:

15 “‘Aye umutiipwe umuntu uwapanga icilubi ca kuwaza, nanti ca kwengulula nu kucika umu ncende ifisame, umulimo uwo u wa winyi kuli Yeova.’ (Nupya antu yonsi yalasuka yati, ‘Ameni!’)

16 “‘Aye umutiipwe umuntu uwasaalula isi nanti nyina.’ (Nupya antu yonsi yalasuka yati, ‘Ameni!’)

17 “‘Aye umutiipwe uwasezezya umuntu muze umupaka.’ (Nupya antu yonsi yalasuka yati, ‘Ameni!’)

18 “‘Aye umutiipwe umuntu uwalenga impafu kuponga inzila.’ (Nupya antu yonsi yalasuka yati, ‘Ameni!’)

19 “‘Aye umutiipwe umuntu uwafyenga umuntu uwafuma uku mpanga yuze, umwana wa nsiwa nanti mukamfwilwa.’ (Nupya antu yonsi yalasuka yati, ‘Ameni!’)

20 “‘Aye umutiipwe uwalaala na muka isi pano ala wazewanya isi.’ (Nupya antu yonsi yalasuka yati, ‘Ameni!’)

21 “‘Aye umutiipwe uwalaala ni nyama ili yonsi.’ (Nupya antu yonsi yalasuka yati, ‘Ameni!’)

22 “‘Aye umutiipwe uwalaala na kaci wakwe, kuli kuti uwavyalwa kuli isi nanti kuli nyina.’ (Nupya antu yonsi yalasuka yati, ‘Ameni!’)

23 “‘Aye umutiipwe uwalaala na nyinavyala.’ (Nupya antu yonsi yalasuka yati, ‘Ameni!’)

24 “‘Aye umutiipwe umuntu uwateyamila umuze nu kumukoma.’ (Nupya antu yonsi yalasuka yati, ‘Ameni!’)

25 “‘Aye umutiipwe uwapoka mafisakanwa pakuti akome umuntu wa kaele.’ (Nupya antu yonsi yalasuka yati, ‘Ameni!’)

26 “‘Aye umutiipwe umuntu uwakana ukulondela masunde yaa.’ (Nupya antu yonsi yalasuka yati, ‘Ameni!’)

28 “Ndi cakuti mulauvwila Yeova Leza winu ukupitila umukulondela masunde yakwe yonsi yano nkumupeela ilelo, Yeova Leza winu alamucindamika ukucila inko zyonsi izyasyala. 2 Nga mwatwalilila ukuvwila Yeova Leza winu, mapaalo yano mulapokelela aeya:

3 “Leza alapaala misumba inu kumwi ni vyalo vinu.

4 “Leza alalenga mukwate ana aingi, ivyakulya ivingi ni viteekwa ivingi, kuli kuti ing’ombe ni mfwele.

5 “Mise inu ilapaalwa kumwi ni viya vinu vino mukakandilamo umunya uwa kupangila umukate.

6 “Mulapaalwa muli vyonsi vino mulaacita.

7 “Yeova alalenga ukuti alwani inu yacimviwe. Yalamuzanza ukufuma uku ntunga yonga lelo yalutukila uku ntunga izipusanepusane 7 kufuma kuli mwemwe. 8 Yeova alapaala inkoma zinu ni milimo inu yonsi nupya Yeova Leza winu alamupaala umu mpanga ino akumupeela. 9 Yeova alamulenga ukuya antu yakwe aamuzilo wakwe vino walafile kuli mwemwe ndi cakuti mwatwalilila ukulondela masunde yakwe Yeova Leza winu nu kucita vino akalonda. 10 Antu yonsi umu nsi yalalola ukuti mukaamilwa ukwi zina lyakwe Yeova nupya yalaamutiina.

11 “Yeova alaleka ukuti mukwate ana aingi, viteekwa ivingi ni vyakulya ivingi mu mpanga ino Yeova walafile uku vikolwe vinu ukuti alamupeela. 12 Yeova alamuyulila iyulu kuti imvula itoonye umu mpanga inu pa nsita ino ilinzile ukutoonyezyapo wakwe vino umuntu akayula inkoma, nupya alapaala vyonsi vino mulaacita. Inko zilaazima ivintu kuli mwemwe, lelo mwemo mutalaalondekwa ukwazima. 13 Nga mwatwalilila ukuvwila masunde yakwe Yeova Leza winu yano nkumunena ilelo nu kuyalondela, Yeova alamulenga ukuya wa mutwe atalamulenga ukuya wa musinda nupya alamucindamika, mutalaya asuulwe. 14 Mwalondela masunde yonsi yano nkumupeela ilelo, mutalinzile ukulondela ya leza yauze nu kuyaombela.

15 “Nomba ndi cakuti mutalauvwila Yeova Leza ukupitila umukulondela masunde yakwe yonsi yano nkumunena ilelo, vitiipu vii vyonsi vilaya pali mwemwe:

16 “Misumba inu ilatiipwa kumwi ni vyalo vinu.

17 “Imise inu ilatiipwa kumwi ni viya vino mukakandilamo umunya wa kupangila umukate.

18 “Mutalakwata ana aingi, ivyakulya ivingi, ni ng’ombe ni mfwele.

19 “Mulatiipwa muli vyonsi vino mulaacita.

20 “Yeova alamuletela icitiipu ni cimvulunganya nupya mulafululwa muli vyonsi vino mukucita mpaka mukafwe nu kulowa zuwa, pa mulandu ni vicitwa viipe na vino mwamusuula. 21 Yeova alamuletela indwala ya mutatakuya mpaka akamulovye umu mpanga ino mukuya umu kwikalamo. 22 Yeova alamuletela ulwale wakwe TB, impepo, kuvimba, kukaya umwili, umuza ukaye, nupya mulacimviwa umu ulwi, ni vimelwa vinu viluuma, ivintu vii viliza pali mwemwe suka muce mulowe. 23 Ndalenga iyulu linu ukuya wakwe koopa nupya ndalenga impanga inu ukuya wa cela. 24 Yeova alalenga ulukungu nu mucanga vyatoonya wa mvula ukufuma umwi yulu mu mpanga inu suka muce mulowe. 25 Yeova alalenga ukuti mucimviwe uku yalwani inu, mulayazanza ukufuma uku ntunga yonga, lelo muluutukila umu ntunga zipusanepusane 7; nupya ivilamucitikila vilalenga mawene yonsi ukuvwa intete. 26 Ivyunyi ni nyama vilalya ivitumbi vinu nupya kusi alavizinga.

27 Yeova alamuletela ivipute wakwe vino waleesile umu Ijipti, ulwale wa kuvimba apakafumila usali,* impele, ni vilonda vya pa nkanda nupya mutalapoziwa. 28 Yeova alalenga ukuti mupene nu kumulenga ukupafula alino nu kuvulunganyiziwa. 29 Mulaapulupunta umusanya wakwe vino impafu ikapulupunta, mutalaakwanisya ukucita icili consi, yalaamucenjezya nu kumwiila nupya kusi alamupususya. 30 Mulaataisya anaci, lelo aonsi yauze yalaalala nayo uku maka. Mulaakuula mang’anda, lelo mutalaaikalamo. Mulaalima ivyalo vya myangazi, lelo mutalaalyako vizao vivyo. 31 Ing’ombe zinu zilakomwa ale mukulola nako, lelo mutalalyako. Yalamwiila ya punda inu ale mukulola nako, lelo yatalamuwezezya. Alwani inu yalamusendela imfwele, lelo kusi alamwavwa. 32 Antu yauze yalamusendela ana inu aonsi na akazyana ale mukulola nako nupya lyonsi mulaluuka ana inu, lelo mutalakwata maka aakucita cili consi. 33 Antu yano mutamanya yalaamulila ivizao ni vyakulya vyonsi vino mwazombola nupya lyonsi yalaamucenjezya nu kumucuzya sana. 34 Mulapena pa mulandu ni vintu vino mulaalola.

35 Yeova alamulwalika ivipute ivipisye pa makokola nu ku makulu ivitalapola ukufuma uku tukando kufika pa mutwe. 36 Yeova alamuzingila pamwi nu mwene wino mulaisontela ku luko luno mutamanya nupya luno ni vikolwe vinu vitaamanyile, nupya kuuku mulaombela ya leza yauze, kuli kuti ya leza apangilwa ni vimiti na mawe. 37 Lino mulafika uku ncende ino Yeova alamuzingilako, antu yonsi aakaikala uku ncende iyo yaluvwa intete pa mulandu ni vilamucitikila nupya yalamuseka nu kumutumfya.

38 “Mulaakomela imbezu zingi umu vyalo lelo mulazombola sile utunono pano ya makanta yalaalya. 39 Mulalima ivyalo vya myangazi lelo mutalazombolamo ivili vyonsi nupya mutalamwa waini, pano iviyongoli vilalya. 40 Mulakwata imiti ya miolivi umu ncende inu yonsi lelo mutalapanga mafuta akupakala, pano maolivi yalalukuta. 41 Mulakwata ana aonsi na akazyana lelo mutalatwalilila ukuya nayo, pano yalasendwa umu uzya. 42 Ya makanta* yalonona imiti inu yonsi ni vizao vinu. 43 Antu afuma uku mpanga zyuze aakaikala namwe yalaakwatilako sile amaka, lelo mwemo mulaacepelwa amaka. 44 Yalaamukongwesya lelo mwemo mutalaayakongwesya. Yalaya wa mutwe, lelo mwemo mulaya wa musinda.

45 “Vitiipu vii vyonsi viliza pali mwemwe mpaka muce mulowe, pa mulandu wa kukanauvwila Yeova Leza winu kupitila umukukanalondela masunde yakwe yano wamunenyile. 46 Vilatwalilila ukuya pali mwemwe na pa yana inu nupya vilaya ivimanyililo ni vilangililo vya kucelula manda pe, 47 pano mutaombiile Yeova Leza winu ni nsansa lino mwakweti vintu ivingi. 48 Yeova alamutumila alwani nupya mulayaombela lino muli ni inzala, lino muli nu lusala, nupya lino mwemwe yasizye nu kuulizya. Leza alamuzwika iyoko lya cela umu nsingo suka ace amulovye.

49 Yeova alamukatusizya uluko lwa kutali pakuti lumulwisye, lulafuma uku mpela ya nsi; luliza kwati a cipungu nupya mutalauvwa ululimi luno uluko lulo lulaalanda, 50 uluko lulo lulaya sana nu unkalwe nupya lutalalangulukila umukote nanti ukuvwila umwance uluse. 51 Yalaamuliila iviteekwa vinu ni vizao vinu suka muce mulowe. Yatalamusiila ivyakulya ivili vyonsi, waini umupya nanti amafuta, ing’ombe, nanti imfwele suka yace yamonone. 52 Yalazinguluka imisumba inu yonsi nu kumucilikila pakuti mutakaafuma kufikila malinga yano mwataila yace yawe. Cumi kwene yalazinguluka imisumba inu iyaya umu mpanga inu yonsi ino Yeova Leza winu wamupeela. 53 Lyene mulatandika ukulya ana inu alumendo na akazyana yano Yeova Leza winu wamupeela, pa mulandu na vino alwani inu yalamuzinguluka alino na vino yalaamucuzya.

54 “Nanti sile umonsi umukankala sana ataluvwila umwina wakwe uluse nanti mamakwe wino watemwa sana nanti ana yakwe asyala, 55 nupya atalaleka yalyeko umwanakwe wino alalya, pano atalakwata icili consi pa mulandu na vino alwani yalazinguluka imisumba inu nu kumucuzya sana. 56 Nu mwanaci umukankala sana aatatazile aelenganyepo ukulyata ulwazo pansi pa mulandu nu ukankala, ataluvwila uluse iya wino watemwa sana nanti umwanakwe umulumendo nanti umukazyana, 57 pano atalaleka yalyeko umwana wino wakwata kumwi sile na vyonsi ivikafuma umu mwili pa cisila ca kukwata umwana, alalya ivintu vivyo mu umfisolo kumwi na ana yano alaakwata pa mulandu na vino alwani inu yalazinguluka imisumba inu nu kumucuzya sana.

58 “Ndi cakuti mutalaalondela masunde yonsi yaa aalembwa umwi buku lii nu kutiina izina lya lulumbi nupya ilya kutiinya lyakwe Yeova Leza winu, 59 Yeova alaleta ivinkunka iviipisye pali mwemwe na pa yana inu, vinkunka ivikalamba nupya ivya mutatakuya ni ndwala iziipisye nupya izya mutatakuya. 60 Alamuletela indwala zyonsi zino mwatiinanga umu Ijipti nupya zilatwalilila ukuya pali mwemwe. 61 Yeova alamuletela indwala na zyuze nanti vinkunka ivitalembwa umwi buku lii lya masunde mpaka mukalowe. 62 Nanti cakuti mwavula wa ntanda zya mwi yulu, antu sile anono aalasyala pa mulandu wakuti mutuvwilile Yeova Leza winu.

63 “Nupya wakwe viivi kwene vino Yeova walondesyanga ukuti vintu vyamuzipila nu kumuvuzya, ali vino Yeova alaalondesya ukumonona nu kumulovya nupya kusi aalasyala umu mpanga ino mukuya umukwikalamo.

64 “Yeova alamusalanganyizizya umu nko zyonsi ukufuma uku mpela ya nsi ukufika uku mpela yuze iya nsi, nupya kuuku kwene akuno mulaaombela ya leza aapangilwa ni vimiti na mawe yano mwemo ni vikolwe vinu mutaamanyile. 65 Mutalaya nu mutende uku nko zino mulasalanganilako nanti ukuzana incende umwakupuuzila ulwazo lwinu. Lelo Yeova alalenga ukuti mwasakamikwa nu kulenga amanso inu ukutonta nu kuvwa sana intete. 66 Umi winu ulaya umu uzanzo, nupya mulauvwa sana intete musanya nu usiku; mutalamanya ndi cakuti mulapusuka. 67 Pa mulandu nu kuya sana ni ntete na vino mulaalola, katondo mulaalanda imuti, ‘Fwandi nga icili amanguzi!’ na manguzi nayo mulaalanda imuti, ‘Fwandi nga icili akatondo!’ 68 Nupya ukwaula nu kutwisika Yeova alamuswilizya uku Ijipti ukuomvya uwato, kuno namunenyile ukuti, ‘Mutalatala muswilile,’ nupya kuuku kwene akuno mulaikazya mweineco uku yalwani inu wa yazya aonsi na anaci nomba kutalaya uwa kumukala.

29 Yaa ali mazwi ya upangano yano Yeova wanenyile Mose ukupangana na Ina Izlaeli mu mpanga ya Moabu ukulunda pa upangano uno wapangine nayo umu Holebu.

2 Lyene Mose wakolonganike Aina Izlaeli yonsi nu kuyanena ati: “Mwailoliile vyonsi vino Yeova wacisile umu mpanga ya Ijipti kuli Falao nu ku yaomvi yakwe yonsi nu ku yantu yonsi amu mpanga yakwe, 3 mwailoliile upinguzi wakwe ukalamba, ivimanyililo ivikalamba ni vizungusyo. 4 Nomba Yeova ataamulenga ukuya nu mwenzo wa kwiluka, manso ya kulolelako na matwi ya kuvwilako kufika na ndakai. 5 ‘Lino namutungululanga pa myaka 40 umu lwanga, vyakuzwala vinu ni ndyatu vitaatazile ivisila. 6 Mutaalile umukate, kumwa waini nanti vyakumwa vyuze ivikolineko pakuti mumanye ukuti nene indi Yeova Leza winu.’ 7 Lyene mwizile uku ncende yii, nupya Sihoni umwene wa Hesyiboni na Ogi umwene wa Basyani izile umu kutulwisya, nomba twayacimvizye. 8 Pa cisila twatozile impanga yao nu kupeela Aina Lubeni, Aina Gadi na afu wa mutundu wa Ina Manase. 9 Fwandi mwasunga mazwi amu upangano uu nu kuyalondela pakuti vintu vyamuzipila muli vyonsi vino mukucita.

10 Mwensi imwimilila pa nkoleelo yakwe Yeova Leza winu ilelo, kuli kuti intunguluzi zya mitundu, akalamba, angalizi, aonsi yonsi amu Izlaeli, 11 ana inu, ya mama inu, na antu afuma uku mpanga zyuze yano mukaikala nayo kufuma pali yano yakamutiyila inkwi kufika pali yano yakamutapila manzi. 12 Imwiza pano pakuti mulape umulapo wa kwingila umu upangano wakwe Yeova Leza winu, upangano uno Yeova Leza winu akupangana namwe ilelo 13 pakuti amulenge ukuya antu yakwe, nawe aye Leza winu wakwe vino wamulavile nu kulapa uku vikolwe vinu, kuli kuti Abulahamu, Isaki, na Yakobo.

14 “Nomba nsikupangana sile namwe nu kulapa sile kuli mwemwe, 15 lelo a kuli yonsi atiimilila pa nkoleelo yakwe Yeova Leza witu ilelo na yonsi yano tusi nayo ilelo pano. 16 (Pano mwamanya ningo vino twikalanga umu mpanga ya Ijipti na vino twapisile umu nko zipusanepusane lino twali pa lwendo. 17 Nupya mwailolelanga ivintu vya winyi ni vilubi vya winyi vino yakweti ivyapangilwa ni vimuti na mawe na siuva na goldi.) 18 Kusi umonsi nanti umwanaci, ulupwa nanti umutundu uuli pano ilelo uulinzile ukupondokela Yeova Leza witu nu kutandika ukuombela ya leza ya nko zii pakuti patakaye umusila pali mwemwe uwa cimuti cakwe poizoni nupya icikaseeka ivizao ivilule.

19 “Ndi cakuti umwi uvwa mazwi ya mulapo uu nu kutandika ukuyuvwa ati, ‘Ndaya nu mutende nanti cakuti natwalilila ukucita vino nkulonda,’ ivintu vitalamuzipila muli vyonsi vino akucita, 20 Yeova atalamwelela, nupya ukali wakwe Yeova ulaya pa muntu wiyo ni vitiipu vyonsi ivyalembwa umwi buku lii vilaya pali aliwe, nupya Yeova alasisya izina lya muntu wiyo pano nsi. 21 Yeova alafumya umuntu wiyo mu mitundu yonsi iya Ina Izlaeli nu kumonona ukulingana ni vitiipu vyonsi vya mu upangano uu uwalembwa umwi buku lii lya masunde.

22 “Ana inu aalavyalwa uku nkoleelo na antu afuma uku mpanga zya kutali yalalola ivinkunka ni ntazi zino Yeova alamuletela 23 alalenga kuye saufa, musilya, nu moto, icakuti kusi cili consi icilakomelwa umu mpanga inu nanti ukumela, nupya kutalalemba icimelwa icili consi wakwe vivi kwene vino cali umu Sodoma nu mu Gomola mu Adima nu mu Zeboimu, misumba ino Yeova ononyile pa mulandu nu ukali wakwe. 24 Ana inu yonsi aalavyalwa uku nkoleelo, antu afuma uku mpanga zya kutali, alino na antu amu nko zyonsi yaluzya ukuti, ‘U mulandu ci uno Yeova watacitila vii uku mpanga yii? I cani caticilenga ukuti ayasokele?’ 25 Lyene yalati, ‘A pa mulandu wakuti yatasunzile upangano wakwe Yeova Leza wa vikolwe vyao uno yapangine nawe lino wayafumizye umu mpanga iya Ijipti. 26 Lelo yatandike ukuombela ya leza yauze nu kuyapepa, ya leza yano yataamanyile nupya yano ataayazumilizye ukupepa. 27 Lyene ukali wakwe Yeova wizile pali aliyo lino wayaletiile ivitiipu vyonsi ivyalembwa umwi buku lii. 28 Fwandi Yeova wayasokiile sana nu kuyafumya umu mpanga yao nupya wayatwazile uku mpanga yuze kuno yali ndakai.’

29 “Ivintu ivyafiswa i vyakwe Yeova Leza witu, lelo ivintu ivyasokololwa i vitu na ana itu manda pe, pakuti twalondela masunde yaa yonsi.

30 “Lino mazwi yaa yonsi yalafikiliziwa pali mwemwe, kuli kuti amapaalo ni vitiipu vino nkumunena ilelo nupya mukwiusya lino muli umu nko zyonsi zino Yeova Leza winu alamusalanganyizizyamo, 2 nupya mwemo na ana inu mwaswilila kuli Yeova Leza winu nu kuvwa ukwi izwi lyakwe ukulingana na vino nkumunena ilelo, ni myenzo inu yonsi nu umi winu onsi, 3 lyene Yeova Leza winu alamufumya umu uzya nu kumuvwila uluse nu kumukolonganika ukufuma umu yantu yonsi muno Yeova Leza winu wamusalanganyizizye. 4 Nanti cakuti antu inu yalasalangana ukufika kuno insi yapeleela, Yeova Leza winu alamukolonganika nu kumuwezya. 5 Yeova Leza winu alamuwezezya umu mpanga ino ivikolwe vinu vyaposile, nupya mulatandika ukwikalamo; nupya alalenga ivintu vyamuzipila nu kumuvuzya ukucila ivikolwe vinu. 6 Yeova Leza winu alasangulula imyenzo inu ni myenzo ya yana inu, pakuti mukatemwe Yeova Leza winu ni myenzo inu yonsi nu umi winu onsi, nupya mulatwalilila ukuya nu umi. 7 Lyene Yeova Leza winu alaleta ivitiipu vyonsi vii pa yalwani inu aamupata nupya aakamucuzya.

8 “Mulawela nu kukutika ukwi izwi lyakwe Yeova nu kulondela masunde yakwe yonsi yano nkumunena ilelo. 9 Yeova Leza winu alalenga ivintu vyamuzipila sana muli vyonsi vino mulaacita, alamuvuzizya ana, iviteekwa, na vino mulaazombola, Yeova alaalondesya ukumucitila ivintu visuma nupya wakwe vino walondesyanga ukucitila ivikolwe vinu. 10 Pano mulaakutika ukwi izwi lyakwe Yeova Leza winu nu kuvwila masunde yakwe aalembwa umwi buku lii lya Masunde nupya mulawela kuli Yeova Leza winu ni myenzo inu yonsi nu umi winu onsi.

11 “Masunde yano nkumupeela ilelo yasi yatale nupya yasi ukutali namwe. 12 Masunde yayo yasi ukwi yulu cakuti mungalanda muti, ‘A weni amaya ukwi yulu nu kuyatuletela pakuti tuyuvwe nu kuyalondela?’ 13 Nupya yasi uku mbalama yuze yakwe yemba icakuti mungalanda muti, ‘A weni amalamba yemba nu kuyatuletela pakuti tuyuvwe nu kuyalondela?’ 14 Pano mazwi yaa yali umupiipi sana namwe, yali umu tunwa twinu nu mu myenzo inu pakuti mwayalondela.

15 “Ilelo nkwika pali mwemwe umi ni imfwa, alino ni cisuma ni ciipe. 16 Ndi cakuti mukuvwila masunde yakwe Yeova Leza winu yano nkumunena ilelo, ukupitila umu kutemwa Yeova Leza winu, ukucita vino akalonda, nu kulondela masunde yakwe nu upinguzi wakwe mulaya nu umi nupya mulavula, na Yeova Leza winu alamupaala umu mpanga ino mukuya umukwikalamo.

17 “Lelo ndi cakuti mwapumbuka nu kukanauvwa kuli Leza nupya mwabepwa nu kutandika ukupepa ya leza yauze nu kuyaombela, 18 nkumunena ilelo ukuti mulalowa. Mutalikala manda aingi umu mpanga ino mukuya umukwikalamo nga mwalamba Uluzi Lwa Yodani. 19 Nika pali mwemwe umi ni imfwa, ipaalo ni citiipu, ilelo aaya umwi yulu nu mu nsi aakambone pali vino mukucita, nupya mwemo na ana inu mulinzile ukusoolola umi pakuti mutafwa, 20 fwandi mwatemwa Yeova Leza winu, ukumuvwila nu kupalama sana kuli aliwe, pano ali umi winu nupya Yeova alalenga ukuti mwikale amanda aingi umu mpanga ino walavile ukupeela uku vikolwe vinu, kuli kuti Abulahamu, Isaki, na Yakobo.”

31 Lyene Mose waile uku Ina Izlaeli yonsi nu kuyanena mazwi yaa, 2 wayanenyile ati: “Pa nsita yii indi ni myaka 120. Ntanga imutungulule, pano Yeova watanena ati, ‘Utalalamba Uluzi Lwa Yodani.’ 3 Yeova Leza winu aliwe amamutungululanga, alalovya inko zii zino mukuyako nupya mulazizinga. Yoswa aliwe alaamutungulula wakwe vino Yeova watalanda. 4 Yeova alacita kuli aliyo wakwe vino wacisile kuli Sihoni na Ogi aene ya Ina Amoli, na vino wacisile uku mpanga zyao lino wayalovizye. 5 Yeova alamwavwa ukuyacimvya, nupya muce mucite kuli aliyo ukulingana na masunde yonsi yano iimupeela. 6 Sipiini nupya muye akome. Mutayatiina nanti ukuvwa intete, pano Yeova Leza winu alaya namwe. Atalamulekelezya nanti ukumusya.”

7 Lyene Mose wamile Yoswa nu kumunena ala Aina Izlaeli yonsi yakuvwa ati: “Usipe nupya uye umukome, pano wewe ulingizya antu yaa umu mpanga ino Yeova walavile uku vikolwe vyao ukuti alayapeela, nupya ulayapeela impanga iiyo ukuti iye ica upyanyi cao. 8 Yeova amayanga naawe, nupya alatwalilila ukuya naawe. Atalakulekelezya nanti ukukusya. Utuvwa intete nanti ukutiina.”

9 Lyene Mose walemvile masunde yaa nu kupeela akalamba ya mu Izlaeli yonsi na ya simapepo Aina Levi aasendanga imbokosi ya upangano yakwe Yeova. 10 Mose wayanenyile ati: “Lyonsi pa mpela ya myaka 7, pa nsita isoololwe umu mwaka wa kukululwa, pa nsita ya Mutebeto wa Nsakwe, 11 lino Aina Izlaeli yonsi yalolekela pa nkoleelo yakwe Yeova Leza winu mu ncende ino wasoolola, mulinzile ukubelenga masunde yaa ku Ina Izlaeli yonsi pakuti yayuvwe. 12 Muce mwakolonganika antu, kuli kuti aonsi, anaci, ana, na antu afuma uku mpanga zyuze aaya umu misumba inu, pakuti yace yauvwa nu kusambilila pali Yeova Leza winu nu kumutiina alino nu kulondela mazwi yonsi aali umu masunde yaa. 13 Lyene ana yao aatamanya masunde yaa yaluvwa nu kusambilila ivya kutiina Yeova Leza winu manda yonsi yano mulaikala umu mpanga ino mukuyamo nga mwalamba Uluzi Lwa Yodani.”

14 Lyene Yeova wanenyile Mose ati: “Insita iyakuti ufwe yapalama. Ama Yoswa nupya muye api tenti lya kupepelapo, pakuti nsonte Yoswa ukuya intunguluzi.” Fwandi Mose na Yoswa yaile api tenti lya kupepelapo. 15 Lyene Yeova walolekiile api tenti mwi kumbi nupya ikumbi limilile umupiipi nu mulyango wi tenti.

16 Lyene Yeova wanenyile Mose ati: “Wasya ufwe likwene, nupya antu yaa yalata ukuya ni cisinka kuli nene nu kutandika ukupepa ya leza yauze aya umu mpanga iyayazinguluka ino yakuyamo. Yalansya nupya yalata ukulondela upangano uno impangana nayo. 17 Lyene nani ndayasokela sana nupya ndayasya, nu kufisa icinso cane kuli aliyo suka yace yononwe. Lyene pa cisila ca kuponelwa ni ntazi izingi, yalalanda yati, ‘Uzye ale a pa mulandu wakuti Leza witu asi naswe i calenga intazi zii zituponele?’ 18 Lelo ndatwalilila ukufisa icinso cane kuli aliyo pa mulandu ni vicitwa viipe vino yacita pa kupepa ya leza yauze.

19 “Fwandi lyene lemba ulwimbo luu nu kusambilizya Ina Izlaeli. Leka yalusambilile pakuti luye a kambone wane uku Ina Izlaeli. 20 Lino ndayatwala umu mpanga ino nalavile uku vikolwe vyao, kuli kuti impanga umwaya umukaka nu uci, vino yalalya nu kwikuta ni vintu vyayazipila,* yalatandika ukupepa ya leza yauze nu kuyaombela nupya yalansuula nu kutama upangano wane. 21 Lino intazi zingi ziliza pali aliyo, ulwimbo luu lulaya ali kambone kuli aliyo (pano ana yao yatalinzile ukwilila ulwimbo luu), pano iimanya mapange yao na lino ntatala naingizya umu mpanga ino nalafile ukuti ndayapeela.”

22 Fwandi Mose wimvile ulwimbo luu pa wanda kwene uu nu kusambilizya Ina Izlaeli.

23 Lyene Leza wapeezile Yoswa mwana Nuni umulimo nu kumunena ati: “Usipe nupya uye umukome, pano wewe ulingizya Aina Izlaeli umu mpanga ino nalafile ukuyapeela, nupya ndatwalilila ukuya naawe.”

24 Lino Mose wamazile sile ukulemba mazwi yonsi aali umu masunde umwi buku, 25 wanenyile Aina Levi aasendanga imbokosi ya upangano yakwe Yeova ukuti: 26 “Tolini ibuku lii lya Masunde nu kulika pa mbali ya mbokosi ya upangano wakwe Yeova Leza winu nupya lilaya a kambone pali mwemwe. 27 Pano namanya ningo ucipondoka winu na vino mwakoma imyenzo. Ndi cakuti mukapondokela Yeova lino ncili nu umi, ale cilacila napo lino ndafwa! 28 Nkolonganikilini akalamba ya mitundu inu yonsi na angalizi pakuti njanene mazwi yaa, nupya aya umwi yulu na pano nsi yamaya aakambone pali aliyo. 29 Pano imanya ningo ukuti nga nafwa mulatandika ukucita viipe nu kufuma umu nzila ino namunenyile nupya uku nkoleelo intazi ziliza pali mwemwe pano mulaacita iviipe nu kusosya Yeova.”

30 Lyene Mose walanzile mazwi yonsi aali umu lwimbo luu, kufuma pano lwatandikila ukufika na pano lwasilila ala Ina Izlaeli yonsi yakuvwako.

 3 Ndamanyisya antu pi zina lyakwe Yeova.

Manyisyini antu pa lulumbi lwakwe Leza witu!

 5 Aliyo yacisile iviipe.

Asi yana yakwe, aliyo yaalenga.

Iinkulo ya ucenjezi nupya iipe!

15 Lino Yesyuluni* winyile, watandike ukupantoka aya cipondoka.

Watuwina, watufina, nupya watuwikuta.

29 Ndi cakuti i yakwata mano, nga yelenginyepo sana.

Nga yelenginye pali vino vingayacitikila.

Lekini ize yamwazwe.

Lekini ize yamucingilile.

Nkakoma nu kupeela umi.

44 Fwandi Mose wizile nu kulanda mazwi yonsi aaya umu lwimbo luu ala na antu yakuvwako, wali na Hosyia* mwana Nuni. 45 Lino Mose wamazile ukulanda mazwi yonsi yaa uku Ina Izlaeli yonsi, 46 wayanenyile ati: “Mwasunga mazwi yonsi aakucelula yano nkumunena ilelo, pakuti muce mwanena ana inu kukonka mazwi yonsi amu masunde yaa. 47 Pano amazwi yaa asi ya sile sile lelo yalalenga muye nu umi, nupya yalalenga mukikale manda aingi umu mpanga ino mukuya umukwikalamo nga mwalamba Uluzi Lwa Yodani.”

48 Yeova wanenyile Mose pa wanda kwene uu ati: 49 “Yanga uku mwamba wa mu Abalimu, kuli kuti Mwamba wa Nebo uwaya umu mpanga ya Moabu, incende iyalozyanya na Yeliko, pakuti ukalole impanga ya Kenani ino nkupeela Aina Izlaeli ukuti yaikalamo. 50 Lyene ulafwila pa mwamba kwene uno ukuyako, nu kuziikwa wa vikolwe vyako, wakwe vino Aloni umwinako wafwilile pa Mwamba wa Holi nu kuziikwa wa vikolwe vyakwe, 51 pano mwensi mweili mutaali ni cisinka kuli nene lino mwali na Ina Izlaeli pa manzi ya ku Meliba ku Kadesyi umu lwanga lwa Zini, pa mulandu wakuti mutancindike pa Ina Izlaeli. 52 Impanga ino nkupeela Aina Izlaeli umailolela sile patali, lelo utalingilamo.”

33 Yaa ali mapaalo yano Mose umuntu wakwe Leza wa cumi walanzile pa Ina Izlaeli lino atatala wafwa. 2 Walanzile ati:

 7 Nupya wapaazile Yuda ati:

 8 Pali Levi walanzile ati:

12 Pali Benjamini walanzile ati:

13 Pali Jozefu walanzile ati:

18 Pali Zebuluni walanzile ati:

19 Yalama antu kuti yaye uku mwamba.

Kuuku kwene akuno yalapeela malambo ya ulungami.

20 Pali Gadi walanzile ati:

“Mupaalwe awiyo aakakuzya imipaka yakwe Gadi.

Intunguluzi zya yantu zilakolongana pamwi.

22 Pali Dani walanzile ati:

“Dani waya wakwe mwana cisama.

Alazanza ukufuma uku Basyani.”

23 Pali Nafutali walanzile ati:

Alapeelwa incende ya ku uwondaka nu ku kaeya.”

24 Pali Asyeli walanzile ati:

“Leza wapaala Asyeli pa kumupeela ana aingi,

29 We Izlaeli, waya ni nsansa!

34 Lyene Mose wafumile uku lwanga ulwa Moabu nu kuya uku Mwamba uwa Nebo, kufika na pa ncende iya papela iya Pisiga, iyalozyanya na Yeliko. Nupya Yeova wamulanzile impanga yonsi, ukufuma uku Gilyadi ukufika uku Dani, 2 ni mpanga iya mutundu wakwe Nafutali yonsi, mpanga iya mutundu wakwe Efulemu na Manase, ni mpanga yonsi ya mutundu wakwe Yuda kufika na kuli Yemba wa ku uwondaka,* 3 ni mpanga iya Negebu, citungu ca Yodani, ulwanga lwa Yeliko, musumba wa tuncindu kufika nu ku Zoali.

4 Lyene Yeova wamunenyile ati: “Yii ali mpanga ino nalafile kuli Abulahamu, Isaki, na Yakobo ukuti ndaipeela uku yana yao. Naleka ukuti uilole, nomba utalingilamo.”

5 Lyene Mose umuomvi wakwe Yeova wafwilile umu mpanga iya Moabu wakwe vino Yeova walanzile. 6 Wamuzisile umu mukonko umu mpanga iya Moabu, uwalozyanya ni ncende iya Beti-peoli, nupya kusi uwamanya apayela ilindi lyakwe ukufika na ndakai. 7 Mose wali ni myaka 120 lino wafwile. Manso yakwe yalolanga sile ningo nupya wakweti maka. 8 Aina Izlaeli yaloosizye Mose umu lwanga lwa Moabu pa manda 30. Lyene manda ya kulila nu kuloosya Mose yasizile.

9 Yoswa mwana Nuni wali sana nu mupasi wa mano, pano Mose wisile ikasa lyakwe pali aliwe; na Ina Izlaeli yatandike ukumuvwila, nupya yacisile viivi kwene sile vino Yeova wanenyile Mose. 10 Nomba kutatazile ikuya kasesema umu Izlaeli uwali wakwe Mose wino Yeova wamanyile ningo sana.* 11 Wacisile ivimanyililo vyonsi ni vizungusyo vino Yeova wamutumile ukuyacita umu mpanga iya Ijipti kuli Falao nu ku yaomvi yakwe yonsi alino nu ku yantu amu mpanga yakwe yonsi, 12 kumwi ni kasa lya maka ni vintu ivikalamba vino wacisile ala na Ina Izlaeli yonsi yakulolako.