NYIMBO ZYA ULANDA
א [Aleph]*
1 Iyee vino umwanaci watasyala sile wenga, kuli kuti umusumba umwali sana antu!
Wataya wakwe mukamfwilwa nanti cakuti u wakweti antu aingi ukucila inko izyasyala!
Uwali wa mwana umwanaci uwa mwene wataya wa muzya.
ב [Beth]
2 Akuloosya sana usiku, minsozi yakwe yakufika nu mu matama.
Kusi ali wensi pali yano yamutemilwe aakumuteekezya.
Ya cuza yakwe yonsi iyamufutuka; iyaya alwani yakwe.
ג [Gimel]
3 Yuda watasendwa umu uzya nupya akucula nu kuomba imilimo ya uzya ikome.
Alinzile ukwikala pamwi ni nko zyuze; ataazana incende ukwa kupuuzila.
Antu yonsi aakamucuzya iyamwizila lino akucula.
ד [Daleth]
4 Miseo iyaya uku Zioni ikuloosya pano kusi ali wensi aakuya uku mutebeto.
Impongolo zyakwe zyonsi zyononeka; ya simapepo yakwe yakulila.
Ya nacisungu yakwe yali nu ulanda nupya akucululuka sana.
ה [He]
5 Alwani yakwe lyene aakumutungulula; yasisakamikwa icili consi.
Yeova wamuletela intazi pa mulandu ni viipe uwingi vino wacita.
Alwani yasenda ana yakwe umu uzya.
ו [Waw]
6 Ucindami wakwe Zioni onsi wasila.
Ya cilolo yakwe yaaya wa mpelembe izitakweti isote lya kulya,
Nupya yakapita ala iyatonta pa nkoleelo ya yalwani yao.
ז [Zayin]
7 Mu manda yano Yelusalemu akucula, nupya lino antu yakwe yatakweti umwa kwikala
Akaiusya ivintu vyonsi ivicindame vino wakweti mpiti.
Lino antu yakwe yazanzilwe uku yalwani, ataakweti uwa kumwazwa,
Alwani yakwe yamuweni nu kumuseka pa mulandu na vino ononike.
ח [Heth]
8 Yelusalemu wayembuka sana.
Ali mulandu uno wayela icintu ca winyi.
Yonsi aamucindike yamusuula pano yamutambila.
Akaloosya nupya akafisama pa mulandu ni nsonyi.
ט [Teth]
9 Vyakuzwala vyakwe vyakowela.
Asielenganya pa vya ku nkoleelo.
Ukononwa kwakwe kwali ukwa kuzungusya; kutaaya uwa kumuteekezya.
We Yeova lola, vino nkucula pano umulwani wane akuyuvwa.
י [Yod]
10 Alwani yamupoka ivyuma vyakwe vyonsi.
Pano walola kuno inko zikwingila umu ncende yakwe iya muzilo,
Kuli kuti antu yano walanzile ukuti yatalinzile ukuya umu yantu yako.
כ [Kaph]
11 Antu yakwe yonsi yakulila; yakulonda ivyakulya.
Iyakauzya ivintu vyao ivicindame ni vyakulya, pakuti sile yatwalilile ukuya nu umi.
We Yeova lola, inja wa mwanaci* uwa sile sile.
ל [Lamed]
12 Uzye mukulolapo uli mwensi mweyano mukupita umu museo?
Lolekesyini!
Uzye kwatala kwayako intazi iipe wakwe yii ino nkweti,
Kuli kuti ino Yeova waleesile pali nene umu wanda wa ukali wakwe?
מ [Mem]
13 Wataleta umoto ukufuma umwi yulu nu koca mafupa yane yonsi.
Wateya ingazo zyane nu kumpatikizya ukuswilila icisila.
Wandenga ukuya wa mwanaci uwasyala wenga.
Nkaya umulwale uwanda onsi.
נ [Nun]
14 Imembu zyane zyanyepelelwa wi yoko, wazilemanya pamwi ukuomvya ikasa lyakwe.
Wazizwika umu nsingo yane nupya maka yasila.
Yeova wampeela umu minwe ya yantu yano ntanga ncimvye.
ס [Samekh]
15 Yeova wasumba aonsi yane aamaka.
Wakolonganika iumba ilya kukoma asilika yane.
Yeova walyatolela umwana umwanaci nacisungu uwa ku Yuda mu ca kufenelamo waini.
ע [Ayin]
16 Nkuloosya pa mulandu ni vintu vii; aminsozi yakukonkoloka.
Pano wensi aanganteekezya nanti ukunkomelezya ali ukutali sana.
Ana yane iyasyala sile yonga, pano umulwani watacimvya.
פ [Pe]
17 Zioni watakonzolola makasa yakwe; atakweti uwa kumuteekezya.
Yeova watanena alwani yakwe Yakobo yonsi ukuti yamulwisye.
Yelusalemu wataya icintu ca winyi kuli aliyo.
צ [Tsade]
18 Yeova u mulungami muli vino wacita pano naakana ukuvwila masunde yakwe.
Uvwini mwe yantu mwensi, lolini vino nkucula.
Ya nacisungu yane na onsi yane yasendwa umu uzya.
ק [Qoph]
19 Naleenzile uwazwilizyo uku yantu aantemwa lelo yaamfutuka.
Ya simapepo yane na akalamba yane yaloviwa umu musumba,
Lino yalondanga ivyakulya pakuti yatwalilile ukuya nu umi.
ר [Resh]
20 We Yeova lola, indi ni ntazi ikalamba.
Nkuzakaza umukasi.
Umwenzo wane ukuwaya, pano napondoka sana.
Panzi ana yakukomwa uku lupanga, mu ng’anda namo kwene antu yakufwa.
ש [Shin]
21 Antu iyuvwa ukulila kwane; kusi uwa kunteekezya.
Alwani yane yonsi iyuvwa pa ntazi ino nkweti.
Iyasansamuka pano wewe watuleta intazi iiyo.
Lelo uwanda uliza lino ulayacita vino walanzile, umu wanda uwo yalaya wakwe nene.
ת [Taw]
22 Si viipe vyonsi vino yakacita viloleke kuli wewe, nupya si uyafulule sana,
Wakwe vino wamfulula pa mulandu ni viipe vyane vyonsi.
Pano nkuloosya sana nupya umwenzo wane ukuwaya.
א [Aleph]
2 Iyee vino Yeova watavimba umusumba wa Zioni ni kumbi lya ukali wakwe!
Watasumba ukuyemba kwakwe Izlaeli pansi ukufuma umwi yulu.
Atiwisye icilimba cakwe ica kulyatapo ingazo umu wanda wa ukali wakwe.
ב [Beth]
2 Yeova onona incende yonsi yakwe Yakobo ukwaula uluse.
Onona incende izicingililwe izya mwana umwanaci wakwe Yuda umu ukali wakwe.
Wawisya uwene nu kuuzewanya alino nu kuzewanya ya cilolo aayamo.
ג [Gimel]
3 Watamala amaka yonsi yakwe Izlaeli ala watasoka sana.
Watawezya ikasa lyakwe ili lunji lino alwani yapalama,
Nupya ukali wakwe watwalilila ukuya pali Yakobo wa moto uukaoca vyonsi iviuzingulwike.
ד [Daleth]
4 Wakwe vino umulwani akacita; watatinta ulapwa wakwe nupya ikasa lyakwe ili lunji iliipekanya ukutulwisya;
Akukoma ali wensi wino watemwa.
Nupya wataleta ukali wakwe uukupya wa moto pi tenti lya musumba wa Zioni.
ה [He]
5 Yeova wataya wa mulwani;
Wataonona Izlaeli.
Wataonona impungu zyakwe zyonsi;
Ni ncende zyakwe zyonsi izicingililwe.
Nupya wataleka umwana umwanaci wakwe Yuda ukuloosya nu kuya sana nu ulanda.
ו [Waw]
6 Wataonona insakwe yakwe, wakwe vino yakaonona umutanda uuli umu calo.
Watafumyako umutebeto wakwe.
Yeova watalenga ukuti umutebeto ni sabata vililike umu Zioni,
Nupya pa mulandu nu ukali wakwe ukalamba asikuvwila umwene na simapepo uluse.
ז [Zayin]
7 Yeova watakana ulambo;
Watakana incende yakwe iya muzilo.
Watapeela iviumba vya mpungu zyakwe izikome uku yalwani.
Yakupunda umu ng’anda yakwe Yeova kwati apa wanda wa mutebeto.
ח [Heth]
8 Yeova watapanga ukonona iviumba vya musumba wa Zioni.
Watapima iviumba ukuomvya intambo ya kupimilako.
Watalenga ikasa lyakwe ukuleta uwononesi.
Watalenga ivya kucingililako umusumba ni ciumba ukuloosya.
Vyonsi kwene ivyononekela pamwi.
ט [Teth]
9 Impongolo zyakwe izituwila.
Wataonona nu kukontola imifiikilo yakwe.
Umwene wakwe na ya cilolo yakwe iyasendwa umu uzya umu nko.
Kusi masunde, nanti sile aakasesema yakwe yasikulola ivilolwa ivifumile kuli Yeova.
י [Yod]
10 Aakalamba amu musumba wa Zioni yakwikala pansi ale yali mya.
Yakuisansa ulukungu uku mitwe nu kuzwala ivyakuzwala ivya kulangilamo ulanda.
Ya nacisungu ya mu Yelusalemu iinamika imitwe yao pansi.
כ [Kaph]
11 Manso yane iyatonta muno nkuloosya.
Nkuzakaza umukasi.
Itima lyane ilifuma nu kuponela pansi pa mulandu nu kononwa kwa mwana umwanaci uwa mu yantu yane,
Pano ana nu tunya yakufwa icipafi umu ncende umukazanwa antu aingi.
ל [Lamed]
12 Yakuzya ya nyina iyati, “Uzye ingaano na waini vili kwi?”
Lino yakufwa icipafi wa muntu uwatacisikila umu ncende umukazanwa antu aingi umu musumba,
Ale yakufwila umu minwe yakwe ya nyina.
מ [Mem]
13 I cani cino ningaomvya nga kambone?
Nanti a kuli cani kuno ningakukolanya we Yelusalemu?
A kuli cani kuno ningakukolanya pakuti nkuteekezye we mwana umwanaci nacisungu wa mu Zioni?
Pano icilonda cako i cikalamba sana wakwe yemba. A weni angakupozya?
נ [Nun]
14 Vilolwa vino ya kasesema yako yakuloliile vyali ivya ufi nupya ivya sile sile,
Pa mulandu wakuti yataasokolwile iviipe vino wacitanga calenzile usendwe umu uzya,
Nupya yatwalilile ukukunena ivilolwa vya ufi ni vintu ivya kukuponzya.
ס [Samekh]
15 Antu yonsi aakupita umupiipi naawe yakatoota mitumfyo mitumfyo.
Yakazunguka nu kukunta imitwe pa mulandu nu musumba wa Yelusalemu, ala yakuti:
“Uzye uu ali musumba uno yalandangapo iyati, ‘Wazipa sana, nupya ukalenga antu yonsi amu nsi ukuya ni nsansa’?”
פ [Pe]
16 Alwani yako yonsi yakulanda pali wewe.
Yakukutumfya nu kulanda ala iyasoka iyati: “Itumonona.
Uu ali wanda uno twaloleelanga! Iufika nupya ituulola!”
ע [Ayin]
17 Yeova watacita vino wapanzile; watafikilizya vino walanzile,
Vino walanzile mpiti sana.
Watakonona ukwaula ukuvwa uluse.
Wataleka ukuti alwani yako yakucimvye nu kusansamuka; wataleka ukuti alwani yako yakwate amaka ukukucila.
צ [Tsade]
18 We Zioni, antu yako yakulilila kuli Yeova.
Leka aminsozi yakonkoloka wa luzi umusanya nu usiku.
Utata ukulila, utaleka manso yako yapuuze.
ק [Qoph]
19 Katuka! Uwalila usiku lino macaca iyatandika.
Pongolola vyonsi ivili uku mwenzo wa manzi pa nkoleelo yakwe Yeova.
Katusizya makasa yako kuli aliwe pakuti ana yako
Aakufenta umu makoona yonsi amiseo pa mulandu ni cipowe yaye nu umi.
ר [Resh]
20 We Yeova, lolekesya pa yantu yano watufulula icipisye.
Uzye anaci yatwalilile ukulya ana yao yano yaivyalila?
Nanti uzye ya simapepo na ya kasesema yamatwalilila ukukomelwa umu ncende yako iya muzilo we Yeova?
ש [Shin]
21 Vitumbi vya yalumendo na akote vili umu miseo.
Ya nacisungu na aonsi iyakomwa uku lupanga.
Wayakomile umu wanda wa ukali wako; wayakomile ukwaula uluse.
ת [Taw]
22 Waleesile ivya kutiinya ukufuma uku ntunga zyonsi kwati ukuleta antu uku mutebeto.
Mu wanda uno waleesile ukali we Yeova, kusi uutwike nanti ukupusuka;
Alwani yane yalovya antu yano naviile nu kukuzya.
א [Aleph]
3 Nalola vino antu yakucula pa mulandu wakuti Leza wasosile sana nu kutufulula.
2 Wanzinga nu kuleka ukuti impite umu mfinzi, kucila ukupita umu luswepo.
3 Imiku ingi akandwisya ukuomvya ikasa lyakwe uwanda onsi.
ב [Beth]
4 Walenga umwili wane ukutonta ni nkanda yane ukuta ukuloleka ningo;
Wakontola amafupa yane.
5 Wakuula iciumba ukunzinguluka; wanzinguluka na poizoni umwipisye ni ntazi.
6 Wampatikizya ukwikala umu ncende umwaya imfinzi, wa yantu aafwile mpiti.
ג [Gimel]
7 Wakuula iciumba ukunzinguluka pakuti ntapuuka;
Wanyepa na maceni yakwe koopa aafine.
8 Nupya nga nalilila kuli aliwe lino nkulonda uwazwilizyo, asiuvwa ipepo lyane.
9 Wacilika inzila zyane ukuomvya mawe alinganye;
Wanyonganya imiseo yane.
ד [Daleth]
10 Akanteyamila wakwe beele pakuti anzanze, nupya wakwe cisama uwatafisama.
11 Wampatikizya ukufuma umu nzila nupya wansandola;
Walenga ukuti nsyale uwa sile sile.
12 Watinta ulapwa wakwe, nu kuulungamika kuli nene pakuti andase.
ה [He]
13 Wandasa umu mfyo ukuomvya inceto zya mu kacola kakwe.
14 Antu yonsi yakanseka, yakanjimba umu nyimbo zyao uwanda onsi.
15 Wandisya ivilule nu kumwesya ivilule ivingi.
ו [Waw]
16 Akandisya umucanga suka mino iyapanduka;
Akansunkila umwi twi.
17 Walenga ukuti ntaya nu mutende; nilila ivintu visuma.
18 Fwandi nkulanda nkuti: “Ucindami wane wasila, nata ukupaalila muli Yeova.”
ז [Zayin]
19 Iusya ucuzi wane na vino ntakwata umwa kwikala, iusya ni vilule na poizoni umukalipe.
20 Icumi kwene ulanjiusya nu kwizangazwa.
21 Nkaiusya ivintu vii; ali mulandu kwene uno ndatwalilila ukuloleela.
ח [Heth]
22 Kutemwa kwa cumi kwakwe Yeova u kwalenga ukuti tutalowa,
Pano uluse lwakwe lusisila.
23 Ukaya nu luse cila wanda; waya sana ni cisinka.
24 Nalanda ukuti, “Yeova ali ca upyanyi cane, ali mulandu uno ndatwalilila ukumuloleela.”
ט [Teth]
25 Yeova u musuma uku yantu aakapaalila muli aliwe, uku muntu aakatwalilila ukumulonda.
26 Caziipa ukuteeka umwenzo lino umwi akuloleela ukupususya kwakwe Yeova.
27 Caziipa umuntu ukucula lino acili umwance.
י [Yod]
28 Lekini aikale wenga mya lino Leza wamuletela ucuzi.
29 Lekini aike akanwa kakwe umu lukungu; limwi angazanamo upaalilo uwakuti alapusuka.
30 Lekini apeele itama lyakwe kuli wino akumuma; lekini atukwe.
כ [Kaph]
31 Pano Yeova atalatutazyela manda pe.
32 Nanti cakuti walenga tuye nu ulanda, alatuvwila uluse pa mulandu wakuti waya sana nu kutemwa kwa cumi.
33 Pano asilonda ukucuzya nanti ukulenga antu ukuya nu ulanda.
ל [Lamed]
34 Asilonda ukuti afungwa ali yonsi yaacuziwa,
35 Nupya Uwa Papelapela asilonda ukuti umuntu afyengwe,
36 Nupya Yeova asilonda umuntu ukufyengwa
Lino akupingulwa.
מ [Mem]
37 Kusi aangalanda cimwi nu kuleka ukuti cicitike suka sile nga Yeova akulonda ciye vivyo.
38 Uwa Papelapela
Asilanda iviipe ni visuma pa muku onga.
39 U mulandu ci uno umuntu wa umi aangailizyanyizizya pa vikafuma umu luyembu lwakwe?
נ [Nun]
40 Lekini twelenganye pa miyele itu na pali vino tukacita, nupya lekini tuswilile kuli Yeova.
41 Lekini tupaapate kuli Leza wa kwi yulu ni myenzo itu yonsi nupya lekini tukatusye makasa itu nu kulanda ukuti:
42 “Twayembuka nu kupondoka, nupya utaatweleela.
ס [Samekh]
43 Wasosile nu kuleka ukuti tutaapalama kuli wewe;
Watukonsile nu kutukoma ukwaula uluse.
44 Wika ikumbi pakasi pakuti mapepo itu yataafika kuli wewe.
45 Watulenga ukuya icitumba nupya ivikoona umu yantu.”
פ [Pe]
46 Alwani itu yonsi yakalanda iviipe pali sweswe.
47 Intete ni viteyo vili pali sweswe, uluko lwitu lononwa nu kusyala umwaula cimwi.
48 Minsozi yakukonkoloka wa luzi pa mulandu na vino antu yane yononeka.
ע [Ayin]
49 Nkaloosya ukwaula ukuleka, ukwaula ukuta,
50 Mpaka Yeova ace alolekesye pano nsi ukufuma umwi yulu.
51 Nkuvwa ulanda nga nalola vyonsi ivyativicitikila antu ya mu musumba wane.
צ [Tsade]
52 Alwani yane yakundunga wa cunyi ukwaula umulandu.
53 Iyansumbila umu ciwina pakuti yankome; iyatwalilila ukusumbila mawe pali nene.
54 Manzi yaapisile pa mutwe wane, nupya natiile: “Lyene casila nafwa!”
ק [Qoph]
55 Nalilile kuli wewe, we Yeova, ala indi umu ciwina icizike.
56 Uvwa vino nkulanda; utasuulako sile kuli vino nkulenga uwazwilizyo pakuti ungavwe.
57 Wapaliime umupiipi umu wanda uno naliliile kuli wewe. Wanenyile uti: “Utuvwa intete.”
ר [Resh]
58 We Yeova, wancingilile umu cilye, wapuswisye umi wane.
59 We Yeova, walola iviipe vino antu yakancitila; napaapata ya nu mulinganya kuli nene.
60 Walola vyonsi vino yakalandula, na vyonsi vino yakapaanga pali nene.
ש [Sin] nanti [Shin]
61 We Yeova, uuvwa imitumfyo yao na vyonsi vino yakapaanga pali nene,
62 Uuvwa na vino aakankanya yakalanda na mapange yao amu umfisolo yano yakapaanga pali nene uwanda onsi.
63 Si lola; ndi cakuti iikala nanti iimilila yakantumfya umu nyimbo zyao!
ת [Taw]
64 We Yeova, ulayafulula ukulingana ni vicitwa vyao.
65 Ulayalenga ukukomya imyenzo, nupya cico kwene ali citiipu cao.
66 We Yeova, ulayakonka ala watusoka nu kuyalovya umu nsi.
א [Aleph]
4 Iyee vino goldi aakayengesa watata ukuyengesa, kuli kuti goldi umusuma!
Vino amawe ya muzilo iyasalangana umu makoona yonsi amu miseo.
ב [Beth]
2 Ana aonsi amu Zioni aali acindame wakwe goldi umwengululwe ningo,
Iyaya wa nsembo izi ivu
Zino nakamata wapanga!
ג [Gimel]
3 Ya nkusa yakasakamala utwana twao,
Lelo antu yane iyaya nu unkalwe wa mbuni umu lwanga.
ד [Daleth]
4 Ululimi lwa mwana aakonka lwakambatila umu kanwa pa mulandu nu lusala.
Ana yakalenga ivyakulya, lelo kutaaya uwa kuyapeela icili consi.
ה [He]
5 Aalyanga ivyakulya ivisuma sana yakulaala sile umu miseo ni nzala.
Aazwalanga ivyakuzwala vya mutengo* yakulaala sile api itwi.
ו [Waw]
6 Antu yane iyafululwa sana ukucila vino Sodoma wafulwilwe pa luyembu lwakwe,
Ononyilwe umu nsita sile inono ukwaula uwa kumwavwa.
ז [Zayin]
7 Anazili ya mu Zioni yaali asanguluke, nupya yaali atiswe ukucila umukaka.
Yalolekanga ayenzulukile ukucila iwe lino yakati kolo; nupya yalolekanga wi iwe lyakwe safilo.
ח [Heth]
8 Nomba lyene yakuloleka atifi ukucila malasya;
Yasikumanyikwa umu miseo.
Inkanda zyao zyakambatila uku mafupa; zyuma kwati icimuti.
ט [Teth]
9 Antu aafwila uku lupanga yazipa ukucila aafwila uku cipowe,
Kuli kuti aasizile maka, aafwile pa mulandu nu kuulizya ivyakulya.
י [Yod]
10 Anaci aaya nu luse iyeleka ana yao.
Iyaya ivyakulya vya yantu yane umu nsita ino yali ni ntazi.
כ [Kaph]
11 Yeova wataleta icipyu cakwe;
Wataleta ukali wakwe uukupya wa moto.
Watasonteka umoto pakuti aoce imifula ya mu Zioni.
ל [Lamed]
12 Ya mwene ya mu nsi na antu yonsi aakaikalamo
Yataazumile ukuti alwani yangingila pa mpongolo zya musumba wa Yelusalemu.
מ [Mem]
13 Cico cacitike pa mulandu ni membu zino ya kasesema na ya simapepo yakwe yacisile,
Aazwisyanga uwazi wa yantu alungame.
נ [Nun]
14 Yakalulumba umu miseo wa mpafu.
Yakowela nu wazi,
Icakuti kusi ali wensi aangalema ivyakuzwala vyao.
ס [Samekh]
15 Yakayapundilila iyati: “Pitangini! Mwe yakowele mwe! Pitangini! Pitangini! Mutatulemamo!”
Yatakwata umwa kwikala nupya yakalulumba sile.
Antu ya mu nko yakulanda iyati: “Yatanga iikale pamwi naswe.
פ [Pe]
16 Yeova wayasalanganya;
Atalatala ayalolekesyepo nu kuyuvwila uluse.
Antu yatalacindika ya simapepo nanti ukulangulukilako akalamba.”
ע [Ayin]
17 Kufika na ndakai manso itu yacili iyatonta muno tukulonda uwazwilizyo.
Twalonzile uwazwilizyo uku luko ulutanga lutwazwe.
צ [Tsade]
18 Yatulunganga monsi muno tukupita icakuti twafilwanga nu kupita umu ncende zitu umukazanwa antu aingi.
Impela itu yatipalama; manda itu iyasila, pano impela itu yatiiza.
ק [Qoph]
19 Aatuzinganyanga yasimulisyanga ukucila ya lyang’anda aakupapuka.
Yatukonsile umu myamba nupya yatufisamiile umu lwanga.
ר [Resh]
20 Muza uno tukafuuta, kuli kuti wino Yeova wasoolola, walemilwe umu ciwina cao icikalamba,
Ali wino twalandangapo tukuti: “Pa mulandu na vino alatucingilila tulatwalilila ukwikala umu nko.”
ש [Sin]
21 Zangini nu kusansamuka mwe yantu ya mu Edomu, mwemuno mukwikala wakwe vino mukaikala umu mpanga ya Uzi.
Lelo namwe kwene alamuletela kapu, nupya mulakoleka nu kusyala tupu.
ת [Taw]
22 Mwe yantu ya mu Zioni mutalafululwa nupya pali vino mwaluvyanyizye.
Atalamusenda nupya umu uzya.
Lelo mwe yantu ya mu Edomu alamufulula.
Alasokolola imembu zinu.
5 We Yeova, iusya ivyatucitikila.
Lolekesya nu kulola vino ituzewana.
2 Ica upyanyi citu capeelwa uku yantu yauze, na mang’anda itu uku yantu ya ku mpanga zyuze.
3 Twaya wa yana ya nsiwa aatakwata ya isi; ya mayo itu yaya wakwe ya mukamfwilwa.
4 Pakuti tumwe sile manzi itu kwene tulinzile ukulipila, ni inkwi zitu kwene tukakala.
5 Aakutuzinganya yali sana umupiipi naswe;
Itutonta, lelo yasikuleka ukuti tupuuze.
6 Twasintilile pali Ijipti na Asilya pakuti tukwate ivyakulya.
7 Ivikolwe vitu ivyayembwike vyafwa, lelo sweswe tukucula pa mulandu na vino vyaluvyanyizye.
8 Aomvi lyene aliyo yakututeeka; kusi uwa kutupususya kuli aliyo.
9 Tukaika maumi itu umu uzanzo pakuti sile tukwate ivyakulya pa mulandu nu lupanga lwa mu lwanga.
10 Nkanda zitu izikaya wi lungu pa mulandu nu kuya sana ni nzala.
11 Iyazewanya ya mama ya mu Zioni na ya nacisungu ya mu misumba ya mu Yuda.
12 Ya cilolo yayanyepelelanga ukwi kasa iyasyala yakunyinyinda, na aikolo yatayacindikanga.
13 Aonsi yakasenda iwe lya kusiilako,* alumendo nayo yakapumika ala iyasenda imyanzi ya nkwi.
14 Kutaacili akalamba aakwikala pa mpongolo ya musumba; kumwi na alumendo aakulizya inyimbo.
15 Twata ukusansamuka; mu cifulo ca kucina, tukaloosya.
16 Cisote ca ucindami capona uku mitwe itu. Kalanda kuli sweswe, pano twayembuka!
17 Ukwene ali mulandu uno imyenzo itu yatilwalila,
Nupya pa mulandu ni vintu kwene vii amanso itu iyata ukulola,
18 Pa mulandu wakuti Umwamba wa Zioni ononeka nu kusyala umwaula antu; ya nkusa lyene aakapitanamo.
19 Lelo wemo we Yeova, wikala pa cilimba ca wene manda pe.
Cilimba cako ica wene cayako uku nkulo ni nkulo.
20 U mulandu ci uno watwililila manda pe, nupya u mulandu ci uno watulekelezezya pa nsita itali vii?
21 Tuwezye kuli wewe we Yeova, naswe tumaitemelwa ukuwela.
Leka manda itu yaye wakwe vino yaali mpiti.
22 Lelo watukaana.
Watwalilila ukutusokela sana.
Mu vipande 1 kufika ku 4 mwaya inyimbo zya ulanda izyatantama ukulingana na aufabeti wa Ciebele.
Umwanaci akulozya kuli Yelusalemu.
Mu Ciebele: “Iviyenzu.”
Nanti “umwanansyo.”