YOWELI
1 Yeova wanenyile Yoweli mwana Petueli ukulanda mazwi yaa:
2 “Uvwini mwe yakalamba,
Nupya kutikishini mwe ikala mpanga mwensi.
Uzye ica musango uu catala cacitikapo mu manda inu
Nanti umu manda ya vikolwe vinu?
3 Simikiliniko ana inu,
Ana inu nayo yalasimikila ana yao,
Ana yao nayo yalasimikila inkulo iilalondelelapo.
4 Vino makanta aakaonona wasile, makanta aakapita umu maumba watalya;
Nupya vino makanta aakapita umu maumba wasile, makanta aatakwata maapa watalya;
Na vino makanta aatakweti maapa wasile, makanta umukalipishe watalya.
5 Zyukini mwe ya cakolwa nu kuloosha!
Looshini mwensi mwemuno mukamwa waini,
Pano waini umulyompe watapokwa umu tunwa twinu.
6 Pano uluko ilwiza umu mpanga yane, u lwa maka na antu ayamo yatanga yapendwe.
Mino ya luko lulo yaaya wa mino yakwe cisama, ni nzekete wakwe zyakwe cisama.
7 Uluko ulonona umwangazi wane nu kuleka umuti wane uwa masamvu ukushala sile icisinte,
Iluvifopola nu kuvisumba,
Nupya imisambo yatishala ukwaula icipaapa.
8 Looshini wakwe vino nacisungu uwatazwala ivyakuzwala vya kulangilamo ulanda
Akaloosha siwinga uwa ku ukazyana wakwe.
9 Mu ng’anda yakwe Yeova musi upe wa vyakulya nu upe wa vyakumwa;
Ya simapepo, aomvi yakwe Yeova yakuloosha.
10 Icalo icononwa, umusili ukuloosha;
Pano ivyakulya ivyononwa, waini umupya na mafuta ivisila.
11 Alimi yali sana nu ulanda, aakaomba umu vyalo vya myangazi yakuloosha,
Pa mulandu ni ngaano na Baale;
Pano ivyakulya vya mu vyalo ivyononeka.
12 Umwangazi iuma,
Umusamvu iunyala.
Mipomegilaneti, tuncindu ni miapo,
Miti yonsi ya mu calo yatiyuma;
Pano antu aali ni nsansa iyaya ni nsonyi.
13 Mwe ya simapepo zwalini vyakuzwala vya kulangilamo ulanda nu kuloosha;
Mweyano mukaombela pa ulambo looshini.
Mweyano mukaombela Leza wane ingilini umwi tempele nupya muzwale ivyakuzwala vya kulangilamo ulanda usiku onsi;
Pano upe wa vyakulya nu upe wa vyakumwa iufumiziwa umu ng’anda yakwe Leza winu.
14 Nenini antu ukufunga; amini antu yonsi ukuti yakolongane.
Kolonganikini akalamba na antu yonsi aakaikala umu mpanga,
Kuti ize uku ng’anda yakwe Yeova Leza winu nu kulilila kuli Yeova kuti ayaazwe.
15 Kalanda pa mulandu nu wanda uwo!
Pano uwanda wakwe Yeova iupalama,
Nupya uliza wa ononesi ukufuma uku wa Maka Yonsi!
16 Uzye yatatupoka ivyakulya ala tukulola nako,
Nu kufumya ukusansamuka nu luzango umu ng’anda yakwe Leza witu?
17 Imbezu* izyuma umwisika lyakwe ya fosholo.
Muno yakasungila ivyakulya imushala ukwaula icili consi.
Inkoma izyononwa, pano ingaano izyuma.
18 Iviteekwa navyo kwene vikuloosha!
Ing’ombe zikululumba ala izivulunganyiziwa, pano kusi umulemvwe!
Ni mfwele zikufululwa.
19 Ndalilila kuli wewe we Yeova;
Pano umoto wationona umulemvwe wa mu lwanga,
Nupya icimbilimbili iicoca imiti yonsi iya mu calo.
20 Inyama zya mu mpanga nazyo kwene zikalonda uwavwilizyo kuli wewe,
Pano utunguzi twakama
Nu moto oca umulemvwe wa mu lwanga.”
2 “Lizyini ipenga umu Zioni!
Pundini ukupunda kwa mu ulwi umu mwamba wane uwa muzilo.
Lekini antu yonsi amu nsi yazakaze,
Pano uwanda wakwe Yeova ukwiza! Uli umupiipi!
2 U wanda wa mfinzi na kaanda,
U wanda wa makumbi na makumbi aafitishe,
Wa luswepo lwa ku macaca ulwatiluswefya umu myamba.
Kuli antu aingi sana nupya aamaka;
Kutatala kwayapo uwanda wakwe uu,
Nupya utalatala uyeko
Uku nkulo zyonsi.
3 Ku nkoleelo yao kuli umoto ukoca,
Nu ku cisila cao kuli icimbilimbili ca moto icikoca.
Impanga iili pa nkoleelo yao yaaya wa calo ca Edeni,
Lelo uku cisila cao u lwanga umutaya icili consi,
Nupya kusi icikapusuka.
4 Yakaloleka wa mfwalasi,
Nupya yakasimula wa mfwalasi zya mu nkondo.
5 Lino yakutolooka pa myamba papela, iciunda cao cikauvwika wa ciunda ca maceleta,
Wa kupantoka kwa moto uukaoca isote.
Caya wa yantu aamaka atiyaipekanya ukuya umu ulwi.
6 Antu yalaya nu ulanda pa mulandu na aliyo.
Antu yonsi yalasakamikwa.
7 Yakazanza wa yasilika,
Yakatoloka iciumba wa yasilika,
Cila muntu akaya sile inkoleelo,
Nupya yasifuma umu nzila zyao.
8 Yasisunka auze;
Cila muntu akatwalilila sile ukuya umu nzila yakwe.
Ndi cakuti ivyanzo vyalenga yamwi ukupona,
Auze yakatwalilila sile ukupita.
9 Yakapitisha ukwingila umu musumba, yakasimula pa viumba.
Yakakwela iviumba vya mang’anda, yakaingilila pa mawindo wa mupuupu.
10 Insi ikatenkana ni yulu likasunkaana pa nkoleelo yao.
Lanzi nu mwezi vikafita,
Ni ntanda zikazima.
11 Yeova alapundisha pa nkoleelo ya yasilika yakwe pano aingi sana.
Pano Leza akufikilizya vino walanda nupya u wa maka;
Uwanda wakwe Yeova uukalamba nupya u wa koofya.
A weni angazizimizya?”
12 Yeova walanda wati: “Nanti sile aeli kwene welini kuli nene ni myenzo inu yonsi,
Ale imufunga, mukuloosha nu kulila.
13 Lepulini imyenzo inu, mutalepula ivyakuzwala vinu,
Nupya muswilile kuli Yeova Leza winu,
Pano waya ni cikuuku nu luse, asisoka zuwa, nupya waya sana nu kutemwa kwa cumi,
Nupya alalanguluka pa ntazi ino wakasi ukuleta.
14 Limwi alasenuka nu kulanguluka
Nupya alamupaala,
Pakuti mungapeela upe wa vyakulya nu upe wa vyakumwa kuli Yeova Leza winu.
15 Lizyini ipenga umu Zioni!
Nenini antu ukufunga; amini antu kuti yakolongane.
16 Kolonganikini antu; yasangululini.
Kolonganikini aikolo na ana nu tunya.
Lekini siwinga na nawinga yafume umu miputule yao.
17 Si ya simapepo aakaombela Yeova
Iimilile pakasi ka muputule uwaya pa kwingilila umwi tempele nu ulambo, yalooshe nu kulanda yati:
‘We Yeova uvwila antu yako uluse;
Utaleka antu yako yaye ica kuseka,
Nu kuleka inko zyayateeka.
U mulandu ci uno antu yangaalandila ukuti, “Uzye Leza wao ali kwi?”’
18 Lyene Yeova alaalondesha ukucingilila impanga yakwe
Nupya alaya ni cikuuku uku yantu yakwe.
19 Yeova alasuka antu yakwe ati:
‘Namamupeela ivyakulya, waini umupya na mafuta,
Nupya mulikuta;
Ntalalenga muzewane nupya umu yantu ya mu nko.
20 Muntu wa ku katutu ndamuzingila ukutali namwe;
Ndamuzingila uku mpanga iyume nupya umusiikala ali wensi,
Asilika yakwe aaku nkoleelo ndayazingila kuli yemba wa ku ufumondaka,*
Na asilika yakwe aaku cisila kuli yemba wa ku uwondaka.*
Cinunu icilafuma pali aliwe cilakatuka
Nupya cilatwalilila ukuya umupela;
Pano Leza alacita ivintu vya maka.’
21 Mutuvwa intete mwe yantu ya mu nsi.
Zangini nu kusansamuka, pano Yeova alacita ivintu ivikalamba.
22 Mutuvwa intete mwe nyama zya mu mpanga,
Pano umulemvwe wa mu lwanga ulaleemba,
Nupya imiti ilaseeka ivizao;
Musamvu nu mwangazi vilaseeka sana.
23 Mwe yana ya mu Zioni, zangini nu kusansamukila muli Yeova Leza winu;
Pano alamuletela imvula ya kutandikilako ilinge,
Nupya alamuletela imvula iingi,
Alamuletela imvula ya kutandikilako ni mvula ya kushalikizyako, wakwe vino cayanga lyonsi.
24 Pa kupuulila palazuula ingaano,
Nupya umwa kufenela imyangazi mulazuula waini umupya nu mwakufenela maolivi mulazuula mafuta.
25 Nupya ndamuwezezya
Vino makanta aakapita umu maumba, makanta aatakwata amaapa, makanta umukalipishe, na makanta aakaonona ivintu waliile pa myaka yonsi,
Kuli kuti iumba ilikalamba ilya yasilika yane yano namutumiile.
26 Mulalya nu kwikuta,
Nupya mulalumbanya izina lyakwe Yeova Leza winu
Uwamucitila ivizungusho;
Antu yane yatalatala yazewanepo nupya.
27 Nupya mulamanya ukuti naya umu Ina Izlaeli
Nu kuti nene Yeova Leza winu, kutaaya muze!
Antu yane yatalatala yazewanepo nupya.
28 Pa cisila, ndapongolwela umupasi wane pa yantu amisango yonsi,
Nupya ana inu aonsi na ana inu akazyana yalasesema,
Aikolo yalalota iviloto,
Na alumendo yalalola ivilolwa.
29 Nupya umu manda yaaya
Ndapongolwela umupasi wane pa yaomvi yane aonsi na anaci.
30 Ndacita ivizungusho umwi yulu nu mu nsi,
Kulaya uwazi, umoto ni cunsi icikalamba icilaaya umupela.
31 Ilanzi lilasanguka imfinzi nu mwezi ulasanguka uwazi
Lino uwanda ukalamba wakwe Yeova nupya uwa koofya utatala wiza.
32 Nupya wensi aakaama api zina lyakwe Yeova alapusuka;
Pa mwamba wa Zioni nu mu Yelusalemu mulaya antu aalapusuka wakwe vino Yeova watalanda,
Nupya yalaya pa yantu aalapusuka yano Yeova akwama.”
3 “Pano lolini! Mu manda yaaya nupya pa nsita iiya,
Lino ndawezya antu ya mu Yuda na amu Yelusalemu aasendwa umu uzya,
2 Ndakolonganika ni nko zyonsi
Nu kuzitwala umu Mukonko Wakwe Yeoshafati.*
Mumu kwene amuno ndazipingwila
Nu kulandilako Aina Izlaeli antu yane nupya ica upyanyi cane,
Pano zyayasalanganyizizye umu nko,
Nu kwankana impanga yane.
3 Yakapendola pakuti yankane antu yane;
Yakakazya umulumendo pakuti yalipile iule
Nu kukazya umukazyana pakuti yakale waini.
4 Nupya i vyani vino namucita,
Mwe yantu ya mu Tuli, mwe ya mu Sidoni na mwe ya mu ncende zyonsi izya mu Filisti?
Uzye mukulandula cimwi kuli nene?
Ndi cakuti mukulandula,
Ndawezya icilanduzi cinu zuwa zuwa pali mwemwe.
5 Pano mwasenda siuva wane na goldi,
Nupya mwatola ivyuma vyane ivisuma sana nu kuvika umu matempele inu;
6 Nupya mwakazya antu ya mu Yuda nu mu Yelusalemu ku ya Giliki,
Pakuti muyatalushe uku ncende yao;
7 Ndaleka yawele ukufuma uku ncende ino mwayakazyako,
Nupya ndaleta icilanduzi pali mwemwe.
8 Ndakazya ana inu alumendo na akazyana ku yantu ya mu Yuda,
Nayo yalayakazya uku yantu ya mu Sheba uluko lwa kutali;
Pano Yeova umwineco u watalanda.
9 Manyishini amu nko muti:
‘Ipekanyini uku ulwi! Cincizyini aonsi ya maka!
Lekini asilika yonsi yapalame, lekini ize!
10 Sulini ya pulao inu ukuya ya panga, ni vya kutungwilako imiti ukuya amasumo
Umuntu umutonte alande ati: “Nene wa maka.”
11 Mwe ya mu nko zyonsi izya mupiipi izini mwazwe auzo, kolonganini!’”
We Yeova twala asilika yako aamaka pa ncende iiya.
12 “Si nko zikatuke nu kuya uku Mukonko Wakwe Yeoshafati;
Pano kuuku kwene akuno ndikala nu kupingula inko zyonsi izyazinguluka.
13 Pishinimo icikwakwa pano ivyakulya ivica.
Izini mulyatole pano imyangazi yatizuula umu ca kufenelamo.
Muno waini akakonkolokela imuzuula pa mulandu nu kuvula kwa viipe vyao.
14 Antu aingi yali umu mukonko wa kupingwilamo,
Pano uwanda wakwe Yeova iupalama umu mukonko uwo.
15 Ilanzi nu mwezi vilafiita,
Ni ntanda zilazima.
16 Yeova alang’anzila umu Zioni,
Alapunda umu Yelusalemu.
Nupya iyulu ni insi vilasunkaana;
Lelo Yeova alapususha antu yakwe,
Alacingilila antu ya mu Izlaeli.
17 Nupya mulamanya ukuti nene Yeova Leza winu aakaikala umu Zioni umu mwamba wane uwa muzilo.
Yelusalemu alaya i ncende ya muzilo,
Kusi umuntu uwa ku mpanga yuze alatala apitemo nupya.
18 Mu wanda uuwa imyamba ilaomba na waini umulyompe,
Mu tumyamba mulaakonkoloka umukaka,
Tunguzi twa mu Yuda tonsi tulazuulamo manzi.
Mu ng’anda yakwe Yeova mulaya akafukoka,
Nupya kalakontelela Umukonko wa Miti ya Akasha
19 Lelo Ijipti alashala umwaula icili consi,
Na Edomu alashala ulwanga ulwaulamo icili consi,
Pa mulandu nu unkalwe uwacitike uku yantu ya mu Yuda,
Muno yazwisizye uwazi wa yantu ya kaele.
20 Nomba Yuda alatwalilila ukwikalwamo,
Na Yelusalemu alaikalwamo mu nkulo zyonsi.
21 Uwazi wao uno ntalolanga ukuti u wa kaele ndatandika ukuulola ukuti u wa kaele;
Nupya ne Yeova ndaikala umu Zioni.”
Nanti limwi, “masamvu aume.”
Kuli kuti Yemba Mufwe.
Kuli kuti Yemba wa Meditileniani.
Likapiliula ukuti “Yeova Aali Kapingula.”