AMOSI
1 Mazwi yako Amosi uwali pa yantu ateekanga imfwele aku Tekoa, yano wapokelile umu cilolwa ukulozya uku Ina Izlaeli mu manda ya Mwene Uziya uwa ku Yuda nu mu manda yakwe Yeloboamu mwana Yoashi umwene uwa ku Izlaeli, ale kwashala imyaka iili kuti kuye icilundumusi. 2 Walanzile ati:
“Yeova alang’anzila umu Zioni,
Nupya alapunda ukufuma mu Yelusalemu.
Mulemvwe wakwe ya kacema ulaloosha,
Ni sote ilyaya papela ya mwamba wa Kalimeli liluma.”
3 “Yeova walanda wati,
‘“Pa mulandu wakuti Damasika wapondwike imiku itatu ni miku 4, ntalalekapo sile ukwaula ukumufulula,
Pano wapuuzile Gilyadi ukuomvya ica kupuulilako ica cela.
4 Ndaleta umoto pa ya mu ng’anda yakwe Hazaeli,
Nao uloca impungu izikome zyakwe Beni-hadadi.
5 Ndakontola imifikilo ya pa mpongolo zya mu Damasika;
Ndonona antu ya mu Bikati-aveni
Na kateeka wa mu Beti-edeni;
Nupya antu ya mu Silya yalasendwa uku Kili,” avino Yeova walanda.’
6 Yeova walanda wati,
‘“Pa mulandu wakuti Gaza wapondwike imiku itatu ni miku 4, ntalalekapo sile ukwaula ukumufulula,
Pano wasenzile azya yonsi nu kuyapeela uku yantu ya mu Edomu.
7 Ndaleta umoto pi linga lya ku Gaza,
Nupya uloca impungu zyakwe izikome.
8 Ndonona antu ya ku Ashidodi
Na kateeka wa ku Ashikeloni;
Ndafulula Ekiloni,
Na Ina Filisti alashalako yalalowa,” avino Yeova Umwene wa Papelapela walanda.’
9 Yeova walanda wati,
‘Pa mulandu wakuti Tuli wapondwike imiku itatu ni miku 4, ntalalekapo sile ukwaula ukumufulula,
Pano wasenzile azya yonsi nu kuyapeela uku yantu ya ku Edomu
Nupya atiwishe upangano wa wina uno yapangine.
10 Ndaleta umoto api linga lya ku Tuli,
Nupya uloca impungu zyakwe izikome.’
11 Yeova walanda wati,
‘Pa mulandu wakuti Edomu wapondwike imiku itatu ni miku 4, ntalalekapo sile ukwaula ukumufulula,
Pano wazinginye umwinakwe nu lupanga,
Nupya atali nu luse;
Watwalilile ukuyasandola ale ali ni cipyu,
Nupya watwalilile ukuyasokela sana.
12 Ndaleta umoto umu Temani,
Nupya uloca impungu izikome zyakwe Bozila.’
13 Yeova walanda wati,
‘“Pa mulandu wakuti Aina Amoni yapondwike imiku itatu ni miku 4, ntalalekapo sile ukwaula ukuyafulula,
Pano yalepwile inda zya yanaci aali pa ukulu amu Gilyadi pakuti yakuzye impanga yao.
14 Ndoca ilinga lya ku Laba,
Ni mpungu zyakwe izikome,
Lino asilika yalazanza umusumba kulaya ukupunda kwa mu nkondo,
Nupya ulaya uwanda wa cimuza iciipishe.
15 Nu mwene wao alasendwa umu uzya pamwi na ya cilolo yakwe,” avino Yeova walanda.’
2 “Yeova walanda wati,
‘“Pa mulandu wakuti Moabu wapondwike imiku itatu ni miku 4, ntalalekapo sile ukwaula ukumufulula,
Pano osile umwene wa ku Edomu mpaka ashala itwi litupu.
2 Ndatuma umoto umu Moabu,
Nao uloca impungu izikome umu Kelioti;
Moabu alafwa ale kuli icimvulunganya,
Ukupunda kwa mu ulwi nu kulila kwi penga.
3 Ndafumya kateeka muli aliwe
Nu kukoma ya cilolo yakwe yonsi pamwi nawe,” avino Yeova walanda.’
4 Yeova walanda wati,
‘Pa mulandu wakuti Yuda wapondwike imiku itatu ni miku 4, ntalalekapo sile ukwaula ukumufulula,
Pano wasuuzile masunde yakwe Yeova,
Nupya atayalondelanga;
Lelo ufi uno ivikolwe vyakwe vyalondiile wamuponzizye.
5 Ndatuma umoto umu Yuda,
Nao uloca impungu izikome izya mu Yelusalemu.’
6 Yeova walanda wati,
‘Pa mulandu wakuti Izlaeli wapondwike imiku itatu ni miku 4, ntalalekapo sile ukwaula ukumufulula,
Pano wakakazya umulungami pakuti akwate siuva,
Nu kukazya umupiina pakuti akwate indyatu.
7 Yakalyatoola imitwe ya yantu aasuulwe umu lukungu,
Nupya yakacilika inzila iya muntu mufuuke.
Umwana na isi yakacita uzelele uku mwanaci aali umwi,
Nu kusaalula izina lyane ilya muzilo.
8 Yakalaala umupiipi na cila ulambo pa vyakuzwala vino yapoka ku wa nkongole;
Yakakala waini ukuomvya impiya zino yalipilisha uwa milandu nu kumwela pa ng’anda yakwe ya leza yao.’
9 ‘Lelo nene nononyile Aina Amoli pa mulandu na antu yane,
Aina Amoli yaali aatali wa mikedali nupya yaali akome wa miti ya muoaki;
Nayononyile yonsi kwati nkonona umuti kumwi ni vizao ni misisi.
10 Namufumizye umu mpanga iya Ijipti,
Nu kuleka kuti mupite umu lwanga pa myaka 40,
Pakuti mupoke impanga ya Ina Amoli.
11 Nasonsile ana inu yamwi ukuya ya kasesema
Na aonsi yamwi ukuya Anazili.
Uzye asi vivyo kwene mwe yantu ya mu Izlaeli?’ avino Yeova walanda.
12 ‘Lelo mwatwalilile ukupeela Anazili waini pakuti yamwe,
Nu kuneena ya kasesema imuti: “Mutaasesema.”
13 Ndamuvungolela umu ncende inu,
Wakwe vino icikocikaala icaticisenda ingaano cikavungola vino capitapo.
14 Aakasimulisha atalakwata ukwakuutukila,
Uwa maka atalaya na maka nupya,
Nu musilika atalapusuka.
15 Aakaomvya ulapwa atalasipa,
Aakasimulisha atalutuka,
Na aakakwela pa mfwalasi atalapusuka.
16 Nanti sile aasilika aasipe sana
Yaluutuka ala yali tupu umu wanda uuwa,’ avino Yeova walanda.”
3 “Mwe Ina Izlaeli uvwini mazwi yano Yeova watalanda pali mwemwe, kuli kuti mwe lupwa lonsi luno wafumizye umu mpanga ya Ijipti:
2 ‘Mwemwe sile namanya apa ndupwa zyonsi izya mu nsi.
Ali mulandu uno ndamupingwila pali vyonsi vino mukaluvyanya.
3 Uzye antu yaili yangapitila pamwi ndi cakuti yatapangiine?
4 Uzye cisama angang’anza umu mutengo lino kusi icili consi cino angalema?
Uzye cisama umunono angang’anza ukufuma muno akaikala lino kusi cino watalema?
5 Uzye icunyi cingalemya lino pasi iciteyo?
Uzye iciteyo cingavwampuka lino citalemile icili consi?
6 Uzye antu yasizakaza ndi cakuti ipenga lyalila umu musumba?
Ndi cakuti intazi yacitika umu musumba uzye ale asi Yeova uwatalenga?
7 Pano Yeova Umwene wa Papelapela atanga acite icili consi
Ukwaula ukusokolola inkama kuli ya kasesema aomvi yakwe.
8 Cisama watang’anza! A weni aatakuvwa intete?
Yeova Umwene wa Papelapela watalanda! A weni aatakusesema?’
9 ‘Manyishini pa mpungu izikome izya ku Ashidodi
Na pa mpungu izikome izya mu mpanga ya Ijipti.
Muti: “Kolonganini pa myamba ya mu Samaliya;
Lolini icimvulunganya icilimo
Nu ucenjezi uukucitika.
10 Aakavuzya unkalwe nu wononesi umu mpungu zyao izikome,
Yatamanya ukucita icilungame,” avino Yeova walanda.’
11 Fwandi Yeova Umwene wa Papelapela walanda wati,
‘Alwani yalazinguluka impanga inu,
Yalamumala maka,
Ni vintu vinu ivya mu mpungu izikome vilapokwa.’
12 Yeova walanda wati,
‘Wakwe vino kacema akapokolola makulu yaili aamfwele nanti ikutwi umu kanwa kakwe cisama,
Avino na Ina Izlaeli aakaikala umu Samaliya pali ya bedi acindame,
Na pa vilimba ivisuma yalapokololwa.’
13 ‘Uvwini nu kucelula amu ng’anda yakwe Yakobo,’ avino Yeova Umwene wa Papelapela, Leza wa maumba walanda.
14 ‘Pano pa wanda uno ndapingula Aina Izlaeli pali ucipondoka wao onsi,
Ndapingula na maulambo ya mu Betele;
Impembe zya ku ulambo zilaputulwa nu kuponela pansi.
15 Ndonona ing’anda ya mu nsita ya mpepo ni ng’anda ya mu nsita ino kukakaya sana.’
‘Mang’anda aemviwa na mino ya nzovu yalalowa,
Nupya mang’anda akalamba* yalononwa,’ avino Yeova walanda.”
4 “Mwe yanaci ya pa mwamba wa Samaliya,
Mwemuno mwaya wa ng’ombe zya mu Bashani uvwini mazwi yaa,
Mwemuno mukacenjezya aatakwata uwa kuyazwa nu kucuzya apiina,
Mukanena ya winu imuti, ‘Tuletelini ivyakuti tumwe!’
2 Yeova Umwene wa Papelapela watalapa muli uumuzilo wakwe ati,
‘“Lolini! Manda yakwiza lino alamukatusizya kuli vino yakakowekako inyama
Na mwe yashala alamukatusizya uku maswelo.
3 Mulafumila pa vipongo vya ku ciumba, cila muntu alafumila pali cino watalozyanya naco;
Nupya mulasumbilwa uku Halimoni,” avino Yeova walanda.’
4 ‘Izini uku Betele nu kuyembuka,*
Izini uku Giligali nu kuyembukilako!
Letini ivya upe vinu katondo,
Ni cikumi pa wanda wakwe citatu.
5 Ocini ilambo lya kutaizya ilya mukate uwaula icitutumusi;
Manyishini uku yantu yonsi pa malambo inu aakuitemelwa!
Pano avino mwatemwa ukucita mwe yantu ya mu Izlaeli,’ avino Yeova Umwene wa Papelapela walanda.
6 ‘Nupya ntaamupeezile ivyakulya umu misumba inu yonsi
Nalesile ivyakulya ukusila umu mang’anda inu yonsi;
Lelo mutaawezile kuli nene,’ avino Yeova walanda.
7 ‘Nalesile kuti kutaya imvula lino kwashala imyezi itatu kuti kuye ukuzombola;
Nalenzile ukuti itoonye umu musumba onga lelo ukwaula ukutoonya umu musumba uze.
Nalesile kuti itoonye umu calo conga,
Lelo icalo cino imvula itaatoonyizyemo cumile.
8 Antu ya mu misumba iili nanti itatu yapempezyokanga ala yakuya umu kumwa manzi umu musumba onga,
Lelo ulusala lutasilanga;
Nomba mwakanyile ukuwela kuli nene,’ avino Yeova walanda.
9 ‘Nalesile ivyakulya vinu vyononeke uku cikailila nu ku ndwala.
Mwavuzizye ivyalo vya myangazi ni vyalo vyuze,
Lelo makanta ononyile imisamvu inu ni miolivi;
Nomba nalyo kwene mutaawezile kuli nene,’ avino Yeova walanda.
10 ‘Naleesile icikuko pali mwemwe wakwe cino cali pali Ijipti.
Nakomile aonsi inu uku lupanga nu kupoka imfwalasi zinu.
Nalenzile ukuti mwauvwa icinunu ca mu nkambi zinu;
Lelo mutaawezile kuli nene,’ avino Yeova walanda.
11 ‘Nononyile impanga inu
Wakwe vino nononyile Sodoma na Gomola.
Nupya mwali wa cimuti cino yasompola umu moto;
Lelo nalyo kwene mutaawezile kuli nene,’ avino Yeova walanda.
12 Fwandi vikwene avino ndacita kuli mwemwe mwe Ina Izlaeli.
Pa mulandu wakuti ndacita vii kuli mwemwe mwe Ina Izlaeli,
Ipekanyini ukukomenkanya Leza winu.
13 Pano Leza u wapanzile imyamba nu muza;
Akanena umuntu vino akwelenganya,
Akalenga uluswepo lwa katondo iluya imfinzi,
Akalyatola pa ncende izitumpuke izya mu nsi;
Yeova Leza wa maumba ali zina lyakwe.”
5 “Mwe ya mu ng’anda yakwe Izlaeli uvwini mazwi yano nkumunena aali wa lwimbo lwa ulanda:
2 ‘Izlaeli nacisungu watapona;
Atange akatuke nupya.
Iiyamuleka pansi;
Kusi ali wensi uwa kumukatusha.’
3 “Yeova Umwene wa Papelapela walanda wati:
‘Umu musumba umwafumanga asilika 1,000 mulashala sile aali 100;
Nu mu musumba umwafumanga asilika 100 mulashala sile aali 10, vikwene i vilacitikila amu ng’anda yakwe Izlaeli.’
4 “Pano Yeova akunena amu ng’anda yakwe Izlaeli ukuti:
‘Ndondini nu kutwalilila ukuya nu umi.
5 Mutaya uku Betele,
Mutaya uku Giligali nanti ukupita uku Belisheba,
Pano Giligali alasendwa umu uzya,
Na Betele alononwa.*
6 Londini Yeova nu kutwalilila ukuya nu umi,
Pakuti atonona amu ng’anda yakwe Jozefu wakwe vino umoto ukaonona,
Nu koca Betele ukwaula ukuti umwi azimye umoto.
7 Mwaleka umulinganya ukuya wa cintu icilule,
Nupya mwasumba ulungami pansi.
8 Uwapanzile intanda izyaya umwi umba ilikaamwa ukuti Kima ni zyaya umwi umba ilikaamwa ukuti Kesili,
Aakalenga imfinzi ukuya uluswepo lwa katondo,
Aakalenga kuye imfinzi umusanya wakwe vino cikaya usiku,
Aakakolonganika amanzi ukufuma muli yemba
Pakuti yapongolokele umu nsi
—Izina lyakwe a Yeova.
9 Alalenga uwa maka aononwe,
Alaleta uwononesi pa ncende izicingililwe na malinga.
10 Yapata antu aakayasunda pa mpongolo ya musumba,
Nupya yapata sana aakalanda icumi.
11 Pa mulandu wakuti mukasonkesha icalo uku mupiina
Nupya mukapoka ingaano ngu musonko,
Mutalatwalilila ukwikala umu mang’anda aakulilwa na mawe aaputoolwa
Nanti ukumwa waini uwa mu vyalo vinu ivisuma ivya myangazi.
12 Namanya imiku ino mwapondoka
Nu ukulu wa membu zinu
—mukacuzya alungami,
Mukaoziwa,
Nupya musivwangila aapiina pa mpongola ya musumba.
13 Fwandi aakailuka yalikala mya pa nsita iyo,
Pano ilaya iinsita ya ntazi.
14 Mwacita ivisuma, mutaacita iviipe,
Pakuti mutwalilile ukuya nu umi.
Lyene Yeova Leza wa maumba alaya namwe,
Wakwe vino mukalanda imuti waya namwe.
15 Patini iciipe nu kutemwa icisuma,
Lekini pa mpongolo ya musumba paye umulinganya.
Limwi Yeova Leza wa maumba
Aluvwila ashalako muli Jozefu uluse.’
16 Yeova Leza wa maumba, Yeova walanda wati:
‘Mu ncende zyonsi izya mu musumba umukazanwa antu aingi mulaya ukuloosha,
Mu miseo yonsi yalalanda iyati, “Kalanda kuli sweswe, kalanda kuli sweswe!”
Yalanena alimi ukuloosha
Kumwi na aakalipilwa pakuti yalooshe.’
17 ‘Mu calo consi ica myangazi mulaya ukuloosha;
Pano ndapita umu mpanga inu,’ avino Yeova walanda.
18 ‘Kalanda kuli yano yakalondesha uwanda wakwe Yeova!
Uzye lyene uwanda wakwe Yeova ulaya uli kuli mwemwe?
Kulaya imfinzi, asi uluswepo foo.
19 Cilaya kwati u muntu uutuka cisama lelo wakomenkanya bele,
Nupya lino wingila umu ng’anda nu kusintilizya makasa uku ciumba inzoka nayo imuluma.
20 Pa wanda wakwe Yeova kulaya imfinzi, nupya kutalaswepa;
Kulaya imfinzi iikalamba, nupya kutalaya uluswepo.
21 Napata nupya nsilonda imitebeto inu,
Napata ni cinunu ca vintu vino mukapeela pa maukongano inu.
22 Nanti sile mwampeela malambo ya koca na malambo yauze,
Vitalanzanzya;
Nupya ntalapokelela malambo inu aamutende aanyama iziine.
23 Mutaleka nuvwe iciunda ca nyimbo zinu;
Nupya mutaleka nuvwe ukulila kwa vyakulizizyako inyimbo vinu.
24 Si umulinganya wakonkoloka wa manzi,
Nu ulungami wa luzi ulukapita lyonsi.
25 Mwe ya mu ng’anda yakwe Izlaeli, uzye mwampeelanga malambo ni vyaupe
Pa myaka 40 lino mwali umu lwanga?
26 Nomba lyene mulasenda Sakuti umwene winu na Kaiwani,*
Vinkolanya vino mwaipangila ivya lutanda lwakwe leza winu,
27 Nupya ndamutwala umu uzya ukupuzya uku Damasika,’ avino Leza wa maumba wino izina lyakwe a Yeova walanda.”
6 “Kalanda uku yantu ya cilumba amu Zioni,
Aakayuvwa aacingililwe pa mwamba wa mu Samaliya,
Intunguluzi izicindame izya mu luko ulukalamba,
Kuno amu ng’anda yakwe Izlaeli yakaya!
2 Lambini muye uku Kaline nu kuyalola,
Kufuma kuuku muye uku Hamati Mukalamba,
Nupya muye uku Gati uwa Ina Filisti.
Uzye yacindama ukucila mawene yaa,*
Nanti uzye incende yao yakula ukucila iinu?
3 Mutika mano uku wanda wa ucuzi
Nupya mukalenga antu aankalwe ukuteeka.
4 Yakalala pa mabedi aapangilwa na mino ya nzovu,
Nu kusaalala pa vilimba ala yakulya ya suuku na tucipambasi utwine;
5 Yakapanga inyimbo ala izeeze likulila,
Nupya wakwe Devedi yakapanga ivya kulizizyako inyimbo;
6 Yakamwela waini mu makapu aakalamba
Nu kuitila aineco mafuta asuma sana pa mitwe.
Lelo yatika mano uku wononesi wa yantu yakwe Jozefu.
7 Fwandi aliyo yalatandikilapo ukuya umu uzya,
Nupya icongo ca kuzevya kwakwe yano yakasaalala pa vilimba cilasila.
8 ‘Yeova Umwene wa Papelapela watalapa umwi zina lyakwe ukuti,’ avino Yeova Leza wa maumba walanda,
‘“Napata sana icilumba cakwe Yakobo,
Napata ni mpungu zyakwe izicingililwe,
Nupya ndapeela umusumba kumwi ni vyayamo uku yalwani.
9 “‘“Nupya ndi cakuti umu ng’anda yonga imushala antu 10 nayo kwene yalafwa. 10 Lupwa aliza ayafumye nu kuyoca wenga wenga. Alafumya mafupa yao umu ng’anda, lyene aluzya ali wensi alaya umu miputule iya mu ng’anda ukuti, ‘Uzye muli na yauze?’ Nawe alaasuka ati, ‘Awe musi!’ Lyene alamunena ati, ‘Tuzya! Pano yii asi nsita ya kulumbula izina lyakwe Yeova.’”
11 Pano Yeova aakulanda ukuti vii vicitike,
Nupya alonona ing’anda ikalamba,
Ni ng’anda inono.
12 Uzye imfwalasi zingasimula umu vimawe,
Nanti uzye umuntu angalimamo ni ng’ombe?
Mwalenga umulinganya ukuya wa cimuti cakwe poizoni,
Nu ulungami ukuya wa cintu icilule.
13 Mukazangila umu vintu ivya sile sile,
Nupya mukati, “Uzye tutacimvizye uku maka itu?”
14 Fwandi mwe ya mu ng’anda yakwe Izlaeli ndaleta uluko pali mwemwe,’ avino Yeova Leza wa maumba walanda,
‘Nupya yalamucuzya ukufuma uku Lebohamati* ukufika uku Mukonko wa Alaba.’”
7 Vii avino Yeova Umwene wa Papelapela wandanzile: Lolini! Wapanzile iumba lyakwe ya makanta lino ivyakulya vya kushalikizyako* ukukomela vyatandike ukukula. Pa nsita iiya ala iipa isote lya nyama zya mwene. 2 Lino ya makanta yamazile ukulya ivimelwa vya mu mpanga natiile: “We Yeova Mwene wa Papelapela napaapata eleela antu yako! Uzye Yakobo angapusuka uli? Pano u mutonte!”
3 Fwandi Yeova welenginyepo nupya. Yeova watiile, “Citalacitika.”
4 Vii avino Yeova Umwene wa Papelapela wandanzile: Lolini! Yeova Umwene wa Papelapela walanzile ukuti kuye ukufululwa ukuomvya umoto. Moto osile manzi aingi azike, nupya osile iciputulwa cimwi ca mpanga. 5 Lyene natiile: “We Yeova Mwene wa Papelapela utaleka cico cicitike. Uzye Yakobo angapusuka uli? Pano u mutonte!”
6 Fwandi Yeova welenginyepo nupya. Yeova Umwene wa Papelapela watiile, “Na cico kwene citalacitika.”
7 Vii avino wandanzile: Lolini! Yeova wimilile pa ciumba icakuuzilwe ni ntambo iya kupimilako, nupya walemile intambo ya kupimilako. 8 Lyene Yeova wanguzizye ati: “Amosi i cani cino ukulola?” Nani naswike inti: “Nkulola intambo ya kupimilako.” Lyene Yeova wanenyile ati: “Namaika intambo yii ya kupimilako pa yantu yane Aina Izlaeli. Ntalayeleela nupya. 9 Incende zya kupepelapo zyakwe Isaki zilononwa, ni ncende zya muzilo zyakwe Izlaeli nazyo kwene zilononwa; nupya ndakatukila amu ng’anda yakwe Yeloboamu nu lupanga.”
10 Amaziya simapepo wa ku Betele watumile amazwi uku Mwene Yeloboamu wa ku Izlaeli ukuti: “Amosi akukupondokela umu ya mu ng’anda yakwe Izlaeli. Antu ya mu mpanga yakufilwa ukuzizimizya vyonsi vino akulanda. 11 Pano akulanda akuti, ‘Yeloboamu alafwila uku lupanga, nupya Aina Izlaeli yalasendwa ukufuma umu mpanga yao.’”
12 Lyene Amaziya wanenyile Amosi ati: “We kalola wa vilolwa pitanga utukila uku mpanga ya Yuda, kuuku kwene akuno ulaakwata ivyakulya nupya akuno uce uwasesemela. 13 Lelo ute ukusesemela umu Betele, pano i ncende ya muzilo iya mwene nupya i tempele lya yantu.”
14 Lyene Amosi wanenyile Amaziya ati: “Ntali nene kasesema nanti umwana wakwe kasesema; lelo nali kacema, nupya nasakamalanga imisamvu. 15 Lelo Yeova wamfumizye uku kucema imfwele, nupya Yeova wanenyile ati, ‘Yanga, kaseseme umu yantu yane Aina Izlaeli.’ 16 Lyene uvwa amazwi yakwe Yeova: ‘Ukulanda ukuti, “Utasesema pa Ina Izlaeli nupya utasimikila pa ya mu ng’anda yakwe Isaki.” 17 Fwandi vii avino Yeova walanda: “Mamako alaya iule umu musumba, nupya ana yako aonsi na akazyana yalakomwa uku lupanga. Impanga yako ilankanyiziwa ukuomvya intambo ya kupimilako, naawe ulafwila umu mpanga iikowele; na Izlaeli alasendwa umu uzya ukufuma umu mpanga yakwe.”’”
8 Vino Yeova Umwene wa Papelapela wandanzile aevi: Wandanzile umuse umwali ivizao vya cisanya. 2 Lyene wanguzizye ati, “Amosi i vyani vino ukulola?” Nani naswike inti, “Nkulola umuse umuli ivizao vya cisanya.” Lyene Yeova wanenyile ati: “Impela ya yantu yane Aina Izlaeli yatifika. Ntalaelelapo nupya. 3 ‘Inyimbo zya pi tempele zilasanguka ukuloosha,’ avino Yeova Umwene wa Papelapela walanda. ‘Vitumbi vilasumbilwa umu ncende zyonsi, kulaya sile mya!’
4 Uvwini mazwi yaa mwemuno mukalyatoola apiina,
Na mwemuno mukakoma antu afuuke amu mpanga,
5 Mwemuno mukalanda imuti, ‘A lilaci lino ukuzevya umwezi upya
Ni Sabata vilasila pakuti tukazye ivyakulya?
Pakuti tucefye ivya kupimilako ivyakulya
Nu kukomya imitengo,
Nu kusenula ivya kupimilako pakuti twacenjezya;
6 Pakuti twakala antu aulizye kuli siuva
Nu kukauzya apiina ni ndyatu,
Nu kukazya ivyakulya ivya sile sile.’
7 Yeova uwali ali Ucindami wakwe Yakobo watalapa ukuti,
‘Ntalilila ivicitwa vyao vyonsi.
8 Ukwene ali mulandu uno impanga ilatenkanila,
Na antu yonsi akaikalamo yalaloosha.
Impanga yonsi ilakatuka wa Luzi Lwa Naelo,
Nupya ilasunkaana nu kupona wa Luzi Lwa Naelo ulwa mu Ijipti.’
9 Yeova Umwene wa Papelapela walanda wati,
‘Umu wanda uuwa ndalenga ilanzi ukuwa pakasi ka wanda,
Nupya ndalenga kuye imfinzi lino kucili kasanya.
10 Ndalenga ukuzevya kwinu kuye ukuloosha
Ni nyimbo zinu zyonsi ziye izya ulanda.
Ndaleka muzwale ivyakuzwala vya kulangilamo ulanda, nu kulenga muye na mapala;
Ndaleta ucuzi uulaya wa kuloosha umwana umonsi uwavyalwa sile wenga,
Nupya uwanda uwo onsi ulaya uwa kucula.’
11 Yeova Umwene wa Papelapela walanda wati,
‘Lolini! Manda yakwiza lino ndaleta icipowe umu mpanga,
Asi cipowe ca vyakulya nanti ulusala lwa manzi,
Lelo i cipowe nu lusala lwa kuvwa mazwi yakwe Yeova.
12 Yalaapempezyoka ukufuma kuli yemba kufika kuli yemba,
Nu kufuma uku katutu ukufika uku ufumondaka.
Yalaazinguluka ale yakulonda izwi lyakwe Yeova, lelo yatalalizana.
13 Mu wanda uuwa ya nacisungu asuma
Kumwi na alumendo yalafwa icipafi pa mulandu nu lusala;
14 Aakalapila umu luyembu lwakwe Samaliya na akalanda iyati,
“Nkulapa umwi zina lyakwe leza wako we Dani!”
Na akati, “Nkulapa umwi zina lya museo uwaya uku Belisheba!”
Yalapona nupya yatalatala yakatukepo nupya.’”
9 Naweni Yeova wataimilila papela ya ulambo, nupya watile: “Uma umutwe wa cipilala, nupya cimatenkaana pansi. Uputule imitwe ya vipilala nupya ashala ndayakoma uku lupanga. Kusi aalutuka nanti ukupusuka.
2 Ndi cakuti iimba pakuti yafisame umwi Lindi,*
Ndayafumyamo ukuomvya ikasa lyane;
Nupya ndi cakuti yaya umwi yulu
Ndayawezya pansi.
3 Nupya ndi cakuti yafisama papela ya mwamba wa Kalimeli
Ndayalonda nu kuyalema.
Ndi cakuti yafisama pansi yakwe yemba,
Ndanena inzoka iyalume.
4 Ndi cakuti alwani yao yayasenda umu uzya,
Ndanena antu ya kuuku kuti yayakome nu lupanga;
Ndika mano uku kuyaletela intazi asi visuma foo.
5 Pano Umwene wa Papelapela, Yeova Leza wa maumba aliwe akalema insi,
Pakuti isunguluke na vyonsi ivyayamo vilooshe;
Impanga yonsi ilakatuka wa Luzi Lwa Naelo,
Nu kupona wa Luzi Lwa Naelo ulwa mu Ijipti.
6 ‘Aakakuula masitepu yakwe umwi yulu
Nu kukuula icikuulwa cakwe papela ya nsi;
Aakakolonganika manzi ukufuma muli yemba
Pakuti yapongolokele umu nsi,
Izina lyakwe a Yeova.’
7 ‘Uzye mutaya wa yana ya Ina Kushi kuli nene mwe yantu ya mu Izlaeli?’ avino Yeova walanda.
‘Uzye ntafumizye Izlaeli umu mpanga ya Ijipti,
Na Ina Filisti umu Kilete, na Ina Silya umu Kili?’
8 ‘Manso yakwe Yeova Umwene wa Papelapela yali pa wene wa luyembu,
Nupya alaulovya umu nsi.
Lelo ntalalovya amu ng’anda yakwe Yakobo,’ avino Yeova walanda.
9 ‘Lolini! Impingula vino ndacita,
Ndasunkaanya amu ng’anda yakwe Izlaeli umu nko zyonsi,
Wakwe vino umuntu akasunkanya ulunyungo
Nupya kusi iwe nanti alyonga ilikapona.
10 Antu yonsi ayembu yalafwa uku lupanga,
Yayo akulanda iyati, “Intazi italatupalama nanti ukufika pali sweswe.”’
11 ‘Pa wanda uuwa, ndakatusha insakwe yakwe Devedi iyapona,
Ndazifya ivipongo,
Nupya ndazifya muno yononeka;
Ndaikuula pakuti iye wakwe vino yaali mpiti,
12 Pakuti yapoke ivyashalako umu Edomu
Nu mu nko zyonsi muno izina lyane likaamwa,’ avino Yeova aakucita vii walanda.
13 ‘Lolini! Manda yakwiza,’ avino Yeova walanda,
‘Lino insita ya kulima ilafika ala ivyakulya ivingi vitatala vyazombolwa,
Nupya lino insita ya kukomela ilafika ala imyangazi iingi itatala yalyatolwa;
Nupya imyamba ilaomba na waini umulyompe,
Nu mu tumyamba tonsi mulakonkoloka waini.*
14 Ndakolonganika Aina Izlaeli antu yane aasendwa umu uzya,
Nupya yalakuula cipya cipya imisumba iyononeka nu kwikalamo;
Yalalima ivyalo vya myangazi nu kumwa waini wa ku vilimwa vivyo,
Yalalima ivyalo nu kulya ivizao.’
15 ‘Ndayalemeka umu mpanga yao,
Nupya yatalatala ipulwe
Umu mpanga ino nayapeela,’ avino Yeova Leza winu walanda.”
Nanti limwi, “aingi.”
Nanti “ukupondoka.”
Nanti limwi, “alaya incende umukacitikila iviipe.”
Vilubi vii vyoili vingalozya kuli pulaneti aakamwa ukuti Satani, wino yapepanga.
Yafwile yakulozya uku mawene ya mu Yuda nu mu Izlaeli.
Nanti “uku wingililo wa ku Hamati.”
Kuli kuti umu Januwale na Febuluwale.
Nanti “Syeo.” Lolini Ulondolozi wa Mazwi.
Mu Ciebele: “Tulasunguluka.