YONA
1 Yona mwana Amitai wapokelile amazwi ukufuma kuli Yeova akuti: 2 “Katuka uye uku musumba ukulamba uwa Ninive, nu kuyamanyisya antu pa upinguzi uno ndaleta pa musumba uwo, pano indola iviipe vino yakacita.”
3 Lelo Yona utwike ukufuma kuli Yeova kuti aye uku Tashishi; waile uku Yopa nupya waile azana uwato uwayanga uku Tashishi. Fwandi walipiile impiya pakuti autuke ukufuma kuli Yeova.
4 Lyene Yeova wakatwisye icimuza icikalamba pali yemba, nupya kwali icimuza icipiisye icakuti uwato wali umupiipi nu kononeka. 5 Ya kapisha ya wato yuvwile sana intete nupya cila muntu watandike ukulenga uwazwilizyo kuli leza wakwe. Yatandike ukusumbila ivintu ivyali umu wato muli yemba pakuti wangupale. Lelo Yona wene wali umu muputule wa pansi ale watakasula. 6 Kapitao waile kuli Yona nu kumuzya ati: “U mulandu ci uno watukaswila? Katuka upepe kuli Leza wako limwi Leza wa cumi amatuvwila uluse nupya tutakufwa.”
7 Lyene yatandike ukulanzyanya iyati: “Lekini tupendole pakuti tumanye uwatalenga kuye intazi yii.” Fwandi yapendozile, nupya icipendwilo caponiile pali Yona. 8 Yamuzizye iyati: “Tunene, a weni uwatalenga intazi ize pali sweswe? U mulimo ci uno ukaomba, nupya aekwi kuno ufumile? Ufumile uku mpanga ci, nupya wewe wa mu lupwa ci?”
9 Nawe waswike ati: “Nene Muebele nupya nkapepa Yeova Leza wa kwi yulu, uwapanzile yemba nu mulundu.”
10 Lyene alino aonsi yacizilemo ukuvwa intete, pano walanga watayanena ukuti akuutuka Yeova, nupya yamuzizye iyati: “I cani cino watuucita?” 11 Yamuzizye iyati: “Uzye lyene tucite uli pakuti yemba alaale?” Pano icimuza cayanga cikukomelako sile. 12 Wayaswike ati: “Nyemulini nu kunsumbila muli yemba nupya yemba amalaala; pano imanya ukuti nene indenga ukuti cimuza cii cipisye cize pali mwemwe.” 13 Lelo aonsi yezizye na maka pakuti yaswilizye uwato uku mulundu nomba yafizilwe, pano icimuza cayanga cikwipilako sile.
14 Lyene yaliliile kuli Yeova iyati: “Iyee we Yeova, utaleka tufwe pa mulandu nu muntu wii! Utatupeela umulandu pa mulandu nu wazi wa kaele, pano watuucita ukulingana nu kulonda kwako, we Yeova.” 15 Fwandi yanyemwile Yona nu kumusumbila muli yemba; na yemba alaala. 16 Lyene aonsi yaa yacindike sana Yeova, nupya yapeezile amalambo kuli Yeova nu kulapa ukuti yakulamuombela.
17 Lyene Yeova watumile iciswi cikalamba kuti cimile Yona, fwandi Yona wikazile umunda ya ciswi pa manda yatatu umusanya nu usiku.
2 Lyene Yona wapefile kuli Yeova Leza wakwe ala ali umunda ya ciswi, 2 Nupya watiile:
“Lino naculanga naliliile kuli Yeova, nupya wangaswike
Lino nali umwi Lindi* ilizike* nalenzile uwazwilizyo.
Uvwile izwi lyane.
3 Lino wansumbiile umukasi pansi yakwe yemba,
Manzi yanzingulwike.
Na maimbi yako yonsi aamaka yampumanga.
4 Nupya natiile, ‘Wamfumya uku cinso cako!
Ningalola uli nupya pi tempele lyako ilya muzilo?’
5 Nakasi imfwe pa mulandu wakuti manzi yanzingulwike;
Natuwile umu manzi aingi.
Isote lya muli yemba lyampomvile uku mutwe.
6 Natuwile pansi ya myamba.
Mifiikilo ya nsi yanjalile amanda pe,
Lelo we Yeova Leza wane wampuswishe.
7 Lino umi wane wayanga ukusila Yeova awino niwishe.
Lyene ipepo lyane lizile kuli wewe umwi tempele lyako ilya muzilo.
8 Aakapepa ivilubi vyasile sile yasuula Leza aakayalanga ukutemwa kwa cumi.
9 Lelo nemo ndakutaizya nu kukupeela malambo.
Ndafikilizya imilapo yane.
Yeova aliwe aakapususha.”
10 Lyene Yeova wanenyile iciswi ukulukila Yona uku mulundu naco caile icimuluka.
3 Lyene Yeova wanenyile Yona umuku wakwe ciili ati: 2 “Katuka yanga uku musumba ukulamba uwa Ninive nu kuyamanyisha antu vino namakunena.”
3 Fwandi Yona uvwilile Yeova nu kuya uku Ninive. Musumba wa Ninive wali ukalamba sana. Kuuzinguluka ulwa pansi ungapitapo manda yatatu. 4 Lyene Yona wingile umu musumba, nupya wapisile uwanda upuma ala akumanyisha ukuti: “Kwashala sile manda 40 ale Ninive ononwa.”
5 Antu ya mu Ninive izile iyataila Leza, nupya kwali ukumanyisha antu ukufuma pa munono ukufika na pa mukalamba ukuti yafunge nu kuzwala ivyakuzwala vya kulangilamo ulanda. 6 Lino umwene wa ku Ninive uvwile amazwi yano Yona walandanga, wakatwike pa cilimba cakwe ica wene azula ni vyakuzwala vyakwe ivya wene, azwala ivya kulangilamo ulanda aikala nu mwi twi. 7 Nupya walanzile ukuti kuye ukumanyisha umu Ninive monsi ukuti:
“Kulingana ni sunde lya mwene na antu yakwe acindikwe: Kusi umuntu nanti inyama, ing’ombe nanti imfwele nanti imbuzi ivilinzile ukulya icili consi. Vitalinzile ukulya ivyakulya nanti ukumwa manzi. 8 Antu yazwale ivyakuzwala vya kulangilamo ulanda kumwi sile ni nyama, nupya yalilile sana kuli Leza nu kuta ukucita iviipe vino yakacita nu unkalwe. 9 Limwi Leza wa cumi angasenuka muli vino akulonda ukucita nu kukana ukuleta ukali wakwe pakuti tutalowa?”
10 Lino Leza wa cumi waweni vino yacisile na vino yatiile ukucita iviipe, wasoolwile ukukanaleta intazi ino wakasi ukuleta pali aliyo.
4 Lelo Yona atatemilwe pali cii nupya wasosile sana. 2 Lyene wapefile kuli Yeova ati: “Iyee we Yeova uzye cikwene asi calenzile nsakamale lino nali uku mpanga yane? Ali mulandu uno pa kutandika nezizye ukuutuka kuti inje uku Tashishi, pano namanyile ukuti wewe Leza uwaya ni cikuuku nu luse, aasisoka zuwa nupya uwaya sana nu kutemwa kwa cumi nupya aakalanguluka pa ntazi ino akasi ukuleta. 3 Fwandi we Yeova, sileka sile imfwe pano cazipapo ukuti imfwe ukucila ukuya nu umi.”
4 Yeova uzizye Yona ati: “Uzye icilinga ukuti usoke sana?”
5 Lyene Yona wafumile umu musumba nu kuyaikala uku ufumondaka wa musumba. Wapanzile kamutanda nu kwikalamo pakuti alole ivimacitikila umusumba. 6 Lyene Yeova wamezizye icimelwa icikatamba pakuti cipeele Yona kasaao pakuti auvwe ningo. Nupya Yona uvwile ningo sana pa cimelwa cico.
7 Lelo katondotondo uwanda uwalondelilepo, Leza watumile icizizi nupya calile icimelwa, cimelwa naco cumile. 8 Lino ilanzi lyawazile Leza walenzile kuye icikailila ukufuma uku ufumondaka, kasanya koosile Yona pa mutwe nupya wali umupiipi nu kufwa icipafi. Watwalilile ukulenga ukufwa nu kulanda ati: “Cazipapo ukuti imfwe ukucila ukuya nu umi.”
9 Leza uzizye Yona ati: “Uzye cili sile ningo ukuti usoke sana pa mulandu ni cimelwa?”
Nawe waswike ati: “Inkwata insambu zya kusoka, insoka sana icakuti nkulonda nu kufwa.” 10 Lelo Yeova wamunenyile ati: “Ukuvwila icimelwa uluse, nanti cakuti utaaciombiile nanti kuleka ukuti cikule; cakuzile umu usiku onga nu kulowa umu usiku onga. 11 Uzye nani ntalinzile ukuvwila uluse umusumba ukalamba uwa Ninive umwaya antu ukucila pali 120,000 aatamanya ukupusanya icisuma ni ciipe kumwi ni nyama zyao izingi?”
Nanti “Sheo.” Lolini ulondolozi wa mazwi.
Mu Ciebele: “Umunda.”