NAUMI
1 Mazwi ya upinguzi ukulozya kuli Ninive: Ibuku umwaya icilolwa cino Naumi* Umwina Elikosyi waweni:
2 Yeova a Leza akalonda ukupepwa sile wenga nupya akalandula;
Yeova akalandula nupya waipekanya ukulanga ukali wakwe.
Yeova akaleta icilanduzi pa yalwani yakwe,
Nupya akasungila alwani yakwe ukali.
3 Yeova asisoka zuwa nupya wakwatisya maka,
Lelo Yeova atalafilwa ukufulula aakacita iviipe.
Lino akupita akakatusya icimuza icikaonona,
Nupya ingazo zyakwe zikakatusya ulukungu kwati amakumbi.
4 Akakalipila yemba nu kumukamya;
Nupya akalenga inguzi zyonsi ukukama.
Ivimelwa ivya mu mpanga ya Basyani na Kalimeli vikauma,
Ni vimelwa vya mu Lebanoni vikauma.
5 Imyamba ikatenkaana pa mulandu na aliwe,
Ni milundu ikasunguluka.
Insi ilatenkaana pa mulandu wa kuyapo kwakwe,
Kumwi ni mpanga alino na yonsi aikalamo.
6 Uzye a weni aangapusuka uku ukali wakwe?
Nupya a weni aangazizimizya uku ukali wakwe ukalamba?
Ukali wakwe ulapongoloka wa moto,
Nupya ivimawe vilapandoka pa mulandu na aliwe.
7 Yeova u musuma, ali mwakufisama umu nsita ya ntazi.
Wamanya aakafisama muli aliwe.
8 Alalovya umusumba wa Ninive kuli mulamba,
Alwani yakwe yalaya umu mfinzi.
9 Uzye kuli vino mulacita pa kulwisya Yeova?
Alaleta uwononesi wa pe.
Atalatala alete uwononesi nupya.
10 Pano yaya wa myunga iititikane,
Nupya yaya wa yantu aatiyakoleka uwengwa;
Lelo yalapya wa vipelele.
11 Muli wewe mulafuma umwi aalaya na mapange aipe aa kulwisya Yeova,
Alakupanda mano aa sile sile.
12 Vii ali vino Yeova walanda:
“Nanti icakuti aingi nupya yakwata sana maka,
Yalononwa, nupya yatalatwalilila ukuyako.
Nakusalapula,* lelo ntalatala nkusalapulepo nupya.
13 Ndakukulula ukufuma ukwi yoko lya yalwani yako,
Nupya ndaputoola na ya ceni yako.
14 Yeova walanda pali wewe* ukuti,
‘Izina lyako litalatwalilila.
Ndonona ivilubi vyakuwaza ni vyakwengulula ivyaya umu ng’anda yakwe ya leza yako.
Ndakupangila ilindi, pano wewe wa sile sile.’
15 Lola! Aakuleta ilyasi lisuma akufuma pa myamba,
Wino akusimikila pa mutende.
We Yuda, zevya imitebeto yako nu kufikilizya milapo yako,
Umuntu umwipe atalatala akuzanze nupya.
Alononwa iciipisye.”
2 Aakasalanganya antu wataiza umu kukuzanza.*
Cingilila malinga.
Cingilila umuseo.
Komeleka nupya uipekanye uku ulwi.
2 Pano Yeova alawezya ucindami wakwe Yakobo,
Pamwi nu ucindami wakwe Izlaeli,
Pano alwani yayonona;
Nupya yonona ni misambo yao.
3 Ivisyangu vya yonsi yakwe amaka vyayenza ce,
Asilika yakwe yazwala iviyenzulukile.
Ivyela vya ku maceleta yakwe vikaaka wa moto
Pa wanda uno akuipekanya uku ulwi,
Nupya masumo yanyolwa.
4 Maceleta ya nkondo yakasimula icisimulesimule umu miseo.
Yakasimula monsi monsi umu misolo.
Yakaaka wa nkozyo nu kumyantula wa nkuwa.
5 Alaama akalamba ya yasilika.
Yalapona lino yakupalama.
Yalasimwilila ukwi linga lyakwe;
Yaliika ica kucingilila ilinga.
6 Mpongolo zya nguzi zilayulwa,
Nupya isano lilawa.
7 Icipingulwa: Ninive watazewana,
Watasendwa, nupya aomvi yakwe akazyana yakulosya;
Yakuvwika wa nkunda lino yakuyuma pa visao.
8 Manda yakwe yonsi,
Ninive wali wa cifula ca manzi,
Nomba lyene aikazi yakupuuka.
Antu yamwi yakupunda yakuti: “Imililini! Imililini!”
Nomba kusi aakuweluluka.
9 Sendini siuva, sendini goldi!
Mwaya ivyuma ivingi sana.
Mwaya ivintu ivipusanepusane ivya mutengo.
10 Umu musumba musi nanti a cimwi, musi antu, wononwa!
Yali ni ntete sana, yakuzakaza pa mulandu ni ntete;
Yonsi yakuloleka ntete ntete.
11 Uzye umusumba uwali kwati u mukaikala ya cisama uli kwi?
Muno ya mwana cisama yaliilanga,
Muno cisama akafuma ala akutungulula ana yakwe, Ukwaula ukuti umwi ayatiinye.
12 Cisama akalemela ana yakwe inyama
Nu kulema ivyakuti ya cisama aakaci yalye.
Akazuuzya inyama muno akaikala,
Muno akaikala mwaya inyama zino walema.
13 Yeova wa maumba ya yasilika walanda ukuti:
“Nkwiza umu kukuzanza.
Ndoca maceleta yako aa nkondo,
Nupya ana yakwe ya cisama yalakomwa uku lupanga.
Ndakulesya ukupokolola impanga, Nupya mazwi ya nkombe zyako yatalatala yuvwike.”
3 Kalanda ku musumba umwaya inkomi!
Mwaya sana acenjezi ni vipondo.
Antu ayamo yasita ukuzanza!
2 Mwaya icongo ca mikota ni congo ca maceleta,
Icongo ca kusimula kwa mfwalasi na maceleta.
3 Mwaya icongo ca yantu aakwela pa mfwalasi, na ya panga akumyantula alino na masumo aakuyengesa,
Mwaya antu aingi sana akomwa, alino ni mitumba ya vitumbi
Kuli kuti ivitangapendwa.
Lyonsi antu yakapumika umu vitumbi.
4 Caya vivyo, pa mulandu ni vicitwa ivingi ivya uzelele wakwe,
Wene akalyombeleka, nupya wamanyikisya ivya maleele,
Akalema inko ukupitila umu uzelele wakwe nupya akalema indupwa umu vya maleele.
5 Yeova wa maumba ya yasilika walanda wati: “Lola! Ndakulwisya.*
Ndakuzuula;
Ndalenga inko zikutambile,
Na mawene yalalola ukuzewana kwako.
6 Nupya ndasumbila ivya winyi pali wewe
Nupya ndalenga uzewane;
Ndakulenga ukuya ica kutamba kuli yonsi.
7 Wensi aalakulola alutuka nu kulanda ati,
‘Ninive wataononwa!
Uzye a weni alamuvwila uluse?’
Nupya aekwi kuno nimamuzanila akumuteekezya?
8 Uzye ucizile umusumba wa No-amoni,* uwayela umu mbali ya luzi lwa Naelo?
Wene wazingulukwa na manzi;
Ucindami wakwe wali a yemba nupya yemba wacingiliile umusumba wa ciumba.
9 Impanga ya Etiopia ni ya Ijipti, i zyamutungililanga sana.
Aina Puti na Ina Libya yakwazwilizyanga.
10 Lelo wizile aya umuzya;
Waile umu uzya.
Na ana yakwe kwene yakomozilwe umu miseo yonsi.
Yapendozile pa yonsi yakwe aacindikwe,
Na onsi yakwe yonsi aamaka yanyefilwe na maceni.
11 Namwe kwene mulakoleka;
Mulaya mukafisame.
Nupya mulalonda ukucingililwa pa mulandu na alwani inu.
12 Amalinga inu yonsi yaya wa miti ya masamvu iyakwata ivizao vice ivya kutandikilako;
Nga yatenkanya imiti ya masamvu, masamvu yakapona nupya yakaliiwa.
13 Asilika yano waya nayo umu mpanga yako, yali wa yanaci.
Impongolo zya mu mpanga yako zilayulikila alwani yako.
Umoto uloca imifikilo ya pa mpongolo zyako.
14 Utape manzi yano ulaomvya lino alwani yalazinguluka umusumba!
Komya malinga yako.
Kanda indaka nu kutama injelwa.
15 Na kuko kwene umoto ulakoca.
Ulakomwa nu lupanga.
Vilakuzanza wakwe vino ya makanta anono yakacita.
Vyalanini nu kuvula wakwe ya makanta!
Ee, muvule wakwe ya makanta!
16 Aculuzi yako yavula ukucila intanda.
Makanta umunono akaisontola inkanda alino apapuka.
17 Alinzi yako yaya kwati a makanta,
Nupya akalamba ya yasilika yako yaya kwati iumba lyakwe ya makanta.
Yakaikala umu viumba vya mawe mu nsita ya mpepo,
Lelo nga kasanya kawala, yakapapuka;
Nupya kusi aakamanya kuno yali.
18 We mwene uwa ku Asilya, ya kacema yako iyakasula;
Antu yako aacindikwe iikala umu mang’anda yao.
Antu yako iyasalanganila umu myamba,
Nupya kusi uwa kuyakolonganika.
19 Kusi alakuteekezya lino intazi ilakwizila.
Ivilonda vyako vitalapola.
Nupya yonsi aluvwa pali wewe yalatoota;
Uzye a weni aatacula uku vicitwa vyako iviipe?”
Icikapiliula ukuti “Kateekezya.”
Kuli kuti Yuda.
Kuli kuti Asilya.
Kuli kuti umu kuzanza Ninive.
Kuli kuti ukulwisya Ninive.
Kuli kuti Tibesi.