HABAKUKI
1 Yaa ali mazwi yano kasesema Habakuki* wapokeliile umu cilolwa:
2 We Yeova, uzye ndatwalilila ukulenga uwazwilizyo kuli wewe ukufika lilaci, ukwaula ukuti uuvwe?
Ndatwalilila ukulenga ukuti utupusushe ukufika lilaci, lelo ukwaula ukuti ufumyepo unkalwe?
3 U mulandu ci uno ukalekela ukuti nalola kuno iviipe vikucitika?
U mulandu ci uno walekela ukuti antu yacuzya auze?
U mulandu ci uno walekela ukuti nalola uwononesi nu unkalwe?
Nupya u mulandu ci uno ukupaazyanya nu kulemanila vyavulila?
4 Masunde yaata ukuomba,
Nupya kusi uwaya nu mulinganya.
Pano aipe yavulisha ukucila alungame;
Ali mulandu uno kutayela umulinganya.
5 “Lolekesha umu nko nu kwikako mano!
Lolekesha ale watuzunguka nupya watupeziwa mano;
Pano icintu cimwi cilacitika umu manda yako
Cino ulafilwa ukuzumila nanti sile yakusimikila pa cintu cico.
6 Nimakatusha Aina Kalideya,
Kuli kuti uluko ulwaya nu unkalwe nupya ulukacita ivintu zuwa zuwa.
Yakapita umu ncende ikulu mu nsi
Pakuti yapoke mang’anda ya yantu.
7 Yakauvwisha intete nupya yakaofya.
Yakaipangila masunde nu kuipeela maka.
8 Mfwalasi zyao zikasimulisha ukucila inangu,
Yakalipisha ukucila imimbulu umu nsita ya usiku,
Imfwalasi zyao izya mu nkondo zikasimula ukuya inkoleelo;
Imfwalasi zyao zikafuma ukutali sana.
Yakazanza wakwe lyang’anda aakuya umu kulema icakuti alye.
9 Yonsi kwene yaya nu unkalwe.
Ndi cakuti yakatukila pamwi yaaya wa muza uwa ku ufumondaka,
Nupya yakasenda azya aingi wa mucanga.
10 Yakatumfya ya mwene
Nupya yakaseka intunguluzi izikalamba.
Yakaseka incende zyonsi izicingililwe;
Yakatuulika ivu nu kupoka imisumba.
11 Lyene yakaya inkoleelo wa muza nu kupita umu mpanga,
Lelo yalazanwa nu mulandu,
Pano yakati leza wao aakayapeela maka.”
12 We Yeova, uzye utaayako ukufuma umuyayaya?
We Leza wane Uwa Muzilo, usifwa.
We Yeova, wayasonsile kuti yafikilizye upinguzi wako;
We Ciliwe cane, wayasoolola kuti yatufulule.
13 Manso yako yasanguluka sana asi aangalola iviipe,
Nupya utanga uzumilizye iviipe ukutwalilila.
U mulandu ci lyene uno ukazumilizizya acenjezi
Nupya u mulandu ci uno ukasuulilako sile ndi cakuti umwipe onona umulungami ukumucila?
14 U mulandu ci uno ukalekela antu ukuya wa nswi zya muli yemba,
Wa nyama izikasela izitaakwata kateeka?
15 Yakalema* antu ukuomvya maswelo.
Yakayalemela umu mikwau yao,
Nupya yakayakolonganika umu masumbo yao.
Ali mulandu uno yakasansamukila sana.
16 Ali mulandu uno yakapeelela malambo uku mikwau yao
Nu kupeela malambo ya koca uku masumbo yao;
Vintu vivyo vyalenga ukuti yakwate ivyakulya ivisuma,
Nupya ivya mulyo.
17 Uzye lyene yalatwalilila ukufumya inswi umu mikwau yao?
Uzye yalatwalilila ukukoma antu ya mu nko ukwaula ukuya ni cikuuku?
2 Ndatwalilila ukwimilila pa cifulo cane ica kulindilapo,
Nupya ndatwalilila ukwimilila pa ciumba ca musumba.
Ndatwalilila ukuloleela pakuti nkalole vino alalanda ukupitila muli nene
Na vino ndasuka lino alankalipila.
2 Lyene Yeova wangaswike ati:
“Lemba icilolwa, nupya ucilembe ningo pa mawe,
Pakuti wino alaabelenga umwi zwi lyuvwike atakacule.
3 Pano ivili umu cilolwa vilacitika pa nsita iyasoololwa,
Vyasha vicitike nupya i vya cumi.
Nanti cakuti vyalengela utwalilile ukuloleela!
Pano ukucitika kwene vilacitika.
Nupya vitalacelwa.
4 Lola umuntu wa cilumba;
Asi mulungami.
Lelo umulungami alaya nu umi pa mulandu ni cisinka.*
5 Kwaula nu kutwisika waini akalenga umuntu ukucita ivya uwelewele,
Aali mulandu uno umuntu wa cilumba asicitila vino akulonda.
Vino akalondesha vyakula wi lindi;
Waya wa mfwa nupya asiikuta.
Akatwalilila ukukolonganika inko zyonsi
Nu kuikolonganikila antu yonsi.
6 Uzye yaa yonsi yatalalanda mapinda ni milumbe pali aliwe?
Yalati:
‘Kalanda uku muntu aakapoka ivyuma ivisi vyakwe
Nupya aakatwalilila ukukwatilako inkongole!
Uzye alatwalilila ukucita vivyo ukufika lilaci?
7 Uzye aakukongwesha yatalakukatukila ukwaula ukwenekela?
Yalazyuka nu kukusunkanya umu unkalwe,
Nupya yalakupokolola ivintu.
8 Pa mulandu wakuti wapokolwile ivintu uku nko izingi,
Antu yonsi aashala yalakupokolola ivintu,
Pa mulandu wakuti wakomanga antu
Nupya wali nu unkalwe uku nsi,
Ku misumba nu ku yantu aakaikalamo.
9 Kalanda uku muntu aakacita iviipe pakuti akwate ivintu umu ng’anda yakwe,
Pakuti aike icinsanzo cakwe papela
Kuti autuke intazi!
10 Mapange yako yaleta umuzewanya pa ya mu ng’anda yako.
Vino ukakoma antu aingi ukayembuka.
11 Iwe lilapunda ukufuma uku ciumba,
Nu lumbao lulalyasuka ukufuma api paala.
12 Kalanda kuli wino akakuula umusumba kupitila umu kukoma antu
Na aakapanga umuzi pa mulandu nu kucita iviipe!
13 Uzye asi a Yeova wa maumba aakalenga antu ukuombesha pa vintu ivikaiza vikupya umu moto,
Nupya aakalenga inko ukutonta pa vintu vya sile sile?
14 Umu nsi mulazuula ukumanya ululumbi lwakwe Yeova
Wakwe vino manzi yazuula muli yemba.
15 Kalanda kuli wino akapeela auze ivyakumwa,
Aikamo nu ukali ni cipyu kuti yakoleke,
Pakuti ayatambile!
16 Ulavimbilwa umusaalula ukucila ucindami.
Naawe kwene mwa pakuti ukukanazembululwa kwako kuloleke.*
Kapu wa kwi kasa li lunji lyakwe Yeova aliza umupiipi naawe,
Nu muzewanya ulafumyapo ucindami wako;
17 Yalakonona wakwe vino ononyile Lebanoni,
Nupya wakwe vino walenzile inyama ukuya ni ntete nu kuzikoma avino naawe yalakukoma,
Pa mulandu wakuti wakomanga antu
Nupya wali nu unkalwe uku nsi,
Ku misumba nu ku yantu aakaikalamo.
18 Uzye icilubi cino antu yapanga
Cingazwa uli umuntu?
Uzye ivilubi vya cela na ya kasambilizya ya ufi vingazwa uli umuntu?
Aakapanga ivintu vivyo yavitaila,
Lelo ya leza yano yakapanga aa sile sile, yasivwanga.
19 Kalanda kuli wino akanena icimuti ati: “Zyuka!”
Nanti ukwi iwe ilisilanda ati: “Zyuka! Tusambilizye”
Ikako goldi na siuva,
Nupya mutaya umupu.
20 Lelo Yeova ali umwi tempele lyakwe ilya muzilo.
Ikalini mya mwe ya mu nsi mwensi!’”
3 Lii aali pepo lino kasesema Habakuki wapefile umu nyimbo zya ulanda, watile:
2 We Yeova nuvwa ilyasi pali wewe.
We Yeova nkuzunguka pa vintu vino wacita.
Mu myaka itu* ucite ivintu vya maka nupya kwene
Nupya uleke vimanyikwe.
Si uwiushe ukuya nu uluse mu nsita ya cimvulunganya.
3 Leza wafumile uku Temani,
Uwa muzilo wafumile uku Mwamba wa Palani. (Selah)*
Maka yakwe yavimbilikizye mayulu;
Insi yonsi yamulumbanyanga.
4 Kuyengesa kwakwe kwali wa luswepo.
Myengelele iili yafumanga ukwi kasa lyakwe,
Ukwafisime maka yakwe.
5 Icikuko camukoleelile,
Nu ulwale wa kukaya wamukonsile pa cisila.
6 Wimilile nu kusunkanya insi.
Lino walolekishe inko walenzile ukuti zizakaze.
Myamba iyayako ukufuma mpiti yavungozilwe,
Nu tumyamba twa mpiti twaponyile.
Inzila izyayako ukufuma mpiti i zyakwe.
7 Naweni intazi umu matenti ya ku Kushani.
Matenti ya mu mpanga ya Ina Midyani yazakize.
8 We Yeova uzye inguzi azino wasokiile,
Uzye inguzi izyalenzile kuti usoke?
Nanti uzye wasokiile yemba?
Pano wakwezile pa mfwalasi zyako;
Maceleta yako aankondo yacimvizye.
9 Watutola ulapwa wako nupya watuipekanya ukulasa.
Ivyanzo ivipekanyiziwa pa mulandu nu mulapo. (Selah)
Ukapatukanya insi ukuomvya inguzi.
10 Imyamba yasunkanyile lino yakuweni.
Imvula iingi yatoonyizye.
Manzi azike yapanzile icongo.
Nupya manzi yakatwike umupela.
11 Ilanzi nu mwezi vitawazile.
Inceto zyako zyafumile wa luswepo.
Isumo lyako lyayengesanga wa kumyantula kwa nkuwa.
12 Wapisile umu nsi ala uli nu ukali.
Walyatozile inko ala watusoka.
13 Waile umu kupususha antu yako, wapuswishe umusoololwe wako.
Washunozile intunguluzi ya mu ng’anda ya mwipe.
Yononyilwe ukufuma pi paala ukufika pa mufula. (Selah)
14 Watosile imitwe ya yasilika yakwe ukuomvya ivyanzo vyakwe
Lino izile wa cimuza umu kunsalanganya.
Yasansamwike sana lino yafisime pakuti yakome umuntu uwaculanga.
15 Wakwezile pa mfwalasi zyako nu kupita pali yemba,
Pa manzi aakweti maimbi aakalamba.
16 Nuvwile nupya nazakize;
Milomo yane yazakize pa mulandu na vino nuvwile.
Maka yasizile umu mafupa;
Makulu yane yazakazanga.
Lelo ndatwalilila ukuloleela uwanda wa ucuzi ala inteeka umwenzo,
Pano uliza pa yantu aakatuzanza.
17 Nanti cakuti umusamvu utawalwile,
Nu mwangazi wakana ukuseeka ivizao;
Nanti cakuti umuolivi wakana ukuseeka ivizao,
Nu mu vyalo mwakana ukuya ivyakulya;
Nanti cakuti imfwele ni mbuzi zyasila umu citata
Ni ng’ombe zyasila umu luwa;
18 Nemo ndaazangila muli Yeova;
Ndaasansamukila muli Leza kapususha wane.
19 Yeova Umwene wa Papelapela aali maka yane;
Alalenga ingazo zyane ziye wakwe zyakwe mpombo
Nu kulenga kuti nimilile patumpuke.
Ku mukalamba wakwe ya kiimba; ukuomvya ivilimba vyane ivya nsale.
Limwi likapiliula ukuti “Ukukumbatila Sana.”
Kuli kuti alwani Aina Kalideya.
Nanti limwi, “utailo; cizumilo.”
Nanti limwi, “nupya uwapempezyoka.”
Nanti limwi, “umu nsita itu.”
Lolini Ulondolozi wa Mazwi.