ZEFANIYA
1 Yaa ali mazwi yano Yeova wanenyile Zefaniya mwana Kushi mwana Gedaliya mwana Amaliya mwana Hezekiya umu manda yakwe Yosiya mwana Amoni umwene uwa ku Yuda:
2 Yeova walanda wati, “Ndalovya ivintu vyonsi umu nsi.”
3 Yeova walanda wati: “Ndalovya antu ni nyama.
Ndalovya ivyunyi vya mu lwelele ni nswi zya muli yemba,
Ndafumyapo ivikalenga antu ukuluvyanya* kumwi na antu aipe;
Nupya ndalovya antu umu nsi.”
4 “Ndakonzolwela ikasa pali Yuda
Na pali yonsi aakaikala umu Yelusalemu,
Nupya ndalovya vyonsi ivyashalako vyakwe Baali ivyaya umu ncende yii,
Nu kulovya izina lyakwe ya simapepo yakwe leza wa ku mpanga yuze pamwi na ya simapepo yauze.
5 Na aakafukamila ilanzi, umwezi ni ntanda pa mapaala,
Na aakafukamila Yeova kwati yaya ni cisinka kuli aliwe
Lelo ale yali ni cisinka kuli Malikamu;
6 Na aakata ukulondela Yeova
Kumwi na aakata ukulonda Yeova nanti ukumuleenga ukuti ayapandeko mano.”
7 Muye mya pa nkoleelo yakwe Yeova Umwene wa Papelapela pano uwanda wakwe Yeova iupalama.
Yeova watapekanya ilambo watasangulula antu yano wama.
8 “Pa wanda wi lambo lyakwe Yeova ndapingula ya cilolo,
Ana ya mwene, na yonsi aakazwala wa yantu ya ku mpanga zyuze.
9 Pa wanda uuwa ndapingula yonsi aakakwela pa pulatifomu*
Aakazuzya unkalwe nu ucenjezi mu ng’anda ya musambazi wao.”
10 Yeova walanda wati, “Pa wanda uuwa,
Kulaya ukulila ukufuma uku Mpongolo ya Nswi,
Kulila kuluvwika mu Citungu Cakwe Ciili ica musumba,
Ni congo icikalamba ukufuma uku tumyamba.
12 Pa nsita iya ndaceeceta sana umu Yelusalemu ala inkozya ya lampi,
Nupya ndapingula aasisakamikwa icili consi, aakaelenganya iyati,
‘Yeova atalacita icisuma nupya atalacita iciipe.’
13 Ivyuma vyao vilapokololwa na mang’anda yao yalononwa.
Yalakuula mang’anda lelo yatalikalamo;
Nupya yalalima ivyalo vya myangazi lelo yatalamwa waini aalafumamo.
14 Uwanda ukalamba wakwe Yeova uli umupiipi!
Iupalama nupya ukwiza zuwa sana!
Uwanda wakwe Yeova ulaya uwa koofya.
Asilika yalapunda.
15 Uwanda uwo ulaya u wanda wa ukali,
Uwanda wa ntazi nu kucululuka,
Uwanda wa cimuza nu wononesi,
Uwanda wa mfinzi na kaanda,
Uwanda wa makumbi na makumbi aafitishe,
16 Ulaya u wanda wa kulila kwi penga nu kupunda kwa mu ulwi,
Uliza pa misumba iicingililwe na pa mpungu izitali izya mu makoona.
17 Ndaleta intazi pa yantu,
Nupya yalaapita wa mpafu,
Pano yayembukila Yeova.
Uwazi wao ulitilwa wa lukungu,
Ni minyefu yao* ilaya wa mavi ya nyama.
18 Nanti a siuva wao na goldi vitalayapususha umu wanda wa ukali wakwe Yeova;
Ukali wakwe uwaya wa moto uloca insi yonsi,
Pano alonona iciipishe antu yonsi umu nsi.”
2 Kolonganini, kolonganini pamwi,
Mwe nko mwemuno musiuvwa insonyi.
2 Lino ivyapingulwa vitatala vyacitika,
Lino uwanda utatala wapita wakwe vino ivipumbu vikauluka,
Lino ukali wakwe Yeova utatala wiza pali mwemwe,
Lino uwanda wa ukali wakwe Yeova utatala wiza pali mwemwe,
3 Londini Yeova mwe yantu mwensi aafuuke amu nsi,
Mwemuno mukakonka masunde yakwe aalungame.
Londini ulungami, londini ufuuke.
Limwi mulacingililwa pa wanda wa ukali wakwe Yeova.
4 Musumba wa Gaza ulalekeleziwa;
Nu musumba wa Ashikeloni ulononwa.
Antu ya mu Ashidodi yalazingwa umu musumba umu nsita ya kasanya,
Na Ekiloni alipulwa.
5 “Kalanda kuli mwemuno mwikala umu nkumba yakwe yemba mwe Ina Keleti!
Yeova watalanda pa vilamucitikila.
We Kenani impanga ya Ina Filisti ndakonona,
Icakuti kutalaya ali wensi aakaikala muli wewe aalashala.
6 Nupya inkumba ilaya i ncende ya mulemvwe,
Mulaya ivisima vyakwe ya kacema ni vitata vya mfwele ivyakuulilwa na mawe.
7 Cilaya i citungu cakwe yano yashalapo amu ng’anda yakwe Yuda;
Kuuku kwene akuno yalaaliila.
Mu mang’anda ya Ina Ashikeloni amuno yalalaala nga kwafita.
Pano Yeova Leza wao Alaayasakamala,
Nupya alawezya aasendwa umu uzya.”
8 “Nuvwa imiponto ya Ina Moabu ni ntusi zya Ina Amoni,
Aakatumfya antu yane nu kuyuvwa pali vino yalayapoka impanga.”
9 Yeova wa maumba, Leza wakwe Izlaeli walanda wati: “Nkulapa,
Moabu alaya wakwe Sodoma,
Na Amoni alaya wakwe Gomola,
Zilaya i ncende zya myunga, mulaya iviwina vya musilya nupya mutalaya icili consi.
Ashalapo umu yantu yane yalapoka ivintu vyao,
Nupya ashalapo umu luko lwane yalapoka impanga yao.
10 Vikwene i vilayacitikila pa mulandu ni cilumba cao,
Pano yatumfyanga antu yakwe Yeova wa maumba nu kuyuvwa pali aliyo.
11 Yeova alaya uwa koofya kuli aliyo;
Pano alonona ya leza yonsi amu nsi,
Inko zyonsi izyaya umu vilila zilamufukamila,
Cila luko pa ncende ino lwayapo.
12 Namwe kwene mwe Ina Etiopia mulakomwa uku lupanga lwane.
13 Alakonzolwela ikasa lyakwe uku katutu nu konona Asilya,
Nupya alalenga Ninive ukushala umwaula icili consi wa lwanga.
14 Inyama zilalaala muli aliwe, kuli kuti inyama izya mu mpanga izya misango yonsi.
Mukanga ni cinunji vilalaala muli vimwi ivyaya wa ntendo ivya pa vipilala.
Izwi liluvwika pi windo.
Pa mulyango palononeka;
Pano alalenga imbao zya mikedali izyaya uku viumba zishale paswe.
15 Uu aali musumba wa cilumba uwali ucingililwe,
Uwelenganyanga ukuti, ‘Anene sile kutaya muze.’
Lyene iuya umusumba wa kusekwa,
Muno inyama zya mu mpanga zikalaala!
Yonsi aakupita umupiipi yalazunguka nu kuzulunzya ikofi.”
3 Kalanda uku musumba wa ucipondoka, ukowele nupya uukacuzya aakaikalamo!
2 Usiuvwila izwi; usipokelela ukusalapula.
Utaataila Yeova; utaapalama kuli Leza.
3 Ya cilolo aayamo yaaya wakwe ya cisama aakung’anza;
Ya kapingula yaaya wa mimbulu mu nsita ya usiku;
Yasisha nanti sile ifupa lya kukokota katondo.
4 Ya kasesema aayamo yaaya ni cilumba nu ucenjezi.
Ya simapepo yakakowezya ivya muzilo;
Yakatama masunde.
5 Yeova waya umulungame nupya akaikala umu musumba uwo; asicita iviipe.
Cila katondo akamanyisha upinguzi wakwe.
Wakwe viivi kwene vino ilanzi likatunka cila wanda.
Lelo aasi yalungame yasiuvwa insonyi.
6 “Nononyile inko; mu mpungu zyao izya mu makoona mutasiile icili consi.
Nononyile imiseo yao icakuti kutaali nu wa kupitamo.
Misumba yao yononike, icakuti kutasiile muntu uwa kwikalamo.
7 Natiile, ‘Icumi kwene ulangopa nu kupokelela ukusalapula,’
Pakuti Yelusalemu ataca aononwe
Ndinzile ukupingula umusumba pa vintu vii vyonsi.
Lelo yonsi kwene yalondeshanga ukucita ivikowele.
8 Yeova walanda wati, ‘Fwandi twalililini ukundoleela,
Kufikila uwanda uno ndakatuka nu kupokolola ivintu,*
Pano impingula ukukolonganika inko na mawene,
Pakuti ndete ukali pa nko ni cipyu cane consi;
Pano ukali wane uwaya wa moto uloca insi yonsi.
9 Lyene ndasenula ululimi lwa yantu kuti luye ulusanguluke
Pakuti yonsi yace yaama api zina lyakwe Yeova,
Nu kumuombela pamwi.’*
10 Ukufuma uku ncende izyaya uku nguzi zya ku Etiopia,
Antu yane aasalangana aakupaapata kuli nene, yalandetela ivya upe.
11 Pa wanda uuwa utaluvwa insonyi
Pa mulandu ni vicitwa vyako vyonsi ivyalenzile umpondokele,
Pano ndafumya antu acilumba aakayuvwa muli wewe;
Utalatala uyepo ni cilumba nupya umu mwamba wane uwa muzilo.
12 Ndalenga aicefye na afuuke ukushala muli wewe,
Nupya yalaafisama muli Yeova.
13 Aalashalapo muli Izlaeli yatalaacita iviipe;
Yatalaalanda ivya ufi nanti ivya ucenjezi;
Yalaalya nu kulaala nupya kusi alayalenga ukuya ni ntete.”
14 Pundini nu luzango mwe yantu ya mu Zioni! Punda ukupunda kwa kucimvya we Izlaeli!
Sansamukini nu kuzanga ni myenzo inu yonsi mwe yantu ya mu Yelusalemu!
15 Yeova watafumya upinguzi pali wewe.
Watazinga alwani yako.
Yeova Umwene wa mu Izlaeli ali muli wewe.
Utaluvwapo intete nupya pa mulandu ni ntazi.
16 Pa wanda uuwa, Yelusalemu aluvwa mazwi yakuti:
“Utuvwa intete we Zioni.
Utaleka makasa yako yatoovoke.
17 Yeova Leza wako ali muli wewe.
Vino u wa maka alakupususha.
Alaya sana nu luzango pali wewe.
Alikala mya pa mulandu wakuti wakutemwa.
Alasansamuka sana pali wewe nu kupunda nu luzango.
18 Ndakolonganika aali nu ulanda pa mulandu wakuti yataazanyilwe uku mitebeto yako;
Yataazanyilweko pa mulandu wakuti yayazewanyizye ku mpanga yuze.
19 Lola! Pa nsita iiya ndafulula yonsi aakakucuzya;
Ndapususha aakusinta
Nu kukolonganika aasalangana.
Ndayalenga ukulumbanyiziwa nu kumanyikwa
Mu mpanga yonsi muno yayazewanyizye.
20 Pa nsita iiya ndamuwezya,
Nupya ndamukolonganika.
Pano ndamulenga ukumanyikwa nu kulumbanyiziwa mu yantu yonsi aamu nsi,
Lino ndakolonganika antu inu aasenzilwe umu uzya ala mukulola nako,” avino Yeova walanda.
Vingalozya kuli vyonsi ivikaomviwa uku kupepa kwa ufi.
Nanti limwi, “pa pulatifomu ya cilimba ca wene.”
Ifwile i ncende iya mu Yelusalemu umupiipi ni Mpongolo ya Nswi.
Mu Ciebele: “Mala.”
Nanti limwi, “ndakatuka nu kuya kambone.”
Nanti “yaye alemane lino ya kumupepa.”