HAGAI

1 Mu mwaka wakwe ciili uwa kuteeka kwa Mwene Dalyusi, pa wanda wa kutandikilako mu mwezi uwalenga 6, Yeova wanenyile Zelubabeli umulasi wa ya Yuda umwana wakwe Sheatieli na Yoswa simapepo mukalamba umwana wakwe Yeozadaki ukupitila muli kasesema Hagai* ukuti:

2 “Vii avino Yeova wa maumba walanda, ‘Antu yaa yakati: “Insita ya kukuula* ing’anda* yakwe Yeova itatala yafika.”’”

3 Nupya kwene Yeova walanzile ukupitila muli kasesema Hagai ukuti: 4 “Uzye yii insita yakuti mwaikala umu mang’anda inu ayemviwa ni mbao izisuma lino ing’anda yii yononeka? 5 Lyene vii avino Yeova wa maumba walanda, ‘Mwelenganyepo sana pali vino mukucita. 6 Mukakomela imbezu izingi lelo mukazombola utunono. Mukalya lelo musiikuta, mukamwa nomba ulusala lusisila. Mukazwala nomba musiuvwa ukukaya. Aakaombela malipilo yakaika umu kacola katuluke.’”

7 “Yeova wa maumba walanda wati, ‘Mwelenganyepo sana pali vino mukucita.’

8 “‘Yangini uku myamba mukasende imbao. Nupya mukuule ing’anda pakuti nasansamukilamo nu kulumbanyiziwa,’ avino Yeova walanda.”

9 “Yeova wa maumba walanda wati: ‘Mwenekelanga ivingi lelo mwapokeliile ivinono; nupya lino mwavileesile umu ng’anda nalesile ukuti vyononeke. U mulandu ci uno nacitiile vivyo? A pa mulandu wakuti ing’anda yane yononeka lino mwemo cila muntu mukapitaana pakuti sile muzifye mang’anda inu. 10 Ali mulandu uno mayulu yalenzile kutaya ulumi, ni insi itamezizye ivimelwa. 11 Natwalilile ukulenga kuti kuye icilala umu nsi na pa myamba, nupya calenzile kutaya ivyakulya, waini umupya, mafuta ni vimelwa, mwe yantu kumwi ni viteekwa mukucula nupya ukuombesha kwinu konsi u kwa sile sile.’”

12 Zelubabeli mwana Sheatieli, Yoswa simapepo mukalamba mwana Yeozadaki, na antu yonsi aashala yuvwile vino Yeova Leza wao walanzile na mazwi yakwe kasesema Hagai, pa mulandu wakuti Yeova Leza wao u wamutumile; nupya antu yatandike ukoopa Yeova.

13 Lyene Hagai wino Yeova watumile, wanenyile antu ukulingana na vino Yeova wamunenyile, watiile: “‘Indi namwe,’ avino Yeova walanda.”

14 Fwandi Yeova wakomelizye Zelubabeli umulasi wa ya Yuda mwana Sheatieli, na Yoswa simapepo mukalamba mwana Yeozadaki na antu yonsi aashala nupya yaile iyatandika ukukuula ing’anda yakwe Yeova wa maumba, Leza wao. 15 Yatandike ukukuula pa wanda uwalenga 24, mu mwezi walenga 6 mu mwaka wakwe ciili wa kuteeka kwa Mwene Dalyusi.

2 Pa wanda uwalenga 21 mu mwezi walenga 7, Yeova wanenyile kasesema Hagai ati, 2 “Nena Zelubabeli mwana Sheatieli mulasi wa ya Yuda, na Yoswa simapepo mukalamba mwana Yeozadaki, na antu yonsi aashala uti: 3 ‘Uzye a weni pali mwemwe aakwiusha vino ing’anda yii yalolekanga ningo pa kutandika? Uzye lyene ikuloleka uli? Uzye vino ikuloleka avino yaali?’

4 “Yeova walanda wati, ‘Lelo Zelubabeli komeleka nawe kwene Yoswa simapepo mukalamba mwana Yeozadaki komeleka.’

“‘Na mwe yantu ya mu mpanga mwensi komelekini nu kuomba umulimo,’ avino Yeova walanda.

“‘Pano indi namwe’ avino Yeova wa maumba walanda. 5 ‘Iushini vino namulavile lino namufumizye umu Ijipti, nupya ncili nkamutungulula uku maka yane. Mutuvwa intete.’”

6 “Pano Yeova wa maumba walanda wati, ‘Kwashala sile panono nupya kwene ndasunkaanya mayulu, insi, yemba nu mulundu.’

7 “‘Nupya ndasunkaanya inko zyonsi ni vintu vya mutengo ivyaya umu nko zyonsi viliza umu ng’anda kwene yii nupya ndazuuzyamo ululumbi,’ avino Yeova wa maumba walanda.

8 “Yeova wa maumba walanda wati, ‘Siuva u wane na goldi kwene u wane.’

9 “Yeova wa maumba walanda wati, ‘Lulumbi lwa ng’anda yii lulacila ululumbi lwa ng’anda iyatandikilepo,’

“‘Nupya ndaleta umutende pa ncende yii,’ avino Yeova wa maumba walanda.”

10 Pa wanda uwalenga 24, mu mwezi walenga 9 mu mwaka wakwe ciili uwa kuteeka kwakwe Dalyusi, Yeova walanzile ukupitila muli kasesema Hagai ati: 11 “Yeova wa maumba walanda wati, ‘Si uzya ya simapepo pa masunde uti: 12 “Ndi cakuti muntu wafundila inyama umu cakuzwala cakwe ica muzilo, nupya icakuzwala cico cakumya uku mukate nanti uku musunyi, nanti kuli waini nanti uku mafuta nanti uku cakulya icili consi, uzye ala icintu cico cimaya ica muzilo?”’”

Ya simapepo yaswike iyati: “Awe!”

13 Lyene Hagai uzizye ati: “Ndi cakuti umwi watakowela pa mulandu nu kulema uku citumbi walema icili consi pali vii, uzye cingaya icikowele?”

Ya simapepo yaswike iyati: “Ee cingaya icikowele.”

14 Fwandi Hagai walanzile ati: “Yeova walanda wati, ‘Vikwene avino antu yaa yaaya, nupya aali vino nkalola uluko luu, nupya vikwene aali vino vyonsi vino yakacita vyaya; vyonsi vino yakapeela vyaya ivikowele.’

15 “‘Acino ukufuma ilelo ukuya inkoleelo mwaelenganya pa cintu cii: Uzye ivintu vyali uli lino iwe litatala likwa pi iwe lyuze umwi tempele lyakwe Yeova? 16 Lino umuntu umwi waile pa mutumba wa ngaano wenekelanga ukuzombola masaaka 20, lelo wazombwile aali 10; nupya lino umwi waile pano yakafenela waini wenekelanga ukuzuuzya insembo 50 lelo wazuuzizye sile 20; 17 Namufulwile ukupitila umu konona ivilimwa vinu vyonsi uku cikaye, imvula ya mawe nu kuleka ivilimwa vinu vyume, lelo kusi aali wensi pali mwemwe uwawezile kuli nene,’ avino Yeova walanda.

18 “‘Ilelo, pa wanda uwalenga 24, mu mwezi walenga 9 mufula wi tempele lyakwe Yeova iupangwa; kufuma ilelo nu kuya inkoleelo mwaelenganya pa cintu cii: 19 Uzye umu nkoma mucili imbezu? Uzye umwangazi, musamvu, mupomegilaneti, nu muti wa miolivi vyaseeka? Kufuma ilelo nakulamupaala.’”

20 Nupya kwene Yeova wanenyile Hagai umuku wakwe ciili pa wanda walenga 24 mu mwezi ati: 21 “Nena Zelubabeli, mulasi waya Yuda uti, ‘Ndasunkanya mayulu ni nsi. 22 Ndonona ivilimba vya wene nu kumala maka ya mawene ya mu nko; ndonona maceleta na aakakwelapo, mfwalasi zyonsi zilafwa, na aakakwelapo yalakomana uku lupanga.’”

23 “Yeova wa maumba walanda wati: ‘We muomvi wane Zelubabeli mwana Sheatieli,’ avino Yeova walanda, ‘mu wanda uuwa ndakutoola nu ku kulenga uye wa mbalaminwe ya kufwatikilako, cilaya vivyo pa mulandu wakuti wewe nasoolola,’ avino Yeova wa maumba walanda.”