ZEKALIYA

1 Mu mwaka wakwe ciili uwa kuteeka kwakwe Dalyusi, umu mwezi uwalenga 8, Yeova wanenyile kasesema Zekaliya* mwana Belekiya mwana Ido ati: 2 “Yeova wasokiile sana ivikolwe vinu.

3 “Yeova wa maumba walanda wati, ‘Unene antu uti: “Welini kuli nene,” avino Yeova wa maumba walanda, “nani namawela kuli mwemwe,” avino Yeova wa maumba walanda.’”

4 “‘Mutaya wa vikolwe vinu vino ya kasesema aaliko mpiti yanenyile iyati: “Vii avino Yeova wa maumba walanda, ‘Senulini imiyele inu iipe nu kuta ukucita ivintu iviipe vino mukacita.’”’

“‘Lelo yataakutike nupya yatisile mano kuli nene,’ avino Yeova walanda.

5 “‘Uzye ivikolwe vinu vili kwi ndakai? Uzye ya kasesema yatwalilila ukuya nu umi? 6 Uzye ivikolwe vinu vitaaweni kuno mazwi yane na masunde yane yano nanenyile aomvi yane ya kasesema yakufikiliziwa?’ Fwandi ivikolwe vinu vyawezile kuli nene nu kulanda iviti: ‘Yeova wa maumba watatufulula ukulingana ni miyele itu ni vicitwa vitu, wakwe vino walanzile ukuti avino alacita.’”

7 Pa wanda uwalenga 24 umu mwezi uwalenga 11, kuli kuti umu mwezi uwa Shebati,* umu mwaka wakwe ciili uwa kuteeka kwakwe Dalyusi, Yeova wanenyile kasesema Zekaliya mwana Belekiya mwana Ido ati: 8 “Naweni icilolwa usiku. Kwali umonsi uwakwezile pa mfwalasi iyenzu, nupya imfwalasi iiyo imilile umu miti iya malito iyaleliile umu mukonko; nupya ukwi tundu lyakwe kwali imfwalasi zyuze iziyenzu, ziyenzulukile ni zitiswe.”

9 Fwandi nuzizye inti: “Aaweni yaa mwene?”

Malaika uwalandanga nani waswike ati: “Namakusokolwela pa yantu yaa.”

10 Lyene umonsi uwimilile umu miti iya malito walanzile ati: “Yaa ali yano Yeova watatuma ukupitana umu nsi.” 11 Nupya yanenyile malaika wakwe Yeova uwimilile umu miti iya malito iyati: “Iitupitana umu nsi yonsi, iituzana muli mya nupya musi icimvulunganya.”

12 Fwandi malaika wakwe Yeova watiile: “We Yeova wa maumba, ulatwalilila ukukanaya nu luse ukufika lilaci uku yantu ya mu Yelusalemu na amu misumba iya Yuda yano wasokela pa myaka yii 70?”

13 Yeova waswike malaika uwalandanga nani umu cikuuku na mazwi ya kuteekezya. 14 Lyene malaika uwalandanga nani wanenyile ati: “Punda uti, ‘Yeova wa maumba walanda wati: “Nkulondesha ukucingilila Yelusalemu na Zioni. 15 Insokela sana inko izikalola ukuti zyacingililwa, pano nazisokiile panono lelo zyatwalilile ukucitilako iviipe.”’

16 “Fwandi Yeova walanda wati: ‘“Ndaswilila kuli Yelusalemu nu kumuvwila uluse, nupya ing’anda yane ilakuulwa muli aliwe,” avino Yeova wa maumba walanda, “ni ntambo ya kupimilako ilakonzololwa pali Yelusalemu.”’

17 “Punda nupya kwene uti, ‘Yeova wa maumba walanda wati: “Umu misumba yane mulazuula ivisuma ivilafuma kuli nene; Yeova alateekezya Zioni nupya, nu kusoolola Yelusalemu nupya kwene.”’”

18 Lyene natumpwile amanso nupya naweni impembe 4. 19 Fwandi nuzizye malaika uwalandanga nani inti: “I vyani vii?” Nawe waswike ati: “I mpembe izyasalanganya Yuda, Izlaeli, na Yelusalemu.”

20 Lyene Yeova wandanzile aonsi 4 aamanya ivya kupangapanga. 21 Nuzizye inti: “Yakwiza umu kucita cani?”

Nawe waswike ati: “Impembe zyasalanginye sana antu ya mu Yuda icakuti kutaali nu wa kukatusha umutwe. Antu yaa yaliza nu koofya impembe, yalakontola impembe zya mu nko izyalwisizye impanga ya Yuda nu kusalanganya antu aakaikalamo.”

2 Nupya kwene nalolekishe umupela nu kulola umonsi watalema intambo ya kupimilako. 2 Fwandi nuzizye inti: “Aekwi kuno ukuya?”

Nawe waswike ati: “Mu kupima Yelusalemu pakuti imanye vino watalimpa na vino wasalala.”

3 Lyene malaika uwalandanga nani wapisile nupya malaika muze wizile umu kumukomenkanya. 4 Lyene wamunenyile ati: “Simula ukanene umulumendo wiya uti, ‘“Yelusalemu alikalwamo wa musumba uutazingulukwa ni viumba pa mulandu na antu yonsi ni inyama ivyayamo.” 5 Yeova walanda wati: “Ndaya kuli aliwe iciumba ca moto ukuzinguluka umusumba onsi nupya umusumba onsi ulazuulamo ululumbi lwane.”’”

6 “Izini! Izini! Utukini ukufuma uku mpanga iya ku katutu,” avino Yeova walanda.

“Pano imusalanganyizizya uku miza 4 iya mwi yulu,” avino Yeova walanda.

7 “Iza we Zioni, utuka wemuno ukaikala nu mwana mukazyana wakwe Babiloni. 8 Pa cisila cakuti Yeova wa maumba wacindamikwa wantumile uku yantu ya mu nko aamupokanga ivintu nupya walanzile ati: ‘Wensi uwamulema ala walema imboni ya linso lyane. 9 Pano lyene ndazulunzya ikasa lyane pali aliyo, nupya aomvi yao yalayapoka ivintu vyao.’ Nupya mulamanya ukuti Yeova wa maumba u watantuma.”

10 Yeova walanda wati: “Punda nu luzango we mwana umwanaci wakwe Zioni; pano nkwiza nupya ndikala muli wewe.” 11 “Mu wanda uuwa inko izingi zilaya uku lusansa lwane, nupya zilaya izyane; ne Yeova ndikala muli wewe.” Nupya ulamanya ukuti Yeova wa maumba wantuma kuli wewe. 12 Yeova alalenga Yuda ukuya ica upyanyi cakwe pa ncende iya muzilo, lyene alasoolola Yelusalemu nupya kwene. 13 Mwe yantu mwensi ikalini mya pa nkoleelo yakwe Yeova pano akufuma uku ncende yakwe iya muzilo pakuti acitepo cimwi.

3 Nupya wandanzile simapepo mukalamba Yoswa ala wataimilila pa nkoleelo yakwe malaika wakwe Yeova, na Satana wimilile ukwi kasa lyakwe ili lunji pakuti amukaanye. 2 Lyene malaika wakwe Yeova wanenyile Satana ati: “Si Yeova akukalipile, we Satana, Yeova uwasoolola Yelusalemu akukalipile! Uzye umuntu wii asi icisonsololwa icafumiziwa pa moto?”

3 Walanga Yoswa watazwala ivyakuzwala ivifiite nupya wimilile pa nkoleelo yakwe malaika. 4 Malaika wanenyile auze aaimi pa nkoleelo yakwe ati, “Muzulini ivyakuzwala ivifiite.” Lyene wanenyile Yoswa ati, “Indenga imembu zyako ukusila, nupya umazwikwa ivyakuzwala ivisuma.”

5 Lyene nalanzile inti: “Muzwikini citambala iciswepe.” Nayo yamuzwisile icitambala iciswepe ni vyakuzwala; nupya malaika wakwe Yeova waimi umupiipi. 6 Malaika wakwe Yeova wanenyile Yoswa ati: 7 “Yeova wa maumba walanda wati, ‘Ndi cakuti umalondelanga masunde yane nu kulaomba imilimo ino wapeelwa, ulaapingula antu yane nu kusakamala ing’anda yane; nupya ndakuzumilizya ukulaiza kuli nene wakwe vino caya kuli yaa aimi paa.’

8 “‘Uvwa kuno Yoswa simapepo mukalamba, pamwi na mwemuno mukaikala pa nkoleelo yakwe, pano mwaya wa cimanyililo; ndaleta umuomvi wane aakaamwa ukuti Umusambo! 9 Lolini iwe lino nika pa nkoleelo yakwe Yoswa! Api iwe lilyo paya amanso 7; ndalembapo mazwi yane,’ avino Yeova wa maumba walanda, ‘nupya ndafumya umulandu wa yantu umu wanda sile onga.’

10 “Yeova wa maumba walanda wati, ‘Umu wanda uuwa cila muntu alaama umwinamupalamano wakwe umwisika lya mwangazi wakwe nu mwisika lya musamvu wakwe.’”

4 Malaika uwalandanga nani wawezile nu kunzyula wakwe vino umuntu akazyula aali umu tulo. 2 Lyene wanguzizye ati: “I vyani vino walola?”

Nani natiile: “Nalola ica kuteekapo lampi cakwe goldi cikweti ni mbale papela. Pali na ya lampi 7, nupya ya lampi yayo yakweti utumipaipi 7. 3 Nupya umupiipi ni ca kuteekapo lampi pali miti ya miolivi iili, onga uyelile ukwi lunji lya mbale nu uze kuli cimani.”

4 Lyene nuzizye malaika uwalandanga nani inti: “Mwene, uzye ivintu vii vikupiliula cani?” 5 Malaika uwalandanga nani wanguzizye ati: “Uzye utamanyile vino ivintu vii vikupiliula?”

Nani naswike inti: “Ee mwene.”

6 Lyene wanenyile ati: “Yaa ali mazwi yano Yeova wanenyile Zelubabeli: ‘“Asi uku yasilika nanti uku maka, lelo u ku mupasi wane,” avino Yeova wa maumba walanda. 7 We mwamba ukalamba, uzye wewe weni? Ulaya umusili ulingane pa nkoleelo yakwe Zelubabeli. Nupya alafumya iwe lyapapela yi tempele ale yakupunda yakuti: “Iyee iwe usuma! Iyee iwe usuma!”’”

8 Yeova wanenyile nupya kwene ati: 9 “Zelubabeli umwineco u watakuula umufula wa ng’anda yii nupya aliwe alaimalilila. Nupya mulamanya ukuti Yeova wa maumba u watantuma kuli mwemwe. 10 Pano a weni uwasuula uwanda uno ivintu ivinono vyatandike? Yalasansamuka nga yalola Zelubabeli watalema intambo ya kupimilako. Yaa* a manso yakwe Yeova aakulolekesha umu nsi yonsi.”

11 Lyene namuzizye inti: “Uzye imiti iili iya miolivi iili ukwi lunji na kuli cimani ya ca kuteekapo lampi ikupiliula cani?” 12 Nupya kwene namuzizye inti: “Uzye imisambo ya miti ya miolivi iili iikupongolola ivya manzi manzi ivikuloleka wakwe goldi ivikupita umu tumipaipi twili twakwe goldi ikupiliula cani?”

13 Fwandi wanguzizye ati: “Uzye utamanyile vino ivintu vii vikupiliula?”

Nani naswike inti: “Ee mwene.”

14 Watiile: “Vintu vii aasoololwe yaili atiimilila umupiipi nu Mwene uwa nsi yonsi.”

5 Nupya kwene nalolekishe umupela nu kulola ulupapulo ulupombwe lukupapuka. 2 Wanguzizye ati: “I vyani vino walola?”

Nani naswike inti: “Nalola ulupapulo ulupombwe lukupapuka, luli mamita 9 umu utali na mamita 9 umu wipi.”*

3 Lyene wanenyile ati: “Cii i citiipu icili umu nsi yonsi pano wensi aakaiya wakwe vino icilembwa uku mbali yonga iya lupapulo, ataafululwa; na wensi aakalapa umulapo wakwe vino icilembwa uku mbali yuze, ataafululwa. 4 ‘Iintuma icitiipu,’ avino Yeova wa maumba walanda, ‘nupya cilingila umu ng’anda ya mupuupu nu mu ng’anda yakwe wino akaalapa ivya ufi umwi zina lyane; cilikala umu mang’anda yayo nu kuyonona nu konona imbao na mawe ayamo.’”

5 Lyene malaika uwalandanga nani wizile pa nkoleelo yane nu kunena ati: “Lolekesha, ulole ivimafumamo.”

6 Fwandi namuzizye inti: “I cani cii?”

Watiile: “I ca kupimilako icikufuma.” Watwalilile ukulanda ati: “Vikwene aali vino antu aipe aaya umu nsi yonsi yakaloleka.” 7 Nupya naweni inkupiko izinguluke iyapangilwa nu mutovwe yakupulwa, nupya mu ca kupimilako mwali umwanaci ala wataikala. 8 Fwandi watiile: “Mwanaci wii akwimililako iviipe”. Lyene wamuswilizye umu ca kupimilako nupya pa cisila wakupikepo inkupiko ifine iyapangilwa nu mutovwe.

9 Lyene nalolekishe umupela nu kulola anaci yaili yakwiza, nupya yapapukanga umu muza. Yakweti maapa wa maapa ya nkowa. Nupya yakatwishe ica kupimilako nu kucitwala pakasi ka nsi ni yulu. 10 Nuzizye malaika uwalandanga nani inti: “Aekwi kuno yakutwala ica kupimilako?”

11 Waswike ati: “Ku mpanga ya Shinali* mu kumukuulila ing’anda; nupya nga yamala, kuuku kwene akuno yalamwika pa ncende ino alinzile ukuyapo.”

6 Nupya kwene nalolekishe umupela, naweni maceleta 4 yakufuma pakasi ka myamba iili, nupya imyamba iyo yaali iyakwe koopa. 2 Celeta lya kutandikilapo lyakweti imfwalasi iziyenzu, ni celeta lyakwe ciili lyakweti imfwalasi zitifi. 3 Celeta lyakwe citatu lyakweti mfwalasi zitiswe, ni lyalenga 4 lyakweti imfwalasi zya mantonintoni ni zya maala maala.

4 Nuzizye malaika uwalandanga nani inti: “Mwene, uzye vikwimililako cani vii?”

5 Malaika waswike ati: “Yii i mipasi 4 iya mwi yulu iikufuma pa cisila ca kwimilila pa nkoleelo ya Mwene wa nsi yonsi. 6 Celeta ilikweti imfwalasi zitifi likuya uku mpanga iya ku katutu, ilikweti mfwalasi zitiswe likuya uku mpanga iyayela ukupuzya pali yemba; ni likweti imfwalasi zya mantonintoni likuya uku mpanga ya ku kaeya. 7 Nupya imfwalasi zya maala maala zikulondesha ukupitaana umu nsi.” Lyene wazinenyile ati: “Yangini mukapitaane umu nsi.” Nazyo zyatandike ukupitaana umu nsi.

8 Lyene wampundilile ati: “Lola, izikuya uku mpanga ya ku katutu izilenga umupasi wakwe Yeova ukupuuza umu mpanga iya ku katutu.”

7 Pa wanda uwalenga 4 umu mwezi uwalenga 9, kuli kuti umwezi wa Kisilevu* mu mwaka uwalenga 4 uwa kuteeka kwa mwene Dalyusi, Zekaliya wapokelile mazwi ukufuma kuli Yeova. 2 Antu ya ku Betele yatumile Shaleza na Legemu-meleki na aonsi yakwe kuti yakapaapate kuli Yeova pakuti ayuvwile uluse, 3 nu kunena ya simapepo ya mu ng’anda yakwe Yeova wa maumba naya kasesema ukuti: “Uzye ndinzile ukuloosha umu mwezi uwalenga 5 nu kukanalya wakwe vino nkacita pa myaka iingi?”

4 Yeova wa maumba wanenyile nupya kwene ati: 5 “Nena antu yonsi amu mpanga na ya simapepo uti, ‘Lino mwafunganga nu kuloosha umu mwezi uwalenga 5 nu mu mwezi uwalenga 7 pa myaka 70, uzye mwafunganga pa mulandu wane? 6 Nupya lino mwa lyanga nu kumwa, uzye mutacitanga vivyo pa mulandu winu? 7 Uzye mutalinzile ukuvwila amazwi yano Yeova walanzile ukupitila muli ya kasesema aaliko mpiti, lino Yelusalemu ni misumba iyamuzinguluka mwali antu nupya ikalanga umu mutende, nupya lino umu Negebu nu mu Shefela mwali antu?’”

8 Nupya kwene Zekaliya wapokelile mazwi ukufuma kuli Yeova aakuti: 9 “Yeova wa maumba walanda wati, ‘Mwapingula nu mulinganya, nupya mwaya nu kutemwa kwa cumi nu luse uku yauzo. 10 Mutacenjezya ya mukamfwilwa nanti ana ya nsiwa, antu aafuma uku mpanga zyuze nanti aapiina; nupya mutapanga ukucita iviipe uku yauzo.’ 11 Lelo yakananga ukukutika, yakomizye imyenzo nupya yatuvwanga. 12 Yakomizye imyenzo yao wi iwe lyakwe daimondi yakanyile ukulondela masunde na mazwi yano Yeova wa maumba walanzile ukupitila muli ya kasesema aaliko mpiti ukuomvya umupasi wakwe. Cii calenzile Yeova wa maumba ukusoka sana.”

13 “‘Wakwe viivi kwene vino yakanyile ukuvwa lino nayamile, avino nani nakanyile ukuvwa lino yangamile,’ avino Yeova wa maumba walanda. 14 ‘Nupya nayasalanganyizizye umu nko zyonsi zino yatamanyile ukuomvya icimuza iciipishe, ni mpanga yasile umwaula icili consi, kutaali nu wa kupitamo nanti ukuswililamo; pano yalenzile impanga isuma ukuya ica kusekwa.’”

8 Nupya kwene Yeova wa maumba wanenyile ati: 2 “Yeova wa maumba walanda wati, ‘Ndalondesha ukucingilila Zioni, nupya ndamucingilila ala indi sana nu ukali.’”

3 “Yeova walanda wati, ‘Ndaswilila uku Zioni nu kuyaikala umu Yelusalemu; nupya Yelusalemu alaamwa ukuti musumba umwaya icisinka, nu kuti umwamba wakwe Yeova wa maumba umwamba uwa muzilo.’”

4 “Yeova wa maumba walanda wati, ‘Nupya kwene akote yalikala umu ncende umukazanwa antu aingi umu Yelusalemu, nupya cila muntu alikala ala watalema intuwa pa mulandu nu wingi wa myaka yakwe. 5 Mu ncende zya mu musumba umukazanwa antu aingi mulazuula ana aalacinamo’”

6 “Yeova wa maumba walanda wati, ‘Nanti cakuti ashalako umu yantu yaa yalalola kwati icitala sana umu manda yaaya, uzye nani kwene cilantalila?’ avino Yeova wa maumba walanda.”

7 “Yeova wa maumba walanda wati, ‘Ndapususha antu yane ukufuma uku mpanga ya ku ufumondaka nu ku uwondaka. 8 Ndayatwala uku Yelusalemu nupya akuno yalikala; yalaya antu yane nani ndaya Leza wao umu cumi nu mu ulungami.’”

9 “Yeova wa maumba walanda wati, ‘Sipini mweyano mukuvwa mazwi yano ya kasesema yakulanda, kuli kuti amazwi aali yamwi kwene aalanzilwe lino umufula wa kukuulapo ing’anda yakwe Yeova wa maumba wapanzilwe. 10 Pano lino insita yii itatala yafika, kutaali malipilo apeelwanga uku muntu nanti uku nyama; nupya umu ncende zyonsi mutaali umucingililwe pa mulandu nu mulwani, pano nalenzile ukuti antu yonsi yalwishanya.’

11 “‘Lelo ntalacita uku yantu ashala umu yantu yaa wakwe vino nacisile uku cisila,’ avino Yeova wa maumba walanda. 12 ‘Pano ulumbezu lwa mutende lulakomelwa; imyangazi ilaseeka ivizao ni insi ilamezya ivimelwa nupya mayulu yalaleta ulumi; ndalenga ashalapo umu yantu yaa ukupokelela vii vyonsi. 13 Mwe ya mu ng’anda yakwe Yuda na mwe ya mu ng’anda yakwe Izlaeli, wakwe viivi kwene vino inko zyaomvyanga izina linu wa citiipu avino zilaomvya izina linu ngi paalo. Pano ndamupususha! Mutuvwa intete, sipini.’

14 “Yeova wa maumba walanda wati, ‘“Wakwe viivi kwene vino nalondeshanga ukuleta intazi pali mwemwe pa mulandu wakuti vikolwe vinu vyansosizye,” avino Yeova wa maumba walanda “nupya ntalangulwike, 15 avino pa nsita ii nkulondesha ukucitila Yelusalemu na amu ng’anda yakwe Yuda ivisuma. Mutuvwa intete! ”’

16 “‘Vino mulinzile ukulacita aevi: Mwalanda ivya cumi uku yauzo nupya lino mukupingula pa mpongolo zinu mwaya na ucisinka nupya mwaazwa antu ukupanga umutende. 17 Mutaapangila auzo iviipe nupya mutatemwa imilapo ya ufi; pano napata ivintu vii vyonsi,’ avino Yeova walanda.”

18 Nupya kwene Yeova wa maumba wanenyile ati: 19 “Yeova wa maumba walanda wati, ‘Pa kufunga ukukayako umu mwezi uwalenga 4 nu mu mwezi uwalenga 5, mu mwezi uwalenga 7 nu kukayako mu mwezi uwalenga 10 amu ng’anda yakwe Yuda yalaya nu luzango ni nsansa, kuli kuti ilaya imitebeto ya luzango. Fwandi temwini cumi nu mutende.’

20 “Yeova wa maumba walanda wati, ‘Amu misumba iingi na antu yauze yaliza; 21 antu ya mu musumba onga yalaya uku ya mu musumba uze nu kuyanena iyati: “Twapiteni tukapaapate sana kuti Yeova atuvwile uluse nupya lekini tulonde Yeova wa maumba. Naswe kwene tukuya.” 22 Nupya antu aingi ni nko zya maka yaliza uku Yelusalemu ku kulonda Yeova wa maumba nu kupaapata ukuti Yeova ayuvwile uluse.’

23 “Yeova wa maumba walanda wati, ‘Mu manda yayo aonsi 10 kufuma umu mitundu yonsi iya mu nko yalalemelela uku cakuzwala ca Muyuda wenga, nu kumunena iyati: “Tukulonda ukupita namwe, pano tuvwa ukuti Leza ali namwe.”’”

9 Yaa ali mazwi yakwe Leza:

 3 Tuli waikuulile ilinga ilikome.

 9 Sansamuka sana we mwana umwanaci wa ku Zioni.

Punda kupunda kwa kucimvya we mwana umwanaci wa ku Yelusalemu.

Lola! Umwene wako akwiza kuli wewe.

Ulapwa wa mu nkondo ulapokwa.

12 Mwe yafungwa aaya nu upaalilo swililini uku ncende iicingililwe.

13 Ndapeteka Yuda wa ulapwa wane.

10 “Lengini imvula kuli Yeova mu nsita ya mvula ya kushalikizya.

Ali mulandu uno yalaapitanila wa mfwele.

Yalacula pano kutaaya kacema.

4 “Yeova Leza wane walanda wati, ‘Cema imfwele izilinzile ukukomwa, 5 zino akazikala yakaya umu kuzikoma nupya yasiya nu mulandu. Nupya akazikazya yakalanda iyati, “Si Yeova alumbanyiziwe, pano namaya umukankala.” Nupya aakazicema yasiya ni cikuuku ku mfwele zizyo.’

6 “‘Pano ntalaya ni cikuuku kuli yano yakaikala umu mpanga,’ avino Yeova walanda. ‘Ndalenga cila muntu ukucuziwa uku muze nu ku mwene wakwe; yalonona impanga nupya ntalayapususha.’”

7 Nupya natandike ukucema imfwele izyalinzile ukukomwa, pa mulandu winu mwe mfwele zino yakacuzya. Fwandi natozile intuwa zili, yonga naitemiile inti Cikuuku ni yuze natemiile inti Kulemana, nupya natandike ukucema imfwele. 8 Nupya nazinzile ya kacema yatatu mu mwezi sile onga, pano natiile ukuyateekelela nayo yampasile. 9 Nupya natiile: “Ntalatwalilila ukumucema. Lekini akulonda ukufwa afwe, na akulonda ukulowa alowe. Na alashalako yalye umunyefu wa muze.” 10 Natozile intuwa yane ino natemiile ukuti Cikuuku nu kuikontola natamile upangano uno napangine na antu yonsi. 11 Natamile upangano mu wanda uwa, nupya imfwele izyacuziwanga izyalolanga ivyacitikanga zyamanyile ukuti nalandanga mazwi yakwe Yeova.

12 Lyene nayanenyile inti: “Ndi cakuti cili ningo kuli mwemwe mpeelini malipilo yane lelo nga cisi ningo sungini.” Nayo yampeezile malipilo yane, kuli kuti impiya 30 zyakwe siuva.

13 Yeova wanenyile ati: “Sumbila impiya izinono zino yakalola ukuti izindinga umu cipao.” Fwandi natozile impiya 30 zyakwe siuva nu kuzisumbila umu cipao ca mu ng’anda yakwe Yeova.

14 Lyene nakontwile intuwa yane yakwe ciili iyamwanga ukuti Ukulemana, kuli kuti ukufumyapo uwina uwali pa ya Yuda na Ina Izlaeli.

15 Nupya Yeova wanenyile ati: “Tola iciombelo cakwe kacema uwa sile sile. 16 Pano nkulenga kacema ukukatuka umu mpanga. Atalasakamala imfwele izikulowa; nanti ukulonda izinono, nanti ukupozya izyacisika, nanti ukulisha izikweti maka ya kwimilila. Lelo alalya iminyefu ya mfwele izine nu kuputola inkamba zya mfwele.

17 Kalanda kuli kacema wane uwa sile sile aakusha imfwele

Lupanga luluma ikasa lyakwe ni linso lyakwe ilya kwi lunji.

12 “Yaa aali mazwi yano Yeova walanzile pa Ina Izlaeli”

2 “Nkulenga Yelusalemu ukuya wakwe kapu aakalenga antu yonsi ukupempezyoka; nupya umusumba wa Yuda nu wa Yelusalemu ulazingulukwa. 3 Mu wanda uuwa ndalenga Yelusalemu ukuya iwe ilifine uku yantu yonsi. Wensi uwamukatusha alacisika sana; nupya inko zyonsi izya pano nsi zilamukatukila. 4 Mu wanda uuwa,” avino Yeova walanda, “Ndalenga imfwalasi zyonsi ukuvwa intete nu watakwelapo alavulunganyiziwa. Ndatwalilila ukulolekesha pa ya mu ng’anda yakwe Yuda, lelo ndalenga imfwalasi zyonsi zya yantu ukupafula. 5 Ntunguluzi zya mu Yuda zilelenganya ziti, ‘Antu ya mu Yelusalemu ali maka itu kupitila muli Yeova wa maumba, Leza wao.’ 6 Mu wanda uuwa ndalenga intunguluzi zya mu Yuda ukuya wa mbeula pali umoto iili umu nkwi nupya wa lukozyo ululi umu mwanzi wa ngaano, nupya ziloca yonsi alaya ukwi lunji na kuli cimani, na antu amu Yelusalemu yalatwalilila ukwikala mu ncende zyao mu Yelusalemu kwene.

7 “Nupya Yeova alatandikilapo ukupususha matenti yakwe Yuda, pakuti ucindami wa ya mu ng’anda wakwe Devedi nu ucindami wa yantu aikala mu Yelusalemu utakula kucila uwa mu Yuda. 8 Mu wanda uuwa Yeova alacingilila antu yonsi aikala umu Yelusalemu; wensi aalapumika muli aliyo mu wanda uuwa alaya umukome wakwe Devedi, nupya amu ng’anda yakwe Devedi yalaya wakwe Leza, yalaya wakwe malaika wakwe Yeova aakayakoleelela. 9 Nupya umu wanda uuwa ndasininkizya ukuti nalovya amu nko zyonsi izikalwisha Yelusalemu.

10 “Ndapongolwela umupasi wane pa ya mu ng’anda yakwe Devedi na antu aikala umu Yelusalemu, ndayuvwila uluse nupya yalapepa kuli nene, yalalolekesha umuntu wino yatosile, nupya yalaloosha kwati yakuloosha umwanao umulumendo wenga sile; yalaya sana nu ulanda pali aliwe wakwe vino yangaya nu ulanda pa mwanao umulumendo iyeli. 11 Pa wanda uuwa ukuloosha ukulaya umu Yelusalemu kulaya ukukalamba, wa kuloosha ukwali umu Hadadi-limoni pa ncende iitambalale iya Megido. 12 Impanga ilaloosha, cila lupwa lulailoosezya; amu lupwa lwa mu ng’anda yakwe Devedi yalaloosha ala yali yonga, na anaci yao nayo yalaloosha ala yali yonga; amu lupwa lwa mu ng’anda yakwe Natani yalaloosha ala yali yonga, na anaci yao nayo yalaloosha ala yali yonga; 13 amu lupwa lwa mu ng’anda yakwe Levi yalaloosha ala yali yonga, na anaci yao nayo yalaloosha ala yali yonga; amu lupwa lwa mu ng’anda yakwe Shimei yalaloosha ala yali yonga na anaci yao nayo yalaloosha ala yali yonga; 14 na amu ndupwa zyonsi izyashala, cila lupwa lulaloosha ala luli longa, na anaci yao nayo yalaloosha ala yali yonga.

13 “Mu wanda uuwa yalimbila amu ng’anda yakwe Devedi na antu amu Yelusalemu cisima pakuti yace yasangululwe uku membu nu ku kukowela.

2 “Mu wanda uuwa” avino Yeova wa maumba walanda, “ndafuuta mazina ya vilubi ivyaya umu mpanga, nupya vitalatala viusiwe; ndafumya ya kasesema nu mupasi ukowele umu mpanga. 3 Ndi cakuti umwi wasesema nupya isi na nyina aamuviile yalamunena yati, ‘Umafwa, pano watulanda ufi umwi zina lyakwe Yeova.’ Nupya isi na nyina aamuviile yalamutota pa mulandu wa kusesema.

4 “Mu wanda uuwa ya kasesema yonsi yaluvwa insonyi pa vilolwa vino yalalola lino yakusesema; nupya yatalazwala ivyakuzwala vyakwe ya kasesema ivya mavumbu vino yazwalanga pa kuponzya antu. 5 Nupya cila kasesema alalanda ati, ‘Asi nene kasesema. Nkalima sile pano umwi wankazile ala nene mwance.’ 6 Nupya ndi cakuti umwi wamuzya wati, ‘Ngi vilonda vii pakasi ka viye vyako?’* alasuka ati, ‘Yancisile umu ng’anda yakwe ya cuza yane.’”

Ndalanda inti, ‘Antu yane,’

Nayo yalalanda yati, ‘Yeova a Leza witu.’”

14 “Lola! Uwanda wakwe Yeova ukwiza lino yalankana ivintu vino yalakupokolola* ala yacili muli wewe kwene. 2 Ndakolonganika inko zyonsi kuti zikalwishe Yelusalemu; nupya yalapoka umusumba ni vintu ivya mu mang’anda yao nupya yalalaala na anaci uku maka. Na afu wa yantu ya mu musumba yalasendwa umu uzya, lelo ashala yatalafumiziwa umu musumba.

3 “Yeova alaya umu kulwa ni nko zizyo kwati akulwa pa wanda uwa ulwi. 4 Pa wanda uuwa alimilila pa Mwamba wa Miolivi uwalozya uku ufumondaka wa musumba uwa Yelusalemu; nupya umwamba ulankanikana pakasi, ukufuma uku ufumondaka ukufika uku uwondaka nu kupanga umukonko ukalamba sana, nupya iciputulwa conga cilaya uku katutu, cuze naco cilaya uku kaeya. 5 Mulutukila uku mikonko iya ku myamba yakwe, pano umukonko ulafika nu ku Azeli. Mulutuka wakwe viivi kwene vino mutwike pa mulandu ni cilundumusi icaliko umu manda yakwe Uziya umwene uwa ku Yuda. Nupya Yeova Leza wane aliza, na amuzilo yonsi yalaya nawe.

6 “Pa wanda uuwa kutalaya uluswepo uluiyele, ivintu vilazuka nu kukoma. 7 Ulaya uwanda uulamanyikwa ukuti u wanda wakwe Yeova. Kutalaya kasanya nanti usiku; nupya umu nsita ya manguzi kulaya uluswepo. 8 Mu wanda uuwa manzi ya umi yalaakonkoloka ukufuma umu Yelusalemu, afu wa manzi yayo yalaaya kuli yemba uwa ku ufumondaka* afu yuze nayo yalaaya kuli yemba wa ku uwondaka.* Cico cilaacitika icisanya ni cisiku. 9 Yeova alaya Umwene umu nsi yonsi. Umu wanda uuwa Yeova alaya sile wenga, ni zina lyakwe lilaya sile lyonga.

10 Impanga yonsi ilaya wa ncende iya Alaba ukufuma uku Geba ukufika uku Limoni uku kaeya ka ku Yelusalemu; nupya Yelusalemu alacindamikwa nu kwikalwamo, ukufuma uku Mpongolo Yakwe Benjamini ukufika uku ncende ukwayela Impongolo ya Kutandikilako, alino nu kufika uku Mpongolo ya pa Koona nu kufuma uku Lupungu Ulwa Hananeli ukufika uku ca kufenelamo waini ica mwene. 11 Antu yalikalamo; kutalatala kuye icitiipu ica wononesi nupya, antu aalikala umu Yelusalemu yalacingililwa.

12 “Cii ali cikuko cino Yeova alaleta pa yantu yonsi aakalwisha Yelusalemu: Imiili yao ilaola lino yacili nu umi, manso yao yalaola, ni ndimi zyao zilaola umu tunwa twao.

13 “Pa wanda uuwa icimvulunganya icilafuma kuli Yeova cilaya pali aliyo; nupya cila muntu alalema ikasa lya muze, ni ikasa lyakwe lilalwisha ikasa lya muze. 14 Yuda nawe kwene alalwako umu nkondo iilayako uku Yelusalemu; ni vyuma ivya mu nko zyonsi ivingi sana vilakolonganikwa, kuli kuti goldi, siuva ni vyakuzwala.

15 “Nupya icikuko icili cimwi kwene ciliza na pa mfwalasi, pa ngamila, pali ya punda na pa viteekwa vyonsi ivya umu nkambi zya yalwani.

16 “Nupya yonsi aalashalako umu ya mu nko zyonsi izilalwisha Yelusalemu, cila mwaka yalaaya uku Yelusalemu uku kufukamila Umwene Yeova wa maumba, nu kuzevya Umutebeto wa Nsakwe. 17 Lelo ndi cakuti ali wensi uwa mu ndupwa izya pano nsi wakana ukuya uku Yelusalemu umu kufukamila Umwene Yeova wa maumba, yatalapokelelapo imvula. 18 Nupya ndi cakuti ulupwa ulwa mu Ijipti lwakana ukuya uku Yelusalemu, lutalapokelela imvula lelo lulapokelela icikuko cino Yeova akaleta apa nko izikakana ukuya umu kuzevya Umutebeto wa Nsakwe. 19 Vikwene avino Leza alafulula Ijipti ni inko zyonsi izikakana ukuya umu kuzevya Umutebeto wa Nsakwe, pano ukucita vivyo u luyembu.

20 “Pa wanda uuwa mazwi yakuti ‘Yeova uwa muzilo!’ yalalembwa pali tu mbelu twa ku mfwalasi. Ni mpoto zya mu ng’anda yakwe Yeova zilaya wa mbale izyaya umupiipi nu ulambo. 21 Impoto zyonsi izya mu Yelusalemu nu mu Yuda zilaya i zya muzilo nupya zilaya i zyakwe Yeova wa maumba. Na antu yonsi alaapeela malambo yaliza nu kuomvyako impoto zimwi uku kwelekelamo. Umu wanda uuwa umu ng’anda yakwe Yeova wa maumba mutalaya nupya Umwina Kenani.”