MALAKI

1 Yaa ali mazwi yano Yeova wanenyile Aina Izlaeli

Kupitila muli Malaki:*

2 Yeova walanda wati, “Namulanga ukuti namutemwa.”

Lelo mukati: “Watulanga uli ukuti watutemwa?”

Yeova walanda wati: “Uzye Esau ataali umwina wakwe Yakobo? Lelo natemilwe Yakobo, 3 nupya napasile Esau; nalesile imyamba yakwe ukushala umwaula icili consi nu kuleka ya nkusa ya mulwanga yaikala umu mpanga yakwe iya upyanyi.”

4 Yeova wa maumba walanda wati: “Nanti cakuti Aina Edomu yakalanda iyati, ‘Tononwa, lelo tulawela nu kukuula cipya cipya, yalakuula lelo ndonona nupya yalaamwa ukuti “incende umukacitikila ivintu viipe” nupya “antu yano Yeova wafulula manda pe.” 5 Mulailolela ivintu vii nu kulanda muti: “Si Yeova alumbanyiziwe umu Izlaeli monsi.”’”

6 Yeova wa maumba wanena mwe ya simapepo mwemuno mukasaalula izina lyakwe ukuti: “‘Umwana akacindika isi, nu muomvi akacindika umusambazi wakwe. Fwandi ndi cakuti nene isi uzye umucinzi uno ndinzile ukupeelwa uli kwi? Nupya ndi cakuti nene musambazi winu uzye umucinzi uno ndinzile ukupeelwa uli kwi?

“‘Lelo mukati: “Uzye twasaalula uli izina lyako?”’

7 “‘Mukacita vivyo kupitila umu kupeela ivyakulya ivikowele pa ulambo wane.’

“‘Nupya mukati: “Uzye tukakukowezya uli?”’

“‘Mukalanda imuti: “Tebo wakwe Yeova atalinzile ukucindikwa.” 8 Nupya nga mwapeela inyama ipafule ukuya ilambo mukati: “Asi ciipe.” Nga mwapeela inyama ilemale nanti iilwale nalyo kwene mukati: “Asi ciipe.”’”

“Nga mwezya ukupeela malambo ya musango uu ku mulasi winu, uzye angamutemwa nanti ukumulanga icikuuku?” avino Yeova wa maumba walanda.

9 “Lyene papaatini kuli Leza pakuti amuvwile uluse. Uzye angamupokelela ni cikuuku ndi cakuti mukupeela malambo ya musango uwo?” avino Yeova wa maumba walanda.

10 “Nupya a weni pali mwemwe aangaitemelwa ukuyala ivisaasa? Pano musipemba nanti umoto pa ulambo ukwaula ukulipilisha.” Yeova wa maumba walanda wati: “Nsizangila muli mwemwe, nupya nsizangila umu malambo yano mukapeela.”

11 Yeova wa maumba walanda wati: “Pano kufuma kuno ilanzi likatunkila kufika kuno likawila, izina lyane lilacindikwa umu nko. Malambo ni vya upe vilapeelwa ukwi zina lyane umu ncende zyonsi ukuya ivya upe ivisanguluke; pano izina lyane lilacindikwa umu nko.”

12 “Lelo mukalisaalula* lino mukulanda imuti, ‘Tebo wakwe Yeova wakowela nupya ivizao ni vyakulya ivikaikwapo vitalinzile ukucindikwa.’” 13 Yeova wa maumba walanda wati: “Mukalanda ukuti, ‘Umulimo uu ukatonsha!’ nupya mukalanga ukuti imuusuula kupitila umu kufinya uku manso nupya mukaleeta inyama zya kwiya, zilemale ni zilwale. Mukaleeta kuti viye ivya upe! Uzye ndinzile ukuvipokelela?” avino Yeova walanda.

14 Yeova wa maumba walanda wati, “U mutiipwe umuntu wa ucenjezi uwakwata inyama zya kalume izisuma lelo aakalapa umulapo nu kupeela inyama ilemale wi lambo kuli Yeova. Pano nene Mwene umukalamba nupya izina lyane i lya koofya umu nko.”

2 “Lyene mwe ya simapepo vino nkumunena aevi, 2 ndi cakuti mwakana ukuvwa nu kucindika izina lyane,” avino Yeova wa maumba walanda, “ndamuletela icitiipu nupya ndalenga mapaalo yaye ivitiipu. Indenga mapaalo ukuya ivitiipu pano musiikako mano.”

3 “Lolini! Ndonona imbezu zino mwakomela pa mulandu winu, ndasumbila mavi ya nyama pa manso inu, kuli kuti mavi ya nyama zino mukapeela pa mitebeto; nupya mulasendwa pamwi na mavi kwene yayo. 4 Lyene mulamanya ukuti namunenyile vii pakuti upangano uno napangine na Levi utwalilile,” avino Yeova wa maumba walanda.

5 “Upangano uno napangine na Levi wali uwa kumupeela umi nu mutende, pakuti aancindika. Wancindike, opanga izina lyane. 6 Wasambilizyanga icumi nupya atalandangapo iviipe. Wapitanga nani umu mutende nu mu ulungami, nupya wazwile aingi ukuta ukucita iviipe. 7 Pano simapepo alinzile ukulasambizya vino wamanya pali Leza, nupya antu yafwile ukulasambilila masunde kuli aliwe pano iintumi yakwe Yeova wa maumba.

8 “Lelo mwemo mwafuma umu nzila. Mwalenga antu aingi ukuta ukulondela masunde. Monona upangano wakwe Levi,” avino Yeova wa maumba walanda. 9 “Fwandi ndamulenga ukusaalulwa nu kusuulwa uku yantu yonsi, pano mutalondelanga masunde yane lelo mwali na kapatulula muli vino mwapingulanga.”

10 “Uzye swensi tutakwata tata wenga? Nupya uzye swensi tutaumvilwe kuli Leza wenga? Nomba u mulandu ci uno tukacenjezyanya nu kukowezya upangano wa vikolwe vitu? 11 Yuda watacita ucenjezi, nupya ica winyi iicicitwa umu Izlaeli nu mu Yelusalemu; pano Yuda watakowezya uumuzilo wakwe Yeova uno Leza watemwa, nupya watatwala umwana umukazyana wakwe leza wa ku mpanga yuze. 12 Yeova alonona wensi uwa mu matenti yakwe Yakobo uwacita icintu ca musango uu, nanti cakuti akapeela ivya upe kuli Yeova wa maumba.”

13 “Kwaya na cuze cino mukacita icalenga ukuti pa ulambo wakwe Yeova paye ukulila, ukuloosya nu ulanda, icalenga ukuti Leza ataika mano uku vya upe vino mukapeela nanti ukuvipokelela. 14 Nupya mukauzya imuti, ‘U mulandu ci?’ A pa mulandu wakuti Yeova inte pali mwemwe na pa yaci ya ku ulumendo winu yano mwapondokela, nanti cakuti ali ya cuza inu nupya aci yano mwatwazile ukulingana ni sunde. 15 Lelo kwaliko yamwi ataacisile vivyo, pano yakwetiko umupasi wa muzilo. Nupya i cani cino yalondanga? Yalondanga ana yakwe Leza. Fwandi mwacingilila melenganyo inu nupya mutapondokela aci ya ku ulumendo winu. 16 Pano napata ukutaana,” avino Yeova Leza wakwe Izlaeli walanda, “nupya napata umuntu wensi umunkalwe,” avino Yeova wa maumba walanda. “Mwacingilila melenganyo inu nupya mutaaya nu ucenjezi.

17 “Mwatonsha Yeova pa mulandu na mazwi inu. Lelo mukati, ‘Twalenga uli ukuti atonte?’ Mukacita vivyo ukupitila umu kulanda imuti, ‘Wensi aakacita iviipe ala akucita ivisuma kuli Yeova, nupya akazangila muli aliwe,’ nanti ukulanda imuti, ‘Uzye Leza wa mulinganya ali kwi?’”

3 Yeova wa maumba walanda wati: “Ndatuma inkombe nupya ilazifya inzila lino ntali nize. Nupya umu kupumikizya Umwene wa cumi wino mukalonda aliza umwi tempele lyakwe; ni nkombe ya upangano ino mukazangilamo iliza. Ukwaula nu kutwisika iliza.”

2 “Nomba a weni aalazizimizya pa wanda wa kwiza kwakwe, nupya a weni aalimilila lino alaloleka? Pano alaya wa moto wakwe kengulula nupya wakwe sopo yakwe ya kafula ya vyakuzwala. 3 Alikala wakwe kasangulula nupya kengulula wakwe siuva, alasangulula ana yakwe Levi; nu kuyengulula wakwe goldi na siuva nupya yalaya antu yakwe Yeova aalapeela ilambo umu ulungami. 4 Nupya malambo ya mu Yuda na amu Yelusalemu yalaazanzya Yeova wakwe vino cali mpiti.

5 “Ndiza umupiipi naawe uku kupingula, nupya ndapingula zuwa zuwa aakacita ivya maleele, aacende, aakalapa imilapo ya ufi, aakacenjezya aomvi na ya mukamfwilwa alino na ana ya nsiwa, nupya ndapingula antu aakakana ukwazwa antu aafuma uku mpanga yuze. Yaa yatangopanga,” avino Yeova wa maumba walanda.

6 “Pano nene Yeova nsisenuka. Nupya mwemwe ya mwana Yakobo; ali mulandu uno mutalowela. 7 Ukufuma umu manda ya vikolwe vinu mukata ukuvwila masunde yane nupya musiyakonka. Welini kuli nene nani nimawela kuli mwemwe,” avino Yeova wa maumba walanda.

Lelo mukati: “I cani cimalenga tuwele?”

8 “Uzye umuntu angiyila Leza? Lelo mwemo mukanjiyila.”

Nupya mukati: “Uzye tukakwiyila uli?”

“Pano mukafilwa ukupeela icikumi nu kusangula. 9 Umu cumi mwatiipwa pano mukunjiyila, uluko lonsi lukucita vivyo kwene. 10 Letini icikumi consi umwi tempele, pakuti umu ng’anda yane muye ivyakulya, nu kunjezya muli cii,” avino Yeova wa maumba walanda, “pakuti mulole nga ntanga njule mayulu nu kumupongolwela mapaalo aingi wa mvula ukufikila lino mulakwata vyonsi.”

11 “Ndakalipila aakaonona* nupya atalonona ivizao vya mu mpanga inu, ni miti ya myangazi ilaaseeka ivizao,” avino Yeova wa maumba walanda.

12 “Amu nko zyonsi yalalanda pali mwemwe ukuti mwemwe ya nsansa, pano mulaikala umu mpanga isuma,” avino Yeova wa maumba walanda.

13 Yeova walanda wati: “Mazwi yano mukalanda pali nene aaipe sana.”

Nupya mukati: “I viipe ci vino tukalanda pali wewe?”

14 “Mukati, ‘Citacindama ukuombela Leza. I visuma ci ivyatucitikila muli vino tukatwalilila ukulondela masunde yakwe nu kupita aulanda pa mulandu ni membu zitu pa nkoleelo yakwe Yeova wa maumba? 15 Lyene tukalola antu ya cilumba ukuti yaaya ni nsansa. Na aakacita iviipe vintu vikayazipila. Yakaezya Leza nupya kusi ivili vyonsi ivikayacitikila.’”

16 Pa nsita iiya antu aopanga Yeova yaalanzyanyanga, cila muntu nu muze, nupya Yeova watwalilile ukuikako mano nu kukutika. Ibuku lya ciusizyo lyakwe yayo aakaopa Yeova na aakaelenganya sana api zina lyakwe lyalemvilwe pa nkoleelo yakwe.

17 Yeova wa maumba walanda wati: “Yalaya aane pa wanda uno ndayalenga ukuya antu yane aiyele. Ndayalanga icikuuku wakwe vino umuntu akaya ni cikuuku uku mwanakwe aakamuombela. 18 Nupya kwene mulalola upusano uwaya pa muntu umulungame nu mwipe, na pa muntu aakaombela Leza na aasimuombela.”

4 “Lolini! Uwanda ukwiza, uli wa moto ukalamba umwi lungu lino antu yonsi aacilumba na yonsi aakacita iviipe yalaya wi sote.” Yeova wa maumba walanda wati: “Uwanda uukwiza ulayoca, nupya utalayasila imisisi nanti imisambo. 2 Lelo ilanzi lya ulungami lilawala pali mweyano mukacindika izina lyane, ni myengelele yi lanzi ilamupozya nupya mulaatoloka wa twana utwa ng’ombe utwine.”

3 Yeova wa maumba walanda wati, “Umu wanda uno ndacita vivyo mulalyatola antu aipe, pano yalaya wa lukungu ululi pansi ya ngazo zinu.”

4 “Iushini Masunde Yakwe Mose umuomvi wane, na vino nanenyile Aina Izlaeli yonsi ukuti yauvwila lino yaali uku Holebu.

5 “Lolini! Nkutuma Eliya kasesema kuli mwemwe lino uwanda wakwe Yeova ukalamba nupya uwa koofya utatala wiza. 6 Nupya alalenga ya isi ukuswilila uku yana yao, na ana ukuswilila kuli ya isi pakuti ntaca nize nu konona insi.”

(Pakwene a papeleela Malembo ya Ciebele ni Cialamaiki, lyene pamakonka Malembo ya Cigiliki aa Ina Klistu)