ILYASI LISUMA ILYALEMVILWE NA MATEO

1 Ibuku umwaya ilyasi ilikalanda pa umi wakwe Yesu Klistu,* mwana Devedi, mwana Abulahamu:

 6 Yese wali a isi wakwe Devedi umwene.

Devedi wali a isi wakwe Solomoni wino wavile muli muka Uliya;

11 Yosiya wali a isi wakwe Yekoniya na ana yauze aonsi mu nsita ino Ayuda yasenzilwe umu uzya ku Babiloni.

16 Yakobo wali a isi wakwe Jozefu iya wakwe Maliya, uwaviile Yesu, wino akaamwa ukuti Klistu.

17 Fwandi inkulo zyonsi ukufuma pali Abulahamu kufika kuli Devedi, zyali 14; lyene ukufuma pali Devedi kufika pa nsita ino Ayuda yasenzilwe umu uzya ku Babiloni, napo kwene inkulo zyali 14; nupya ukufuma pa nsita ino Ayuda yasenzilwe umu uzya ku Babiloni kufika mu nsita yakwe Klistu, napo kwene inkulo zyali 14.

18 Fwandi vii ali vino ukuvyalwa kwakwe Yesu Klistu kwali. Pa nsita ino Maliya yamutaisye kuli Jozefu, wizile azanwa ukuti ali ni inda ukupitila umu mupasi wa muzilo* ala yatali yatwalane na Jozefu. 19 Lelo pa mulandu wakuti Jozefu uwamutaisye* wali umulungami, nupya atalondanga ukuti amuzewanye uku yantu, walondanga ukuti amukane* umu nkama. 20 Lelo pa cisila ca kwelenganya pali vyonsi vii , malaika wakwe Yeova* walolike kuli aliwe mu ciloto nu kumunena ati: “Jozefu, mwana Devedi, utatiina ukusenda Maliya kuti aye a mamako, pano umupasi wa muzilo u watiulenga ukuti aye ni inda.* 21 Alakwata umwana umonsi, nupya uce umutemele uti Yesu,* pano alapususya antu yakwe uku membu zyao.” 22 Vyonsi vii vyacitiike pakuti mazwi yano Yeova walanzile ukupitila muli kasesema wakwe yafikiliziwe, aakuti: 23 “Lolini! Nacisungu alakwata inda nupya alavyala umwana umonsi, nupya yalamutemela izina lyakuti Emanweli, ilikapiliula ukuti, “Leza Ali Naswe.”

24 Lyene Jozefu wazyusile nu kucita vino malaika wakwe Yeova wamunenyile, nupya wasenzile Maliya ukuti aye mamakwe. 25 Lelo ataapanzile icupo nawe kufikila lino wizile akwata umwana umonsi, nupya Jozefu wamutemiile ati Yesu.

2 Pa cisila cakuti Yesu wavyalwa mu musumba wa Betelemu uwayelile mu Yudeya, mu manda ya Mwene Helodi,* lolini! aakasapola ukuomvya intanda yafumile ku Ufumondaka* nu kwiza uku Yelusalemu, 2 nga iyuzya iyati: “Uzye umwene wa Yayuda uwatavyalwa ali kwi? Pano twaweni ulutanda lwakwe lino twali ku Ufumondaka, nupya iitwiza uku kumupeela umucinzi.”* 3 Lino Umwene Helodi uvwile vii, wasakamile sana kumwi na antu yonsi amu Yelusalemu yano wali nayo. 4 Lyene wakolonganike ya simapepo akalamba na ya kalemba* yonsi, nu kuyuzya ukwali nu kuvyalilwa Klistu.* 5 Yamunenyile iyati: “U mu musumba wa Betelemu uwayela umu Yudeya, pano vikwene avino calemvilwe kupitila muli kasesema ukuti: 6 ‘Naawe we musumba wa Betelemu uwayela umu mpanga ya Yuda, utaacepesya pa misumba yakwe ya kateeka ya mu Yuda, pano muli wewe mulafuma kateeka, aalacema antu yane aina Izlaeli.’”

7 Lyene Helodi mu nkama aama aakasapola ukuomvya intanda nupya ayuzikisya insita ino ulutanda lwaloliike. 8 Lino wayatumanga uku Betelemu, wayanenyile ati: “Yangini mukalondelezye ningo pa mwana wii, nupya nga mwamuzana, muce mwize munene pakuti nani ince nkamupeele umucinzi.” 9 Pa cisila ca kuvwa uku mwene, yapisile, nupya lolini! ulutanda luno yaweni lino yali ku Ufumondaka iluyakolelela nu kuya imilila papela pa ncende apayelile umwana. 10 Lino yaweni ulutanda, yatemilwe sana. 11 Nupya lino iingile mu ng’anda, yaweni umwana na nyina, lyene yafukime nu kupeela umwana umucinzi. Nupya yayuzile utumbokosi twa vyuma nu kumupeela ivya upe apaali goldi, ubani ni vinunkile. 12 Lelo pa mulandu wakuti Leza wayacelwile mu ciloto ukuti yataswilila kuli Helodi, yaswilile ukumwao ukuomvya inzila yuze.

13 Lino yapisile, lolini! malaika wakwe Yeova waloliike kuli Jozefu mu ciloto nu kumunena ati: “Katuka, senda umwana na nyina nu kuutukila ku Ejipti, nupya uce uwikale kuuku kwene kufikila lino ndakunena ukufumako, pano Helodi wasya atandike ukulonda ukuli umwana pakuti amukome.” 14 Fwandi Jozefu wakatwike usiku asenda umwana na nyina nu kuya ku Ejipti. 15 Wikazile kuuku kwene kufikila lino Helodi wafwile. Cii cafikilizye amazwi yano Yeova wavwanzile kupitila muli kasesema wakwe aakuti: “Namile umwanane ukufuma umu Ejipti.”

16 Lyene lino Helodi waweni ukuti iyamutumpoka kuli ya kasapola aakaomvya intanda, wasosile sana, nupya watumile antu aakuti yakakome ana aonsi yonsi mu Betelemu nu mu ncende zyonsi izyalimo, kutandikila pali yano yaali ni myaka iili nu kwiza pansi, kulingana ni nsita ino aakasapola ukuomvya intanda yamunenyile ukuti alino ulutanda lwaloliike. 17 Lyene amazwi yafikiliziwe aalanzilwe ukupitila muli kasesema Yelemiya aakuti: 18 “Izwi lyuvwisile umu Lama, ilya kuloosya ni mpooma ikulu sana. Lakeli u waloosyanga ana yakwe, nupya atalondanga nu kuteekeziwa, pano ala iyafwa.”

19 Lino Helodi wafwile, lolini! malaika wakwe Yeova waloliike kuli Jozefu mu ciloto umu Ejipti 20 nu kumunena ati: “Katuka, senda umwana na nyina nu kuya uku mpanga ya Izlaeli, pano aalondanga ukukoma umwana iyafwa.” 21 Fwandi wakatwike, asenda umwana na nyina nu kuya uku mpanga ya Izlaeli. 22 Lelo lino uvwile ukuti Akelao u watapyana isi Helodi pa wene mu mpanga ya Yudeya, uvwile intete zya kuyako. Nupya pa mulandu wakuti Leza wamucelwile umu ciloto, waile uku ncende ya mu Galili. 23 Nupya waile aikala mu musumba uno yamanga ukuti Nazaleti, pakuti mazwi yafikiliziwe aavwanzilwe ukupitila muli ya kasesema aakuti: “Alaamwa* ukuti umwina Nazaleti.”

3 Lyene insita yafisile ino Yoani Kabatizya watandike ukusimikila umu lwanga lwa mu Yudeya, 2 ala akuti: “Lapilini, pano Uwene wa kwi yulu watiupalama.” 3 Nupya wikwene ali wino kasesema Ezaya walanzilepo umu mazwi aakuti: “Izwi lyakwe umwi likupunda umu lwanga likuti: ‘Zifini inzila yakwe Yeova! Olololini imiseo yakwe.’” 4 Lyene Yoani wazwalanga icakuzwala ca mavumbu ya ngamali nu musipi wa mpapa umu musana. Walyanga makanta nu uci wa mu mpanga. 5 Lyene antu amu Yelusalemu na yonsi amu Yudeya alino na aali umu ncende izyazingulwike Yodani, yayanga kuli aliwe, 6 nupya wayabatizyanga* umu Luzi lwa Yodani, ala yakusokolola imembu zyao apaswe.

7 Lino waweni Afaliseo na Asaduki aingi yakuya umu kubatiziwa, wayanenyile ati: “Mwe yana ya nzoka mwe, a weni uwatamucelula kuti muutuke ukali wakwe Leza uuli umupiipi nu kwiza? 8 Fwandi mwaomba imilimo ikulanga ukuti imulapila. 9 Mutaelenganya ukuti, ‘Twakwata Abulahamu tata witu.’ Pano nkumunena ukuti Leza angapanga ana yakwe Abulahamu kuomvya mawe kwene yaa. 10 Impasa iya kuputwila imisisi ya miti yatipekanyiziwa. Umuti onsi uusiseeka ivizao ivisuma ukakomwa nu kusumbilwa umu moto. 11 Nemo nkumubatizya na manzi pa mulandu wakuti mwatimulapila, lelo aakwiza pa cisila cane wene akweti maka ukuncila, nupya ntakweti insambu zya kumuzula indyatu. Wene alamubatizya nu mupasi wa muzilo nu moto. 12 Alemile icakwelelako, nupya alazifya ningo ulwano lwakwe nu kukolonganika ingano zyakwe umu nkoma, lelo ivipumbu vyene alavyoca umu moto uutanga uzimiiwe.”

13 Lyene Yesu wafumile uku Galili aya uku Yodani kuli Yoani pakuti akabatiziwe kuli aliwe. 14 Lelo Yoane wezizye ukumukaanya, amunena ati: “Nene ndinzile ukwiza kuli wewe kuti umbatizye, u mulandu ci uno wizila kuli nene?” 15 Yesu wamwaswike ati: “Utakana, pano ukucita vivyo ikulinga pakuti tucite vyonsi vino Leza akalonda.” Lyene wazumiile ukumubatizya. 16 Pa cisila ca kubatiziwa, Yesu wafumile umu manzi; nupya lolini! iyulu lyayulike nupya waweni umupasi wakwe Leza ukwika wa nkunda nu kwiza pali aliwe. 17 Lolini! Kuvwisile ni izwi ukufuma umwi yulu iliti: “Wii u Mwanane wino natemwa, nkazangila muli aliwe.”

4 Lyene Yesu watungulwilwe nu mupasi* umu lwanga ukuti akeziwe na Ciwa. 2 Pa cisila ca kwikala ukwaula ukulya amanda 40 umusanya nu usiku, uvwile inzala. 3 Nupya Ciwa waile kuli aliwe nu kumunena ati: “Nga wewe mwana wakwe Leza, nena mawe yaa ukuti yaye umukate.” 4 Lelo waswike ati: “Malembo yakati: ‘Umuntu atange aye nu umi uku cakulya citupu, suka nu ku mazwi yonsi aakafuma mu kanwa kakwe Yeova.’”

5 Lyene Ciwa wamusenzile umu musumba wa muzilo, nu kuya mwimika papela pa ciumba ci tempele 6 alino amunena ati: “Nga wewe mwana wakwe Leza, tolokela pansi, pano calembwa ukuti: ‘Leza alanena ya malaika yakwe ukuti yakusendele pa minwe yao, pakuti ulwazo lwako lutaca lupume ukwi we.’” 7 Yesu wamwaswike ati: “Nupya kwene calembwa ukuti: ‘Utalinzile ukwezya Yeova Leza wako.’”

8 Nupya kwene Ciwa wamusenzile pa mwamba utali sana nu kumulanga mawene yonsi amu nsi na vino yacindama. 9 Nupya wamunenyile ati: “Ivintu vii vyonsi namakupeela nga wamfukamila nu kumpepako sile nanti apanono.” 10 Lyene Yesu wamunenyile ati: “Fuma pano, Satana! Pano calembwa ukuti: ‘Yeova Leza wako ali wino ulinzile ukupepa, nupya wenga sile awino ulinzile ukuombela.’” 11 Lyene Ciwa wamusiile, nupya ya malaika iizile nu kutandika ukumwazwa.

12 Lyene lino Yesu uvwile ukuti Yoani iyamulema, wafumileko aya uku Galili. 13 Nupya pa cisila ca kufuma mu Nazaleti, waile aikala mu Kapenaumu mu mbali yakwe yemba mu ncende ya Zebuluni na Nafutali, 14 pakuti cifikiliziwe icalanzilwe ukupitila muli kasesema Ezaya, uwalanzile ati: 15 “Mwemuno mwikala mu mpanga ya Zebuluni ni mpanga ya Nafutali, mwemuno mwayela umu mbali ya museo uwaya kuli yemba, ku mbalama yakwe Yodani, ni mpanga ya Galili umukaikala antu afuma ku mpanga zyuze! 16 Antu aikalanga mu mfinzi yaweni uluswepo ulukulu, nupya yayo aikalanga mu ncende ino imfwa yaya wa cinzingwa, uluswepo lwaswefizye pano yali.” 17 Kufuma pa nsita iiya, Yesu watandike ukusimikila ala akuti: “Lapilini pano Uwene wa kwi yulu watiupalama.”

18 Lino wapitanga mu mbali yakwe Yemba wa Galili, waweni silenzi nu muto, Simoni wino yamanga ukuti Petulo, na Andeleya, ala yakusumbila isumbo muli yemba, pano yali aakavuwa ya nswi. 19 Nupya wayanenyile ati: “Ndondelini, nani namamulenga ukuya ya kavuwa ya yantu.” 20 Lilyo kwene sile yasiile masumbo yao nu kumulondela. 21 Lino wafumile kuuku, waweni na yauze yaili, silenzi nu muto, Yakobo na Yoani ya mwana Zebedi. Yaali umu wato na isi Zebedi ala yakusuma masumbo yao, nupya wayamile. 22 Lilyo kwene sile yasiile uwato na isi nu kumulondela.

23 Lyene wapisile mu mpanga yonsi iya Galili, ala akusambilizya mu masunagogi* nu kusimikila ilyasi lisuma ilya Wene nu kupozya antu aali ni ndwala zya misango yonsi. 24 Nupya ilyasi pali aliwe lyasalangine mu mpanga yonsi iya Silya, lyene yamuletiile yonsi aaculanga ni ndwala izipusanepusane nu kuwaika kwa misango yonsi, yano iviwa vyacuzyanga na alwile icifumfumi alino ni vite, nupya wayapozizye. 25 Fwandi antu aingi yamulondiile ukufuma ku Galili, ku Dekapoli,* ku Yelusalemu, ku Yudeya nu kufuma ku mbalama ya luzi lwa Yodani.

5 Lino Yesu waweni maumba, wakwezile pa mwamba; nupya lino wikazile, asambi yakwe yaile kuli aliwe. 2 Lyene watandike ukuyasambilizya ati:

3 “Ansansa aantu aakalondesya vyakwe Leza,* pano Uwene wa kwi yulu u wao.

4 “Ansansa aantu aakaloosya, pano yalateekeziwa.

5 “Ansansa aantu afuuke pano yalapyana insi.

6 “Ansansa aantu aakalondesya ulungami, pano vino yakalonda vilacitika.

7 “Ansansa aantu aya nu luse, pano yalelelwa.

8 “Ansansa aantu asanguluke imyenzo, pano yalalola Leza.

9 “Ansansa aantu ya mutende, pano yauze yalayama ukuti ana yakwe Leza.

10 “Ansansa aantu yano yakacuzya pa mulandu wa ulungami pano Uwene wa kwi yulu u wao.

11 “Mwemwe ya nsansa ndi cakuti antu yakumupontela nu kumucuzya nu kumubepezya ivintu iviipe pa mulandu wane. 12 Zangini nu kusansamuka sana, pano icilambu cinu i cikulu umwi yulu, pano vivyo kwene avino yacuzizye na ya kasesema aaliko mpiti.

13 “Mwemwe musilya wa pano nsi, lelo ndi cakuti musilya wafumuka, uzye kuli angaukalifya nupya? Usiomviwa uku cili consi lelo ukasumbwa nu kulyatolwa na antu.

14 “Mwemwe luswepo lwa pano nsi. Musumba utanga ufisame ndi cakuti wayela pa mwamba. 15 Antu yasikozya lampi nu kutupikapo,* yakamwika pa ca kuteekapo nawe akapeela uluswepo kuli yonsi aali mu ng’anda. 16 Namwe kwene, mwaleka uluswepo lwinu lwaloleka ku yantu yonsi pakuti yangalola imilimo inu isuma nu kucindika Tata winu uwa kwi yulu.

17 “Mutaelenganya ukuti niiza umu konona masunde nanti ivisambilizyo vyakwe ya kasesema. Ntiiza umu konona, lelo niiza uku kufikilizya. 18 Cumi namunena ukuti nanti cakuti iyulu ni insi vingapita, patalononekapo kalembo kanono nanti kamusilwa ka kalembo kufikila vyonsi vice vicitike. 19 Fwandi wensi uwatama isunde lyonga pa masunde yaa anono nu kusambilizya yauze ukucita vivyo kwene, alaamwa ukuti u munono mu Wene wa kwi yulu. Lelo wensi aakalondela masunde yaa nu kusambilizya yauze alaamwa ukuti u mukalamba mu Wene wa kwi yulu. 20 Pano nkumunena ukuti ulungami winu nga utacizile wakwe ya kalemba na Afaliseo ale mutalingila umu Wene wa kwi yulu.

21 “Muuvwa vino cavwanzilwe uku yantu ya mpiti ukuti: ‘Utaakoma, lelo wensi uwakoma yalamutwala uku cilye.’ 22 Lelo nkumunena ukuti wensi aakatwalilila ukusokela umwina yalamutwala ku cilye, nupya wensi uwanena umwina amazwi ya miponto yalamutwala uku Cilye Cikalamba, lelo uwavwanga ukuti ‘Ciwelewele we!’ wene alapingulwa ukuya uku Gehena.*

23 “Ndi cakuti ukutwala upe pa ulambo,* lyene papo kwene wiusya ukuti umwina wako wakusokela, 24 usye upe wako pa nkoleelo ya ulambo nu kuswilila. Mutale mukuvwane nu mwina wako alino uwele uwize upeele upe wako.

25 “Mwauvwana zuwa na akukutwala ku cilye lino mucili mu nzila, pakuti atakufisya kuli kapingula, na kapingula nawe atakupeela uku mulinzi pakuti akusumbile umu cifungo. 26 I cumi nakunena nati utalafuma ukufikila ukalipile impiya zyonsi zino wakwata.*

27 “Muuvwa vino cavwanzilwe ukuti: ‘Utaacita ucende.’ 28 Lelo nemo nkumunena ukuti wensi uwatwalilila ukulolekesya umwanaci nu kumukumbwa ala watacita mpiti nawe ucende umu mwenzo. 29 Lyene ndi cakuti ilinso lyako ilya kwi lunji likukulenga ukuluvyanya, litonkole nu kulisumba. Pano cazipa ukuponzya icilundwa conga ukucila kuti umwili wako onsi usumbwe umu Gehena.* 30 Nupya ndi cakuti ikasa lyako ilya kwi lunji likukulenga ukuluvyanya, liputule nu kulisumba. Pano cazipa ukuponzya icilundwa conga ukucila kuti umwili wako onsi uye umu Gehena.*

31 “Nupya cavwanzilwe ukuti: ‘Wensi uwata umuci, alinzile ukumupeela kalata wa kutaanilapo.’ 32 Lelo nemo nkumunena ukuti wensi uwata umuci pa mulandu uze ukucila pa uzelele,* ale wamulenga ukuya mu uzanzo wa kucita ucende, nupya wensi uwatwala umwanaci wiyo ala wacita ucende.

33 “Nupya muuvwa vino cavwanzilwe ku yantu ya mpiti ukuti: ‘Utalinzile ukulapa ukwaula ukufikilizya, lelo ulinzile ukufikilizya imilapo yako kuli Yeova.’ 34 Lelo nkumunena ukuti: Mutaalapa, nanti sile ukulapa ukuomvya iyulu, pano i cilimba cakwe Leza; 35 nanti sile ukuomvya insi, pano ali cilimba ca ngazo zyakwe, nanti sile ukuomvya Yelusalemu, pano u musumba wa Mwene mukalamba. 36 Mutaalapa ukuomvya umutwe, pano mutanga musenule ulunyele longa ukuti luye ulutiswe nanti ulutifi. 37 Lekini ‘Ee’ winu aye ee, na ‘Awe’ winu aye awe, pano ivyacila pali vii vikafuma uku mwipe.

38 “Muuvwa vino cavwanzilwe ukuti: ‘Ilinso pi linso ni lino pi lino.’ 39 Lelo nkumunena ukuti: Mutaakanya umwipe, wensi uwakupama ukwi tama lya kwi lunji, mupeele ni lyuze kwene. 40 Nupya ndi cakuti umwi akulonda ukukutwala uku cilye pakuti akakupoke icakuzwala conga, muleke asende na cuze kwene pali vino uzwite; 41 nupya ndi cakuti umwi uwaya mu ulasi wakupatikizya ukumusendela vimwi ukulingana na kilomita wenga, musendele ukulingana na makilomita yaili. 42 Uwapeela uwakulenga, nupya utaima aakulonda ukukongola* kuli wewe.

43 “Muuvwa vino cavwanzilwe ukuti: ‘Uwatemwa umuzo nu kupata umulwani wako.’ 44 Lelo nkumunena ukuti: Mwatemwa alwani inu nu kupepelako aakamucuzya, 45 pakuti mungalanga ukuti mwemwe yana yakwe Tata winu uwa kwi yulu, pano wene akaleka akasanya ukuwala pa yantu aipe na asuma nu kuleka imvula ukutoonya pa yantu alungame na aatalungama. 46 Ndi cakuti mwatemwa sile aamutemwa, i cilambu ci cino mungakwata? Uzye asi vino na ya kasonkisya ya misonko yakacita? 47 Nupya ndi cakuti mukalamuka sile aina inu, i cintu ci ciiyeele cino mukacita? Uzye na antu ya mu nko asi vino yakacita vivyo kwene? 48 Mulinzile ukuya aamalilike, wakwe vino Tata winu uwa kwi yulu waya umumalilike.

6 “Mwacenjela pakuti mutaacita ivilungame pa manso ya yantu pakuti sile yamulole; pano nga mukucita vivyo, mutalapokelela icilambu ukufuma kuli Tata winu uwa kwi yulu. 2 Fwandi lino ukupeela ivya upe,* utaalizya ipenga wakwe vino asomvi yakacita umu masunagogi* nu mu miseo, pakuti antu yayacindike. I cumi nkumunena ukuti yene yapokelela mpiti cilambu cao consi. 3 Lelo wemo lino ukupeela ivya upe, utaleka ikasa lyako ilya kuli cimani limanye vino ikasa ilya kwi lunji likucita, 4 pakuti ivya upe vyako viye ivya mu nkama. Lyene Tata wako aakalola ivya mu nkama alakupeela icilambu.

5 “Nupya lino mukupepa, mutaacita vino asomvi yakacita, pano yene lino yakupepa yatemwa ukwimilila umu masunagogi nu mu makoona ya miseo iikalamba pakuti antu yayalole. Cumi nkumunena ukuti yene yapokelela mpiti icilambu cao consi. 6 Lelo wemo lino ukupepa, ingila umu muputule wako nu kuyalako icisaasa, alino upepe kuli Tata wako aasiloleka. Lyene Tata wako aakalola ivya mu nkama alakupeela icilambu. 7 Lino ukupepa utaaswilizya kulanda ivili vimwi wakwe vino antu amu nsi yakacita, pano yene yakaelenganya ukuti ipepo lyao limauvwika ndi cakuti yalanda mazwi aingi. 8 Fwandi mutakolana nayo, pano Tata winu wamanya vino mukalonda na lino mutatala mwamulenga.

9 “Mulinzile ukupepa vii:

“‘Tata witu uwa kwi yulu, leka izina lyako licindikwe.* 10 Uwene wako wize. Kulonda kwako kucitike pano nsi wakwe vino kukucitika nu kwi yulu. 11 Tupeele icakulya ca wanda wi lelo; 12 nupya utwelele imembu* zitu, wakwe vino naswe tukaelela aakatuluvyanya. 13 Nupya utaleka tuponele umu kweziwa, lelo utupususye uku mwipe.’

14 “Pano nga mukwelela auzo lino yamuluvyanya, Tata winu uwa kwi yulu nawe alamwelela; 15 Lelo nga musikwelela auzo lino yamuluvyanya, Tata winu uwa kwi yulu nawe kwene atalamwelela.

16 “Lino mwata ukulya pa nsita imwi,* mutaaloleka aulanda pa manso, wakwe vino asomvi yakacita, pano yene yakaloleka aulanda pa manso pakuti antu yangayalola ukuti iyata ukulya. Cumi nkumunena ukuti yene yapokelela mpiti cilambu cao consi. 17 Lelo wemo lino wata ukulya pa nsita imwi, uwapakala mafuta uku mutwe nu kufulala pa manso, 18 pakuti utaloleka uku yantu ukuti usikulya, suka sile kuli Tata wako aasiloleka. Lyene Tata wako aakalola ivya mu nkama alakupeela icilambu.

19 “Mutaasungila ivyuma vinu pano nsi pano ivipepelya ni ngalawa vingalya, nupya pano apuupu yangingila nu kwiya. 20 Lelo mwasungila ivyuma vinu ukwi yulu kuno ivipepelya ni ngalawa vitanga vilye, nupya kuno apuupu yatanga ingile nu kwiya. 21 Pano ukuli icuma cako, u kukaaya nu mwenzo wako kwene.

22 “Uluswepo lwa mwili a manso. Fwandi ndi cakuti amanso yako yakulola sile pa cintu conga, umwili wako onsi ulaya umu luswepo. 23 Lelo ndi cakuti amanso yako yakulola pa viipe,* umwili wako onsi ulaya umu mfinzi. Nupya ndi cakuti uluswepo ululi muli wewe lwaya imfinzi, ale imfinzi iiyo ilaya ikulu sana.

24 “Kusi angaombela ya mwene yaili; pano angapata wenga nu kutemwa umuze, nanti ukuya ni cisinka kuli wenga nu kusuula umuze. Mutanga muombele Leza nga ni Vyuma.

25 “Ali mulandu uno nkumunenela ukuti: Tiini ukusakamala pa umi winu pali vino mumalya nanti vino mumamwa, nanti vino mumazwala. Uzye umi utacindama ukucila ivyakulya, nu mwili uzye utacindama ukucila ivyakuzwala? 26 Lolekesyini ivyunyi vya mu lwelele; visikomela imbezu nanti ukuzombola nanti ukwika umu nkoma, lelo Tata winu uwa kwi yulu akavilisya. Uzye mutacindama ukuvicila? 27 Uzye a weni pali mwemwe aangalundako akasita nanti sile akanono uku umi wakwe pa mulandu nu kusakamikwa? 28 Nupya, u mulandu ci uno mukusakamalila pa vyakuzwala? Sambililini kuli vino maluwa ya mu mpanga yakakula; yasiomba nanti ukupikula; 29 lelo nkumunena ukuti nanti cakuti Solomoni wazwalanga ivyakuzwala ivisuma sana, ataatazile azwale ukucila iluwa lyonga pali yaa. 30 Nomba vii nga avino Leza akazwika ivimelwa vya mu mpanga ivilipo ilelo nupya mutondo ivisumbilwa umu moto, uzye atalacizyapo ukuzwika mwemwe, mwe ya utailo unono? 31 Fwandi mutaasakamala nu kulanda imuti, ‘Tumalya vyani?’ nanti, ‘Tumamwa vyani?’ nanti, ‘Tumazwala vyani?’ 32 Pano vyonsi vii ali vino amu nsi yakalondesya. Tata winu uwa kwi yulu wamanya ukuti mukalondekwa ivintu vii vyonsi.

33 “Inkoleelo mwalonda Uwene wakwe Leza nu ulungami wakwe, lyene na vyonsi ivyasyala alamupeela. 34 Fwandi mutaasakamala pa vya wanda ulondelilepo, pano cila wanda waikwatila masakamika. Mwaelenganya sile pa ntazi zya wanda wi lelo.

7 “Tiini ukupingula pakuti namwe mutapingulwa; 2 pano vino mukapingula auzo ali vino namwe kwene yalamupingula, nupya icipimo cino mukapimilako auzo acino namwe kwene yalamupimilako. 3 Nomba u mulandu ci uno ukalolela kasote akali umwi linso lya mwinako, lelo usilola umulando uuli umwi linso lyako? 4 Nanti uzye unganena uli umwinako uti, ‘Leka nkufumizye kasote umwi linso lyako,’ lino wemo uli nu mulando umwi linso lyako? 5 We musomvi we! Inkoleelo utale ufumye umulando uuli umwi linso lyako, lyene alino umalola ningo ivya kufumya kasote akali umwi linso lya mwinako.

6 “Mutaapeela ica muzilo kuli ya simbwa nanti ukusumbila mawe ya mutengo kuli ya kapoli, pano yangavilyatola nupya yangamuzanza.

7 “Mwalenga, alino mulapeelwa; mwalonda, alino mulazana; mwakonkonsya, alino mulayulilwa; 8 pano wensi aakalenga akapeelwa, na wensi aakalonda akazana, na wensi aakakonkonsya akayulilwa. 9 Uzye a weni pali mwemwe wino umwanakwe nga wamulenga umukate, angamupeela iwe? 10 Nanti ndi cakuti walenga inswi, uzye angamupeela inzoka? 11 Fwandi ndi cakuti mwemo, nanti mwemwe yayembu, mwamanya ukupeela ivya upe ivisuma ku yana inu, uzye Tata winu uwa kwi yulu atalacizyapo ukupeela ivintu visuma kuli yano yakamulenga?

12 “Acino vyonsi vino mukalonda ukuti antu yamucitile avino namwe mulinzile ukuyacitila. Pano vii ali vino Masunde ni vyalembwa vyakwe ya Kasesema vikalanda.

13 “Ingilini pa mulyango ufyenkane, pano umulyango ukulu nu museo usaalale vikatwala ku ononesi, nupya aingi aakapitamo; 14 lelo umulyango unono nu museo ufyenkane vikatwala uku umi, nupya antu anono aakauzana.

15 “Cenjelini kuli ya kasesema ya ufi aakaiza kuli mwemwe ala yakuloleka wa mfwele, lelo mukasi i mimbulu iikalipe sana. 16 Mulayamanyila uku vizao vyao. Uzye antu yangakulula imyangazi nanti masamvu uku myunga? 17 Umu nzila ili yonga kwene, umuti onsi usuma ukaseeka ivizao ivisuma, lelo umuti onsi uwipe ukaseeka ivizao iviipe. 18 Umuti usuma utanga useeke ivizao iviipe, nanti umuti uwipe ukuseeka ivizao visuma. 19 Umuti onsi uusiseeka ivizao ivisuma ukakomwa nu kusumbilwa umu moto. 20 Fwandi antu yayo mulayamanyila uku vizao vyao.

21 “Asi wensi aakangama ati: ‘Mwene, Mwene, aalingila umu Wene wa kwi yulu, suka sile aakacita vino Tata uwa kwi yulu akalonda, aliwe alingilamo. 22 Pa wanda uuwa, aingi yalanguzya yati: ‘Mwene, Mwene, uzye tutaasesemile umwi zina lyako, nu kuzingila iviwa umwi zina lyako, alino nu kucitila ivizungusyo umwi zina lyako?’ 23 Lyene ndayanena inti: ‘Ntamumanyile! Fumini pano mwe ya kacita ya viipe!’

24 “Fwandi wensi akauvwa mazwi yane nu kuyalondela, alaya wa muntu wa mano uwakuuzile ing’anda yakwe pali cilwala. 25 Nupya imvula yatoonyile, na mulamba wizile, ni cimuza capungiile pa ng’anda iiyo, lelo itawile pano yakuuzilwe pali cilwala. 26 Nomba wensi akauvwa mazwi yane nu kukanayalondela, alaya wa muntu ciwelewele uwakuuzile ing’anda yakwe pa mucanga. 27 Nupya imvula yatoonyile, na mulamba wizile, ni cimuza capungiile pa ng’anda iiyo, nupya yawile iciipisye.”

28 Lino Yesu wamazile ukulanda mazwi yaa, iumba lya yantu lyazungwike sana pa misambilizizye yakwe, 29 pano wayasambilizyanga wa muntu uwali na maka kupusanako na ya kalemba yao.

8 Lyene lino Yesu watentemwike ukufuma pa mwamba, iumba ilikulu lyamulondiile. 2 Nupya uwalwile tembwe wizile nu kumufukamila, alino alanda ati: “Mwene, manyile ukuti ndi cakuti ukulonda ungampozya.” 3 Yesu nawe watambaliike ikasa nu kumulema, alino alanda ati: “Nkulonda! Pola.” Papo kwene sile, uwalwile tembwe wapozile. 4 Lyene Yesu wamunenyile ati: “Uteezya ukunena ali wensi, lelo pitanga ukalolekele kuli ya simapepo nu kupeela ivya upe wakwe vino cavwanzilwe umu Masunde yakwe Mose, pakuti yasininkizye ukuti watupola.”

5 Lino Yesu wingile umu Kapenaumu, umukalamba wa yasilika wizile kuli aliwe ala akumupaapata 6 ati: “Mwene, muomvi wane aizi umu ng’anda, akucula uku ulwale uwipisye, nupya asikukatuka.” 7 Nawe wamunenyile ati: “Namaiza mupozye.” 8 Umukalamba wa yasilika nawe waswike ati: “Mwene, ntalinzile ukuti uwize uwingile umu ng’anda umwane, lelo landa sile izwi, nu muomvi wane amapola. 9 Pano nani kwene nanti cakuti kwaya uwancila amaka, nakwata asilika aakanguvwila, nupya nkanena wenga inti, ‘Pitanga!’ nawe apita, na kuli muze inti, ‘Iza!’ nawe aiza, nu ku muomvi wane inti, ‘Cita cii!’ nawe acita.” 10 Lino Yesu uvwile vivyo, wazungwike nu kunena amulondelanga ati: “I cumi nkumunena ukuti, ntatala nalolapo umuntu wa utailo ukome wakwe uu umu Izlaeli. 11 Lelo nkumunena ukuti antu aingi ukufuma uku ufumondaka nu ku uwondaka yaliza ikale pali pamwi na Abulahamu, Isaki na Yakobo mu Wene wa kwi yulu; 12 lelo ana ya Wene yene yalasumbilwa ukunzi umu mfinzi. Kuko u kulaya kulila nu kulumanya incecete.” 13 Lyene Yesu wanenyile umukalamba wa yasilika ati: “Pitanga. Pa mulandu wakuti watulanga utailo, leka cino walanda cicitike.” Nupya lilyo kwene umuomvi wakwe wapozile.

14 Nupya lino Yesu wingile umu ng’anda yakwe Petulo, waweni nyinavyala wakwe Petulo aizi, ala watalwala impepo. 15 Lyene Yesu wamulemile ikasa, avino wapozile, nupya wakatwike atandika nu kumupekanyizizya ivyakulya. 16 Nupya lino cafisile manguzi, yatandike ukumuletela antu aingi aali ni viwa; nawe wazinzile iviwa ukuomvya izwi, nupya wapozizye na alwale yonsi, 17 pakuti mazwi aavwanzilwe ukupitila muli kasesema Ezaya yafikiliziwe, aakuti: “Wene watusendiile indwala zitu nu kuwaika.”

18 Lino Yesu waweni iumba lyatilimuzinguluka, wanenyile asambi yakwe ukuti yaye uku mbalama yuze. 19 Nupya kalemba wizile nu kumunena ati: “Kasambilizya, namakulondelanga konsi kuno waya.” 20 Lelo Yesu wamunenyile ati: “Ya nkusa yakwata iviwina muno yakaikala, ni vyunyi vyakwata ivinsanzo, lelo Umwana wa muntu wene atakwata ing’anda yakwe umwa kulaala.” 21 Lyene muze pa yasambi wamunenyile ati: “Mwene, tale leka mpite nkazike tata.” 22 Yesu nawe wamunenyile ati: “Ndondelange, leka afwe yaziike afwe yao.”

23 Nupya lino wakwezile uwato, asambi yakwe yamulondiile. 24 Lyene icimuza icikalamba cakatwike pali yemba, icakuti na manzi yatandike ukwingila umu wato pa mulandu na maimbi; lelo Yesu wene waizi. 25 Nupya yaile kuli aliwe nu kumuzyula, iyamunena iyati: “Mwene, tupususye, tuli apiipi nu kufwa!” 26 Lelo wayanenyile ati: “U mulandu ci uno mukuvwila intete, mwe ya utailo unono?” Lyene wakatwike nu kukalipila icimuza na yemba, navyo iviya na mya. 27 Fwandi asambi yazungwike nu kulanda iyati: “U muntu wa musango ci wii? Nanti sile u muza na yemba vikumuvwila.”

28 Lino waile ku mbalama yuze mu mpanga ya Gadala, wakomenkine na onsi yaili aakweti iviwa ala yakufuma uku malindi. Yaali aakalipe sana icakuti kutaali nanti aumwi uwasipanga ukupita umu museo uwa. 29 Nupya lolini! yapunzile iyati: “I vyani vino ukulonda kuli sweswe, we Mwana Leza? Uzye wiza uku kutucuzya lino insita itatala yafika?” 30 Akatalamukila, kwali ya kapoli aingi ala yakulya. 31 Lyene iviwa vyatandike ukumupaapata iviti: “Nga watufumya utuzingile muli ya kapoli.” 32 Nawe wavinenyile ati: “Pitangini!” Lino vyuvwile vivyo vyafumile nu kwingila muli ya kapoli, lyene ya kapoli yonsi yuutukile ukusuluke nu kuponela muli yemba iyamwela. 33 Lelo ya kacema yutwike, iyaya umu musumba nu kuyasimika vyonsi ivyacitiike, kumwi ni vyacitikile aonsi yaaya aali ni viwa. 34 Lyene yonsi umu musumba yaile uku kukomaanya Yesu, nupya lino yamuweni, yatandike ukumupaapata ukuti afume umu mpanga yao.

9 Lino Yesu wakwezile uwato, walamvile yemba nu kuya uku Kapenaumu, umu musumba uno wikalangamo. 2 Lyene antu yamuletiile umonsi uwali icite ala aizi pa cintamba.* Lino Yesu waweni utailo wao, wanenyile umonsi wiyo ati: “We mwana we, sipa! Imembu zyako zyelelwa.” 3 Lyene ya kalemba yatandike ukwelenganya iyati: “Umuntu wii akusaalula Leza.” 4 Lino Yesu wamanya vino yakwelenganya, walanzile ati: “U mulandu ci uno mukwelenganyizizya iviipe? 5 Uzye icangupale ukulanda i cilikwi, pa kulanda ukuti, ‘Imembu zyako zyelelwa,’ nanti ukuti, ‘Katuka utandike ukupita’? 6 Lelo pakuti mumanye ukuti Umwana wa muntu wakwata maka pano nsi aakwelela imembu—” lyene wanenyile umonsi uwali icite ati: “Katuka, senda icintamba cako, nu kuya ukwako.” 7 Nawe wakatwike nu kuya ukwakwe. 8 Lino antu yaweni vii, yuvwile intete, nupya yacindike Leza uwapeezile antu amaka ya musango uu.

9 Lyene lino Yesu wafumile kuuku, waweni umonsi umwi uwi zina lyakuti Mateo ala atenzi pa ng’anda ya musonko, nupya wamunenyile ati: “Ndondele.” Nawe wakatwike nu kumulondela. 10 Lino Yesu wali umu ng’anda ala akulya, ya kasonkisya aingi na ayembu izile nu kutandika ukuliila pamwi nawe na asambi yakwe. 11 Lelo lino Afaliseo yaweni vii, yuzizye asambi yakwe iyati: “U mulandu ci uno kasambilizya winu akaliila pamwi na ya kasonkisya na ayembu?” 12 Lino Yesu uvwile vivyo, walanzile ati: “Antu apuma yasilondekwa uwa kuyapozya, suka alwale. 13 Fwandi pitangini, mukasambilile vino cii cikupiliula: ‘Nkalonda uluse, asi ilambo foo.’ Pano ntiiza umu kwama alungame, suka ayembu.”

14 Lyene asambi yakwe Yoani yaile kuli Yesu nu kumuzya iyati: “U mulandu ci uno swemo na Afaliseo tukateela ukulya pa nsita imwi, lelo asambi yako yene yasiita ukulya?” 15 Yesu nawe wayaswike ati: “Auze yakwe siwinga, yasiiya nu ulanda lino yali nawe. Lelo manda yaliza lino siwinga alasendwa, nupya alino yalata ukulya. 16 Kusi umuntu aakakampika icikampa ca nsalu ipya pa cakuzwala ca mpiti, pano icikampa icipya cikalepula icakuzwala ca mpiti nupya icipongo cikakulilako. 17 Nupya antu yasyaika waini umupya umu nyambi zya mpiti. Pano ndi cakuti yacita vivyo, ale inyambi zimalepuka na waini aitike nupya inyambi zikaononeka. Lelo antu yakaika waini mupya umu nyambi izipya, nupya vyonsi vikasungwa ningo.”

18 Lino Yesu acili akuyanena vii, lolini! intunguluzi imwi izile kuli aliwe imufukamila nu kulanda iti: “Ndakai umwanane umukazyana afwile watafwa, lelo tuye twapita ukike amakasa yako pali aliwe nawe amaya nu umi.”

19 Lyene Yesu wakatwike kumwi na asambi yakwe, nu kumulondela. 20 Nupya lolini! umwanaci uwaculanga uku ulwale wa kufuma uwazi pa myaka 12 waile uku nsizi yakwe nu kulema uku nsenkebele zya cakuzwala cakwe, 21 pano welenganyanga ati: “Ndi cakuti nalema sile uku cakuzwala cakwe, namapola.” 22 Yesu wapiliwike nu kumulola, alino avwanga ati: “Mwana we, sipa! Utailo wako wakupozya.” Nupya ukufuma pa nsita kwene iiya, umwanaci wapozile.

23 Lyene lino Yesu wingile umu ng’anda ya ntunguluzi iiyo nu kulola antu aalizyanga imitolilo ni umba ilyalosyanga, 24 walanzile ati: “Fumilini panzi, pano umukazyana atafwile lelo watakasula sile.” Lino yuvwile vivyo yatandike ukumuseka nu kumutumfya. 25 Lino iumba lyafumiile panzi, wingile umu ng’anda nu kulema umukazyana api kasa, nawe wakatwike. 26 Nupya ilyasi lii lyasalangine umu mpanga iiya yonsi.

27 Lino Yesu wafumile kuuku, aonsi yaili aali impafu yamulondiile ala yakupunda iyati: “Mwana Devedi, tuvwileko luse.” 28 Lyene lino Yesu wingile umu ng’anda, aonsi yaaya impafu yaile kuli aliwe, nawe wayuzizye ati: “Uzye imutaila ukuti ningamupozya?” Nayo yaswike iyati: “Ee Mwene.” 29 Lyene wayalemile umu manso, ayanena ati: “Lekini ciye vivyo kwene kulingana nu utailo winu.” 30 Lyene yatandike ukulola. Nupya Yesu wayakonkomizye ati: “Muteezya ukunena nanti aumwi.” 31 Nomba lino yafumile panzi, yatandike ukusalanganya ilyasi pali aliwe mu mpanga iiya yonsi.

32 Lino aonsi yaaya yapitanga, lolini! antu yamuletiile umonsi ciulu uwali ni ciwa; 33 pa cisila cakuti Yesu wafumya iciwa, umonsi wino wali a ciulu watandike ukuvwanga. Lyene antu yazungwike nu kulanda iyati: “Kutatala kwacitika ca musango uu mu Izlaeli.” 34 Lelo Afaliseo yalandanga iyati: “Akafumya iviwa ukuomvya maka yakwe kateeka wa viwa.”

35 Nupya Yesu waile mu misumba yonsi ni mizi, ala akusambilizya umu masunagogi yao nu kusimikila ilyasi lisuma ilya Wene nu kupozya indwala zya misango yonsi. 36 Lino waweni maumba ya yantu, wayuvwilile uluse, pano yayacuzyanga nupya yaali atazyelwe wa mfwele izyaula kacema. 37 Lyene wanenyile asambi yakwe ati: “I cumi uzombozi uukulu, lelo aomvi iyacepa. 38 Acino lengini Umwineco wa uzombozi kuti atume aomvi mu mulimo wakwe uwa kuzombola.”

10 Lyene Yesu wamile asambi yakwe 12 nu kuyapeela amaka pakuti yafumya imipasi ikowele nu kupozya indwala zya misango yonsi.

2 Mazina ya yatumwa 12 aeya: Uwa kutandikilako a Simoni, aakaamwa ukuti Petulo, na Andeleya umwina wakwe Petulo; Yakobo na Yoani ya mwana Zebedi; 3 Filipi na Batolomeo; Tomasi na Mateo kasonkisya wa misonko; Yakobo mwana Alufeo; Tandeo; 4 Simoni umucincile;* na Yuda Iskalyoti uwizile afutuka Yesu.

5 Lyene Yesu watumile atumwa yaa 12 nu kuyanena ati: “Mutaya ku yantu asi Ayuda, nupya mutingila umu musumba uli onsi uwa mu Samaliya; 6 lelo mwaya sile uku yantu amu luko lwa ina Izlaeli aya wa mfwele iziponge. 7 Lino mukupita, mwasimikila ala mukuti ‘Uwene wa kwi yulu watiupalama.’ 8 Mwapozya alwale, mwatuutulula afwe, mwapozya yakwe tembwe, nu kufumya iviwa. Mwapeezilwe sile uwila, namwe mwapeela uwila. 9 Mutasenda goldi, siuva, nanti koopa umu vikwama vinu vya mpiya, 10 nanti ukusenda icola ca vyakulya, nanti ivyakuzwala viili,* nanti indyatu, nanti intuwa, pano umuomvi walinga ukupeelwa ivyakulya.

11 “Mu musumba onsi nanti umuzi uno mwingilamo, londini umuntu aangalonda ukuvwa, nupya mwikale nawe mpaka mukafumemo. 12 Lino mwingila umu ng’anda, lamukini amu ng’anda iiyo. 13 Ndi cakuti yakulonda ukuvwa, lekini umutende winu uye pa ng’anda iiyo, lelo nga yatakulonda ukuvwa, lekini umutende winu umuwelele. 14 Lelo ndi cakuti umwi atamupokelile nanti ukuvwa uku mazwi inu, pa kufuma pa ng’anda iiyo nanti umu musumba uwo kuntini ulukungu uku ngazo zinu. 15 I cumi nkumunena ukuti pa Wanda wa Upinguzi cilipisya uku musumba uwo ukucila vino cali kuli Sodoma na Gomola.

16 “Lolini! Nkumutuma wa mfwele mu mimbulu; fwandi muye acenjele wa nzoka nupya muye aakaele wa nkunda. 17 Nupya mwacenjela uku yantu, pano yalamutwala uku vilye nu kumuma ivikoti mu masunagogi* yao. 18 Nupya yalamutwala kuli ya kateeka na kuli ya mwene pa mulandu wane, pakuti yene na antu ya mu nsi yangasimikilwa pali nene. 19 Lelo lino yalamutwala, mutaca musakamale pali vino mulavwanga nanti inzila ino mulavwangilamo, pano mazwi yano mulavwanga yalapeelwa kuli mwemwe pa nsita kwene iiyo; 20 pano asi mwemwe sile mulavwanga, lelo umupasi wakwe Tata winu ulamwavwa. 21 Nupya umwina alakomisya umwina wakwe, na isi alakomisya umwanakwe, ana nayo yalakatukila avyazi nu kuyakomisya. 22 Nupya antu yonsi yalamupata pa mulandu wi zina lyane, lelo uwazizimizya ukufika nu ku mpela wene alapusuka. 23 Lino yamucuzya umu musumba umwi, muce muutukile uku musumba uze, pano i cumi nkumunena ukuti, mutalamala ukusimikila umu misumba yonsi ya mu Izlaeli ale Umwana wa muntu wataiza.

24 “Musambi ataacila kasambilizya wakwe, nu muzya ataacila umusambazi wakwe. 25 Calinga umusambi ukuya wakwe kasambilizya wakwe, nu muzya ukuya wa musambazi wakwe. Ndi cakuti antu yakaama umwineco wa ng’anda ukuti Belezebu,* uzye amu ng’anda yakwe yene cingapela kwi? 26 Fwandi mutaayatiina, pano kutaya icafiswa icitalasokololwa, nanti inkama italamanyikwa. 27 Vino nkumunenela umu mfinzi, mwavilandila pa luswepo, nupya vino namutotoza mwavilandila apaswe. 28 Nupya mutaatiina yayo aakakoma umwili lelo atanga yakome umi; lelo mwatiina wiyo angonona vyoili kwene umi nu mwili umu Gehena.* 29 Uzye utunyi twili utunono tusikalwa na kalupiya kanono sana?* Nomba kusi nanti konga akakapona* pansi ukwaula ukuti Tata winu amanye. 30 Nupya ni nyele zya ku mitwe inu zyonsi nazyo kwene zyapendwa. 31 Fwandi mutaatiina; pano mwacindama ukucila utunyi utwingi.

32 “Wensi uwanzumila pa manso ya yantu, nani ndamuzumila pa manso yakwe Tata uwa kwi yulu. 33 Lelo wensi uwankana pa manso ya yantu, nani kwene ndamukana pa manso yakwe Tata uwa kwi yulu. 34 Mutelenganya ukuti niiza uku kuleta umutende pano nsi; ntiiza uku kuleta umutende, suka ulupanga. 35 Pano niiza uku kupaatukanya umwana umonsi na isi, nu mwana umukazyana na nyina, nu mukazyana uwatwalwa na nyinavyala. 36 I cumi alwani ya muntu yalaya amu ng’anda yakwe kwene. 37 Wensi uwatemwa sana isi nanti nyina ukucila nene atalinzile ukuya umusambi wane; nupya wensi uwatemwa sana umwanakwe umonsi nanti umukazyana ukucila nene atalinzile ukuya umusambi wane. 38 Nupya wensi aakakana ukusenda icimuti* cakwe ica kucuziwilwapo nu kundondela, atalinzile ukuya umusambi wane. 39 Wensi aakalonda ukusungilila umi wakwe alauponzya, na wensi uwaponzya umi wakwe pa mulandu wane alauzana.

40 “Wensi uwamupokelela ala nani kwene wampokelela, na wensi uwampokelela ala wapokelela nu wantumile. 41 Wensi uwapokelela umwi pa mulandu wakuti a kasesema alapokelela icilambu cakwe kasesema, nupya wensi uwapokelela umwi pa mulandu wakuti u mulungami alapokelela icilambu ca muntu umulungami. 42 Nupya wensi uwapeela wenga pali yaa anono kapu wenga sile uwa manzi ya kumwa aazuke pa mulandu wa kuti u musambi wane, i cumi namunena ukuti alapeelwa icilambu.”

11 Lino Yesu wamazile ukunena asambi yakwe 12 ivya kucita, wafumileko aya mu kusambilizya nu kusimikila mu misumba yuze.

2 Lino Yoani wali mu cifungo, uvwile pa milimo ino Klistu waombanga, nupya watumile asambi yakwe 3 ukuyamuzya yati: “Uzye a wewe twalolelanga nanti kuliza muze?” 4 Yesu nawe wayaswike ati: “Swililini kuli Yoani mukamunene pali vino mukuvwa nu kulola: 5 Impafu zikulola na alemale yakupita, yakwe tembwe yakupoziwa na ya cipuuli yakuvwa, afwe yakutuutululwa na apiina yakuvwa ilyasi lisuma. 6 Uwa nsansa a wiyo asiita ukuya nu utailo pa mulandu wane.”

7 Lino asambi yakwe Yoani yapita, Yesu watandike ukulanda ukwi umba pali Yoani ati: “I cani cino mwaile umu kulola mu lwanga? Uzye u muntu umutonte uwaya wi tete ilikutenkana pa mulandu nu muza? 8 I cani fwandi cino mwaile umu kulola? Uzye u muntu uwazwite ivyakuzwala ivisuma? Aakazwala ivyakuzwala ivisuma yakaikala umu mang’anda yakwe ya mwene. 9 I cani fwandi cino mwailileko? Uzye uku kulola kasesema? Ee, nkumunena ukuti wali u mucindame ukucila na pali ya kasesema. 10 Wikwene awino amalembo yalanzile iyati: ‘Ndatuma inkombe iilakukolelela,* iilakupekanyizizya inzila lino utali uwize!’ 11 I cumi nkumunena ukuti, pali yano yavyalwa mu yanaci, kutatala kwaya umukalamba ukucila pali Yoani Kabatizya, lelo umunono mu Wene wa kwi yulu u mukalamba pali aliwe. 12 Ukufuma umu manda yakwe Yoani Kabatizya ukufika na ndakai, antu yakaezya ukwingila umu Wene wa kwi yulu, nupya aakaezya na maka yakaingila. 13 Pano vyonsi ivyalembwa mu mabuku yakwe ya kasesema nu mu masunde vyasoowilwe ukufika umu manda yakwe Yoani; 14 nupya nga mukulonda, mungazumila amazwi yakuti Yoani ali ‘Eliya wino ya kasesema yalanzile ukuti aliza.’ 15 Aali na matwi auvwe.

16 A kuli ya weni kuno ningakolanya inkulo yii? Ili wa yana anono aatenzi pa maliketi ale yakupundilila auze, 17 yakuti: ‘Itumulizizya imitolilo, nomba mutacinyile; ituloosya, lelo ukwaula ukuti muye nu ulanda.’ 18 Vikwene avino cali na lino Yoani wizile, atalyanga nanti ukumwa, lelo antu yatangi, ‘Ali ni ciwa.’ 19 Umwana wa muntu wiza, akalya nu kumwa, lelo antu yakalanda yakuti, ‘Wapunuka, a cakolwa nupya a cuza wakwe ya kasonkisya ya misonko na ayembu.’ Nomba ivilungame vino umuntu akacita i vikalanga ukuti u wa mano.”

20 Lyene watandike ukukalipila antu amu misumba ino wacitiilemo ivizungusyo ivingi, pano yataalapiile: 21 “Kalanda kuli mwe yantu amu Kolazini! Kalanda kuli mwe yantu amu Betisaida! pano ndi cakuti vizungusyo ivyacitiilwe umu misumba inu i vicitilwa uku yantu ya mu Tuli na Sidoni, nga yalapiile mpiti nu kuzwala masaaka nu kwikala umwi twi. 22 Lelo nkumunena ukuti, pa Wanda wa Upinguzi cilipisya kuli mwemwe ukucila Tuli na Sidoni. 23 Nupya namwe mwe yantu ya mu Kapenaumu, uzye mukwelenganya ukuti Leza alamucindamika ukucila ivintu vyonsi ivyasyala? Alamutwala ku malindi.* Pano ndi cakuti ivizungusyo ivyacitiike muli mwemwe ivicitika umu Sodoma, na ndakai kwene umusumba uwo nga apano waya. 24 Lelo nkumunena ukuti, pa Wanda wa Upinguzi cilipisya kuli mwemwe ukucila Sodoma na Gomola.”

25 Pa nsita iiya Yesu walanzile ati: “Tata, we Mwene wi yulu ni insi, nkukulumbanya paswe, pano wafisa ivintu vii ku yantu ya mano na asambilile nu kuvisokolola ku yantu aicefya wa yana anono. 26 Ee, Tata, pano cikwene acino walondanga ukuti cicitike.” 27 Nupya Yesu watiile: “Tata aliwe wampeela ivintu vyonsi nupya kusi uwamanya ningo Umwana suka Tata, nanti uwamanya ningo Tata suka Umwana, na wensi wino Umwana watemwa ukusokolwela vino Isi waya. 28 Izini kuli nene mwensi mwemuno mukacula na mwemuno mwasenda ivisendo ivifine, nani ndamulenga ukupuza. 29 Zwalini* iyoko lyane nu kusambilila kuli nene, pano nafuuka nupya naicefya,* nupya mulapuza. 30 Pano iyoko lyane lyanguka ni cisendo cane cangupala.”

12 Pa nsita iiya Yesu wapisile mu vyalo vya ngano pa wanda wi Sabata. Asambi yakwe yuvwile inzala nupya yatandike ukutinkula imitwe ya ngano nu kulya. 2 Lino Afaliseo yaweni vivyo, yamunenyile iyati: “Lola! Asambi yako yakucita cino isunde lyakanya pa wanda wi Sabata.” 3 Nawe wayanenyile ati: “Uzye mutaabelenga vino Devedi wacisile lino wene pamwi na aonsi yano wali nayo yuvwile inzala? 4 Wingile umu ng’anda yakwe Leza nu kusenda imikate ya muzilo, nupya wene capamwi na aonsi yano wali nayo yaliile imikate iiyo. Yataakweti insambu zya kulya imikate, lelo aakweti sile insambu zya kulya imikate iiyo aasimapepo. 5 Nanti uzye mutabelenga umu masunde ukuti pa manda ya Masabata ya simapepo aombanga umwi tempele yatapeelwanga umulandu wa kutama isunde lya kusunga Isabata? 6 Lelo nkumunena ukuti umwi aacizile itempele ali pano. 7 Lelo ndi cakuti mwamanyile upiliulo wi lembo ilikati, ‘Nkalonda uluse asi ilambo foo,’ nga mutapeezile antu yaa aakaele umulandu. 8 Pano Umwana wa muntu wakwata maka api Sabata.”

9 Lino wafumile uku ncende iiya, waile umwi sunagogi,* 10 nupya kwali umonsi umwi uwali umulemale ikasa, fwandi yuzizye Yesu iyati, “Uzye masunde yazumilizya ukupozya pa wanda wi Sabata?” pano yalondanga ukumupeela umulandu. 11 Nawe wayanenyile ati: “Ndi cakuti umwi pali mwemwe wakweti imfwele yonga, lyene yaponela umu ciwina pa wanda wi Sabata, uzye atange aifumye? 12 Umuntu wacindama sana ukucila imfwele! Fwandi isunde lyazumilizya ukucita icisuma pa wanda wi Sabata.” 13 Lyene wanenyile umonsi ati: “Tambalika ikasa lyako.” Nawe walitambalike nupya lyapozile iliya wa lyuze. 14 Lelo Afaliseo yafumilepo nu kuyapangana ukuti yakome Yesu. 15 Lino Yesu wilwike vivyo, wafumileko. Antu aingi yamulondiile nupya wapozizye alwale yonsi. 16 Lelo wayakonkomizye ukuti yateezya ukunena antu pali aliwe, 17 pakuti amazwi aavwanzilwe ukupitila muli kasesema Ezaya yafikiliziwe, aakuti:

18 “Lolini! Umuomvi wane wino nasoolola, wino natemwa nupya wino nkazangilamo! Indiika umupasi wane pali aliwe nupya alalenga amu nsi yamanye ningo vino umulinganya waya. 19 Atalalemanila na antu nanti ukupunda, nupya kusi aaluvwa izwi lyakwe mu miseo ikalamba. 20 Atalavuna itete ilifwampe, nupya atalazimya utambi uuli apiipi nu kuzima, kufikila lino alaleta umulinganya. 21 Mu cumi inko zyonsi zilataila umwi zina lyakwe.”

22 Lyene yamuletiile umuntu uwali ni ciwa, uwali impafu nupya ciulu, nawe wamupozizye icakuti atandika nu kuvwanga nu kulola. 23 Lyene antu yonsi yazungwike iyatandika nu kulanda ukuti: “Uzye ale wii angaya a Mwana Devedi?” 24 Lino Afaliseo yuvwile vivyo, yavwanzile iyati: “Umuntu wii akafumya iviwa ukuomvya amaka yakwe Belezebu* kateeka wa viwa.” 25 Lino wamanyile vino yelenganyanga, wayanenyile ati: “Uwene onsi uukapaatukana ukaawa, nu musumba onsi nanti ing’anda ivikapaatukana vikaawa. 26 Mu nzila ili yonga kwene, ndi cakuti Satana wafumya Satana ale waipaatukanya umwineco; uzye uwene wakwe ungatwalilila uli? 27 Nupya ndi cakuti nkafumya iviwa ukuomvya amaka yakwe Belezebu, uzye ale ana inu yene yakavifumizya umu maka yakwe weni? Ali mulandu uno ana inu yalamupingwila. 28 Lelo ndi cakuti nkafumya iviwa ukuomvya umupasi wakwe Leza, ale umu cumi Uwene wakwe Leza uli pali mwemwe. 29 Nanti uzye umuntu umwi angingila uli umu ng’anda ya muntu uwakwata amaka nu kumwiyila ivintu vyakwe ukwaula ukuti atale anyepe umuntu wiyo? 30 Wensi aasi ku lusansa lwane ala akundwisya, na wensi asiombela pamwi nani ukwavwa antu ukwiza kuli nene ala akuyafumya kuli nene.

31 “Ali cino nkumunena ukuti, uluyembu lonsi ni miponto ya yantu vilelelwa, lelo uwapontela umupasi wene atalelelwa. 32 Wensi uwapontela Umwana wa muntu alelelwa; lelo wensi uwapontela umupasi wa muzilo wene atalelelwa ndakai* nu ku nkoleelo kwene.

33 “Mungalenga umuti ukuya usuma nu kulenga ivizao vya muti uwo ukuya ivisuma, nanti ukulenga umuti ukuya uwipe nu kulenga ivizao vya muti uwo ukuya iviole, pano umuti ukamanyikilwa uku vizao. 34 Mwe yana ya nzoka mwe, uzye mungavwanga uli ivintu ivisuma lino mwemwe yaipe? Pano umuntu akalanda ivyaya umu mwenzo wakwe. 35 Umuntu umusuma akalanda ivisuma pano i vyazuula umu mwenzo wakwe, nu muntu umwipe akalanda iviipe pano i vyazuula umu mwenzo wakwe. 36 Nkumunena ukuti antu yalapingulwa pa Wanda wa Upinguzi pa mazwi yonsi aipe yano yakalanda; 37 pano ndi cakuti amazwi yako asuma, Leza alakulola ukuti wewe kacita wa visuma, lelo ndi cakuti amazwi yako aipe, Leza alakupingula.”

38 Lyene yamwi pali ya kalemba na Afaliseo yalanzile iyati: “Kasambilizya tukulonda utucitile icizungusyo.” 39 Nawe wayaswike ati: “Inkulo iipe nupya iitaya ni cisinka* ikalondesya ukulola icizungusyo, lelo kusi icizungusyo cino ilalola ukucila pa cizungusyo cakwe kasesema Yona. 40 Wakwe vino Yona wali umunda ya ciswi icikulu pa manda yatatu umusanya nu usiku, avino nu Mwana wa muntu alaya umwi lindi pa manda yatatu umusanya nu usiku. 41 Antu ya mu Ninive yalatuutululwa pa wanda wa upinguzi pamwi ni nkulo yii nu kuipeela umulandu, pano yene yalapiile lino Yona wayasimikile. Nomba lolini! aacizile pali Yona ali pano. 42 Namwene wa ku Syeba* alatuutululwa pamwi ni nkulo yii pa Wanda wa Upinguzi nu kuipeela umulandu, pano wene wafumile uku mpanga ya kutali kuti aize auvwe mano yakwe Solomoni. Nomba lolini! aacizile pali Solomoni ali pano.

43 “Lino umupasi ukowele wafuma umu muntu, ukapita umu ncende umutaya amanzi ale ukulonda apa kupuzila, lelo usipazana. 44 Lyene ukati, ‘Namaswilila umu ng’anda ino nafumilemo,’ nupya lino wafika ukazana umu ng’anda musi nanti cimwi nomba ala imuzifiwa nu kuyemviwa. 45 Lyene ukaya iusenda mipasi 7 ipusanepusane iipisye ukuucila, nupya lino imipasi iiyo iingila mu muntu wiyo ikaikala mumo kwene; nupya imiyele ya muntu wiyo ikaipisya ukucila vino wali pa kutandika. Vikwene avino cilaya nu ku nkulo yii iipe.”

46 Lino Yesu walandanga ukwi umba, aatowakwe na nyina iizile iimilila panzi, ala yakulonda ukulanda nawe. 47 Fwandi umwi wamunenyile ati: “Lola! Ya mayo yako na aatowako yaimi panzi yakulonda ukulanda naawe.” 48 Yesu nawe wamwaswike ati: “Uzye mayo a weni, nupya aatowane aaweni?” 49 Lyene wasonsile ikasa uku yasambi yakwe, alino alanda ati: “Lola! Mayo na aatowane aeya! 50 Pano wensi aakacita ukulonda kwakwe Tata uwa kwi yulu, wiyo kwene ali mwinane nupya ali kaci wane nupya ali mayo.”

13 Pa wanda uuwa Yesu wafumile ku ng’anda iiya nu kuya ikala umu mbali yakwe yemba. 2 Nupya iumba ilikulu lyakolongine kuli aliwe icakuti nawe wingiile umu wato amuno aikala, nupya iumba nalyo limiliile umu mbali yakwe yemba. 3 Lyene wayasambilizye ivintu ivingi ukuomvya ivilangililo, ati: “Kata wa mbezu waile umu kuta imbezu. 4 Lino watanga imbezu, zimwi zyaponiile umu mbali ya museo, nupya ivyunyi vizile nu kuzikompa. 5 Zyuze zyaponiile pali cilwala apataali umusili uwingi, nupya zyamezile zuwa pano zitaazikime sana. 6 Nomba lino kasanya kawazile, koosile imbezu zizyo, nupya zyumile pano zitaakweti imisisi. 7 Zyuze nazyo zyaponiile pa myunga nupya imyunga yakuzile nu kuzivimbilikizya. 8 Lyene zyuze nazyo zyaponiile pa musili usuma, nupya zyatandike ukuseeka ivizao, lumwi lwaseesile 100, luze 60, luze nalo 30. 9 Aali na matwi auvwe.”

10 Lyene asambi yaile kuli aliwe nu kumuzya iyati: “U mulandu ci uno ukalandila nayo ukuomvya ivilangililo?” 11 Nawe wayaswike ati: “Mwemo mwapeelwa amano ya kumanya inkama zya Wene wa kwi yulu, lelo yene yatapeelwa. 12 Pano wensi uwakwata, alapeelelwapo na vyuze, nupya alakwata ivingi; lelo wensi aatakwata, alapokwa na tonsi tuno akaelenganya ukuti wakwata. 13 Ali cino nkalandila kuli aliyo ukuomvya vilangililo; pano yakalola lelo yasimanya vino yakulola, yakauvwa lelo yasimanya vino yakuvwa, nupya yasiiluka. 14 Nupya usesemo wakwe Ezaya ukufikilizya kuli aliyo. Ukati: ‘Muluvwa, lelo mutaliluka, nupya mulalola, lelo mutalamanya. 15 Pano imyenzo ya yantu yaa yakoma, yakauvwa lelo yasicitapo icili consi, yaazyatika manso yao pakuti yataalola, nupya yasiuvwa na matwi yao, yasyailuka, nupya yasilonda ukulapila pakuti njapozye.’

16 “Lelo mwemo mwapaalwa pano amanso inu yakalola na matwi inu yakauvwa. 17 I cumi nkumunena ukuti, ya kasesema aingi na antu alungami yalondesyanga ukulola ivintu vino mwemo mukulola lelo yataaviweni, nupya yalondesyanga ukuvwa ivintu vino mwemo mukuvwa lelo yataavyuvwile.

18 “Lyene uvwini upiliulo wa cilangililo cakwe kata wa mbezu. 19 Ulumbezu ulwaponiile umu mbali ya museo, u muntu aakauvwa ilyasi lya Wene nu kukanailuka, nu mulwani akaiza asompola ulumbezu ulwakomiilwe umu mwenzo wakwe. 20 Lyene ulumbezu ulwaponiile pali cilwala, u muntu aakauvwa ilyasi lya Wene nu kulipokelela ni nsansa. 21 Lelo asikwata imisisi nomba akatwalilila pa nsita inono, nupya nga wakwata intazi nanti ukucuziwa pa mulandu ni lyasi lya Wene, akata ukulilondela. 22 Lyene ulumbezu ulwaponiile pa myunga, u muntu aakauvwa ilyasi lya Wene, nomba masakamika ya muno nsi* nu kulondesya ivyuma vikavimbilikizya ilyasi lya Wene, nupya lisiseeka. 23 Nupya ulumbezu ulwaponiile pa musili usuma, u muntu akauvwa ilyasi lya Wene nu kwiluka, akaseeka ivizao, umwi akaseeka ivizao 100, umwi nawe ivili 60, alino muze nawe 30.”

24 Wayanenyile icilangililo na cuze ati: “Uwene wa kwi yulu waya wa muntu uwatiile imbezu zisuma umu calo cakwe. 25 Lino antu yaizi usiku, umulwani wakwe wizile ata kalolo mu calo ca ngano nu kupita. 26 Lino ingano zyamezile nu kufukula, alino kalolo nawe walolike. 27 Lyene aomvi ya mwineco wa ng’anda yaile kuli aliwe nu kumuzya iyati, ‘Mwene uzye utaatile imbezu zisuma umu calo cako? Nga lyene kalolo wafuma kwi?’ 28 Nawe wayaswike ati, ‘U mulwani uwacisile vii.’ Aomvi yamuzizye yati, ‘Uzye ukulonda tukipoolemo kalolo?’ 29 Nawe wayaswike ati, ‘Awe, pano lino mukwipula kalolo mungipwila kumwi ni ngano. 30 Lekini vyonsi vikulile capamwi ukufika insita ya uzombozi, nupya umu nsita ya uzombozi ndanena ya kazombola ukuti: Mutale mukolonganike kalolo nu kumunyepa umu myanzi nu kumoca; alino mukolonganike ingano umu nkoma yane.’”

31 Wayanenyile icilangililo na cuze ati: “Uwene wa kwi yulu waya wa lumbezu lwakwe musunta* luno muntu waile ata mu calo cakwe. 32 Ulumbezu luu ali luno lwacepesya sana pa mbezu zyonsi, nomba nga lwakula lukaya i cimelwa icikulu sana kucila misaalu yonsi nupya lukaaya umuti, ni vyunyi vikaiza nu kwikala ku misambo.”

33 Wayanenyile icilangililo na cuze ati: “Uwene wa kwi yulu waya wa citutumusi cino umwanaci watozile auminkanya na fulaulo makilogalamu 10 kufikila umunya onsi iututumuka.”

34 Yesu walanzile vyonsi vii ukwi umba ukuomvya ivilangililo. I cumi atatazile alanda nayo ukwaula icilangililo, 35 pakuti cifikiliziwe icalanzilwe ukupitila muli kasesema uwatile: “Ndalanda ukuomvya ivilangililo; ndasokolola ivintu ivyafisama ukufuma pa kutandika kwa nsi.”

36 Lyene lino wanena iumba ukuti lipite, wingile umu ng’anda. Asambi yaile kuli aliwe nu kumunena iyati: “Tulondolwele upiliulo wa cilangililo cakwe kalolo umu calo.” 37 Nawe wayaswike ati: “Kata wa mbezu zisuma u Mwana wa muntu; 38 icalo iinsi. Lyene imbezu zisuma aana ya mu Wene, lelo kalolo aana ya mwipe, 39 nupya umulwani uwatiile kalolo a Ciwa. Uzombozi i mpelelekezyo ya nsi,* na azombozi aa malaika. 40 Wakwe viivi kwene vino yakakolonganika kalolo nu kumoca mu moto, ali vino cilaya nu ku mpelelekezyo ya nsi.* 41 Umwana wa muntu alatuma ya malaika yakwe, nupya yalakolonganika aakalenga antu yauze ukuluvyanya kumwi na ya kacita ya viipe nu ku yafumya mu Wene wakwe, 42 nupya yalayasumbila umwi lungu lya moto. Kuko u kulaya ukulila nu kulumanya incecete. 43 Pa nsita iiya aalungami yalaengesa wi lanzi mu Wene wakwe Isi uwa kwi yulu. Aali na matwi auvwe.

44 “Uwene wa kwi yulu waya wa cuma cino yafisile umu mpanga, cino umuntu wazanyile nu kufisa; lyene pa mulandu ni nsansa, waile akazya vyonsi vino wakweti nu kukala impanga iiyo.

45 “Nupya Uwene wa kwi yulu waya wa muculuzi uwaile mu kulonda mawe ya mutengo. 46 Lino wazanyile iwe lyonga ilya mutengo ukulu sana, wapisile nu kuyakazya zuwa vyonsi vino wakweti nu kukala iwe lilyo.

47 “Nupya Uwene wa kwi yulu waya wa mukwau uno yasumbiile muli yemba nu kulema inswi zya misango ipusanepusane. 48 Lino umukwau wazuzile, yautintiile ku cituntu, nupya iikazile nu kusoolola inswi izisuma iyazika mu viya, lelo inswi iziipe yazisumvile. 49 Vikwene avino cilaya nu ku mpelelekezyo ya nsi.* Ya malaika yaliza nu kupaatula antu aipe ukufuma ku yalungami 50 nupya yalayasumbila umwi lungu lya moto. Kuko u kulaya ukulila nu kulumanya incecete.

51 Lyene Yesu wayuzizye ati: “Uzye mwatimwiluka ivintu vii vyonsi?” Nayo yamwaswike iyati: “Ee Mwene.” 52 Lyene wayanenyile ati: “Fwandi kasambilizya wa yantu wensi uwasambiliziwa pa Wene wa kwi yulu waya wa mwineco wa ng’anda aakafumya umu cipao cakwe ivintu ivipya ni vya mpiti.”

53 Lino Yesu wamazile ukulanda ivilangililo vii, wafumileko. 54 Lino waile uku mpanga ya kumwao, watandike ukusambilizya antu mu masunagogi,* nupya yazungwike nu kulanda iyati: “Aekwi kuno umuntu wii wafumya mano yaa na maka ya kucita ivizungusyo vii? 55 Uzye wii asi mwana kawaza? Uzye nyina asi Maliya, nupya uzye aina yakwe asi Yakobo, Jozefu, Simoni na Yuda? 56 Nupya uzye ya kaci yakwe yonsi tutaaya nayo kuno? Aekwi fwandi kuno umuntu wii wafumya vyonsi vii?” 57 Fwandi yakanyile ukumutaila. Lelo Yesu wayanenyile ati: “Kasesema asicindikwa ukumwao nu ku ya mu ng’anda yakwe.” 58 Nupya ataacisile ivizungusyo ivingi kuuku pano antu yataakweti utailo.

14 Pa nsita iiya, umwene Helodi uvwile ilyasi pali Yesu 2 nupya wanenyile aomvi yakwe ati: “Wii a Yoani Kabatizya. Wene watuutululwa ukufuma uku yafwe, nupya ali mulandu uno akucitila ivizungusyo.” 3 Helodi* walemile Yoani, amunyepa nu kumuyalila umu cifungo pa mulandu wakwe Helodiya. Ku cisila, Helodiya wali u muci wakwe Filipi, nupya Filipi wali a silenzi wakwe Helodi. 4 Pano Yoani wamunenanga ukuti: “Ukulingana ni sunde utalinzile ukutwala Helodiya.” 5 Lelo nanti cakuti Helodi walondanga ukukoma Yoani, watiinanga antu, pano yalolanga Yoani ukuti a kasesema. 6 Lelo lino kwali ukuzevya uwanda wa kuvyalwa kwakwe Helodi, mwana Helodiya umukazyana wacinyile nu kuzanzya sana Helodi 7 icakuti Helodi wamulavile nu kulapa ukuti amamupeela consi cino walenga. 8 Lyene umukazyana walondiile vino nyina wamunenyile, nu kulanda ati: “Mpeelini likwene umutwe wakwe Yoani Kabatizya pa mbale.” 9 Nanti cakuti umwene uvwile ulanda, walanzile ukuti umutwe wakwe Yoani upeelwe ku mukazyana, pa mulandu nu mulapo uno walafile pa yantu yano wamile. 10 Fwandi watumile aakuya putula umutwe wakwe Yoani umu cifungo. 11 Lyene yaleesile umutwe wakwe pa mbale nu kupeela umukazyana, nawe wautwazile kuli nyina. 12 Pa cisila, asambi yakwe Yoani yaile iyatola icitumbi nu kuciziika; nupya yaile iyanena na Yesu pali cino cacitiike. 13 Lino Yesu uvwile vivyo, wafumileko apita nu wato aya uku ncende kuno kutaali antu pakuti akaye wenga. Lelo lino maumba yamanyile kuno Yesu waile, yafumile umu misumba iyamulondela ulwa pansi.

14 Lino wafisile umu mbali yakwe yemba, waweni antu aingi sana, wayuvwilile uluse, nupya wapozizye na alwale. 15 Lelo lino cafisile manguzi, asambi yakwe yaile kuli aliwe nu kumunena iyati: “Paa pano tuli a pa mpanga nupya ilanzi lyasya liwe; fwandi nena antu yaa yapita, pakuti yaye umu mizi nu kuyaikalila ivyakulya.” 16 Lelo wayanenyile ati: “Yatalinzile ukupita; mwemwe kwene yapeelini ivyakuti yalye.” 17 Nayo yamunenyile iyati: “Tukweti sile imikate 5 ni nswi ziili.” 18 Watiile: “Letini kuno.” 19 Nupya wanenyile antu ukwikala pa masote. Lyene watozile imikate 5 ni nswi ziili, alingamila umwi yulu, alino apepa, nupya pa cisila ca kumokoola imikate, wapeezile asambi yakwe, asambi yakwe nayo yapeezile maumba. 20 Fwandi yonsi yaliile iikuta, nupya yakolonganike ivyasyazile iyazuzya imise 12. 21 Nupya aaliile yali aonsi apiipi na 5,000, ukwaula ukupendelako anaci na ana anono. 22 Lyene lilyo kwene sile, Yesu wanenyile asambi yakwe ukuti yakwele uwato nu kumukolelela uku mbalama yuze, wene wasyazile ala akunena maumba ukuti yapite.

23 Pa cisila ca kunena maumba kuti yapite, waile wenga uku mwamba umu kupepa. Lino kwafiisile, wali kuuku kwene wenga. 24 Lyene pa nsita yii uwato umwali asambi wali patali ni cituntu, nupya maimbi yasunkanyanga uwato pa mulandu ni cimuza icafumanga kuno yayanga. 25 Lelo pa macaca* Yesu waile uku yasambi ala akupita pali yemba. 26 Lino asambi yamuweni akupita pali yemba, yatiinyile iyalanda iyati: “Mwe lolini cilolwa!” Nupya yatandike ukupunda ale intete iziyalema. 27 Nomba Yesu wayanenyile ati: “Sipini! Anene; mutuvwa intete.” 28 Petulo nawe wamwaswike ati: “Mwene, ndi cakuti a wewe, unene impite pa manzi nu kwiza kuli wewe.” 29 Yesu wamunenyile ati: “Iza!” Lyene Petulo wafumile umu wato atandika ukupita pa manzi nu kulungama kuli Yesu. 30 Nomba lino waweni cimuza cakoma, uvwile intete. Nupya lino watandike ukutuwila, wapunzile ati: “Mwene mpususye!” 31 Lilyo kwene Yesu watambaliike ikasa amulema, nupya amunena ati: “We wa utailo unono u mulandu ci uno iwatwisikila?” 32 Lino yakwezile uwato, icimuza caizi. 33 Lyene aali umu wato yamupeezile umucinzi* nu kulanda iyati: “Umu cumi wewe mwana Leza.” 34 Nupya yalamvile yemba nu kuya uku mpanga ya Genesaleti.

35 Lino antu yamumanyile, yamanyisizye yonsi umu mpanga iiya, nayo yamuletiile yonsi aali alwale. 36 Nupya yatandike ukumupaapata ukuti yalemeko sile nanti uku nsenkebele zya cakuzwala cakwe, nupya yonsi aalemileko yaapozile.

15 Lyene Afaliseo na ya kalemba yafumile ku Yelusalemu iyaya kuli Yesu, nu kumunena iyati: 2 “U mulandu ci uno asambi yako yasikonkela intambi zya vikolwe vitu? Yene yasifulala* uku minwe pa kulya.”

3 Nawe wayaswike ati: “Nga mwemo, u mulandu ci uno musikonkela masunde yakwe Leza pa mulandu ni ntambi zinu? 4 Leza walanzile ati: ‘Uwacindika tata na mayo wako,’ nupya ‘Wensi uwapontela* isi na nyina afwile ukukomwa.’ 5 Lelo mukati, ‘Wensi uwalanda wati: “Consi cino ningapeela avyazi yane pali vino nakwata, nalaya mpiti ukupeela kuli Leza,” 6 atalinzile ukucindika isi.’ Fwandi mwatimulenga izwi lyakwe Leza ukuya ilya sile sile pa mulandu ni ntambi zinu. 7 Mwe yasomvi mwe, Ezaya wasesime ningo pali mwemwe lino watiile: 8 ‘Antu yaa yakancindika sile pa kanwa, lelo imyenzo yao yataluka sana kuli nene. 9 Nanti cakuti yakampepa yakaicuzya sile, pano yakasambilizya sile masunde ya yantu.’” 10 Lyene Yesu wanenyile iumba kuti lipalame kuli aliwe alino alinena ati: “Uvwini nu kwiluka vino nkumunena: 11 Ivikaingila mu kanwa ka muntu visimukowezya, lelo ivikafuma mu kanwa kakwe i vikamukowezya.”

12 Lyene asambi yaile kuli Yesu nu kumunena iyati: “Uzye watumanya ukuti Afaliseo yali yasoka lino iyuvwa vino iwalanda?” 13 Nawe waswike ati: “Umuti onsi uno Tata uwa kwi yulu ataalemile ulatukulwa. 14 Lekini yaye. Pano i ntunguluzi impafu. Ndi cakuti impafu ikutungulula impafu yuze, zyonsi zyoili zingaponela mu ciwina.” 15 Petulo walanzile ati: “Tulondolwele umulozile icilangililo.” 16 Yesu nawe watiile: “Uzye namwe kwene mutatala mwiluka? 17 Uzye mutamanya ukuti vyonsi ivikaingila mu kanwa vikapita umunda nu kufumila kunzi? 18 Lelo vyonsi ivikafuma mu kanwa, vikafuma mu mwenzo, nupya ivintu kwene vivyo i vikakowezya umuntu. 19 Mu mwenzo wa muntu u mukafuma amelenganyo aipe, ukomi, ucende, uzelele,* upuupu, ukambone wa ufi ni miponto. 20 Vii i vikakowezya umuntu; lelo ukulya ukwaula ukufulala* uku minwe kwene kusikowezya.”

21 Lyene lino Yesu wafumile kuuku, waile ku musumba wa Tuli na Sidoni. 22 Nupya umwanaci umwina Fonisya uwikalanga umu ncende kwene iiya waile kuli Yesu nu kupunda ati: “We Mwene, Mwana Devedi, nguvwile uluse. Umwanane umukazyana akucuziwa sana ni ciwa.” 23 Lelo Yesu atamwaswike icili consi. Fwandi asambi yakwe yaile kuli aliwe nu kumunena iyati: “Munene aapita pano akutupangila icongo.” 24 Nawe waswike ati: “Leza wantumile uku kwavwa sile amu luko lwa ina Izlaeli, aaya wa mfwele iziponge.” 25 Lelo umwanaci waile kuli Yesu nu kumufukamila, alino alanda ati: “Mwene, ngavwe!” 26 Nawe wamunenyile ati: “Citaya ningo kutola ivyakulya vya yana nu kusumbila tusimbwa.” 27 Mwanaci nawe waswike ati: “Ee Mwene, lelo na tusimbwa kwene tukalya imvungwa izikapona api tebulo lyakwe yano yatuteeka.” 28 Lyene Yesu wamwaswike ati: “Utailo wako uukulu; kaciye vivyo kwene vino ukulonda.” Nupya lilyo kwene umwanakwe umukazyana wapozile.

29 Lyene lino Yesu wafumile kuuku, waile mupiipi na Yemba wa Galili, nupya pa cisila waile uku mwamba akuno aya aikala. 30 Lyene iumba ilikulu sana lyaile kuli aliwe nu kumutwalila ivite, alemale, impafu, ya ciulu alino na yauze aingi, nupya yaile iyayateeka pa nkoleelo yakwe, nawe wayapozizye. 31 Antu aingi yazungwike lino yaweni ya ciulu yakuvwanga, alemale yakupoziwa, ivite vikupita ni mpafu zikulola nupya yalumbanyizye Leza wa ina Izlaeli.

32 Lelo Yesu wamile asambi nu kuyanena ati: “Nuvwila antu luse, pano yatiikala nani manda yatatu nupya yatakweti ivyakulya. Nsikulonda yapite ni nzala pano yangawa ulwezwe umu nzila.” 33 Nomba asambi yakwe yamunenyile iyati: “Aekwi kuno tumazana ivyakulya pa mpanga kwene paa vino antu yonsi yaa yangalya iikute?” 34 Yesu nawe wayaswike ati: “Mukweti imikate inga?” Nayo yatiile: “Tukweti 7 nu tuswi utunono sile.” 35 Fwandi pa cisila ca kunena antu kuti iikale pansi, 36 watozile imikate 7 nu tuswi, nupya pa cisila ca kutaizya Leza, wamokozile apeela asambi, asambi nayo yapeezile antu. 37 Nupya yonsi yaliile iikuta, ni vyasyazile yavikolonganike iyazuzya imise 7 ikalamba. 38 Yano yaliile ivyakulya vivyo yali aonsi 4,000 ukwaula ukupendelako anaci na ana anono. 39 Lyene pa cisila ca kunena maumba kuti yapite, wakwezile uwato nu kuya uku Magadani.

16 Lyene Afaliseo na Asaduki yaile kuli Yesu, nupya pakuti yamwezye, yamunenyile ukuti ayacitile icizungusyo umwi zina lyakwe Leza. 2 Nawe wayaswike ati: “Nga caya amanguzi mukati, ‘Mutondo ulaca ningo pano iyulu iliyenza,’ 3 nupya katondo mukati, ‘utacile ningo, kumaya imvula, pano umwi yulu mukuloleka imuyenzulukila lelo kuli cifutika.’ Mwamanya ukulondolola imilolekele ya mwi yulu lelo mutanga mulondolole ivimanyililo vya nsita. 4 Inkulo iipe nupya iitaya ni cisinka* ikalondesya ukulola icizungusyo, lelo kusi icizungusyo cino ilalola ukucila pa cizungusyo cakwe kasesema Yona.” Lyene wafumilepo, ayasya.

5 Lyene asambi yalamvile iyaya uku mbalama yuze nupya iilile ukusenda umukate. 6 Yesu wayanenyile ati: “Cenjelini ku citutumusi ca Afaliseo na Asaduki.” 7 Lyene yatandike ukulanzyanya iyati: “Tutali twasenda umukate uli onsi.” 8 Lino Yesu wamanyile vii, walanzile ati: “U mulandu ci uno mukulanzyanyizizya ukuti mutakweti imikate, mwe ya utailo unono? 9 Uzye nalikwene mutali mwiluke, nanti uzye musikwiusya imikate 5 ino antu 5,000 yaliile ni mise uwingi ino mwakolonganikilemo ivyasyazile? 10 Nanti uzye musikwiusya imikate 7 ino antu 4,000 yaliile ni mise iingi ikalamba ino mwakolonganikilemo ivyasyazile? 11 U mulandu ci uno mutiilukile ukuti ntali nkulanda pa mukate? Lelo cenjelini ku citutumusi ca Afaliseo na Asaduki.” 12 Lyene yilwike ukuti atalandanga pa citutumusi ca mukate, lelo wayanenanga ukuti yalinzile ukucenjela ku visambilizyo vya Afaliseo na Asaduki.

13 Lino Yesu waile ku Kesaliya Filipi, uzizye asambi yakwe ati: “Uzye antu yakati Umwana wa muntu a weni?” 14 Yamwaswike iyati: “Yamwi yakati a Yoani Kabatizya, yauze yakati a Eliya, lyene yauze nayo yakati a Yelemiya nanti wenga pali ya kasesema.” 15 Nawe wayuzizye ati: “Nga mwemo mukati nene weni?” 16 Simoni Petulo waswike ati: “Wewe Klistu Umwana wakwe Leza wa umi.” 17 Yesu nawe wamwaswike ati: “Wewe wa nsansa Simoni, mwana Yona, pano kusi umuntu* uwatakusokolwela cii, suka Tata uwa kwi yulu u watakusokolwela. 18 Nupya nkukunena ukuti: “Wewe Petulo, nupya api we lii a pano ndakuula icilongano cane, nupya ni milyango ya Malindi* italalicimvya. 19 Ndakupeela amaki ya Wene wa mwi yulu, nupya consi cino wanyepa pano nsi ala nu kwi yulu kwene icinyepwa, na consi cino wasapula pano nsi ala nu mwi yulu kwene icisapulwa.” 20 Lyene wakonkomizye asambi yakwe ukuti yateezya ukunena umuntu nanti umwi ukuti ali Klistu.

21 Kufuma pa nsita kwene iiya, Yesu watandike ukulondolwela asambi yakwe ukuti wali nu kuya ku Yelusalemu nupya intunguluzi zya Yayuda na ya simapepo na ya kalemba yali nu kumucuzya sana nu kumukoma, nupya pa wanda wakwe citatu alatuutululwa. 22 Lino Petulo uvwile vivyo, wamusenzile pa mbali nu kutandika kumukalipila ati: “Uyuvwile uluse Mwene; vintu vivyo vitalakucitikila.” 23 Lelo lino wapiliwike, wanenyile Petulo ati: “Fuma pano Satana! Kuli nene, wewe ca kupumikako. Pano usielenganya melenganyo yakwe Leza suka aayantu.”

24 Lyene Yesu wanenyile asambi yakwe ati: “Ndi cakuti umwi akulonda kundondela, alinzile kuikana nu kusenda icimuti* cakwe ca kucuziwilwapo nu kutwalilila ukundondela. 25 Pano wensi aakulonda ukupususya umi wakwe alauponzya, lelo wensi uwaponzya umi wakwe pa mulandu wane alauzana. 26 Uusuma ci uno umuntu angazana ndi cakuti walonka insi yonsi lelo waponzya umi wakwe? Nanti i cani cino umuntu angakauzya nu umi wakwe? 27 Pano Umwana wa muntu ali nu kwiza mu lulumbi lwakwe Isi pamwi na ya malaika yakwe, nupya alalambula cila umuntu ukulingana ni miyele yakwe. 28 Cumi nkumunena ukuti yamwi aimi pano yatalafwa kufikila yace yalole umwana wa muntu akwiza umu Wene wakwe.”

17 Lino papisile manda 6, Yesu wasenzile Petulo, Yakobo na Yoani umwinakwe nu kuyatwala pa mwamba utali pakuti yaye yonga. 2 Nupya icinso cakwe Yesu casenwike ala yakulolako, icitandika ukuyengesa wi lanzi, ni vyakuzwala vyakwe vyatandike ukuyengesa wa luswepo. 3 Nupya lilyo kwene kwalolike Mose na Eliya ala yakulanzyanya nawe. 4 Lyene Petulo wanenyile Yesu ati: “Mwene cingazipa tutwalilile ukwikala pakwene. Ndi cakuti ungatemwa, nimapanga insakwe zitatu, yonga iyako, yonga yakwe Mose na yuze yakwe Eliya.” 5 Lino Petulo acili akulanda, ikumbi liyengese lyayavimbilikizye nupya ni izwi lyafumile umwi kumbi iliti: “Wii u Mwanane umutemwikwe, wino nkazangilamo. Muvwini.” 6 Lino asambi yuvwile vii, yaponyile pansi ala yafupime nupya yuvwile sana intete. 7 Lyene Yesu wapalime kuli aliyo nu kuyalema, alino ayanene ati: “Katukini. Mutuvwa intete.” 8 Lino inwile imitwe, yataweni ali wensi suka sile Yesu. 9 Lyene lino yatentemukanga umwamba, Yesu wayakonkomizye ati: “Mutanena ali wensi pa cilolwa cii kufikila lino Umwana wa muntu alatuutululwa.”

10 Lelo asambi yamuzizye iyati: “Nga fwandi u mulandu ci uno ya kalemba yakalandila ukuti Eliya aliwe alinzile ukutandikilapo ukwiza?” 11 Nawe wayaswike ati: “I cacumi Eliya aliza nupya alalungika ivintu vyonsi. 12 Lelo nkumunena ukuti Eliya wiza mpiti, nupya yataamumanyile lelo yacisile vyonsi vino yalondanga kuli aliwe. Nupya vikwene avino yalacuzya nu Mwana wa muntu.” 13 Lyene asambi yilwike ukuti wayanenanga pali Yoani Kabatizya.

14 Lino yaile api umba, umonsi umwi waile kuli Yesu afukama nu kumunena ati: 15 “Mwene, uvwila umwanane uluse, pano wakwata icifumfumi nupya u mulwale sana. Ilingi akaponela umu moto nu mu manzi. 16 Inamuleta ku yasambi yako, lelo iyafilwa ukumupozya.” 17 Yesu nawe waswike ati: “Mwe nkulo itaya nu utailo nupya iyononeke, ndatwalilila ukuya namwe ukufika lilaci? Ndatwalilila ukuzizimizya pali mwemwe ukufika lilaci? Muletini kuno.” 18 Lyene Yesu wakalipile iciwa, naco cafumile mu mulumendo, nupya ukufuma lilyo kwene wapozile. 19 Lyene asambi yaile kuli Yesu uku mbali nu kumuzya iyati: “U mulandu ci uno swemo itwafililwa ukucifumya?” 20 Nawe wayanenyile ati: “A pa mulandu wakuti utailo winu unono. Pano mu cumi nkumunena ukuti nga mukweti utailo uuli wa lumbezu lwakwe musunta, munganena umwamba uu muti, ‘Fuma paa uye kuuku,’ nao ungafumapo, nupya kusi icingamuposya.” 21*——

22 Lino yakolongine pamwi mu Galili, Yesu wayanenyile ati: “Umwana wa muntu alafutukwa nu kupeelwa umu minwe ya yalwani, 23 nayo yalamukoma, nupya alatuutululwa pa wanda wakwe citatu.” Asambi yakwe yuvwile sana ulanda pa mazwi yayo.

24 Lino yafisile mu Kapenaumu, aonsi asonkisyanga umusonko wa pi tempele* yaile kuli Petulo nu kumuzya iyati: “Uzye kasambilizya winu akalipila umusonko wa pi tempele?” 25 Nawe wayaswike ati: “Ee akalipila.” Lelo lino wingile mu ng’anda, Yesu wamuzizye ati: “Ukwelenganyapo uli Simoni? A kuli weni kuno ya mwene ya pano nsi yakapoka imisonko ipusanepusane? Uzye u ku yana yao nanti u ku yantu yauze?” 26 Lino waswike ati: “U ku yantu yauze,” Yesu wamunenyile ukuti: “Fwandi ana yatalinzile ukulipila. 27 Lelo pakuti tutayasosya, pitanga kuli yemba, ukasumbile iswelo mu manzi, nupya inswi ino umaya ukatandikilepo ukuswela, ukayasamule kanwa, umaya ukazane ulupiya lwakwe siuva.* Utole ulupiya lulo uwize undipilile nawe uilipilile.”

18 Pa nsita iiya, asambi yaile kuli Yesu nu kumuzya iyati: “Uzye umukalamba umu Wene wa kwi yulu a weni?” 2 Lyene wamile umwana umunono nu kumwimika pa nkoleelo yao, 3 alino ayanena ati: “I cumi nkumunena ukuti ndi cakuti mutasenwike nu kuya wa yana anono, mutalingila umu Wene wa kwi yulu. 4 Fwandi wensi uwaicefya wa mwana wii umunono, ali mukalamba umu Wene wa kwi yulu; 5 nupya wensi uwapokelela umwana umunono wenga wakwe wii umwi zina lyane ala nani kwene watampokelela. 6 Lelo wensi uwasosya wenga pali yaa aantaila yano yaaya wa yana anono nu kumulenga ukufuma umu utailo, cingazipa ukumunyepelela umu nsingo iciliwe ca kusiila cino punda akapindulula nu kumusumbila muli yemba.

7 “Kalanda uku yantu amu nsi pano yakalenga yauze ukuluvyanya! Ukuya kwene ivikalenga antu ukuluvyanya* vyene vili nu kwiza, lelo kalanda uku muntu wino akalenga yauze ukuluvyanya! 8 Fwandi ndi cakuti ikasa lyako nanti ikulu likukulenga ukuluvyanya, liputule nu kulisumba. Cazipa ukupusuka wewe makunkutu nanti icilema ukucila ukusumbwa na makasa yaili nanti amakulu yaili umu moto wa pe.* 9 Nupya ndi cakuti ilinso lyako likukulenga ukuluvyanya litonkole nu kulisumba. Cazipa ukupusuka ni linso lyonga ukucila ukusumbwa na manso yaili muli Gehena* wa moto. 10 Mutaasula wenga pali yaa aaya wa yana anono, pano nkumunena ukuti lyonsi ya malaika yao ukwi yulu, yakalola icinso cakwe Tata uwa kwi yulu. 11*——

12 “Uzye mungatuuli? Ndi cakuti umuntu akweti imfwele 100 nupya paponga yonga, uzye asisya izili 99 mu myamba nu kuya uku kulonda iyatiponga? 13 I cumi nkumunena ukuti nga waizana, akaya sana ni nsansa pa mfwele iiyo ukucila pa mfwele 99 izitaponzile. 14 Vikwene avino na Tata wa kwi yulu asilonda ukuti nanti wenga pali yaa aaya wa yana anaono aponge.

15 “Nupya ndi cakuti umwina wako wakuyembukila, yanga mukalanzyanye* sile mweili. Ndi cakuti wakuvwa, ala wawezya umwinako umu nzila isuma. 16 Lelo ndi cakuti atuvwile, senda umuntu wenga nanti yaili, pano ya kambone yaili nanti yatatu yangasininkizya vyonsi ivyalandwa. 17 Ndi cakuti wakana ukuvwa kuli aliyo, nena icilongano. Nga wakana ukuvwa nu ku cilongano kwene, leka aye wa muntu wa mu nsi kuli wewe nupya wakwe kasonkisya wa misonko.

18 “I cumi namunena nati, vyonsi vino mwanyepa pano nsi ala nu kwi yulu kwene ivinyepwa, nupya vyonsi vino mwasapula pano nsi, ala ivisapulwa nu kwi yulu kwene. 19 I cumi nupya kwene nkumunena ukuti, nga yaili pali mwemwe yalenga icintu cimwi icicindame, cilapeelwa kuli aliyo umwi zina lyakwe Tata uwa kwi yulu. 20 Pano kuno antu yaili nanti yatatu iyakolongana capamwi umwi zina lyane, ala nani kwene indi nayo.”

21 Lyene Petulo waile kuli Yesu nu kumuzya ati: “Mwene, i miku inga ino mfwile ukwelela umwinane nga wanduvyanya? Uzye i miku 7?” 22 Yesu wamwaswike ati: “Ntakuti imiku 7, lelo i miku 77.

23 “Ali mulandu uno Uwene wa kwi yulu wayela wa mwene uwalondanga aomvi yakwe yamuwezezye inkongole. 24 Lino watandike ukupoka inkongole, yamuletiile umuntu uwamukongwile amatalanti 10,000.* 25 Lelo pa mulandu wa kuti ataakweti amaka ya kulipila inkongole zizyo, umusambazi wakwe wapingwile ukuti yamukazye kumwi nu muci na ana yakwe na vyonsi vino wakweti pakuti inkongole zilipilwe. 26 Fwandi umuomvi wafukiime nu kumupaapata ati, ‘Undoleeleko ndakulipila inkongole zyonsi.’ 27 Lyene umusambazi wakwe wamuvwilile uluse nu kumuleka nupya wafuusile inkongole zyakwe. 28 Lelo umuomvi wiya wapisile ayazana umuomvi muze uwamukongwile madinali 100, nupya wamulemile nu kumutitila pa nsingo alino amunena ati, ‘Mbwezezye inkongole zyane zyonsi.’ 29 Lyene umuomvi muze wafukime pansi nu kumupaapata ati, ‘Undoleeleko ndakulipila inkongole zyako.’ 30 Lelo wakanyile, nupya wamutwazile umu cifungo kufikila ace alipile inkongole zino wakweti. 31 Lino aomvi yauze yaweni ivyacitiike, yuvwile sana uyi, nupya yaile iyanena umusambazi wao pali vyonsi ivyacitiike. 32 Lyene umusambazi wakwe wamwamile nu kumunena ati: ‘We muomvi mwipe, inafuuta inkongole zyako zyonsi lino iwampaapata. 33 Uzye nawe utaali ulinzile ukuvwila umuomvi muzo luse wakwe vino nani inakuvwila uluse?’ 34 Lyene umusambazi wakwe wasosile sana nu kumutwala uku yalinzi ya mu cifungo ukufikila ace alipile inkongole zyonsi. 35 Vikwene avino na Tata wa kwi yulu alacita kuli mwemwe ndi cakuti musikwelela auzo nu mwenzo onsi.”

19 Lino Yesu wamazile ukulanda ivintu vii, wafumile uku Galili, alamba uluzi lwa Yodani nu kuya ku mipaka ya mpanga ya Yudeya. 2 Nupya antu aingi sana yamulondiile, nawe wapozizye alwale yonsi.

3 Lyene Afaliseo yaile kuli aliwe ku kumwezya, nupya yamuzizye iyati: “Uzye isunde lyazumilizya umonsi ukuta umuci pa mulandu uli onsi?” 4 Nawe wayaswike ati: “Uzye mutabelenga ukuti uwaumvile antu pa kutandika, waumvile umonsi nu mwanaci? 5 Nupya uzye mutabelenga vino walanzile ati: ‘Pa mulandu kwene uu umonsi alasya isi na nyina nu kuilundanya ku muci wakwe, nupya yoili yalaya umwili onga’? 6 Ndakai yatacili yaili, lelo yali umwili onga. Fwandi kusi umuntu alinzile ukulekanya cino Leza watalundanya.” 7 Nayo yamuzizye iyati: “U mulandu ci fwandi uno Mose walandiile ukuti umonsi alinzile ukupeela umuci kalata ya kumuzingilapo nga nu kumuta?” 8 Yesu nawe wayaswike ati: “A pa mulandu wakuti mwakoma imyenzo, i calenzile ukuti Mose amuzumilizye ukuta yamama inu, lelo asi vino cali ukufuma pa kutandika. 9 Nkumunena ukuti wensi uwata umuci lino pasi umulandu wa uzelele* nu kutwala muze, ala wacita ucende.”

10 Asambi yamunenyile iyati: “Ndi cakuti vivyo avino icupo cifwile ukuya, cazipa ukwikala ukwaula ukutwala.” 11 Yesu nawe wayanenyile ati: “Asi yonsi angakwanisya ukwikala usimbe, suka sile yayo aakwata ica upe. 12 Pano yamwi yatanga yatwale pa mulandu wa kuti avino yaviilwe, lyene yamwi nayo yatanga yatwale pa mulandu wa kuti avino antu yayacita, yauze nayo yakasoolola ukwikala usimbe pa mulandu nu Wene wa kwi yulu. Fwandi aangakwanisya ukwikala usimbe angikala vivyo kwene.”

13 Lyene antu yatandike ukumuletela ana anono pakuti ayikepo makasa nu kuyapepela, nomba asambi yayakalipile. 14 Lelo Yesu nawe watiile: “Yalekini, mutayakaanya ukwiza kuli nene, pano Uwene wa kwi yulu u wa yantu aya wakwe yaa.” 15 Nawe wayisilepo makasa nu kufumako.

16 Lyene umuntu umwi wizile kuli Yesu nu kumuzya ati: “Kasambilizya, i vintu ci visuma vino ndinzile ukucita pakuti nkaye nu umi wa pe?” 17 Nawe wamwaswike ati: “U mulandu ci uno wanguzizya pa visuma? Kwaya sile umusuma wenga. Ndi cakuti ukulonda ukaye nu umi, uwalondela masunde lyonsi.” 18 Nawe wamuzizye ati: “A masunde ci?” Yesu wamwaswike ati: “Utaakoma, utaacita ucende, utaiya, utaapeela unte wa ufi, 19 uwacindika tata wako na mayo wako, nupya uwatemwa umuzo wakwe vino waitemwa.” 20 Umulumendo wamwaswike ati: “Nkalondela vyonsi vii; i vyani vyuze vino ndinzile ukucita?” 21 Yesu wamwaswike ati: “Ndi cakuti ukulonda ukuya umumalilike, pitanga ukakazye vino wakwata nu kupeela impiya zizyo uku yapiina, nupya ulakwata ivyuma umwi yulu; alino uwize uye umulondezi wane.” 22 Lino mulumendo uvwile vii, wafumilepo ala ali nu ulanda, pano wakweti ivyuma ivingi. 23 Lyene Yesu wanenyile asambi yakwe ati: “I cumi nkumunena ukuti cilatala uku muntu wa vyuma ukwingila umu Wene wa kwi yulu. 24 Nupya kwene nkumunena ukuti, cangupalako uku ngamali ukwingila umwi linso lya nsindano ukucila uwa vyuma ukwingila umu Wene wakwe Leza.”

25 Lino asambi yuvwile mazwi yayo, yazungwike sana icakuti yalanzile iyati: “Uzye fwandi a weni angapusuka?” 26 Lyene Yesu wayalolekisye, alino ayanena ati: “Cii citanga cicitike uku yantu, lelo kuli Leza kwene vyonsi vingacitika.”

27 Lyene Petulo walanzile ati: “Lola! Twasya vyonsi nu kukulondela, nga lyene i vyani vino tulakwata?” 28 Yesu wayanenyile ati: “I cumi nkumunena ukuti, pa nsita ino ivintu vilaya ivipya, lino Umwana wa muntu alikala pa cilimba ca wene ica lulumbi, namwe mweyano mukandondela mulikala pa vilimba vya wene 12, nu kupingula imitundu 12 yakwe Izlaeli. 29 Nupya wensi uwasya mang’anda nanti aina nanti ya kaci yakwe nanti isi nanti nyina nanti ana nanti ivyalo pa mulandu wi zina lyane, alapokelela ivingi ukucila pali vino wasya nupya uku nkoleelo alakwata umi wa pe.

30 “Lelo aingi aankoleelo yalaya aacisila na aacisila yalaya aankoleelo.

20 “Uwene wa kwi yulu waya wa mwineco wa calo ca myangazi uwalaavile katondo ku kulonda aomvi aakuomba mu calo cakwe. 2 Pa cisila ca kuzumilizyanya na aomvi ukuti amayalipila dinali wenga pa wanda onsi, wayatumile mu calo cakwe ica myangazi. 3 Lino waile ku maliketi apa 9:00,* waweni antu na yauze alondanga incito ale iimilila; 4 nayo kwene wayanenyile ati, ‘Namwe kwene yangini mu calo ca myangazi nupya namamupeela malipilo aalinge.’ 5 Fwandi yaile mu kuomba. Nupya kwene waswilile ku maliketi apa 12:00* na pa 15:00* mu kulonda aomvi. 6 Nupya kwene waswilile ku maliketi pa muku wa kusyalikizya apa 17:00,* waile azana na yauze kwene yaimi, nupya wayuzizye ati, ‘U mulandu ci uno mwimilile sile pano uwanda onsi ukwaula ukwingila incito?’ 7 Yamwaswike iyati, ‘Kusi nanti aumwi uwatatulemba incito.’ Wayanenyile ati, ‘Namwe kwene yangini mu calo ca myangazi.’

8 “Lino cafisile manguzi, umwineco wa calo ca myangazi wanenyile kapitao wakwe ati, ‘Ama aomvi nu kuyapeela malipilo yao, utandikile nu wa kusyalikizya alino uwize umalilile nu wa nkoleelo.’ 9 Lino aingiile incito apa 17:00 yaile mu kupoka malipilo, cila muntu wapeezilwe dinali wenga. 10 Fwandi lino aakutandikilako yaile mu kupoka malipilo, yelenginye ukuti limwi yamapeelwa malipilo aingi, lelo nayo kwene yapeezilwe sile dinali wenga wenga. 11 Lino yapeezilwe malipilo yao, yatandike ukuilizyanya ku mwineco wa calo 12 nu kulanda iyati, ‘Antu yaa ali iza icisila, iyaomba sile iawala lyonga; nomba wayapeela malipilo aliyamwi na yano itupeelwa swemuno itwaombesya uwanda onsi nu kupya na kasanya!’ 13 Lelo waswike wenga pali yayo ati, ‘Cuzane, pasi vino inkuluvyanya. Uzye tutali twazumilizyanya ukuti namakupeela dinali wenga? 14 Tola malipilo yako uwapita. Nkulonda ukupeela na wikwene uwa kusyalikizya malipilo ali yamwi na yano inkupeela. 15 Uzye ntakweti insambu zya kucita vino nkulonda? Nanti uzye uvwa uzuwa* pa mulandu wakuti nayacitila ivisuma?’* 16 Mu nzila ili yonga kwene, aacisila yalaya aankoleelo na aankoleelo yalaya aacisila.”

17 Lino Yesu wayanga uku Yelusalemu na asambi yakwe 12, wayasenzile pa mbali nu kuyanena ati: 18 “Lyene paa tukuya ku Yelusalemu, nupya Umwana wa muntu alapeelwa kuli ya simapepo akalamba na ya kalemba. Nayo yalamupingula ukukomwa 19 nupya yalamupeela ku yantu amu nsi pakuti yamusoweke nu kumuma ivikoti alino nu kumupoopela pa cimuti; lyene pa wanda wakwe citatu alatuutululwa.”

20 Lyene muka Zebedi waile na ana yakwe aonsi yaili kuli Yesu, amufukamila nu kumulenga icintu cimwi. 21 Yesu wamuzizye ati: “I cani cino ukulonda?” Nawe wamwaswike ati: “Lino ulateeka mu Wene wako, uce uleke ana yane aonsi yaa yaili yace ikale naawe, umwi ukwi lunji, nu muze kuli cimani.” 22 Yesu waswike ati: “Mutamanyile vino mukulenga. Uzye mungamwa vino nasya imwe?” Nayo yamwaswike iyati: “Ee.” 23 Yesu nawe wayanenyile ati: “I cacumi mungamwa, lelo asi nene ningasoolola aakwikala ukwi lunji lyane na kuli cimani, Tata aliwe wapekanya.”

24 Lino asambi yauze 10 yuvwile vii, yasokiile auze yaili. 25 Yesu wayamile nu kuyanena ati: “Mwamanya ukuti ya kateeka amu nsi yakatitikizya antu yano yakateeka, nupya alasi nayo yasiomvya ningo maka yao ku yantu yano yakatungulula. 26 Vii asi avino cifwile kuya pali mwemwe; lelo wensi aakulonda ukuya mukalamba pali mwemwe afwile kuya umuomvi winu, 27 nupya wensi aakulonda ukuya uwa nkoleelo pali mwemwe alinzile ukuya umuzya winu. 28 Vikwene avino nu Mwana wa muntu atizile kuti yamuombela, lelo wizile umu kuombela antu nu kupeela umi wakwe ilambo pakuti akulule antu aingi.”

29 Lino yafumanga mu Yeliko, iumba ilikulu lyamulondiile. 30 Lyene aonsi yaili impafu aatenzi umu mbali ya museo yuvwile ukuti Yesu akupita, yapunzile iyati: “Mwene, tuvwileko uluse, Mwana Devedi!” 31 Lelo iumba lyayakalipile nu kuyanena ukuti yate ukupanga icongo; nomba alino yapundiisye iyati: “Mwene, tuvwileko uluse, Mwana Devedi!” 32 Fwandi Yesu wimilile, ayama nu kuyuzya ati: “I vyani vino mukulonda imucitile?” 33 Nayo yamwaswike iyati: “Mwene, leka manso itu yatandike ukulola.” 34 Yesu uvwile uluse nu kuyalema mu manso, nupya lilyo kwene sile yatandike nu kulola nupya yamulondiile.

21 Lino yafisile mu Betifage pa Mwamba wa Miolivi umupiipi na Yelusalemu, Yesu watumile asambi yakwe yaili, 2 nu kuyanena ati: “Yangini umu muzi uuwa, nupya mwayazana punda nu mwanakwe iyayanyepa. Muyasapule nu kuyaleta kuno. 3 Nga umwi waya wamuzya icili consi, mukalande muti, ‘Umwene aliwe akuyalonda.’ Nupya lilyo kwene amaya akamuzumilizye ukuyaleta.”

4 Cii cacitiike pakuti amazwi yafikiliziwe aalanzilwe ukupitila muli kasesema, uwatiile: 5 “Nena umwana umwanaci uwa ku Zioni* ukuti: ‘Umwene wako umufuuke akwiza kuli wewe watakwela pali punda, nupya a punda munono.”

6 Fwandi asambi yapisile nu kuyacita viivi kwene vino Yesu wayanenyile. 7 Yamuletiile punda nu mwana, nupya yanzikepo ivyakuzwala vyao, alino Yesu nawe aikalapo. 8 Antu aingi yatandike ukwanza ivyakuzwala vyao umu museo, yauze nayo ala yakukoma imisambo ya miti nu kwanza umu museo. 9 Nupya maumba aamukolelile alino na aali cisila yapundanga ala yakuti: “We Leza, pususya Mwana Devedi! Umupaalwe a wiyo akwizila umwi zina lyakwe Yeova! Tukupepa kuli wewe wemuno wikala papelapela tukuti mupususye!”

10 Nupya lino wingile umu Yelusalemu, mu musumba onsi mwali icongo, ala antu yakuti: “Nga aweni wii?” 11 Maumba nayo yatwalilile ukulanda yati: “Wii a Yesu, kasesema ukufuma uku Nazaleti, umu mpanga ya Galili!”

12 Lyene Yesu wingile umwi tempele nu kuzinga yonsi aakazyanga nu kukala ivintu, nupya wapenozile na matebulo yakwe ya kakauzya ya mpiya ni vilimba vyakwe ya kakazya ya nkunda. 13 Nupya wayanenyile ati: “Calembwa ukuti, ‘Ing’anda yane ilaamwa ukuti ing’anda ya mapepo,’ lelo mwemo imuisangula ukuya ing’anda ya vipondo.” 14 Nupya impafu na antu alemale yaile kuli aliwe umwi tempele, nawe wayapozizye.

15 Lino ya simapepo akalamba na ya kalemba yaweni ivizungusyo vino Yesu wacisile na vino alumendo yapundanga umwi tempele yakuti, “We Leza, pususya Mwana Devedi!” yasosile sana 16 nupya yamunenyile iyati: “Uzye ukuvwa vino ana yaa yakulanda?” Yesu nawe wayaswike ati: “Ee. Uzye mutabelenga mazwi aakuti, ‘Watulenga ana anono nu tunya ukukulumbanya’?” 17 Nupya lino wayasiile, waile uku musumba uwa ku Betaniya nupya waile alaala kuuku kwene.

18 Lino waswililanga uku Yelusalemu katondo, uvwile inzala. 19 Lyene waweni cimuti ca masamvu mu mbali ya museo nupya waileko, lelo wazanyile sile mafwa yatupu ukwaula ivizao, wanenyile icimuti ati: “Utalatala useekepo ivizao.” Nupya cimuti ca masamvu cumile papo kwene sile. 20 Lino asambi yakwe yaweni vivyo, yazungwike nu kulanda iyati: Ngi cimuti ca masamvu cuma uli pakwene?” 21 Yesu nawe wayaswike ati: “I cumi nkumunena ukuti ndi cakuti mukweti utailo nupya musikutwisika, mulacita ni vicizile pali vino nacita uku cimuti ca masamvu, munganena nu mwamba kwene uu muti, ‘Katuka nu kuisumbila muli yemba,’ nupya cingacitika vivyo kwene. 22 Nupya vyonsi vino mwalenga umwi pepo, ndi muli nu utailo, mulapeelwa.”

23 Lino Yesu wingile umwi tempele, ya simapepo akalamba ni ntunguluzi zya Yayuda yaile kuli aliwe ala akusambilizya, yamuzizye iyati: “U ku maka ci kuno ukacitila ivintu vii? Nupya a weni uwakupeela amaka kwene yaa?” 24 Yesu wayaswike ati: “Nani namamuzya iuzyo lyonga. Nga mwangasuka, lyene namamunena uwampeela amaka ya kucita ivintu vii: 25 Uzye aekwi kuno Yoani wafumizye amaka ya kubatizya? Uzye u kwi yulu nanti uku yantu? Lelo yatandike ukulanzyanya aineco iyati: “Nga twati, ‘u kwi yulu,’ amatuzya ati, ‘Nga lyene u mulandu ci uno mutamutailile?’ 26 Lelo nga twati, ‘U ku yantu,’ tukutiina iumba, pano yonsi yazumila ukuti Yoani a kasesema.” 27 Fwandi yamwaswike iyati: “Tutamanyile.” Nawe wayanenyile ati: “Nani kwene ntakumunena kuno nkafumya maka ya kucita ivintu vii.

28 “Uzye mungatuuli? Umuntu umwi wakweti ana yaili. Lyene waile uku mwana wa kutandikilako amunena ati, ‘Mwanane, ilelo uye umu kuomba umu calo ca myangazi.’ 29 Nawe waswike ati, ‘Ntakuyako,’ lelo pa cisila walangulwike nupya waile aomba. 30 Lino waile uku mwana wakwe ciili, wamunenyile amazwi aliyamwi kwene. Nawe waswike ati, ‘Tata, namaya,’ nomba ataileko. 31 Uzye pa yana yaa yaili, a weni uwacisile vino isi walondanga?” Nayo yatiile: “U wa kutandikilako.” Yesu nawe wayanenyile ati: “I cumi nkumunena ukuti ya kasonkisya ya misonko na ya cizelele yalamukoleelela umu Wene wakwe Leza. 32 Pano Yoani wizile nu kumulanga inzila ya ulungami, lelo mutamutaile. Nomba ya kasonkisya ya misonko na ya cizelele yene yamutaile, nupya na lino mwaweni vii, mutasenwike pakuti mumutaile.

33 “Uvwini cilangililo na cuze, kwali umuntu umwi uwalimile icalo ca myangazi nupya wacipindiliile nu kwimbamo iciwina ca kufenelamo imyangazi, wakuuzilemo nu lupungu; lyene wasiilile* alimi alino aya nu ku mpanga iya kutali. 34 Lino insita ya kuzombola yafisile, watumile aomvi yakwe ku yalimi pakuti yakatole ivizao vyakwe. 35 Lelo alimi yalemile aomvi yakwe, nupya wenga yamumile, muze yamukomile, alino muze nawe yamutamile na mawe. 36 Nupya kwene watumile aomvi na yauze aingi ukucila yano watumile pa kutandika, lelo nayo kwene yayacisile icili cimwi. 37 Lyene pa kusyalikizya watumile umwanakwe pano welenganyanga ukuti, ‘Wene yalamucindika.’ 38 Lino yaweni umwanakwe, alimi yatandike ukulanzyanya iyati, ‘Wii ali mpyanyi. Lekini tumukome nu kupoka vino alapyana!’ 39 Lyene yamulemile nu kumusumbila ukunzi ya calo ca myangazi nupya yamukomile. 40 Uzye lino umwineco wa calo ca myangazi aliza, alacita uli uku yalimi yayo?” 41 Nayo yamwaswike iyati: “Pa mulandu wa kuti antu yayo aaipe, alayakoma mu musango uwipisye nu kupeela icalo ca myangazi ku yalimi yauze, yano yalamupeela ivizao ndi vyaca.”

42 Yesu wayanenyile ati: “Uzye mutabelenga umu Malembo ukuti, “Iwe lino ya kakuula yakanyile lizile iliya iwe licindame ilya pa koona?* Iwe lii lyafumile kuli Yeova, nupya i cizungusyo kuli sweswe.’ 43 Uli mulandu uno nkumunenela ukuti Uwene wakwe Leza ulapokwa kuli mwemwe nu kupeelwa kuli yano yakacita ukulonda kwakwe. 44 Nupya umuntu wensi wino waponela pi we lii alavuneeka. Lelo wensi wino lyaponela, lilamuvungola.”

45 Lino ya simapepo akalamba na Afaliseo yuvwile ivilangililo vyakwe, yilwike ukuti walandanga pali aliyo. 46 Nanti cakuti yalondanga ukumulema, yatiinanga maumba, pano yene yamumanyile ukuti a kasesema.

22 Nupya kwene Yesu walanzile nayo ukuomvya ivilangililo ati: 2 “Uwene wa kwi yulu wakolana nu mwene uwapekinye mutebeto wa winga wa mwanakwe umonsi. 3 Nupya watumile aomvi yakwe kuti yakaame aalalikwe uku uwinga, nomba antu yayo yatalondanga ukwiza. 4 Nupya kwene watumile aomvi na yauze nu kuyanena ati, ‘Kanenini atiyalaalikwa muti: “Natimpekanya ivyakulya, natinkoma ya cipambasi ni inyama iziine sana, nupya vyonsi ivipekanyiziwa. Mwize uku winga.”’ 5 Nomba antu yayo yatasumvileko mano, yamwi yaile uku vyalo vyao, yauze nayo yaile uku uculuzi wao; 6 lelo aasyala, yalemile aomvi yakwe, iyayacuzya sana nu kuyakoma.

7 “Lyene umwene wasosile sana nupya watumile aasilika yakwe aile iyakoma inkomi zizyo nu koca umusumba wao. 8 Lyene wanenyile aomvi yakwe ati, ‘Vyonsi vyativipekanyiziwa, nomba atiyalaalikwa uku winga, yasi yampomvu. 9 Fwandi yangini umu miseo iikalamba nu kwama wensi wino mwazana ukuti aize uku winga.’ 10 Vikwene avino aomvi yacisile, yaile umu miseo nu kwama yonsi yano yazanyile, aipe na asuma; nupya umu muputule uno yazevezyangamo uwinga mwazuzile antu kwene yayo aalyanga.

11 “Lino umwene wingile umu muputule pakuti alole antu aizile ku winga, waweni umuntu umwi aatazwite ivyakuzwala vya pa winga. 12 Fwandi wamuzizye ati, ‘Cuzane, nga wazanwa uli muno ukwaula icakuzwala ca pa winga?’ Nawe wafizilwe ica kwasuka. 13 Lyene umwene wanenyile aomvi yakwe ati, ‘Munyepini makasa na makulu nu kumusumbila ukunzi mu mfinzi, kuko u kulaya ukulila nu kulumanya incecete.’

14 “Pano aamwa aingi, lelo aasoololwa anono.”

15 Lyene Afaliseo yapisile nu kuyauvwana pakuti yangamupeela umulandu nga waluvyanya umu milandile. 16 Fwandi yatumile asambi yao kuli aliwe, pamwi na amu kaungwe kakwe Helodi pakuti yakamunene yati: “Kasambilizya, twamanya ukuti wewe wa cumi, ukasambilizya antu icumi pali Leza, nupya usiika mano uku myelenganyizizye ya muntu ali wensi pano usilola pa milolekele ya yantu. 17 Fwandi tunene, uzye ungatuuli? Uzye isunde lyazumilizya ukulipila umusonko kuli Kaisale nanti foo?” 18 Lelo pa mulandu wakuti Yesu wamanyile imyelenganyizizye yao iipe, wayanenyile ati: “Mwe yasomvi mwe, u mulandu ci uno mukungezezya? 19 Ndangini ulupiya luno mukalipila umusonko.” Nayo yamupeezile dinali wenga. 20 Nawe wayuzizye ati: “Uzye icikope cii ni vilemvilwepo i vyakwe weni?” 21 Nayo yamwaswike iyati: “I vyakwe Kaisale.” Lyene wayanenyile ati: “Fwandi peelini vyakwe Kaisale kuli Kaisale, na vyakwe Leza kuli Leza.” 22 Lino yuvwile vivyo, yazungwike, nupya yamusiile iyapita.

23 Pa wanda kwene uwa, Asaduki aalandanga iyati kutaya ukutuutuluka, yaile kuli Yesu nu kumuzya iyati: 24 “Kasambilizya, Mose walanzile ati: ‘Ndi cakuti umonsi wafwa ukwaula ana, umwinakwe afwile ukutola umuci wino wasya nu kuvyalila umwinakwe ana.’ 25 Nomba kwali aina 7 yano twali nayo. Uwa kutandikilako watwazile nu kufwa ukwaula umwana, umwinakwe wapyanyile umuci wino wasiile. 26 Vikwene avino cali na kuli wakwe ciili na wakwe citatu, kufika na kuli yonsi 7. 27 Na pa kusyalikizya umwanaci wiyo wafwile. 28 Uzye lino aonsi yayo 7 yalatuutululwa, umwanaci wiyo alaya umuci wakwe weni? Pano yonsi kwene yamutwazilepo.”

29 Yesu nawe wayaswike ati: “Mwaponga, pano mutamanya Malembo nanti amaka yakwe Leza; 30 pano lino afwe yalatuutuluka, aonsi yatalatwala na anaci yatalatwalwa, lelo yalaya wakwe ya malaika umwi yulu. 31 Ukulozya uku kutuutuluka kwa yafwe, uzye mutabelenga amazwi yano Leza wamunenyile aakuti: 32 ‘Nene Leza wakwe Abulahamu, Leza wakwe Isaki, na Leza wakwe Yakobo’? Asi Leza wa yafwe, lelo a Leza wa yantu ya umi.” 33 Lino maumba yuvwile vivyo, yazungwike sana pa misambilizizye yakwe.

34 Lino Afaliseo yuvwile ukuti Asaduki yatamwaswike, nayo yakolongine capamwi iyaya kuli Yesu. 35 Nupya wenga uwamanyile sana masunde, pakuti amwezye, wamuzizye ati: 36 “Kasambilizya, i sunde ci ilikalamba pa masunde yonsi?” 37 Nawe wamwaswike ati: “‘Uwatemwa Yeova Leza wako nu mwenzo wako onsi, nu umi wako onsi na mano yako yonsi.’ 38 Lii ali sunde likalamba nupya ilya kutandikilako. 39 Lyakwe ciili ilyakolana na lii, i lyakuti: ‘Uwatemwa umuzo wakwe vino waitemwa.’ 40 Pa masunde kwene yaa yaili, a pasintilila masunde yonsi ni vyeo vino ya kasesema yalanzile.”

41 Lyene lino Afaliseo yakolongine capamwi, Yesu wayuzizye ati: 42 Uzye mwamanyapo uli pali Klistu? A mwana weni?” Nayo yamwaswike iyati: “A mwana Devedi.” 43 Nupya wayuzizye ati: “Nga lyene u mulandu ci uno umupasi wa muzilo walenzile Devedi ukwama Klistu ukuti Umwene, nu kulanda ati, 44 ‘Yeova wanenyile Umwene wane ati: “Ikala ukwi kasa lyane ili lunji ukufikila lino ndakupeela amaka pa yalwani yako”’? 45 Ndi cakuti Devedi wamile Klistu ukuti Umwene, u mulandu ci nupya uno angayela umwanakwe?” 46 Kutaali nanti aumwi uwamwaswike, nupya ukufuma pa wanda kwene uuwa, kutaali uwatazile amuzyapo iuzyo.

23 Lyene Yesu wanenyile amaumba na asambi yakwe ati: 2 “Ya kalemba na Afaliseo yaisonta aineco ukuomba umulimo uli umwi na uno Mose waombanga. 3 Fwandi mwacita nu kulondela vyonsi vino yakumunena, lelo mutaacita wakwe vino yakacita, pano yene yasicita vino yakalanda. 4 Yakanyepa ivisendo ivinyome nu kutwika auze pa viye, lelo yene yasiitemelwa ukukumyako sile nanti akamunwe. 5 Imilimo yonsi ino yakaomba, yakaiomba pakuti antu yayalole, pano yakakuzya utumbokosi twa malembo tuno yakazwala pakuti yaicingilila, nupya yakatalimfya ni nsenkebele zya vyakuzwala vyao. 6 Yatemwa ukwikala pa vifulo ivicindame sana lino yali pa mitebeto, alino nu kwikala ku vilimba vya ku nkoleelo* mu masunagogi,* 7 nupya yakalonda kuti antu yayalamuka pa maliketi nu kuyama ukuti ya Labi. 8 Lelo mwemo, mutaaleka ukuti antu yamwama ukuti ya Labi, pano mwakwata sile Kasambilizya wenga, nupya mwensi mwemwe ina. 9 Nupya mutaama umuntu aali wensi pano nsi ukuti tata, pano mwakwata sile Tata winu wenga uwa kwi yulu. 10 Nupya mutaaleka yamwama ukuti intunguluzi, pano mwakwata sile Intunguluzi yonga, Klistu. 11 Lelo umukalamba pali mwemwe alinzile ukuya umuomvi winu. 12 Wensi aakaicindamika alacefiwa, na wensi aakaicefya alacindamikwa.

13 “Kalanda kuli mwe ya kalemba na Afaliseo, mwe yasomvi mwe! pano mukayalila antu kuti yatingila umu Wene wa kwi yulu; pa mulandu wa kuti mwemo musiingilamo, nupya na yayo akulonda ukwingilamo mukayakaanya. 14*——

15 “Kalanda kuli mwe ya kalemba na Afaliseo, mwe yasomvi mwe! pano mukapita ulendo wa pali yemba na pa musili umu kulonda umuntu uwakuti aize umu mipepele ya Yayuda, nupya nga watandika ukumulondela, mukamulenga ukuya uku Gehena* nupya akaipisya ukucila mwemwe.

16 “Kalanda kuli mwe ntunguluzi impafu, mwemuno mukati ‘Umwi nga walapa umwi zina li tempele ala pasi umulandu; lelo mukati wensi uwalapa umwi zina lyakwe goldi uwa pi tempele, alinzile ukufikilizya umulapo.’ 17 Mwe viwelewele mwe nupya impafu! Uzye icicindamepo i cilikwi? Uzye a goldi nanti itempele ilikalenga goldi ukuya umusanguluke? 18 Nupya mukati, ‘Umwi nga walapa umwi zina lya ulambo ala pasi umulandu; lelo nga umwi walapa umwi zina lya upe uuli pa ulambo, alinzile ukufikilizya umulapo.’ 19 Mwe mpafu mwe! Uzye icicindamepo i cilikwi? Uzye uupe nanti ulambo uukalenga upe ukuya usanguluke? 20 Fwandi wensi uwalapa umwi zina lya ulambo ale walapa na pali vyonsi ivyativipeelwa pa ulambo; 21 nupya wensi uwalapa umwi zina li tempele ala walapa nu mwi zina lyakwe Leza umwineco wi tempele; 22 nupya wensi uwalapa ukuomvya iyulu ala walapa umwi zina lya cilimba cakwe Leza, alino na Leza kwene uwikalapo.

23 “Kalanda kuli mwe ya kalemba na Afaliseo, mwe yasomvi mwe! pano mukapeela icikumi ca minte, dilu, na kumini,* lelo mwasuula ivicindame ivyaya umu masunde ivili wa mulinganya, uluse na ucisinka. Caya sile ningo ukupeela icikumi, lelo mutalinzile ukusuula ivintu ivicindame ivyaya umu masunde. 24 Mwe ntunguluzi impafu, mwemuno mukafumya utuzizi muli vino mukumwa lelo mukamila ingamali!

25 “Kalanda kuli mwe ya kalemba na Afaliseo, mwe yasomvi mwe! pano mukaziifya kapu ni mbale ukunzi, lelo umukasi mwazula ucenjezi* na ukaitemwe. 26 We Mufaliseo impafu, utale uziifye kapu ni mbale umukasi, pakuti alino nu kunzi kuziipe.

27 “Kalanda kuli mwe ya kalemba na Afaliseo, mwe yasomvi mwe! pano mwakolana na malindi yano yaatakasa nu mula, aakaloleka asuma ukunzi lelo umukasi mwazula mafupa ya yantu afwe alino nu kukowela kwa misango yonsi. 28 Namwe kwene ukunzi mukaloleka wa yantu alungami, nomba imyenzo inu yazula usomvi na umpulamasunde.

29 “Kalanda kuli mwe ya kalemba na Afaliseo, mwe yasomvi mwe! pano mukakuula malindi yakwe ya kasesema nu kuzifilizya malindi ya yantu alungami, 30 nupya mukati, ‘Nga twaliko mu manda ya vikolwe vitu, ngatutaavyazwilizye ukukoma ya kasesema.’ 31 Fwandi mukuisinila sile mweineco ukuti mwemwe yana yakwe yano yakomile ya kasesema. 32 Fwandi lyene, mufwile ukumalila imilimo ino ivikolwe vinu vyatandike.

33 “Mwe nzoka mwe, mwe yana ya nzoka zya usungu mwe, uzye muluutuka uli upinguzi wa mu Gehena?* 34 Uli mulandu uno nkumutumila ya kasesema na antu ya mano na ya kasambilizya ya yantu. Yamwi mulayakoma nu kuyapampamila pa vimuti, nupya yamwi nayo mulayuma ivikoti mu masunagogi nupya mulaayacuzya umu musumba onga na onga, 35 pakuti muce mupeelwe umulandu pa yalungami yonsi aakomwa pano nsi, ukutandikila pali Abeli ukwizafika pa mfwa yakwe Zakaliya wino mwakomiile pa nkoleelo yi tempele apiipi nu ulambo. 36 I cumi nkumunena ukuti vyonsi vii, vili nu kucitikila inkulo kwene yii.

37 “Yelusalemu, Yelusalemu, wemuno ukakoma ya kasesema nu kutama na mawe antu yano yakatumwa kuli wewe, imiku iingi nalondanga ukukolonganika ana yako, wakwe vino nyinankoko akafukatila utwana twakwe umu maapa! Lelo wemo utalondanga. 38 Lola! Ing’anda yako yatikusyalila icitotela. 39 Pano nkumunena ukuti, mutalatala mundole ukufuma ndakai mpaka mukavwange muti, ‘Umupaalwe a wiyo akwizila umwi zina lyakwe Yeova!’”

24 Lyene lino Yesu wafumanga api tempele, asambi yakwe yaile kuli aliwe nu kumulanga ivikuulwa vya pi tempele. 2 Nawe wayanenyile ati: “Uzye imuvilola vyonsi vii? I cumi nkumunena ukuti patalasyala nanti iwe lyonga api we lyuze, yonsi kwene yaloomolwa.”

3 Lino Yesu watenzi pa Mwamba wa Miolivi, asambi yakwe yaile kuli aliwe nu kumuzya iyati: “Tunene, a lilaci lino ivintu vii vilacitika, nupya i cani icilaya icimanyililo ca kuyapo* kwako ni ca mpelelekezyo ya nsi?”*

4 Yesu nawe wayaswike ati: “Cenjelini ukuti umwi ataca amuponzye, 5 pano aingi yalizila umwi zina lyane nu kulanda ukuti, ‘Nene Klistu,’ nupya yalaponzya aingi. 6 Mulauvwa malyasi ya nkondo mu ncende izipusanepusane, lelo mukacenjele pakuti mutakatiine, pano ivintu vii vilinzile ukucitika lino impela itali ize.

7 “Pano uluko lulakatukila uluko luze nu wene ulakatukila uwene uze, nupya kulaya ivipowe ni vilundumusi umu ncende zimwi zimwi. 8 Vyonsi vii vilaya ali kutandika kwa macuzi aipisye aalaya wa ucuzi wa pa kupaapa.

9 Lyene antu yalamucuzya nu kumukoma, nupya antu amu nko zyonsi yalamupata pa mulandu wi zina lyane. 10 Nupya antu aingi yalata ukuya nu utailo, yalaafutuka auze nu kupatana. 11 Ya kasesema ya ufi aingi yalakatuka nu kuponzya antu aingi; 12 nupya pa mulandu wakuti umpulamasunde ulavula, ukutemwa kwa yantu aingi kulacepa. 13 Lelo uwazizimizya ukufika nu ku mpela, wene alapusuka. 14 Ni lyasi lisuma lii ilya Wene lilasimikilwa umu nsi yonsi ukuya unte ku yantu amu nko zyonsi, lyene alino impela iliza.

15 “Fwandi lino mulalola ica winyi icikaleta uwononesi icalanzilwe ukupitila muli kasesema Danieli icimilila umu ncende ya muzilo, (aakubelenga alinzile ukwiluka), 16 lyene aalaya mu Yudeya yace yatandike ukuutukila uku myamba. 17 Na wensi aalaya pi paala ataca aingile umu ng’anda umu kusenda iviya vyakwe, 18 nupya wensi aalaya umu calo ataca aswilile umu kusenda icakuzwala cakwe. 19 Kalanda uku yanaci aalaya pa ukulu alino na alaonsya umu manda yayo! 20 Mwapepa ukuti mutaca muutuke umu nsita ya mpepo nanti pa wanda wi Sabata; 21 pano kulaya ucuzi ukalamba utatala wayako ukufuma pa kutandika kwa nsi ukufika na ndakai, nupya utalatala uyeko. 22 Nupya ukwaula ukucefya manda yayo, kusi umuntu aangapusuka; lelo pa mulandu na asoololwa, manda yayo yalacefiwa.

23 “Lyene ndi cakuti ali wensi wamunena ukuti, ‘Lolini! Klistu ali kuno,’ nanti, ‘Ali kuuku!’ mutaca muzumile. 24 Pano ya Klistu ya ufi na ya kasesema ya ufi yalakatuka nu kucita ivimanyililo ivikalamba ni vizungusyo kuti yaponzye antu, nupya nga cingacitika nu kuponzya na asoololwe kwene. 25 Lolini! namunenela calimwi. 26 Fwandi ndi cakuti antu yamunena ukuti, ‘Lolini! Ali umu lwanga,’ mutaca muyeko; nupya nga yati ‘Lolini! Ali umu muputule wa mukasi,’ mutaca muzumile. 27 Wakwe vino inkuwa ikamyantula ukufuma uku ufumondaka ukuya uku uwondaka, avino nu kuyapo* ukwa Mwana wa muntu kulaya. 28 Pano ukuli icitumbi, akuno na ya lyang’anda yakakolongana.

29 “Pa cisila sile ica ucuzi wa manda yayo, ilanzi lilafiita, nu mwezi utalawala, nupya intanda zilapona ukufuma umwi yulu, alino ni vya maka ivya mwi yulu vilatenkaana. 30 Lyene icimanyililo ca Mwana wa muntu cilaloleka umwi yulu, nupya imitundu ya yantu yonsi pano nsi ilaya nu ulanda, nupya yalalola Umwana wa muntu akwiza na maka nu lulumbi ulukalamba ukufuma mu makumbi ya mwi yulu. 31 Alaomvya iciunda icikulu ici penga pa kutuma ya malaika yakwe, nayo yalakolonganika asoololwe yakwe ukufuma umu ntunga 4 izya nsi, ukufuma ku mpela yi yulu nu kufika uku mpela yuze.

32 “Lyene sambililini uku cilangililo ca muti wa masamvu: Lino watandika sile ukuleemba, mukamanya ukuti icisiku cili umupiipi. 33 Namwe kwene lino mulalola ivintu vii vyonsi, muce mumanye ukuti ali apiipi, pa mulyango. 34 I cumi nkumunena ukuti inkulo yii italapita kufikila ivintu vyonsi vii vikacitike. 35 Iyulu ni nsi vilapita, lelo mazwi yane yene yatalapita.

36 Lelo ukulozya ku wanda uuwa ni nsita, kusi uwamanya, nanti sile aamalaika ya kwi yulu nanti Umwana, suka sile Tata. 37 Pano wakwe vino cali mu manda yakwe Nowa, avino cilaya na lino Umwana wa muntu alayapo.* 38 Viivi kwene vino cali mu manda yaya lino mulamba atali aize, antu yalyanga nu kumwa, yatwalanga nu kutwalwa, kufika na pa wanda uno Nowa wingile mu ciwato, 39 nupya yatiisileko mano kufikila lino mulamba wizile ayasenda yonsi, vikwene avino cilaya na lino Umwana wa muntu alayapo. 40 Lyene aonsi yaili yalaya mu calo; wenga alasendwa nupya umuze alasyala. 41 Anaci yaili yalaasya api we; wenga alasendwa nupya umuze alasyala. 42 Fwandi twalililini ukuya aiteyanye pano mutaamanya uwanda uno Umwene winu aliza.

43 “Lelo manyini icintu conga: Ndi cakuti umwineco wa ng’anda watamanya insita ino umupuupu amaizilapo usiku, atanga akasule nupya atanga aleke ukuti amwingilile umu ng’anda nu kumwiyila. 44 Ali cino namwe kwene muiteyanye, pano Umwana wa muntu aliza pa nsita ino musikwenekela.

45 “Uzye lyene umuomvi mutailwe nupya uwa mano, wino umwene wakwe wasonsile ukuti aasakamala amu ng’anda yakwe nu kuyapeela ivyakulya pa nsita ilinge, a weni? 46 U wa nsansa umuomvi wiyo ndi cakuti lino umwene wakwe aliza, alamuzana akuomba umulimo wakwe! 47 I cumi nkumunena ukuti alamusonta ukuti asakamala ivyuma vyakwe vyonsi.

48 Lelo ndi cakuti umuomvi wiyo u mwipe nupya walanda umu mwenzo wati, ‘Umwene wane walengela,’ 49 nupya watandika ukuuma aomvi yauze nu kulya alino nu kumwela pamwi na yano yamanyikwa ukuti aacakolwa, 50 umwene wa muomvi wiya aliza pa wanda uno asikwenekela nupya pa nsita ino atamanyile, 51 nupya alamufulula icipisye nu kumwika pamwi na asomvi. Kuko u kulaya ukulila nu kulumanya incecete.

25 “Lyene Uwene wa kwi yulu wakolana na ya nacisungu 10 aasenzile ya lampi nu kuya umu kukomenkanya siwinga. 2 Ya nacisungu 5 yali aawelewele, nupya 5 yali aamano. 3 Pano awelewele yasenzile ya lampi lelo ukwaula ukusenda mafuta na yauze aakwikamo, 4 lelo ya nacisungu aamano yene yasenzile ya lampi alino na mafuta na yauze aakwikamo. 5 Lino siwinga walengiile ukwiza, yonsi yatandike ukusipula iyasuka iyakasula nu kukasula. 6 Lyene pakasi ka usiku yuvwile antu yakupunda yakuti: ‘Siwinga wiza! Kamukomenkanyini.’ 7 Lyene ya nacisungu yonsi yakatwike nu kupekanya ya lampi yao. 8 Awelewele yanenyile aamano iyati, ‘Tupeeliniko mafuta, pano swemo ya lampi itu yasya yazime.’ 9 Aamano yaswike iyati: ‘Limwi mafuta yano tukweti yatanga yatukumane swensi. Fwandi pitangini mukakale kuli yano yakakazya.’ 10 Lino yapisile uku kukala mafuta, alino siwinga nawe wafisile. Nupya ya nacisungu aiteinye ingiile nawe umu ng’anda ya winga ni cisaasa cayazilwe. 11 Lyene pa cisila, ya nacisungu yano yaile umu kukala mafuta yawezile nu kutandika ukupunda iyati, ‘Siwinga, Siwinga, tuyulile!’ 12 Nawe wayaswike ati, ‘I cumi nkumunena ukuti ntamumanyile.’

13 “Fwandi mwaya aiteyanye, pano mutaamanya uwanda nanti insita.

14 Nupya Uwene wa kwi yulu wakolana nu muntu umwi uwali apiipi nu kuya uku mpanga ya kutali uwamile aomvi yakwe nu kuyaseekezya icuma cakwe. 15 Wapeezile umuomvi wenga matalanti* 5, muze nawe yaili, lyene umuze nawe lyonga, cila muntu ukulingana na maka yakwe, alino apita uku mpanga ya kutali. 16 Papo kwene sile uwapeezilwe matalanti 5 wayile umu kucita uculuzi, nupya wazaniilepo na yauze 5. 17 Vikwene avino nu wapeezilwe matalanti yaili wacisile, nupya wazaniilepo na yauze yaili. 18 Lelo umuomvi uwapeezilwe italanti lyonga, waile aimba iciwina nu kuziika ulupiya* luno umusambazi wakwe wamupeezile.

19 “Lino papisile insita itali, umusambazi wa yaomvi yaa wawezile umu kulola vino aomvi yakwe yaomvizye impiya zyakwe. 20 Fwandi uwapeezilwe amatalanti 5 waile uku musambazi wakwe ale asenzile matalanti na yauze 5, nu kumunena ati, ‘Musambazi, wampeezile matalanti 5; nomba lola, inzanilapo na yauze 5.’ 21 Umusambazi wakwe wamunenyile ati: ‘Wacita ningo, wewe muomvi musuma nupya uwa cisinka! Wali ni cisinka umu vintu ivinono. Namakusonta ukuti uwasakamala ivintu ivingi. Ingila nu kusansamukila pamwi nu musambazi wako.’ 22 Lyene uwapeezilwe amatalanti yaili waile uku Musambazi nu kumunena ati, ‘Musambazi, wampeezile matalanti yaili; nomba lola, inzanilapo na yauze yaili.’ 23 Umusambazi wakwe wamunenyile ati: ‘Wacita ningo, wewe muomvi musuma nupya uwa cisinka! Wali ni cisinka umu vintu ivinono. Namakusonta ukuti uwasakamala ivintu ivingi. Ingila nu kusansamukila pamwi nu musambazi wako.’

24 “Nupya uwapeezilwe italanti lyonga waile uku Musambazi nu kumunena ati; ‘Musambazi, namanyile ukuti wewe umuntu umutale, ukazombola pano utaakomiile nupya ukakolonganika vino utaaombiile. 25 Fwandi natiinyile nupya naile inzika italanti lyako. Italanti lyako aeli.’ 26 Umusambazi wakwe wamwaswike ati: ‘We muomvi mwipe nupya umukasu, uzye fwandi wamanyile ukuti nkazombola pano ntaakomiile nu kukolonganika vino ntaaombiile? 27 Fwandi nga waile usungila impiya* zyane uku banki, pakuti nga nawela akuno inja insenda kumwi ni zya papela.

28 “‘Fwandi mupokini italanti nu kupeela kuli wino akweti matalanti 10. 29 Pano wensi uwakwata, alapeelelwapo na vyuze, nupya alakwata ivingi, lelo wensi aatakwata, alapokwa na tonsi tuno akaelenganya ukuti wakwata. 30 Nupya sumbilini umuomvi wii uwa sile sile ukunzi umu mfinzi. Kuko u kulaya ukulila nu kulumanya incecete.’

31 “Lino Umwana wa muntu aliza umu lulumbi lwakwe pamwi na ya malaika yakwe, alikala pa cilimba cakwe ica wene ica lulumbi. 32 Inko zyonsi zilakolonganikwa pa nkoleelo yakwe, nupya alapaatukanya antu wakwe vino kacema akapaatukanya imfwele ni mbuzi. 33 Nupya aliika imfwele ukwi kasa lyakwe ili lunji, lelo imbuzi alaziika kuli cimani.

34 “Lyene Umwene alanena akwi kasa li lunji ati: ‘Izini kuno, mwemuno mwapaalwa na Tata, pyanini Uwene uno yamupekanyizizye ukufuma pa kutandika kwa nsi. 35 Pano nali ni nzala namwe mwampeezile ivyakulya; nali nu lusala namwe mwampeezile amanzi. Nali umwenyi namwe mwampokelile ningo. 36 Nali umusizye namwe mwampeezile ivyakuzwala. Nali umulwale namwe mwansakamile. Nali umu cifungo namwe mwantandalile.’ 37 Lyene alungami yalamwasuka yati: ‘Mwene, a lilaci lino twakuweni uli ni nzala naswe itukupeela ivyakulya, nanti lino wali nu lusala naswe itukupeela manzi ya kumwa? 38 A lilaci lino twakuweni wewe mwenyi naswe itukupokelela ningo, nanti lino wali umusizye naswe itukupeela ivyakuzwala? 39 Nupya a lilaci lino twakuweni wewe mulwale nanti lino wali umu cifungo naswe itukutandalila?’ 40 Umwene nawe alayasuka ati. ‘I cumi nkumunena ukuti, pa mulandu wakuti mwavwilizye wenga pa ina yane yaa anono, mwavwilizye nene.’

41 “Lyene alanena aakuli cimani ati: ‘Fumini pano, mwemuno mwatiipwa, yangini umu moto wa pe uno yapekanyizizya Ciwa na ya malaika yakwe. 42 Pano lino nali ni nzala, mutampeezile ivyakulya, nupya lino nali nu lusala mutampeezile amanzi ya kumwa. 43 Nupya lino nali umwenyi, mutampokelile ningo; nali musizye mutampeezile ivyakuzwala, nalwile nupya nali umu cifungo, lelo mutansakamile.’ 44 Lyene nayo kwene yalamwasuka yati: ‘Mwene, a lilaci lino twakuweni uli ni nzala nanti lino wali nu lusala nanti lino wali umwenyi nanti lino wali umusizye nanti lino wali umulwale nanti lino wali umu cifungo, naswe itukaana ukukwavwa?’ 45 Nawe alayasuka ati: ‘I cumi nkumunena ukuti pa mulandu wakuti mutavwilizye wenga pali yaa anono, mutaavwilizye nene.’ 46 Yaa yalononwa manda pe,* lelo alungami yene yalaya nu umi wa pe.”

26 Lyene lino Yesu wamazile ukulanda ivintu vii vyonsi, wanenyile asambi yakwe ati: 2 “Mwatimumanya ukuti kwasyala sile amanda yaili ale uwanda wa Ucilo wafika, nupya Umwana wa muntu alapeelwa uku yalwani yakwe pakuti yamupoopele pa cimuti.”

3 Lyene ya simapepo akalamba ni ntunguluzi zya yantu yakolongine pa musolo wakwe simapepo mukalamba, uwi zina lyakuti Kayafa, 4 Nupya yuvwanyile ukuti yaleme Yesu umu mucenjelo nu kumukoma. 5 Lelo yalandanga iyati: “Tutaca tucite vivyo pa wanda wa kuzevya, pano antu yangaca yalete icimvulunganya.”

6 Lino Yesu wali uku Betaniya umu ng’anda yakwe Simoni uwalwilepo tembwe, 7 umwanaci umwi waile kuli Yesu ala asenzile ibotolo lya mafuta anunkile nupya aamutengo, nupya watandike ukwitulwila Yesu mafuta pa mutwe pa nsita ino Yesu walyanga icakulya. 8 Lino asambi yakwe yaweni vivyo, yasosile nu kulanda iyati: “U wononyi wa musango ci uu? 9 Pano mafuta yaa nga yakaziwe pa mutengo ukome nu kupeela impiya ku yapiina.” 10 Lino Yesu wamanyile vino yalandangapo, wayanenyile ati: “U mulandu ci uno mukucuzizya umwanaci wii? Watancitila icintu cisuma. 11 Pano apiina mwaya nayo lyonsi, lelo nemo mutalaya nani lyonsi. 12 Lino umwanaci iwitulwila mafuta pa mwili wane, wali akumpekanyizizya vino ndaziikwa nga nafwa. 13 I cumi nkumunena ukuti konsi kuno ilyasi lisuma lilasimikilwa umu nsi yonsi, na vino umwanaci wii watacita navyo kwene vilalandwa pa kumwiusya.”

14 Lyene wenga pa yatumwa 12 wino yamanga yakuti Yuda Iskalyoti, waile kuli ya simapepo akalamba 15 nu kuyuzya ati: “I cani cino mumampeela ndi cakuti nafutuka Yesu pakuti mumuleme?” Nayo yamulavile kumupeela impiya zyakwe siuva 30. 16 Fwandi ukufuma pa nsita kwene iiya, watandike ukulonda inzila iyakufutukilamo Yesu.

17 Pa wanda wa kutandikilako ukupekanya Umukate Uwaula Icitutumusi, asambi yaile kuli Yesu iyamuzya iyati: “Aekwi kuno ukulonda tukakupekanyizizye ukuliila Ucilo?” 18 Nawe wayanenyile ati: “Yangini mu musumba, mwayazana umuntu umwi nupya mumunene muti, ‘Kasambilizya wati: “Insita yane yatipalama; namaiza inzevezye Ucilo umu ng’anda yako pamwi na asambi yane.”’” 19 Fwandi asambi yacisile viivi kwene vino Yesu wayanenyile nupya yapekanyizye Ucilo.

20 Lino cafisile manguzi, Yesu wikazile pamwi na asambi yakwe 12 iyatandika ukulya. 21 Lino yalyanga, Yesu walanzile ati: “I cumi nkumunena ukuti umwi pali mwemwe amamfutuka.” 22 Nayo yuvwile sana ulanda, nupya yonsi yatandike kumuzya iyati: “Mwene uzye ale anene?” 23 Yesu nawe waswike ati: “Wino akuteela pamwi nani umu mbale ali wino amamfutuka. 24 I cacumi, Umwana wa muntu alafwa wakwe vino calembwa pali aliwe, lelo kalanda uku muntu aakufutuka Umwana wa muntu! Nga cazifile umuntu wiyo atavyalwa.” 25 Yuda uwali apiipi nu kufutuka Yesu wamuzizye ati: “Labi uzye anene?” Yesu nawe wamwaswike ati: “Watuvwanga wemwineco.”

26 Lino yalyanga, Yesu watozile umukate, pa cisila ca kutaizya kuli Leza, waumokozile nu kupeela asambi yakwe, alino ayanena ati: “Tolini mulye. Umukate uu ukwimililako umwili wane.” 27 Nupya watozile kapu, ataizya kuli Leza nu kupeela asambi yakwe, alino ayanena ati: “Mwinimo mwensi, 28 pano waini aalimo, akwimililako ‘uwazi wane uwa upangano,’ uuli nu kupongololwa pakuti imembu zya yantu aingi zyelelwe. 29 Lelo nkumunena ukuti: “Ntalamwapo nupya waini wii kufikila uwanda uuwa lino ndamwa waini umupya pamwi namwe umu Wene wakwe Tata.” 30 Pa cisila ca kwimba inyimbo zya kulumbanya Leza, yaile ku Mwamba wa Miolivi.

31 Lyene Yesu wayanenyile ati: “Mwensi mumansya muno usiku, pano calembwa ukuti: ‘Ndakoma kacema, ni mfwele zilasalangana.’ 32 Lelo lino ndatuutululwa ndamukolelela uku Galili.” 33 Lelo Petulo wamunenyile ati: “Nanti cakuti yonsi yakusya, nemo ntakukusya!” 34 Yesu wamunenyile ati: “I cumi nkukunena ukuti usiku kwene uu lino mukolwe atatala walamula, umankana imiku itatu.” 35 Petulo wamunenyile ati: “Nanti cakuti ningafwila pamwi nawe, ntakukukana.” Asambi yauze yonsi nayo kwene yalanzile icili cimwi.

36 Lyene Yesu waile na asambi yakwe ku ncende iyamwanga ukuti Getisemani, nupya wayanenyile ati: “Ikalini paa, natala naya kuuku mu kupepa.” 37 Lyene wasenzile Petulo na ya mwana Zebedi aonsi yaili, nupya watandike ukuvwa ulanda nu kusakamikwa sana. 38 Lyene wayanenyile ati: “Indi sana nu ulanda icakuti ningafwa nu kufwa. Ikalini paa nu kutwalilila ukulola pamwi nani.” 39 Lino waile pa nkoleelo panono, wafukime nu kwinama, alino apepa ati: “Tata nga cingacitika, fumya kapu wi pali nene. Lelo asi ukulingana nu kulonda kwane suka ukulonda kwako.”

40 Lino waswilile uku yasambi yakwe, wazanyile yakukasula, nupya wanenyile Petulo ati: “Uzye mutanga mutwalilile ukulola pamwi nani nanti sile api awala lyonga? 41 Twalililini ukulola nu kupepa, pakuti mutingila umu wezyo. Umwenzo wene ukulonda nomba umwili iutonta.” 42 Nupya kwene waswilile umuku wakwe ciili nu kupepa ati: “Tata, nga citanga cicitike ukusisya kapu wii ukwaula ukuti imwemo, leka ukulonda kwako kucitike.” 43 Nupya kwene waswilile nu kuzana iyakasula, pano ala manso yao iyafina nu tulo. 44 Fwandi wayasile, nupya kwene waile umu kupepa umuku wakwe citatu ala akulanda amazwi aliyamwi kwene. 45 Lyene waswilile uku yasambi yakwe nu kuyanena ati: “Uzye pa nsita ya musango uu apano mukukasula nu kupuuza? Lolini! Insita yapalama iyakuti Umwana wa muntu afutukwe nu kupeelwa uku yayembu. 46 Katukini, tuini twapita. Lolini! Aamamfutuka wasya afike.” 47 Lino acili akuvwanga, lolini! Umusambi wenga pa yasambi 12 uwi zina lyakuti Yuda, wafisile ale ali ni umba ilikalamba ilya yantu lino ya simapepo akalamba ni ntunguluzi zya yantu yatumile, ala iyasenda impanga ni zya ntuwa.

48 Lyene uwali nu kumufutuka wayapeezile icimanyililo, ayanena ati: “Wino namatonsola ali wiyo kwene; mumuleme.” 49 Nupya waile kuli Yesu, amunena ati: “Uli Labi?” nupya wamutonswile. 50 Lelo Yesu wamuzizye ati: “I cani cino uwiziile?” Lyene yaile kuli aliwe iyamulema nu kumusenda. 51 Lelo wenga pali yano yali na Yesu, wafumizye ulupanga lwakwe nu kuputula ikutwi lya muomvi wakwe simapepo mukalamba. 52 Lyene Yesu wamunenyile ati: “Swilizya ulupanga lwako muno lukaikala, pano yonsi aakaomvya ulupanga yalafwila uku lupanga. 53 Nanti uzye ukwelenganya ukuti ntanga ndenge kuli Tata ukuti ampeele pa nsita kwene yii maumba akulu 12 yakwe ya malaika? 54 Nomba uzye nga nacita vivyo, Malembo yangafikiliziwa uli aakalanda ukuti vikwene avino cilinzile ukuya?” 55 Pa nsita kwene iiya Yesu wanenyile iumba ati: “Uzye imwiza umu kundema ni mpanga ni zya ntuwa kwati mwizile umu kulema icipondo? Cila wanda nayanga namwe umwi tempele ala nkusambilizya, lelo mutatazile imundemapo. 56 Nomba vyonsi vii ivicitika pakuti vino ya kasesema yalemvile* vifikiliziwe.” Lyene asambi yakwe yonsi yutwike nu kumusya.

57 Aalemile Yesu yamutwazile kuli Kayafa simapepo mukalamba, kuno ya kalemba ni ntunguluzi zya Yayuda yakolongine. 58 Lelo Petulo walondelanga Yesu akatalamukila asuka aya afika na pa musolo wa ng’anda yakwe simapepo mukalamba, nupya lino wingile umukasi, wikazile pamwi na aomvi ya mu ng’anda pakuti alole ivyali nu kucitika.

69 Lyene Petulo watenzi umu musolo wa kunzi, nupya umukazyana uwali umuomvi waile kuli aliwe nu kumunena ati: “Naawe kwene wali pamwi na Yesu uwa ku Galili!” 70 Lelo wakanyile pa manso ya yantu yonsi, ati: “Ntamanyile vino ukulandapo.” 71 Lino waile uku kang’anda ka pa mpongolo, mukazyana na muze wamuweni nu kunena antu aalipo ati: “Umuntu wii wali pamwi na Yesu uwa ku Nazaleti.” 72 Nupya kwene Petulo wakanyile alapa nu kulapa ati: “Ntamumanyile umuntu wii!” 73 Lino papisile sile kasita kanono, aimiliile umupiipi yaile kuli Petulo iyamunena iyati: “Icumi nawe kwene wewe musambi wakwe Yesu, pano imilandile yako ikoline ni ya yantu aku Galili.” 74 Lyene watandike ukuitiipwila nu kulapa ati: “Ntamumanyile umuntu wii!” Nupya lilyo kwene mukolwe walamwile. 75 Nupya Petulo wiwisye mazwi yano Yesu walanzile aakuti: “Lino mukolwe atatala walamula, umankana imiku itatu.” Lyene Petulo wafumile panzi nu kuyalila sana.

27 Lyene katondo, ya simapepo akalamba yonsi ni ntunguluzi zya Yayuda yuvwanyile kuti yakome Yesu. 2 Pa cisila ca kumunyepa, yamutwazile kuli Pilato kateeka.

3 Lyene lino Yuda uwafutwike Yesu waweni ukuti Yesu wapingulwa ukukomwa, walangulwike nupya waswilizye impiya zyakwe siuva 30 kuli ya simapepo akalamba ni ntunguluzi zya Yayuda, 4 nu kulanda ati: “Nayembwike pa kufutuka umuntu uwa kaele.” Nayo yamunenyile iyati: “Nomba ukulonda tucite uli? Umamanya ivya kucita!”* 5 Fwandi wasumbiile impiya zyakwe siuva umwi tempele nu kufumapo. Lyene waile aikulika. 6 Lelo ya simapepo akalamba yatozile impiya zizyo nu kulanda iyati: “Isunde litazumilizya ukwika impiya zii mu cipao ca muzilo, pano i zya wazi.” 7 Pa cisila ca kulanzyanya, yaomvizye impiya zizyo uku kukala impanga* iya kuziikamo aenyi. 8 Fwandi impanga iiyo ikaamwa ukuti Impanga ya Wazi ukufika na ndakai kwene. 9 Lyene amazwi aavwanzilwe ukupitila muli kasesema Yelemiya yafikiliziwe aakuti: “Nupya yatozile impiya zyakwe siuva 30, umutengo uno ana onsi yamwi yakwe Izlaeli yazumilizyanyizye ukuti auno akalilwepo, 10 nupya yaomvizye impiya zizyo uku kukala impanga yakwe nakamata, ukulingana na vino Yeova wanenyile.”

11 Lyene Yesu wimilile pa nkoleelo yakwe kateeka, nupya kateeka wamuzizye ati: “Uzye wewe Mwene wa Yayuda?” Yesu nawe waswike ati: “Watuvwanga wemwineco.” 12 Lelo lino ya simapepo akalamba ni ntunguluzi zya Yayuda yamupeelanga imilandu, ataswike nanti acimwi. 13 Lyene Pilato wamuzizye ati: “Uzye utakuvwa ivintu uwingi vino yakukusinila?” 14 Lelo ataamwaswike nanti acimwi, fwandi kateeka wazungwike sana.

15 Lyonsi lino kwaya ukuzevya kwa ucilo, kateeka wasapwilanga iumba umufungwa wino likulonda. 16 Pa nsita iiya ale yalema Balaba uwali icipondo icimanyikwe sana. 17 Fwandi lino yakolongine, Pilato wayuzizye ati: “A weni wino mukulonda imusapwile, uzye a Balaba nanti Yesu wino yakaama ukuti Klistu?” 18 Pano Pilato wamanyile ukuti antu yaamutwalile Yesu pa mulandu nu muvimbila. 19 Nupya lino Pilato watenzi pa cilimba ca upinguzi, umuci wamutumiile amazwi aakuti: “Utacita icili consi uku muntu wii umulungami, pano ilelo incula sana mu ciloto cino inalota pali aliwe.” 20 Lelo ya simapepo akalamba ni ntunguluzi zya Yayuda yatonsizye iumba ukuti lilenge kuli Pilato ukusapula Balaba, lelo Yesu wene akomwe. 21 Lyene kateeka nawe wayuzizye ati: “Uzye a weni wino mukulonda ukuti imusapwile pa yantu yaa yaili?” Nayo yaswike iyati: “Balaba.” 22 Pilato wayuzizye ati: “Uzye fwandi i cani cino mukulonda incite kuli Yesu wino yakaama ukuti Klistu?” Yonsi yaswike iyati: “Apoopelwe pa cimuti!” 23 Nawe wayuzizye ati: “U mulandu ci? I cani cino wataluvyanya?” Lelo alino yacizilemo ukupundisya iyati: “Apoopelwe pa cimuti!”

24 Lelo lino Pilato waweni icimvulunganya nu kulola ukuti pasi cino wali nu kucita, watozile amanzi nu kufulala ku minwe pa manso ya yantu, alino alanda ati: “Nemo nene wa kaele uku wazi wa muntu wii. U mulandu winu.” 25 Lino antu yonsi yuvwile vivyo, yaswike iyati: “Lekini uwazi wakwe uye pali sweswe na pa yana itu.” 26 Lyene wayasapwilile Balaba nu kupingula ukuti Yesu aumwe ivikoti nu kupeelwa uku yantu pakuti yamupoopele pa cimuti.

27 Lyene asilika yakwe kateeka yatwazile Yesu pa ng’anda yakwe kateeka nu kukolonganika iumba lyonsi ilya yasilika nalyo ilimuzinguluka. 28 Lyene yamuzuzile ivyakuzwala nu kumuzwika icakuzwala iciyenzu, 29 nupya yapanzile icisote ca myunga nu kumuzwika uku mutwe iyamulemeka ni itete ukwi kasa li lunji. Nupya yafukime pa nkoleelo yakwe alino iyatandika ukumutumfya ala yakuti: “Mwapola, we Mwene wa Yayuda!” 30 Nupya yamuswizile nu kutola itete iyatandika ukumuma pa mutwe. 31 Lyene pa cisila ca kumutumfya, yamuzuzile icakuzwala iciyenzu nu kumuzwika ivyakuzwala vyakwe ivya kunzi alino iyamusenda pakuti yakamupoopele pa cimuti.

32 Lino yafumanga umu musumba, yazanyile umonsi umwina Kuleni uwi zina lyakuti Simoni. Umonsi wii yamupatikizye ukusendela Yesu icimuti ca kucuziwilwapo.* 33 Nupya lino yafisile pa ncende ino yamanga ukuti Gologota, icikapiliula ukuti Ipanga,* 34 yamupeezile waini umuminkanye ni vilule, nomba lino uvwile vino vikuvwika, wakanyile ukumwa. 35 Lino yamupoopiile pa cimuti, yapendozile nu kwankana ivyakuzwala vyakwe ivya kunzi, 36 nupya yateenzi kuku kwene ala yakumulinda. 37 Nupya isile icipampa lwa papela ya mutwe wakwe pano yalemvile umulandu uno yamupeezile, yalemvile iyati: “Wii a Yesu Umwene wa Yayuda.”

38 Lyene ivipondo viili yaviisile pa vimiti umupiipi na Yesu, conga ukwi lunji ni cuze kuli cimani. 39 Nupya aapitanzila yamupontelanga ala yakupukunya imitwe 40 nu kulanda iyati: “Wemuno ungawisya itempele nu kulikuula pa manda yatatu, ipususye! Nga wewe mwana wakwe Leza, ika uku cimuti ca kucuziwilwapo!”* 41 Ya simapepo akalamba kumwi na ya kalemba ni ntunguluzi zya Yayuda nayo kwene yatandike ukumutumfya, iyati: 42 “Wene wapususyanga yauze; lelo wafilwa ukuipususya! U Mwene wa ina Izlaeli; lekini aike ku cimuti ca kucuziwilwapo,* alino tumamutaila. 43 Wene wataila Leza; lekini amupususye ndi cakuti akulonda ukumwavwa, pano walandanga akuti, ‘Nene Mwana wakwe Leza.’” 44 Ni vipondo ivyali pa vimiti umu mbali yakwe navyo kwene vyamupontelanga.

45 Kutandika 12:00,* kwali imfinzi umu mpanga yonsi ukwizafika ni nsita yakwe 15:00.* 46 Lyene ku ma 15:00, Yesu wapunzile ni izwi likalamba ati: “Eli, Eli, lama sabakatani?” kuli kuti “Leza wane, Leza wane, i cani cino wandekelezezya?” 47 Lino yuvwile vivyo, yamwi aimilile pa ncende iiya yatandike ukulanda iyati: “Umuntu wii akwama Eliya.” 48 Nupya lilyo kwene wenga pali aliyo wasimwile aya atola pamba nu kumutimpika muli waini mukantuke alino asomekamo itete nu kupeela Yesu pakuti amwe. 49 Lelo aasyala yalanzile iyati: “Muleke! Leka tulole ndi cakuti Eliya amaiza amupususye.” 50 Nupya kwene Yesu wapunzile ni izwi ilikalamba alino afwa.*

51 Nupya lolini! iketani lya mwi tempele lyalepwike ilyankanikana paili, ukufuma papela ukufika pansi, ni nsi yatenkanyile ni vimawe vyalepwike. 52 Na malindi yayulike, alino ni vitumbi ivingi ivya yantu ya muzilo vyatukwike, 53 nupya vyalolike uku yantu aingi. (Lino Yesu watuutulwilwe, antu yamwi aafumanga ku malindi iingile umu musumba wa muzilo.) 54 Lelo lino umukalamba wa yasilika na yano wali nayo aalindanga Yesu yaweni icilundumusi ni vyacitike, yuvwile sana intete nupya yalanzile iyati: “I cumi wii wali u Mwana wakwe Leza.”

55 Nupya na anaci aingi aasukilile Yesu kufuma uku Galili pakuti yamusakamala, yaali akatalamukila ala yakutamba ivyacitikanga; 56 Pali yayo pali Maliya uwa ku Magadala, Maliya nyina wakwe Yakobo na Yosesi, alino nu muci* wakwe Zebedi nyina wakwe Yakobo na Yoani.

57 Lyene umu nsita ya manguzi, umonsi uwa cuma uwa ku Alimatiya uwi zina lyakuti Jozefu wizile, nawe kwene wali u musambi wakwe Yesu. 58 Umonsi wii waile kuli Pilato nu kulenga umwili wakwe Yesu. Pilato nawe walanzile ukuti yamupeele umwili uwo. 59 Lyene Jozefu watozile umwili wakwe Yesu, aupomba umu nsalu iya usaka nupya isuma, 60 nu kuwika umwi lindi lyakwe lino wafukwile umu ciliwe. Nupya lino wakunkulwisye iciliwe icikulu nu kucilika pa mulyango wi lindi, wafumilepo. 61 Lelo Maliya uwa ku Magadala na Maliya muze yaatwalilile ukuya papa kwene, ale iikala apiipi ni lindi.

62 Uwanda uwalondelilepo, pa cisila ca kupekanya Isabata, ya simapepo akalamba na Afaliseo yakolongine kuli Pilato, 63 nu kumunena iyati: “Musambazi, tukwiusya ukuti umusomvi wiya lino atatala wafwa walanzile ati, ‘Pa cisila ca manda yatatu ndatuutululwa.’ 64 Fwandi nena aakuya umu kulinda ilindi kufika pa wanda wakwe citatu, pakuti asambi yakwe yataca yakamwiye nu kunena antu iyati, ‘Watuutulwilwe ukufuma uku yafwe!’ Pano ufi uu ulipisya ukucila uwa kutandikilako.” 65 Pilato nawe wayanenyile ati: “Sendini alinzi nu kuyalinda ningo ilindi.” 66 Fwandi yaile iika icimanyililo pa ciliwe nu kusyapo alinzi pakuti yacingilile ilindi.

28 Pa cisila ci Sabata, pa wanda wa kutandikilako* umu mulungu pa macaca, Maliya uwa ku Magadala na Maliya muze yaile umu kulola ilindi.

2 Nupya kwacitiike icilundumusi icikalamba, pano malaika wakwe Yeova wafumile ukwi yulu nu kuya kunkulusya iciliwe icali apa mulyango wi lindi, aikala na pa ciliwe kwene. 3 Imilolekele yakwe yali wa kumyantula kwa nkuwa, nupya ivyakuzwala vyakwe vyali ivitiswe sana. 4 Alinzi yaafwile icipafi pa mulandu wakuti yuvwile sana intete.

5 Lelo malaika wanenyile anaci ati: “Mutatiina, pano imanya ukuti mukulonda Yesu wino yapoopiile pa cimuti. 6 Asipo pano, watatuutululwa wakwe vino walanzile. Izini mulole pano waizi. 7 Fwandi pitangini likwene mukanene asambi yakwe ukuti watatuutululwa ukufuma uku yafwe, pano amamukoleelela uku Galili. Mumaya mukamulole kuuku kwene. Yakwene ali mazwi yano mukwatiile.”

8 Fwandi lilyo kwene sile yafumile ukwi lindi ale yali ni ntete ni nsansa sana nupya yasimwile iyaya umu kunena asambi yakwe Yesu. 9 Nupya Yesu wakomenkine na anaci nu kuyalamuka ati: “Mwapoleni!” Nayo yapaliime kuli aliwe iyamufukamila nu kumulema uku ngazo. 10 Lyene Yesu wayanenyile ati: “Mutatiina! Yangini mukanene ainane pakuti yaye uku Galili, nupya kuuku kwene akuno yamaiza yandole.”

11 Lino anaci yacili umu nzila, alinzi yamwi yaile umu musumba nu kuya simikila ya simapepo akalamba vyonsi ivyacitiike. 12 Nupya lino ya simapepo akalamba yakolongine nu kulanzyanya ni ntunguluzi zya Yayuda, yapeezile asilika impiya zyakwe siuva izingi 13 nu kuyanena iyati: “Munene antu ukuti, ‘Asambi yakwe iiza usiku nu kumwiya ala itukasula.” 14 Ndi cakuti ilyasi lii lyaca lyuvwika kuli kateeka tulamulondolwela* ningo, nupya mutalinzile ukusakamala.” 15 Nayo yaatozile impiya zyakwe siuva nu kucita vino yayanenyile, nupya ilyasi lii lyasalangana sana uku Yayuda ukufika na ndakai kwene.

16 Lelo asambi yakwe 11 yaile uku Galili, uku mwamba kuno Yesu wapekanyizye ukuti akuno yakakomenkane. 17 Lino yamuweni, yamufukamiile, lelo yamwi yene yatwisiike ndi cakuti aliwe. 18 Lyene Yesu wapaliime kuli aliyo nu kuyanena ati: “Impeelwa amaka yonsi umwi yulu na pano nsi. 19 Acino fwandi, yangini mukapange antu amu nko zyonsi ukuya asambi, mwayabatizya umwi zina lyakwe Tata ni lya Mwana ni lya mupasi wa muzilo, 20 mwayasambilizya ukulondela vyonsi vino namunenyile. Nupya lolini! Namayanga namwe amanda yonsi ukufika nu ku mpelelekezyo ya nsi.”*