Watchtower LAIBULALE UWA PA INTANETI
Watchtower
LAIBULALE UWA PA INTANETI
Cimambwe-Lungu
  • BAIBO
  • MPAPULO
  • KULONGANA
  • nwt Luka 1:1-16:8
  • Mako

Kutaaya vidyo pali vino mwasoolola

Awe icumi catala, vidyo wakaana ukuloleka

  • Mako
  • Baibo Uwa Malembo ya Nsi Ipya
Baibo Uwa Malembo ya Nsi Ipya
Mako

ILYASI LISUMA ILYALEMVILWE NA MAKO

1 Vii ali vino ilyasi lisuma pali Yesu Klistu Umwana wakwe Leza lyataandika: 2 Wakwe vino calemvilwe umwi buku lyakwe kasesema Ezaya ukuti: “(Ndatuma inkombe iilakukolelela,* iilakupekanyizizya inzila lino utali uwize.) 3 Izwi lyakwe umwi likupunda umu lwanga likuti: ‘Zifini inzila yakwe Yeova! Olololini imiseo yakwe.’” 4 Yoani Kabatizya wali umu lwanga, ala akusimikila antu ukuti yalinzile ukubatiziwa pa kulangilila ukuti iyalapila uku membu zyao pakuti yelelwe. 5 Nupya antu yonsi amu Yudeya na yonsi amu Yelusalemu yayanga kuli aliwe, nupya wayabatizyanga* umu Luzi lwa Yodani, ala yakusokolola imembu zyao apaswe. 6 Lyene Yoani wazwalanga icakuzwala ca mavumbu ya ngamali nu musipi wa mpapa umu musana, nupya walyanga makanta nu uci wa mu mpanga. 7 Nupya wasimikilanga akuti: “Umwi aakweti amaka ukuncila akwiza pa cisila cane, nupya ntakweti insambu zya kwinama nu kusapula intambo uku ndyatu zyakwe. 8 Nemo nkumubatizya na manzi, lelo wene alamubatizya nu mupasi wa muzilo.”

9 Umu manda kwene yaaya, Yesu wafumile uku Nazaleti uwa ku Galili nu kuyabatiziwa kuli Yoani umu luzi lwa Yodani. 10 Pa cisila ca kufuma umu manzi, Yesu waweni iyulu lyayulika, nupya umupasi wa muzilo wizile pali aliwe wa nkunda. 11 Nupya kuvwisile ni izwi ukufuma umwi yulu iliti: “Wewe Mwanane wino natemwa, nkazangila muli wewe.”

12 Nupya lilyo kwene sile umupasi wa muzilo watungulwile Yesu uku lwanga. 13 Fwandi watwalilile ukwikala umu lwanga pa manda 40 ala Satana akumwezya. Nupya umu lwanga mwali ni nyama zya mu mpanga, lelo ya malaika yamusakamalanga.

14 Lyene lino Yoani yamulemile, Yesu waile uku Galili ala akusimikila ilyasi lisuma lyakwe Leza 15 ati: “Insita yatifika nupya Uwene wakwe Leza watiupalama. Lapilini nu kutaila ilyasi lisuma.”

16 Lino wapitanga umu mbali yakwe Yemba wa Galili, waweni Simoni na Andeleya umwina wakwe Simoni, ala yakusumbila masumbo muli yemba, pano yali aakavuwa ya nswi. 17 Lyene Yesu wayanenyile ati: “Ndondelini, nani namamulenga ukuya ya kavuwa ya yantu.” 18 Nupya lilyo kwene sile yasiile masumbo yao nu kumulondela. 19 Lino Yesu waile pa nkoleelo panono, waweni Yakobo na Yoani ya mwana Zebedi, ala yali umu wato yakusuma masumbo yao, 20 nupya lilyo kwene wayamile. Fwandi yasiile isi Zebedi umu wato na aomvi yakwe nu kulondela Yesu. 21 Nupya yaile umu Kapenaumu.

Lino Isabata lyatandike sile, Yesu waile umwi sunagogi* nu kutandika ukusambilizya. 22 Nupya antu yazungwike sana pa misambilizizye yakwe, pano wayasambilizyanga wa muntu uwali na maka ukupusanako na ya kalemba. 23 Pa nsita kwene iiya, umwi sunagogi lyao mwali umonsi umwi uwatungululwanga nu mupasi ukowele, nupya wapunzile ati: 24 “I vyani vino ukulonda kuli sweswe, we Yesu wa ku Nazaleti? Uzye wiza umu kutonona? Ninkumanya ningo, wewe wa Muzilo nupya watumwa na Leza!” 25 Lelo Yesu wakalipile umupasi ukowele ati: “Congo, nupya fuma umu muntu wii!” 26 Pa cisila cakuti umupasi ukowele wavumvunya umonsi nu kupunda ni izwi ilikulu, lyene umupasi uwo wafumile muli aliwe. 27 Lyene antu yonsi yazungwike sana iyatandika nu kulanzyanya iyati: “I cani cii? Uzye i misambilizizye iipya? Akweti na maka ya kunena imipasi ikowele kuti ifume umu yantu, nayo ikumuvwila.” 28 Fwandi ilyasi pali Yesu lyasalangine zuwa umu mpanga yonsi iya Galili.

29 Lilyo kwene yafumile umwi sunagogi nu kuya uku ng’anda yakwe Simoni na Andeleya, yapisile pamwi na Yakobo na Yoani. 30 Lyene nyinavyala wakwe Simoni waizi ala watalwala impepo, nupya lilyo kwene yanenyile Yesu pali aliwe. 31 Yesu waile amulema ikasa nu kumukatusya. Nupya wapozile atandika nu kuyapekanyizizya ivyakulya.

32 Lino cafisile amanguzi ale ilanzi iliwa, antu yatandike ukumuletela alwale yonsi na aakweti iviwa; 33 nupya antu yonsi amu musumba, yakolongine pa mulyango wa ng’anda. 34 Fwandi wapozizye antu aingi aali ni ndwala izipusanepusane, nupya wafumizye iviwa ivingi, nomba atavizumilizyanga ukuvwanga pano vyamumanyile ukuti a Klistu.

35 Katondotondo lino pacili ipafita, wafumile apanzi aya uku ncende ukutaali antu, nupya waile atandika ukupepa kuuku kwene. 36 Lyene Simoni na auze yatandike ukumulonda, 37 nupya lino yamuzanyile, yamunenyile iyati: “Antu yonsi yakukulonda.” 38 Lelo wayanenyile ati: “Twapiteni uku mizi yuze iya mupiipi, pakuti nako kwene nkasimikileko, pano cii acino niizila.” 39 Lyene wapisile mu mpanga yonsi iya Galili, ala akusimikila umu masunagogi nu kufumya iviwa umu yantu.

40 Nupya uwalwile tembwe waile kuli Yesu, amufukamila atandika ukumupaapata ati: “Manyile ukuti ndi cakuti ukulonda, ungampozya.” 41 Yesu nawe wamuvwilile uluse, nupya watambaliike ikasa nu kumulema, alino alanda ati: “Nkulonda! Pola.” 42 Papo kwene sile uwalwile tembwe wapozile, nupya wasangulwike. 43 Lyene Yesu wamunenyile ukuti apita, nupya wamukonkomizye sana 44 ati: “Uteezya ukunena ali wensi, lelo pitanga ukalolekele kuli ya simapepo nu kupeela ivya upe wakwe vino cavwanzilwe umu Masunde yakwe Mose, pakuti yasininkizye ukuti watupola.” 45 Nomba lino umonsi wiya wapisile, watandike ukunena antu nu kusalanganya sana ilyasi, icakuti Yesu atingiile nu mu musumba, wikazile sile uku ncende ukutaali antu. Lelo antu yatwalilile ukuya kuli aliwe ukufuma umu ncende zyonsi.

2 Lelo pa cisila ca manda yamwi, Yesu waswilile uku Kapenaumu, nupya antu yuvwile ukuti ali pa ng’anda. 2 Na antu aingi yakolongine umu ng’anda icakuti ing’anda yaziile kumwi na pa mulyango kwene, nupya watandike ukulanda nayo. 3 Lyene yamutwaliile umuntu uwali icite wino aonsi 4 yasenzile. 4 Lelo yafizilwe ukumufisya apaali Yesu pa mulandu ni umba, lyene yatulwile icipongo api paala ukulingana na pano Yesu wayelile, apano iingizizya icintamba apaizi umuntu uwali icite. 5 Lino Yesu waweni utailo wao, wanenyile umonsi uwali icite ati: “We mwana we, imembu zyako zyelelwa.” 6 Lyene paali ya kalemba yamwi aatenzi ala yakwelenganya ukuti: 7 “U mulandu ci uno umuntu wii akulandila vii? Akuponta. A weni angelela imembu ukucila pali Leza?” 8 Lelo lilyo kwene sile Yesu wilwike vino yelenganyanga, fwandi wayanenyile ati: “U mulandu ci uno mukwelenganyizizya vivyo?” 9 Uzye icangupale ukulanda i cilikwi, ukunena icite ukuti, ‘Imembu zyako zyelelwa,’ nanti ukulanda ukuti, ‘Katuka senda icintamba cako uwapita’? 10 Lelo pakuti mumanye ukuti Umwana wa muntu wakwata maka pano nsi aakwelela imembu—” wanenyile umonsi uwali icite ati: 11 “Nkukunena ukuti, Katuka, senda icintamba cako, nu kuya ukwako.” 12 Lyene nawe wakatwike nupya papo kwene sile wasenzile ni cintamba cakwe nupya wapisile ala na antu yonsi yakulolako. Fwandi yonsi yazungwike sana, nupya yacindike Leza iyati: “Tutaatala twalolapo ica musango uu!”

13 Nupya kwene waswilile umu mbali yakwe yemba, na antu yayanga kuli aliwe, nawe watandike ukuyasambilizya. 14 Lyene lino Yesu wapitanga, waweni Levi mwana Alufeo atenzi pa ng’anda ya misonko, nupya wamunenyile ati: “Ndondele.” Nawe wakatwike nu kumulondela. 15 Lino Yesu wali umu ng’anda ala akulya, ya kasonkisya aingi na ayembu izile nu kutandika ukuliila pamwi nawe na asambi yakwe, pano aingi pali yayo yamulondelanga. 16 Lelo lino ya kalemba ya Afaliseo yaweni ukuti Yesu akuliila pamwi na ayembu na ya kasonkisya, yatandike ukuzya asambi yakwe iyati: “Uzye fwandi akaliila pamwi na ya kasonkisya na ayembu?” 17 Lino Yesu uvwile vivyo, wayanenyile ati: “Antu apuma yasilondekwa uwa kuyapozya, suka alwale. Ntiiza umu kwama alungame, suka ayembu.”

18 Lelo asambi yakwe Yoani na Afaliseo yaatanga ukulya apa nsita imwi.* Fwandi yaile kuli Yesu nu kumuzya iyati: “U mulandu ci uno asambi yakwe Yoani na asambi ya Afaliseo yakateela ukulya pa nsita imwi, lelo asambi yako yene yasiita ukulya?” 19 Yesu nawe wayaswike ati: “Uzye auze yakwe siwinga yakaata ukulya pa nsita imwi lino yali nawe? Ndi cakuti yali na siwinga yasiita ukulya pa nsita imwi. 20 Lelo manda yaliza lino siwinga alasendwa, nupya alino yalata ukulya. 21 Kusi umuntu aakakampika icikampa ca nsalu ipya pa cakuzwala ca mpiti. Pano ndi cakuti wacita vivyo, icikampa icipya cikalepula icakuzwala ca mpiti nupya icipongo cikakulilako. 22 Nupya kusi aakaika waini umupya umu nyambi zya mpiti. Pano ndi cakuti wacita vivyo, ala waini amalepula inyambi aitike nu kwitika ni nyambi zyononeke. Lelo antu yakaika waini mupya umu nyambi izipya.”

23 Lyene lino Yesu wapitanga mu vyalo vya ngano pa wanda wi Sabata, asambi yakwe yatandike ukutinkula imitwe ya ngano ala yakupita. 24 Lyene Afaliseo yamunenyile iyati: “Lola! U mulandu ci uno asambi yako yakucitila cino isunde lyakanya pa wanda wi Sabata?” 25 Nawe wayanenyile ati: “Uzye mutaabelenga vino Devedi wacisile lino wene pamwi na aonsi yano wali nayo yuvwile inzala nupya yataakweti ivyakulya? 26 Nupya uzye mutaabelenga pi lyasi ilikalanda pali Abiata simapepo mukalamba, vino Devedi wingiile umu ng’anda yakwe Leza nu kulya imikate ya muzilo ino isunde lyazumilizye sile ya simapepo ukulya, nupya wapeezileko na aonsi yano wali nayo?” 27 Lyene Yesu wayanenyile ati: “Leza wisileko Isabata pa mulandu wa yantu, lelo ataumvile antu pa mulandu wi Sabata. 28 Fwandi Umwana wa muntu wakwata maka api Sabata.”

3 Nupya kwene Yesu wingile umwi sunagogi* ala muli nu monsi umwi uwali umulemale ikasa. 2 Fwandi Afaliseo yalolekesyanga sana Yesu pakuti yalole ndi cakuti wali nu kupozya umonsi wiya pa wanda wi Sabata, pakuti yamupeele umulandu. 3 Yesu wanenyile umonsi umulemale ikasa ati: “Katuka, iza pakasi.” 4 Lyene wayuzizye ati: “Uzye pa wanda wi Sabata, isunde lyazumilizya ukucita icisuma nanti iciipe, ukupususya umi nanti ukukoma?” Lelo yataaswike. 5 Lyene wayalolekisye ala watasoka, pano uvwile ulanda pa mulandu wakuti yaali akome imyenzo, nupya wanenyile umonsi ati: “Tambalika ikasa lyako.” Nawe walitambalike nupya lyapozile. 6 Lelo Afaliseo yapisile, nupya lilyo kwene yaile iyapangana na amu kaungwe kakwe Helodi ukuti yakome Yesu.

7 Lyene Yesu waile kuli yemba pamwi na asambi yakwe, nupya iumba ilikalamba ukufuma ku Galili nu ku Yudeya lyamulondiile. 8 Na antu aingi ukufuma uku Yelusalemu, ku Idumeya, ku mbalama ya luzi lwa Yodani nu kufuma ku Tuli na Sidoni iizile kuli Yesu lino yuvwile ivintu wingi vino wacitanga. 9 Nupya wanenyile asambi yakwe ukuti yamuletele uwato unono uwakuti aikalemo pakuti iumba litamuunganila. 10 Pa mulandu wakuti wapozizye antu aingi, yonsi alwile indwala izipisye yalwilanga ukuti yamulememo. 11 Nanti sile imipasi ikowele ndi cakuti yamulola, yaponanga pa nkoleelo yakwe nu kupunda iti: “Wewe Mwana wakwe Leza.” 12 Lelo ilingi wailesyanga pakuti itaamusokolola.

13 Lyene wakwezile umwamba nu kwama yano walondanga, nayo yaile kuli aliwe. 14 Nupya wasoolwile* antu 12 yano wamanga nu kuti atumwa, aali nu kulamulondela nupya yano wali nu kutuma umu mulimo wa kusimikila 15 nu kuyapeela amaka akufumya iviwa.

16 Nupya antu 12 yano wasoolwile,* mazina yao aeya: Simoni, wino watemiile ni zina lyakuti Petulo, 17 Yakobo na Yoani ya mwana Zebedi (yano Yesu watemiile ni zina lyakuti Boanego, ilikapiliula ukuti “ana aonsi aaya wa kupangalakansya kwa nkuwa”), 18 Andeleya, Filipi, Batolomeo, Mateo, Tomasi, Yakobo mwana Alufeo, Tandeo, Simoni umucincile, 19 na Yuda Iskalyoti uwizile afutuka Yesu.

Lyene wingiile umu ng’anda, 20 nupya kwene antu aingi yakolongine, icakuti Yesu na asambi yakwe yafizilwe nu kulya ivyakulya. 21 Lelo lino ya lupwa yakwe yuvwile vivyo, yaile umu kumusenda, pano yalandanga yakuti: “Watapena.” 22 Na ya kalemba afumile uku Yelusalemu yalandanga yakuti: “Ali na Belezebu,* nupya akafumya iviwa kuomvya maka yakwe kateeka wa viwa.” 23 Fwandi lino wayamile, wayanenyile ukuomvya ivilangililo ati: “Uzye Satana angafumya uli Satana? 24 Ndi cakuti uwene wapaatukana, utanga utwalilile; 25 nupya ndi cakuti ing’anda yapaatukana, ikaawa. 26 Nupya ndi cakuti Satana waikatukila nu kuipaatukanya umwineco, atanga atwalilile ukuyako. 27 Nupya kusi umuntu umwi angingila umu ng’anda ya muntu uwakwata amaka nu kumwiyila ivintu vyakwe ukwaula ukuti atale anyepe umuntu wiyo. 28 “I cumi nkumunena ukuti, uluyembu lonsi ni miponto ya yantu vilelelwa. 29 Lelo uwapontela umupasi wa muzilo wene atalatala aelelwe, alaya nu luyembu amanda pe.” 30 Walanzile vivyo pano antu yalandanga yakuti: “Ali nu mupasi ukowele.”

31 Lyene aatowakwe na nyina iizile iimilila panzi, nupya yatumile uwakuti akamwame. 32 Vino iumba lyatenzi ale ilimuzinguluka, umwi pali yayo wamunenyile ati: “Lola! Ya mayo yako na aatowako yaimi panzi yakukulonda.” 33 Lelo Yesu wayanenyile ati: “Uzye mayo a weni, nupya aatowane aaweni?” 34 Lyene walolekisye aatenzi apiipi nawe, alino alanda ati: “Lolini! Mayo na aatowane aeya! 35 Wensi aakacita ukulonda kwakwe Leza, wiyo kwene ali mwinane nupya ali kaci wane nupya ali mayo.”

4 Nupya kwene watandike ukusambilizya umu mbali yakwe yemba, ni umba ilikalamba sana lyakolongine umupiipi na aliwe. Fwandi waile akwela umu wato nupya wikazile mumu kwene pali yemba, lelo iumba lyonsi lyasiile umu mbali yakwe yemba. 2 Lyene watandike ukuyasambilizya ivintu ivingi ukuomvya ivilangililo, nupya lino wayasambilizyanga, wayanenyile ati: 3 “Uvwini kuno. Kata wa mbezu waile umu kuta imbezu. 4 Nupya lino watanga imbezu, zimwi zyaponiile umu mbali ya museo, ni vyunyi vizile nu kuzikompa. 5 Zyuze zyaponiile pali cilwala apataali umusili uwingi, nupya zyamezile zuwa pano zitaazikiime sana. 6 Nomba lino kasanya kawazile, koosile imbezu zizyo, nupya zyumile pano zitaakweti imisisi. 7 Zyuze nazyo zyaponiile pa myunga, nupya imyunga yakuzile nu kuzivimbilikizya, nupya zitaseesile ivizao. 8 Lelo zyuze zyene zyaponiile pa musili usuma, nupya zyamezile nu kukula, izitandika nu kuseeka ivizao, zimwi zyaseesile 30, zyuze 60, zyuze nazyo 100. 9 Lyene walanzile ati: “Aali na matwi auvwe.”

10 Lyene lino wali wenga, antu yano wali nayo kumwi na asambi yakwe 12, yatandike ukumuzya pa vilangililo. 11 Nawe wayanenyile ati: “Mwemo mwapeelwa amano ya kumanya inkama zya Wene wa kwi yulu, lelo asyala yene nkayasambilizya ukuomvya ivilangililo, 12 pakuti nanti yakulola, yatanga yamanye vino yakulola, nupya nanti cakuti yakuvwa, yatanga iiluke nupya yatalatala yawele kuli Leza pakuti yelelwe.” 13 Nupya wayanenyile ati: “Ndi cakuti mutilwike icilangililo cii, uzye muliluka uli ivilangililo vyuze?

14 Kata wa mbezu u muntu aakasimikila* izwi lyakwe Leza. 15 Imbezu izyaponiile umu mbali ya museo, aantu aakuti lino yuvwa sile izwi lyakwe Leza, Satana aiza asenda izwi lilyo muli aliyo. 16 Lyene imbezu izyaponiile pali cilwala, aantu aakuti lino yuvwa sile izwi lyakwe Leza, iyalipokelela ni nsansa. 17 Lelo yasikwata imisisi nomba yakatwalilila pa nsita inono, nupya nga yakwata intazi nanti ukucuziwa pa mulandu ni izwi lyakwe Leza, yakata ukulilondela. 18 Lyene imbezu izyaponiile pa myunga, aantu aakauvwa izwi lyakwe Leza, 19 nomba masakamika ya muno nsi* nu kulondesya ivyuma nu lunkumbwa lwa vintu vyuze vikaingila umu myenzo yao nu kuvimbilikizya izwi lyakwe Leza, nupya lisiseeka. 20 Lyene imbezu izyaponiile pa musili usuma, aantu aakauvwa izwi lyakwe Leza nu kulipokelela ni nsansa, nupya yakaseeka ivizao, yamwi 30, yamwi 60, alino yauze nayo 100.”

21 Nupya wayanenyile ati: “Antu yasikozya lampi nu kutupikapo* nanti ukumwika umwi zungu, lelo yakamwika pa ca kuteekapo. 22 Pano kutaya icafiswa icitalasokololwa, nanti inkama iitalamanyikwa apaswe. 23 Aali na matwi auvwe.”

24 Nupya wayanenyile ati: “Mwaika mano kuli vino mukuvwa. Pano vino mukacitila auzo ali vino namwe kwene yalamucitila, nupya pa mulandu wa kucita vivyo mulapokelela ivingi. 25 Pano wensi uwakwata, alapeelelwapo na vyuze ivingi, lelo wensi aatakwata, alapokwa na tonsi tuno akaelenganya ukuti wakwata.”

26 Nupya watwalilile ukuyanena ati: “Uwene wakwe Leza waya wakwe vino vikacitika lino umuntu wata imbezu. 27 Akalaala usiku nupya akakatuka lino waca, lyene imbezu zikamela nu kukula, lelo asimanya ivikacitika. 28 Lyene panono panono imbezu zikafuma umu musili, inkoleelo zikafumya umwenge, alino ipakonka umutwe, na pa kusyalikizya uku mutwe kukaya impece izingi. 29 Lelo lino ivyakulya vyaca, akasinza pano ale insita ya kuzombola yatifika.”

30 Nupya watwalilile ukulanda ati: “Uzye a kuli cani kuno tungakolanya Uwene wakwe Leza, nanti i cilangililo cii cino tungaomvya pa kuulondolola? 31 Waya wa lumbezu lwakwe musunta* ulukaya ulunono sana pa mbezu zyonsi izyaya pano nsi; lino lwakomelwa. 32 Nomba nga lwamela lukakula iluya icimelwa icikulu sana kucila imisaalu yonsi, nupya lukakwata imisambo ikulu cakuti ni vyunyi vikaiza nu kwikala umu cisaao ca cimelwa cico.”

33 Fwandi waomvyanga ivilangililo ivingi vya musango uwo pa kulanda nayo, ukulingana na vino yanguvwa. 34 I cumi atatazile alanda nayo ukwaula icilangililo, lelo walondolwelanga asambi yakwe vyonsi lino yali yonga.

35 Nupya pa wanda kwene uwa amanguzi, wanenyile asambi yakwe ati: “Lekini tulambe tuye uku mbalama yuze yakwe yemba.” 36 Fwandi pa cisila cakuti asambi yanena iumba ukupita, yamusenzile umu wato, nupya paali mawato na yauze kwene. 37 Lyene icimuza icikalamba cakatwike, nupya maimbi yatandike ukupuma umu wato, icakuti wali apiipi nu kuunda. 38 Lelo Yesu wene waizi uku cisila ca wato ala watasamila pa musamilo.* Lyene papo kwene sile asambi yakwe yamuzyuzile nu kumunena iyati: “Kasambilizya, uzye utasakamile ukuti tuli apiipi nu kufwa?” 39 Lyene wakatwike nu kukalipila icimuza, nu kunena yemba ati: “Laala!” Ni cimuza caizi, ikuya na mya. 40 Fwandi wayanenyile ati: “U mulandu ci uno mukuvwila intete? Uzye na likwene mutatala mwakwata utailo?” 41 Lelo yuvwile sana intete, nupya yatandike ukuuzyanya iyati: “U muntu wa musango ci wii? Nanti sile u muza na yemba vikumuvwila.”

5 Lyene yaile uku mbalama yuze yakwe yemba mu mpanga ya Gelasa. 2 Nupya lino Yesu wafumile sile umu wato, umonsi umwi uwafumile ku malindi wino wali nu mupasi ukowele wamukomenkinye. 3 Umonsi wiyo wikalanga ku malindi, nupya kutatazile kuye ali wensi uwakweti amaka ya kumunyepa pakuti ataputula, nanti sile ukuomvya maceni. 4 Ilingi yamunyepanga na maceni ku makasa nu ku makulu, lelo waputulanga nupya kutaali uwakweti amaka ya kumutonsya. 5 Nupya lyonsi kasanya nu usiku, wapundanga ku malindi nu mu myamba nupya waicembolanga na mawe. 6 Lelo lino waweni Yesu katalamukila, wasimwile nu kuyamufukamila. 7 Lyene wapunzile ni izwi ilikulu ati: “I vyani vino ukulonda kuli nene we Yesu, Umwana wakwe Leza wa Papelapela? Lapa umwi zina lyakwe Leza ukuti utakuncuzya.” 8 Pano Yesu wanenanga umupasi ukowele ati: “We mupasi ukowele, fuma umu muntu.” 9 Lelo Yesu wauzizye ati: “Wewe weni?” nao wamwaswike iuti: “Nene Iumba, pano sweswe iingi.” 10 Nupya umupasi ukowele watwalilile ukupaapata Yesu ukuti atazingila imipasi ku mpanga yuze.

11 Lyene kwali ya kapoli aingi aali uku mwamba ala yakulya. 12 Fwandi imipasi ikowele yamupaapasile iti: “Tuzingile muli ya kapoli amuno tukingile.” 13 Nawe waizumilizye. Lino imipasi ikowele yuvwile vivyo yafumile nu kuya ingila muli ya kapoli, lyene ya kapoli yonsi aali umupiipi na 2,000 yuutukile kuli yemba ku ncende isuluke, nupya yamwelile muli yemba. 14 Lelo ya kacema yutwike iyaya mu musumba nu mu mizi nu kuyasimika ivyacitiike, na antu yaile mukulola ivyacitiike. 15 Lyene antu yaile kuli Yesu nupya yaweni umonsi wino mpiti wali ni ciwa, uwakweti iumba lya mipasi ikowele ala atenzi watazwala nupya ali sile ningo, fwandi yuvwile intete. 16 Nupya aaweniko ivyacitiike yatandiike ukusimikila antu ivyacitiike uku monsi uwali ni ciwa alino na kuli ya kapoli. 17 Fwandi antu yatandike ukupaapata Yesu ukuti afume mu mpanga yao.

18 Lyene lino Yesu wakwelanga uwato, umonsi wino mpiti wali ni ciwa watandike kumupaapata ukuti amulondele. 19 Lelo Yesu atamuzumilizye, wamunenyile ati: “Pitanga uku ng’anda kuli ya lupwa yako nu kuyayasimikila vyonsi vino Yeova watakucitila na vino watakuvwila uluse.” 20 Umonsi wii wapisile nu kuyatandika kusimika mu Dekapoli* pali vyonsi vino Yesu wamucitiile, nupya antu yonsi yazungwike.

21 Nupya kwene lino Yesu walamvile yemba nu kuya ku mbalama yuze nu wato, iumba ilikalamba lyakolongine kuli aliwe ala acili umu mbali yakwe yemba. 22 Lyene umukalamba umwi uwi sunagogi uwi zina lyakuti Yailo, wizile, nupya lino waweni Yesu, wamufukamile. 23 Wamupaapasile imiku iingi ati: “Umwanane umukazyana u mulwale sana.* Napaapata twapita ukike makasa yako pali aliwe pakuti apole nu kuya nu umi.” 24 Lyene lilyo kwene Yesu wapisile nawe, nupya iumba ilikalamba lyamulondiile ala likumutitikizya.

25 Lyene kwali umwanaci uwaculanga ku ulwale wa kufuma uwazi pa myaka 12. 26 Wapisile muli ya dokota aingi kuti yamupozye nupya wacuzile sana, waomvizye na vyonsi vino wakweti, lelo atapozile nupya ulwale wakwe wipilangako sile. 27 Lino uvwile ivintu vino antu yalandanga pali Yesu, wapisile umwi umba nu kuya uku nsizi yakwe Yesu nupya walemile uku nsenkebele zya cakuzwala cakwe, 28 pano welenganyanga ukuti: “Ndi cakuti nalemako sile uku cakuzwala cakwe, namapola.” 29 Nupya lilyo kwene uwazi watiile ukufuma, nupya uvwile ukuti watapola uku ulwale wakwe uwipisye.

30 Lyene lilyo kwene Yesu uvwile ukuti amaka yafuma muli aliwe, nupya wapiliukile ukwi umba nu kuzya ati: “A weni uwandema ku cakuzwala?” 31 Lelo asambi yakwe yamunenyile iyati: “Watulola vino iumba ilikuunganila, nga lyene unguzya uli uti, ‘A weni uwandema?’” 32 Lelo Yesu walolekesyanga monsi monsi pakuti alole uwatamulema. 33 Umwanaci uvwile intete pano wamanyile ivyamucitikiile, lyene waile kuli Yesu nu kumufukamila nupya wamunenyile vyonsi. 34 Yesu nawe wamunenyile ati: “Mwana we! Utailo wako wakupozya. Upite ningo, nupya upole ku ulwale wako uwipisye.”

35 Lino Yesu acili akuvwanga, aonsi yamwi aafumile uku ng’anda yakwe Yailo izile nu kunena Yailo iyati: “Umwanako umukazyana watafwa! U mulandu ci uno ucili ukupamvizya Kasambilizya?” 36 Lelo Yesu uvwile vino yalandanga nupya wanenyile Yailo ati: “Utuvwa intete, uye sile nu utailo.” 37 Lyene Yesu atazumilizye ali wensi ukumulondela, suka sile Petulo, Yakobo na Yoani umwina wakwe Yakobo.

38 Fwandi yaile uku ng’anda yakwe Yailo, nupya Yesu waweni kuno antu yakulila nu kuloosya ni mpooma ikulu sana. 39 Lino Yesu wingile umu ng’anda, wayanenyile ati: “U mulandu ci uno mukuloosezya nu kupanga icongo umusango uu? Umwana atafwile lelo watakasula sile.” 40 Lino yuvwile vivyo yatandike ukumuseka nu kumutumfya. Lelo lino wanenyile antu yonsi kufumila panzi, wasenzile isi wa mwana na nyina alino na asambi yakwe yatatu, nupya iingile umu muputule umwali umwana. 41 Lyene Yesu walemile ikasa lya mwana nu kumunena ati: “Talita kumi” icikapiliula ukuti: “Mwana we nakunena nati, ‘Katuka!’” 42 Nupya lilyo kwene umukazyana wakatwike atandika nu kupita. (Wali ni myaka 12.) Na avyazi yakwe yatemilwe sana. 43 Lelo wayakonkomizye ukuti yataleka ali wensi amanye pali vivyo, nupya wayanenyile ukuti yapeele umwana ivyakulya.

6 Lyene Yesu wafumileko nu kuya uku mpanga ya kumwao, nupya asambi yakwe yamulondiile. 2 Lino uwanda wi Sabata wafisile, Yesu watandike ukusambilizya umwi sunagogi,* nupya antu aingi amuvwile yazungwike nu kulanda iyati: “Aekwi fwandi kuno umuntu wii wafumya vyonsi vii? Nupya a weni uwamupeela amano na maka ya kucita ivizungusyo vya musango uu? 3 Uzye wii asi kawaza, mwana Maliya nupya aina yakwe asi Yakobo, Jozefu, Yuda, na Simoni? Nupya ya kaci yakwe uzye tutaaya nayo kuno?” Fwandi yakanyile ukumutaila. 4 Lelo Yesu wayanenyile ati: “Kasesema asicindikwa ukumwao nu ku lupwa lwakwe nu ku ya mu ng’anda yakwe.” 5 Fwandi ataacisile icizungusyo icili consi kuuku, lelo wapozizye sile alwale anono. 6 I cumi wazungwike sana pali vino antu yaaya yataakweti utailo. Nupya waile umu kusambilizya umu mizi iyali umupiipi.

7 Lyene wamile atumwa 12 nu kuyatuma yaili yaili, nupya wayapeezile amaka ya kufumya imipasi ikowele. 8 Wayanenyile nu kuti yatasenda icili consi pa lwendo; umukate, icola ca vyakulya, ni vikwama vya mpiya,* suka sile intuwa, 9 wayanenyile sile ukuzwala indyatu nomba kusi ukusenda* ivyakuzwala viili.* 10 Nupya wayanenyile ati: “Ing’anda yonsi ino mwingilamo, mwikale mumo kwene mpaka muce mufume uku ncende iiyo. 11 Nupya uku ncende ili yonsi kuno yatamupokelile nanti ukuvwa ku mazwi inu, pa kufumako, kuntini ulukungu uku ngazo zinu pa kulangilila ukuti imuyasinila pa viipe vino yakacita.” 12 Lyene yafumile yakusimikila uku yantu ukuti yalinzile ukulapila, 13 yafumyanga iviwa ivingi umu yantu nupya yapakanga alwale aingi mafuta nu kuyapozya.

14 Lyene Umwene Helodi uvwile ilyasi pali Yesu, pano Yesu wamanyikwe sana, nupya antu yalandanga yakuti: “Yoani Kabatizya watatuutululwa ukufuma uku yafwe, nupya ali mulandu uno akucitila ivizungusyo.” 15 Lelo yamwi yalandanga yakuti: “A Eliya.” Yauze nayo yalandanga yakuti: “Ali wakwe ya kasesema aaliko mpiti.” 16 Lelo lino Helodi uvwile vivyo, walanzile ati: “Yoani wino naputwile umutwe aliwe watatuutululwa.” 17 Pano ala Helodi walema Yoani nu kumuyalila umu cifungo pa mulandu wakwe Helodiya. Pano Helodi watwazile Helodiya wino mpiti wali u muci wakwe Filipi, nupya Filipi wali a silenzi wakwe Helodi. 18 Pano Yoani wamunenanga ukuti: “Ukulingana ni sunde utalinzile ukutwala mulamu wako.” 19 Fwandi Helodiya wasokiile sana Yoani nupya walondanga ukumukoma, lelo wafizilwe. 20 Pano Helodi watiinanga Yoani, wamanyile ukuti Yoani wali umulungami nupya uwa muzilo, fwandi wamusunganga ningo. Nupya nga uvwa vino Yoani akulanda, wafilwanga ivya kumucita, lelo watemwanga ukuvwa kuli aliwe.

21 Lelo Helodiya wakweti insita isuma, lino Helodi wapekanyizizye alasi na akalamba ya yasilika na antu acindikwe sana umu Galili ivyakulya pa wanda wa kuzevya ukuvyalwa kwakwe. 22 Nupya mwana Helodiya umukazyana waile acina nu kuzanzya Helodi na yonsi aazanyilwe pa kuzevya. Lyene umwene Helodi wanenyile umukazyana ati: “Undenge consi cino ukulonda nani namakupeela.” 23 Nupya walafile ati: “Consi cino umandenga, namakupeela, nanti sile ukukwankanya uwene wane pakasi.” 24 Fwandi waile kuli nyina nu kumuzya ati: “I cani cino namalenga?” Nawe wamunenyile ati: “Lenga umutwe wakwe Yoani Kabatizya.” 25 Lyene lilyo kwene sile waile uku mwene nu kumunena ati: “Nkulonda mumpeele likwene umutwe wakwe Yoani Kabatizya pa mbale.” 26 Nanti cakuti umwene Helodi uvwile sana uyi, wafizilwe ukukana pa mulandu nu mulapo uno walafile alino na antu yano wamile. 27 Fwandi lilyo kwene sile umwene watumile umusilika wakwe ukuti akalete umutwe wakwe Yoani. Nawe waile aputula Yoani umutwe umu cifungo 28 auleta na pa mbale. Nupya wapeezile umukazyana, umukazyana nawe wapeezile nyina. 29 Lyene lino asambi yakwe Yoani yuvwile vivyo, yaile iyasenda icitumbi nu kuya cizika umwi lindi.

30 Lino atumwa yawezile, yanenyile Yesu vyonsi vino yacisile na vino yasambilizye. 31 Lyene wayanenyile ati: “Twapiteni uku ncende ukusi antu pakuti tukapuzeko panono. Pano kwali antu aingi aizanga nu kupita, nupya Yesu na asambi yataakweti ni nsita yakuti yalye. 32 Fwandi yapisile nu wato uku ncende ukutaali antu pakuti yakaye yonga. 33 Lelo antu yayaweni kuno yakupita nupya aingi yamanyile, lyene antu ukufuma umu misumba yonsi yasimwile ulwa pansi nu kuyakolelela. 34 Lino wafumile umu wato, waweni antu aingi sana, nupya wayuvwilile uluse, pano yaali wa mfwele izyaula kacema. Nupya watandike ukuyasambilizya ivintu ivingi.

35 Lyene pa nsita iiya amanguzi, asambi yakwe yaile kuli aliwe nu kumunena iyati: “Paa pano tuli a pa mpanga nupya ilanzi lyasya liwe. 36 Fwandi nena antu yaa yaye umu mizi pakuti yakaikalile ivyakulya.” 37 Nawe wayanenyile ati: “Mwemwe kwene yapeelini ivyakuti yalye.” Nayo yamwaswike iyati: “Uzye tuye tukakale imikate pa madinali 200 iyakuti tupeele antu yaa yalye?” 38 Lyene wayuzizye ati: “Mukweti imikate inga? Yangini mukalole.” Lino yaiweni, yamunenyile iyati: “Tukweti imikate 5 ni inswi ziili.” 39 Lyene wanenyile antu yonsi ukuti ikale umu maumba pa masote. 40 Fwandi iikazile umu maumba, yamwi 100 yauze nayo 50. 41 Lyene watozile imikate 5 ni inswi ziili, alingamila ukwi yulu, apepa, alino amokoola imikate, nu kupeela asambi yakwe kuti nayo yapeele antu, nupya wankiinye ni inswi ziili uku yantu yonsi. 42 Fwandi yonsi yaliile iikuta, 43 nupya yakolonganike imikate iyasiileko iyazuzya imise 12, iyakolonganika ni inswi izyasiileko. 44 Aalile imikate yaali aonsi 5,000.

45 Lyene lilyo kwene sile, Yesu wanenyile asambi yakwe ukuti yakwele uwato nu kumukolelela uku mbalama yuze lwa ku Betisaida, wene wasyazile akunena iumba ukuti lipite. 46 Lelo pa cisila ca kuyapakasya, waile uku mwamba umu kupepa. 47 Lyene lino ilanzi lyawile, uwato wali pakasi kakwe yemba, lelo Yesu wene wali wenga apa mwamba. 48 Fwandi lino Yesu waweni ukuti cikutalila asambi yakwe ukufiya uwato pa mulandu ni cimuza icafumanga kuno yayanga, waile kuli aliyo uku macaca* ala akupita pa manzi, lelo wacisile kwati akulonda ukuyapitilila. 49 Lino asambi yamuweni akupita pali yemba, yapunzile iyati: “Mwe lolini cilolwa!” 50 Pano yonsi yamuweni nupya yuvwile intete. Nomba lilyo kwene Yesu wayanenyile ati: “Sipini! Anene; mutuvwa intete.” 51 Lyene waile akwela umu wato umwali asambi yakwe, ni cimuza caizi. Lino asambi yaweni vivyo yazungwike sana, 52 pano yatiilwike icizungusyo cino wacisile pa mikate, nupya yatwalilile ukwaula ukwiluka.

53 Lino yafisile uku mbalama yuze, yaile uku Genesaleti nupya kuuku kwene akuno yasiile imika uwato. 54 Nomba lino yafumile sile umu wato, antu yamanyile Yesu. 55 Lyene yasimwile iyaya umu ncende zyonsi izya mu mpanga iiya nu kutandika ukusenda alwale pa vintamba ala yakuyatwala kuli Yesu. 56 Nupya Yesu nga wingila umu mizi nanti umu misumba nanti umu ncende zyuze, yatwalanga alwale pa mamaliketi, nupya yamupaapatanga ukuti alwale yalemeko sile nanti uku nsenkebele zya cakuzwala cakwe. Nupya yonsi aalemangako yaapolanga.

7 Lyene Afaliseo na ya kalemba yamwi aafumile ku Yelusalemu yakolongine ukwali Yesu. 2 Nupya yaweni asambi yakwe Yesu yamwi ala yakulya ukwaula ukufulala uku minwe.* 3 (Pano Afaliseo na Ayuda yonsi yasilya suka yafulala ku minwe kufika umu tunkonci, pa mulandu wakuti yakalondela sana intambi zya vikolwe vyao, 4 nupya nga yafuma uku maliketi, yasilya suka nga yafulala. Kwaya intambi na zyuze zino yakalondela sana wakwe, ukutimpika makapu umu manzi, tusembo ni viya ivyapangilwa na koopa.) 5 Fwandi Afaliseo na ya kalemba yamuzizye iyati: “U mulandu ci uno asambi yako yasilondela intambi zya vikolwe vitu, lelo yene yakaalya ukwaula ukufulala ku minwe?” 6 Nawe wayaswike ati: “Ezaya wasesime ningo pali mwemwe mwe yasomvi, wakwe vino calembwa ukuti, ‘Antu yaa yakancindika sile pa kanwa, lelo imyenzo yao yataluka sana kuli nene. 7 Nanti cakuti yakampepa yakaicuzya sile, pano yakasambilizya sile masunde ya yantu.’ 8 Mwasuula masunde yakwe Leza, lelo mukalondela sana intambi zya yantu.”

9 Nupya watwalilile ukuyanena ati: “Mukaomvya imicenjelo pa kusuula masunde yakwe Leza pakuti mwalondela intambi zinu. 10 Mose walanzile ati: ‘Uwacindika tata na mayo wako,’ nupya, ‘Wensi uwapontela* isi na nyina afwile ukukomwa.’ 11 Lelo mukati, ‘Ndi cakuti umuntu umwi walanda wati: “Consi cino ningapeela avyazi yane pali vino nakwata a kobani (kuli kuti upe uwapeelwa kuli Leza),”’ 12 ala musikuleka acitile avyazi yakwe icili consi. 13 Fwandi mukalenga izwi lyakwe Leza ukuya ilya sile sile pa mulandu ni ntambi zinu. Nupya vikwene avino mukacita nu mu vintu ivingi. 14 Fwandi wamile iumba nupya kwene nu kulinena ati: “Uvwini kuno mwensi kwene nu kwiluka vino nkumunena. 15 Ivikaingila umu muntu visimukowezya, lelo ivikafuma umu muntu i vikamukowezya.” 16*——

17 Lyene lino Yesu wafumile api umba, wingile umu ng’anda, nupya asambi yakwe yatandike ukumuzya pa cilangililo. 18 Nawe wayuzizye ati: “Uzye namwe kwene mutatala mwiluka? Uzye mutamanya ukuti icikaingila umu muntu cisimukowezya? 19 Pano cisiingila umu mwenzo lelo cikaingila umunda nu kufumila ukunzi.” Fwandi walozyanga umukuti ivyakulya vyonsi vyasanguluka. 20 Nupya watiile: “Icikafuma umu muntu i cikamukowezya. 21 Pano umu mwenzo wa muntu u mukafuma amelenganyo aipe, uzelele,* upuupu, ukomi, 22 ucende, lunkumbwa, ivicitwa iviipe, ucenjezi, vicitwa vya winyi,* muvimbila, miponto, cilumba nu uwelewele. 23 Iviipe vyonsi vii vikafuma umu mwenzo wa muntu nupya i vikamukowezya.”

24 Lyene wafumileko aya uku mpanga ya Tuli na Sidoni. Waile aingila umu ng’anda nupya atalondanga ali wensi amanye ukuti wataiza, lelo antu yamanyile. 25 Lilyo kwene umwanaci uwali nu mwana umukazyana uwakweti umupasi ukowele uvwile pali Yesu, nupya waile kuli aliwe nu kufukama pa nkoleelo yakwe. 26 Umwanaci wii wali u Mugiliki uwavyalilwe umu mpanga ya Fonisya iyaya umu Silya; nupya wapaapasile Yesu imiku iingi ukuti afumye iciwa umu mwanakwe. 27 Lelo Yesu wamunenyile ati: “Tale leka ana iikute, pano citaya ningo ukutola ivyakulya vya yana nu kusumbila tusimbwa.” 28 Umwanaci nawe waswike ati: “Ee Mwene, lelo na tusimbwa kwene utuli umwisika lyakwe tebulo, tukalya imvungwa zino ana yakuponya.” 29 Nawe Yesu wamunenyile ati: “Pa mulandu na vino walanda, pitanga; iciwa caticifuma umu mwanako.” 30 Fwandi umwanaci wapisile uku ng’anda nupya wazanyile umwana watalala pali bedi, ni ciwa ale icifuma.

31 Lino Yesu wafumanga uku Tuli, wapisile umu Sidoni nu mu mpanga ya Dekapoli* nu kuya kuli Yemba wa Galili. 32 Lyene yamuletiile umonsi uwali acipuuli nupya uwafilwanga ukuvwanga ningo, nupya yamupaapasile ukuti aike makasa yakwe pali aliwe. 33 Yesu nawe wamufumizye api umba, amusenda apa mbali. Lyene wingizye iminwe mu matwi yakwe cipuuli, nupya pa cisila ca kuswila amati, wamulemile pa lulimi. 34 Nupya walingamile umwi yulu, aisya umwenzo alino amunena ati: “Efata,” icikapiliula ukuti, “Yulika.” 35 Lilyo kwene sile amatwi yakwe yayulike, nu lulimi lwatandike ukuomba, nupya watandike ukuvwanga ningo. 36 Lyene wayakonkomizye ukuti yatanena ali wensi, nomba lino wayakonkomizye, yene alino yacizilemo ukusalanganya ilyasi. 37 I cumi antu yazungwike sana, nupya yalanzile iyati: “Imilimo yakwe yonsi i ya kuzungusya. Akupozya na ya cipuuli na ya ciulu kwene.”

8 Umu manda yaaya, nupya kwene iumba ilikalamba lyakolongine, nupya litaakweti ivyakulya. Fwandi Yesu wamile asambi yakwe nu kuyanena ati: 2 “Nuvwila antu luse, pano yatiikala nani manda yatatu nupya yatakweti ivyakulya. 3 Ndi cakuti nayanena ukuti yaapita ukumwao ni nzala, yamawa ulwezwe umu nzila, nupya yamwi kumwao ukutali sana.” 4 Lelo asambi yakwe yamwaswike iyati: “Paa apa mpanga, nga ekwi ukungafuma imikate iyakuti aantu yaa yalye?” 5 Lyene Yesu nawe wayuzizye ati: “Mukweti imikate inga?” Nayo yatiile: “Tukweti 7.” 6 Lyene wanenyile antu kuti iikale pansi. Watozile imikate 7 nu kutaizya Leza, nupya wamokozile alino apeela asambi ukuti yapeele antu, asambi nayo yapeezile antu. 7 Yakweti nu tuswi utunono, nupya pa cisila ca kutaizya kuli Leza, wanenyile asambi yakwe ukuti yapeele antu. 8 Fwandi yonsi yaliile iikuta, ni vyasyazile yavikolonganike iyazuzya imise 7 ikalamba. 9 Nupya kwali aonsi apiipi na 4,000. Lyene wayanenyile ukuti yaapita.

10 Lilyo kwene Yesu wakwezile uwato pamwi na asambi yakwe nu kuya ku mpanga ya Dalamanuta. 11 Lyene Afaliseo yaile kuli Yesu pakuti yamwezye, yatandike ukupazyanya nawe, ale yakumupatikizya ukuti ayacitile icizungusyo umwi zina lyakwe Leza. 12 Fwandi uvwile sana ulanda nupya walanzile ati: “U mulandu ci uno inkulo yii ikalondela ukulola icizungusyo? I cumi nkumunena ukuti kusi icizungusyo cino inkulo yii ilalola.” 13 Lyene wayasiile, akwela uwato nupya kwene nu kuya ku mbalama yuze.

14 Asambi iilile ukusenda imikate, lelo yakweti sile umukate onga umu wato. 15 Nupya Yesu watandike ukuyasoka ati: “Cenjelini ku citutumusi ca Afaliseo na cakwe Helodi.” 16 Fwandi yatandike ukupaazyanya pa mulandu wakuti yataakweti imikate. 17 Lino Yesu wamanyile vivyo, wayuzizye ati: “U mulandu ci uno mukupaazyanyizizya ukuti mutakweti mikate? Uzye na likwene mutatala mwiluka nu kumanya? Uzye na likwene imyenzo inu icili ikome? 18 ‘Mwakwata amanso, uzye musilola; nupya mwakwata amatwi, uzye musiuvwa?’ Uzye musikwiusya 19 lino namokozile imikate 5 nu kuliisya aonsi 5,000, i mise inga ino mwazuuzizye ivyasyazileko?” Nayo yatiile: “Yaali 12.” 20 Nupya lino namokozile imikate 7 nu kuliisya aonsi 4,000, i mise inga ikalamba ino mwazuuzizye ivyasyazileko?” Nayo yatiile: “Yaali 7.” 21 Lyene wayuzizye ati: “Uzye na likwene mutatala mwiluka?”

22 Lyene lino yafisile ku Betisaida, antu yamuletiile umuntu uwali impafu, nupya yamupaapasile ukuti amuleme. 23 Yesu nawe wamulemile api kasa nu kumusenda kunzi ya muzi. Pa cisila ca kumuswila pa manso, wisile amakasa pali aliwe nu kumuzya ati: “Uzye walola icili consi?” 24 Lyene umuntu wiyo winwike nu kulanda ati: “Nkulola antu yakupita, nomba yakuloleka kwati imiti.” 25 Nupya kwene Yesu wamulemile pa manso, lyene umuntu wiyo wapozile atandika ukulola ningo vyonsi. 26 Yesu wamunenyile ukuti aapita uku ng’anda, nu kumunena ati: “Utaya mu muzi.”

27 Lyene Yesu na asambi yakwe yaile mu mizi ya ku Kesaliya Filipi, nupya lino yaali pa lwendo, watandike ukuzya asambi yakwe ati: “Uzye antu yakati nene weni?” 28 Yamwaswike iyati: “Yakati wewe Yoani Kabatizya, lelo yauze yakati wewe Eliya, nupya yauze yene yakati wewe wenga pali ya kasesema.” 29 Nawe wayuzizye ati: “Nga mwemo mukati nene weni?” Petulo waswike ati: “Wewe Klistu.” 30 Lyene wayakonkomizye ukuti yatanena ali wensi pali aliwe. 31 Nupya watandike ukuyasambilizya ukuti Umwana wa muntu yali nu kumucuzya sana nu kumukana ku ntunguluzi zya Yayuda na ya simapepo akalamba na ya kalemba nupya ali nu kukomwa, na pa wanda wakwe citatu ali nu kutuutululwa. 32 Yesu walanzile amazwi yaa apaswe. Lelo Petulo wamusenzile pa mbali nu kutandika kumukalipila. 33 Lino wapiliwike nu kulolekesya asambi yakwe, wakalipiile Petulo ati: “Fuma pano Satana! pano usielenganya melenganyo yakwe Leza suka aayantu.”

34 Lyene wamile iumba kumwi na asambi yakwe, alino ayanena ati: “Ndi cakuti umwi akulonda kundondela, alinzile ukuikana nu kusenda icimuti* cakwe ca kucuziwilwapo nu kutwalilila kundondela. 35 Pano wensi aakulonda kupususya umi wakwe alauponzya, lelo wensi uwaponzya umi wakwe pa mulandu wane na pa mulandu wi lyasi lisuma, alaya nu umi nupya. 36 Uusuma ci uno umuntu angazana ndi cakuti walonka insi yonsi lelo waponzya umi wakwe? 37 I cani cino umuntu angakauzya nu umi wakwe? 38 Pano wensi aakauvwa insonyi nupya asilonda antu yamanye ukuti u musambi wane nu ukuti wazumila umu mazwi yane umu nkulo yii iitaya ni cisinka* nupya iipe, Umwana wa muntu nawe kwene lino aliza mu lulumbi lwakwe Isi pamwi na ya malaika yakwe aamuzilo, aluvwa insonyi zya kumupokelela.”

9 Nupya wayanenyile ati: “I cumi nkumunena ukuti yamwi aimi pano yatalafwa kufikila yace yalole Uwene wakwe Leza ukuteeka na maka.” 2 Lino papisile manda 6, Yesu wasenzile Petulo, Yakobo na Yoani nu kuyatwala pa mwamba utali pakuti yaye yonga. Nupya icinso cakwe Yesu casenwike ala yakulolako; 3 ivyakuzwala vyakwe vyaswefile nu kutandika ukuyengesa sana, nupya kusi umuntu ali wensi angaswefya ivyakuzwala wakwe vino vyaswefile. 4 Nupya yaweni Eliya na Mose ala yakulanzyanya na Yesu. 5 Lyene Petulo wanenyile Yesu ati: “Labi, cingazipa tutwalilile ukwikala pakwene. Fwandi katupange insakwe zitatu, yonga iyako, yonga yakwe Mose ni yuze yakwe Eliya.” 6 Petulo atamanyile na vyuze ivya kulanda, pano yali sana ni intete. 7 Nupya ikumbi lyayavimbilikizye, ni izwi lyafumile umwi kumbi iliti: “Wii u Mwanane umutemwikwe. Muvwini.” 8 Lyene papo kwene sile lino yalolekisye konsi konsi, kusi wino yaweni suka sile Yesu.

9 Lyene lino yatentemukanga umwamba, Yesu wayakonkomizye ukuti yatanena ali wensi pali vino yaweni kufikila lino Umwana wa muntu alatuutululwa. 10 Yasunzile amazwi yayo umu myenzo,* lelo yalanzyanyanga yonga pali vino ukutuutuluka kwakwe kwapiliulanga. 11 Nupya yatandike ukumuzya iyati: “Nga fwandi u mulandu ci uno ya kalemba yakalandila ukuti Eliya aliwe alinzile ukutandikilapo ukwiza?” 12 Nawe wayaswike ati: “Eliya alinzile ukutandikilapo ukwiza nu kulungika ivintu vyonsi; nomba u mulandu ci uno calembelwa ukuti Umwana wa muntu alinzile ukupita umu macuzi aingi alino nu kusuulwa? 13 Lelo nkumunena ukuti Eliya wiza mpiti, nupya yamucisile vyonsi vino yalondanga wakwe vino calembwa pali aliwe.”

14 Lino yafisile uku yasambi yauze, yaweni iumba ilikalamba ala iliyazinguluka, nupya paali na ya kalemba aapaazyanyanga nayo. 15 Lelo lino sile yonsi aali pi umba yalola Yesu, yazungwike sana, nupya yasimwilile kuli aliwe umu kumulamuka. 16 Fwandi wayuzizye ati: “I vyani vino mukupaazyanya?” 17 Lyene wenga api umba wamwaswike ati: “Kasambilizya, inaleta umwanane kuli wewe pa mulandu wakuti wakwata umupasi uwipe uukalenga kuti aafilwa ukulanda. 18 Nupya lyonsi lino umupasi uwo wamulema ukamutama pansi, nupya akafumya itomvwe ku kanwa nu kulumanya incecete, nupya maka yakasila. Inanena asambi yako ukuti yaufumye nomba iyafilwa.” 19 Yesu nawe waswike ati: “Mwe nkulo itaya nu utailo, ndatwalilila ukuya namwe ukufika lilaci? Ndatwalilila ukuzizimizya pali mwemwe ukufika lilaci? Muletini kuno.” 20 Fwandi yaamutwalile umulumendo, nomba lino sile umupasi uwipe waweni Yesu, wavumvwinye umwana pansi. Nupya lino umwana waponyile pansi, watwalilile ukukunkuluka ala akufuma ni itomvwe ku kanwa. 21 Lyene Yesu uzizye isi wa mwana ati: “A lilaci lino cii catandike?” Nawe watiile: “Kufuma sile uku wance, 22 nupya ilingi ukamuponyezya umu moto nu mu manzi pakuti umukome. Lelo ndi cakuti ungacitapo cimwi, tuvwile uluse nupya twavwe.” 23 Yesu nawe wamunenyile ati: “U mulandu ci uno walandila ukuti, ‘Ndi cakuti ungacitapo cimwi’? Pano kuli wensi uwakwata utailo ivintu vyonsi vingacitika.” 24 Lilyo kwene sile isi wa mwana wapunzile ati: “Nkweti utailo! Nupya ngavwe ukuya nu utailo ukome!”

25 Lyene lino Yesu waweni ukuti iumba likusimwilila kuli aliyo, wakalipile umupasi ukowele ati: “We mupasi, wemuno ukalenga kuti umuntu ataavwanga nupya afilwa ukuvwa, nakunena ukuti fuma, nupya utaca uswilile muli aliwe!” 26 Lyene pa cisila cakuti umupasi wapunda nu kuvumvunya umwana imiku iingi, wafumile muli aliwe, nupya umwana waloliike kwati watafwa, icakuti na antu aingi yalandanga yakuti: “Watafwa!” 27 Lelo Yesu wamulemile api kasa nu kumukatusya, nawe wakatwike. 28 Lyene lino Yesu wingile umu ng’anda, asambi yakwe yamuzizye apa mbali iyati: “U mulandu ci uno swemo itwafililwa ukuufumya?” 29 Nawe wayanenyile ati: “Kusi cuze icingafumya umupasi wa musango uu, suka sile ipepo.”

30 Lyene yafumileko, nupya yaile iyapita umu Galili, lelo atalondanga ali wensi ukumanya kuno wali. 31 Pano wasambilizyanga asambi yakwe nu kuyanena ati: “Umwana wa muntu alafutukwa nu kupeelwa umu minwe ya yalwani, nayo yalamukoma, lelo nanti cakuti alakomwa, alatuutululwa pa wanda wakwe citatu.” 32 Lelo yatuvwikisye muno walozizye amazwi yayo, nupya yafizilwe ukumuzya pa mulandu ni intete.

33 Lyene yafisile umu Kapenaumu. Nupya lino iingile umu ng’anda, Yesu wayuzizye ati: “I vyani vino imukupaazyanya umu nzila?” 34 Lelo yataswike nanti acimwi, pano umu nzila yapaazyanyanga pali wino wali umukalamba pali aliyo. 35 Fwandi wikazile nu kwama atumwa yakwe 12 alino ayanena ati: “Ndi cakuti umwi akulonda ukuya uwa nkoleelo, alinzile ukuya ali wa kusyalikizya pali yonsi nu kuya umuomvi wakwe yonsi.” 36 Lyene watozile umwana umunono nu kumwimika pa nkoleelo yao, nupya amufukatila, alino ayanena ati: 37 “Wensi uwapokelela umwana umunono wenga wakwe wii umwi zina lyane ale nani kwene watampokelela; nupya wensi uwampokelela ale atapokelile sile nene lelo ale wapokelela nu wantumile.”

38 Yoani wamunenyile ati: “Kasambilizya, twaweni umwi akufumizya iviwa umwi zina lyako, nupya twezizye ukumulesya pano asi uwa mwi umba litu.” 39 Lelo Yesu walanzile ati: “Mutaamulesya, pano kusi angacita icizungusyo umwi zina lyane nupya apa nsita inono atandike ukulanda iviipe pali nene. 40 Pano wensi asitulwisya ala ali ku lusansa lwitu. 41 Nupya wensi uwamupeela kapu wa manzi ya kumwa pa mulandu wakuti mwemwe yakwe Klistu, i cumi nkumunena ukuti alapokelela icilambu. 42 Lelo wensi uwasosya wenga pali yaa anono aya nu utailo, cingazipa ukumunyepelela umu nsingo iciliwe ca kusiila cino punda akapindulula alino nu kumusumbila muli yemba.

43 Fwandi ndi cakuti ikasa lyako likukulenga ukuluvyanya, liputule. Cazipa ukupusuka wewe makunkutu ukucila ukuya na makasa yaili umu Gehena* muno umoto usizima. 44*—— 45 Nupya ndi cakuti ikulu lyako likukulenga ukuluvyanya, liputule. Cazipa ukupusuka wewe cilema ukucila ukuya na makuulu yaili umu Gehena.* 46*—— 47 Nupya ndi cakuti ilinso lyako likukulenga ukuluvyanya, litonkole. Cazipa ukwingila mu Wene wakwe Leza ni linso lyonga ukucila ukusumbilwa na manso yaili umu Gehena,* 48 muno ingonyo zisifwa nupya nu moto usizima.

49 “Pano umoto uliza pa muntu ali wensi, wakwe viivi kwene vino yakacemeka umusilya umu vyakulya. 50 Umusilya uusuma, lelo ndi cakuti wafumuka, uzye mungaukalifya na cani? Muye wa musilya, nupya mwaikala umu mutende na auzo.”

10 Lino Yesu wafumile kuuku, walamvile uluzi lwa Yodani nu kuya ku mipaka ya mpanga ya Yudeya, nupya antu aingi yakolongine kuli aliwe. Lyene wakwe vino wacitanga lyonsi, nupya kwene watandike ukuyasambilizya. 2 Nupya Afaliseo yaile kuli aliwe ku kumwezya, yamuzizye ndi cakuti isunde lyazumilizya umonsi ukuta umuci. 3 Nawe wayuzizye ati: “I vyani vino Mose wamunenyile?” 4 Nayo yatiile: “Mose wazumilizye umonsi ukulemba kalata ya kuzingilapo umuci nga nu kumuta.” 5 Lelo Yesu wayanenyile ati: “Pa mulandu wakuti mwakoma imyenzo, i calenzile ukuti Mose amulembele isunde lilyo. 6 Lelo ukufuma pa kutandika kwa uumbo, ‘Leza waumvile umonsi nu mwanaci. 7 Pa mulandu kwene uu, umonsi alasya isi na nyina, 8 nupya umonsi nu umuci* wakwe yalaya umwili onga’, pakuti yataya nupya yaili, lelo yaye umwili onga. 9 Fwandi kusi umuntu alinzile ukulekanya cino Leza watalundanya.” 10 Nupya kwene lino yaali umu ng’anda, asambi yakwe yatandike ukumuzya pa mulandu kwene uu. 11 Nawe wayanenyile ati: “Wensi uwata umuci nu kutwala muze, ala wacita ucende nu kuyembukila umuci wakwe, 12 nupya ndi cakuti umwanaci wafuma* kuli iya nu kutwalwa kuli muze ala wacita ucende.”

13 Lyene antu yatandike ukumuletela ana anono pakuti ayikepo makasa, nomba asambi yayakalipile. 14 Lino Yesu waweni vivyo wasosile nu kuyanena ati: “Lekini ana anono ize kuli nene, mutezya ukuyakaanya, pano Uwene wakwe Leza u wa yantu aya wakwe yaa. 15 I cumi nkumunena ukuti wensi aasipokelela Uwene wakwe Leza wa mwana umunono atalingilamo.” 16 Nupya watozile ana nu kuyafukatila, nu kutandika ukuyapaala ala wataika makasa yakwe pali aliyo.

17 Lyene lino Yesu wapitanga, umuntu umwi wasimwilile kuli aliwe nu kuyamufukamila alino amuzya ati: “Kasambilizya musuma, i vintu ci vino ndinzile ukucita pakuti nkaye nu umi wa pe?” 18 Yesu nawe wamunenyile ati: “U mulandu ci uno wangamila wati umusuma? Kutaya nanti aumwi umusuma, suka sile Leza. 19 Wamanya ukuti masunde yakati: ‘Utaakoma, utaacita ucende, utaiya, utaapeela unte wa ufi, utaacenjezya auzo, nupya uwacindika tata na mayo wako.’” 20 Nawe walanzile ati: “Kasambilizya, nkalondela masunde yaa yonsi ukufuma sile uku wance.” 21 Yesu wamulolekisye, nupya pa mulandu wakuti wamutemilwe, wamunenyile ati, “Watuulizya icintu conga: Pitanga ukakazye vino wakwata nu kupeela impiya zizyo uku yapiina, nupya ulakwata ivyuma umwi yulu; alino uwize uye umulondezi wane.” 22 Lelo uvwile ulanda pa mazwi yayo, nupya wafumilepo ala ali nu ulanda, pano wakweti ivyuma ivingi.

23 Lino Yesu walolekisye konsi konsi, wanenyile asambi yakwe ati: “Cilatala uku yantu ampiya ukwingila umu Wene wakwe Leza.” 24 Lelo asambi yakwe yazungwike apa kuvwa mazwi yayo. Nupya Yesu wayanenyile ati: “Mwe yana, catala ukwingila umu Wene wakwe Leza. 25 Cangupalako uku ngamali ukwingila umwi linso lya nsindano ukucila uwa vyuma ukwingila umu Wene wakwe Leza.” 26 Lyene alino yazungwike sana nu kumunena* iyati: “Uzye fwandi a weni angapusuka?” 27 Lyene Yesu wayalolekisye, alino ayanena ati: “Cii citanga cicitike uku yantu, lelo kuli Leza kwene vyonsi vingacitika.” 28 Petulo wamunenyile ati: “Lola! Twasya vyonsi nu kukulondela.” 29 Yesu walanzile ati: “I cumi nkumunena ukuti, kusi nanti aumwi uwasya ing’anda nanti aina nanti ya kaci yakwe nanti nyina nanti isi nanti ana nanti ivyalo pa mulandu wane na pa mulandu wi lyasi lisuma, 30 aatalapokelela ivingi ndakai ukucila pali vino wasya, kuli kuti mang’anda, aina, ya kaci yakwe, ya nyina, ana, ivyalo alino nu kucuziwa nupya nu ku nkoleelo* alapokelela umi wa pe. 31 Lelo aingi aankoleelo yalaya aacisila na aacisila yalaya aankoleelo.”

32 Lyene Yesu na asambi yakwe yayanga uku Yelusalemu, nupya Yesu u wali pa nkoleelo, fwandi asambi yakwe yazungwike, lelo yauze aali pa cisila cao yatandike ukuvwa intete. Nupya kwene Yesu wasenzile atumwa yakwe 12 apa mbali nu kutandika ukuyanena ivyali nu kumucitikila ati: 33 “Lyene paa tukuya ku Yelusalemu, nupya Umwana wa muntu alapeelwa kuli ya simapepo akalamba na ya kalemba. Yalamupingula ukukomwa nupya yalamupeela ku yantu amu nsi, 34 nayo yalamusoweka nu kumuswila mati nupya yalamuma ivikoti nu kumukoma; lelo pa wanda wakwe citatu alatuutululwa.”

35 Lyene Yakobo na Yoani ya mwana Zebedi, yaile kuli Yesu nu kumunena iyati: “Kasambilizya, tukulonda utucitile consi cino tumakulenga.” 36 Nawe wayuzizye ati: “I cani cino mukulonda imucitile?” 37 Nayo yatiile: “Uce uleke twikale naawe umu Wene wako, wenga ukwi kasa lyako ili lunji, nu muze kuli cimani.” 38 Lelo Yesu wayaswike ati: “Mutamanyile vino mukulenga. Uzye mungamwa vino nkumwa nanti ukubatiziwa ulubatizyo luno nkubatiziwa?” 39 Nayo yamwaswike iyati: “Ee.” Yesu nawe wayanenyile ati: “I cacumi mulamwa vino nkumwa, nupya mulabatiziwa ulubatizyo luno nkubatiziwa. 40 Lelo asi nene ningasoolola aakwikala ukwi lunji lyane na kuli cimani, Tata aliwe wapekanya.”

41 Lino asambi yauze 10 yuvwile vii, yasokiile Yakobo na Yoani. 42 Lelo Yesu wayamile nu kuyanena ati: “Mwamanya ukuti aakaloleka ukuti* aa kateeka ya mu nsi yakatitikizya antu yano yakateeka, nupya alasi nayo yasiomvya ningo maka yao ku yantu yano yakatungulula. 43 Vii asi avino cifwile kuya pali mwemwe; lelo wensi aakulonda ukuya umukalamba pali mwemwe afwile ukuya umuomvi winu, 44 nupya wensi aakulonda ukuya uwa nkoleelo pali mwemwe alinzile ukuya umuzya winu mwensi. 45 Pano nu Mwana wa muntu kwene atizile kuti yamuombela, lelo wizile umu kuombela antu nu kupeela umi wakwe ilambo pakuti apususye antu aingi.”

46 Lyene yafisile umu Yeliko. Lelo lino Yesu na asambi yakwe ni umba ilikalamba yafumanga umu Yeliko, Batimeo (mwana Timeo) uwali impafu kalengalenga, watenzi umu mbali ya museo. 47 Lyene lino uvwile ukuti a Yesu uwa ku Nazaleti, watandike ukupunda ati: “We Yesu, Mwana Devedi, nguvwileko uluse!” 48 Aingi yatandike ukumukalipila lino yuvwile vivyo, ala yakumunena ukuti ate ukupanga icongo; nomba alino wapundisye ati: “We Yesu, Mwana Devedi, nguvwileko uluse!” 49 Yesu wimilile nu kuyanena ati: “Mwamini.” Nayo yamwamile nu kumunena iyati: “Sipa! Katuka; Yesu akukwama.” 50 Nawe wasumvile icakuzwala ca kunzi, nupya lilyo kwene wakatwike zuwa zuwa nu kuya kuli Yesu. 51 Lyene Yesu wamuzizye ati: “I vyani vino ukulonda nkucitile?” Nawe wamunenyile ati: “Kasambilizya,* nkulonda ukuti ntandike ukulola.” 52 Yesu nawe wamunenyile ati: “Pitanga. Utailo wako wakupozya.” Nupya lilyo kwene watandike ukulola, atandika nu kulondela Yesu.

11 Lino yafisile mu Betifage na Betaniya pa Mwamba wa Miolivi umupipi na Yelusalemu, Yesu watumile asambi yakwe yaili 2 nu kuyanena ati: “Yangini umu muzi uuwa, nupya nga mwafika sile mwayazana mwana punda iyamunyepa wino kusi umuntu nanti aumwi uwatala wakwelapo. Mukamusapule nu kumuleta kuno. 3 Nupya nga umwi wamuzya ukuti, ‘U mulandu ci uno mukusapwila mwana punda?’ mukalande muti, ‘Umwene akumulonda nupya amamuwezya likwene.’” 4 Fwandi yapisile nu kuyazana mwana punda watanyepwa lwa pa mulyango wa ng’anda iyali umu mbali ya museo, nupya yamusapwile. 5 Lelo yamwi aimi papa kwene, yayuzizye iyati: “U mulandu ci uno mukusapwila mwana punda?” 6 Nayo yayanenyile viivi kwene vino Yesu wayanenyile, fwandi yatayakaanyizye.

7 Nupya yaleesile mwana punda kuli Yesu, yanzikepo ni vyakuzwala vyao, nawe wikazilepo. 8 Nupya aingi yatandike ukwanza ivyakuzwala vyao umu museo, lelo yauze yene yakomanga imisambo ya miti nu kwanza umu museo. 9 Nupya aamukolelile alino na aali cisila yapundanga ala yakuti: “We Leza mupususye! Umupaalwe a wiyo akwizila umwi zina lyakwe Yeova! 10 Uwene wakwe Devedi tata witu uukwiza, wapaalwa! Tukupepa kuli wewe wemuno wikala papelapela tukuti mupususye!” 11 Nupya lino wafisile umu Yelusalemu, wingile umwi tempele, nupya walolekisye vyonsi ivyalimo, nomba pa mulandu wakuti ale ikutandika ukufita, wafumilemo nu kuya ku Betaniya pamwi na atumwa yakwe 12.

12 Uwanda uwalondelilepo lino wafumanga uku Betaniya, uvwile inzala. 13 Lyene waweni cimuti ca masamvu katalamukila icakweti mafwa, nupya waileko mukulola ndi cakuti angazanako ivizao. Lelo lino wafisile, wazanyileko sile mafwa yatupu, pano itali insita iyakuti masamvu yaseeke. 14 Fwandi wanenyile icimuti ati: “Kusi nanti aumwi alatala alyeko ivizao kuli wewe.” Nupya asambi yakwe yuvwileko.

15 Lino yafisile umu Yelusalemu, Yesu wingile umwi tempele nupya watandike ukuzinga yonsi aakazyanga nu kukala ivintu, nupya wapenozile na matebulo yakwe ya kakauzya ya mpiya ni vilimba vyakwe ya kakazya ya nkunda, 16 nupya atazumilizye umuntu ali wensi ukupisya icili consi api tempele. 17 Wayasambilizyanga ati: “Uzye citalembwa ukuti, ‘Ing’anda yane ilaamwa ukuti ing’anda ya mapepo iya yantu yonsi? Lelo mwemo imuisangula ukuya ing’anda ya vipondo.” 18 Lyene ya simapepo akalamba na ya kalemba yuvwile ivyacitiike, nupya yatandike ukulonda inzila yakumukomelamo; pano yamutiinanga pa mulandu wakuti antu yonsi yazungwike imisambilizizye yakwe.

19 Lyene manguzi, Yesu na asambi yakwe yafumile umu musumba. 20 Lelo katondotondo lino yapitanga, yaweni icimuti ca masamvu ale icuuma kumwi ni misisi. 21 Lino Petulo wiwisye ivyacitiike, wanenyile Yesu ati: “Labi, lola! icimuti cino watiipwizile icuuma.” 22 Yesu nawe wayanenyile ati: “Tailini Leza.” 23 I cumi nkumunena ukuti wensi uwanena umwamba uu ukuti, ‘Katuka nu kuisumbila muli yemba,’ nupya asikutwisika, lelo watataila ukuti vino walanda vimacitika, ala vimacitika na vivyo kwene. 24 Fwandi ali mulandu uno nkumunenela ukuti vyonsi vino mukupepelapo nu kulenga, mwataila ukuti imuvipokelela mpiti, nupya mulavikwata. 25 Lino imwimilila mukupepa, mwaelela wensi uwamuluvyanya pakuti Tata winu uwa kwi yulu nawe amwelele pali vino mukaluvyanya.” 26*——

27 Nupya kwene yaile ku Yelusalemu. Lyene lino Yesu wingile umwi tempele, ya simapepo akalamba, ya kalemba ni ntunguluzi zya Yayuda yaile kuli aliwe 28 nu kumuzya iyati: “U ku maka ci kuno ukacitila ivintu vii? Nanti uzye a weni uwakupeela amaka ya kucita ivintu vii?” 29 Yesu nawe wayaswike ati: “Nani namamuzya iuzyo lyonga. Nga mwangasuka, lyene namamunena uwampeela amaka ya kucita ivintu vii. 30 Uzye aekwi kuno Yoani wafumizye amaka ya kubatizya, u kwi yulu nanti uku yantu? Ngasukini.” 31 Fwandi yatandike ukulanzyanya aineco iyati: “Nga twati, ‘U kwi yulu,’ amatuzya ati, ‘Nga lyene u mulandu ci uno mutamutailile?’ 32 Lelo nga twati, ‘U ku yantu,’ i vyani ivimatucitikila?” Yatiinanga iumba pano yonsi yazumiile ukuti Yoani wali a kasesema. 33 Fwandi yamwaswike iyati: “Tutamanyile.” Nawe wayanenyile ati: “Nani kwene ntakumunena kuno nkafumya maka ya kucita ivintu vii.”

12 Lyene watandike ukulanda nayo ukuomvya vilangililo ati: “Umuntu umwi walimile icalo ca myangazi nupya wacipindiliile nu kwimbamo iciwina ca kufenelamo imyangazi, wakuuzilemo nu lupungu; lyene wasiliile* alimi alino aya uku mpanga iya kutali. 2 Lino insita ya kuzombola yafisile, watumile umuomvi wakwe ku yalimi pakuti akamutolele ivizao vyakwe. 3 Lelo yamulemile, iyamuma nu kumuswilizya ukwaula icili consi. 4 Nupya kwene watumile umuomvi na muze, wene yaile iyamuma iyamucisa ku mutwe nupya yamupontiile. 5 Nupya kwene watumile muomvi na muze, wene yaile iyamukoma, lyene watumile aomvi na yauze aingi, yamwi yaile yayuma nupya yamwi yayakomile. 6 Lyene pa kusyalikizya watumile umwanakwe wino watemilwe sana, pano welenganyanga ukuti, ‘Wene yalamucindika.’ 7 Lelo alimi yatandike ukulanzyanya iyati, ‘Wii ali mpyanyi. Lekini tumukome na vino wali nu kupyana vilaya ivitu.’ 8 Lyene yamulemile nu kumukoma nupya yamusumbiile ukunzi ya calo ca myangazi. 9 Uzye umwineco wa calo ca myangazi alacita uli? Aliza akome alimi yayo nu kupeela icalo ca myangazi ku yalimi yauze. 10 Uzye mutabelenga umu Malembo ukuti: ‘Iwe lino ya kakuula yakanyile lizile iliya iwe licindame ilya pa koona?* 11 Iwe lii lyafumile kuli Yeova, nupya i cizungusyo kuli sweswe.’”

12 Lino ya kalemba na ya simapepo akalamba yuvwile vivyo, yalondanga ukumulema, pano yamanyile ukuti icilangililo cino walanzile calozyanga kuli aliyo, lelo yatiinyile iumba. Fwandi yapisile iyamusya.

13 Lyene yatumile Afaliseo yamwi na amu kaungwe kakwe Helodi kuti yakamupeele umulandu nga waluvyanya umu milandile. 14 Lino yafisile yamunenyile iyati: “Kasambilizya, twamanya ukuti wewe wa cumi nupya usiika mano uku myelenganyizizye ya muntu ali wensi, pano usilola pa milolekele ya yantu, lelo ukasambilizya antu icumi pali Leza. Uzye isunde lyazumilizya ukulipila umusonko kuli Kaisale nanti foo? 15 Uzye tulinzile ukulipila nanti foo?” Lino Yesu waweni usomvi wao wayanenyile ati: “U mulandu ci uno mukungezezya? Letini dinali kuno tulole.” 16 Nayo yamuletiile dinali wenga, nawe wayuzizye ati: “Uzye icikope cii ni vilemvilwepo i vyakwe weni?” Nayo yamwaswike iyati: “I vyakwe Kaisale.” 17 Lyene Yesu wayanenyile ati: “Peelini vyakwe Kaisale kuli Kaisale, na vyakwe Leza kuli Leza.” Nupya yazungwike sana pali vino waswike.

18 Lyene Asaduki aalandanga yakuti kutaya ukutuutuluka, yaile kuli Yesu nu kumuzya iyati: 19 “Kasambilizya, Mose watulembiile ati, ndi cakuti umonsi wafwa nupya wasya umuci ukwaula ukuvyalamo umwana, umwinakwe afwile ukutola umuci wino wasya nu kuvyalila umwinakwe ana. 20 Nomba kwali aina 7. Uwa kutandikilako watwazile, lelo wafwile ukwaula umwana. 21 Nupya wakwe ciili watwazile umwanaci wiyo, lelo nawe kwene wafwile ukwaula umwana, vikwene avino cali na kuli wakwe citatu. 22 Nupya yonsi 7 yafwile ukwaula ukukwatamo umwana. Na pa kusyalikizya umwanaci wiyo wafwile. 23 Uzye lino aonsi yayo 7 yalatuutululwa, umwanaci wiyo alaya umuci wakwe weni? Pano yonsi kwene yamutwazilepo.” 24 Yesu nawe wayaswike ati: “Mutamanya Malembo nanti amaka yakwe Leza. Ali mulandu uno mwapongela. 25 Pano lino afwe yalatuutululwa, aonsi yatalatwala na anaci yatalatwalwa, yalaya wakwe ya malaika umwi yulu. 26 Lelo ukulozya ku kutuutululwa kwa yafwe, uzye mutabelenga umwi buku lyakwe Mose api lyasi ilikalanda pa cimpuza ca moto, pali vino Leza wanenyile Mose ati: ‘Nene Leza wakwe Abulahamu, Leza wakwe Isaki, na Leza wakwe Yakobo’? 27 Asi Leza wa yafwe, lelo a Leza wa yantu ya umi. Mwaponga sana.”

28 Kwali kalemba umwi uuvwile vino yapaazyanyanga. Fwandi pa mulandu wakuti uvwile vino Yesu wayalondolwelile ningo, wamuzizye ati: “I sunde ci ilikalamba* pa masunde yonsi?” 29 Yesu waswike ati: “Ilya nkoleelo aeli, ‘Uvwini mwe ina Izlaeli, Yeova Leza witu a Yeova wenga, 30 nupya uwatemwa Yeova Leza wako nu mwenzo wako onsi, nu umi* wako onsi na mano yako yonsi na maka yako yonsi.’ 31 Lyakwe ciili aeli, ‘Uwatemwa umuzo wakwe vino waitemwa.’ Kutaya isunde na lyuze ilikalamba ukucila pali yaa.” 32 Kalemba nawe wamwaswike ati: “Kasambilizya, walanda ningo ukulingana ni cumi, ‘Kwaya sile Leza wenga, nupya kutaya na muze’; 33 nupya ukutemwa Leza nu mwenzo onsi, nu kwelenganya konsi, na maka yonsi, alino nu kutemwa umuzo wakwe vino waitemwa, kwacindama sana ukuluta upe onsi uwa koca na malambo.” 34 Lino Yesu uvwile ukuti wasuka ningo, wamunenyile ati: “Usi ukutali nu Wene wakwe Leza.” Nupya kusi uwasifile ukumuzya iuzyo na lyuze.

35 Lelo lino Yesu wasambilizyanga umwi tempele walanzile ati: “U mulandu ci uno ya kalemba yakalandila ukuti Klistu a mwana Devedi? 36 Umupasi wa muzilo walenzile Devedi ukulanda ukuti, ‘Yeova wanenyile Umwene wane ati: “Ikala ukwi kasa lyane ili lunji ukufikila lino ndakupeela amaka pa yalwani yako”’? 37 Ndi cakuti Devedi wamile Klistu ukuti Umwene, angaya uli nupya umwanakwe?”

Iumba ilikalamba lyatemilwe vino lyuvwanga kuli Yesu. 38 Nupya lino wasambilizyanga walanzile ati: “Cenjelini kuli ya kalemba aatemwa ukupitana ale iyazwala imingila iitali nupya yakalonda antu yayalamuka nu mucinzi apa maliketi, 39 nupya yatemwa ukwikala ku vilimba vya ku nkoleelo* mu masunagogi* nu kwikala pa vifulo ivicindame sana pa nsita ino yakuliila pamwi na antu yauze. 40 Yakapoka ya mukamfwilwa ivyuma, nupya yakapepa amapepo aatali pakuti yailangizye uku yantu. Upinguzi wa yantu yaa ulipisya.”

41 Nupya Yesu watenzi ala watalozya manso ku tumbokosi twa mpiya, walolanga vino iumba lyasumbilanga impiya umu tumbokosi, nupya antu aingi aavyuma yasumbilangamo impiya izingi. 42 Lyene mukamfwilwa mupiina waile asumbilamo tupiya twili utunono sana.* 43 Fwandi Yesu wamile asambi yakwe nu kuyanena ati: “I cumi nkumunena ukuti mukamfwilwa wii umupiina watasumbila impiya izingi mu kambokosi ukucila yonsi atiyasumbilamo. 44 Pano yonsi iyasumbila impiya ukufuma pa vyuma vyao, lelo wene nanti cakuti umupiina, watasumbilamo tonsi tuno wali akweti tuno angaomvya mu umi wakwe.”

13 Lino Yesu wafumanga api tempele, umusambi wenga wamunenyile ati: “Kasambilizya, si lola mawe usuma ni vikuulwa!” 2 Lelo Yesu wamunenyile ati: “Uzye watulola ivikuulwa vii vikulu? Patalasyala iwe nanti alyonga api we lyuze, yonsi kwene yaloomolwa.”

3 Lino Yesu watenzi pa Mwamba wa Miolivi ulunga ni tempele, Petulo, Yakobo, Yoani na Andeleya yaile pa mbali nu kumuzya iyati: 4 Tunene, a lilaci lino ivintu vii vilacitika, nupya i cani icilaya icimanyililo cakuti vintu vii vyonsi vili uku mpelelekezyo?” 5 Fwandi Yesu watandike ukuyanena ati: “Cenjelini ukuti umwi ataca amuponzye. 6 Aingi yalizila umwi zina lyane nu kulanda ukuti, ‘Anene kwene,’ nupya yalaponzya aingi. 7 Nupya lino muluvwa malyasi ya nkondo mu ncende izipusanepusane, mutaca mutiine, ivintu vii vilinzile ukucitika lino impela itali ize.

8 “Pano uluko lulakatukila uluko luze nu wene ulakatukila uwene uze, nupya kulaya ivilundumusi umu ncende zimwi zimwi; kulaya ni vipowe. Vyonsi vii vilaya ali kutandika kwa macuzi aipisye aalaya wa ucuzi wa pa kupaapa.

9 “Mwemo mucenjele. Antu yalamutwala uku vilye nupya yalamuma umu masunagogi* nu kumutwala kuli ya kateeka na ya mwene pa mulandu wane, nupya cii cilalenga ukuti yasimikilwe. 10 Nupya inkoleelo, ilyasi lisuma lilatala lisimikilwe uku yantu amu nko zyonsi. 11 Nupya lino yalamutwala uku cilye, mutaca musakamale pali vino mulavwanga, lelo muce muvwange vino umupasi wa muzilo ulamunena pa nsita kwene iiyo, pano asi mwemwe mulavwanga, lelo u mupasi wa muzilo. 12 Nupya umwina alakomisya umwinakwe, na isi alakomisya umwanakwe, ana nayo yalakatukila avyazi nu kuyakomisya. 13 Nupya antu yonsi yalamupata pa mulandu wi zina lyane. Lelo uwazizimizya ukufika nu ku mpela wene alapusuka.

14 “Lelo lino mulalola ica winyi icikaleta uwononesi icimilila pano citalinzile ukwimilila, (aakubelenga alinzile ukwiluka), lyene aalaya umu Yudeya yace yatandike ukuutukila uku myamba. 15 Aalaya api paala ataca aike nanti ukwingila umu ng’anda umu kusenda icili consi; 16 Nupya wensi aalaya umu calo ataca aswilile umu kusenda icakuzwala cakwe. 17 Kalanda uku yanaci aalaya pa ukulu alino na alaonsya umu manda yayo! 18 Mwapepa ukuti mutaca muutuke umu nsita ya mpepo; 19 pano umu manda yayo mulaya ucuzi utatala wayako ukufuma pano antu yaumbiilwe ukufika pa nsita iiyo, nupya utalatala uyeko. 20 Nupya ndi cakuti Yeova atacefizye manda yayo, kusi umuntu aangapusuka. Lelo pa mulandu na antu yano Leza wasoolola, alacefya manda.

21 “Lyene ndi cakuti ali wensi wamunena ukuti, ‘Lolini! Klistu ali kuno,’ nanti, wati ‘Lolini! Ali kuuku!’ mutaca muzumile. 22 Pano ya Klistu ya ufi na ya kasesema ya ufi yalakatuka nu kucita ivimanyililo ni vizungusyo kuti yaponzye antu, nupya nga cingacitika nu kuponzya na asoololwe kwene. 23 Fwandi mwemo mucenjele. Namunenela limwi vyonsi.

24 “Lelo umu manda yaya, pa cisila ca ucuzi, ilanzi lilafiita, nu mwezi utalawala, 25 ni ntanda zilaapona ukufuma umwi yulu, alino ni vya maka ivya mwi yulu vilatenkaana. 26 Nupya yalalola Umwana wa muntu akwiza na maka nu lulumbi ulukalamba ukufuma mu makumbi ya mwi yulu. 27 Nupya alatuma ya malaika yakwe, nayo yalakolonganika asoololwe yakwe ukufuma umu ntunga 4 izya nsi, ukufuma kuno insi yapelela, kufika na kuno iyulu lyapelela.

28 “Lyene sambililini uku cilangililo ca muti wa masamvu: Lino watandika sile ukuleemba, mukamanya ukuti icisiku cili umupiipi. 29 Namwe kwene lino mulalola ivintu vii vikucitika, muce mumanye ukuti ali apiipi, pa mulyango. 30 I cumi nkumunena ukuti inkulo yii italapita kufikila ivintu vyonsi vii vikacitike. 31 Iyulu ni nsi vilapita, lelo mazwi yane yene yatalapita.

32 “Lelo ukulozya ku wanda uuwa nanti insita, kusi uwamanya, nanti sile aamalaika ya kwi yulu nanti Umwana, suka sile Tata. 33 Mwaya aiteyanye, pano mutaamanya insita ino Leza wasoolola. 34 Caya kwati u muntu uwapisile uku mpanga ya kutali nu kusya wapeela aomvi yakwe amaka ya kwangalila ing’anda yakwe, nu kupeela imilimo kuli wenga na wenga, nupya wanenyile nu mulinzi ukuya umuiteyanye. 35 Fwandi twalililini ukuya aiteyanye pano mutaamanya lino umwineco wa ng’anda aliza, nga manguzi nanti usiku pakasi nanti lino amacaca* yatatala yatandika nanti katondotondo, 36 pakuti nga wiza umukupumikizya ataca azane imukasula. 37 Lelo vino nkumunena ali vino nkunena na yonsi nkuti: Iteyanyini.”

14 Lyene kwasile manda yaili ukuti kuye Ukuzevya Kwa Ucilo nu Kwa Mukate Uwaula Icitutumusi. Nupya ya simapepo akalamba na ya kalemba yalondanga inzila ya kulemelamo Yesu umu mucenjelo nu kumukoma; 2 lelo yalandanga yakuti: “Tutaca tucite vivyo pa wanda wa Ucilo, pano limwi antu yangaca yalete icimvulunganya.”

3 Nupya lino Yesu wali uku Betaniya ala akulya umu ng’anda yakwe Simoni uwalwilepo tembwe, umwanaci umwi waile kuli aliwe ala asenzile ibotolo* lya mafuta anunkile nupya aamutengo yano yamanga yakuti nadi wa cumi cumi. Wayuzile ibotolo nu kutandika ukwitulwila Yesu pa mutwe. 4 Lino yamwi yaweni vivyo, yasosile nu kutandika ukulanzyanya iyati: “U mulandu ci uwakononela amafuta asuma vii? 5 Pano amafuta yaa nga yakaziwe ukucila na pa madinali 300 nu kupeela impiya zizyo uku yapiina!” Nupya yasokiile sana umwanaci. 6 Lelo Yesu wayanenyile ati: “Mulekini. U mulandu ci uno mukumucuzizya? Watancitila icintu cisuma. 7 Pano apiina mwaya nayo lyonsi, nupya mungayacitila ivisuma pa nsita yonsi ino mukulonda, lelo nemo mutalaya nani lyonsi. 8 Watacita cino angakwanisya ukucita; wataitulwila mafuta pa mwili wane pa kumpekanyizizya vino ndaziikwa nga nafwa. 9 I cumi nkumunena ukuti konsi kuno ilyasi lisuma lilasimikilwa umu nsi yonsi, na vino umwanaci wii watacita navyo kwene vilalandwa pa kumwiusya.”

10 Lyene wenga pa yatumwa 12 wino yamanga yakuti Yuda Iskalyoti, waile kuli ya simapepo akalamba pakuti afutuke Yesu nu kumupeela kuli aliyo. 11 Lino yuvwile vivyo yatemilwe sana, nupya yamulavile kumupeela impiya zyakwe siuva. Fwandi watandike ukulonda inzila iya kufutukilamo Yesu.

12 Lyene pa wanda wa kutandikilako ukuzevya Umukate Uwaula Icitutumusi, lino yapeelanga ilambo pa wanda wa Ucilo, asambi yamuzizye iyati: “Aekwi kuno ukulonda tukakupekanyizizye ukuliila Ucilo?” 13 Lyene watumile asambi yakwe yaili nu kuyanena ati: “Yangini mu musumba, nupya umuntu uwatasenda insembo ya manzi amaya akamukomenkanye. Mukamulondele, 14 nupya ing’anda yonsi ino amaya akingilemo, munene umwineco wa ng’anda iiyo muti, ‘Kasambilizya akuzya ukuti: “Uzye umuputule wa enyi uli kwi muno namaliila Ucilo pamwi na asambi yane?”’ 15 Nawe amaya akamulange umuputule ukalamba uwa papela, uupekanyiziwe ningo. Amuno mupekanyizizye Ucilo. 16 Fwandi asambi yapisile nu kuya ingila mu musumba nupya yaile iyazana viivi kwene vino Yesu wayanenyile nupya yapekanyizye Ucilo.

17 Lino cafisile manguzi, Yesu na atumwa yakwe 12 yaile kuuku. 18 Nupya lino yalyanga, Yesu walanzile ati: “I cumi nkumunena ukuti umwi pali mwemwe aakulya nani amamfutuka.” 19 Nayo yuvwile sana ulanda, nupya cila muntu watandike ukumuzya ati: “Mwene uzye ale anene?” 20 Yesu nawe wayanenyile ati: “A wenga pali mwemwe kwene 12, aakuteela nani umu mbale. 21 Pano Umwana wa muntu alafwa wakwe vino calembwa pali aliwe, lelo kalanda uku muntu aakufutuka Umwana wa muntu! Nga cazifile umuntu wiyo atavyalwa.”

22 Nupya lino yalyanga, Yesu watozile umukate, ataizya kuli Leza, aumokoola nu kupeela asambi yakwe, alino ayanena ati: “Tolini mulye; umukate uu ukwimililako umwili wane.” 23 Nupya watozile kapu, ataizya kuli Leza nu kupeela asambi yakwe, nupya yonsi yamwile. 24 Nupya wayanenyile ati: “Waini wii, akwimililako ‘uwazi wane uwa upangano’ uuli nu kupongololwa pa mulandu wa yantu aingi. 25 I cumi nkumunena ukuti, ntalamwapo nupya waini wii kufikila uwanda uuwa lino ndamwa waini umupya umu Wene wakwe Leza.” 26 Pa cisila ca kwimba inyimbo zya kulumbanya Leza, yaile uku Mwamba wa Miolivi.

27 Lyene Yesu wayanenyile ati: “Mwensi mumansya, pano calembwa ukuti: ‘Ndakoma kacema, ni mfwele zilasalangana.’ 28 Lelo lino ndatuutululwa ndamukolelela uku Galili.” 29 Lelo Petulo wamunenyile ati: “Nanti cakuti yonsi yakusya, nemo ntakukusya.” 30 Lyene Yesu wamunenyile ati: “I cumi nkukunena ukuti ilelo, usiku kwene uu, lino mukolwe atatala walamula imiku iili, umankana imiku itatu.” 31 Lelo Petulo watwalilile ukukana ati: “Nanti cakuti ningafwila pamwi nawe, ntakukukana.” Asambi yauze yonsi nayo kwene yalanzile icili cimwi.

32 Lyene yafisile apa ncende iyamwanga ukuti Getisemani, nupya Yesu wanenyile asambi yakwe ati: “Ikalini paa, naya umu kupepa.” 33 Lyene wasenzile Petulo, Yakobo na Yoani, nupya watandike ukuvwa sana ulanda nu kusakamikwa. 34 Lyene wayanenyile ati: “Indi sana nu ulanda icakuti ningafwa nu kufwa. Ikalini paa nu kutwalilila ukulola.” 35 Nupya waile pa nkoleelo panono, wafukime nu kutandika kupepa ukuti, nga cingacitika insita itale ipitile ukutali na aliwe. 36 Nupya walanzile ati: “Abba,* Tata, kuli wewe vyonsi vingacitika; fumya kapu wii pali nene. Lelo asi ukulingana nu kulonda kwane suka ukulonda kwako.” 37 Lino waswilile uku yasambi yakwe, wazanyile yakukasula, nupya wanenyile Petulo ati: “Simoni, uzye ukukasula? Uzye utakweti maka ya kutwalilila ukulola pamwi nani nanti sile api awala lyonga? 38 Twalililini ukulola nu kupepa, pakuti mutingila umu wezyo. Umwenzo wene ukulonda nomba umwili iutonta.” 39 Nupya kwene waile umu kupepa ala akulanda amazwi ali yamwi kwene. 40 Nupya kwene lino waswilile uku yasambi yakwe, wazanyile iyakasula, pano ala manso yao iyafina nu tulo, fwandi yafizilwe ni vya kuvwanga. 41 Lyene waswilile uku yasambi yakwe umuku wakwe citatu nu kuyanena ati: “Uzye pa nsita ya musango uu apano mukukasula nu kupuuza? Casila! Insita yafika! Lolini! Umwana wa muntu akufutukwa nu kupeelwa uku yayembu. 42 Katukini, tuini twapita. Lolini! Aamamfutuka wasya afike.”

43 Nupya lilyo kwene lino acili akuvwanga, Umusambi wenga pa yatumwa 12 uwi zina lyakuti Yuda, wafisile ala ali ni umba ilya yantu lino ya simapepo akalamba na ya kalemba ni ntunguluzi yatumile, ale iyasenda impanga ni zya ntuwa. 44 Lyene uwali nu kumufutuka wayapeezile icimanyililo, ayanena ati: “Wino namatonsola ali wiyo kwene; mumuleme nupya mumusende ningo.” 45 Nupya waile kuli Yesu, amunena ati: “Uli Labi?” nupya wamutonswile. 46 Fwandi yamulemile nu kumusenda. 47 Lelo wenga pali yano yaimi umupiipi, wafumizye ulupanga lwakwe nu kuputula ikutwi lya muomvi wakwe simapepo mukalamba. 48 Lelo Yesu wayanenyile ati: “Uzye imwiza umu kundema ni mpanga ni zya ntuwa kwati mwizile umu kulema icipondo? 49 Cila wanda nayanga namwe umwi tempele ala nkusambilizya, nupya mutatazile imundemapo. Nomba vyonsi vii ivicitika pakuti Malembo yafikiliziwe.”

50 Lyene asambi yakwe yonsi yutwike nu kumusya. 51 Lelo umonsi umwi uwaivimvile icakuzwala ca nsalu isuma ku mwili watandike kumulondela umupiipi nupya yaakasi yamuleme, 52 lelo wafyumbutwike asya icakuzwala cakwe nu kuutuka tupu.*

53 Lyene yatwazile Yesu kuli simapepo mukalamba, nupya kuuku kwene u kwakolongine ya simapepo akalamba yonsi ni ntunguluzi zya Yayuda na ya kalemba. 54 Lelo Petulo walondelanga Yesu akatalamukila asuka aya afika na pa musolo wa ng’anda yakwe simapepo mukalamba; nupya wikazile pamwi na aomvi ya mu ng’anda ala akoota nu moto. 55 Lyene ya simapepo akalamba ni cilye consi ica Sanihedilini,* yalondanga antu aakuti yasinile Yesu pakuti yamukome, lelo yatamuzanyile nu mulandu uli onsi. 56 Antu aingi yalandanga ivya ufi pakuti yamusinile, lelo vino yalandanga vyapusananga. 57 Nupya yamwi yakatukanga nu kulanda ivya ufi pakuti yamusinile, yalandanga yakuti: 58 “Tuvwile umuntu wii akuti, ‘Ndawisya itempele lii ilyakuzilwe na makasa ya yantu nupya ndakuula lyuze umu manda yatatu ilitanga likuulwe na makasa ya yantu.’” 59 Lelo na pa milandu kwene iiyo, vino yalandanga vyapusananga.

60 Lyene simapepo mukalamba wimilile pa nkoleelo yao alino auzya Yesu ati: “Nga wemo, uzye usikulandapo nanti acimwi? Uzye ukutuuli pali vino antu yaa yakukusinila?” 61 Lelo Yesu wali sile mya nupya ataswike icili consi. Nupya kwene simapepo mukalamba watandike kumuzya ati: “Uzye wewe Klistu Umwana wakwe Leza wa Muzilo?” 62 Lyene Yesu waswike ati: “Anene kwene; nupya mulalola Umwana wa muntu atenzi ukwi kasa li lunji ilya maka nu kumulola akwiza na makumbi.” 63 Lino simapepo mukalamba uvwile vivyo, walepwile ivyakuzwala vyakwe nu kulanda ati: “Uzye tukulondekwa ya kambone na yauze nupya? 64 Lyene mwayuvwila vino akuponta. Mwemo mukutuuli?” Yonsi yalanzile ukuti alinzile ukufwa. 65 Nupya yamwi yatandike ukumuswila amati nu kumuvimba pa manso nupya yamumanga makofi ala yakumunena iyati: “Ndi cakuti wewe kasesema, tunene uwakuma!” Nupya lino aalinzi ya pa cilye yamutamile amapi pa manso, yamusenzile.

66 Lyene lino Petulo watenzi umu musolo, umukazyana wenga pa yaomvi yakwe simapepo mukalamba wizile. 67 Lino waweni Petulo akoota umoto, wamulolekisye nu kumunena ati: “Naawe kwene wali pamwi na Yesu wii uwa ku Nazaleti. 68 Lelo wakanyile ati: “Yesu ntamumanyile nupya ntamanyile na vino ukulandapo, nupya wafumile ukunzi aya uku mulyango.* 69 Nako kwene umuomvi umukazyana wamuweni, nupya watandike ukunena antu aaimi umupiipi ati: “Na wikwene u musambi wakwe.” 70 Nupya kwene wakanyile. Lyene lino papisile sile kasita kanono, aimiliile umupiipi nupya kwene yatandike ukunena Petulo iyati: “I cumi naawe kwene wewe musambi wakwe Yesu, pano wewe mwina Galili. 71 Lelo watandike ukuitiipwila nu kulapa ati: “Ntamumanyile umuntu wii wino mukulandapo!” 72 Lyene lilyo kwene mukolwe walamwile umuku wakwe ciili, nupya Petulo wiwisye mazwi yano Yesu wamunenyile aakuti: “Lino mukolwe atatala walamula imiku iili, umankana imiku itatu.” Nupya Petulo uvwile sana ulanda nu kutandika ukulila.

15 Lyene papo kwene sile ku macaca, ya simapepo akalamba kumwi ni ntunguluzi zya Yayuda na ya kalemba, yonsi sile amu cilye ca Sanihedilini* yakolongine nu kulanzyanya pali vino yali nu kucita kuli Yesu, lyene yamunyefile nu kumutwala kuli Pilato. 2 Fwandi Pilato wamuzizye ati: “Uzye wewe Mwene wa Yayuda?” Yesu nawe waswike ati: “Watuvwanga wemwineco.” 3 Lelo ya simapepo akalamba yamupeelanga imilandu iingi. 4 Lyene Pilato watandike ukumuzya nupya kwene ati: “Uzye usikulandapo nanti acimwi? Lola imilandu uwingi ino yakukupeela.” 5 Lelo Yesu ataswike nanti acimwi, nupya Pilato wazungwike.

6 Lyonsi lino kwaya kuzevya kwa ucilo, Pilato wayasapwilanga umufungwa wenga wino yakulonda. 7 Pa nsita iiya ala Balaba yamuyalila mu cifungo pamwi na auze pa mulandu wa kukatukila uteeko nu kukoma antu. 8 Fwandi antu aingi iizile nu kutandika ukulenga Pilato ukuti ayacitile vino wayacitilanga lyonsi. 9 Pilato nawe wayuzizye ati: “Uzye mukulonda imusapwile Umwene wa Yayuda?” 10 Pano Pilato wamanyile ukuti ya simapepo akalamba yaamutwalile Yesu pa mulandu nu muvimbila. 11 Lelo ya simapepo akalamba yaatwalilile ukunena antu ukuti yanene Pilato ayasapwile Balaba. 12 Nupya kwene Pilato wayuzizye ati: “Uzye fwandi i cani cino mukulonda incite ku muntu wii wino mukaama ukuti Umwene wa Yayuda?” 13 Nayo yaatwalilile ukupunda iyati: “Apoopelwe pa cimuti!” 14 Lelo nupya kwene Pilato wayuzizye ati: “U mulandu ci? I cani cino wataluvyanya?” Lelo alino yaatwalilile ukupundisya iyati: “Apoopelwe pa cimuti!” 15 Lyene pa mulandu wakuti Pilato walondanga ukuzanzya iumba, wayasapwilile Balaba nupya pa cisila ca kupingula ukuti Yesu aumwe ivikoti, wamupeezile uku yantu pakuti yamupoopele pa cimuti.

16 Lyene asilika yatwazile Yesu pa musolo wa ng’anda yakwe kateeka, nupya yaamile iumba lyonsi ilya yasilika. 17 Yamuzwisile icakuzwala iciyenzu nupya yapanzile icisote ca myunga nu kumuzwika uku mutwe; 18 yatandike nu kupunda ala yakuti: “Mwapola, we Mwene wa Yayuda!” 19 Nupya yamumanga ni tete pa mutwe nu kumuswila mati nupya yamufukamiile. 20 Lyene pa cisila ca kumutumfya, yamuzuzile icakuzwala iciyenzu nu kumuzwika ivyakuzwala vyakwe. Nupya yamusenzile pakuti yakamupoopele pa cimuti. 21 Nupya yapatikiizye umupita nzila umwi uwi zina lyakuti Simoni umwina Kuleni, isi wakwe Alekizanda na Lufusi, uwafumanga kunzi ya musumba, kuti awino asendele Yesu icimuti ca kucuziwilwapo.*

22 Fwandi yamutwazile ku ncende ino yamanga ukuti Gologota, icikapiliula ukuti “Ipanga.”* 23 Lyene yamupeezile waini umuminkanye na mule, lelo wakanyile kumwa. 24 Nupya yamupoopiile pa cimuti, nu kwankana ivyakuzwala vyakwe kupitila mu kupendola pakuti yalole vino cila muntu wali nu kusenda. 25 Lyene insita yakwe 9:00* yamupoopiile pa cimuti. 26 Nupya isile cipampa lwa papela ya mutwe wakwe pano yalemvile umulandu uno yamupeezile, iyati: “Wii a Yesu Umwene wa Yayuda.” 27 Iisile ni vipondo viili pa vimiti umupiipi na Yesu, conga ukwi lunji ni cuze kuli cimani. 28* —— 29 Nupya aapitanzila yamupontelanga ala yakupukunya imitwe nu kulanda iyati: “Ale! Wemuno ungawisya itempele nu kulikuula pa manda yatatu, 30 ika uku cimuti ca kucuziwilwapo* pakuti uipususye.” 31 Na ya simapepo akalamba kumwi na ya kalemba nayo kwene yamutumfyanga ala yakuti: “Wene wapususyanga yauze; lelo wafilwa ukuipususya! 32 Lekini Klistu Umwene wa ina Izlaeli aike ku cimuti ca kucuziwilwapo* tulole, nga tumutaile.” Ni vipondo ivyali pa vimiti umupiipi nawe navyo kwene vyamupontelanga.

33 Lino cafisile 12:00,* kwali imfinzi umu mpanga yonsi kufika ni nsita yakwe 15:00.* 34 Nupya apa 15:00, Yesu wapunzile ni izwi likalamba ati: “Eli, Eli, lama sabakatani?” kuli kuti “Leza wane, Leza wane, i cani cino wandekelezezya?” 35 Lyene yamwi aimilile mupiipi lino yuvwile vivyo, yatandike ukulanda iyati: “Uvwini! Akwama Eliya.” 36 Lyene umwi wasimwile aya atimpika pamba muli waini umukantuke alino asomekamo itete nu kupeela Yesu pakuti amwe nupya walanzile ati: “Tekelini! Lekini tulole ndi cakuti Eliya amaiza amupususye.” 37 Lelo Yesu wapunzile ni izwi ilikalamba alino afwa.* 38 Nupya iketani lya mwi tempele lyalepwike ilyankanikana paili, ukufuma papela ukufika pansi. 39 Lelo lino umukalamba wa yasilika uwaimi apiipi na Yesu waweni ivyacitike pa mfwa yakwe, walanzile ati: “I cumi wii wali u Mwana wakwe Leza.”

40 Nupya kwali na anaci aali akatalamukila ala yakutamba ivikucitika, pali yayo pali Maliya uwa ku Magadala, Maliya nyina wakwe Yakobo umwance* na Yosesi alino na Salome, 41 aamusukililanga nu kumusakamala lino wali ku Galili, nupya kwali na anaci aingi aile pamwi nawe ku Yelusalemu.

42 Lyene pa mulandu wakuti yali insita ya manguzi, nupya wali uwanda wa kupekanya* Isabata, 43 kwizile umonsi umwi uwi zina lyakuti Jozefu uwa ku Alimatiya uwali umucindikwe sana umu Cilye Icikalamba ica Yayuda nupya uwaloleelanga Uwene wakwe Leza. Umonsi wii wasifile, aya kuli Pilato nu kuyalenga umwili wakwe Yesu. 44 Lelo Pilato watwisike ndi cakuti Yesu watafwa mpiti, fwandi wamile umusilika umukalamba nu kumuzya ndi cakuti watafwa. 45 Lino umusilika umukalamba wamunenyile ukuti i cacumi watafwa, wazumilizye Jozefu ukusenda umwili wakwe Yesu. 46 Lyene lino Jozefu wakazile insalu isuma nu kwisya umwili wakwe Yesu, waupomvile umu nsalu iiyo nu kuwika umwi lindi lino wafukwile umu ciliwe, lyene wakunkulwisye iciliwe icikalamba nu kucilika pa mulyango wi lindi. 47 Lelo Maliya uwa ku Magadala na Maliya nyina wakwe Yosesi yaatwalilile ukulolekesya pano Yesu wazisilwe.

16 Pa cisila ci Sabata, Maliya uwa ku Magadala na Maliya nyina wakwe Yakobo na Salome yakazile amafuta anunkile pakuti yakapake umwili wakwe Yesu. 2 Nupya katondotondo pa wanda wa kutandikilako umu mulungu, yaile ukwi lindi. 3 Yalanzyanyanga yakuti: “A weni aamaya akatukunkulusizye iciliwe pa mulyango wi lindi?” 4 Nomba lino yatumpwile amanso, yaweni ukuti iyafumyapo iciliwe nanti cakuti cali icikulu sana. 5 Lino iingile umwi lindi yaweni umulumendo ala atenzi ukwi lunji, watazwala nu mwingila utiswe, nupya yazungwike. 6 Lyene umulumendo wayanenyile ati: “Mutazunguka. Imanya ukuti mukulonda Yesu umwina Nazaleti wino yapoopiile apa cimuti. Watatuutululwa. Asipo pano. Lolini, pano yamulaalike aepa. 7 Lelo pitangini, mukanene asambi yakwe na Petulo ukuti, ‘Amamukolelela uku Galili. Akuno mumaya mukamulole wakwe vino wamunenyile.’” 8 Fwandi lino yafumile umwi lindi, yutwike ala yakuzakaza nupya ale iciyapezya amano. Nupya yataanenyile nanti aumwi, pano yali ni intete.*

Mu Cigiliki: “Pa nkoleelo yako.”

Nanti “kutuwizya.”

I cikuulwa muno Ayuda yapepelanga nu kubelengela Malembo.

Nanti “ukufunga.”

I cikuulwa muno Ayuda yapepelanga nu kubelengela Malembo.

Nanti “wasonsile.”

Nanti “wasonsile.”

Izina lii likaomviwa kuli Satana.

Mu Cigiliki: “Aakata izwi.”

Nanti “uwikazi wa ndakai.” Lolini Ulondolozi wa Mazwi.

Mu Cigiliki: “Kutupikapo na basiketi wa kupimilako.”

Nanti “lumbezu lwakwe musunta aakazanwa ku Izlaeli. akatalimpa kufika ku ma mita 4 nupya akakwata ni misambo.”

Nanti “kusyoni.”

Nanti “Impanga Umwaya Imisumba 10.”

Nanti “ali mupiipi nu kufwa.”

I cikuulwa muno Ayuda yapepelanga nu kubelengela Malembo.

Mu Cigiliki: “Koopa.”

Mu Cigiliki: “Mutazwala.”

Nanti “icakuzwala na cuze.”

Kuli kuti uku ma 03:00 ukufika uku ma 06:00.

Kuli kuti ukukana konka intambi pa kufulala ku minwe.

Nanti “uwatuka.”

Lolini Mat 17:21.

Mu Cigiliki: “Por·nei′a.” Lolini Ulondolozi wa Mazwi.

Nanti “kupama mu kucita ivya nsonyi.” Mu Cigiliki, a·sel′gei·a. Lolini Ulondolozi wa Mazwi.

Nanti “Impanga Umwaya Imisumba 10.”

Lolini Ulondolozi wa Mazwi.

Mu Cigiliki: “Iya ucende.”

Nanti “yataanenyile ali wensi.”

Lolini Ulondolozi wa Mazwi.

Lolini Mat 17:21.

Lolini Ulondolozi wa Mazwi.

Lolini Mat 17:21.

Lolini Ulondolozi wa Mazwi.

Mu Cigiliki: “Yoili.”

Nanti “ukuta iya.”

Nanti limwi, “ukuvwanzyanya.”

Nanti “uwikazi uukwiza.” Lolini Ulondolozi wa Mazwi.

Nanti “aamanyikwa ukuti.”

Mu Cigiliki: “Laboni.”

Lolini Mat 17:21.

Nanti “ukuseekezya.”

Mu Cigiliki: “Iwe ilya pa koona papela.”

Nanti “ilicindamisye.”

Lolini Ulondolozi wa Mazwi.

Nanti “ivisuma sana.”

I vikuulwa muno Ayuda yapepelanga nu kuwelengela Malembo.

Mu Cigiliki: “Maleputa yaili, kuli kuti Kwadilani.”

I vikuulwa muno Ayuda yapepelanga nu kuwelengela Malembo.

Mu Cigiliki: “Pali mukolwe.”

Mu Cigiliki: “Ibotolo lyakwe ‘alabasita.’ a kanyungu kano yapangilanga ni iwe ilikazanwa uku Alabastron, ku Ejipti.”

Izwi lya Cialamaiki ilikapiliula ukuti “Tata!”

Nanti “autuka sile na kakuzwala ka mukasi.”

Sanihedilini cali i cilye icikalamba ica Yayuda.

Nanti “impongolo.”

Sanihedilini cali i cilye icikalamba ica Yayuda.

Lolini Ulondolozi wa Mazwi.

Nanti “Cipanga.”

Mu Cigiliki: “Iawala ilyalenga citatu.”

Lolini Mat 17:21.

Lolini Ulondolozi wa Mazwi.

Lolini Ulondolozi wa Mazwi.

Mu Cigiliki: “Iawala ilyalenga 6.”

Mu Cigiliki: “Iawala ilyalenga 9.”

Nanti “ukuta ukufuuta.”

Nanti “umwipi.”

Kuli kuti pali Cisano.

Kulingana ni vyalembwa vya mpiti ivya cumi ivya kutandikilako, ilyasi lyakwe Mako lyasila na mazwi aya umu cikomo 8.

    Impapulo Zya Cimambwe-Lungu (2009-2025)
    Fumini
    Ingilini
    • Cimambwe-Lungu
    • Tumiliniko Yamwi
    • Vino mukulonda ukucita
    • Copyright © 2025 Watch Tower Bible and Tract Society of Pennsylvania
    • Masunde pa Miomvezye
    • Kusunga Inkaama
    • Privacy Settings
    • JW.ORG
    • Ingilini
    Tumiliniko Yamwi