KUSOKOLOLA UKWAPEEZILWE KULI YOANI

1 Kusokolola kwakwe Yesu Klistu, kuno Leza wamupeezile, ukwa kulanga aomvi yakwe ivintu ivili nu kucitika likwene. Nupya watumile malaika wakwe uwanenyile Yoani umuomvi wakwe ivintu vivyo ukuomvya ivimanyililo. 2 Yoani nawe wasimiike pali vino Leza walanzile, na pali vino Yesu Klistu walanzile, alino na pa vintu vyonsi vino waweni. 3 Uwa nsansa u muntu aakabelengela auze na aakauvwa mazwi ya usesemo uu, alino na aakalondela ivyalembwamo, pano insita isoololwe yatipalama.

4 Ne Yoani nalembela ivilongano 7 ivyaya umu citungu ca Asia:

Icikuuku cikulu nu mutende viye namwe ukufuma kuli “wino wayako nupya uwaliko nupya aakwiza,” nu kufuma uku mipasi 7 iyaya pa nkoleelo ya cilimba cakwe ica wene, 5 nu kufuma kuli Yesu Klistu, “Inte ya Cumi,” “uwatandikilepo ukutuutululwa ukufuma uku yafwe,” nupya “Kateeka wakwe ya mwene ya pano nsi.”

Kuli wino watutemwa nupya uwatukulula uku membu zitu ukuomvya uwazi wakwe 6 nupya watulenzile ukuya ya mwene, nu kuya ya simapepo yakwe Leza wakwe nupya Isi, kuli aliwe kuye lulumbi na maka manda pe. Ameni.

7 Lolini! Akwiza na makumbi, nupya antu yonsi yalamulola kumwi sile na yaya kwene amutosile; nupya imitundu ya pano nsi yonsi ilaya sana nu ulanda pa mulandu na aliwe. Ameni.

8 Yeova Leza walanda wati: “Nene Aufa nupya Omega* uwayako nupya uwaliko nupya aakwiza, uwa Maka Yonsi.”

9 Ne Yoani umwina winu, nemuno nkaculila pamwi namwe umu macuzi nupya tulaya swensi umu wene nupya tukazizimizya pamwi namwe pa mulandu wa kuya pamwi na Yesu, nali pa cilila icikaamwa ukuti Patimosi pa mulandu wakuti nalandanga pali Leza nu kusimika pali Yesu. 10 Pa mulandu na mazwi yano napokelile kufuma kuli Leza, nizile inja umu wanda wa Mwene, nupya nuvwile izwi likalamba uku nsizi ilyali wa kulila kwi penga, 11 ala likuti: “Ivintu vino walola, vilembe umu lupapulo nu kulutuma uku vilongano vii 7: uku Efeso, ku Similina, ku Pegamu, ku Tiyatila, ku Sadisi, ku Filadefia, nu ku Lodesiya.”

12 Napiliwike pakuti indole uwalandanga nani, lyene naweni ivya kuteekapo ya lampi vyakwe goldi ivili 7, 13 nupya pakasi ka vya kuteekapo ya lampi pali umwi uwakoline nu mwana wa muntu, uwazwite umwingila uwafikanga uku ngazo nupya wazwite ni cisalu cakwe goldi pa cisao. 14 Nupya umutwe wakwe ni nyele vyali ivitiswe wakwe pamba nupya vyali wa usu wa mvula, na manso yakwe yali wa cimbilimbili ca moto, 15 nupya ingazo zyakwe zyayengesanga kwati a koopa aakwengululwa umwi lungu, ni izwi lyakwe lyuvwikanga kwati icongo ca manzi aingi. 16 Nupya walemile intanda 7 ukwi kasa lyakwe ili lunji, nu mu kanwa kakwe mwafumile ulupanga ulutali, ulunyolwe konsi koili, ni cinso cakwe calolekanga kwati ilanzi vino likayengesa kasanya nga kawalisya. 17 Lino namuweni, naponyile pa ngazo zyakwe wa muntu mufwe.

Nawe wisile ikasa lyakwe ili lunji pali nene nu kunena ati: “Utatiina. Nene wa Nkoleelo nupya uwa Kusyalikizya, 18 nupya uwa umi, nafwile, lelo indi nu umi manda pe, nupya nakwata amaki ya mfwa na aku Malindi.* 19 Fwandi lemba ivintu vino iwalola, ni vintu ivikucitika, alino ni vilacitika pa cisila cakwe vii. 20 Lyene inkama yakwe Leza iya ntanda 7 zino walola umwi kasa lyane ili lunji ni vya kuteekapo ya lampi vyakwe goldi ivili 7, ikupiliula vii: Intanda 7 zikupiliula ya malaika ya vilongano 7, ni vya kuteekapo ya lampi ivili 7 vikupiliula ivilongano 7.

2 “Kuli malaika wa ku cilongano ca mu Efeso, lemba uti: Uwalema intanda 7 umwi kasa lyakwe ili lunji nupya aakapita mu vya kuteekapo ya lampi vyakwe goldi ivili 7, walanda wati: 2 ‘Namanya imilimo yako nu kuombesya kwako nu kuzizimizya kwako, nupya usizumilizya antu aakacita iviipe, nupya ukaezya yayo aakati atumwa nomba asi yatumwa nupya wazana ukuti aufi. 3 Nupya ukazizimizya ukwaula ukutoovoka, pa mulandu wi zina lyane. 4 Lelo cino nkuilizyanya pali wewe i cakuti wata ukuya nu kutemwa kuno wakweti pa kutandika.

5 “‘Fwandi iusya ivyalenzile ukuti upone, ulapile nupya uwacita vino wacitanga pa kutandika. Ndi cakuti utalapile, ndakwizila nupya ndiza imfumye ica kuteekapo lampi pano cikaikala. 6 Lelo icazipako kuli wewe i cakuti: wapata imilimo ya kaliumba kakwe Nikolasi ino nani kwene napata. 7 Lekini wino ali na matwi auvwe vino umupasi ukulanda uku vilongano ukuti: Uwacimvya ndamulenga ukuti alye uku muti wa umi, uno waya muli paladaise wakwe Leza.’

8 Nupya kuli malaika wa mu cilongano ca ku Similina lemba uti: ‘Uwa Nkoleelo nupya uwa Kusyalikizya,’ uwafwile nu kuya nu umi nupya, walanda wati: 9 ‘Namanya ucuzi wako nu upiina wako lelo wewe mukankala, nupya namanya ni miponto iya yantu aakalanda ukuti Ayuda lino asi Yayuda lelo i sunagogi lyakwe Satana. 10 Utatiina ucuzi uno wasya ukucitikile. Ciwa alatwalilila ukusumbila yamwi pali mwemwe umu cifungo pakuti mukeziwe sana, nupya mulacula pa manda 10. Lelo mukatwalilile ukuya acumi mpaka ni mfwa, nani ndamupeela icilambu ca umi. 11 Lekini ali na matwi auvwe vino umupasi ukulanda uku vilongano ukuti: Uwacimvya atalafwa uku mfwa yakwe ciili.’

12 “Lembela malaika wa ku cilongano ca mu Pegamu uti: Uwakwata ulupanga ulutali nupya ulunyolwe konsi koili walanda wati: 13 ‘Namanya kuno ukaikala, kuli kuti kuno icilimba ca wene cakwe Satana cayela; lelo watwalilila ukuya uwa cumi ukwi izina lyane nupya utaakanyile ukuntaila nanti sile umu manda yakwe Antipa kambone wane uwa cumi uwakomilwe ala mukulolako, kuko kwene kuno Satana akaikala.

14 “Lelo nkweti ivyeo ivinono ivya kuilizyanya pali wewe, wakwata antu yamwi aakalondela ivisambilizyo vyakwe Balamu, uwasambilizye Balaki ukuleenga ana yakwe Izlaeli ukuyembuka, kuli kuti ukulya ivintu ivikapeelwa uku vilubi nu kucita uzelele.* 15 Nupya umu nzila ili imwi kwene wakwata na aakalondela ivisambilizyo vya kaliumba kakwe Nikolasi. 16 Fwandi lapila. Ndi cakuti utalapiile, ndiza zuwa kuli wewe, nupya ndayalwisya nu lupanga ulutali ulwaya umu kanwa kane.

17 “‘Lekini aali na matwi auvwe vino umupasi ukulanda uku vilongano ukuti: Wensi uwacimvya ndamupeela mana umwi uwafiswa, nupya ndamupeela iwe litiswe, nupya api we lilyo palembwa izina ilipya lino kusi nanti a wenga uwamanya suka sile wiyo akulipokelela.’

18 “Lembela malaika wa mu cilongano ca ku Tiyatila uti: Umwana wakwe Leza uwakwata amanso aaya wa cimbilimbili ca moto nupya wino ingazo zyakwe zyaya wakwe koopa umwengululwe, walanda wati: 19 ‘Namanya imilimo yako nu kutemwa kwako, nu utailo wako, nu mulimo uno ukaombela Leza na vino ukazizimizya, nu kuti ndakai ukaombesya ukucila vino waombanga pa kutandika.

20 “‘Lelo cino nkuilizyanya pali wewe i cakuti, ukazumilizya umwanaci Yezebele, aakalanda ukuti a kasesema mwanaci, nupya akasambilizya nu kuponzya aomvi yane kuti yacita uzelele* nu kulya ivintu ivikapeelwa wa malambo uku vilubi. 21 Nupya namupeezile insita iyakuti alapile, lelo asilonda ukulapila uku uzelele* wakwe. 22 Lola! Indi umupiipi nu kumulwalika nupya aakacita nawe ucende ndayalenga ukucula sana nga yatalapiile kuli vino akayalenga ukucita. 23 Nupya ndakoma ana yakwe uku cinkunka pakuti ivilongano vyonsi vikamanye ukuti nene nkalola umu melenganyo nu mu myenzo ya yantu, nupya mwensi ndamulambula cila muntu ukulingana ni vicitwa vinu.

24 “‘Lelo, nkulanda kuli mwensi mwe ya ku Tiyatila, mwensi mwemuno musilondela icisambilizyo cii, mweyano mutaamanyile “ivisambilizyo vya ufi ivikafuma kuli Satana”: Ntakumutwika icisendo na cuze. 25 Lelo cino mukweti mucilemasye ukufikila lino ndiza. 26 Nupya wensi uwacimvya nu kutwalilila ukucita vino nkalonda ukufika nu ku mpela, ndamupeela maka pa yantu ya mu nsi, 27 nupya alacemela antu uku ntuwa ya cela icakuti yalatamooka wa nyungu izimate, wakwe vino napeelwa amaka ukufuma kuli Tata. 28 Nupya ndamupeela ulutanda lwa katondo. 29 Lekini ali na matwi auvwe vino umupasi ukulanda uku vilongano.’

3 “Kuli malaika wa ku cilongano ca ku Sadisi lemba uti: Vii ali vino uwakwata imipasi 7 yakwe Leza ni ntanda 7 walanda ukuti: ‘Namanya imilimo yako, nanti cakuti wamanyikwa ukuti uli nu umi, wewe mufwe. 2 Ucenjele, nupya ukomye ivintu ivyasyalapo ivyali apiipi nu kufwa, pano nazana ukuti utamalilila imilimo yakwe Leza wane. 3 Fwandi twalilila ukwiusya vino wapokelile na vino uvwile, uwavisunga nupya ulapile. Ndi cakuti utazyusile ndiza wa mupuupu, nupya utalamanya insita ino ndizilapo.

4 “‘Lelo watukwata antu anono umu Sadisi, aatakowizye ivyakuzwala vyao, nupya yalapitila pamwi nani umu vyakuzwala ivitiswe, pano iyalinga. 5 Uwacimvya alazwikwa ivyakuzwala ivitiswe, nupya ntalafuuta izina lyakwe umwi buku lya umi, lelo ndalanda kuli Tata na kuli ya malaika ukuti namanya umuntu wiyo. 6 Lekini wino ali na matwi auvwe vino umupasi ukulanda uku vilongano.’

7 “Kuli malaika uwa mu cilongano ca ku Filadefya lemba uti: Vii avino uwa muzilo walanda, uwa cumi, uwakwata amaki yakwe Devedi, wino nga wayula kusi aakayala nupya nga wayala kusi aakayula, wati: 8 ‘Namanya imilimo yako, nomba lola! Inkuyulila umulyango uno kusi aangayala. Nupya imanya ukuti wakwata amaka anono, nupya ukauvwila mazwi yane nu kutwalilila ukuya uwa cumi ukwi zina lyane. 9 Lola! Ndalenga yayo aya umwi sunagogi lyakwe Satana aakabepa sile ukuti Ayuda lelo asi Yayuda, ukwizakufukamila nu kulenga yamanye ukuti nakutemwa. 10 Pa mulandu wa kuti walondiile izwi pali vino nazizimizye, nani ndakucingilila umu nsita ya wezyo uuliza umu nsi yonsi, nupya ulezya antu aikala pano nsi. 11 Nkwiza likwene. Ulemasye cino ukweti, pakuti kutaya uwa kukupoka icilambu.

12 “‘Uwacimvya ndamulenga ukuya ulucesi umwi tempele lyakwe Leza wane, nupya atalatala afumemo, ndalemba pali aliwe izina lyakwe Leza wane ni zina lya musumba wakwe Leza wane, kuli kuti Yelusalemu mupya aakufuma ukwi yulu kuli Leza wane, alino ni zina lyane ilipya. 13 Lekini ali na matwi auvwe vino umupasi ukulanda uku vilongano.’

14 “Kuli malaika wa ku cilongano ca ku Lodesiya lemba uti: Vii avino Ameni, inte ya cisinka nupya iya cumi, wino Leza watandikilepo ukuumba walanda, wati: 15 ‘Namanya imilimo yako, ukuti utaazuuka nanti ukukaya. Nga cali ningo uzuuka nanti ukaya. 16 Nomba pa mulandu wakuti waya icizunzuwi nupya utaakaya nanti ukuzuuka, ndakuswa. 17 Pa mulandu wakuti ukalanda ukuti, “Nene mukankala nakwata ivyuma nupya nsilondekwa icili consi,” lelo utamanya ukuti wewe mucuzi, mulanda, umupiina, impafu nupya umusizye, 18 nkukupandako mano ukuti ukale kuli nene goldi umwengululwe umu moto pakuti uye umukankala, ni vyakuzwala ivitiswe pakuti uzwale utapita tupu nu kuzewana, alino nu mulembo wa kupaka umu manso pakuti uwalola.

19 “‘Yonsi yano natemwa, nkayasunda nu kuyasalapula. Fwandi uye umucincile nupya ulapile. 20 Lola! Inimilila pa mulyango nkukonkonsya. Ndi cakuti umwi uvwa izwi lyane nu kuyula icisaasa, ndingila umu ng’anda umwakwe nu kuliila pamwi nawe icakulya ca manguzi. 21 Uwacimvya ndalenga ukuti aikale pamwi nani pa cilimba cane ica wene, wakwe vino nani nacimvizye nu kwikala pamwi na Tata pa cilimba cakwe ica wene. 22 Lekini ali na matwi auvwe vino umupasi ukulanda uku vilongano.’”

4 Pa cisila cakwe cii, naweni icisaasa iciyulike umwi yulu, ni izwi lya kutandikilako lino nuvwile likulanda nani lyuvwikanga kwati ukulila kwi penga, ala likuti: “Iza kuno, nani namakulanga ivintu ivili nu kucitika.” 2 Nupya lilyo kwene nizile inja nu mupasi wa muzilo, nupya lolini! icilimba ca wene cali umwi yulu, na umwi watenzipo. 3 Nupya uwatenzipo walolekanga wi we lino yakati jasipa, alino ni iwe lino yakati sadisi,* nupya icilimba ca wene cazingulwikwe nu mulalamfuti uwalolekanga kwati iwe lino yakati emalodi.

4 Icilimba ca wene cazingulwikwe ni vilimba vya wene 24, nupya naweni aikolo 24 yatenzi pa vilimba vivyo ala yazwite imingila itiswe, nupya yazwite ivisote vyakwe goldi uku mitwe. 5 Pa cilimba ca wene pamyantulanga inkuwa nupya puvwikanga mazwi nu kupangalakansya; nupya paali ya lampi 7 aakanga pa nkoleelo ya cilimba ca wene, aakapiliula imipasi 7 yakwe Leza. 6 Ku nkoleelo ya cilimba ca wene, kwali yemba uwalolekanga wi galasi nupya uwayengesanga wi we.

Na pakasi apaali cilimba ca wene alino nu kuzinguluka icilimba kwali iviumbwa vya umi 4 ivyakweti amanso aingi ku nkoleelo nu kwitundu. 7 Iciumbwa ca umi ica kutandikilako calolekanga wakwe cisama, na cakwe ciili calolekanga wakwe cipambasi, cakwe citatu cakweti cinso ca muntu, na cakwe 4 calolekanga wakwe lyang’anda aakupapuka. 8 Nupya iciumbwa conga na conga pa viumbwa kwene vii 4 ivya umi, cakweti amapa 6; nupya mapa yakweti amanso monsi kwene kumwi nu mukasi. Nupya lyonsi kwene umusanya nu usiku vikalanda vikuti: “U wa muzilo, u wa muzilo, u wa muzilo Yeova Leza, uwa Maka yonsi, uwaliko nupya uwayako nupya aakwiza.”

9 Lyonsi lino iviumbwa vya umi vikupeela ululumbi nu mucinzi nu kutaizya kuli wino wikala pa cilimba ca wene, uwaya nu umi manda pe, 10 aikolo 24 yakafukama pa nkoleelo yakwe wino wikala pa cilimba ca wene nu kupepa uwaya nu umi manda pe, nupya yakasumba ivisote vyao pa nkoleelo ya cilimba ca wene ala yakuti: 11 “Walinga we Yeova Leza witu ukupokelela ululumbi nu mucinzi na maka, pano waumvile ivintu vyonsi, nupya pa mulandu nu kulonda kwako walenzile ukuti vyonsi viyeko nu kuumbwa.”

5 Nupya naweni umwi kasa li lunji kuli wino watenzi pa cilimba ca wene ala muli ulupapulo ululembwe konsi koili,* ululematikwe ni vilematikilo 7. 2 Nupya naweni malaika wa maka akupunda ni izwi likulu ati: “A weni uwalinga ukuyula ulupapulo nu kukambatula ivilematikilo?” 3 Lelo kutaali nanti a wenga umwi yulu nanti apano nsi nanti umu musili uwali nu kuyula ulupapulo nanti ukulolamo. 4 Nalizile sana pa mulandu wakuti kutaali nanti a wenga uwalinzile ukuyula ulupapulo nanti ukulolamo. 5 Nomba umwi pa ikolo wanenyile ati: “Leka ukulila. Cisama uwa mu mutundu wakwe Yuda, uwa mu lupwa* lwakwe Devedi, watacimvya, fwandi u watalinga ukuyula ulupapulo nu kukambatula ivilematikilo 7.

6 Nupya naweni Umwana wa Mfwele uwalolekanga kwati wakomilwe, ala aimi pakasi ka cilimba ca wene na pakasi ka vya umi 4 alino na pakasi ka ikolo, wakweti ni mpembe 7 na manso 7, nupya manso 7 yakapiliula imipasi 7 yakwe Leza iyatumwa umu nsi yonsi. 7 Lilyo kwene sile waile asenda ulupapulo ukwi kasa li lunji lyakwe wino wikala pa cilimba ca wene. 8 Lino watozile ulupapulo, ivya umi 4 na ikolo 24 yafukime pa nkoleelo ya Mwana wa Mfwele, nupya cila wino pa ikolo wakweti izeze ni mbale yakwe goldi umwaziile ivinunkile. (Ivinunkile vikupiliula mapepo yakwe yayo amuzilo.) 9 Nupya imbanga ulwimbo ulupya iyati: “Wemo walinga ukutola ulupapulo nu kukambatula ivilematikilo, pano wakomilwe, nupya uku wazi wako akuno wakaliile Leza antu ukufuma umu mitundu yonsi, umu ndimi, mu yantu, nu mu nko, 10 nupya wayalenzile ukuti yaye ya mwene nupya ya simapepo yakwe Leza witu, nupya yalateeka insi.”

11 Nupya naweni nu kuvwa izwi lyakwe ya malaika aingi aazingulwike icilimba ca wene ni viumbwa vya umi na ikolo, nupya impendwa yao yali imintapendwa ni mintapendwa na masauzandi na masauzandi, 12 nupya yapundanga ni izwi likulu iyati: “Umwana wa Mfwele uwakomilwe walinga ukupokelela ukateeka, ukankala, mano, maka, mucinzi, lulumbi, ni paalo.”

13 Nupya nuvwile iviumbwa vyonsi ivya mwi yulu ni vya pano nsi ni vya mu musili na vyonsi ivyaya muli yemba, ala vikuti: “Kuli wino wikala pa cilimba ca wene nu ku Mwana wa Mfwele kuye ipaalo, umucinzi, ululumbi na maka amanda pe.” 14 Iviumbwa ivya umi 4 vyalandanga iviti: “Ameni!” na ikolo yafukime nu kupepa.

6 Nupya lino Umwana wa Mfwele wakambatwile icilematikilo conga pa vilematikilo 7 naweni, nupya nuvwile iciumbwa ca umi conga pa viumbwa 4 ala cikupunda ni izwi ilyuvwikanga wa kupangalakansya kwa nkuwa cikuti: “Iza!” 2 Nupya naweni imfwalasi itiswe nu wakwezilepo wakweti ulapwa; wapeezilwe cisote, nupya waile umu kucimvya nu kumalilila ukucimvya kwakwe.

3 Lino wakambatwile icilematikilo cakwe ciili, nuvwile iciumbwa ca umi cakwe ciili cikuti: “Iza!” 4 Nupya naweni imfwalasi iyenzu ikwiza, nu wakwezilepo wapeezilwe maka ya kufumya umutende pano nsi pakuti antu yakomana, nupya wapeezilwe nu lupanga ulukalamba.

5 Lino wakambatwile icilematikilo cakwe citatu, nuvwile iciumbwa ca umi cakwe citatu cikuti: “Iza!” Nupya naweni imfwalasi itifi nu wakwezilepo walemile ivya kupimilako viili umu minwe. 6 Nuvwile icuvwikanga wi zwi pakasi ka viumbwa vya umi 4 ala cikuti: “Cipimo ca ngano conga pali dinali* wenga ni vipimo vyakwe baale vitatu pali dinali wenga; nupya utonona mafuta ya muolivi na waini.”

7 Lino wakambatwile icilematikilo cakwe 4, nuvwile izwi lya ciumbwa ca umi cakwe 4 ala likuti: “Iza!” 8 Nupya naweni imfwalasi iswepuluke, nu wakwezilepo wakweti izina lyakuti Imfwa. Nupya na Malindi* yamulondelanga, wapeezilwe na maka pa ciputulwa conga ica viputulwa 4 ivya nsi, aakukoma antu ukuomvya ulupanga ulutali, ku cipowe, ku ndwala, alino nu kuomvya ivilyanyi vya mu mpanga.

9 Lino wakambatwile icilematikilo cakwe 5, naweni umwisika lya ulambo uwazi wakwe yano yakomilwe pa mulandu wi zwi lyakwe Leza alino na pa mulandu wa kusimikila. 10 Yapundanga ni izwi likalamba ala yakuti: “We Mwene wa Papelapela, uwa muzilo nupya uwa cumi, uzye u kufika lilaci lino ulapingula nu kulandula pa wazi witu kuli yano ikala pano nsi?” 11 Nupya yonsi wenga na wenga yapeezilwe umwingila utiswe, nupya yanenyilwe ukuti yaloleleko panono, ukufikila lino impendwa yakumana iya yaomvi yauze na ina yao aali apiipi nu kukomwa wakwe vino yene yakomilwe.

12 Nupya lino wakambatwile icilematikilo cakwe 6, naweni kuno icilundumusi icikalamba cikucitika; nupya ilanzi lyafiisile wa cisalu ca kulangilamo ulanda cino yapangila na mavumbu, nu mwezi wasangwike uwazi, 13 nupya intanda zya mwi yulu zyaponyile pano nsi wakwe vino masamvu aisi yakapona uku cimuti ca masamvu ndi cakuti catenkanyiziwa ku cipunga. 14 Ni yulu lyafumilepo wa lupapulo ulukupombwa, ni myamba yonsi kumwi ni vilila vyafumiziwe pano vyayela. 15 Lyene ya mwene ya pano nsi, aalasi, aasilika yakalamba, aakankala, aamaka, aazya, kumwi na antungwa, yafisime umu viwina nu mu vimawe vya mu myamba. 16 Nupya yanenanga imyamba ni vimawe yakuti: “Tuponelini nu kutufisa ku cinso cakwe wino wikala pa cilimba ca wene nu ku ukali wa Mwana wa Mfwele, 17 pano uwanda ukalamba uwa ukali wao iwiza, nupya uzye a weni angapusuka?”

7 Pa cisila cakwe vii, naweni ya malaika 4 yaimi pa makoona 4 aa nsi, yalemile imiza 4 iya nsi, pakuti kutaya umuza uwa kupungila pano nsi, nanti pali yemba nanti pa muti uli onsi. 2 Nupya naweni malaika muze akufuma ukukatunkila ilanzi, wali ni cilematikilo cakwe Leza wa umi; nupya wapunzile ni izwi likalamba kuli ya malaika 4 apeezilwe maka ya konona insi na yemba, 3 ati: “Mutonona insi nanti yemba nanti imiti, kufikila lino twalematika aomvi yakwe Leza ivimanyililo pa vipuma vyao.”

4 Nupya nuvwile impendwa yakwe yano yalematiikwe ivimanyililo, yaali 144,000, aalematiikwe ukufuma umu mitundu yonsi iya yana yakwe Izlaeli aeya:

9 Pa cisila cakwe vii, naweni iumba ilikalamba lino kusi umuntu nanti a wenga aangapenda, lyafumile umu nko zyonsi, umu mitundu, umu yantu nu mu ndimi, nupya yaimi pa nkoleelo ya cilimba ca wene na pa nkoleelo ya Mwana wa Mfwele, ala yazwite imingila itiswe; nupya yalemile imisambo ya tuncindu umu minwe yao. 10 Nupya yapundanga yakuti: “Ipusukilo likafuma kuli Leza witu, uwikala pa cilimba ca wene, nu ku Mwana wa Mfwele.”

11 Ya malaika yonsi iimilile ukuzinguluka icilimba ca wene na ikolo ni viumbwa vya umi 4, nupya yafukime pa nkoleelo ya cilimba ca wene nu kupepa Leza, 12 ala yakuti: “Ameni! Lekini ilumbo, lulumbi, mano, kutaizya, mucinzi, ukateeka na maka viye kuli Leza witu amanda pe. Ameni.”

13 Lyene wenga pa ikolo wanguzizye ati: “Uzye yaa atiyazwala imingila itiswe, aaweni nupya aekwi kuno yafuma?” 14 Lilyo kwene sile namwaswike inti: “Mwene, wewe umanyile.” Nupya wanenyile ati: “Yaa yafuma umu ucuzi ukalamba, nupya yafula imingila yao nu kuilenga ukuya itiswe umu wazi wa Mwana wa Mfwele. 15 Uli mulandu uno yayelile pa nkoleelo ya cilimba cakwe Leza, nupya yakamuombela umusanya nu usiku umwi tempele lyakwe; nu wikala pa cilimba ca wene alavungulula itenti lyakwe pali aliyo. 16 Yataluvwapo inzala nupya nanti ulusala, nanti sile akasanya katalayoca nanti icikailila, 17 pano Umwana wa Mfwele uwaya pakasi ka cilimba ca wene, alayacema nu kuyatungulula uku tufukoka twa manzi ya umi. Nupya Leza alayakumbula minsozi.”

8 Lino wakambatwile icilematikilo cakwe 7, umwi yulu mwali mya pa mamineti mupiipi na 30. 2 Nupya naweni ya malaika 7 aakaimilila pa nkoleelo yakwe Leza, nupya yapeezilwe mapenga 7.

3 Malaika na muze uwalemile ica kocelako ivinunkile cakwe goldi, wizile aimilila pa ulambo, nupya wapeezilwe ivinunkile ivingi pakuti avipeele pa ulambo wakwe goldi uwali pa nkoleelo ya cilimba ca wene lino mapepo ya yantu yonsi amuzilo yuvwisile. 4 Icunsi ca vinunkile ukufuma umu makasa yakwe malaika caile kuli Leza pamwi na mapepo ya yantu ya muzilo. 5 Lelo lilyo kwene malaika watozile ica kocela ivinunkile, nupya wazuzizyemo umoto uwali pa ulambo nu kucisumbila pano nsi. Lyene kwali ukupangalakansya, na mazwi nu kumyantula kwa nkuwa ni cilundumusi. 6 Nupya ya malaika 7 aali na mapenga 7, yaipekanyizye ukuyalizya.

7 Malaika wa kutandikilapo walizizye ipenga lyakwe. Nupya kwali imvula iya mawe nu moto ivisaakane nu wazi, nupya vyasumbiilwe pano nsi; nupya iciputulwa conga pa viputulwa vitatu ivya nsi capiile, ni ciputulwa conga pa viputulwa vitatu ivya miti capiile, ni vimelwa vyonsi iviisi vyapiile.

8 Malaika wakwe ciili walizizye ipenga lyakwe. Nupya cimwi icali wa mwamba ukalamba uukupya casumbiilwe muli yemba. Ni ciputulwa conga pa viputulwa vitatu vyakwe yemba casangwike uwazi; 9 nupya iciputulwa conga pa viputulwa vitatu ivya viumbwa vya umi cafwile, nupya iciputulwa conga pa viputulwa vitatu ivya vimawato cononike.

10 Malaika wakwe citatu walizizye ipenga lyakwe. Nupya ulutanda ulukalamba ulwakanga kwati a lampi lwaponyile ukufuma umwi yulu, lwaponiile pa ciputulwa conga ica pa viputulwa vitatu ivya nguzi na pa tufukoka twa manzi. 11 Ulutanda lulo yakalwama yakuti Ukulula. Nupya iciputulwa conga pa viputulwa vitatu ivya manzi caluzile, nupya antu aingi yafwile uku manzi pa mulandu wakuti yaluzile.

12 Malaika wakwe 4 walizizye ipenga lyakwe. Nupya iciputulwa conga pa viputulwa vitatu ivi lanzi caputwike kumwi ni ciputulwa conga pa viputulwa vitatu ivya mwezi ni vya ntanda, pakuti iciputulwa conga pa viputulwa vitatu ivya vintu vivyo ciye imfinzi na pakuti iciputulwa conga pa viputulwa vitatu ivya musanya ni ciputulwa conga pa viputulwa vitatu ivya usiku vitakwata uluswepo.

13 Nupya naweni nu kuvwa lyang’anda akupapuka umupela sana ala akupunda ni izwi likalamba akuti: “Kalanda, kalanda, kalanda kuli yano ikala pano nsi pa mulandu na mapenga yatatu aasyala yano ya malaika yatatu yasya yalizye!”

9 Malaika wakwe 5 walizizye ipenga lyakwe. Nupya naweni ulutanda ulwaponyile ukufuma ukwi yulu, na maki ya ku ciwina icaula impela yapeezilwe kuli aliwe. 2 Wayuzile iciwina caula impela, nupya icunsi cafumile umu ciwina kwati i cunsi icikufuma umwi lungu ilikalamba, ni lanzi kumwi nu muza vyafiisile pa mulandu ni cunsi kwene icafumile umu ciwina. 3 Nupya ya makanta yafumile mu cunsi nu kwiza pano nsi, nupya yapeezilwe maka, wa maka yano amakalela* ya pano nsi yakwata. 4 Ya makanta yanenyilwe ukuti yatonona isote lya pano nsi nanti icimelwa icili consi nanti umuti uli onsi, suka sile antu aatalematikwa icimanyililo cakwe Leza pa vipuma vyao.

5 Nupya ya makanta yanenyilwe ukuti yatakoma antu yayo, lelo yayacuzye pa myezi 5, nupya kucuzya kuko kwali wakwe viivi kwene vino cikaya ndi cakuti ikalela lyaluma umuntu. 6 Umu manda yayo antu yalalonda imfwa lelo yatalaizana, nupya yalalonda ukufwa, lelo imfwa ilayutuka.

7 Nupya ya makanta yalolekanga wa mfwalasi izyatizipekanyiziwa ukuya uku ulwi; na pa mitwe yao paali ivyalolekanga wa visote vyakwe goldi, ni vinso vyao vyali wa vinso vya yantu, 8 lelo yali ni nyele wa nyele zya yanaci. Nupya amino yao yalolekanga wa mino yakwe ya cisama, 9 nupya yakweti ivya kucinga ivisao kwati i vyacela. Ni ciunda ca kupapuka kwao cali wa ciunda ca mfwalasi izikusimula ukuya uku nkondo ala zikutinta maceleta. 10 Nupya yakweti imisinda iyali nu luoya wa makalela, nupya umu misinda yao mwali amaka ya kucuzya antu pa myezi 5. 11 Yakweti umwene, malaika wa ku ciwina icaula impela. Umu Ciebele akaamwa ukuti Abadoni,* lelo umu Cigiliki akaamwa ukuti Apolyoni.*

12 Ucuzi onga watiupita. Lyene kwasyala amacuzi yaili aakwiza pa cisila cakwe vii.

13 Malaika wakwe 6 walizizye ipenga lyakwe. Nupya nuvwile izwi ukufuma umu mpembe izyali pa ulambo wakwe goldi uwali pa nkoleelo yakwe Leza 14 ala likunena malaika wakwe 6 uwali ni penga likuti: “Sapula ya malaika 4 aanyepwa uku luzi lukalamba ulwa Yufuleti.” 15 Nupya ya malaika 4 apekanyiziwe uku nsita iiyo, nu wanda, nu mwezi, alino nu mwaka, yasapwilwe kuti yakome iciputulwa conga pa viputulwa vitatu ivya yantu.

16 Nuvwile impendwa ya asilika aali pa mfwalasi, yaali 200 milyoni. 17 Nupya imfwalasi zino naweni umu cilolwa kumwi na aakwezilepo vyalolekanga vii: Aakwezile pa mfwalasi yakweti ivya kucinga ivisao iviyenzu, na vyakwe bulu alino na vyakwe yelo, ni mitwe ya mfwalasi yalolekanga wa mitwe yakwe ya cisama, nupya umoto ni cunsi na maluti vyafumanga umu tunwa twa mfwalasi. 18 Iciputulwa conga pa viputulwa vitatu ivya yantu cakomilwe ku vinkunka vii vitatu, ku moto, ku cunsi nu ku maluti ivyafumanga mu tunwa twa mfwalasi. 19 Pano maka ya mfwalasi yayelile umu tunwa nu ku misinda, imisinda yaali kwati inzoka nupya yakweti imitwe, nupya kuli vikwene akuno zyacuzizyanga antu.

20 Lelo antu asyala aatakomilwe ku vinkunka vii, yatalapiile kuli vino yacitanga; yataatile ukupepa iviwa ni vilubi ivyapangwa na goldi, siuva, koopa, mawe alino ni miti, ivisilola nanti ukuvwa nanti ukupita. 21 Nupya yatalapiile ku vicitwa vyao, kuli kuti uku ukomi, uku kutaila imipasi, ku uzelele* alino nu ku upuupu.

10 Nupya naweni malaika na muze uwa maka akufuma umwi yulu, ale ni kumbi ilimuvimbilikizya, nu mulalamfuti wali pa mutwe wakwe, ni cinso cakwe cali wi lanzi, na maulu* yakwe yaali wa ncesi zya moto, 2 walemile kalupapulo kanono kapombololwe. Nupya walyasile ulwazo lwa kwi lunji pali yemba alino ulwazo lwa kuli cimani nalo pa musili, 3 nupya wapunzile ni izwi ilikalamba wakwe vino cisama akang’anza. Nupya lino wapunzile, nuvwile mazwi auvwikanga wa kupangalakansya kwa nkuwa 7.

4 Lino nuvwile amazwi auvwikanga wa kupangalakansya kwa nkuwa 7, nakasi ndembe, lelo nuvwile izwi ukufuma ukwi yulu likuti: “Sunga mazwi yayo umu mwenzo wako, utayalemba.” 5 Malaika wino naweni watalyata pali yemba na pa musili, wakatwisye ikasa lyakwe ilya kwi lunji umupela, 6 nupya walafile umwi zina lyakwe wino waya nu umi manda pe, wino waumvile iyulu ni vintu ivyayamo ni insi ni vintu ivyayamo alino na yemba ni vintu ivyayamo, walafile ati: “Insita ya kuloleela yatisila. 7 Lelo lino malaika wakwe 7 wali umupiipi nu kulizya ipenga lyakwe, inkama yakwe Leza iilyasi lisuma ino walanzile kuli ya kasesema yakwe yafikiliziwe.”

8 Nupya kwene nuvwile izwi ukufuma ukwi yulu ala likunena likuti: “Pitanga ukayule ulupapulo ululi umu minwe yakwe malaika uwatalyata pali yemba na pa musili.” 9 Naile kuli malaika nu kumunena ukuti ampeele kalupapulo kanono. Nawe wanenyile ati: “Tola ulye, nupya umauvwa ukulula umu nda, lelo umu kanwa kamauvwika ukulyompa wa uci.” 10 Natoozile kalupapulo akaali umu minwe yakwe malaika nu kukalya, nupya umu kanwa kalyomfile wa uci, nomba lino nakaliile umunda mwaluzile. 11 Nupya yanenyile iyati: “Nupya kwene ulinzile ukusesema pa yantu, pa nko, pa ndimi na pali ya mwene aingi.”

11 Nupya wampeezile itete ilyali wa kamuti akatali alino anena ati: “Pitanga kapime itempele lyakwe Leza kumwi nu ulambo, nupya ukapende na antu aakapepelamo. 2 Lelo utaya ukapime umusolo uwaya ukunzi yi tempele lyakwe Leza pano wapeelwa uku yantu ya mu nko, nupya yalalyatoola umusumba wa muzilo pa myezi 42. 3 Ndaleenga ya kambone yane yaili ukusesema pa manda 1,260 ala yazwite ivisalu vya kulanga ulanda.” 4 Ya kambone yaa yakwimililwako ni miti ya miolivi iili ni vya kuteekapo ya lampi viili nupya iimilila pa nkoleelo ya Mwene uwa pano nsi.

5 Nupya ndi cakuti umwi akulonda ukuyakoma, umoto ukafuma umu tunwa twao nu konona alwani yao. Nupya ndi cakuti umwi walonda ukuyakoma, vikwene ali vino alinzile ukukomwa. 6 Yaa yakwata maka ya kucilika umwi yulu pakuti kutaya imvula umu manda yano yakusesema, nupya yakwata maka ya kulenga manzi ukuya uwazi nu kuleta ivinkunka ivipusanepusane pano nsi pa nsita ili yonsi ino yakulonda.

7 Lino yalamala umulimo wao uwa kusesema, icilyanyi ca mu mpanga icilafuma umu ciwina icaula impela cilalwa nayo nu kuyacimvya nupya cilayakoma. 8 Nupya ivitumbi vyao vilaya umu museo ukalamba uwa mu musumba ukalamba uukaimililako Sodoma na Ejipti, kuno nu Mwene wao wapoopiilwe pa cimuti. 9 Nupya antu aingi ni mitundu ni ndimi ni inko yalalola ivitumbi vyao pa manda yatatu na afu, nupya yatalaleka kuti viziikwe umu malindi. 10 Nupya antu ya pano nsi yalasansamuka pa vitumbi vivyo nupya yalazevya, yalapeelana ni vya upe, pa mulandu wakuti ya kasesema yaa yaili yacuzyanga antu ya pano nsi.

11 Pa cisila ca manda yatatu na afu, amaka ya umi yafumile kuli Leza nu kwingila muli aliyo, nupya yakatwike nu kwimilila, nupya aaweniko yuvwile sana intete. 12 Nupya yuvwile izwi likulu ukufuma ukwi yulu ala likuti: “Izini kuno.” Nupya yaile umu makumbi, na alwani yao yayaweni. 13 Pa nsita kwene iiya kwali icilundumusi icikalamba, nupya iciputulwa icalenga 10 ica musumba caponyile na antu 7,000 yakomilwe uku cilundumusi, nupya asyala yuvwile intete nu kupeela ululumbi kuli Leza wa kwi yulu.

14 Ucuzi wakwe ciili iupita. Lyene ucuzi wakwe citatu wasya wize.

15 Malaika uwalenga 7 walizizye ipenga lyakwe. Nupya ukwi yulu kuvwisile amazwi akalamba ala yakuti: “Uwene wa muno nsi iuya u Wene wakwe Leza witu na wakwe wino wasoolola ukuya Klistu, nupya Leza alateeka amanda pe.”

16 Nupya aikolo 24 aatenzi pa vilimba vyao ivya wene pa nkoleelo yakwe Leza yafukime nu kupepa Leza, 17 iyati: “Twakutaizya Yeova Leza, uwa Maka Yonsi, uwayako nupya uwaliko, pano watuupoka maka yako aingi nu kutandika ukuteeka. 18 Lelo inko zyasosile, nupya ukali wako wizile, ni nsita isoololwe yafisile iya kupingula afwe nu kupeela icilambu uku yaomvi yako kuli kuti ya kasesema na amuzilo na aakatiina izina lyako, na apiina na akankala, nu konona aakaonona insi.”

19 Nupya incende yakwe Leza iya muzilo iya kwi yulu yayulike, ni mbokosi ya upangano wakwe yalolike umu ncende kwene iiyo iya muzilo. Nupya kwali ukumyantula kwa nkuwa na mazwi yuvwisile nu kupangalakansya ni cilundumusi ni mvula ikalamba iya mawe.

12 Lyene icimanyililo icikalamba calolike umwi yulu: Umwanaci wazwite ivyakuzwala ivyayengesanga wi lanzi, walyasile pa mwezi, wazwite ni cisote ca ntanda 12 ku mutwe, 2 nupya wali ni nda. Nupya walilanga sana pa mulandu nu kuwaika nu kucula sana pa kupaapa.

3 Icimanyililo na cuze calolike umwi yulu. Lolini! Icizoka ciyenzu cali ni mitwe 7 ni mpembe 10 nupya cazwite ni visote 7 ivya wene; 4 nupya cakwesile iciputulwa conga pa viputulwa vitatu ivya ntanda zya mwi yulu ukuomvya umusinda nu kucisumbila pano nsi. Nupya icizoka catwalilile ukwimilila apali umwanaci uwali mupiipi nu kupaapa pakuti nga wapaapa sile cimuliile umwana.

5 Waviile umwana umonsi, uwali nu kucemela inko zyonsi uku ntuwa ya cela. Nupya umwanakwe wasompwilwe nu kutwalwa kuli Leza nu ku cilimba cakwe ica wene. 6 Umwanaci utukiile umu lwanga, ku ncende ino Leza wamupekanyizizye nupya kuno yali nu kumupeela ivyakulya pa manda 1,260.

7 Nupya inkondo yakatwike umwi yulu: Mikaeli* na ya malaika yakwe yalwile ni cizoka, ni cizoka na ya malaika ya ciko yalwile nayo 8 lelo yataacimvizye,* nupya yataakweti ni ncende umwi yulu. 9 Fwandi icizoka cikalamba casumvilwe pansi, icizoka ca pa kutandika, icikaamwa ukuti Ciwa nupya Satana, aakaponzya yonsi aya pano nsi; wasumvilwe pano nsi, nupya na ya malaika yakwe nayo kwene yasumvilwe pamwi nawe. 10 Nuvwile izwi likalamba ukufuma umwi yulu likuti:

“Lyene Leza witu wataleta ipusukilo, nupya maka yakwe iyasokololwa, wataleta nu Wene wakwe nupya Klistu wakwe watatandika ukuteeka, pano aakabepezya aina itu watasumbwa pansi, aakayabepezya kuli Leza umusanya nu usiku! 11 Nayo yamucimvizye pa mulandu nu wazi wa Mwana wa Mfwele na pa mulandu wa mazwi yano yasimikiile, nupya yatatiinanga nu kufwa. 12 Acino sansamukini mwe mayulu na mwemuno mwikalamo! Kalanda uku nsi na yemba, pano Ciwa watasumbwa pali mwemwe, nupya u musoke sana pa kumanya ukuti watasyala sile ni nsita inono.”

13 Lyene lino icizoka caweni ukuti icisumbwa pano nsi, cacuzizye umwanaci uwaviile umwana umonsi. 14 Lelo umwanaci wapeezilwe amaapa yaili yakwe lyang’anda umukalamba, pakuti apapuke nu kuya umu lwanga uku ncende yakwe, kuno wali nu kupeelwa ivyakulya pa nsita yonga ni nsita ziili na afu* pa kumucingilila uku cizoka.

15 Nupya icizoka calusile amanzi kwati uluzi uku nsizi ya mwanaci pakuti amwele umu luzi. 16 Lelo insi yapuswisye umwanaci, insi yasiime nu kumwa manzi yano icizoka calusile. 17 Lyene icizoka casokiile sana umwanaci nupya caile umu kulwa na ana yakwe aasyalapo, aakalondela masunde yakwe Leza nupya akwata umulimo wa kusimikila pali Yesu.

13 Nupya icizoka cimiliile pa mucanga wa muli yemba.

Nupya naweni icilyanyi ca mu mpanga cikufuma muli yemba, cali ni mpembe 10 ni mitwe 7, nupya uku mpembe kwali ivisote vya wene 10, lelo ku mitwe kwali mazina ya miponto. 2 Nupya icilyanyi cino naweni calolekanga wa nangu, lelo ingazo zyalolekanga wakwe zyakwe beele, nu mulomo walolekanga kwati uwakwe cisama. Ni cizoka capeezile icilyanyi amaka ni cilimba ca wene ni nsambu zya kuteeka.

3 Naweni ukuti umutwe onga wali ni cilonda iciipisye, lelo icilonda capozile, na antu yonsi pano nsi yalondiile icilyanyi ca mu mpanga ala yakuzunguka. 4 Nupya yapefile icizoka pano capeezile icilyanyi ca mu mpanga maka, yapefile ni cilyanyi ca mu mpanga ala yakuti: “Uzye a weni uwaya wa cilyanyi cii nupya uzye a weni angalwa naco?” 5 Capeezilwe umulomo uwalandanga ivintu vikalamba nu kuponta, nupya capeezilwe maka ya kuomba pa myezi 42. 6 Nupya catandike ukupontela Leza nu kupontela izina lyakwe na kuno akaikala alino na aikala umwi yulu. 7 Cazumiliziwe ukulwa na amuzilo nu kuyacimvya, nupya capeezilwe maka pa mitundu yonsi na pa yantu na pa ndimi na pa nko. 8 Nupya yonsi akaikala pano nsi yalacipepa. Ukufuma pano insi yaumbilwa, kutaya nanti awenga pali aliyo wino izina lyakwe lyalembwa umu lupapulo lwa umi ulwa Mwana wa Mfwele uwakomilwe.

9 Lekini wensi aali na matwi, auvwe. 10 Ndi cakuti umwi alinzile ukuya umu uzya, alaya umu uzya. Ndi cakuti umwi alakoma nu lupanga,* alinzile ukukomwa nu lupanga. Ukwene uli mulandu uno amuzilo yalinzile ukuzizimizya nu kuya nu utailo.

11 Lyene naweni icilyanyi ca mu mpanga na cuze ala cikufuma pano nsi, nupya cakweti impembe ziili wa mwana wa mfwele, lelo catandike ukuvwanga wa cizoka. 12 Cikaomvya maka yonsi acilyanyi ca kutandikilako ala ni cilyanyi cico cikulolako. Nupya cikalenga insi na iikalamo ukupepa icilyanyi ca kutandikilako, cino icilonda iciipisye capozile. 13 Nupya cikacita ivimanyililo ivikalamba, kumwi sile nu kulenga umoto ukupona ukufuma ukwi yulu ukwiza pano nsi ala na antu yakulolako.

14 Cikaponzya aikala pano nsi, pa mulandu ni vizungusyo vino cazumiliziwe ukucita pa manso ya cilyanyi ca mu mpanga, ala cikunena aikala pano nsi ukupanga icilubi icikolane ni cilyanyi ca mu mpanga icakomilwe ku lupanga lelo icatwalilile ukuya nu umi. 15 Nupya cazumiliziwe ukuti cipeele umupu ku cilubi icikolane ni cilyanyi ca mu mpanga, pakuti cilubi icikolane ni cilyanyi ca mu mpanga cavwanga nu kulenga ukuti yonsi aakukana ukupepa icilubi cico yaakomwa.

16 Cikapatikizya antu yonsi, asuulwe na acindame, akankala na apiina, antungwa na azya, kuti yalinzile ukwikwa ivimanyililo kwi kasa lyao ili lunji nanti pa vipuma vyao, 17 nu kuti kutaya nanti wenga uwa kukala nanti ukukazya suka sile umuntu aakweti icimanyililo, kuli kuti izina lya cilyanyi ca mu mpanga nanti inamba yi zina lya ciko. 18 Uli mulandu uno mano yakalondekelwa: Lekini aali na mano azane upiliulo wa namba ya cilyanyi ca mu mpanga, pano i namba ya muntu, nupya inamba iiyo a 666.

14 Lyene naweni Umwana wa Mfwele aimi pa Mwamba wa Zioni, nupya wali na ya 144,000 yano pa vipuma vyao palemvilwe izina lyakwe na lyakwe Isi. 2 Nuvwile iciunda cikufuma umwi yulu icali wa ciunda ca manzi aingi nupya icali wa ciunda ca kupangalakansya kwa nkuwa; nupya iciunda cino nuvwile cali wakwe cakwe ya kimba akulizya mazeeze yao. 3 Nupya iimbanga ulwimbo ulupya pa nkoleelo ya cilimba ca wene na pa nkoleelo ya viumbwa vya umi 4 na pa nkoleelo ya ikolo, nupya kutaali uwasambilile ulwimbo lulo suka sile ya 144,000, aakazilwe pano nsi. 4 Yaa yatakoweziwepo ku yanaci; nupya yaya wakwe ya nacisungu. Yene yakalondela Umwana wa Mfwele konsi kuno akuya. Yakazilwe ukufuma umu yantu pakuti yaye ivizao vya nkoleelo kuli Leza nu ku Mwana wa Mfwele, 5 nupya yataatazile yalande mazwi ya ufi; yene akaele.

6 Nupya naweni malaika na muze akupapuka umupela sana, wali ni lyasi ilisuma ilya manda pe ilya kusimikila kuli yano ikala pano nsi, nu ku nko zyonsi ni mitundu ni ndimi nu ku yantu. 7 Walandanga ni izwi likalamba ati: “Tiinini Leza nu kumupeela umucinzi, pano insita yakwe iya upinguzi yatifika, fwandi pepini uwaumvile iyulu ni nsi na yemba kumwi nu tufukoka twa manzi.”

8 Lyene kwalondelile malaika wakwe ciili, uwalandanga ati: “Watawa! Babiloni Mukalamba watawa, uwalenzile inko zyonsi ukumwa waini aakalenga yalondesya sana ukucitako uzelele* wakwe!”

9 Nupya malaika wakwe citatu walondelilepo ala akulanda ni izwi likalamba akuti: “Ndi cakuti umwi wapepa cilyanyi ca mu mpanga ni cilubi icikoline naco nupya wazumila ukwikwa icimanyililo pa cipuma nanti kwi kasa lyakwe, 10 alamwa na waini umukalipisye uwa ukali wakwe Leza aalitulwilwa muli kapu wa ukali wakwe Leza, nupya alacuziwa ku moto nu ku maluti pa nkoleelo yakwe ya malaika ya muzilo na pa nkoleelo ya Mwana wa Mfwele. 11 Nupya icunsi icilafuma ku moto ulayacuzya cilaasuuka manda pe, nupya yonsi aakapepa icilyanyi ca mu mpanga ni cilubi icikoline naco na yonsi aakazumila ukwikwa icimanyililo ci zina lya ciko, yatalaapuuza umusanya nu usiku. 12 Ukwene uli umulandu uno amuzilo aakalondela masunde yakwe Leza nupya ataila muli Yesu, yalinzile ukuzizimizya.”

13 Nupya nuvwile izwi ukufuma ukwi yulu likuti, “Lemba uti: Ansansa a yayo akafwila umu Mwene pa nsita kwene yii nu kuya inkoleelo. Umupasi ukuti, kayapuuze ku milimo yao, pano ivintu vino yacisile vikapitila pamwi nayo.”

14 Lyene naweni ikumbi ilitiswe nu wateenzipo walolekanga wa mwana wa muntu, wazwite ni cisote cakwe goldi ku mutwe nupya walemile ni cikwakwa icikalipe.

15 Malaika na muze wafumile umwi tempele ala akupunda ni izwi ilikalamba kuli wino wateenzi pi kumbi ati: “Tola icikwakwa cako nu kutandika kusinza, pano insita ya kusinza yatifika, ivizao vya mu nsi ivica.” 16 Nupya uwateenzi pi kumbi wapisizye icikwakwa umu nsi, ni vizao vya mu nsi vyazombwilwe.

17 Nupya kwene malaika na muze wafumile umwi tempele lya kwi yulu, nawe kwene wali ni cikwakwa icikalipe.

18 Nupya kwene malaika na muze wafumile pa ulambo, wali na maka pa moto. Nupya wapunzile ni izwi ilikalamba kuli wino wali ni cikwakwa icikalipe ati: “Tola icikwakwa cako nu kukolonganika imyanzi ya myangazi ya pano nsi, pano ivizao vya myangazi ivica.” 19 Malaika wapisizye icikwakwa pano nsi nu kukolonganika imyangazi ya pano nsi, nupya waisumbiile umu ca kufenelamo imyangazi cikalamba ica ukali wakwe Leza. 20 Imfwalasi zyalyatozile imyangazi kunzi ya musumba, nupya uwazi uwafumile pa ncende iiyo wafisile nu ku mitwe ya mfwalasi nupya wakonkolwike umupiipi na makilomita 300.

15 Nupya naweni icimanyililo na cuze umwi yulu, icikalamba nupya ica kuzungusya, kuli kuti ya malaika 7 ala yali ni vinkunka 7. Ivinkunka vii i vya kusyalikizya, pano lino vilasila ale nu ukali wakwe Leza kwene wasila.

2 Nupya naweni icalolekanga wakwe yemba wi galasi icuminkine nu moto, na aacimvizye icilyanyi ca mu mpanga ni cilubi icakoline naco ni namba yi zina lya ciko, ala yaimi mupiipi na yemba wiyo, yalemile na mazeeze yakwe Leza. 3 Imbanga ulwimbo lwakwe Mose umuomvi wakwe Leza nu lwimbo lwa Mwana wa Mfwele, ala yakuti:

“Imilimo yako iikalamba nupya i yakuzunguka we Yeova Leza wa Maka Yonsi. Nupya vino ukacita i vilungame nupya ivya cumi, we Mwene uwa manda pe. 4 Pa mulandu wakuti wewe sile wenga waya uwa cumi, uzye a weni aatalakutiina we Yeova nu kucindika izina lyako? Pano inko zyonsi ziliza nu kupepa wewe, pa mulandu wakuti masunde yako aalungame yasokololwa.”

5 Pa cisila cakwe vii, naweni incende ya muzilo iyi tenti lyakwe kambone yayulika umwi yulu, 6 nupya ya malaika 7 aali ni vinkunka 7 yafumile umu ncende ya muzilo ala yazwite ivya kuzwala ivisuma, iviyengese nupya ale iyapomba ni nsalu zyakwe goldi pa visao vyao. 7 Lyene iciumbwa conga pa viumbwa vya umi 4 capeezile ya malaika 7 imbale zyakwe goldi 7 izyazilemo ukali wakwe Leza, wino wayako manda pe. 8 Nupya umu ncende ya muzilo mwazuzile icunsi pa mulandu nu lulumbi lwakwe Leza alino na pa mulandu na maka yakwe, nupya kutaali nanti a wenga uwali nu kwingila umu ncende ya muzilo ukufikila lino ivinkunka 7 vyakwe ya malaika 7 vyasila.

16 Nupya nuvwile izwi likalamba ukufuma umu ncende ya muzilo likunena ya malaika 7 iliti: “Yangini mukitile ukali wakwe Leza umu nsi uuli umu mbale 7.”

2 Malaika wa kutandikilako wapisile aya aitila ivyali umu mbale yakwe umu nsi. Nupya antu aakweti icimanyililo ca cilyanyi ca mu mpanga na apepanga icilubi icakoline naco, yalwile ivilonda iviwaye nupya iviipisye.

3 Malaika wakwe ciili nawe witiile ivyali mu mbale yakwe muli yemba. Na yemba wasangwike uwazi uwali kwati uwa muntu umufwe, ni vya umi vyonsi ivyali muli yemba vyafwile.

4 Malaika wakwe citatu nawe witiile ivyali umu mbale yakwe umu nguzi nu mu tufukoka twa manzi. Nupya manzi yasangwike uwazi. 5 Nuvwile malaika uwakweti amaka pa manzi akuti: “Wemuno wayako nupya wemuno waliko, we wa cumi, wewe mulungami, pano watuleta upinguzi uu, 6 pa mulandu wakuti yazwisizye uwazi wa yantu ya muzilo na wakwe ya kasesema, nupya watuyapeela uwazi kuti yamwe; iciyalinga.” 7 Nupya nuvwile izwi ukufuma pa ulambo likuti: “We Yeova Leza wa Maka Yonsi, upinguzi wako u wa cumi nupya uulungame.”

8 Malaika wakwe 4 nawe witiile ivyali umu mbale yakwe api lanzi, nalyo lyazumiliziwe ukoca antu uku cikailila. 9 Nupya antu yaapiile ku cikailila icikalamba, lelo yapontiile izina lyakwe Leza, uwali na maka pa vinkunka vivyo, nupya yataalapiile nu kumucindika.

10 Malaika wakwe 5 nawe witiile ivyali umu mbale yakwe pa cilimba ca wene ica cilyanyi ca mu mpanga. Nupya uwene wa ciko wasangwike imfinzi, yatandike nu kulumoola indimi zyao pa mulandu nu kuvwa ukali, 11 lelo yapontiile Leza wa kwi yulu pa mulandu nu kuvwa ukali na pa mulandu wa vilonda, nupya yataalapiile ku vicitwa vyao.

12 Malaika wakwe 6 nawe witiile ivyali umu mbale yakwe umu luzi ulukalamba ulwa Yufuleti, nupya manzi aalimo yaakamile, pakuti ya mwene yangakwata apa kupita ukufuma ukukatunkila ilanzi.

13 Nupya naweni imipasi ikowele itatu iyalolekanga wakwe ya cula ikufuma umu kanwa ka cizoka nu mu kanwa ka cilyanyi ca mu mpanga alino nu mu kanwa kakwe kasesema wa ufi. 14 Ikwene ali mipasi ya viwa iikacita ivizungusyo, nupya iikaya kuli ya mwene yonsi aya pano nsi, ku kuyakolonganika uku nkondo iya pa wanda ukalamba wakwe Leza wa Maka Yonsi.

15 “Lolini! Nkwiza wa mupuupu. Uwa nsansa a wiyo umuiteyanye nupya aakasunga ivyakuzwala vyakwe, pakuti atapita tupu nu kuzewana uku yantu.”

16 Nupya imipasi ikowele yakolonganike ya mwene uku ncende iikaamwa umu Ciebele ukuti Amagedoni.*

17 Malaika wakwe 7 nawe witiile ivyali umu mbale yakwe umu muza. Nupya lilyo kwene kuvwisile izwi likalamba ukufuma umu ncende ya muzilo uku cilimba ca wene ala likuti: “Lyene casila!” 18 Nupya kwali ukumyantula kwa nkuwa na mazwi nu kupangalakansya, nupya kwali icilundumusi icikalamba icitatala cayako ukufuma pano antu yayela pano nsi, icilundumusi cico cali sana na maka nupya cali icikulu sana. 19 Umusumba ukalamba wankanikine patatu, ni misumba iya mu nko yawile; nupya Leza wiwisye Babiloni Mukalamba nu kumumwesya kapu wakwe waini umwazuzile ukali wakwe. 20 Nupya ivilila vyonsi vyutwike, ni myamba yatiile ukuloleka. 21 Lyene imvula ya mawe yafumile ukwi yulu nu kutoonyezya pa yantu, nupya iwe lyonga lyafinanga mupiipi na makilogalamu 20, nupya antu yapontiile Leza pa mulandu ni cinkunka ca mawe, pano icinkunka cico ciipisye sana.

17 Malaika wenga pali ya malaika 7 aakweti imbale 7 wizile nu kunena ati: “Iza, nani namakulanga upinguzi uuliza pali cizelele mukalamba uwikala pa manzi aingi, 2 wino ya mwene ya pano nsi yacisile uzelele* nawe nupya antu ya pano nsi yakolike waini wa uzelele* wakwe.”

3 Nupya wansenzile mu maka ya mupasi aantwala umu lwanga. Lyene naweni umwanaci atenzi pa cilyanyi ciyenzu ica mu mpanga icakweti mazina ya miponto aingi nupya icakweti imitwe 7 ni mpembe 10. 4 Umwanaci wazwite ivyakuzwala iviyenzulukile, nupya waiyemvizye na goldi na mawe ya mutengo, walemile na kapu yakwe goldi iyazilemo ivintu vya winyi ni vikowele ivya uzelele* wakwe. 5 Pa cipuma cakwe palemvilwe izina lya nkama ilyakuti: “Babiloni Mukalamba nyina wakwe ya cizelele nu wa vintu vya winyi ivya pano nsi.” 6 Nupya naweni ukuti umwanaci wakolike uwazi wa yantu ya muzilo nu wazi wakwe ya kambone yakwe Yesu.

Lino namuweni nazungwike sana. 7 Lyene malaika wanenyile ati: “U mulandu ci uno wazungukila? Nimakunena inkama ya mwanaci ni nkama ya cilyanyi icati cimusenda icikweti imitwe 7 ni mpembe 10: 8 Icilyanyi ca mu mpanga cino watulola caliko pa kutandika, lelo cizile icita ukuloleka, nomba casya cice cifume umu ciwina icaula impela nu kononwa. Antu aikala umu nsi yano mazina yao yatalembwa umu lupapulo lwa umi kufuma pano insi yaumbiilwe, yalazunguka lino yalalola icilyanyi ca mu mpanga icaliko pa kutandika, nupya icizile cita ukuloleka, cayako nupya.

9 “Cikalondekwa mano pakuti umwi ailuke ivintu vii: Imitwe 7 ikapiliula imyamba 7 ino mwanaci wikalapo. 10 Nupya kuli ya mwene 7: Aali 5 yafumiziwapo, wenga apano acili nu muze nawe atatala wiza; lelo lino aliiza, alikalako sile pa nsita inono. 11 Nupya icilyanyi ca mu mpanga icaliko lelo icitayako, naco kwene u mwene uwalenga 8, lelo cafuma muli ya mwene 7, nupya cilononwa.

12 “Impembe 10 zino watulola zikupiliula ya mwene 10 aatali yapeelwe uwene, lelo yapeelwa maka ya kuya ya mwene api awala lyonga pamwi ni cilyanyi ca mu mpanga. 13 Ya mwene yaa yaya ni pange lyonga, fwandi yakapeela maka ni nsambu zyao izya kuteeka uku cilyanyi ca mu mpanga. 14 Yalalwa nu Mwana wa Mfwele, lelo vino Umwana wa Mfwele u Mwene wakwe ya mwene nupya a Kateeka wakwe ya kateeka, alayacimvya. Nupya yayo aaya pamwi nawe, aamwa nupya asoololwe nupya acumi nayo kwene yalacimvya.”

15 Malaika wanenyile ati: “Manzi yano watulola, apatipikala cizelele, yakupiliula antu na maumba, ni nko ni ndimi. 16 Nupya impembe 10 zino watulola alino ni cilyanyi ca mu mpanga, vilapata cizelele nupya vilamupoka vyonsi nu kumusya tupu, nupya vilalya umwili wakwe nu kumoca wensi umu moto. 17 Pano Leza wiika ipange lyakwe umu myenzo yao pakuti yafikilizye ipange lyakwe ukupitila umu kupeela uwene wao ku cilyanyi ca mu mpanga, kufika lino mazwi yakwe Leza yalafikiliziwa. 18 Nupya umwanaci wino watulola, akupiliula umusumba ukalamba uwakwata maka pali ya mwene ya pano nsi.”

18 Pa cisila cakwe vii, naweni malaika na muze ala akufuma umwi yulu na maka sana, nupya insi yayengesile pa mulandu nu lulumbi lwakwe. 2 Nupya wapunzile ni izwi lya maka ati: “Watawa! Babiloni Mukalamba watawa, nupya wataya ali ncende umwakwikala iviwa nu mwakwikala imipasi yonsi ikowele ni vyunyi vyonsi ivikowele! 3 Pano pa mulandu na waini uwakulondesya ukucitako uzelele* wakwe, inko zyonsi zyakoleka, nupya ya mwene ya mu nsi yacisile nawe uzelele, na aculuzi amu nsi izile iyakwata sana ivyuma ukupitila mu vintu vya mutengo ivingi vino wakwata ukwaula insonyi.”

4 Nupya nuvwile izwi na lyuze ukufuma umwi yulu likuti: “Fumini muli aliwe mwe yantu yane, nga musikulonda ukucitako imembu zyakwe, nupya nga musikulonda ukuculako uku vinkunka iviliza pali aliwe. 5 Pano imembu zyakwe izitulumana ukufika umwi yulu, nupya Leza wataiusya ivicitwa vyakwe iviipe. 6 Iviipe vino wacitiile auze, wene mumucitile imiku iili, na waini wino wamwesyanga auze, wene mumumwesye umukalipisye ukucila pali wino wamwesyanga auze. 7 Wakwe vino waicindamike nu kwikala imikalile ya usambazi ukwaula insonyi, avino mumucuzye nu kumulenga ukuloosya. Pano akatwalilila ukulanda umu mwenzo wakwe ati: ‘Nkaikala wakwe namwene, nupya asi nene mukamfwilwa, nupya ntalatala ndoosye.’ 8 Uli mulandu uno ivinkunka vilamuponela umu wanda onga, kuli kuti imfwa nu kuloosya ni cipowe, nupya alocewa wensi umu moto, pano Yeova Leza uwamupingula u wa maka.

9 “Nupya ya mwene ya muno nsi aacisile nawe uzelele* nu kuilyokezya pamwi nawe imikalile ya usambazi ukwaula insonyi, yalaloosya nu kuya sana nu ulanda lino yalalola icunsi cikusuuka kuno akupya. 10 Yalimilila katalamukila pa mulandu nu kutiina ukucuziwa wakwe aliwe nu kulanda iyati: ‘Caipa sana, caipa sana, we musumba ukalamba, Babiloni we musumba wa maka, pano upinguzi wako wafika umwi awala sile lyonga!’

11 “Nupya aculuzi ya mu nsi yakulila impooma nu kumuloosya, pano kusi uwa kukala iviya vyao, 12 iviya vyakwe goldi, vyakwe siuva, mawe ya mutengo, insalu izisuma, insalu iziyenzulukile, insalu izitelepe, ni insalu iziyenzu; na vyonsi ivyapangilwa uku miti inunkile; na vyonsi ivyapangilwa uku mino ya nzovu, nu kumiti ya mutengo, kuli koopa, icela, nu ku mawe asuma; 13 na sinamoni, masipaisi ya ku India, ivinunkile, mafuta anunkile, ubani, waini, mafuta ya muolivi, fulaulo isuma, ingano, ing’ombe, imfwele, imfwalasi, ivikocikala, azya, na antu yauze. 14 Ivizao ivisuma vino wemo walondesyanga ivisila, ni vyakulya vyonsi ivisuma ni vintu vya mutengo ivisila, nupya utalatala uvizane.

15 “Aculuzi aakazyanga ivintu vii, aizile iyakwata ivyuma kufuma kuli aliwe, yalimilila katalamukila pa mulandu nu kutiina ukucuziwa wakwe aliwe nupya yalalila impooma nu kuloosya, 16 iyati: ‘Caipa sana, caipa sana, ku musumba ukalamba, uwazwala ivyakuzwala ivisuma, iviyenzulukile, nupya iviyenzu, uwaiyemvya ni viyembelo vyakwe goldi alino na mawe ya mutengo, 17 pano ivyuma ivingi vyapokwa umwi awala sile lyonga!’

“Nupya kapitao ali wensi uwa wato, nu muntu ali wensi aakapita sana nu wato na ya kapisya ya wato alino na yonsi akazanila uwikazi wao pali yemba iimiliile katalamukila, 18 nupya yapundanga ala yakulola icunsi cikusuuka lino akupya nu moto iyati: ‘U musumba ci uwaya wa musumba ukalamba?’ 19 Yasumbanga ulukungu pa mitwe yao ala yakupunda, yalilanga impooma nu kuloosya ala yakuti: ‘Caipa sana, caipa sana, ku musumba ukalamba, muno yonsi aakweti mawato pali yemba yakwatiile ivyuma ukupitila umu vyuma vyakwe, pano wataononwa umwi awala sile lyonga!’

20 “Sansamukini pa mulandu wakwe, mwemuno mwaya umwi yulu, na mwe ya muzilo, na atumwa na ya kasesema, pano Leza wataleta upinguzi pali aliwe pa mulandu winu!”

21 Nupya malaika wa maka wakatwisye iwe ilikalamba ilili wi we lya kusiila nu kulisumbila muli yemba, alanda ati: “Vikwene avino Babiloni umusumba ukalamba ulatamwa pansi, nupya utalatala uloleke. 22 Nupya iciunda cakwe ya kalizya ya mazeeze, cakwe ya kimba ya nyimbo, cakwe ya kalizya ya mitolilo na cakwe ya kalizya ya mapenga vitalatala vyuvwike muli wewe nupya. Na aacenjela umu vya kupangapanga aakacita uculuzi yatalatala yazanwe muli wewe, nupya iciunda ci we lya kusiila citalatala cuvwike muli wewe. 23 Kusi uluswepo lwakwe lampi ululakozya muli wewe nupya, ni izwi lyakwe siwinga na nawinga litalatala lyuvwike muli wewe nupya; pano aculuzi yako yaali aonsi aakweti ivifulo vya papela pano nsi, nupya waponzizye inko zyonsi pa mulandu wakuti wacitanga ivya maleele. 24 Muli aliwe mwazanyilwe uwazi wakwe ya kasesema na amuzilo na wakwe yonsi akomilwe pano nsi.”

19 Pa cisila cakwe vii nuvwile izwi likalamba kwati izwi li umba ilikalamba umwi yulu. Lyatangi: “Lumbanyini Jah!* Ipusukilo nu lulumbi na maka i vyakwe Leza witu, 2 pano upinguzi wakwe u wa cumi nupya uulungame. Watapingula cizelele mukalamba uwakowizye insi ku uzelele* wakwe, nupya watalandula pa wazi wa yaomvi yakwe uwaya umu minwe yakwe cizelele.” 3 Nupya lilyo kwene iumba lyalanzile umuku wakwe ciili iliti: “Lumbanyini Jah!* Icunsi icikufuma pa musumba wa Babiloni cilatwalilila manda pe.”

4 Nupya aikolo 24 ni viumbwa vya umi 4 vyafukime nu kupepa Leza uwikala pa cilimba ca wene iviti: “Ameni! Lumbanyini Jah!”*

5 Nupya izwi lyafumile uku cilimba ca wene iliti: “Lumbanyini Leza mwe yaomvi yakwe mwensi, mweyano mukamutiina, mwe yasuulwe na acindame.”

6 Nuvwile ni izwi kwati izwi li umba ilikalamba nupya wa ciunda ca manzi aingi nupya wa ciunda ca kupangalakansya ukukalamba. Lyatangi: “Lumbanyini Jah,* pano Yeova Leza witu uwa Maka Yonsi, watatandika ukuteeka! 7 Lekini tusansamuke sana nu kumupeela umucinzi, pano uwinga wa Mwana wa Mfwele iufika na nawinga wakwe wataipekanya. 8 Watazumiliziwa ukuzwala ivyakuzwala ivitiswe, ivya usaka, nupya ivisuma, pano ivyakuzwala ivisuma vikapiliula imilimo ilungame iya yantu ya muzilo.”

9 Nupya wanenyile ati, “Lemba uti: Ansansa a yayo yano yaamwa uku mutebeto wa winga uwa Mwana wa Mfwele.” Nupya wanenyile nu kuti: “Yaa a mazwi acumi yakwe Leza.” 10 Lilyo kwene nafukime pa nkoleelo yakwe pakuti imupepe. Lelo wanenyile ati: “Awe utacita vivyo! Nene muzya sile wakwe wewe kwene na ina yako aakwata umulimo wa kusimikila pali Yesu. Pepa Leza! Pano masesemo yakalanda icumi pali Yesu.”

11 Naweni iyulu lyayulika, indola ni mfwalasi itiswe. Uwakwezilepo akaamwa ukuti uwa Cisinka nupya uwa Cumi, nupya akapingula nu kulwa inkondo umu ulungami. 12 Amanso yakwe yaali wa cimbilimbili ca moto, nupya wazwite ivisote vya wene ivingi uku mutwe. Pali aliwe palemvilwe izina lino kusi uwamanyile suka sile aliwe, 13 nupya wazwite icakuzwala icakandine* uwazi, akaamwa nu kuti Izwi lyakwe Leza. 14 Nupya asilika amwi yulu yamulondelanga pa mfwalasi zitiswe, yaazwite ni vyakuzwala ivitiswe, ivya usaka, nupya ivisuma. 15 Mu kanwa kakwe mwafumile ulupanga ulukalipe, nupya ulutali ulwa kukomelako inko, nupya alazicemela uku ntuwa ya cela. Nupya alalyatoola umu ca kufenelako waini cakwe Leza wa Maka Yonsi icikaimililako ukali wakwe ukalamba. 16 Pa cakuzwala cakwe pa lupamba palemvilwe izina ilya kuti, Kateeka wakwe ya kateeka nupya Umwene wakwe ya mwene.

17 Nupya naweni malaika aimi pi lanzi, wapunzile ni izwi likalamba nu kunena ivyunyi vyonsi ivikapapuka umupela sana ati: “Izini kuno, kolonganini uku mutebeto ukalamba wakwe Leza, 18 pakuti mulye imili yakwe ya mwene ni mili ya yakalamba ya yasilika ni mili ya yantu amaka ni mili ya mfwalasi na akwelapo, ni mili ya yantu yonsi, ni mili ya yantungwa na azya alino ni mili ya yantu asuulwe na acindame.”

19 Nupya naweni icilyanyi ca mu mpanga na ya mwene ya pano nsi na asilika yao iyakolongana ku kulwa nu wakwela pa mfwalasi nu kulwa na asilika yakwe. 20 Icilyanyi ca mu mpanga calemilwe kumwi na kasesema wa ufi uwacitanga ivizungusyo pa nkoleelo ya cilyanyi nu kuponzya aazumile ukwikwa icimanyililo ca cilyanyi ca mu mpanga na yayo aapefile icilubi icakoline naco. Lino icilyanyi ca mu mpanga na kasesema wa ufi vicili nu umi, vyasumbiilwe muli yemba wa moto uwapyanga na maluti. 21 Lelo aasyala yakomilwe uku lupanga ulutali ulwafumile umu kanwa kakwe wino wakwela pa mfwalasi. Nupya ivyunyi vyonsi vyaliile nu kwikuta imili yao.

20 Nupya naweni malaika akufuma umwi yulu ala ali na maki aku ciwina icaula impela nupya wakweti ceni umukalamba umu minwe yakwe. 2 Walemile cizoka, icizoka ca pa kutandika, icikaamwa ukuti Ciwa nupya Satana, nupya wacinyefile pa myaka 1,000. 3 Nupya wacisumbiile umu ciwina caula impela nu kuyalapo nu kwikapo icimanyililo, pakuti citaponzya nupya antu ya mu nsi kufikila imyaka 1,000 isile. Pa cisila cilasapulwa pa nsita inono.

4 Nupya naweni vilimba vya wene, na atenzipo yapeezilwe amaka ya kupingula. Naweni aakomilwe* pa mulandu wa kusimikila pali Yesu nu kulanda pali Leza, na yayo aatapefileko icilyanyi nanti icilubi icakoline naco, nupya aatisilwe icimanyililo pa vipuma vyao na pa makasa yao. Nupya izile iyaya nu umi nu kuteeka pamwi na Klistu pa myaka 1,000. 5 (Afwe aasyala yatizile iyaya nu umi kufikila lino myaka 1,000 yasila.) Kuu ali kutuutululwa kwa kutandikilako. 6 Ansansa nupya amuzilo a yayo alatandikilapo ukutuutululwa; pa yantu yaa imfwa yakwe ciili itakweti amaka, lelo yalaya ya simapepo yakwe Leza na yakwe Klistu nupya yalateeka nawe pa myaka 1,000.

7 Lyene lino imyaka 1,000 ilasila sile, Satana alasapulwa ukufuma umu cifungo, 8 nupya alaya umu kuponzya inko umu ntunga 4 izya nsi, kuli kuti Gogi na Magogi pakuti ayakolonganike uku nkondo. Icipendo ca yantu yayo cilaya wa mucanga wa mu mbali yakwe yemba. 9 Nupya yaile umu nsi yonsi nu kuzinguluka inkambi ya yantu ya muzilo nu musumba uwatemwikwa. Lelo umoto waponyile ukufuma ukwi yulu nu kuyoca. 10 Nupya Ciwa uwayaponzyanga wasumbiilwe muli yemba wa moto na maluti, umwali icilyanyi na kasesema wa ufi; nupya yalatwalilila ukucuziwa umusanya nu usiku amanda pe.

11 Nupya naweni icilimba ca wene icitiswe icikalamba alino nu watenzipo. Insi ni yulu vyutwike ukufuma kuli aliwe, nupya vitazanyile incende apa kwikala. 12 Nupya naweni afwe, aacindame na asuulwe, ala iimilila pa nkoleelo ya cilimba ca wene, ni mpapulo zyapombolwilwe. Lelo kwali ulupapulo na luze ulwapombolwilwe, lwali u lupapulo lwa umi. Afwe yapingwilwe ukulingana na vino yacitanga ivyalemvilwe umu mpapulo. 13 Nupya yemba wafumizye afwe alimo, ni mfwa na Malindi* navyo vyafumizye afwe alimo, nupya yapingwilwe cila muntu ukulingana ni milimo yakwe. 14 Nupya imfwa na Malindi* vyasumbiilwe muli yemba wa moto. Yemba wa moto akapiliula imfwa yakwe ciili. 15 Nupya wensi uwazanyilwe ukuti atalemvilwe umwi buku lya umi, wasumbiilwe muli yemba wa moto.

21 Nupya naweni iyulu ilipya ni nsi ipya; pano iyulu lya mpiti ni nsi ya mpiti ala ivifumapo, kutaali yemba nupya. 2 Nupya naweni umusumba wa muzilo, kuli kuti Yelusalemu Mupya, ukwika ukufuma ukwi yulu kuli Leza ala iupekanyiziwa kwati a nawinga uwataemviwa aakuloleela siwinga. 3 Lyene nuvwile izwi likalamba ukufuma uku cilimba ca wene likuti: “Lolini! Itenti lyakwe Leza lili pamwi na antu, nupya alikala pamwi nayo, nayo yalaya antu yakwe. Nupya Leza umwineco alaya pamwi nayo. 4 Nupya alayakumbula aminsozi yonsi, kutalaya imfwa, kutalaya ukuloosya nanti ukulila nanti ukuvwa ukuwaika. Ivintu vya mpiti vyativipita.”

5 Nupya uwikala pa cilimba ca wene walanzile ati: “Lolini! Nkupanga ivintu vyonsi ukuya ivipya.” Walanzile nu kuti: “Lemba, pano mazwi yaa aacisinka nupya acumi.” 6 Nupya wanenyile ati: “Ivifikiliziwa! Nene Aufa nupya Omega,* uwa kutandikilapo nupya uwa kusyalikizya. Wensi aali nu lusala ndamupeela kafukoka ka manzi ya umi, uwila sile. 7 Wensi uwacimvya alapokelela ivintu vii, nupya ndaya Leza wakwe nawe alaya umwanane. 8 Lelo antu ya ntete na aataya nu utailo na akacita ivya winyi, inkomi na akacita uzelele* na akacita ivya maleele na akapepa ivilubi na yonsi aufi, yalasumbilwa muli yemba aakupya nu moto na maluti. Cii cikupiliula imfwa yakwe ciili.”

9 Malaika wenga pali ya malaika 7 aakweti imbale 7 umwali ivinkunka 7 ivya kusyalikizya wizile nu kunena ati: “Iza, nani namakulanga nawinga, umuci wa Mwana wa Mfwele.” 10 Wansenzile umu maka ya mupasi uku mwamba ukalamba nupya utali, lyene wandanzile Yelusalemu umusumba wa muzilo ala ukwika ukufuma ukwi yulu kuli Leza 11 nupya ala uli nu lulumbi lwakwe Leza. Wayengesanga wi we lya mutengo sana, nupya wayengesanga wi we lino yakati jasipa ilikaloleka wi galasi. 12 Wakweti ciumba icikalamba nupya icitali nupya wakweti impongolo 12 na ya malaika 12 yaali pa mpongolo kwene zizyo, nupya pa mpongolo palemvilwe mazina amitundu 12 iya yana yakwe Izlaeli. 13 Uku ufumondaka kwali impongolo zitatu, nu ku katutu kwali impongolo zitatu, nu ku kaeya kwali mpongolo zitatu nu ku uwondaka nako kwali mpongolo zitatu. 14 Iciumba ca musumba cakweti ni mifula ya mawe 12, nupya pa mifula iiyo paali mazina 12 ayatumwa 12 a Mwana wa Mfwele.

15 Lyene uwalandanga nani walemile itete lyakwe goldi ilyali wa cipimilo ilyakuti apimile umusumba, impongolo zya musumba, alino ni ciumba ca musumba. 16 Nupya umusumba walingine umu utali nu mu kusalala. Nupya malaika wapimile umusumba ni itete, wali umupiipi na makilomita 2,220; umu utali nu mu kusalala nu mu kusanzama* wali icili cimwi. 17 Nupya wapimile iciumba ca musumba, cakweti amamita umupiipi na 64 ukulingana nu kupima kwa muntu, nupya malaika waomvizye icipimo kwene cino umuntu akaomvya. 18 Iciumba cakuuzilwe na mawe yakwe jasipa, nupya umusumba wakuuzilwe ukuomvya goldi umwengululwe aakaloleka wi galasi. 19 Imifula ya ciumba ca musumba yaemviwe na mawe amutengo apusanepusane: umufula wa kutandikilako waemviwe na mawe yano yakati jasipa, wakwe ciili safilo, wakwe citatu kalikedoni, na wakwe 4 emalodi, 20 mufula wakwe 5 sadonikisi, wakwe 6 sadyasi, wakwe 7 kilisoliti, wakwe 8 beliu, wakwe 9 topazi, wakwe 10 kilisopulezi, wakwe 11 yakinti, wakwe 12 ametusiti. 21 Nupya impongolo 12 zyakweti mawe ya mutengo 12; cila mpongolo yapangiilwe ni iwe lyonga ilya mutengo. Nu museo ukalamba uwa mu musumba wapangiilwe na goldi umwengululwe, akaloleka wi galasi.

22 Ntawenimo itempele, pano Yeova Leza wa Maka Yonsi ali tempele lya musumba, nu Mwana wa Mfwele nawe kwene i tempele lya musumba. 23 Nupya umusumba utalondekwanga uluswepo lwi lanzi nanti uluswepo lwa mwezi, pano ululumbi lwakwe Leza u lwaswefizye umusumba, nupya Umwana wa Mfwele wali ali lampi wa musumba. 24 Nupya antu ya mu nko yalapita umu luswepo lwa musumba, na ya mwene ya pano nsi yalaleta ululumbi lwao umu musumba. 25 Mpongolo zya musumba zitalaayalwa pano kutalaya usiku. 26 Ululumbi nu mucinzi ivya yantu ya mu nko vilaletwa umu musumba. 27 Lelo icikowele icili consi nu muntu ali wensi aakacita ivya winyi ni vya ucenjezi atalingilamo; suka sile yano yalembwa umu lupapulo lwa umi ulwa Mwana wa Mfwele aalingilamo.

22 Nupya wandanzile uluzi ulwakweti manzi ya umi, ulwayengesanga wi we lya mutengo, lwafumanga uku cilimba ca wene cakwe Leza ni ca Mwana wa Mfwele, 2 nupya lwapisile pakasi ka museo ukalamba uwa mu musumba. Ku mbali zyoili izya luzi kwali imiti ya umi iyaseekanga ivizao 12, yaseekanga cila mwezi. Nupya mafwa ya miti iiyo yaomviwanga ukupozya antu amu nko.

3 Nupya mutalaya icitiipu icili consi. Lelo icilimba ca wene cakwe Leza ni ca Mwana wa Mfwele cilaya umu musumba, nupya aomvi yakwe yalamuombela umulimo wa muzilo; 4 yalalola icinso cakwe, ni zina lyakwe lilaya pa vipuma vyao. 5 Nupya kutalaya usiku, yatalalondekwa nu luswepo lwakwe lampi nanti ulwi lanzi, pano Yeova Leza alayakozezya uluswepo, nupya yalateeka amanda pe.

6 Wanenyile ati: “Mazwi yaa aacisinka nupya acumi; Yeova, Leza uwalenzile ukuti ya kasesema yalande mazwi yaa, watatuma malaika wakwe ukwizalanga aomvi yakwe ivintu ivifwile ukucitika likwene. 7 Lolini! Nkwiza likwene. Uwa nsansa a wiyo aakalondela mazwi ya usesemo aaya umu lupapulo luu.”

8 Ne Yoani nuvwile nu kulola ivintu vii. Lino nuvwile nu kuvilola, nafukime ukuti impepe malaika uwandanganga ivintu vii. 9 Lelo wanenyile ati: “Awe utacita vivyo! Nene muzya sile wakwe wewe kwene nupya wa ina yako, ya kasesema, nupya wakwe yayo aakalondela amazwi aaya umu lupapulo luu. Pepa Leza.”

10 Wanenyile nu kuti: “Utasunga inkama mazwi ya usesemo amu lupapulo luu, pano insita iyasoololwa yatipalama. 11 Lekini kacita wa viipe atwalilile ukucita iviipe, nu mukowele atwalilile ukuya umukowele; lelo lekini umulungami atwalilile ukucita ivilungame, nu wa muzilo atwalilile ukuya uwa muzilo.

12 “‘Lolini nkwiza likwene, nupya indi ni cilambu ca kupeela cila muntu kulingana nu mulimo wakwe. 13 Nene Aufa nupya Omega,* uwa nkoleelo nupya uwa mpelelekezyo, uwa kutandikilako nupya uwa kusyalikizya. 14 Ansansa a yayo afula imingila yao, pakuti yakwate insambu zya kulya ku miti ya umi nu kuti yapite pa mpongolo nu kwingila umu musumba. 15 Ukunzi ya musumba kuli ya simbwa* na akacita ivya maleele na ya cizelele* ni nkomi na aakapepa ivilubi na yonsi aatemwa ufi nupya aakabepa.’

16 “‘Ne Yesu natumile malaika wane ukwizamusimikila pa vintu vii pa mulandu ni vilongano. Nene wa mu lupwa* lwakwe Devedi nupya umwanakwe nupya nene lutanda lwa katondo uluyengese.’”

17 Nupya umupasi na nawinga yakalanda yakuti, “Izini!” nupya lekini wensi aakuvwa alande ati, “Izini!” lekini na wensi ali nu lusala aize; lekini wensi aakulonda, amwe manzi ya umi uwila sile.

18 “Nkusimikila wensi aakuvwa mazwi ya usesemo amu lupapulo luu: Ndi cakuti umwi walundamo umu vintu vii, Leza alamulundila ivinkunka ivyalembwa umu lupapulo luu; 19 nupya ndi cakuti umwi wafumyamo mazwi yamwi amu lupapulo luu ausesemo, Leza atalamuzumilizya ukulya uku miti ya umi wakwe vino calembwa umu lupapulo luu, nupya atalamuzumilizya ukwingila umu musumba wa muzilo.

20 “Aakusimika pa vintu vii akulanda ukuti, ‘Nkwiza likwene.’”

“Ameni! Iza Mwene Yesu.”

21 Si cikuuku cikulu ica Mwene Yesu ciye na antu amuzilo.