KU INA LOMA

1 Kalata ukufuma kuli Paulo umuomvi wakwe Klistu Yesu nupya uwamwa ukuya umutumwa, nu kusoololwa ukusimikila ilyasi lisuma pali Leza, 2 lino Leza walavile mpiti ukupitila muli ya kasesema yakwe umu Malembo ya muzilo, 3 ilikalanda pa mwanakwe uwizile avyalilwa pano nsi umu lupwa lwakwe Devedi, 4 ukupitila umu mupasi wa muzilo, watuutulwilwe ukufuma uku yafwe, nupya cii cikalangilila ukuti u Mwana wakwe Leza. Wikwene ali Mwene witu Yesu Klistu. 5 Ukupitila muli aliwe twapokelile icikuuku cikulu nu kuya atumwa pakuti antu amu nko zyonsi yaye ni cuvwila pa mulandu nu utailo alino nu kucindika izina lyakwe, 6 namwe kwene mwamilwe ukufuma umu yantu amu nko pakuti muye antu yakwe Yesu Klistu— 7 nalembela yonsi amu Loma yano yatemwikwa kuli Leza, nupya yano yamwa ukuya amuzilo:

Icikuuku cikulu nu mutende ukufuma kuli Leza Tata witu nu ku Mwene Yesu Klistu viye namwe.

8 Ica kutandikilako, nkutaizya Leza wane ukupitila muli Yesu Klistu pali mwemwe mwensi, pano utailo winu ukulandwa umu nsi yonsi. 9 Pano Leza wino nkaombela sana lino nkusimikila ilyasi lisuma pa Mwanakwe, a kambone wane pali vino nkamulumbula lyonsi umu mapepo, 10 nkapaapata ukuti nga cingacitika ningiza kuli mwemwe nga Leza watemwa. 11 Pano nkulondesya ukwizamulola, pakuti nkamupeele ica upe ukufuma kuli Leza pakuti mukomeleke; 12 nu kuti mwemwe nani tukakomelezyanye umu utailo witu.

13 Lelo inane nkulonda mumanye ukuti pa nsita izingi nalondanga ukwiza kuli mwemwe, lelo nacilikilwa ukufika na ndakai, pakuti ince nize nsimikile nu kupanga asambi wakwe vino nacisile nu ku yantu yonsi amu nko. 14 Naya ni nkongole ku Yagiliki nu ku yantu asi Agiliki, ku yantu ya mano nu ku yantu aatasambilila; 15 fwandi nkulondesya ukwizasimikila ilyasi lisuma na kuli mwemwe kwene mwe ina Loma. 16 Pano nsiuvwa insonyi api lyasi lisuma, pano ali nzila ino Leza akaomvya iya maka iikalenga wensi uwaya nu utailo ukupusuka, ukutandikila uku Muyuda ukufika nu ku Mugiliki. 17 Pano pa mulandu ni lyasi lisuma ulungami wakwe Leza ukusokololwa ukupitila umu utailo, nupya ukulozya uku utailo, calembwa ukuti: “Lelo umulungami alaya nu umi pa mulandu wa utailo.”

18 Pano ukali wakwe Leza ukusokololwa ukufuma umwi yulu pali yonsi asipepa Leza nupya asi yalungami aakafisa icumi umu nzila isi ilungame, 19 pa mulandu wakuti vino yangalondekwa ukumanya pali Leza, vyamanyikwa ningo kuli aliyo, pano Leza wayasokolwela. 20 Pano ukufuma pano Leza waumbiile insi imiyele yakwe iisiloleka, kuli kuti amaka yakwe na Uleza wakwe, ikalolekela umu vintu vino waumba, icakuti yataakwata nu mwa kubepekezya. 21 Pano nanti cakuti yamanyile Leza, yataamucindike ukuti a Leza nupya yatamutaizyanga, lelo imyelenganyizizye yao yali iya sile sile ni myenzo yao iwelewele izile iya umu mfinzi. 22 Nanti cakuti yailolanga ukuti aamano, izile iyaya awelewele 23 nupya yatiile ukupepa Leza aasifwa nu kutandika ukupepa icilubi icikoline nu muntu aakafwa, ivyunyi, inyama ni vikasela.

24 Fwandi wakwe vino yalondanga, Leza wayalesile ukuti yacita ivintu ivikowele pakuti yazewanya imili yao. 25 Yakawizye icumi pali Leza nu ufi, nupya yapepanga nu kuombela iciumbwa ukucila Kaumba aakalumbanyiziwa amanda pe. Ameni. 26 Uli mulandu uno Leza wayalesile ukuti yatungululwa ni nsuna iyaula ukuikanya, pano anaci yatiile ukupanga icupo umu nzila ya civyalilwa; 27 nanti sile aonsi yasiile umusango wa civyalilwa uwa kupanga icupo na anaci nu kutandika ukulondesya ukupanga icupo na onsi yauze, yacitanga ivya winyi nupya yapokelile icilambu icalingine nu luyembu lwao.

28 Vino yatalondanga ukumanya ningo Leza, wayalesile ukuti yaatungululwa na melenganyo yao, pakuti yacita iviipe. 29 Nupya yali ni miyele itaali ilungame, yacitanga iviipe, yali nu uzuwa, nu uyi, aamuvimbila, aakomi, aavikanza, aalunkumbwa, nu lupato, aalwambo, 30 aakalanda iviipe pa yauze, aapata Leza, aamiponto, aacilumba, aakayuvwa, aaya na mapange aipe, aasiuvwila avyazi, 31 aasiiluka, aasisunga ivipangano, aatatemwa auze, nupya aataya nu luse. 32 Nanti cakuti yaamanya ningo amasunde yakwe Leza alungame, ukuti aakacita ivintu vivyo yalinga ukufwa, yakatwalilila ukuvicita nu kuzumilizya antu aakacita ivintu vivyo.

2 Fwandi we muntu we, wemuno ukapingula, utakwata umwa kubepekezya; pano lino ukupingula umuzo ala ukuipingula wemwineco, pano vino ukapingwilapo umuzo avino nawe kwene ukacita. 2 Nomba twamanya ukuti Leza akapingula antu aakacita ivya musango uwo, nupya upinguzi wakwe ukauvwana ni cumi.

3 We muntu we, uzye ukwelenganya ukuti lino ukupingula yayo aakacita vintu vivyo vino nawe kwene ukacita, wemo Leza atalakupingula? 4 Nanti uzye wasuula icikuuku cakwe Leza icikulu na vino wateeka umwenzo, pa mulandu wakuti utamanya ukuti Leza mu cikuuku cakwe akwezya ukukwazwa pakuti ulapile? 5 Lelo pa mulandu ni cilumba cako nu kukanalapila, ukuiletela ukali wemwineco pa wanda wa ukali na pa wanda uno Leza alaleta upinguzi ulungame. 6 Nupya alapingula cila muntu kulingana na vino akacita: 7 alapeela umi wa pe ni mili isiola kuli yayo akalonda ucindami nu mucinzi lino yakuzizimizya mu kuomba imilimo isuma; 8 Lelo ukali ni cipyu vilaya pa yantu ya lwete na asiuvwila icumi lelo aakacita iviipe. 9 Ucuzi nu ulanda viliza pa muntu wensi akacita iviipe, vilatandikila pa Muyuda alino pakonke Mugiliki; 10 lelo ucindami, umucinzi nu mutende viliza pali wensi aakacita ivisuma, vilatandikila pa Muyuda alino pakonke Mugiliki. 11 Pano Leza atakwata kapaatulula.

12 Pano yonsi aakacita uluyembu ukwaula ukumanya amasunde yalafwa nanti cakuti yatamanyile masunde; lelo yonsi akacita uluyembu lino yamanyile amasunde yalapingulwa ukulingana na masunde. 13 Pano antu aakauvwa sile masunde asi yalungami kuli Leza, lelo aakalondela masunde aliyo yalaya alungami. 14 Nanti cakuti antu ya mu nko yatamanya amasunde yakwe Leza, yakacita vintu kulingana na vino amasunde yakalanda. Nupya nanti yatamanya amasunde, amasunde yayo yaya umu myenzo yao. 15 Yakwene aliyo yakalangilila ukuti ivyaya mu masunde vyalembwa mu myenzo yao, nupya ya kampingu yao ni myenzo yao i vikayasinila ukuti yali nu mulandu nanti foo. 16 Cii cilacitika pa wanda uno Leza ukupitila muli Klistu Yesu, alapingula antu pa vintu vino yakacita umu nkama, ukulingana ni lyasi lisuma lino nkasimikila.

17 Fwandi ndi cakuti ukati wewe Muyuda nupya wasintilila pa masunde nu kuyuvwa pa mulandu wa kuya cuza wakwe Leza, 18 nupya wamanya vino Leza akalonda alino ni vintu ivicindamisye pa mulandu wakuti yakusambilizya amasunde, 19 nupya wasininkizya ukuti ukatungulula impafu, wewe luswepo ku yantu ya mu mfinzi, 20 wewe kalungika wa yawelewele, kasambilizya wa yana anono, nupya wamanya ivyeo ivyangupale pali Leza ni cumi icaya mu Masunde— 21 uzye fwandi wemuno ukasambilizya umuzo, ukaisambilizya wemwineco? Wemuno ukasimikila uti, “Utaiya,” uzye wemo ukaiya? 22 Wemuno ukati, “Utaacita ucende,” uzye wemo ukaacita ucende? Wemuno wapata ivilubi, uzye ukaiya ivya mu matempele? 23 Wemuno ukaituntumba ukuti wamanya masunde, uzye ukasaalula Leza ukupitila umu kutama Masunde? 24 Pano calembwa ukuti: “Antu ya mu nko yakupontela izina lyakwe Leza pa mulandu namwe.”

25 Ukuzembululwa kungakwazwa ndi cakuti ukalondela amasunde; lelo ndi cakuti ukatama amasunde, ukuzembululwa kwako icili cimwi nu kukanazembululwa. 26 Ndi cakuti umuntu aatazembululwa akulondela ivilungame ivyaya umu Masunde, nanti cakuti atazembululwa alaya wa muntu muzembululwe. 27 Nupya umuntu aatazembululwa lelo akalondela amasunde, alakupingula wemuno ukatama masunde nanti cakuti wakwata amasunde alembwe nupya wazembululwa. 28 Pano asi Muyuda umu milolekele, nupya aatazembululwa uku mwili. 29 Lelo u Muyuda umukasi, nupya ukuzembululwa kwakwe u kwa mu mwenzo ukuomvya umupasi asi masunde alembwa. Asi antu aakataizya muntu wiyo lelo a Leza.

3 Uzye lyene, uusuma ci uwakuya Umuyuda, nanti uusuma ci uwa kuzembululwa? 2 Mwaya sana usuma. Inkoleelo, yapeezilwe mazwi yakwe Leza. 3 Uzye lyene mungatuuli pa Yayuda yamwi aatiile ukutaila Leza? Uzye ale cikupiliula ukuti Leza atanga atailwe? 4 Awe foo! Lelo Leza u wa cumi, nanti cakuti antu yonsi yangaya aufi, wakwe vino calembwa ukuti: “Amazwi yako yalalanga ukuti wewe wa cumi nupya akukupeela imilandu ulayasinila.” 5 Lelo ndi cakuti iviipe vino tukacita vikalanga ulungami wakwe Leza, uzye tungatuuli? Uzye Leza akaya nu lufyengo lino waleta ukali wakwe? (Nkulanda wakwe vino antu yakalanda.) 6 Citanga ciye vivyo! Pano nga caya vivyo, uzye Leza alapingula uli antu ya mu nsi?

7 Lelo ndi cakuti ufi wane walenga icumi pali Leza ukumanyikwa nu kulenga ukuti acindikwe, u mulandu ci uno nkupingwilwa ukuti nene muyembu? 8 Nupya u mulandu ci uno tutanga tulandile wakwe vino antu yakatubepezya iyati tukalanda ukuti, “Lekini twacita iviipe pakuti ivintu ivisuma vikiize”? Upinguzi uno uliza apa yantu yayo ulaya uwa mulinganya.

9 Uzye lyene tungati tucizile asyala? Awe foo! Pano twamanya ukuti Ayuda na Agiliki yonsi aayembu; 10 wakwe vino calembwa ukuti: “Kutaaya umuntu nanti awenga umulungami; 11 kutaya umuntu nanti awenga aakailuka; kutaya nanti awenga aakalonda Leza. 12 Antu yonsi yaata ukuvwila Leza, yonsi kwene aa sile sile; kutaaya nanti awenga uwaya ni cikuuku.” 13 “Imikolomilo yao yaya wa malindi ayulike; yakabepa ukuomvya indimi zyao.” “Imilomo yao yakwata usungu kwati inzoka.” 14 “Nupya umu tunwa twao mwazuula ivitiipu na mazwi aipe.” 15 “Yene yakasimwilila uku kukoma auze.” 16 “Lyonsi yakaleta uwononesi ukalamba pa yantu nu kuyalenga ukucula, 17 nupya yatamanya ivya kwikala na auze umu mutende.” 18 “Yasitiina Leza.”

19 Lelo twamanya ukuti vyonsi ivyaya umu Masunde vikanena aakatungululwa na Masunde, pakuti antu yonsi yatakwata umwa kubepekezya na pakuti Leza angaca apingule antu yonsi amu nsi. 20 Fwandi kusi nanti awenga aalaya umulungami kuli Leza pa mulandu wa kulondela masunde, pano masunde yakalenga uluyembu ukumanyikwa ningo.

21 Lelo ndakai ulungami wakwe Leza wasokololwa ukwaula masunde, wakwe vino Masunde ni vyalembwa vyakwe ya Kasesema vikalanda, 22 nupya yonsi yano yataila muli Yesu Klistu, Leza akayalola ukuti alungami. Pano wene ataaya na kapaatulula. 23 Pano yonsi ayembu nupya yafilwa ukufika pa lulumbi lwakwe Leza, 24 nupya a pa mulandu nu upe wa cikuuku cikulu cakwe Leza sile akuno yakulungamikilwa kupitila muli vino Klistu Yesu watukulwile. 25 Leza wapeezile Yesu ukuya ilambo ilya kwelela imembu zya yantu aataila umu wazi wakwe. Wacisile vivyo pa kulanga ukuti u mulungami, pa mulandu wakuti wateeka umwenzo, welezile antu pa membu zino yacisile mpiti. 26 Nupya wacisile vivyo pa kulanga ukuti na ndakai kwene u mulungami lino akulola uwataila muli Yesu ukuti u mulungami.

27 Isunde ilyakwata imilimo lingalenga umuntu ukuitakizya. Nomba uzye tulinzile ukuitakizya? Awe foo. U mulandu ci? Pano isunde ilikalanda ukuti umuntu alinzile ukuya nu utailo, likalangilila ningo ukuti kusi uwakwata insambu zya kuitakizya. 28 Pano twamanya ukuti umuntu akaya umulungami pa mulandu wa utailo asi pa mulandu wa kulondela masunde. 29 Nanti uzye a Leza wa Yayuda yatupu? Uzye na antu amu nko kwene asi Leza wao? Ee nayo kwene a Leza wao. 30 Fwandi vino Leza a wenga, alalola antu azembululwe ukuti aalungami pa mulandu nu utailo wao na asi azembululwe nayo kwene alayalola ukuti alungami pa mulandu nu utailo wao. 31 Uzye tulinzile ukusuula masunde pa mulandu wa utailo? Awe foo! Lelo tulinzile ukulondela masunde.

4 Uzye fwandi tungatuuli, i cani cino Abulahamu icikolwe citu wakweti? 2 Ndi cakuti Abulahamu wamilwe ukuti u mulungami pa mulandu ni milimo yakwe, nga wakweti insambu zya kuitakizya, lelo asi kuitakizya kuli Leza. 3 Uzye ilembo likatuuli? “Abulahamu wataile Yeova, nupya wamilwe ukuti u mulungami.” 4 Lyene umuntu aakaomba, asilola malipilo yakwe ukuti a pa mulandu wa cikuuku cikulu lelo akalola ukuti a yano alinzile ukupokelela. 5 Lelo kuli Leza, umuntu aasisintilila pali vino akacita lelo wataila Leza, ala u mulungami nanti cakuti wayembuka. 6 Vikwene avino na Devedi walanzile ukuti umuntu wino Leza akalola ukuti u mulungami ukwaula imilimo akaya ni nsansa. Walanzile ati: 7 “Ansansa a yayo yano ivicitwa vyao iviipe vyelelwa na yano imembu zyao zyelelwa; 8 uwa nsansa u muntu wino Yeova ataliusya imembu zyakwe.”

9 Uzye lyene insansa zii, i zya yantu sile azembululwa, nanti na atazembululwa kwene? Pano tukati: “Utailo wakwe Abulahamu u walenzile ukuti aye umulungumi.” 10 Nga lyene cali uli pakuti aye umulungami? Uzye wizile aya umulungami lino wazembulwilwe nanti ala atatala wazembululwa? Wali u mulungami ala atatala wazembululwa. 11 Nupya wapokeliile icimanyililo ca kuzembululwa ukuya usininkizyo wakuti wali umulungami pa mulandu nu utailo uno wakweti lino atatala wazembululwa, pakuti angaya isi wa yantu yonsi autailo lino yatatala yazembululwa, pakuti Leza angayalola ukuti alungami; 12 nu kuti angaya isi wa yana azembululwe, asi sile yayo aakalondela isunde lya kuzembululwa, lelo na yayo aaya nu utailo wakwe uno tata witu Abulahamu wakwetiko lino ataatala wazembululwa.

13 Pano masunde asi yano yalenzile Abulahamu nanti ana yakwe ukupeelwa ulayo wakuti angiza apyane insi, lelo a pa mulandu nu ulungami uno wali nao ukupitila umu utailo. 14 Pano ndi cakuti aakalondela masunde i mpyanyi, ale utailo utakweti incito nupya nu ulayo kwene ungaya uwa sile sile. 15 Umu cumi Masunde yakaleta ukali wakwe Leza, lelo ukutaya masunde kusiya nu kuluvyanya kwene.

16 Abulahamu wapokelile ulayo pa mulandu nu utailo wakwe, pano Leza wamulanzile icikuuku cikulu, pakuti ulayo ukafikiliziwe uku yana yakwe yonsi, asi sile kuli yayo aakalondela Masunde lelo na yayo aaya nu utailo wakwe vino Abulahamu wali, wino ali tata witu swensi. 17 (Cii cili wakwe vino calembwa ukuti: “Natinkusoolola ukuya isi wa nko izingi.”) Ulayo wakwe Leza wali nu kufikiliziwa, nupya Abulahamu wataile Leza aakalenga afwe ukuya apuma nupya aakalola ivintu ivitatala vyacitika kwati ivicitika mpiti. 18 Wali nu upaalilo nupya wataile ukuti angaya isi wa nko izingi nanti cakuti calolekanga kwati citanga cicitike. Wazumiile wakwe vino calanzilwe ukuti: ‘Vikwene avino ana yako yalavula.” 19 Nanti cakuti ataatiile ukuya nu utailo, walolanga umwili wakwe ukuti i cili cimwi nu ufwe (pano wali ni myaka 100), nupya walolanga Sala ukuti atanga akwate umwana. 20 Lelo pa mulandu wa ulayo wakwe Leza, Abulahamu ataatiile ukuya nu utailo; utailo wamukomizye, nupya walumbanyanga Leza 21 nu kusininkizya ukuti Leza wali nu kucita vino walavile. 22 Fwandi “Leza wamwamile ukuti u mulungami.”

23 Lelo, amazwi yakuti “Leza wamuweni” yatalemvilwe sile pa mulandu na Abulahamu, 24 lelo na pa mulandu witu swemuno tukalolwa ukuti sweswe yalungami, pano twataila Leza uwatuutulwile Yesu Umwene witu ukufuma uku yafwe. 25 Wapeezilwe pa mulandu wa membu zitu nupya watuutulwilwe pakuti Leza atulenge ukuya alungami.

5 Fwandi vino Leza watulenga ukuya alungami pa mulandu wa utailo, lekini tuipakizye umutende pamwi na Leza ukupitila umu Mwene witu Yesu Klistu, 2 ukutaila muli aliwe kwalenga ukuti tupalame kuli Leza nu kupokelela icikuuku cikulu cino tukuipakizya ndakai; nupya lekini tusansamuke pa mulandu wakuti twakwata upaalilo wa kupokelela ululumbi ukufuma kuli Leza. 3 Asi pali cico conga, lelo lekini tusansamuke na lino tuli na macuzi, pano twamanya ukuti ukucula kukaleta ukuzizimizya; 4 ukuzizimizya nako kukalenga tutemwikwe kuli Leza, nu kutemwikwa kuli Leza nako kukalenga tuye nu upaalilo, 5 nupya upaalilo usilenga umuntu ukutoovoka; pano ukutemwa kwakwe Leza kwazula umu myenzo itu ukupitila umu mupasi wa muzilo uno twapeezilwe.

6 Pano umu cumi, lino twali atonte, Klistu wafwilile ayembu pa nsita ino Leza wasoolwile. 7 Citangupala uku muntu ali wensi ukufwila umulungami; nanti cakuti limwi umwi angezya ukufwila umuntu umusuma. 8 Lelo Leza watulanga ukutemwa kwakwe, pano lino twali ayembu, Klistu watufwilile. 9 Fwandi lyene vino twalenzilwe ukuya alungami pa mulandu nu wazi wakwe Yesu, tulapusuka uku ukali wakwe Leza. 10 Ndi cakuti lino twali alwani yakwe Leza, twizile ituya ya cuza yakwe ukupitila umu mfwa ya Mwanakwe, fwandi lyene vino sweswe ya cuza yakwe Leza, tulapusuka ukupitila umu umi wakwe Yesu. 11 Asi cico conga, lelo tukusansamukila na muli Leza, ukupitila umu Mwene witu Yesu Klistu uwalenga ukuti lyene tuye ya cuza yakwe Leza.

12 Wakwe vino uluyembu lwingilile umu muntu wenga pano nsi alino ni mfwa nayo ingilile umu luyembu, ali cino imfwa yasalanganila uku yantu yonsi pa mulandu wa kuti yonsi yayembwike—. 13 Pano uluyembu lwali pano nsi lino kutatala kwaya Masunde, lelo umuntu asipeelwa umulandu wa kucita uluyembu nga pasi isunde. 14 Imfwa yateekanga antu ukufuma pali Adamu ukufika kuli Mose, nupya yateekanga na antu kwene aatayembwike umu musango uno Adamu wayembukilemo, wino wakolineko muli vimwi na wino wali nu kwiza.

15 Lelo upe utaya wa luyembu. Pano ndi cakuti uluyembu lwa muntu wenga lwalenzile antu aingi ukufwa, ale icikuuku cikulu cakwe Leza nu upe uwapeezilwe umu muntu wenga Yesu Klistu vilacilapo ukuleta mapaalo ku yantu aingi! 16 Nupya ivisuma ivyafuma umu upe uwapeezilwe vyapusana ni vyafumilemo lino umuntu wayembwike. Pano lino umuntu wenga wayembwike antu yonsi yapeezilwe umulandu, lelo upe uwapeezilwe pa cisila cakuti aingi yayembuka, u kulengwa ukuya alungami. 17 Uluyembu lwa muntu wenga lwalenga imfwa ukuteeka ukupitila muli aliwe. Fwandi tungasininkizya ukuti icikuuku cikulu nu upe wa kuya alungami i vikalamba sana. Aakapokelela ivintu vii yalaya nu umi nupya yalateeka ukupitila umu muntu wenga, Yesu Klistu!

18 Fwandi wakwe vino uluyembu lwa muntu wenga lwalenga antu amisango yonsi ukupeelwa umulandu, avino nu ulungami wa muntu wenga walenga antu amisango yonsi ukuya alungami pakuti yakaye nu umi. 19 Pano wakwe vino ucintuvwa wa muntu wenga walenga antu aingi ukuya ayembu, avino ni cuvwila ca muntu wenga cilalenga antu aingi ukuya alungami. 20 Lyene Masunde yapeezilwe pakuti uluyembu luvulisye. Lelo lino antu yacisile imembu izingi, alino Leza wayalanzile sana icikuuku cikulu. 21 U mulandu ci? Pano wakwe viivi kwene vino uluyembu lwateekanga nu kuleta imfwa, avino ni cikuuku cikulu cilateeka antu umu ulungami nu kuyalenga ukuya nu umi wa pe ukupitila muli Yesu Klistu Umwene witu.

6 Uzye lyene tungatuuli? Uzye tufwile ukutwalilila ukuyembuka pakuti icikuuku cikulu cikulileko? 2 Awe! Uzye vino twafwile pa mulandu nu luyembu, tungatwalilila uli ukuyembuka nupya? 3 Nanti uzye mutamanya ukuti swensi swemuno twabatiziwe muli Klistu Yesu twabatiziwe umu mfwa yakwe? 4 Fwandi twazisilwe pamwi nawe lino twabatiziwe umu mfwa yakwe, pakuti wakwe vino Klistu watuutulwilwe ukufuma uku yafwe kupitila umu lulumbi lwakwe Isi, avino naswe tuye nu umi upya. 5 Ndi cakuti twalemenkana nawe umu mfwa ili yonga kwene, ale tulalemenkana nawe nu mu kutuutuluka kwene. 6 Pano twamanya ukuti untu witu uwa mpiti wapoopiilwe pamwi nawe pa cimuti pakuti imili itu iya luyembu itakwata maka, kuti tutatwalilila ukuya azya uku luyembu. 7 Pano umuntu nga wafwa ala uluyembu lwakwe lwelelwa.*

8 Nupya nga twafwile pamwi na Klistu, twataila ukuti tulaya nu umi pamwi nawe. 9 Pano twamanya ukuti vino Klistu watuutululwa ukufuma uku yafwe, atalafwa nupya; imfwa lyene itakwata maka pali aliwe. 10 Pano wafwile umuku onga sile pakuti afumyepo uluyembu, lelo umi uno wakwata ndakai, a pa mulandu wakwe Leza. 11 Namwe kwene mwailola ukuti mwafwa pa mulandu wa luyembu, lelo mwaya nu umi pa mulandu wakwe Leza ukupitila muli Klistu Yesu.

12 Fwandi mutaleka ukuti uluyembu lutwalilile ukuteeka umu mili inu iikafwa pakuti mutalondela vino imili inu ikulonda. 13 Nupya mutaapeela imili* inu uku luyembu wa vyanzo ivya kucitila iviipe, lelo mwaipeela mweineco kuli Leza wa yantu ya umi aatuutuluka ukufuma uku yafwe, nupya mwapeela imili* inu kuli Leza wa vyanzo vya kucitilako ulungami. 14 Pano uluyembu lutalinzile ukukwata maka pali mwemwe, vino musitungululwa na masunde lelo mukatungululwa ni cikuuku cikulu.

15 Uzye lyene tungatuuli? Uzye twakulayembuka pa mulandu wakuti tusitungululwa na masunde lelo tukatungululwa ni cikuuku cikulu? Awe foo! 16 Uzye mutamanya ukuti ndi cakuti mwaipeela ku muntu ali wensi wa yazya ya cuvwila, ala mwemwe yazya ya muntu wiyo wino mukuvwila? Fwandi ndi cakuti mwemwe yazya ya luyembu, lulamutungulula ku mfwa, lelo nga mwemwe yazya ya cuvwila, cilamutungulula ku ulungami. 17 Lelo nkutaizya Leza ukuti nanti cakuti mwali yazya ya luyembu pa nsita imwi, mwizile imuvwila nu mwenzo onsi icisambilizyo icapeezilwe kuli mwemwe. 18 Ee, pa mulandu wakuti mwakulwilwe uku luyembu, mwizile imuya azya ku ulungami. 19 Nkulanda wakwe vino antu yonsi yakalanda pa mulandu nu kutonta kwinu; pano wakwe viivi kwene vino mwapeezile ivilundwa vinu wa yazya uku vintu ivikowele na kuli umpulamasunde uukatungulula ku kucita iviipe, avino lyene mupeele ivilundwa vinu ku ulungami uukatungulula ku milimo ino Leza akalonda. 20 Pano lino mwali azya ya luyembu, mwakweti uuntungwa uku ulungami.

21 I cani icafumilemo mu vintu vino mwacitanga pa nsita iya, vino ndakai mukauvwilapo insonyi? Pano impela ya vintu vivyo iimfwa. 22 Lelo vino ndakai mwakululwa uku luyembu nu kuya azya yakwe Leza, mukuomba imilimo ya muzilo nupya ilamutungulula uku umi wa pe. 23 Pano icilambu ca luyembu iimfwa, lelo upe wakwe Leza uumi wa pe ukupitila muli Klistu Yesu Umwene witu.

7 Uzye ale mutaamanya, inane, (pano nkulanda kuli yano yaamanya masunde) ukuti Amasunde yakatungulula umuntu lyonsi lino ali nu umi? 2 Pano umwanaci uwatwalwa akanyepelelwa kuli iya ukulingana ni sunde lino iya acili nu umi; lelo iya nga wafwa, akasapulwa ukwi sunde lyakwe iya. 3 Fwandi ndi cakuti umwanaci wiyo watwalwa uku monsi muze lino iya acili nu umi ala wacita ucende. Lelo ndi cakuti iya wafwa, ala wasapulwa ukwi sunde lyakwe iya. Nupya nga watwalwa uku monsi muze ala atacisile ucende.

4 Mwe inane, namwe kwene mwali afwe uku Masunde ukupitila umu mwili wakwe Klistu, pakuti muye antu yakwe Klistu uwatuutulwilwe ukufuma uku yafwe, pakuti twacita ivikazanzya Leza. 5 Pano lino twacitanga vino imili itu yalondanga, Masunde yasokolwile ulunkumbwa lwa kucita uluyembu umu mili itu ulukalenga twacita ivintu ivikatwala uku mfwa. 6 Lelo ndakai twasapulwa uku Masunde, pano twafwa uku Masunde yayo, lelo twaya azya pano tukatungululwa nu mupasi tusitungululwa na Masunde alembwa.

7 Uzye tungatuuli? Uzye Masunde u luyembu? Awe foo! Nga kutaya Masunde nga ntamanya uluyembu. Nga ntamanyile ulunkumbwa ndi cakuti Masunde yatalanzile ukuti: “Utaakumbwa.” 8 Lelo lino uluyembu lwingilile umu masunde lwalenzile ukuti inje nu lunkumbwa lwa misango yonsi, pano lino kutaali masunde kutaali uluyembu. 9 Nali nu umi lino kutaali masunde. Lelo lino kwizile ikuya masunde, alino camanyikwe ningo ukuti nene muyembu, nupya nafwile. 10 Nupya nazanyile ukuti isunde ilyali nu kuntwala uku umi, likuntwala uku mfwa. 11 Pano uluyembu lwanjingilile ukupitila umwi sunde, ilumbepa nu kunkoma. 12 Masunde yakwe Mose aamuzilo, nupya vino yalandapo navyo kwene i vya muzilo, i vilungame nupya i visuma.

13 Uzye icisuma calenzile ukuti imfwe? Awe foo! Suka sile uluyembu, pakuti cimanyikwe ningo ukuti uluyembu u lukundetela imfwa ukupitila umu kucita icisuma, pakuti ukupitila umu masunde uluyembu lungamanyikwa ningo. 14 Pano masunde yafuma kuli Leza, lelo nemo nene muyembu uwakaziwe ukuya umuzya wa luyembu. 15 Pano nsimanya cino nkucita. Nsicita cino nkulonda, lelo nkacita cino napata. 16 Lelo ndi cakuti nkucita cino nsikulonda, ala nkuzumila ukuti Masunde yaya sile ningo. 17 Nomba ndakai asi nene nkucita vivyo, lelo u luyembu ulwaya muli nene. 18 Pano namanya ukuti muli nene, kuli kuti umu mwili wane, mutaya icisuma; pano nkalondesya ukucita icisuma lelo nsikwata amaka ya kucicita. 19 Nsicita icisuma cino nkulonda, lelo iciipe cino nsikulonda acino nkacita. 20 Fwandi ndi cakuti nkucita cino nsikulonda, ala asi nene nkucicita, lelo u luyembu ulwaya muli nene.

21 Lelo isunde ilyaya muli nene aeli: Lino nkulonda ukucita icisuma, nkazana ukuti nkucita iciipe. 22 Nemo umu mwenzo wane nkazangila sana umu masunde yakwe Leza, 23 lelo umu mwili wane nkalola isunde lyuze likulwisyanya ni sunde lya mu melenganyo nu kuntwala uku uzya wi sunde lya luyembu ilyaya umu mwili wane. 24 Iye mwe ne mulanda! A weni alampokolola uku mwili uu ukuntwala uku mfwa? 25 Nkutaizya Leza kupitila muli Yesu Klistu Mwene witu! Fwandi lyene umu melenganyo yane nene muzya uku masunde yakwe Leza, lelo uku mwili wane nene muzya ukwi sunde lya luyembu.

8 Fwandi yayo aakaombela pamwi na Klistu Yesu yatakwata umulandu. 2 Pano isunde lya mupasi wa muzilo lyamupeela umi, pakuti mwaombela pamwi na Klistu Yesu nupya lyamupususya kwi sunde lya luyembu nu kwi sunde lya mfwa. 3 Vino Masunde yafizilwe ukucita pa mulandu wakuti yali aatonte, Leza wene wavicisile ukupitila umu kutuma Umwanakwe, uwizile wa muntu umuyembu pakuti afumyepo uluyembu, nupya wapingwile uluyembu ulwali umu yantu, 4 pakuti ivikalondekwa ukulingana na Masunde yakwe Leza vifikiliziwe muli sweswe, swemuno tusitungululwa nu mwili lelo tukatungululwa nu mupasi. 5 Pano aakalondela vino imili yao ikalonda, yakaika amano kuli vino imili ikulonda, lelo aakalondela umupasi wa muzilo, yakaika amano ku vintu vya mupasi wa muzilo. 6 Pano ukwika amano kuli vino imili ikalonda kukatungulula ku mfwa, lelo ukwika amano ku mupasi wa muzilo kukatungulula ku umi nu ku mutende; 7 pano ukwika amano kuli vino imili ikalonda kukalenga antu ukuya alwani yakwe Leza, pano imili isiuvwila masunde yakwe Leza nupya itanga imuvwile. 8 Fwandi aakacita vino imili ikalonda yatanga yazanzye Leza.

9 Mwemo musicita vino imili inu ikalonda, lelo mukatungululwa nu mupasi wa muzilo, pano umu cumi umupasi wakwe Leza waya muli mwemwe. Nomba ndi cakuti umwi asi nu mupasi wakwe Klistu ala umuntu wiyo asi wakwe Klistu. 10 Lelo ndi cakuti Klistu ali muli mwemwe ala umwili uufwe pa mulandu wa luyembu, lelo umupasi ala uli nu umi pa mulandu wa ulungami. 11 Lyene ndi cakuti umupasi wakwe wino watuutulwile Yesu ukufuma ku yafwe uli muli mwemwe, uwatuutulwile Klistu Yesu ukufuma uku yafwe alalenga nu kuti imili inu iikafwa iye nu umi ukupitila umu mupasi wakwe uwaya muli mwemwe.

12 Fwandi ina itu tutalinzile ukulondela vino imili itu ikalonda; 13 pano nga mukucita vino imili ikalonda, mulafwa; lelo ndi cakuti mwaleka umupasi wakoma vino umwili ukalonda, mulaya nu umi. 14 Pano yonsi aakatungululwa nu mupasi wakwe Leza, aana yakwe Leza. 15 Pano mutapokelile umupasi wa uzya uwa kumulenga ukuya ni ntete nupya, lelo mwapokelile umupasi wa kumulenga ukuya ana yakwe Leza, nupya umupasi kwene uu uukatulenga ukupunda ituti: “Abba,* Tata!” 16 Umupasi wakwe Leza ukalenga tusininkizye ukuti sweswe yana yakwe. 17 Fwandi ndi cakuti sweswe yana yakwe Leza ale sweswe mpyanyi, kuli kuti impyanyi zyakwe Leza, nupya sweswe mpyanyi pamwi na Klistu, lelo tulinzile ukuculila pamwi nawe pakuti nu kucindamikwa kwene tukacindamikilwe pamwi nawe.

18 Pano namanya ukuti ukucula kwa pa nsita yii pasi vino kuli ngu kukulinganya ku ucindami uno tulapokelela. 19 Pano uumbo ukalolela nu kulondesya ukwizalola uwanda uno ana yakwe Leza yalasokololwa. 20 Pano uumbo walenzilwe ukuti uye nu umi uwa sile sile, asi pa mulandu nu kulonda kwa uumbo uwineco lelo a pa mulandu nu kulonda kwakwe Leza, lino wacisile vivyo walenzile ukuti uumbo ukwate nu upaalilo 21 pakuti uce ukululwe ku uzya wa kuola nu kukwata untungwa wa yana yakwe Leza. 22 Pano twamanya ukuti uumbo watwalilila ukutetela capamwi nu kuwaikilwa capamwi ukufika na ndakai. 23 Asi cico conga, lelo naswe kwene swemuno twakwata ivizao vya nkoleelo kuli kuti umupasi, tukateta lino tukulolela uwanda uno tulaya ana yakwe Leza, lino imili itu ilakululwa ukupitila umwi lambo. 24 Pano twapusukile umu upaalilo kwene uu; lelo upaalilo uukaloleka ala usi upaalilo, pano uzye umuntu angapaalila icintu cino akulola? 25 Lelo nga twataila icintu cino tusikulola, tukatwalilila ukucilolela ala tukuzizimizya.

26 Umu musango uli umwi kwene, umupasi nao ukatwazwa mu kutonta kwitu; pano intazi iikayapo i yakuti tusimanya vino tulinzile ukupepelapo, lelo umupasi ukatupaapatilako muli vino tukufilwa ukulanda lino tukuteta. 27 Lelo aakaceceta imyenzo wamanya vino umupasi waya, pano ukapaapatilako amuzilo ukulingana na vino Leza akalonda.

28 Twamanya ukuti Leza akalenga imilimo yakwe yonsi ukuvwana pakuti cazipila amutemwa, kuli kuti yano yaamwa ukulingana nu kulonda kwakwe; 29 pano antu yano Leza watandikilepo ukumanya wayasoolwelile calimwi kuti yakolanya Umwanakwe, pakuti angaya iyeli pa ina aingi. 30 Nupya antu yano Leza wasoolwelile calimwi ali yano wama; nupya yano wama ali yano walenga ukuya alungami. Nupya yano walenga ukuya alungami ali yano wacindamika.

31 Uzye lyene tumatuuli pa vintu vii? Ndi cakuti Leza ali naswe, uzye a weni aangatulwisya? 32 Vino ataakanyizye Umwanakwe lelo wamupeezile kuli sweswe swensi, uzye atalatupeela ni vintu vyuze vyonsi ivyasyala ukulunda pa Mwanakwe? 33 Uzye a weni aalapeela antu yano Leza wasoolola umulandu? Pano Leza aliwe walanda ukuti aalungami. 34 Uzye a weni alayapingula? Klistu Yesu aliwe wafwile, nupya ukulunda pali cico, watuutulwilwe, lyene ali ukwi kasa li lunji lyakwe Leza nupya akatupaapatilako.

35 I cani icingalenga Klistu ate ukututemwa? Uzye ucuzi nanti ulanda nanti ukucuziwa nanti inzala nanti ukusizya nanti uzanzo nanti ulupanga? 36 Wakwe vino calembwa ukuti: “Pa mulandu wakuti sweswe antu yako, tukakomwa cila wanda; tukalolwa wa mfwele zino yakutwala umu kukoma.” 37 Lelo umu vintu vii vyonsi tukacimvya ukupitila muli wino watutemilwe. 38 Pano insininkizya ukuti nanti imfwa nanti umi nanti ya malaika nanti amauteeko nanti ivintu ivyayako ndakai nanti iviliza nanti ivya maka 39 nanti ivya kwi yulu nanti ivya pano nsi nanti sile iciumbwa icili consi vitalalenga ukuti Leza ate ukututemwa, wakwe vino na Klistu Yesu Umwene witu akalanga ukutemwa.

9 Nkulanda icumi muli Klistu; ntakubepa, na kampingu akunjela unte ukulingana nu mupasi wa muzilo, 2 ukuti indi sana nu ulanda nupya umwenzo wane ukucululuka. 3 Pano ningatemwa ukuti yamfumye kuli Klistu wa muntu umutiipwe pa mulandu na ina yane, kuli kuti ya lupwa yane, 4 aina Izlaeli. Yene wayasoolwile ukuti yaye ana yakwe nu kuyacindamika nu kuyapeela ivipangano na Masunde nu mulimo wa muzilo alino na malayo. 5 Muli yakwene u mwali ni vikolwe umwafumile Klistu uwizile avyalwa wa muntu. Leza uwaya na maka pa vintu vyonsi alumbanyiziwe amanda pe. Ameni.

6 Lelo asi kuti mazwi yakwe Leza yafilwa ukufikiliziwa. Pano asi yonsi aavyalwa umu ina Izlaeli aaya aina “Izlaeli” ya cumi cumi. 7 Nupya asi yonsi aaya ana pa mulandu wakuti yafumile muli Abulahamu; lelo, “Aalamwa ukuti ana yako yalafuma muli Isaki.” 8 Kuli kuti, ana avyalwa umu lupwa lwakwe Abulahamu asi yana yakwe Leza acumi cumi, lelo ana avyalwa pa mulandu nu ulayo ali yana yakwe Leza acumi cumi. 9 Pano ulayo wali u wakuti: “Ndiza pa nsita kwene yii nupya Sala alakwata umwana umonsi.” 10 Asi sile pa nsita iiyo yonga lelo na lino Labeka wakweti inda yakwe ya mpundu kufuma kuli Isaki icikolwe citu; 11 pano lino yatali yavyalwe nupya lino yatali yacite icili consi icisuma nanti iciipe, Leza walenzile ukulonda kwakwe kumanyikwe ukwakuti asisoolola umuntu pa mulandu ni milimo yakwe, lelo akasoolola wino akulonda, 12 Leza wanenyile Labeka ati: “Umukalamba alaya u muzya ku mwance.” 13 Wakwe vino calembwa ukuti: “Natemilwe Yakobo, lelo napasile Esau.”

14 Uzye lyene tungatuuli? Uzye Leza waya nu lufyengo? Awe foo! 15 Pano Leza wanenyile Mose ati: “Ndaya nu luse kuli wensi wino nkulonda, nupya ndaya ni cikuuku kuli wensi wino nkulonda.” 16 Fwandi Leza asisoolola kulingana na vino umuntu akulonda nanti ukulingana na maka ya muntu wiyo, lelo akasoolola pa mulandu nu luse lwakwe. 17 Pano ilembo likalanda pali Falao ukuti: “Pa mulandu kwene uu auno nalekela ukuti utwalilile ukuyako: pakuti ndange amaka yane ukupitila muli wewe na pakuti izina lyane limanyikwe umu nsi yonsi.” 18 Fwandi akaya nu luse kuli wino akulonda, lelo akaleka wino akulonda ukuya umukome umwenzo.

19 Acino mulanguzya muti: “U mulandu ci uno acili akalondelezya umulandu? A weni uwatala wamulesya ukucita cino akulonda?” 20 We muntu we, uzye wewe weni uwakuti uwapaazyanya na Leza? Uzye icintu cino yamata cinganena nakamata citi: “U mulandu ci uno wampangila umu musango uu?” 21 Uzye nakamata ataakwata amaka akuomvya ivu ilili limwi kwene uku kupanga iciviya icicindame ni civiya icisi cicindame? 22 Nanti cakuti Leza walondanga ukuleta ukali wakwe pa yantu aipe nu kulenga amaka yakwe yamanyikwe, wateekanyizizye sana antu aalinzile ukononwa nupya aali wa viya ivilinzile ukononwa. 23 Nupya wacisile cii pakuti ululumbi lwakwe ulukalamba lumanyikwe pa yantu aaya wa viya vya luse, yano wapekanyizizye calimwi pakuti yakapeelwe ululumbi, 24 kuli kuti sweswe swemuno ataamile ukufuma umu Yayuda yatupu lelo watwamile nu kufuma umu yantu ya mu nko. 25 Cili wakwe vino Leza walanzile ukupitila muli Oseya ukuti: “Aasi antu yane ndayama ukuti ‘antu yane,’ nu mwanaci wino ataali umutemwikwe, ndamwama ukuti ‘u mutemwikwe’; 26 nupya kuno yanenyilwe ukuti, ‘Musi yantu yane,’ nako kwene yalaamwa ukuti ‘ana yakwe Leza wa umi.’”

27 Nupya Ezaya walanzile pa ina Izlaeli ukuti: “Nanti cakuti impendwa ya yana yakwe Izlaeli ingaya wa mucanga wa muli yemba, anono sile aalapusuka. 28 Pano Yeova alapingula insi, nupya alacita vivyo umu nsita inono.” 29 Nupya wakwe vino Ezaya wasesime ukuti: “Ndi cakuti Yeova uwa maumba yakwe ya malaika ataatusiliile ana, nga twaya wakwe Sodoma, nupya nga twakolana na Gomola.”

30 Uzye lyene tungatuuli? Antu amu nko nanti cakuti yatacitanga ivilungame izile iyaya alungami, kuli kuti ulungami uukafuma umu utailo; 31 lelo nanti cakuti aina Izlaeli yezyanga ukulondela ivyaya umu masunde, yatasunganga masunde wakwe vino calinzile ukuya. 32 A pa mulandu ci? Pano yezyanga ukulondela masunde pa mulandu ni milimo ino yaombanga asi pa mulandu nu utailo. Yapumiike ukwi “we lya kupumikako”; 33 wakwe vino calembwa ukuti: “Lolini! Nkwika iwe lya kupumikako umu Zioni nupya iwe ilya kulenga antu ukuluvyanya, lelo wensi uwalitaila atalazewana.”

10 Inane, cino nemo nkalondesya nu kupaapatilako aina Izlaeli kuli Leza, i cakuti yakapusuke. 2 Pano nkuyacitilako unte ukuti yacincila muli vyakwe Leza, lelo yataamumanya ningo. 3 Pa mulandu wakuti yataamanya ulungami wakwe Leza lelo yalondanga ukucita ivyao, yatalondelanga ulungami wakwe Leza. 4 Pano Klistu ali mpela ya Masunde, pakuti wensi uwataila muli aliwe aye umulungami.

5 Pano Mose walemvile pa kucita vino Masunde yakati i vilungame ati: “Umuntu aakucita ivintu kwene vii alaya nu umi. 6 Lelo pa ulungami uukafuma umu utailo walemvile ati: “Utaalanda umu mwenzo uti, ‘A weni aalaya ukwi yulu?’ kuli kuti, uku kuleta Klistu, 7 nanti, ‘A weni aalingila umu ciwina icaula impela?’ kuli kuti uku kuleta Klistu ukufuma uku yafwe.” 8 Nomba uzye Malembo yakatuuli? “Izwi lyakwe Leza lili umupiipi namwe, lili umu tunwa twinu nu mu myenzo inu”, kuli kuti, “izwi” lya utailo, lino tukasimikila. 9 Pano nga wailandila apaswe ukuti Yesu u Mwene, nu kutaila umu mwenzo wako ukuti Leza wamutuutulwile ukufuma uku yafwe, ulapusuka. 10 Pano umuntu akataila umu mwenzo pakuti aye umulungami, lelo akaomvya akanwa pa kulanda pali vino wataila pakuti akapusuke.

11 Pano ilembo likalanda ukuti: “Kusi nanti aumwi aakataila muli aliwe aalazewana.” 12 Pano pataaya upusano pa Muyuda nu Mugiliki. Yonsi yakwata Umwene wenga, aakapaala sana yonsi yano yakaama pi zina lyakwe. 13 Pano “wensi aakaama api zina lyakwe Yeova alapusuka.” 14 Nomba, uzye yalama uli api zina lyakwe ndi cakuti yatamutaile? Nupya, yalamutaila uli lino yatuuvwa pali aliwe? Nupya, yaluvwa uli ukwaula uwa kuyasimikila? 15 Nupya yalasimikila uli lino yatatumilwe? Wakwe vino calembwa ukuti: “Lolini vino caziipa ukulola ingazo zyakwe yayo aakasimikila ilyasi lisuma ilya vintu visuma!”

16 Lelo asi yonsi auvwilile ilyasi lisuma. Pano Ezaya walanzile ati: “Yeova, uzye a weni uwataile vino twalanzile?” 17 Fwandi umuntu akataila ndi cakuti uvwa. Nupya izwi likauvwika lino umwi walanda pali Klistu. 18 Lelo nkuzya ukuti, Uzye yafizilwe ukuvwa? Awe, pano “amazwi yuvwisile umu nsi yonsi, nupya ivyalanzilwe vyuvwisile umu nsi yonsi.” 19 Lelo nkuzya ukuti, uzye aina Izlaeli yafizilwe ukumanya? Awe, pa kutandika Mose walanzile ati: “Ndamulenga ukuya nu uzuwa pa yantu asi aina Izlaeli; ndamulenga ukusokela uluko uluwelewele.” 20 Lelo Ezaya wasifile sana nu kulanda ati: “Antu aatandondanga yanzanyile; nizile imanyikwa uku yantu aatalondanga ukuumanya.” 21 Lelo ukulozya uku ina Izlaeli walanzile ati: “Uwanda onsi nkaama antu aataaya ni cuvwila nupya aakoma imyenzo.”

11 Lyene nkamuzye nupya kwene, uzye Leza wakanyile antu yakwe? Awe atayakanyile! Pano nani kwene nene mwina Izlaeli umwana wakwe Abulahamu ukufuma umu mutundu wakwe Benjamini. 2 Leza ataakanyile antu yakwe, yano watandikilepo ukumanya. Uzye mutaamanya vino ilembo likalanda pali Eliya lino wapaapatiileko aina Izlaeli kuli Leza? 3 Watiile: “Yeova, iyakoma ya kasesema yako, iyonona maulambo, insyala sile nenga, nupya nani kwene yakulonda ukunkoma. 4 Uzye Leza wamunenyile uli? Watiile: “Kucili antu 7,000 aatapepapo Baali.” 5 Umu nzila ili imwi kwene, na ndakai kwene kuli yano yasyalapo pali yano yasoololwa pa mulandu ni cikuuku cikulu. 6 Fwandi wayasoolwile pa mulandu ni cikuuku cakwe icikulu, asi pa mulandu na vino yacisile; pano ndi cakuti iyasoololwa pa mulandu na vino yacisile, nga citaali icikuuku cikulu.

7 Uzye lyene tumatuuli? Aina Izlaeli yataazanyile icintu cino yalondesyanga, lelo aasoololwe yene yacizanyile. Asyala yatuuvwile, 8 wakwe vino calembwa ukuti: “Leza wayapeezile umupasi wa tulo, amanso aasilola na matwi aasiuvwa, ukufika na ndakai kwene.” 9 Nupya Devedi walanzile ati: “Lekini umutebeto wao uye iciteyo ni iwe lya kupumikako nupya uyafulule. 10 Lekini amanso yao yaye umu mfinzi pakuti yataalola, nupya lekini lyonsi yatunduza.”

11 Fwandi nkanuzye ukuti, uzye yapumiike nu kuponelela? Awe foo! Lelo pa mulandu wakuti yayembwike nupya na antu ya mu nko yapuswike, calenzile ukuti yasoke. 12 Ndi cakuti ukuluvyanya kwao kwaleesile mapaalo aingi uku yantu ya pano nsi, nupya impendwa yao inono yaleesile mapaalo uku yantu ya mu nko, fwandi cilacila napo lino impendwa yao ilakumanila!

13 Lyene nkulanda kuli mwemwe mwe yantu ya mu nko. Vino nene mutumwa uku yantu ya mu nko, nacindamika umulimo wane 14 pakuti indole ndi cakuti limwi ningasosya antu yane nu kupususya yamwi pali aliyo. 15 Pano ndi cakuti ukusumbwa kwao kwalenga antu yamwi ukuya ya cuza yakwe Leza, uzye lyene cilaya uli lino yalapokelelwa? Cilaya kwati yatuutululwa ukufuma uku yafwe. 16 Nupya ndi cakuti umunya umwi uuli wa vizao vya nkoleelo u wa muzilo, ale umunya onsi nao kwene u wa muzilo; nupya ndi cakuti umusisi u wa muzilo, ale ni misambo nayo kwene i ya muzilo.

17 Lelo ndi cakuti imisambo imwi yaputwilwe, nupya namwe nanti cakuti mwali wa muolivi wa mu mpanga, mwalematiikwe kuli aliyo nupya mwizile imupokelela mapaalo aingi ukufuma uku musisi wa muolivi, 18 mutailola ukuti mwacindama ukucila imisambo yuze. Ndi cakuti mukuilola ukuti mwacindama ukucila imisambo yuze, mwaiusya ukuti asi mwemwe mwatungilila umusisi, lelo umusisi u wamutungilila. 19 Lyene mulalanda muti: “Imisambo yaputwilwe pakuti ndematikwe.” 20 I cacumi! Pano yaputwilwe pa mulandu nu kukanaya nu utailo. Lelo mwemo mwatwalilila ukuyako pa mulandu wa utailo. Mutaitutumula, lelo cenjelini. 21 Pano ndi cakuti Leza ataalesile imisambo ya kutandikilako ukuti itwalilile, namwe kwene atalamuleka kuti mutwalilile. 22 Acino elenganyini pa cikuuku cakwe Leza na pa ukali wakwe. Akalanga ukali uku yantu aakaluvyanya, lelo mwemo wamukwatila icikuuku pano akalonda ukuti mutwalilile ukuya umu cikuuku cakwe; nga mutatwalilile ukuya umu cikuuku cakwe, namwe kwene mulaputulwa. 23 Nupya nayo kwene ndi cakuti yalapila nu kuya nu utailo, yalalematikwa, pano Leza angayalematika nupya kwene. 24 Pano ndi cakuti mwemo mwaputwilwe uku muolivi wa mu mpanga nupya mwalematiikwe uku muolivi wa mu calo uwa kulema sile, fwandi yaa yene cilangupala sana pano yafumile uku muolivi wa mu calo kwene kuno yalayaswilizya!

25 Pano nkulonda ukuti mumanye inkama yakwe Leza inane, pakuti mutaailola ukuti mwemwe ya mano: Aina Izlaeli yamwi yatuvwile ukufika lino impendwa ya yantu amu nko izile ikumana, 26 nupya umu musango kwene uu, aina Izlaeli yonsi yalapusuka. Wakwe vino calembwa ukuti: “Kapususya alafuma umu Zioni nupya alafumyapo iviipe pa yana yakwe Yakobo. 27 Nupya uu uli upangano uno ndapangana nayo lino ndafumyapo imembu zyao.” 28 I cacumi, aalwani yakwe Leza pa mulandu wakuti yakanyile ukuvwa ukwi lyasi lisuma, nupya cico calenzile ivintu vimuzipile. Lelo pa mulandu nu ulayo uno Leza walavile ivikolwe vyao, wasoolwile yamwi ukufuma muli aliyo ukuti yaye ya cuza yakwe. 29 Pano Leza atalalanguluka pa vintu vino wapeela antu nanti pa yantu yano wama. 30 Pano wakwe viivi kwene vino mutaali ni cuvwila kuli Leza pa nsita imwi, lelo ndakai Leza wamwelela pa mulandu na ucintuvwa wao, 31 fwandi wamulanga uluse pa mulandu na ucintuvwa wao, pakuti nayo kwene yangelelwa. 32 Pano Leza waleka ukuti yonsi yataya ni cuvwila pakuti yonsi ayalange uluse.

33 Iye mwe vino Leza wakwatisya mapaalo na mano ni vintu uwingi vino wamanya! Kusi aangalondolola upinguzi wakwe ni milimo yakwe! 34 Pano “a weni uwamanya vino Yeova akaelenganya, nanti a weni uwaya impandamano yakwe?” 35 Nanti “a weni uwamupeezile vimwi, pakuti angamuwezezya?” 36 Pano ivintu vyonsi vyafuma kuli aliwe nupya vyayako ukupitila muli aliwe alino na pa mulandu wakwe. Ululumbi luye kuli aliwe amanda pe. Ameni.

12 Acino, nkumupaapata inane pa mulandu ni cikuuku cakwe Leza ukuti, peelini imili inu wi lambo ilipuma, ilya muzilo nupya lino Leza angapokelela, kuli kuti ukuombela Leza ukulingana na maka inu aakwelenganya. 2 Nupya tiini ukutungululwa nu wikazi wa ndakai,* lelo piliukini ukupitila umu kusenula imyelenganyizizye inu pakuti musininkizye vino Leza akalonda, ivisuma, ivimalilike nupya ivikamuzanzya.

3 Pano ukupitila umu cikuuku cikulu icapeezilwe kuli nene, nkunena mwensi ukuti mutaikuzya ukucila pali vino mwaya, lelo muye na mano kulingana nu utailo uno Leza wapeela cila muntu. 4 Pano wakwe viivi kwene vino twakwata ivilundwa ivingi ku mwili, lelo ivilundwa vyonsi vitakwata umulimo uli umwi, 5 avino naswe kwene nanti cakuti twaya aingi, sweswe mwili onga muli Klistu, lelo swensi kwene cila muntu sweswe vilundwa ivilemenkane. 6 Fwandi, vino twakwata ivya upe ivipusanepusane pa mulandu ni cikuuku cikulu, ndi cakuti ica upe citu i ca kusesema, lekini twasesema ukulingana nu utailo witu; 7 nanti ndi cakuti ica upe citu i ca kwazwa antu, lekini twayazwa; nupya umuntu aakasambilizya, lekini aasambilizya; 8 na wino akakomelezya, lekini aakomelezya; na wino akapeelako auze, lekini acita vivyo mukuitemelwa; na aakatungulula, lekini aombesya; na aakalanga uluse, lekini acita vivyo ni nsansa.

9 Mutaleka ukutemwa kwinu kuye ukwa usomvi. Patisyini iciipe nu kutemwisya icisuma. 10 Mwatemwana sana wa ina. Mwatandikilapo ukucindika auzo. 11 Mwaombesya, mutaya akasu. Mwaleka umupasi wamulenga ukuya acincile. Mwaombela Yeova. 12 Mwazangila muli vino mulapokelela uku nkoleelo. Mwazizimizya lino mukupita umu macuzi. Muye nu mute wa kupepa. 13 Mwapeelako amuzilo ukulingana na vino yakulondekwa. Mwapokelela aenyi. 14 Mwapaala akumucuzya; mwayapaala mutayatipwila. 15 Mwasansamukila pamwi na akusansamuka nupya mwalosezya pamwi na akulosya. 16 Mwalola auzo wakwe vino mukailola; mutaaya ni cilumba, lelo mwaya aicefye. Mutailola ukuti mwemwe ya mano.

17 Mutawezezya uyi pa uyi. Mwacita vino antu yonsi yakulola ukuti i visuma. 18 Ndi cakuti cingacitika, mwaezya apapezile amaka inu ukuya amutende ku yantu yonsi. 19 Inane, mutaalandula, lelo mwasiila Leza ukuti awino alange ukali uku yantu aakacita iviipe. Pano Yeova walanda ukuti: “Icilanduzi i cane; nene ndalandula.” 20 Lelo “ndi cakuti umulwani wako ali ni nzala, mupeele ivyakulya; ndi cakuti ali nu lusala mupeele amanzi ya kumwa; pano ngu kucita vivyo ala ukutulika umoto wa malasya pa mutwe wakwe.”* 21 Utaaleka ukuti iviipe vyakucimvya, lelo uwacimvya iviipe ukupitila umu kucita ivisuma.

13 Umuntu wensi afwile auvwila ya kateeka, pano kutaya uteeko uutafuma kuli Leza; lelo ya kateeka yonsi ayako ndakai Leza u wayazumilizya. 2 Acino wensi aakukanya uteeko ala akukanya vino Leza wapekanya; aakakanya uteeko yalailetela upinguzi. 3 Pano aakacita ivisuma yasitiina ya kateeka, suka aakacita iviipe aakayatiina. Uzye ukulonda ukuti utatiiina uteeko? Uwacita ivisuma, nao ulakutaizya; 4 pano uteeko waya wa muomvi wakwe Leza akakuombela pakuti ivintu vikuzipile. Lelo ndi cakuti ukucita iviipe, uwautiina, pano wakwata maka ya kukupingula. Nupya uteeko waya wa muomvi wakwe Leza akalandula pakuti afulule umuntu akacita iviipe.

5 Fwandi kwaya umulandu wa mpomvu uno mulinzile ukuvwila uteeko, asi pa mulandu sile uwa kutiina ukufululwa lelo na pa mulandu wakwe ya kampingu inu. 6 Ali mulandu uno mukalipilila ni misonko kwene; pano ya kateeka yaya wa yaomvi yakwe Leza aakaomba lyonsi umulimo wa kwazwa antu. 7 Mwapeela yonsi vino yalinzile ukupokelela: aakulonda umusonko mwamupeela umusonko; aakulonda umusangulo, mwamupeela umusangulo; aakulonda ukumutiina, mwamutiina, na aakulonda umucinzi mwamupeela umucinzi.

8 Mutaaya ni nkongole uku muntu ali wensi suka sile inkongole zya kutemwana; pano wensi uwatemwa umuze ala akulondela isunde. 9 Pano masunde yakati, “Utaacita ucende, utaakoma, utaiya, utaakumbwa,” nupya masunde yauze asyala yaya mwi sunde lyonga ilikati: “Uwatemwa umuzo wakwe vino waitemwa.” 10 Uwaya nu kutemwa asicita iciipe ku muze; fwandi uwatemwa auze ala akalondela masunde yonsi.

11 Nupya mwacita cii, pano imumanya ukuti insita yii i yakuti muzyuke umu tulo, pano lyene ipusukilo lili mupiipi sana kucila vino cali lino twataile. 12 Kwasya kuce; umusanya uli umupiipi. Acino lekini tusumbe imilimo ya mu mfinzi nupya lekini tuzwale ivyanzo vya luswepo. 13 Twacita ivisuma wakwe vino antu ya mu luswepo yakacita, tutawowota nanti ukukoleka, tutacita uzelele nanti vicitwa vya winyi,* nupya tutacita ulwete nanti ukuya nu uzuwa. 14 Mwakolanya Umwene Yesu Klistu, nupya mutaapangila limwi ukucita vino imili inu ikulonda.

14 Mwapokelela umuntu umutonte umu utailo, lelo mutaamupingula pali vino imupusana mu myelenganyizizye. 2 Umuntu umwi utailo ungamuzumilizya ukulya ivili vyonsi, lelo umuntu mutonte wene akalya sile umusalu utupu. 3 Aakulya atalinzile ukusuula umuntu aasikulya, na aasikulya atalinzile ukupingula umuntu aakulya, pano Leza wamupokelela. 4 Uzye wewe weni uwakupingula umuomvi wa muntu muze? Umusambazi wakwe aakamupingula ndi cakuti akuomba ningo nanti foo. Umu cumi alaomba ningo, pano Yeova angamwazwa ukukwanisya.

5 Umuntu umwi akalola ukuti uwanda onga wacindama ukucila uuze; muze nawe akalola ukuti uwanda onga uli umwi na manda yonsi asyala; lekini cila muntu asininkizye umu mwenzo wakwe. 6 Umuntu aakacindika uwanda, akaucindika pakuti acindike Yeova. Nupya umuntu aakalya, akalya pakuti acindike Yeova, pano akataizya Leza; umuntu aasilya, asilya pakuti acindike Yeova, lelo nawe kwene akataizya Leza. 7 Kusi nanti awenga pali sweswe aakaya nu umi pa mulandu wakwe umwineco, nupya kusi nanti awenga aakafwa pa mulandu wakwe umwineco. 8 Pano nga tuli nu umi, tukaya nu umi pakuti tucindike Yeova, nupya nga twafwa, tukafwa pakuti tucindike Yeova. Fwandi nga tuli nu umi nanti nga twafwa, sweswe yakwe Yeova. 9 Pano Klistu wafwile nu kwizaya nu umi nupya, pakuti aye Umwene pa yafwe na aumi.

10 Nomba u mulandu ci uno ukupingwila umwina wako? Nanti u mulandu ci uno ukusuulila umwina wako? Pano swensi kwene tulimilila pa nkoleelo ya cilimba ca upinguzi cakwe Leza. 11 Pano calembwa umu Malembo ukuti: “Yeova walanda wati, ‘I cumi kwene antu yonsi yalamfukamila, nupya yonsi yalamanya ukuti nene Leza.’” 12 Fwandi cila muntu alailondolwela kuli Leza.

13 Acino tutaapingulana, nupya tutacita ivingalenga umwina ukutoovoka umu utailo nanti kumulenga ukuluvyanya. 14 Namanya nu kusininkizya umu Mwene Yesu ukuti kutaaya icintu icitaasanguluka; suka sile uku muntu aakaelenganya ukuti cintu cimwi citaasanguluka, ala kuli aliwe akuno citaasanguluka. 15 Pano ndi cakuti ivyakulya vino ukulya vikusosya umwinako, ala usi nu kutemwa. Utaaleka ivyakulya vino ukulya vyaonona utailo wa mwinako wino Klistu wafwilile. 16 Fwandi utaaleka antu yalanda iviipe pa visuma vino ukacita. 17 Pano ukulya nu kumwa asi u kulalenga umuntu ukwingila umu Wene wakwe Leza, lelo umupasi wa muzilo uukalenga umuntu ukuya umulungami, uwa mutende nupya uwa nsansa. 18 Umuntu ali wensi aakaombela Klistu umu musango uu akapokelelwa kuli Leza nupya akatemwikwa uku yantu.

19 Acino lekini twaezya ukucita ivintu ivikaleta umutende alino ni vintu ivikakomelezya. 20 Tiini ukonona umulimo wakwe Leza pa mulandu ni vyakulya. I cacumi, ivintu vyonsi vyasanguluka, lelo citaaya ningo uku muntu ukulya ivyakulya ivingasosya yauze. 21 Cazipa ukukanalya inyama nanti ukumwa waini nanti ukucita icili consi icingalenga umwina ukusoka. 22 Twalilila ukuya nu utailo wako kuli Leza. Uwa nsansa u muntu aasiipingula umwineco ukupitila muli vino watemwa. 23 Lelo nga akutwisika ala watapingulwa mpiti ndi cakuti walya, pano ala ataliliile umu utailo. Nupya consi icisicitikila umu utailo u luyembu.

15 Swe yakome tulinzile ukwavwa atonte, nupya tutalinzile ukuizanzya sweineco. 2 Lekini swensi twacita ivingazanzya anji, ivingayakomelezya. 3 Pano na Klistu kwene ataizanzyanga umwineco, wakwe vino calembwa ukuti: “Umuzewanya wa yantu aakakuzewanya iwiza pali nene.” 4 Pano vyonsi ivyalemvilwe mpiti, vyalemvilwe uku kutusambilizya, pakuti ukupitila umu kuzizimizya nu mu kuteekeziwa ukukafuma umu Malembo tuye nu upaalilo. 5 Si Leza aakamulenga ukuzizimizya nupya aakamuteekezya amulenge ukuya na melenganyo yano Klistu wakweti, 6 pakuti mwensi capamwi umwi zwi lyonga mulumbanye Leza nupya Isi wa Mwene witu Yesu Klistu.

7 Fwandi mwapokelelana, wakwe vino na Klistu wamupokelile, pakuti Leza acindikwe. 8 Pano nkumunena ukuti Klistu wizile aombela antu yano yaali azembululwe pa mulandu na ucisinka wakwe Leza, pakuti malayo yano Leza walavile ivikolwe vyao yasininkiziwe, 9 na pakuti antu ya mu nko yacindike Leza pa luse lwakwe. Wakwe vino calembwa ukuti: “Uli mulandu uno ndakulumbanyizizya apaswe umu yantu amu nko, nupya ndalumbanya izina lyako umu nyimbo.” 10 Calembwa nu kuti: “Sansamukini mwe yantu ya mu nko pamwi na antu yakwe.” 11 Nupya kwene calembwa ukuti: “Lumbanyini Yeova mwe yantu ya mu nko mwensi, nupya lekini antu yonsi yamulumbanye.” 12 Nupya kwene Ezaya walanzile ati: “Muli Yese mulafuma* umuntu alateeka antu amu nko; muli wikwene amuno antu amu nko yalataila.” 13 Si Leza aakapeela upaalilo amupeele insansa izingi nu mutende ukupitila umu kupaalila muli aliwe, pakuti muye sana nu upaalilo ukupitila umu mupasi wa muzilo.

14 Lyene inane insininkizya ukuti mukacita sana ivisuma, mwamanya ivintu vyonsi, nupya mukasambilizyanya. 15 Lelo namulembela ivisinka vimwi umu kusipa pakuti imwiusyeko nupya, pa mulandu ni cikuuku cikulu cino napokelela ukufuma kuli Leza, 16 pano wansoolola ukuya umuomvi wakwe Klistu Yesu ku yantu amu nko. Nkuomba umulimo wa muzilo uwa kusimikila ilyasi lisuma pali Leza uku yantu amu nko, pakuti yaye wi lambo ilyasangululwa nu mupasi wa muzilo, na pakuti yaye wi lambo lisuma kuli Leza.

17 Fwandi nkusansamukila muli Klistu Yesu pa mulandu nu mulimo uno Leza wampeela. 18 Pano ntalalanda pa vintu vyuze suka sile pali vino Klistu wacita ukupitila muli nene, pakuti antu amu nko yaye ni cuvwila muli vino nkalanda nu kucita, 19 mu vimanyililo ni vizungusyo, nu mu mupasi wakwe Leza uwa muzilo, nupya ukufuma uku Yelusalemu nu kufika uku Ililikumu nasimikila sana ilyasi lisuma pali Klistu. 20 Cii calenzile mpingulepo ukuti ntalasimikila ilyasi lisuma kuno izina lyakwe Klistu lyamanyikwa mpiti, pakuti ntakuula pano umuntu muze wimba mpiti umufula; 21 wakwe vino calembwa ukuti: “Aatamanyile icili consi pali aliwe yalalola, na aatuvwile yaliiluka.”

22 Nupya ukwene ali mulandu uno pa miku iingi nafizilwe ukwiza kuli mwemwe. 23 Lelo ndakai kusi icifulo cino ntaombelako umu ncende yii, nupya pa myaka iingi nalondanga ukwiza kuli mwemwe. 24 Fwandi lino ndaya pa lwendo lwa ku Sipeni, nkutaila ukuti ndamulola, nupya mulansukilila pa cisila ca kwikala namwe pa nsita inono. 25 Lelo ndakai indi umupiipi nu kuya uku Yelusalemu pakuti nkaombele antu ya muzilo. 26 Pano aina amu Makedoniya na amu Akaya yatemilwe ukupeela yauze vino yaakweti ukupitila umu kusangwila apiina aali pa ya muzilo umu Yelusalemu. 27 I cacumi yatemilwe ukucita cico, nupya yaali ni nkongole kuli aliyo; pano ndi cakuti antu amu nko yapokeliile vyakwe Leza ukufuma uku yantu ya muzilo amu Yeslusalemu, ale nayo kwene yaalinzile ukuyaombela ukupitila umu kuyapeela ivyuma vyao. 28 Lyene nga namala umulimo uu nu kuyafisya umusangulo uu kuli aliyo, ndiza mpite kuli mwemwe pa kuya uku Sipeni. 29 Nupya manyile ukuti nga niza kuli mwemwe, ndiza na mapaalo aingi ukufuma kuli Klistu.

30 Lyene nkumupaapata inane ukupitila umu Mwene witu Yesu Klistu nu mu kutemwa ukukafuma uku mupasi wa muzilo nkuti, mwampepela sana kuli Leza wakwe vino nani nkupepa, 31 pakuti mpokololwe uku yantu aatataila amu Yudeya nu kuti umulimo wane ungapokelelwa uku ya muzilo umu Yelusalemu, 32 pakuti Leza nga watemwa ince nize kuli mwemwe ni nsansa nu kwiza sansamukila pamwi namwe. 33 Si Leza aakapeela umutende aye namwe mwensi. Ameni.

16 Nkasi ukumumanyisya pali Febi, nkazi witu, aakaombela pamwi ni cilongano icayela umu Kenkeleya, 2 pakuti mumupokelele umu Mwene umu nzila isuma ino mulinzile ukupokelela amuzilo nu kumwavwa muli vino akulondekwa, pano nawe kwene wavwilizya antu aingi kumwi nani kwene.

3 Mundamukileko Pulisika na Akwila, ya kaomba yanji muli Klistu Yesu, 4 aisile amaumi yao umu uzanzo pa mulandu wane nupya asi nene nenga nkuyataizya lelo na amu vilongano vyonsi ivya mu mpanga zyuze nayo kwene yakuyataizya. 5 Nupya mundamukileko ni cilongano icikalonganila umu ng’anda yao. Mulamuke na cuzane Epanatusi, uwali pali yano yatandikilepo ukutaila Klistu umu Asia. 6 Mulamuke Maliya uwaombesyanga pa kumusakamala. 7 Mulamuke Andolonika na Yuniyasi, ya lupwa yane nupya afungwa yanji, aonsi aamanyikwa ningo uku yatumwa nupya aankoleelile ukuya alondezi yakwe Klistu.

8 Mundamukileko Ampilyatosi, wino natemwa umu Mwene. 9 Mundamukile Ubanusi, kaomba munji muli Klistu, na Sitakisi wino natemwa. 10 Mundamukile Apele, uwatemwikwa kuli Klistu. Lamukini amu ng’anda yakwe Alistobulusi. 11 Mulamuke Helodyoni, lupwa wane. Mulamuke amu ng’anda yakwe Nakisosi aataila umu Mwene. 12 Mulamuke Tulafaeni na Tulafosa anaci akaombesya umu Mwene. Mulamuke Pesisi, wino twatemwa, pano waombesya sana umu Mwene. 13 Mulamuke Lufusi, umusoololwe umu Mwene, mulamuke na yamayo yakwe nupya ya mayo yane. 14 Mulamuke Asiklito, Fulegoni, Hemesi, Patulobasi, Hemasi, alino na ina yano yaya nayo. 15 Mulamuke Filologasi na Julia, Neleusi na kaci muze, nupya mulamuke Olimpasi na amuzilo yonsi aaya nayo. 16 Mulamukane mwensi nu kutonsolana kwa wina. Ivilongano vyakwe Klistu vyonsi vyamulamuka.

17 Lyene inane nkumukonkomezya ukuti cenjelini kuli yayo aakaleta malekano nu kulenga yauze ukuponzya utailo ukupusanako na vino mwasambilile, nupya mwayataluka. 18 Pano antu yayo asi yazya ya Mwene witu Klistu, lelo yateekwa uzya uku viipe vino imili yao ikalonda, yakalanda malyasi ya kuzembeleka nu kulumbilizya pakuti yaponzye antu ya kaele. 19 Antu yonsi yaamanya ukuti mwaya ni cuvwila, nupya nkaya ni nsansa pa mulandu winu. Nomba nkulonda ukuti muye na mano uku vintu visuma, lelo muye akaele uku viipe. 20 Pano Leza aakapeela umutende wasya amupeele amaka akusyunola Satana. Si cikuuku cikulu ica Mwene witu Yesu ciye namwe.

21 Timoti umuomvi munji wamulamuka, na Lukiyo, Yasoni, na Sosipata ya lupwa yane, nayo kwene yamulamuka.

22 Nani, ne Telitasi nemuno indemba kalata wii, namulamuka umu Mwene.

23 Gayusi, aakampokelela nupya wino amu cilongano yonsi yakalonganila umu ng’anda yakwe, wamulamuka. Elasita, aakaangalila icipao ca mu musumba, wamulamuka, nu mwinakwe Kwatosi, nawe kwene wamulamuka. 24* ——

25 Lyene kuli wiyo aangamukomya ukulingana ni lyasi lisuma lino nkasimikila pali Yesu Klistu, nupya ukulingana nu kusokololwa kwa nkama yakwe Leza iyafisilwe pa nsita itali, 26 lelo ndakai yasokololwa nupya yamanyikwa ukupitila umu Malembo ya usesemo umu nko zyonsi ukulingana ni sunde lyakwe Leza ilya manda pe ilikalanda pa kuya ni cuvwila ukupitila umu utailo; 27 kuli Leza, uwakwata sile mano wenga, kuye ululumbi ukupitila muli Yesu Klistu amanda pe. Ameni.