KALATA WA KUTANDIKILAKO KU INA KOLINTO

1 Ne Paulo, uwasoololwa ukuya umutumwa wakwe Klistu Yesu pa mulandu nu kulonda kwakwe Leza, indi pamwi na Sositeni umwina witu, 2 namulembela mwe ya mu cilongano cakwe Leza ica mu Kolinto, mweyano mwasangululwa muli Klistu Yesu, nu kwamwa ukuya amuzilo, pamwi na yonsi aakaama pi zina lya Mwene witu Yesu Klistu, nupya Umwene wao:

3 Si cikuuku cikulu nu mutende kufuma kuli Leza Tata witu nu ku Mwene witu Yesu Klistu viye namwe.

4 Lyonsi nkataizya Leza wane pali mwemwe, pa cikuuku cikulu cakwe Leza icapeelwa kuli mwemwe muli Klistu Yesu; 5 pano muli vyonsi mwacindama ukupitila muli aliwe, mu kulanda nu kumanya ningo izwi lyakwe Leza, 6 wakwe vino mwakomeleka ukusimikila pali Klistu, 7 pakuti mutuulizya ica upe icili consi, lino mukulolela ukusokololwa kwa Mwene witu Yesu Klistu. 8 Nupya Leza alamukomya ukufika nu ku mpela pakuti mutakapeelwe umulandu pa wanda wa Mwene witu Yesu Klistu. 9 Leza u wa cisinka, uwamwamile ukuti mukaye pamwi nu Mwanakwe Yesu Klistu Umwene witu.

10 Lyene nkumupaapata inane, ukupitila mwi zina lya Mwene witu Yesu Klistu ukuti mwensi kwene mulinzile ukuzumilizyanya muli vino mukulanda nupya patalinzile ukuya malekano pali mwemwe, lelo mulinzile ukuya na mano ali yamwi na melenganyo ali yamwi. 11 Pano yamwi amu ng’anda yakwe Koloye yaanena pali mwemwe inane ukuti mukupusana. 12 Cino nkupiliula icakuti, cila muntu muli mwemwe akalanda ivipusane. Umwi akati: “Nene wakwe Paulo,” muze nawe akati: “Nene wakwe Apolo,” muze nawe ati: “Nene wakwe Kefasi,”* alino muze nawe akati: “Nene wakwe Klistu.” 13 Uzye Klistu wapaatukana? Uzye Paulo awino yapoopiile pa cimuti pa mulandu winu? Nanti uzye mwabatiziwe umwi zina lyakwe Paulo? 14 Nkataizya Leza pano ntabatizye ali wensi pali mwemwe suka sile Klisipa na Gayusi, 15 pakuti kutaya nanti aumwi angalanda ukuti mwabatiziwe umwi zina lyane. 16 Ee kwene nabatizye na amu ng’anda yakwe Sitefani. Lelo aasyala yene nsikwiusya ndi cakuti nabatizyepo ali wensi. 17 Pano Klistu ataantumile mu kubatizya lelo wantumile mu kusimikila ilyasi lisuma; nupya asi pa mulandu nu kucenjela mu milandile, pakuti icimuti ca kucuziwilwapo* cakwe Klistu citaya ica sile sile.

18 Pano ukulanda pa cimuti ca kucuziwilwapo uuwelewele uku yantu aakononeka, lelo kuli sweyano tukupusuka, cikalanga maka yakwe Leza. 19 Pano calembwa ukuti: “Ndonona mano ya yantu aaya na mano, nupya ndakana ukucenjela kwa yantu acenjele.” 20 Uzye umuntu wa mano ali kwi? Uzye kalemba* ali kwi? Uzye umuntu uwatemwa ukupaazya umu wikazi wa ndakai* ali kwi? Uzye Leza ataalenzile amano ya mu nsi yii ukuya uwelewele? 21 Pano ukulingana na mano yakwe Leza, antu ya mu nsi yataamanyile Leza uku mano yao, Leza watemilwe ukupususya antu aataile ukupitila umu kuyasimikila ilyasi lisuma lino antu yakalola ukuti uuwelewele.

22 Pano Ayuda yakalonda ivimanyililo, Agiliki nayo yakalonda mano; 23 lelo tukasimikila pali vino Klistu wapoopiilwe pa cimuti, nupya Ayuda cikayasosya lelo antu amu nko yene yakalola ukuti uuwelewele. 24 Lelo kuli yano yaamwa, kuli kuti Ayuda na Agiliki, Klistu a maka yakwe Leza nupya a mano yakwe Leza. 25 Pano ivintu ivyafuma kuli Leza vino antu yakalola ukuti uuwelewele i vya mano ukuluta mano ya yantu, nupya ivintu ivyafuma kuli Leza vino antu yakalola ukuti i vitonte vyakoma ukucila antu.

26 Pano lolini inane mweyano yama, asi aingi aaya na mano,* nupya asi aingi aaya na maka, nupya asi aingi afumile umu ndupwa izikankala, 27 lelo Leza wasoolwile ivintu vino amu nsi yalolanga ukuti uuwelewele pakuti alenge antu aamano ukuya ni nsonyi; nupya wasoolwile ivintu vino amu nsi yalolanga ukuti i vitonte pakuti alenge antu amaka ukuya ni nsonyi; 28 nupya Leza wasoolwile ivintu vino amu nsi yalolanga ukuti vitacindama ni vintu ivisuulwe, ni vintu ivitayako, pakuti aonone ivintu ivyayako, 29 pakuti kutaya ali wensi uwa kuya ni cilumba kuli Leza. 30 Leza u walenga kuti muye muli Klistu Yesu, uwasokolola mano yakwe Leza nu ulungami wakwe, nupya Yesu u walenga ukuti antu yaye amuzilo, ni lambo i lyalenga kuti yakululwe, 31 pakuti ciye wakwe vino calembwa ukuti: “Aakuilumba ailumbila muli Yeova.”

2 Lino nizile kuli mwemwe inane, ntiizile ni mivwangile iiyele nanti ukuilanga uwa mano lino namusimikilanga pa nkama yakwe Leza. 2 Lino nali kuli mwemwe napingwilepo ukukanalanda pa cintu icili consi suka sile pali Yesu Klistu na vino wapoopiilwe pa cimuti. 3 Nupya nizile kuli mwemwe ala nene mutonte nupya nali ni ntete ala nkuzakaza nu kuzakaza; 4 nupya imivwangile yane na vino nasimikilanga vitalimo amazwi ya kutonsya aamano, lelo vyalangililanga maka ya mupasi, 5 pakuti utailo winu utaya mu mano ya yantu suka umu maka yakwe Leza.

6 Ndakai tukalanda ivya mano kuli yano yakula muli vyakwe Leza, lelo asi mano ya wikazi wa ndakai* nanti yakwe ya kateeka ya wikazi wa ndakai yano yalononwa. 7 Lelo tukalanda mano yakwe Leza mu nkama yakwe, amano aafiswa yano walandiile limwi lino kutatala kwaya uwikazi wa ndakai pakuti tukacindamikwe. 8 Kusi ya kateeka amu wikazi uu* aamanyile amano yaa, pano nga yayamanyile, nga yatapoopiile Umwene wa lulumbi pa cimuti. 9 Lelo cili wakwe vino calembwa ukuti: “Ilinso litaweni ni kutwi lituvwile, nupya kusi umuntu uwelenginyepo vino Leza wapekanyizizye antu aamutemwa.” 10 Pano Leza wasokolwile ivintu vii kuli sweswe ukupitila umu mupasi wakwe, pano umupasi ukalondelezya umu vintu vyonsi nu mu vintu kwene ivizike vyakwe Leza.

11 Uzye kwaya angamanya vino umuntu akaelenganya? Awe foo. Umwineco sile aakamanya vino akwelenganya. Vikwene avino kutaya umuntu uwamanya vyakwe Leza suka sile umupasi wakwe Leza. 12 Tutaapokelile umupasi wa muno nsi, lelo twapokelile umupasi ukufuma kuli Leza, pakuti tungamanya ivintu vino Leza watupeezile pa mulandu ni cikuuku cakwe. 13 Tusilanda ivintu vii ukuomvya mano yano twasambilile uku yantu, lelo tukaomvya mazwi yano twasambilile kufuma ku mupasi wakwe Leza, lino tukulondolola vyakwe Leza ukupitila umu mupasi.

14 Lelo umuntu aakatungululwa na vino umwili ukalonda asizumila ivintu ivikafuma ku mupasi wakwe Leza, pano i vya uwelewele kuli aliwe; nupya atanga avimanye, pano vikamanyikwa sile kuli wino akatungululwa nu mupasi. 15 Lelo umuntu aakatungululwa nu mupasi akalondelezya ningo ivintu vyonsi, nupya kusi uwakwata maka ya kumupingula. 16 Pano “uzye a weni uwamanya melenganyo yakwe Yeova, pakuti angamusambilizya? Lelo twakwata melenganyo yakwe Klistu.

3 Fwandi inane, nafizilwe ukulanda kuli mwemwe wa yantu aakatungululwa nu mupasi, lelo nalanzile kwati nkunena antu aakatungululwa na vino imili yao ikalonda, aya wa tunya muli Klistu. 2 Namupeezile umukaka, ntamupeezile ivyakulya ivikome, pano ala mutatala mwakoma. Nupya na ndakai kwene mutali mukome, 3 pano mucili mukalondela vino imili inu ikalonda. Vino mukauvwilana uzuwa nupya mukapaazyanya, uzye cisilanga ukuti mukatungululwa na vino imili inu ikalonda nu kucita wakwe vino antu ya mu nsi yakacita? 4 Pano ndi cakuti umwi walanda ukuti, “Nemo nene wakwe Paulo,” alino muze nawe walanda ukuti, “Nani nene wakwe Apolo,” uzye ale musikucita wakwe vino antu ya mu nsi yakacita?

5 Uzye lyene Apolo a weni? Nga Paulo a weni? Aaomvi sile aalenzile ukuti mutaile, aaomvile mulimo uno Umwene watupeezile. 6 Nemo nakomiile, Apolo nawe wakontelile, lelo Leza u walenzile ukuti cimele, 7 pakuti kakomela na kakontelela yatapokelela umucinzi, suka sile Leza aakalenga ukuti cimele. 8 Umuntu aakakomela na aakakontelela yaya icili cimwi, lelo cila muntu alapokelela icilambu kulingana nu mulimo wakwe. 9 Pano tukaombela pamwi na Leza. Namwe mwemwe calo cakwe Leza cino akulima, nupya mwemwe ng’anda ino Leza wakuula.

10 Pa mulandu ni cikuuku cikulu cino Leza wampeezile, naya wa muntu uwamanyikisya ukukuula, nupya nimvile umufula, lelo umuntu muze aliwe akukuulapo. Nomba lekini cila muntu aalola vino akukuula. 11 Pano kusi umuntu aangimba umufula uze ukucila pali uno wimbwa, kuli kuti Yesu Klistu. 12 Umwi angakuula pa mufula ukuomvya goldi, siuva na mawe ya mutengo, muze nawe angaomvya imbao, isote nanti imiti, 13 lelo umulimo wakwe yoili ulamanyikwa ningo pa wanda wa wezyo, pano pa wanda uwo umoto uliza usokolole umulimo wakwe cila muntu. 14 Ndi cakuti vino umwi wakuula pa mufula uwo vyasyala, alapokelela icilambu; 15 lelo ndi cakuti vino umwi wakuula pa mufula vyapya, alaponzya ivintu vyakwe, nomba wene alapusuka; lelo cilaya kwati wasompolwa sile umu moto.

16 Uzye mutamanya ukuti mwemwe itempele lyakwe Leza, nu kuti umupasi wakwe Leza wikala muli mwemwe? 17 Ndi cakuti umwi onona itempele lyakwe Leza, Leza alamonona; pano itempele lyakwe Leza i lya muzilo, nupya itempele lilyo a mwemwe kwene.

18 Kusi alinzile ukuibepa: Ndi cakuti umwi akwelenganya ukuti u wa mano mu wikazi wa ndakai,* lekini aye iciwelewele pakuti aye na mano. 19 Amano ya mu nsi yii uuwelewele kuli Leza, pano calembwa ukuti: “Akaalema aamano umu ucenjezi wao.” 20 Nupya kwene calembwa ukuti: “Yeova wamanya ukuti ukwelenganya kwa yantu ya mano u kwa sile sile.” 21 Fwandi umuntu wensi atayuvwila icilumba mu yantu; pano ivintu vyonsi i vinu, 22 asi mulandu aye Paulo nanti a Apolo nanti a Kefasi* nanti insi nanti uumi nanti imfwa nanti ivintu ivyayako ndakai nanti ivilayako, vyonsi kwene i vinu; 23 namwe mwemwe yakwe Klistu; Klistu nawe u wakwe Leza.

4 Umuntu alinzile aatulola ukuti sweswe yaomvi yakwe Klistu nupya tukaangalila inkama zyakwe Leza. 2 Nupya angalizi yakalondekwa ukuya ni cisinka. 3 Pali mwemwe pasi aalinzile ukundondelezya umulandu nanti sile i cilye ca yantu citalinzile ukundondelezya. Nupya nani kwene nsiilondelezya. 4 Pano nemo umu mwenzo wane ntacita iciipe icili consi. Lelo cii cisilanga ukuti nene mulungami; Yeova sile aakanceeceta. 5 Acino mutaapingula icili consi lino insita isoololwe itatala yafika, kufikila lino Umwene aliza. Wene alasokolola ivyafisama umu mfinzi nu kuvileta umu luswepo nupya alalenga ivyaya umu myenzo ya yantu kumanyikwa, nupya alino cila muntu yalamutaizya kuli Leza.

6 Lyene inane ivintu vii nkuvilanda ukulozya kuli nene na kuli Apolo pakuti ivintu vimuzipile, pakuti ukupitila muli sweswe mumanye isunde ilikati: “Mutaacila umu vyalembwa,” pakuti mutaaya ni cilumba, nu kulalola umwi ukuti wacindama ukucila umuze. 7 Pano a weni aakalenga upusaneko uku muzo? I cani cino ukweti cino utapokelile? Ndi cakuti wacipokelile u mulandu ci uno ukuyuvwila kwati utacipokelile?

8 Uzye mwakwata vyonsi vino mukalondekwa? Uzye mwemwe yakankala? Uzye mwatandika ukuteeka ukwaula sweswe? Ningatemwa nga mwatandika ukuteeka, pakuti naswe tungateeka pamwi namwe. 9 Pano nemo nkalola ukuti Leza walenga swe yatumwa ukuya akusyalikizya wa yantu aapingulwa ukufwa, pa mulandu wa kuti antu amu nsi kumwi na ya malaika yakatutamba. 10 Sweswe yawelewele pa mulandu wakwe Klistu, lelo mwemo mwemwe ya mano muli Klistu; sweswe yatonte, lelo mwemo mwemwe yakome; mwacindikwa, lelo swemo twasuulwa. 11 Kufika na ndakai twatwalilila ukuya ni nzala nu lusala nupya twasizya, yakatuuma nupya tutakwata umwa kwikala 12 nupya tukaombesya sweineco. Lino yakutupontela, swemo tukayapaala; lino yakutucuzya, swemo tukazizimizya; 13 lino yakulanda iviipe pali sweswe, tukaasuka ningo; twaya wa vikoona uku yantu ya muno nsi, nupya twaya wa vintu vya kusumba ukufika na ndakai kwene.

14 Nkumulembela ivintu vii pakuti imukonkomezye wa yana yano natemwa, asi pakuti imulenge ukuya ni nsonyi. 15 Nanti cakuti mwakwata ya kasambilizya* 10,000 aakamusambilizya ivya kulondela Klistu, mutaakwata ya tata inu aingi; lelo nemo indi wakwe tata winu nupya nkamusambilizya ilyasi lisuma alino ni vya kulondela Klistu Yesu. 16 Acino fwandi nkumupaapata ukuti mwankolanya. 17 Uli mulandu uno nkutumila Timoti kuli mwemwe, pano wene u mwana wino natemwa nupya waya ni cisinka umu mulimo wa Mwene. Wene alamwiusya vyonsi vino nkacita umu mulimo wakwe Klistu Yesu, wakwe vino nkusambilizya konsi umu vilongano vyonsi.

18 Yamwi yali ni cilumba kwati ntaliza kuli mwemwe. 19 Nasya ince nize likwene nga Yeova watemwa, ntaliza umu kuvwa imivwangile yakwe yayo acilumba, lelo u mukulola vino maka yao yali. 20 Pano Uwene wakwe Leza usilolekela muli vino umuntu akavwanga suka umu maka yakwe Leza. 21 Uzye mungatemwapo cani? Uzye ince nize nu mukota nanti nu kutemwa nu ufuuke?

5 Inuvwa ukuti muli mwemwe muli yamwi aakucita uzelele,* nupya uzelele* uwo utaatala wazanikwa mu yantu ya mu nko, uwakuti umonsi akalaala nu muci wakwe isi. 2 Uzye mwemo mukalola ukuti cili sile ningo? Uzye mutalinzile ukuloosya nu kufumya umuntu aakucita icintu cico muli mwemwe? 3 Nanti cakuti insi pamwi namwe, indi namwe umu mupasi, nupya napingula mpiti umuntu aakucita icintu cico kwati sile indi namwe. 4 Lino mwakomaana pamwi umwi zina lya Mwene witu Yesu nu kumanya ukuti indi namwe umu mupasi pamwi na maka ya Mwene witu Yesu, 5 mulinzile ukupeela umuntu wiyo kuli Satana pakuti uluyembu luno waleta umu cilongano lufumiziwepo na pakuti ukapepa wa cilongano ukacingililwe mu wanda wa Mwene.

6 Kuyuvwa kwinu kusi kusuma. Uzye mutamanya ukuti icitutumusi sile icinono cikatutumula umunya onsi? 7 Fumyini icitutumusi ca mpiti pakuti mungaya wa munya upya, pano muli mwemwe mutafwile ukuya icitutumusi icili consi. Pano Klistu Ucilo witu wapeezile umi wakwe ukuya ilambo. 8 Fwandi tutalinzile ukuomvya icitutumusi ca mpiti lino tukuzevya, nupya tutalinzile ukuomvya icitutumusi icikaimililako uluyembu ni viipe, lelo tulinzile ukulya umukate uwaula icitutumusi uukaimililako icisuma ni cumi.

9 Muli kalata wino namulembiile namunenyile ukuti mutauvwana na antu aakacita uzelele.* 10 Lelo ntalozizye umukuti mutalinzile ukuvwana na antu yonsi amu nsi yii aakacita uzelele* nanti antu ya lunkumbwa nanti acenjezi nanti ya kapepa ya vilubi. Pano iciya vivyo nga mwafumile umu nsi. 11 Fwandi lyene nkumulembela ukuti mute ukuvwana nu muntu ali wensi aakaitunga ukuya umwina lelo aakacita uzelele* nanti uwa lunkumbwa nanti kapepa wa vilubi nanti aakatukana nanti cakolwa nanti aakacenjezya auze, nupya mutalya pamwi nu muntu wa musango uwo. 12 Uzye nene ndinzile ukupingula antu ya kunzi? Uzye mutalinzile ukupingula amukasi, 13 lino Leza nawe akupingula akunzi? “Fumyini kacita wa viipe muli mwemwe.”

6 Uzye ali wensi muli mwemwe ndi wapusana nu muze angatwala umulandu uku cilye uku yantu aatalungama ukucila ukutwala uku yantu ya muzilo? 2 Nanti uzye mutamanya ukuti antu ya muzilo yalapingula antu ya muno nsi? Nupya ndi cakuti mwemwe mungapingula antu ya muno nsi, uzye mungafilwa ukupingula imilandu inono? 3 Uzye mutaamanya ukuti tulapingula ya malaika? Nomba lyene tungafilwa uli ukupingula intazi zya ndakai? 4 Uzye lyene ndi cakuti mwakwata amaka ya kupingula intazi izyayako ndakai, u mulandu ci uno mukaya uku yantu ya muno nsi yano icilongano casuula pakuti a yano yakamupingule? 5 Nkulanda vii pakuti muvwe insonyi. Uzye pali mwemwe pataaya nanti aumwi uwa mano aangapingula aina? 6 Lelo umwina akutwala umwina muze uku cilye nupya pa nkoleelo ya yantu aatataila!

7 Pano ndi cakuti mwatwalana uku cilye ala imucimviwa mpiti. U mulandu ci uno musizizimizya ndi cakuti aina yamuluvyanya? Cingaya sile ningo ukuyaleka yatoole sile ivintu vinu. 8 Lelo mukaluvyanya aina inu nu kuyasendela iviya!

9 Nanti uzye mutaamanya ukuti antu aatalungama yatalingila umu Wene wakwe Leza? Mutaabepwa. Antu aakacita uzelele,* aakapepa ivilubi, aakacita ucende, aonsi aakazumilizya aonsi yauze ukucita nayo uzelele, aonsi aakacita uzelele na onsi yauze,* 10 apuupu, alunkumbwa, ya cakolwa, aantusi, na acenjezi yatalingila umu Wene wakwe Leza. 11 Nupya yamwi pali mwemwe avino mwali. Lelo mwaswefiwa; mwasangululwa; mwalungamikilwa umwi zina lya Mwene witu Yesu Klistu nu mu mupasi wakwe Leza witu.

12 Nazumiliziwa ukucita ivintu vyonsi, lelo asi vyonsi ivikaavwa. Nazumiliziwa ukucita ivintu vyonsi, lelo ntalaleka ukuti natungululwa ni cili consi. 13 Ivyakulya vikaingila umunda, inda nayo ikasunga ivyakulya, lelo Leza alalenga vyonsi vyoili ukuya ivya sile sile. Umwili utalinzile ukuomviwa uku kucita uzelele* suka uku kuombela Umwene, nupya Umwene ali mwineco wa mwili. 14 Lelo Leza watuutulwile Umwene nupya naswe kwene alatutuutulula ukufuma uku yafwe uku maka yakwe.

15 Uzye mutaamanya ukuti imili inu i vilundwa vyakwe Klistu? Uzye lyene ndinzile ukutola ivilundwa vyakwe Klistu nu kuvilunda kuli cizelele? Awe foo! 16 Uzye mutaamanya ukuti ali wensi uwailunda kuli cizelele ala waya umwili onga nawe? Pano Leza walanda ukuti: “Yaili yalaya umwili onga.” 17 Lelo wensi uwailunda uku Mwene ala waya pamwi nawe umu mupasi. 18 Utukini uku uzelele!* Uluyembu luze luno umuntu akacita u lwa kunzi ya mwili, lelo wensi aakacita uzelele akayembukila umwili wakwe. 19 Uzye mutaamanya ukuti imili inu i tempele lya mupasi wa muzilo uwaya muli mwemwe, uwafuma kuli Leza? Nupya mwemwe yakwe Leza, 20 pano wamukazile pa mutengo ukulu. Mwaezya na maka ukucindika Leza umu mili inu.

7 Lyene ukulozya uku vintu vino mwalemvile, cazipa uku monsi ukukanalema* umwanaci; 2 lelo pa mulandu wa kuvulisya kwa uzelele,* lekini umonsi wensi akwate umuci nu mwanaci wensi nawe akwate iya. 3 Lekini iya apeele umuci cino alinzile ukupeelwa, umuci nawe kwene apeele iya cino alinzile ukupeelwa. 4 Umuci atakwata amaka pa mwili wakwe, suka iya; iya nawe kwene atakwata amaka pa mwili wakwe, suka umuci. 5 Mutaimana suka sile nga mwazumilizyanya apa nsita imwi, pakuti muomvye insita iiyo uku kupepa alino nu kwizaya pamwi nupya, pakuti Satana ataamutunka pa mulandu wa kukanaikaanya kwinu. 6 Lelo namupeela insambu zya kucita vivyo, nomba asi sunde. 7 Lelo ningatemwa ndi cakuti antu yonsi yali wakwe nene. Nomba cila muntu wakwata ica upe ukufuma kuli Leza, wenga umu nzila yii, muze nawe umu nzila yuze.

8 Lyene nkunena aatatwala nanti ukutwalwa kumwi na ya mukamfwilwa ukuti cingazipa nga yatwalilile ukuya wakwe nene. 9 Lelo ndi cakuti yatanga yaikaanye, lekini yatwale nanti ukutwalwa, pano cazipa ukutwala nanti ukutwalwa ukucila ukuya sana ni nsuna.

10 Lyene kuli yano yatwalana nkuyanena ukuti, umuci atalinzile ukufuma kuli iya, asi nene nkulanda lelo u Mwene. 11 Lelo umuci nga wafuma kuli iya, atwalilile ukwikala ukwaula ukutwalwa nanti aswilile kuli iya; nupya iya atalinzile ukusya umuci.

12 Lelo yauze nkuyanena ukuti ndi cakuti umwina wakwata umuci aatataila nupya umuci akulonda ukwikala nawe, atalinzile ukumusya, anene nkulanda, asi Umwene; 13 nupya ndi cakuti umwanaci wakwata iya aatataila nupya umonsi akulonda ukwikala nawe, atalinzile ukumusya. 14 Pano iya aatataila akaya umusanguluke pa mulandu nu muci, nupya umuci aatataila akaya umusanguluke pa mulandu na iya uwataila, nga citaali vivyo ana inu yangaya akowele, lelo ndakai aamuzilo. 15 Lelo ndi cakuti aatataila wapingulapo ukufumako,* angafumako; umwina nanti nkazi atalinzile ukupatikiziwa ukwikala nawe nga caya vivyo, nomba Leza wamwama ukuti muye nu mutende. 16 Pano we muci, wamanya uli ndi cakuti limwi wewe ungaca upususye uwako? Nanti, we iya, wamanya uli ndi cakuti limwi wewe ungaca upususye mamako?

17 Lelo wakwe viivi kwene vino Yeova wapeela cila muntu ica upe, lekini cila muntu acita ukulingana na vino Leza wamwama. Nupya vikwene avino nkunena ni vilongano vyonsi. 18 Uzye umwi wamilwe ala u muzembululwe? Lekini atwalilile ukuya umuzembululwe. Uzye umwi wamilwe ala asi muzembululwe? Lekini aye vivyo kwene ukwaula ukuzembululwa. 19 Ukuzembululwa kutaakwata incito, nu kukanazembululwa nako kwene kutaakwata incito; icacindama u kulondela masunde yakwe Leza. 20 Lekini cila muntu atwalilile ukuya viivi kwene vino wali lino wamilwe. 21 Uzye wamilwe ala wewe muzya? Cico citalinzile ukukusakamika; lelo ndi cakuti isyuko lya kuya umuntungwa lyaloleka, utalipanya. 22 Pano wensi uwamiilwe umu Mwene lino wali umuzya, u muntungwa umu Mwene; nupya wensi uwamilwe lino wali umuntungwa, u muzya wakwe Klistu. 23 Mwakazilwe pa mutengo ukome; fwandi tiini ukuya azya ya yantu. 24 Inane lekini cila muntu atwalilile ukuya cuza wakwe Leza wakwe vino wali lino wamilwe.

25 Lyene ukulozya kuli yano yataatala yatwalapo nanti ukutwalwa, ntakweti amazwi ya kuyanena ukufuma uku Mwene, lelo namalanda sile vino nkwelenganya wa muntu wino Umwene walangizya uluse pa kuya uwa cumi. 26 Fwandi nkwelenganya ukuti cazipa umuntu atwalilile wakwe vino waya pa mulandu ni ntazi zya ndakai. 27 Uzye wakwata umuci wako? Utalonda ukusapulwa. Uzye utakwata umuci wako? Utalonda ukukwata umuci. 28 Lelo nanti cakuti watwala nanti ukutwalwa, ala utacisile uluyembu. Nupya umusimbe nga watwala nanti ukutwalwa, ala atacisile uluyembu. Lelo yano yatwala nanti ukutwalwa yalakwata intazi umu mili yao. Nemo nkwezya sile ukumucingilila uku ntazi.

29 Nupya inane namunena ukuti, insita iyatisyalako yaticepa. Acino ukufuma ndakai kwene, aakwata ya mama yaye kwati yatakwata, 30 nupya akuloosya yaye wa yantu asikuloosya, na akusansamuka yaye wa yantu asikusansamuka, na akukala yaye wa yantu aatakweti nanti acimwi, 31 na akuomvya insi yii yaye wa yantu asiiomvya sana; pano ivintu vya mu nsi yii vikusenuka. 32 Nkulonda ukuti muye antungwa uku masakamika. Umuntu aatatwala akasakamala pa vintu vya Mwene, pali vino angatemwikwa uku Mwene. 33 Lelo umuntu uwatwala akaika mano uku vintu vya mu nsi, pali vino angatemwikwa kuli mamakwe, 34 nupya akapumvyanyiziwa. Lelo umwanaci aatatwalwa, kumwi nu musimbe, yakaika mano uku vintu vya Mwene, pakuti yangaya amuzilo uku mwili nu ku mupasi. Nomba umwanaci uwatwalwa, akaika amano uku vya mu nsi, pakuti angatemwikwa kuli iya. 35 Lelo nkumunena vii pakuti ivintu vimuzipile, nsikumupoka untungwa, lelo nkulonda ukuti mwacita ivisuma alino nu kutwalilila ukuombela Umwene ukwaula ukupumvyanyiziwa.

36 Lelo ndi cakuti umwi akulola ukuti cikumutalila ukwikala ukwaula ukutwala nanti ukutwalwa, nupya nga watacila pa musinku wa wance, cingazipa ukuti atwale; ala atayembwike. 37 Lelo ndi cakuti umwi akulola ukuti angakwanisya nupya kusi icingamutalila, nupya akweti amaka ya kuikaanya nupya watapingula umu mwenzo wakwe ukwikala ukwaula ukutwala nanti ukutwalwa, ala wacita ningo. 38 Fwandi wensi uwatwala nanti ukutwalwa, ala wacita ningo, lelo wensi uwakana ukutwala nanti ukutwalwa, ala wene wacita ningo sana.

39 Umuci asiya nu untungwa wa kutwalwa lino iya acili nu umi. Lelo ndi cakuti iya wafwa, u muntungwa ukutwalwa kuli wensi wino akulonda, cikulu sile watwalilwa umu Mwene. 40 Lelo nemo nkulola ukuti angaya ni nsansa nga watwalilila ukwikala vivyo kwene; nupya nkwelenganya ukuti nani kwene nakwata umupasi wakwe Leza.

8 Lyene ukulozya uku vyakulya ivikapeelwa uku vilubi: Twamanya ningo pa mulandu uu. Ukumanya kukalenga umuntu ukuya ni cilumba, lelo ukutemwa kukalenga umuntu ukukoma muli ukapepa. 2 Ndi cakuti umwi akwelenganya ukuti wamanya cimwi, ala atatala wacimanya vino alinzile ukucimanya. 3 Lelo ndi cakuti umwi watemwa Leza, akamanyikwa kuli aliwe.

4 Lyene ukulozya uku vyakulya ivikapeelwa uku vilubi, twamanya ukuti icilubi citakwata incito umu nsi nupya kwaya sile Leza wenga. 5 Pano nanti cakuti kwaya yano yakaamwa ukuti ya leza umwi yulu nanti pano nsi, wakwe vino kwaya ya “leza” aingi na “ya mwene” aingi, 6 swemo twakwata Leza wenga, nupya Tata, uwaumvile ivintu vyonsi kumwi naswe kwene; nupya kwaya sile Umwene wenga Yesu Klistu, wino ivintu vyonsi vyaumvilwe ukupitila muli aliwe kumwi naswe kwene.

7 Lelo asi yonsi amanya vivyo. Nomba yamwi pa mulandu na vino yapepanga ivilubi, yakalya ivyakulya kwati a malambo aakapeelwa uku vilubi, nupya vino ya kampingu yao yatonta, yakakoweziwa. 8 Lelo ivyakulya vitanga vitupalamike kuli Leza; tutalaponzya icili consi nga tutalile, nupya tutalazana icili consi nga twalya. 9 Lelo mwacenjela pakuti nsambu zinu izya kuisoolwela zitaasosya atonte. 10 Pano ndi cakuti ali wensi wakulola wemuno wamanya ivintu ukulya ivyakulya umwi tempele lya vilubi, uzye kampingu wa muntu wiyo umutonte atalakomeleka icakuti atandike nu kulya ivikapeelwa uku vilubi? 11 Fwandi umwinako umutonte wino Klistu wafwilile akononeka pa mulandu nu kumanya kwako. 12 Ndi cakuti mwayembukila aina umu musango uu nu kucisa ya kampingu yao atonte, ala mukuyembukila Klistu. 13 Acino ndi cakuti ivyakulya vikusosya umwinane, ntalalyapo nupya inyama, pakuti ntacansosye umwinane.

9 Uzye asi nene muntungwa? Uzye asi nene mutumwa? Uzye ntalola Yesu Mwene witu? Uzye mutayako pa mulandu nu umulimo uno nkaombela Umwene? 2 Nanti cakuti insi nene mutumwa uku yantu yauze, nene mutumwa kuli mwemwe! Pano mwemwe muli usininkizyo uukalanga ukuti nene mutumwa wa Mwene.

3 Ukuilandila kwane kuli yano yakandondelezya kwaya wakwe vii: 4 Uzye tutakwata insambu zya kulya nu kumwa? 5 Uzye tutakwata insambu zya kutwala umwanaci uwataila nu kupita nawe, wakwe vino na atumwa yonsi na ina ya Mwene kumwi na Kefasi* yakacita? 6 Nanti uzye ale a Banaba mutupu nani swemuno tutakwata insambu izya kuta ukuomba pakuti twazana ivikalondekwa umu umi? 7 Uzye u musilika ci aakailipilila vino akulondekwa? A weni aakalima icalo ca myangazi nu kukanalya ivizao vya mu calo cico? A weni aakacema iviteekwa nu kukana mwako umukaka wa viteekwa vivyo?

8 Uzye nkulanda ivintu vii ukulingana na vino antu yakaelenganya? Nanti uzye ali vino na Masunde kwene yakalanda? 9 Pano calembwa umu Masunde yakwe Mose ukuti: “Utanyepa cipambasi uku kanwa lino akulyatola ingano.” Uzye ale aacipambasi a yano Leza akaikako amano? 10 Nanti uzye ataalanzile vivyo pa mulandu witu? Calemvilwe pa mulandu witu, pano umuntu aakulima akaenekela ukuti alazombola, na akupuula akaenekela ukuti alalya vino akupuula.

11 Ndi cakuti twakomiile ivintu vyakwe Leza kuli mwemwe, uzye cingiipa nga twapokelile ivintu ivikulondekwa ukufuma kuli mwemwe? 12 Ndi cakuti antu yauze yakwata insambu zya kupokelela ivintu vivyo ukufuma kuli mwemwe, uzye swemo tutakweti insambu ukucila na antu yayo? Nomba tusiomvya insambu zizyo, lelo tukazizimizya muli vyonsi pakuti umu nzila ili yonsi tutacilikila ilyasi lisuma pali Klistu. 13 Uzye mutaamanya ukuti antu aakaomba imilimo yakwe Leza yakalya ivintu vya pi tempele, na aakaombela lyonsi pa ulambo yakapeelwako ivya pa ulambo? 14 Umu nzila ili yonga kwene, Umwene wanenyile aakasimikila ilyasi lisuma ukwikala ukulingana ni lyasi lisuma.

15 Lelo nemo ntaomvyapo insambu ili yonsi pali zii. Nupya nsikumulembela ivintu vii pakuti avino ciye kuli nene, pano cazipa ukufwa ukucila kuti umuntu ampoke vino nkayuvwilapo! 16 Lyene ndi cakuti nkusimikila ilyasi lisuma, ntakweti insambu zya kuyuvwa, pano ali vino mfwile ukucita. Kalanda kuli nene nga nsisimikila ilyasi lisuma! 17 Ndi cakuti nkuomba umulimo uu umu kuitemelwa ala nkweti cilambu; lelo nanti cakuti nkuomba ukwaula ukuitemelwa, nalyo kwene ala ncili nu wangalizi uwapeezilwe kuli nene. 18 Nga lyene i cilambu ci cino nkakwata? I cakuti lino nkusimikila ilyasi lisuma, nkasimikila ukwaula ukulipilwa, pakuti ntaomvya uyi uyi insambu zyane umwi lyasi lisuma.

19 Nanti cakuti nene muntungwa uku yantu yonsi, nkaipanga ukuya umuzya kuli yonsi, pakuti ningavwa antu aingi. 20 Ku Yayuda nizile inja wa Muyuda pakuti nazwe Ayuda; kuli yano yakalondela masunde nizile inja wa muntu aakalondela masunde nanti cakuti nsilondela masunde, pakuti nazwe aakalondela masunde. 21 Kuli yano yasilondela masunde nizile inja wa muntu aasilondela masunde pakuti nazwe asilondela masunde nanti cakuti nkalondela masunde yakwe Leza, nupya nkatungululwa na masunde yakwe Klistu. 22 Ku yatonte nizile inja umutonte pakuti nazwe atonte. Nkacita vyonsi vino ningacita pakuti nazwe antu amisango yonsi, pakuti ningapususyako yamwi. 23 Lelo nkacita ivintu vyonsi pa mulandu wi lyasi lisuma, pakuti ningasimikilako yamwi.

24 Uzye mutamanya ukuti aakasimula umu lwilo lwa kucimvyanya yakasimula yonsi, lelo wenga sile aliwe akapeelwa icilambu? Namwe kwene mwasimula ningo pakuti mukacimvye. 25 Lelo yonsi aakaya umu vyangalo vya kucimvyanya yakaikaanya muli vyonsi. Yakacita vivyo pakuti yangapeelwa icilambu icingononeka, lelo swemo icilambu citu citanga cononeke. 26 Acino nemo nsisimula icisimulesimule; nupya vino nkasumba amakofi vyapusana nu muntu aakauma umuza; 27 lelo nkacuzya umwili wane nu kuuteeka uuzya, pakuti lino nasimikila kuli yauze Leza atankaana.

10 Lyene inane nkulonda mumanye ukuti ivikolwe vitu vyonsi vyali umwisika li kumbi nupya yonsi yapisile pali yemba 2 nupya yonsi yabatiziwe muli Mose lino yali umwisika li kumbi ala yakupita pali yemba, 3 nupya yonsi yaliile icakulya icili cimwi cino Leza wayapeezile 4 nupya yonsi yamwile amanzi ali yamwi yano Leza wayapeezile. Pano yamwanga umu ciliwe cakwe Leza icayalondelanga, nupya iciliwe cico cimililangako Klistu. 5 Lelo Leza ataatemilwe vino aingi yacitanga, acino yakomiilwe umu lwanga.

6 Ivintu vii vizile iviya ivyakutusambilizya, pakuti tutaakumbwa iviipe wakwe vino yavikumvilwe. 7 Nupya tutaapepa ivilubi wakwe vino yamwi muli aliyo yacisile, wakwe vino calembwa ukuti: “Antu ikazile nu kutandika ukulya nu kumwa, nupya yatandike nu kusansamuka.” 8 Nupya tutaacita uzelele* wakwe vino yamwi pali aliyo yacisile uzelele,* nupya antu 23,000 yafwile pa wanda onga sile. 9 Nupya tutaezya Yeova wakwe vino yamwi pali aliyo yamwezizye, nu kufwa uku nzoka. 10 Nupya tutailizyanya wakwe vino yamwi pali aliyo yailizyanyizye nu kukomwa uku mononyi. 11 Ivintu vii vyayacitikile pakuti tusambilileko nupya vyalemvilwe uku kutucelula swemuno tuli ku mpela ya wikazi wa ndakai.

12 Fwandi aakwelenganya ukuti wataimilila, acenjele pakuti atapona. 13 Kutaaya uwezyo uwiza pali mwemwe uusicitikila antu yonsi. Lelo Leza u wa cumi, nupya atalaleka ukuti mweziwe ukucila pali vino mungazizimizya, lelo lino mweziwa alapekanya inzila iyakuti mufumilemo pakuti mungazizimizya.

14 Acino mwe yatemwikwa yane utukini uku kupepa ivilubi. 15 Nkulanda kwati nkunena antu aakailuka; pingulini mweineco vino nkulanda. 16 Uzye kapu wakwe waini wino tukataizizyapo kuli Leza, asiimililako uwazi wakwe Klistu? Nu mukate uno tukamokoola, uzye uusiimililako umwili wakwe Klistu? 17 Nanti cakuti twavula, twaya umwili onga pa mulandu wakuti kwaya umukate onga, pano swensi tukalya ku mukate kwene uwo onga.

18 Lolini vino aina Izlaeli yacitanga: Uzye aakalya malambo yasipepela Leza pa ulambo? 19 Uzye lyene cino nkulanda i cani? Uzye api lambo ilikapeelwa ku cilubi alino ni cilubi, icacindamapo i cani? 20 Pasi; lelo nkulanda ukuti malambo yano antu ya mu nko yakapeela, yakapeela ku viwa asi kuli Leza; nupya nsikulonda ukuti mwauvwana ni viwa. 21 Mutanga mwamwela muli kapu wakwe Yeova na muli kapu wa viwa; mutanga mwaliila “pi tebulo lyakwe Yeova” na pi tebulo lya viwa. 22 Nanti ‘uzye tukulonda ukuti Yeova aye nu uzuwa’? Uzye twamucila amaka?

23 Ivintu vyonsi vyazumiliziwa, lelo asi vyonsi ivikaavwa. Ivintu vyonsi vyazumiliziwa, lelo asi vyonsi ivikakomelezya. 24 Lekini cila muntu ataalonda ivingamuzipila, lelo aalonda ivingazipila umuntu muze.

25 Mwalya inyama ili yonsi ino yakakazya pa maliketi, ukwaula ukuzyapo pa mulandu na ya kampingu inu, 26 pano “Yeova ali mwineco wa nsi na vyonsi ivyayamo.” 27 Ndi cakuti umuntu aatataila wamwama ukwakwe nupya mukulonda ukuyako, mulinzile ukulya vyonsi vino wamupekanyizizya ukwaula ukuzyapo pa mulandu na kampingu winu. 28 Lelo ndi cakuti ali wensi wamunena ukuti, “Inyama yii yapeezilwe ku vilubi,” mutafwile ukulya pa mulandu nu muntu wiyo uwamunena na pa mulandu wakwe kampingu. 29 Nsikulozya kuli kampingu winu, lelo nkulozya kuli kampingu wa muntu muze. Pano u mulandu ci uno kampingu wa muntu muze angapingwila untungwa wane? 30 Ndi cakuti nkutaizya Leza lino nkulya, u mulandu ci uno ningapontelwa pa cintu cino nkutaizizyapo?

31 Fwandi, ndi cakuti mukulya nanti mukumwa nanti mukucita icili consi, mwacita vyonsi ku kucindika Leza. 32 Mutaasosya Ayuda na Agiliki alino ni cilongano cakwe Leza, 33 wakwe vino nkaezya ukuzanzya antu yonsi muli vyonsi, nsilonda ivinganzipila lelo nkalonda ukucita ivingazipila aingi, pakuti yangapusuka.

11 Mwankolanya wakwe vino nani nkakolanya Klistu.

2 Nkumutaizya pano muli vyonsi mukanjiusya nupya mukalondela vino namusambilizye. 3 Lelo nkulonda mumanye ukuti umutwe wa monsi wensi a Klistu; nu mutwe wa mwanaci u monsi; nupya umutwe wakwe Klistu a Leza. 4 Umonsi wensi aakapepa nanti ukusesema lino wataviimba cimwi uku mutwe ala akuzewanya umutwe wakwe; 5 lelo umwanaci aakapepa nanti ukusesema ukwaula ukuviimba cimwi uku mutwe ala akuzewanya umutwe wakwe, pano i cili cimwi nu mwanaci uwatapela inyele uku mutwe wakwe. 6 Pano ndi cakuti umwanaci ataviimvile uku mutwe, ale alinzile ukusentoola ni nyele kwene; lelo ndi cakuti i ca nsonyi uku mwanaci ukusentoola inyele nanti ukupela sile zyonsi alinzile ukuvimba uku mutwe.

7 Umonsi atalinzile ukuvimba uku mutwe pano Leza wamuumvile umu cata cakwe nu mu lulumbi lwakwe, lelo umwanaci akalenga umonsi ukucindikwa. 8 Pano umonsi ataafumile uku mwanaci, lelo umwanaci u wafumile uku monsi. 9 Nupya icikalamba i cakuti, umonsi ataumvilwe pa mulandu wa mwanaci, lelo umwanaci u waumvilwe pa mulandu wa monsi. 10 Uli mulandu kwene uno umwanaci alinzile ukuvimbila uku mutwe ukulangilila ukuti akauvwila iya, pa mulandu wakwe ya malaika.

11 Nupya ukulozya uku Mwene, umwanaci atanga ayeko ukwaula umonsi, umonsi nawe atanga ayeko ukwaula umwanaci. 12 Pano wakwe viivi kwene vino umwanaci wafuma uku monsi, avino nu monsi wafuma umu mwanaci; lelo ivintu vyonsi vyafuma kuli Leza. 13 Pingulini mweineco: Uzye cili sile ningo uku mwanaci ukupepa kuli Leza ukwaula ukuvimba uku mutwe? 14 Uzye ukulingana sile ni civyalilwa mutasambilila ukuti i ca muzewanya uku monsi ukukwata inyele izitali, 15 lelo umwanaci nga akweti inyele izitali ala wene amacindikwa? Pano wene wapeelwa inyele ukucila ica kuvimba uku mutwe. 16 Lelo ndi cakuti ali wensi akulonda ukupaazya pa mulandu nu lutambi luze, mulinzile ukumunena ukuti tutaakwata ulutambi luze nanti sile i vilongano vyakwe Leza, navyo kwene vitaakwata.

17 Lelo lino nkumunena ivintu vii, nsikumutaizya, pano lino mwakomaana, musicita ivisuma, lelo mukacita iviipe. 18 Pano ica kutandikilapo, nuvwa ukuti lino mwakomaana umu cilongano, pakaaya malekano pali mwemwe nupya nasininkizya cico. 19 Pano muli mwemwe mulaya nu tumaumba, pakuti antu yano Leza watemwa yamanyikwe.

20 Lino mwakolongana pa ncende yonga umu kulya Icakulya ca Manguzi ca Mwene musiilya umu nzila isuma. 21 Pano lino mukulya, mukaliila limwi icakulya ca manguzi, yamwi yakasyala ni nzala lelo yauze yene ala iyakoleka. 22 Uzye mutaakwata mang’anda kuno mungaliila nu kumwa? Nanti uzye mukasuula icilongano cakwe Leza nu kuleka ukuti aatakweti nanti acimwi yuvwe insonyi? I vyani vino nimamunena? Uzye ndinzile ukumutaizya? Awe paa pene nsikumutaizya.

23 Pano vino napokelile uku Mwene avino namwe kwene namupeezile, ivyakuti pa wanda uno Umwene Yesu wali nu kufutukwa watozile umukate, 24 nupya lino wataizye kuli Leza, waumokwile nu kulanda ati: “Umukate uu ukwimililako umwili wane uukupeelwa pa mulandu winu. Mwacita cii pa kunjiusya.” 25 Nupya wacisile icili cimwi kwene na kuli kapu pa cisila ca kulya icakulya ca manguzi, ayanena ati: “Kapu wii akwimililako upangano upya uulatandika ukuomba lino ndazwisya uwazi wane pa mulandu winu. Lyonsi lino mwamwamo, mwacita cii pa kunjiusya.” 26 Pano lyonsi lino mwalya umukate nu kumwa waini muli kapu wii, ala mukusimikila pa mfwa ya Mwene, suka ace aize.

27 Acino wensi aakulya umukate nanti ukumwa waini muli kapu wa Mwene umu musango utazifile, alaya nu mulandu wa kukana cindika umwili nu wazi wa Mwene. 28 Inkoleelo umuntu atale aipime nga watalinga, lyene alino alye umukate nu kumwa waini. 29 Pano ndi cakuti umwi akulya nu kumwa ukwaula ukumanya cino umwili ukapiliula ala akuiletela upinguzi umwineco. 30 Uli mulandu kwene uno aingi pali mwemwe yatontela nu kulwala, nupya aingi yafwa.* 31 Lelo ndi cakuti twamanya vino sweineco twaya, tutanga tupingulwe. 32 Lelo ndi cakuti twapingulwa, ala Yeova u watusalapula, pakuti tutapeelwa umulandu uku yantu ya mu nsi. 33 Fwandi inane, lyonsi lino mwakolongana uku kulya, mwalolelana. 34 Ndi cakuti umwi ali ni nzala, alinzile ukulya uku ng’anda, pakuti lino mwakolongana pamwi kutaya uwa kupingulwa. Lelo pa milandu iyasyala, ndiza malilile lino ndiza kuko.

12 Lyene inane nkulonda ukuti mumanye vyonsi ukulozya uku vya upe ukufuma kuli Leza. 2 Mwamanya ukuti lino mutali mutaile, mwatunkwanga ukuti mwapepa ivilubi ivisivwanga, ala vikumutungulula konsi kuno vikulonda. 3 Lyene nkulonda mumanye ukuti kusi umwi aakalandila umu mupasi wakwe Leza ati: “Yesu watiipwa!” nupya kusi angalanda ati: “Yesu u Mwene!” suka sile nga ali nu mupasi wa muzilo.

4 Kwaya ivya upe ivipusanepusane, lelo umupasi wene waya sile onga; 5 nupya kwaya imilimo ipusanepusane, lelo kwaya sile Umwene wenga; 6 nupya umupasi wa muzilo ukalenga antu ukuomba imilimo iingi, lelo kwaya Leza wenga aakacita ivintu vivyo ukupitila umu yantu yonsi. 7 Lelo umupasi ukapeelwa kuli cila muntu pa kuti ivintu vizipile yonsi. 8 Pano umwi umupasi ukamupeela ica upe ica kulanda na mano, muze nawe ukamupeela ica upe ica kumanya ningo ivya kulanda, 9 muze nawe ukamupeela utailo, muze nawe ivya upe vya kupozya, 10 lelo muze nawe ukamupeela maka ya kucita ivizungusyo, muze nawe ica upe ca kusesema, muze nawe ukwiluka ndi cakuti amazwi yaafuma kuli Leza nanti foo, muze nawe ica upe ca kulandila umu ndimi zipusanepusane, muze nawe ica upe ca kupiliwila umu ndimi zipusanepusane. 11 Lelo imilimo yonsi yii ikaombwa ukupitila umu mupasi uli umwi kwene, ukapeela cila muntu ukulingana na vino ukulonda.

12 Pano nanti cakuti kwaya umwili onga, lelo kwaya ivilundwa ivingi; nupya nanti kwaya ivilundwa ivingi, lelo kwaya sile umwili onga, avino caya na kuli Klistu. 13 Pano swensi kwene twabatiziwe umu mupasi onga pakuti tuye umwili onga, asi mulandu sweswe Yayuda nanti Agiliki, sweswe yazya nanti antungwa, swensi twapokelile umupasi uli umwi.

14 Pano umwili utapangwa ni cilundwa conga, lelo wapangwa ni vilundwa ivingi. 15 Ndi cakuti ulwazo lwalanda ukuti, “Vino nemo asi nene ikasa, asi nene cilundwa ca mwili,” cico citanga cilenge ulwazo ukuta ukuya icilundwa ca mwili. 16 Nupya ndi cakuti ikutwi lyalanda ukuti, “Vino nemo asi nene linso, asi nene cilundwa ca mwili,” cico citanga cilenge ikutwi ukuta ukuya icilundwa ca mwili. 17 Ndi cakuti umwili onsi wali i linso, uzye nga tukauvwila kwi? Ndi cakuti umwili onsi wali ikutwi, nga tukanunsizya kwi? 18 Lelo Leza wika icilundwa conga na conga uku mwili ukulingana na vino walondanga.

19 Ndi cakuti ivilundwa vyonsi iviya icilundwa conga, uzye umwili nga wayela kwi? 20 Ivilundwa vyaya ivingi, lelo umwili wene waya onga. 21 Ilinso litanga linene ikasa liti, “Nsikukulonda,” nanti umutwe utanga unene ingazo uti, “Nsikumulonda.” 22 Lelo ni vilundwa vya mwili ivikaloleka ukuti ivitonte vikalondekwa, 23 nupya ivilundwa vya mwili vino tukaelenganya ukuti vitacindama sana avino tukacindika sana, fwandi ivilundwa ivisiloleka ningo i vikacindikwa sana, 24 lelo ivilundwa ivikaloleka ningo visilondekwa icili consi. Nomba Leza wapanga umwili nu kucindika sana ivilundwa ivikaloleka ukuti vitacindama sana, 25 pakuti mutaya malekano umu mwili, lelo ivilundwa vya mwili vifwile vyasakamalana. 26 Ndi cakuti icilundwa conga cikucula, ivilundwa vyonsi ivyasyala vikaculila pamwi naco; nanti ndi cakuti icilundwa conga cacindamikwa, ivilundwa vyonsi ivyasyala vikasansamukila pamwi naco.

27 Mwemwe mwili wakwe Klistu, nupya cila muntu i cilundwa ca mwili wakwe Klistu. 28 Nupya Leza wapeela antu imilimo ipusanepusane umu cilongano: Yamwi aatumwa, yamwi aakasesema, yamwi aakasambilizya; yamwi yakacita ivizungusyo; yamwi yakwata ivya upe vya kupozya; yamwi yakaomba imilimo ya kwavwilizya; yamwi yakwata amaka ya kutungulula; na yamwi yakalandila umu ndimi izipusanepusane. 29 Uzye yonsi aatumwa? Uzye yonsi aakasesema? Uzye yonsi aakasambilizya? Uzye yonsi yakacita ivizungusyo? 30 Uzye yonsi yakwata ivya upe vya kupozya? Uzye yonsi yakalandila umu ndimi? Uzye yonsi yakapiliwila umu ndimi zyuze? 31 Lelo twalililini ukulondesya ivya upe ivikalamba. Nupya nani ndamulanga inzila iicizilepo.

13 Ndi cakuti nkulandila mu ndimi zya yantu nu mu ndimi zyakwe ya malaika lelo ntakweti ukutemwa, ala indi wa cela icikulila nanti wa cingwengwe. 2 Nupya ndi cakuti nakwata ica upe ca kusesema ni ca kwiluka inkama zyakwe Leza zyonsi alino nu kumanya vyonsi, nupya ndi cakuti nakwata utailo uwakuti ningasezya ni myamba, lelo ntakweti ukutemwa, ala nene wa sile sile. 3 Nupya ndi cakuti nakazya vyonsi vino nakwata pakuti nsakamale yauze alino nu kupeela umwili wane ku yantu pakuti nkwate apa kuyuvwila, lelo ntakweti ukutemwa, ala kusi icingangazwa.

4 Ukutemwa kukateeka umwenzo nupya kwaya ni cikuuku. Ukutemwa kutaya nu uzuwa. Ukutemwa kusiyuvwa nupya kusiitutumula, 5 kutakwata akasa, kusicita ivya kuizanzya nupya kusyasepukilwa. Ukutemwa kusisungilila iviipe vino yauze yakatucitila. 6 Kusyasansamukila mu viipe, lelo kukasansamukila umu cumi. 7 Kukasuulako kuli vyonsi, kukazumila vyonsi, kukataila vyonsi, nupya kukazizimizya vyonsi.

8 Ukutemwa kusisila. Lelo ndi cakuti kwaya ivya upe vya kusesema, vilasila; nga kwaya ivya upe vya kulandila mu ndimi,* vilasila; nupya nga kwaya kumanya, nako kwene kulasila. 9 Pano twamanya sile vinono nupya tukasesema sile panono, 10 lelo lino icikumanile ciliza, icisi cikumanile cilasila. 11 Lino nali umwance, nalandanga wa mwance, nelenganyanga wa mwance nu kulola ivintu wa mwance; nomba lyene vino nene wikolo nata ivya wance. 12 Pano ndakai tusilola ningo, caya kwati tukalola muli miila wa cela, lelo tulalola ningo. Ndakai ntamanya ningo, lelo ndamanya ningo wakwe vino namanyikwa ningo. 13 Lelo vii vitatu vilasyala: utailo, upaalilo nu kutemwa; lelo icikalamba sana pali vii u kutemwa.

14 Mwalondesya ukuya nu kutemwa, lelo mwaezya ukulondesya ivya upe vyakwe Leza, sana sana ica upe ca kusesema. 2 Pano aakalandila umu ndimi akalandila kuli Leza, asi ku yantu, pano kusi aanguvwa, lelo akalanda inkama zyakwe Leza ukupitila umu mupasi. 3 Lelo aakasesema, akaazwa antu, kuyakomelezya nu kuyateekezya umu milandile yakwe. 4 Umuntu akalandila umu ndimi zyuze akaikomya, lelo aakasesema akakomya cilongano. 5 Ningatemwa ukuti mwensi mwalandila umu ndimi, lelo cingazipisya nga mukusesema. Umuntu aakasesema wacila umuntu aakalandila umu ndimi, pano aakalandila umu ndimi wene afwile ukusenula vino akulanda pakuti akomye icilongano. 6 Lelo inane, ndi cakuti niza kuli mwemwe nu kulandila mu ndimi zyuze, uzye cingamwazwa uli? Ndi cakuti nkulonda ukumwazwa, mfwile ukuomvya ica upe ca kumusokolwela vyakwe Leza, nanti ica upe ca kumanya, nanti ica upe ca kusesema, nanti ca upe ca kusambilizya.

7 I cili cimwi ni vintu ivisivwanga ivikafumya iciunda, ivili wa mutoolilo ni izeze. Uzye umuntu angamanya uli ukuti umutoolilo uukulila nanti izeze, ndi cakuti iviunda vikuvwika icili cimwi? 8 Pano ndi cakuti ipenga likulila icililelile, a weni angaipekanya uku ulwi? 9 Umu musango uli umwi, namwe kwene nga mukulandila mu ndimi izisikuvwika ningo, uzye a weni angamanya icikulandwapo? Ukulanda kwinu kungaya kwati mukuma sile umuza. 10 Umu nsi mwaya indimi izingi zino antu yakalanda, nupya zyonsi kwene zikauvwika. 11 Pano ndi cakuti ntakuvwa ululimi luno umwi akulanda, ndaya umwenyi kuli aliwe, nawe alaya umwenyi kuli nene. 12 Fwandi namwe kwene vino mukalondesya ivya upe ivikafuma ku mupasi wa muzilo, mwalondesya ukukwata ivya upe ivingakomya icilongano.

13 Acino lekini aakalandila mu ndimi aapepa pakuti amanye ivya kusenula. 14 Pano ndi cakuti nkupepela mu lulimi luze, ala asi nene nkupepa, lelo i ca upe ca mupasi wa muzilo icapeelwa kuli nene. Fwandi nsimanya cino nkulanda. 15 Uzye lyene i cani cino ndinzile ukucita? Pa kupepa nimaomvyanga ica upe ca mupasi wa muzilo, nupya nimapepanga pakuti cino nkulanda cauvwika. Pa kwimba nimaomvyanga ica upe ca mupasi wa muzilo, nupya nimaimbanga pakuti cino nkulanda cauvwika. 16 Lelo ndi cakuti ukulumbanya Leza ukuomvya ica upe ca mupasi, uzye umuntu wino uli nawe aatamanya ululimi lulo angasuka uli ati “Ameni” kuli vino ukutaizya, lino atamanyile cino ukulandapo? 17 I cacumi ukutaizya mu nzila isuma, lelo umuntu muze asikukomeleziwa. 18 Nkutaizya Leza ukuti nemo nkalandila umu ndimi izingi ukucila mwensi. 19 Lelo ningatemwa ndi cakuti mu cilongano nkulanda amazwi 5 auvwike pakuti nsambilizye yauze, ukucila ukulanda mazwi 10,000 mu lulimi luze.

20 Inane mutaelenganya wa yance, lelo muye wa yance uku viipe; nupya mwaelenganya wa ikolo. 21 Calembwa mu Masunde ukuti: “Yeova walanda wati, ‘Ndaomvya indimi zya ku mpanga zyuze ni milomo ya enyi pa kulanda uku yantu yaa, lelo nalyo kwene yatalanguvwa.’” 22 Fwandi ukulandila umu ndimi asi cimanyililo ca yantu aataila lelo i cimanyililo ca yantu aatataila, nomba ukusesema asi cimanyililo ca yantu aatataila lelo i ca yantu aataila. 23 Fwandi ndi cakuti cilongano consi cakolongana pa ncende imwi nupya yonsi yakulandila umu ndimi zyuze, alino antu aatasambilila indimi zizyo nanti aatataila iza, uzye yatalalanda ukuti imupena? 24 Lelo ndi cakuti mwensi mukusesema nupya umuntu aatataila nanti aatasambilila wiza, alayuvwa ukuti watasundwa nupya alasinilwa kuli yonsi. 25 Lyene ivyaya umu mwenzo wakwe vilamanyikwa, nupya alafukama nu kupepa kuli Leza ati: “I cumi Leza ali pamwi namwe.”

26 Uzye lyene cilinzile ukuya uli inane? Ndi cakuti mwakolongana, umwi aalanda ilumbo, muze nawe aasambilizya, muze nawe aasokolola, muze nawe aalandila umu lulimi luze alino muze nawe aasenula ivikulandwa. Lekini vyonsi vyacitika umu kukomya yauze. 27 Ndi cakuti kuli yamwi aakulandila umu ndimi zyuze, lekini yaili nanti yatatu ayano yalanda, alino muze nawe asenula ivikulandwa. 28 Lelo ndi cakuti kusi uwa kusenula, yalinzile ukwikala mya umu cilongano nu kulandila mu mwenzo kuli Leza. 29 Lekini ya kasesema yaili nanti yatatu yaalanda, nu kuleka yauze yailuka upiliulo wa vintu ivikulandwapo. 30 Lelo ndi cakuti umwi akulanda mazwi yano wapokelela ukufuma kuli Leza lino atenzi umu cilongano, lekini uwatatandikilapo ukulanda atale aye mya. 31 Pano mwensi mulinzile mwalekanila pa kusesema, pakuti antu yanguvwa nu kukomeleziwa. 32 Nupya aapeelwa ica upe ca mupasi wa muzilo ica kusesema yalinzile ukuciomvya ningo. 33 Pano Leza asi wa cimvulunganya lelo a Leza wa mutende.

Wakwe vino caya umu vilongano vyonsi ivya yantu ya muzilo, 34 lekini anaci yaikala mya umu vilongano, pano yatazumiliziwa ukulanda. Lelo lekini yaye ni cuvwila wakwe vino na Masunde yakalanda. 35 Ndi cakuti yakulonda ukumanya vimwi, lekini yuzye ya iya uku ng’anda, pano i ca nsonyi uku mwanaci ukulanda umu cilongano.

36 Uzye kuli mwemwe akuno izwi lyakwe Leza lyafumile, nanti uzye lyafisile sile kuli mwemwe mwenga?

37 Ndi cakuti umwi akwelenganya ukuti a kasesema nanti wapeelwa ica upe ca mupasi, alinzile ukumanya ukuti ivintu vino nkumulembela i sunde lya Mwene. 38 Lelo ndi cakuti ali wensi wasuula cii, nawe kwene alasuulwa. 39 Fwandi inane twalililini ukulondesya ukusesema, nupya mutaalesya antu aakulandila umu ndimi zyuze. 40 Lelo lekini ivintu vyonsi vyacitika umu nzila isuma nupya itantikwe.

15 Lyene inane nkumwiusya api lyasi lisuma lino namusimikile, nupya lino mwapokelile, nupya lino mwataile. 2 Ndi cakuti mwatwalilila ukulondela ilyasi lisuma lino namusimikile, mulapusuka, lelo nga cisi vivyo ale utailo winu pasi vino uli.

3 Pano cino namupeezile pa kutandika acino nani kwene napokelile, icakuti Klistu wafwile pa mulandu ni membu zitu ukulingana na Malembo; 4 nupya wazisilwe nu kutuutululwa pa wanda wakwe citatu ukulingana na Malembo; 5 nupya walolekiile kuli Kefasi,* alino aiza alolekela nu ku yatumwa 12. 6 Pa cisila walolekiile uku ina ukucila pali 500 pa muku sile onga, aingi pali yayo yacili naswe nanti cakuti yamwi yafwa. 7 Lyene walolekiile kuli Yakobo, alino aiza alolekela nu ku yatumwa yonsi. 8 Lelo pa kusyalikizya walolekiile na kuli nene nemuno naya wa mwana uwavyalwa lino insita itali ifike.

9 Nene nacepesya pa yatumwa, nupya ntalinga ukwamwa umutumwa, pano nacuzizye icilongano cakwe Leza. 10 Lelo naya vii pa mulandu ni cikuuku cikulu cakwe Leza. Nupya icikuuku cakwe icikulu icapeezilwe kuli nene, citaali ica sile sile, lelo naombesyanga ukucila yonsi; nomba asi nene, lelo i cikuuku cikulu cino Leza wandanzile. 11 Vikwene avino nemo na atumwa tukasimikila, nupya vikwene avino mwataile.

12 Nomba ndi cakuti tukasimikila ukuti Klistu watuutulwilwe ukufuma uku yafwe, u mulandu ci uno yamwi muli mwemwe yakalandila ukuti afwe yatalatuutululwa? 13 Ndi cakuti afwe yatalatuutululwa, ale na Klistu kwene ataatuutulwilwe. 14 Lelo ndi cakuti Klistu ataatuutulwilwe, ale umulimo witu uwa kusimikila pasi vino uli, nupya nu utailo winu kwene ale pasi vino uli. 15 Ndi cakuti mu cumi afwe yatalatuutululwa, ale sweswe ya nte yakwe Leza aufi, pano ale tukasimikila ukuti Leza watuutulwile Klistu wino ataatuutulwile. 16 Pano ndi cakuti afwe yatalatuutululwa, ale na Klistu kwene atatuutululwilwe. 17 Nupya ndi cakuti Klistu atatuutululwilwe, ale utailo winu pasi vino uli; mulatwalilila mu luyembu. 18 Lyene na aafwila muli Klistu nayo kwene ale yafwililila. 19 Ndi cakuti utailo witu muli Klistu u wa umi wa ndakai sile, ale sweswe ya ulanda ukucila antu yonsi muno nsi.

20 Lelo Klistu watuutulwilwe ukufuma uku yafwe, aliwe watandikilepo ukutuutululwa ukufuma uku yafwe. 21 Pano wakwe vino imfwa izile ukupitila umu muntu wenga, avino nu kutuutululwa kwa yafwe kulizila umu muntu wenga. 22 Pano wakwe viivi kwene vino yonsi yakafwila muli Adamu, avino yonsi yalaya nu umi muli Klistu. 23 Lelo cila muntu alatuutululwa pa nsita yakwe: Klistu aliwe watandikiilepo, lyene palalondelela antu yakwe Klistu, aalatuutululwa pa nsita ya kuyapo kwakwe. 24 Lyene pa kusyalikizya alapeela Uwene kuli Leza wakwe nupya Isi. Cii cilacitika pa cisila ca konona mauteeko yonsi kumwi na ya kateeka. 25 Pano alinzile ukuteeka ukufikila lino Leza alonoona alwani yakwe. 26 Nupya imfwa, ali mulwani aalasyalikizya ukucimviwa. 27 Pano Leza “wamupeela maka pa vintu vyonsi.” Lelo amazwi yakuti ‘ivintu vyonsi vyapeelwa,’ yasipiliula ukuti na Leza kwene waya pa vintu ivyapeelwa kuli Klistu. 28 Lelo lino ivintu vyonsi vilapeelwa kuli aliwe, Umwana nawe alaipeela kuli Leza uwamupeezile ivintu vyonsi, pakuti Leza akaye ivintu vyonsi kuli yonsi.

29 Nomba, uzye aakubatiziwa pa mulandu wa kuya afwe yalacita uli? Ndi cakuti afwe yatalatuutululwa, u mulandu ci uno yakubatiziwilwa? 30 U mulandu ci uno naswe tukayela umu uzanzo cila nsita? 31 Cila wanda nkaaya umupiipi nu kufwa. Inane nkauvwila icilumba muli mwemwe mwe yasambi yakwe Klistu Yesu Umwene witu. 32 Ndi cakuti nalwile ni vilyanyi ku Efeso wakwe vino antu yauze yacisile, uusuma ci uno ningazana? Ndi cakuti aafwe yatalatuutululwa, “lekini tulye nu kumwa pano mutondo tulafwa.” 33 Mutaabepwa. Ya cuza aipe yakaonona imiyele isuma. 34 Cenjelini umu nzila ya ulungami, nupya mutacita uluyembu, pano yamwi yatamanya Leza. Nkumunena vii pakuti muvwe insonyi.

35 Lelo umwi anguzya ati: “Uzye afwe yalatuutululwa uli? Uzye yalaya nu mwili wa musango ci?” 36 Ciwelewele we! Cino wakomela cisimela sile papo kwene, suka catala cafwa. 37 Usikomela icimelwa icakula mpiti, lelo ukakomela ulumbezu, lungaya ulwa ngano nanti ulumbezu luze sile; 38 lelo Leza akalupeela umwili ukulingana na vino akulonda, nupya akapeela ulumbezu ululi lonsi umwili uno lulinzile ukupeelwa. 39 Imili yonsi itaakolana, kwaya umwili wa yantu, umwili wa ng’ombe, umwili wa vyunyi, alino nu mwili wa nswi. 40 Nupya kwaya imili ya kwi yulu ni mili ya pano nsi; lelo ululumbi lwa mili ya kwi yulu lwaiyela, nu lulumbi lwa mili ya pano nsi nalo a luze. 41 Ululumbi lwi lanzi a luze, nu lulumbi lwa mwezi nalo a luze, nu lulumbi lwa ntanda nalo a luze; nupya ululumbi lwa lutanda longa lukapusana ku lulumbi lwa lutanda luze.

42 Vikwene avino caya nu ku kutuutululwa kwa yafwe, umwili ukakomelwa umu kuola; lelo ukatuutululwa umu kukanaola. 43 Ukakomelwa ukwaula umucinzi; iututululwa nu lulumbi. Ukakomelwa ala uutonte; iutuutululwa ala uli na maka. 44 Ukakomelwa ala u mwili wa untunze; lelo ukatuutululwa ala u mwili wa mupasi. Ndi cakuti kwaya umwili wa untunze ala kwaya nu mwili wa mupasi. 45 Calembwa ukuti: “Umuntu wa kutandikilako Adamu, wizile aya uwa umi.” Adamu wa kusyalikizyako wizile aya u mupasi uukapeela umi. 46 Asi mwili wa mupasi uwatandikiile ukuyako, lelo umwili wa untunze u watandikiileko. Umwili wa mupasi wizile iuyako pa cisila. 47 Umuntu wa kutandikilako wafumile pano nsi nupya wapanzilwe uku lukungu; umuntu wakwe ciili wafumile ukwi yulu. 48 Antu ya pano nsi yakolana nu wapanzilwe ukufuma uku lukungu; na antu ya kwi yulu yakolana nu wafumile ukwi yulu. 49 Nupya wakwe vino twakolana nu muntu uwapanzilwe uku lukungu, avino tulakolana nu muntu uwafumile kwi yulu.

50 Lelo nkumunena vii inane, umwili wa untunze nu uwazi vitanga vipyane Uwene wakwe Leza, nu kuola kutanga kupyane ukukanaola. 51 Lekini munene inkama yakwe Leza: Asi swensi swemuno tulafwa, lelo swensi tulasenulwa, 52 pa kasita sile akanono, umu kukapaya kwi linso, lino ipenga lya kusyalikizya lilalila. Pano ipenga lilalila, nupya afwe yalatuutululwa nu mwili usiola nupya tulasenulwa. 53 Pano umwili uukaola ulata ukuola, nu mwili uukafwa ulata ukufwa. 54 Lelo lino umwili uukaola ulata ukuola nu mwili uukafwa ulata ukufwa, alino amazwi alembwa yalafikiliziwa akuti: “Imfwa yaatimilwa amanda pe.” 55 “We mfwa, ukucimvya kwako kuli kwi? We mfwa, uluoya lwako luli kwi?” 56 Uluoya ulukaleta imfwa u luyembu, nupya amaka ya luyembu a Masunde. 57 Lelo katwataizya Leza, pano aakatulenga ukucimvya ukupitila mu Mwene witu Yesu Klistu.

58 Fwandi inane, mwe yatemwikwa, twalililini ukuya akome, aasitenta, lyonsi mwaombesya umu mulimo wa Mwene, mwaiusya ukuti umulimo winu umu Mwene usi wa sile sile.

16 Lyene ukulozya uku kusangwilako amuzilo, mwalondela vino nanenyile amu vilongano vya mu Galatiya. 2 Pa wanda wa kutandikilako umu mulungu, cila muntu alinzile ukupaatulako vimwi kulingana na vino wakwata, pakuti kutaca kuye ukusangula lino ndiza. 3 Lelo lino ndafika kuko, ndatuma aonsi yano mwazumilizya umu makalata yano mwalemvile pakuti yakatwale ivya upe ku Yelusalemu. 4 Lelo ndi cakuti cilalondekwa ukuti nani kwene nkapite, ale tulapitila pamwi nayo.

5 Lelo ndiza kuli mwemwe, nga napita umu Makedoniya, pano amuno ndaya nkapite; 6 nupya limwi ndiza nikale namwe nanti sile ukuya namwe insita yonsi iya mpepo, pakuti muce munsukilileko panono kuno ndaya. 7 Pano nsikulonda ukumulola sile lino indi pa lwendo, pa mulandu wakuti nkwenekela ukwizaikalako namwe ndi cakuti Yeova wazumilizya. 8 Lelo nimaikala umu Efeso ukufikila uwanda wa Pentekosti, 9 pano umulyango ukalamba uukatungulula uku milimo iunjulikila, lelo kuli aingi akunkaanya.

10 Lyene lino Timoti alafika, mukasininkizye ukuti asikutiina icili consi lino alaya namwe, pano nawe kwene akuomba umulimo wakwe Yeova uno nani nkaomba. 11 Fwandi mutaca mumusuule. Muce mumutume umu mutende, pakuti ace aize kuli nene, pano nkumuloleela pamwi na ina.

12 Lyene ukulozya kuli Apolo umwina witu, namupaapasile sana ukuti aize kuli mwemwe pamwi na ina. Lelo ataakweti ipange lya kwiza, nomba aliza lino alakwata insita.

13 Acino iteyanyini, muye akome umu utailo, muye asipe nupya muye na maka. 14 Lekini vyonsi vino mukucita vyacitikila umu kutemwa.

15 Mwamanya ukuti amu ng’anda yakwe Sitefani aliyo yaatandikilepo ukutaila umu Akaya nupya yaipeelisye ukuombela amuzilo. Fwandi inane nkumukomelezya ukuti, 16 namwe kwene mwauvwila antu ya musango uwo nu kuvwila yonsi akaombela pamwi nupya aakaombesya. 17 Lelo indi ni nsansa pa kwiza kwakwe Sitefani, Fotuneto na Akaiko, pano iyangazwilizya sana umu milimo ino mwali nu kuomba. 18 Nupya iyankomelezya kumwi namwe kwene. Fwandi mwataizya aonsi ya musango uwo.

19 Amu vilongano vya mu Asia yamulamuka. Akwila na Pulisika pamwi na amu cilongano aakalonganila umu ng’anda yao, yamulamuka sana umu Mwene. 20 Aina yonsi yamulamuka. Mulamukane nu kutonsolana kwa wina.

21 Namulembela ulamu uu ni kasa lyane, anene Paulo.

22 Ndi cakuti umwi ataatemwa Umwene, lekini aye umutiipwe. Mwene witu iza! 23 Icikuuku cikulu ica Mwene Yesu ciye namwe. 24 Ukutemwa kwane kuye namwe mwensi muli Klistu Yesu.