KU INA GALATIYA

1 Ne mutumwa Paulo, kusi umuntu uwansoolola ukuya umutumwa, lelo Yesu Klistu na Leza Tata witu uwatuutulwile Klistu ukufuma ku yafwe aliyo yansoolwile. 2 Nemo pamwi na ina yano indi nayo, twalembela ivilongano vya ku Galatiya:

3 Si cikuuku cikulu nu mutende ukufuma kuli Leza Tata witu nu ku Mwene Yesu Klistu viye namwe. 4 Waipeezile pa mulandu wa membu zitu pakuti atupususye uku wikazi wa ndakai* uwipe, kulingana nu kulonda kwakwe Leza witu nupya Tata, 5 kuli aliwe kuye ululumbi amanda pe. Ameni.

6 Cikunzungusya sana ukuti mukufuma zuwa kuli wino wamwamile pa mulandu ni cikuuku cikulu cakwe Klistu nu kusenukila ukwi lyasi lyuze kwati ali lyasi lisuma. 7 Asi kuti kwaya ilyasi lisuma na lyuze; lelo kuli yamwi aakamuletela intazi nupya yakalonda ukuvulunganya ilyasi lisuma pali Klistu. 8 Lelo nanti cakuti sweswe nanti malaika ukufuma kwi yulu wali nu kwiza musimikila ilyasi lisuma ukucila pali lino twamusimikile, alinzile ukuya umutiipwe. 9 Wakwe vino itulanda, nupya kwene nkumunena ukuti, ali wensi uwiza mu kumusimikila ilyasi ilicizile pali lino twamusimikile, alinzile ukuya umutiipwe.

10 Uzye nkwezya ukutemwikwa uku yantu nanti kuli Leza? Nanti uzye nkwezya ukuzanzya antu? Ndi cakuti natwalilile ukuzanzya antu, ntanga inje umuzya wakwe Klistu. 11 Pano nkulonda mumanye inane ukuti ilyasi lisuma lino namusimikile litafumile uku yantu; 12 pano ntalipokelile ukufuma uku muntu, nupya asi muntu uwansambilizye, lelo lyasokolwilwe kuli nene ukupitila muli Yesu Klistu.

13 I cacumi muvwa vino nali lino nali mu upefi wa Ciyuda, ukuti nacuzyanga sana icilongano cakwe Leza nu kucizanza; 14 nupya nalundulukanga sana umu upefi wa Ciyuda kucila aingi aamusinku wane amu luko lwane, pano nali umucincile sana umu kulondela intambi zya vikolwe vyane. 15 Lelo lino Leza, uwampaatwile ukufuma umu nda muli mayo nu kungama pa mulandu wa cikuuku cakwe icikulu, waciweni ukuti cali ningo 16 ukusokolola Umwanakwe ukupitila muli nene pakuti ningasimikila ilyasi ilisuma pali aliwe ku yantu ya mu nko, ntuzizyepo umuntu ali wensi api lyasi lii papo kwene sile; 17 nupya ntaile uku Yelusalemu kuli yano yali atumwa lino ntatala naya umutumwa, lelo naile uku Alabya alino iniza nswilila uku Damasika.

18 Lyene lino papisile manda yatatu naile uku Yelusalemu uku kutandalila Kefasi,* nupya nikazile nawe pa manda 15. 19 Lelo ntaalolinepo na atumwa yauze, naloline sile na Yakobo umwina wa Mwene. 20 Lyene ukulozya uku vintu vii vino nkumulembela, nkulanda icumi pa manso yakwe Leza nsikubepa.

21 Lyene lino nafumile kuuku naile ku Silya nu ku Kilikiya. 22 Lelo ntaamanyikwe uku vilongano vya ina Klistu ivya ku Yudeya. 23 Yuvwanga sile ukuti: “Umuntu uwalondanga ukonona imipepele itu nupya uwatucuzyanga, lyene akusimikila ilyasi lisuma.” 24 Fwandi yatandike ukucindika Leza pa mulandu wane.

2 Lyene lino papisile imyaka 14 nupya kwene naile uku Yelusalemu na Banaba, na Tito kwene namusenzile. 2 Naileko pa mulandu ni vintu vino Umwene wasokolwile kuli nene. Lelo nakomanyile sile na ina acindikwe sana nupya nayanenyile ilyasi lisuma lino nkasimikila uku yantu ya mu nko. Nacisile vivyo pakuti nsininkizye ukuti vino naombanga mpiti na vino nkuomba ndakai visi vya sile sile. 3 Lelo nanti a Tito kwene uwali nani ataapatikiziwe ukuzembululwa nanti cakuti wali u Mugiliki. 4 Lelo uwavya uu wakatwike pa mulandu na ina ya ufi aasokelile, aalondanga ukutononela untungwa uno tukaipakizya umu kuombela pamwi na Klistu Yesu, pakuti yatuteeke uzya; 5 tutayuvwilile nanti sile a pa nsita inono, pakuti icumi api lyasi lisuma citwalilile ukuya muli mwemwe.

6 Lelo ukulozya kuli yayo alolekanga ukuya acindame, ucindami wao pasi vino wali kuli nene, pano Leza asilola vino umuntu akaloleka ukunzi, nupya kusi icipya icili consi cino napokelile uku yantu aali acindikwe sana. 7 Lelo yaweni ukuti napeelwa umulimo wa kusimikila ilyasi ilisuma kuli yano yatazembululwa wakwe vino na Petulo wapeezilwe umulimo wa kusimikila kuli yano yazembululwa. 8 Pano uwapeezile Petulo amaka ya kuya umutumwa pa yantu azembululwe, nani kwene u wampeela maka pa yantu ya mu nko. 9 Nupya lino yamanyile ukuti cikuuku cikulu capeezilwe kuli nene, Yakobo, Kefasi* na Yoani alolekanga ukuti ali yasintililwepo yazumilizye Banaba nani ukuti twaombela pamwi nayo, pakuti swemo tungaya ku yantu ya mu nko alino yene yaye ku yantu aazembululwa. 10 Yatunenyile sile ukuti twaiusya apiina, nupya vivyo kwene avino nkaezya na maka ukucita.

11 Lino Kefasi* wizile uku Antioki, namukalipiile pa manso, pano waluvyanyizye. 12 Pano lino antu yamwi ukufuma kuli Yakobo yatatala iiza, walyanga na antu amu nko; lelo lino yafisile watiile ukucita vivyo, nupya waipaatwile ala akutiina aazembululwe. 13 Na Ayuda yonsi yatandike ukumukolanya umu usomvi kwene uwo, icakuti nanti sile a Banaba watandike ukuyakonkelezya umu usomvi wao. 14 Nomba lino naweni ukuti yasikulondela icumi cino yasambilile umwi lyasi lisuma, nanenyile Kefasi* pa manso ya yantu yonsi inti: “Ndi cakuti we Muyuda ukucita ivintu wa yantu ya mu nko nupya usikucita wakwe vino Ayuda yakacita, uzye ungakomelezya uli antu ya mu nko ukucita ivintu ukulingana nu lutambi lwa Yayuda?”

15 Swe Yayuda nupya swemuno tusi yayembu aafuma umu yantu ya mu nko, 16 twamanya ukuti umuntu asiya umulungami pa mulandu wa kulondela masunde suka pa mulandu wa kutaila muli Yesu Klistu. Acino swemo twataila muli Klistu Yesu, pakuti tungaya alungami ukupitila umu kutaila Klistu asi pa mulandu wa kulondela masunde, pano kusi nanti wenga aalaya umulungami pa mulandu wa kulondela masunde. 17 Lyene ndi cakuti cazanikwa ukuti sweswe yayembu lino tukulonda ukuya alungami pa mulandu wakwe Klistu, uzye ale cikupiliula ukuti Klistu akatukomelezya ukucita uluyembu? Awe foo! 18 Ndi cakuti nupya kwene nkukuula ivintu vino nawisizye, ala cikupiliula ukuti nene muyembu. 19 Pano nafwile pa mulandu wa kulondela masunde, pakuti ningaya nu umi kuli Leza. 20 Napoopelwa pa cimuti pamwi na Klistu. Ndakai insi nu umi pa mulandu wane lelo a pa mulandu wakwe Klistu akaikala muli nene. Nupya umi uno nkweti ndakai a pa mulandu wa kutaila Umwana wakwe Leza, uwantemilwe nupya uwapeezile umi wakwe pa mulandu wane. 21 Nsikana icikuuku cikulu cakwe Leza, pano ndi cakuti ulungami ukayako pa mulandu na masunde, ale ukufwa kwakwe Klistu u kwa sile sile.

3 Mwe ina Galatiya yawelewele mwe! A weni uwalenga ukuti mwacita icintu cii iciipe, mweyano yalondolwelile ningo vino Yesu Klistu wapoopiilwe pa cimuti? 2 Icintu conga cino nkulonda ukumuzya* aeci: Uzye mwapokelile umupasi pa mulandu wa kulondela masunde nanti pa mulandu wa kutaila ivintu vino muvwile? 3 Uzye i cacumi mwemwe yawelewele? Pa kutandika mwatungululwanga nu mupasi wa muzilo, uzye lyene mukulonda mwatungululwa na vino imili ikalonda? 4 Uzye lino mwaculanga uku ntazi izingi, mwaculanga sile? Namanya ukuti ukucula kwinu kutali ukwa sile sile. 5 Uzye aakamupeela umupasi nu kucita ivizungusyo ivikalamba muli mwemwe, akacita vivyo pa mulandu wakuti mukalondela masunde nanti pa mulandu wakuti mwataila ivintu vino muvwile? 6 Elenganyini vino cali kuli Abulahamu, “wataile Yeova, nupya wamilwe ukuti u mulungami.”

7 I cumi mwamanya ukuti antu aya nu utailo ali yana yakwe Abulahamu. 8 Lyene lino kucili insita, Leza walanzile ukupitila umu malembo ukuti alama antu amu nko ukuti alungami pa mulandu nu utailo wao, acino waneniile limwi Abulahamu ilyasi lisuma ati: “Muli wewe amuno antu yonsi amu nko yalapaalilwa.” 9 Fwandi antu aya nu utailo yakapaalwa wakwe vino Abulahamu uwali nu utailo wapaazilwe.

10 Antu yonsi aataila umu Masunde yatiipwa, pano calembwa ukuti: “Umutiipwe a wiyo aasitwalilila ukulondela vyonsi ivyalembwa umu lupapulo lwa masunde.” 11 Nupya camanyikwa ukuti Leza atanga ame umuntu ukuti u mulungami pa mulandu na masunde, pano “umulungami alaya nu umi pa mulandu wa utailo.” 12 Masunde asi aakalondekwa pakuti umuntu aye nu utailo. Lelo wensi aakalondela masunde alaya nu umi pa mulandu wa masunde. 13 Klistu watukazile nu kutukulula uku citiipu ca Masunde lino wailenzile ukuya umutiipwe mu cifulo cakwe sweswe, pano calembwa ukuti: “Umuntu wensi aakakulikwa pa cimuti u mutiipwe.” 14 Cali vivyo pakuti ipaalo lino Leza walavile Abulahamu lingaya na pa yantu ya mu nko ukupitila muli Yesu Klistu, pakuti tungapokelela umupasi uwalavilwe ukupitila umu utailo witu.

15 Mwe inane nkulanda ukuomvya icilangililo wakwe vino antu yakacita: Nanti cakuti upangano wazumiliziwa nu muntu, kutaaya aakaufumya nanti ukulundako. 16 Malayo yalavilwe kuli Abulahamu nu ku mwanakwe. Malembo yasilanda ukuti, “nu ku yanako,” kwati aingi. Lelo yakati, “nu ku mwanako,” ukulozya uku muntu wenga kuli kuti Klistu. 17 Nupya nkulanda ukuti: Amasunde aizile iyayako pa cisila ca myaka 430, yasifumyapo upangano wa mpiti uno Leza wisileko, pakuti yonone ulayo. 18 Pano ndi cakuti upyanyi wasintilila pa masunde, ale ndakai utasintilila pa ulayo; lelo Leza wapeezile Abulahamu upyanyi ukupitila mu ulayo.

19 Uzye lyene u mulandu ci uno masunde yaayelileko? Yalunzilweko pakuti imembu zisokololwe, ukufikila lino umwana uwalavilwe wali nu kwiza; nupya yapeezilwe kuli kakundanya ukupitila muli ya malaika. 20 Kusiya kakundanya ndi cakuti kuli sile umuntu wenga, lelo Leza waya sile wenga. 21 Uzye ale amasunde yapusana na malayo yakwe Leza? Awe foo! Pano ndi cakuti antu yapokelile amasunde aakapeela umi, ale yaali nu kuya alungami pa mulandu na masunde. 22 Lelo Malembo yalangilile ukuti antu yali azya ya luyembu, pakuti ulayo ukafuma umu kutaila Yesu Klistu ungapeelwa kuli yano yaya nu utailo.

23 Lelo lino kutali kuye utailo, twatungululwanga na masunde, twali azya nupya twalolelanga utailo uwali apiipi nu kusokololwa. 24 Fwandi masunde izile iyaya akututungulula kuli Klistu, pakuti tuye alungami ukupitila umu utailo. 25 Lelo ndakai vino kwaya utailo, tusilondekwa masunde aakututungulula.

26 Mwensi mwemwe yana yakwe Leza, pa mulandu wa kutaila Klistu Yesu. 27 Pano mwensi mwemuno mwabatiziwa muli Klistu, mwazwala Klistu. 28 Kutaya Umuyuda nanti Umugiliki, kutaya umuzya nanti umuntungwa, kutaya umonsi nanti umwanaci, pano mwensi mwaya icili cimwi muli Klistu Yesu. 29 Nupya ndi cakuti mwemwe yakwe Klistu ale umu cumi mwemwe yana yakwe Abulahamu, nupya mulapokelela upyanyi wakwe vino Leza walavile.

4 Lyene nkulanda ukuti ndi cakuti mpyanyi acili umwana umunono, asipusana nu muzya, nanti cakuti u mwene wa vintu vyonsi, 2 lelo akatungululwa na ya kapitao na angalizi ukufika pa wanda uno isi wasoolwela limwi. 3 Naswe kwene lino twali ana anono twateesilwe uzya uku myelenganyizizye ni miyele ya mu nsi. 4 Lelo lino insita yafisile, Leza watumile Umwanakwe, uwizile avyalwa uku mwanaci nupya uwatungululwanga na masunde, 5 kuti akulule yayo akatungululwa na masunde, pakuti tuye ana yakwe Leza.

6 Lyene vino mwemwe yana, Leza watuma umupasi wa Mwanakwe umu myenzo itu, nupya ukapunda ukuti: “Abba,* Tata!” 7 Fwandi lyene musi yazya; nupya ndi cakuti mwemwe yana, ale mwemwe mpyanyi ukupitila muli Leza.

8 Lelo lino mutaamanyile Leza, mwateesilwe uzya kuli ya leza ya ufi. 9 Nomba lyene vino mwamanya Leza nanti vino mwamanyikwa kuli Leza, u mulandu ci uno mukulonda ukuswilila nupya uku vintu vya sile sile ivya mu nsi yii nu kuteekwa uzya uku vintu kwene vivyo? 10 Mwemo mukaika sana mano ku kuzevya amanda, imyezi, insita ni myaka. 11 Nkusakamikwa sana pali mwemwe ukuti limwi nononyile sile amaka pali vino namwavwile.

12 Inane nkumulenga ukuti muye wakwe nene, pano nani nali wakwe mwemwe. Mutaanduvyanyizye icili consi. 13 Lelo mwamanya ukuti a pa mulandu wakuti nalwile i calenzile nize pa muku wa kutandikilako ku kumusimikila ilyasi lisuma. 14 Nupya nanti cakuti ulwale wane wali uwezyo kuli mwemwe, mutansuuzile nanti ukunsaalula; lelo mwampokelile wakwe malaika wakwe Leza nupya wakwe Klistu Yesu. 15 Nga fwandi ukutemwa kuno mwakweti kuli kwi? Pano nkumuyela unte ukuti imuya wakwe vino mwali mpiti nga mwaipeelisye ukufumya amanso inu nu kumpeela ndi cakuti ukucita vivyo ukwali nu kungazwa. 16 Uzye lyene naya umulwani winu pa mulandu wa kuti namunena ivya cumi? 17 Antu yamwi yakaombesya pakuti muye ku lusansa lwao, lelo asi pa vintu ivisuma; yakalonda ukumufumya kuli nene pakuti mwalondesya ukuyalondela. 18 Lelo lyonsi cikaya ningo ndi cakuti umwi akulonda muye ku lusansa lwakwe pa mulandu ni vintu ivisuma nupya cico citalinzile sile ukucitika lino indi namwe, 19 mwe twana twane, pa mulandu winu nupya kwene mfwile ukuwaikwa wakwe vino cikaya uku mwanaci ali pa kupaapa ukufikila lino mulaya wakwe Klistu. 20 Nga cazifile inja namwe likwene nu kulanda umu nzila ipusaneko, pano imunzungusya sana.

21 Nenini mweyano mukalonda ukulondela masunde, uzye mutamanya vino Masunde yakalanda? 22 Calembwa ukuti Abulahamu wakweti ana yaili aonsi, wenga umu muomvi umukazyana nu muze mu mwanaci umuntungwa; 23 lelo uwaviilwe ku muomvi umukazyana waviilwe wa yantu yonsi, lyene muze uwaviilwe ku mwanaci umuntungwa wavyaliilwe umu ulayo. 24 Ivintu vii vikaimililako ivyali nu kucitika ku nkoleelo; pano anaci yaaya yaili yakaimililako maupangano yaili, upangano onga u wa pa Mwamba wa Sinai, ukavyala ana azya nupya ali Haga kwene. 25 Lyene Haga akapiliula Sinai, umwamba uwaya mu Alabya nupya Haga wakolana na Yelusalemu wa ndakai, pano wene u muzya pamwi na ana yakwe. 26 Lelo Yelusalemu wa kwi yulu wene u muntungwa, nupya ali mayo witu.

27 Pano calembwa ukuti: “Sansamuka we mwanaci ing’umba wemuno usikwata ana; puundisya ni nsansa, we mwanaci wemuno utuuvwapo ukuwaika pa kukwata ana; pano umwanaci ing’umba wakwata ana aingi ukucila umwanaci uwakwata iya.” 28 Lyene mwemo inane, mwemwe yana ya ulayo wakwe vino Isaki wali. 29 Viivi kwene vino uwaviilwe wa yantu yonsi watandike ukucuzya uwaviilwe ukupitila umu mupasi, avino caya na ndakai kwene. 30 Nomba uzye malembo yakatuuli? Yakati: “Zinga umuomvi umukazyana nu mwanakwe, pano umwana wa muomvi umukazyana atalaya impyanyi pamwi nu mwana wa mwanaci umuntungwa.” 31 Fwandi inane, tusi yana ya muomvi umukazyana lelo sweswe yana ya mwanaci umuntungwa.

5 Klistu watukulula pakuti tuye nu untungwa uwo. Acino zyansyini, mutaswilila nupya kwene umwi yoko lya uzya.

2 Lyene ne Paulo, nkumunena ukuti nga mwazembululwa ale Klistu atalamwazwa nanti acimwi. 3 Nupya kwene nkunena umuntu wensi uwazembululwa ukuti alinzile alondela Masunde yonsi. 4 Mwafumako kuli Klistu, mwemuno mukalonda ukuya alungami pa mulandu wa masunde; mwafuma ku cikuuku cakwe icikulu. 5 Pano swemo swemuno tukatungululwa nu mupasi tukaloleela sana ulungami uulayako pa mulandu wa utailo. 6 Pano kuli Klistu Yesu kwene ukuzembululwa nanti ukukanazembululwa vitacindama, lelo icacindama uutailo ukatungululwa nu kutemwa.

7 Mwasimulanga sile ningo. Uzye a weni uwalenzile ukuti mute ukulondela icumi? 8 Uwamwamile asi aliwe walenga ukuti mute ukulondela icumi. 9 Citutumusi cinono cikatutumula umunya onsi. 10 Nintaila ukuti mwemuno mwaya pamwi nu Mwene mutalelenganya ivipusineko; lelo wensi akumucuzya, alapingulwa ukulingana ni vicitwa vyakwe. 11 Inane, ndi cakuti ncili nkusimikila pa kuzembululwa, u mulandu ci uno antu yatwalilila ukuncuzizya? Fwandi ukusambilizya pa mfwa yakwe Yesu iya pa cimuti ca kucuziwilwapo* kutanga kusosye antu. 12 Ningatemwa ukuti antu aakwezya ukumuvulunganya yaitungule aineco.*

13 Inane mwamilwe pakuti muye antungwa; mutaomvya untungwa uu pakuti mwacita vino imili ikalonda, lelo mwaombelana umu kutemwa. 14 Pano Masunde yonsi yakafikilizya isunde lyonga ilikati: “Uwatemwa umuzo wakwe vino waitemwa.” 15 Ndi cakuti mukalumana nanti ukucisana, mwacenjela pakuti mutakomana.

16 Lelo nkumunena ukuti mwatungululwa nu mupasi alino mutalaalondela vino imili ikalonda. 17 Pano vino umwili ukalonda vyapusana na vino umupasi ukalonda, nupya umupasi wapusana nu mwili; ivintu vii vikalwisyanya, pakuti mutaacita vino mukulonda ukucita. 18 Nupya ndi cakuti mukutungululwa nu mupasi, ala musitungululwa na masunde.

19 Imilimo ya mwili wa luyembu ikaloleka apaswe nupya aeyi; uzelele,* ukukowela, ivicitwa vya winyi,* 20 ukupepa ivilubi, ukutaila imipasi, ulwani, ivikanza, uzuwa, icipyu, ukupusana, amalekano, ukupanga utumaumba, 21 muvimbila, ucakolwa, kuwowota, ni vintu ivyakolana na vii, nkumucelwila limwi pa vintu vii wakwe vino namucelwile nu ku cisila, ukuti antu aakacita ivintu vya musango uu yatalingila umu Wene wakwe Leza.

22 Lelo imiyele* iikafuma ku mupasi wa muzilo, u kutemwa, insansa, umutende, ukuteeka umwenzo, icikuuku, usuma, utailo, 23 ukufuuka nu kuikaanya. Kutaya isunde ilikalwisyanya ni vintu vii. 24 Nupya asambi yakwe Klistu Yesu yapoopela umwili wa luyembu pa cimuti pamwi na vino umwili ukalonda.

25 Ndi cakuti tukatungululwa nu mupasi, lekini twacita ivintu kulingana nu mupasi. 26 Lekini tutaaya ni cilumba, tutaacimvyanya nupya tutauvwilana uzuwa.

6 Inane, ndi cakuti umwi watandika ukucita iviipe ukwaula ukumanya, mwemuno mukatungululwa nu mupasi mulinzile ukwezya ukumulungika umu ufuuke. Lelo mulinzile ukucenjela, pano limwi namwe kwene mungeziwa. 2 Mwasendelana ivisendo ivinyome, nupya nga mukucita vivyo ala mukufikilizya isunde lyakwe Klistu. 3 Pano ndi cakuti umwi akwelenganya ukuti u mucindame lino pasi vino ali, ala akuibepa umwineco. 4 Lelo lekini cila muntu aceeceta ivicitwa vyakwe pakuti aasansamukila umu milimo yakwe, asi kusansamuka pa mulandu wa kuilinganya kuli yauze. 5 Pano cila muntu alaisendela icisendo cakwe.

6 Nupya lekini aakusambiliziwa izwi lyakwe Leza aapeela ivintu vyonsi ivisuma kuli wino akumusambilizya.

7 Mutaibepa: Leza asibepwa. Pano consi cino umuntu akukomela, acino alazombola; 8 pano aakakomela uku mwili alazombola ukuola ukufuma uku mwili wakwe, lelo wensi aakakomela uku mupasi alazombola umi wa pe ukufuma uku mupasi. 9 Fwandi tutatoovoka ukucita icisuma, pano pa nsita ilinge tulazombola nga tutatoovwike. 10 Acino lyonsi lino twakwata insita ya kwavwana, lekini twacita icisuma kuli yonsi, lelo maka maka uku ina itu umu utailo.

11 Lolini ivilembo ukulu vino namulembela ukuomvya ikasa lyane.

12 Antu yonsi aakalonda ukuilanga uku mwili ali yano yakaezya ukumupatikizya kuti muzembululwe, yakacita vivyo pakuti kutaya uwa kuyacuzya pa cimuti ca kucuziwilwapo* cakwe Klistu. 13 Pano nanti sile antu aakazembululwa yasisunga Masunde, lelo yakalonda kuti muzembululwe pakuti yakwate apakuyuvwila. 14 Lelo nemo ntalatala njuvwepo, suka sile ukuyuvwila pa cimuti ca kucuziwilwapo* ica Mwene witu Yesu Klistu, muli aliwe amuno insi yafwila* pa mulandu wane, nani pa mulandu ni insi. 15 Pano ukuzembululwa nanti ukukanazembululwa vitacindama, lelo ukuya iciumbwa cipya u kwacindama. 16 Kuli yayo yonsi aakalondela isunde lilyo, umutende nu luse viye pali aliyo, kuli kuti pali Izlaeli wakwe Leza.

17 Ukufuma ndakai ntakulonda nanti aumwi uwa kuncuzya, pano umwili wane uli ni viyazi ivya kuya umuzya wakwe Yesu.

18 Inane icikuuku cikulu ica Mwene witu Yesu Klistu ciye namwe lino mukulanga imiyele isuma. Ameni.