KU INA EFESO

1 Ne Paulo, umutumwa wakwe Klistu Yesu pa mulandu nu kulonda kwakwe Leza, nalemba kalata wii uku yantu ya muzilo amu Efeso nupya aaya nu utailo muli Klistu Yesu:

2 Si cikuuku cikulu nu mutende ivikafuma kuli Leza Tata witu nu ku Mwene Yesu Klistu viye namwe.

3 Alumbanyiziwe Leza nupya Isi wa Mwene witu Yesu Klistu, pano watupaala umwi yulu ukuomvya mapaalo aakafuma ku mupasi wa muzilo pa mulandu wakuti twaya pamwi na Klistu, 4 watusoolwile kuti tuye nawe* lino insi itali iyeko, wacisile vii pakuti tuye nu kutemwa nupya amuzilo aula umulandu kuli aliwe. 5 Watusoolwelile limwi ukuti tuye ana yakwe ukupitila muli Yesu Klistu, ukulingana ni vikamuzanzya alino nu kulonda kwakwe, 6 pakuti angalumbanyiziwa pa mulandu ni cikuuku cikulu cino watulanzile ukupitila muli wino watemwa. 7 Wene watukulula ukupitila umu wazi wa Mwana wakwe, walenga ukuti twaelelwa imembu pa mulandu ni cikuuku cakwe icikulu.

8 Watulanzile icikuuku cikulu nu kutulenga ukuya na mano alino nu kwiluka 9 lino watusokolwelile inkama ya kulonda kwakwe. Inkama iiyo yuvwananga nu kulonda kwakwe 10 ukwa kwika utunguluzi pa nsita iyasoololwa, ukukolonganika ivintu vyonsi muli Klistu, ivya mwi yulu alino ni vya pano nsi. 11 Twaya pamwi nawe nupya Leza watusoolwile ukuya impyanyi, watusoolwelile limwi ukulingana nu kulonda kwakwe wino akacita ivintu vyonsi vino wapingula wakwe vino umwineco akulonda, 12 sweswe twatandikiilepo ukupaalila muli Klistu nupya Leza watusoolwelile limwi pakuti twamucindika nu kumulumbanya. 13 Lelo namwe kwene mwamutaile pa cisila ca kuvwa icumi, kuli kuti ilyasi lisuma pa kupusuka kwinu. Lino mwataile, mwapokelile icimanyililo ca mupasi wa muzilo uno Leza wamulavile ukupitila muli aliwe, 14 ali usininkizyo wakuti tulapokelela vino Leza watulaya, pano Leza wakulwile antu yakwe ukuomvya ilambo pakuti aalumbanyiziwa.

15 Uli mulandu kwene uno ukufuma lino nuvwile pali vino mwataila Umwene Yesu na vino mwatemwa antu yonsi amuzilo, 16 ntata ukutaizya Leza pa mulandu winu. Natwalilila ukumulumbula umu mapepo yane, 17 pakuti Leza wa Mwene witu Yesu Klistu, Tata wa lulumbi, angamupeela mano nu kumusokolwela ningo pali aliwe. 18 Wayula imyenzo inu kuti mulole, pakuti mumanye upaalilo uno wamwamileko, ululumbi luno antu ya muzilo yalapokelela, 19 na maka yakwe yano akalanga pali sweswe swemuno twataila. Amaka kwene yaa yakalolekela 20 muli vino watuutulwile Klistu ukufuma uku yafwe nu kumwika ukwi kasa li lunji umwi yulu, 21 wamucindamika ukucila mauteeko yonsi, ya kateeka, intunguluzi, ya mwene ni izina lyonsi ilyayako, asi sile umu wikazi wa ndakai* lelo nu mu wikazi uuliza. 22 Nupya wamupeela maka pa vintu vyonsi kuti aye umutwe pa vintu vyonsi ivya mu cilongano, 23 icaaya ali mwili wakwe, umwazuula imiyele yakwe, nupya aliwe akamalilila ivintu vyonsi.

2 Nupya Leza wamulenzile ukuya nu umi, nanti cakuti mwali afwe mu kuluvyanya kwinu ni membu zinu, 2 pano pa nsita imwi mwapitanga ukulingana nu wikazi wa ndakai* uwa mu nsi yii, ukulingana na kateeka uwakwata maka ya kutungulula umuza, kuli kuti umupasi uno ndakai ukaomba umu yana ya cintuvwa. 3 Pa nsita imwi swensi kwene twali wakwe aliyo, nupya twacitanga ivintu ukulingana nu lunkumbwa lwa mwili ala tukucita vino umwili na melenganyo itu vikalonda, nupya umu civyalilwa sile twali ana ya ukali, wakwe vino yonsi yaya. 4 Nomba vino Leza waya sana nu luse, pa mulandu nu kutemwa kwakwe ukukulu kuno watulanzile, 5 watulenzile ukuya nu umi pamwi na Klistu, nanti cakuti twali afwe mu kuluvyanya kwitu, wamupususya pa mulandu ni cikuuku cikulu. 6 Nupya watutuutulwile capamwi nu kutupeela ivifulo umwi yulu pamwi na Klistu Yesu, 7 pakuti umu wikazi ukwiza,* ace atulange icikuuku cikulu pa mulandu na vino watutemwa swemuno twaya muli Klistu Yesu.

8 Pa mulandu ni cikuuku kwene cii cikulu wamupususya ukupitila umu utailo, nupya citaacitike pa mulandu nu kuombesya kwinu, lelo wali upe wakwe Leza. 9 Asi pa mulandu ni milimo, pakuti umwi ataya na pakukwatila icilumba. 10 Leza u watuumvile, nupya twaumvilwe muli Klistu Yesu pa mulandu ni milimo isuma ino wapekanyizizye calimwi kuti tuce tuombe.

11 Fwandi mwaiusya ukuti musi Yayuda, nupya aazembululwa na antu yakamwama ukuti mutazembululwa. 12 Pa nsita iiya mutamanyile Klistu, mutaali aina Izlaeli, mwali aenyi ku maupangano ya ulayo; mutaali nu upaalilo nupya mutaamanyile Leza umu nsi. 13 Nomba vino mwaya pamwi na Klistu Yesu, mweyano mwali sana ukutali, lyene mwaya apiipi pa mulandu nu wazi wakwe Klistu. 14 Pano watulenga ukuya nu mutende, waleeta pamwi amaumba yoili nupya onona iciumba icali pakasi kao. 15 Ukupitila umu mwili wakwe wafumizyepo ulwani na Masunde umwali ivya kulondela, pakuti maumba yoili yaye pamwi nawe nu kuya umuntu umupya alino nu kuya pa mutende, 16 nupya wawikizye maumba yoili kuli Leza ukupitila umu mfwa yakwe pa cimuti ca kucuziwilwapo* ukuti yaye umwili onga, nupya wafumizyepo ulwani. 17 Nupya wizile nu kusimikila ilyasi lisuma ilya mutende kuli mwemwe mweyano mwali ukutali sana, wasimikiile ni lyasi lya mutende kuli yano yali umupiipi, 18 pano tukapalama kuli Tata pa mulandu na aliwe ukupitila umu mupasi wa muzilo uli umwi.

19 Fwandi ndakai musi aenyi nanti aku mpanga zyuze, lelo mwemwe ikazi pamwi na antu amuzilo nupya mwemwe ya mu ng’anda yakwe Leza, 20 nupya mwakuulwa pa mufula wa yatumwa na ya kasesema, lyene Klistu Yesu ali iwe lya mu mufula pa koona. 21 Icikuulwa consi icaya pamwi nawe alino ni vilundwa vyonsi vyalemana nupya vikakula pakuti viye itempele lyakwe Yeova ilya muzilo. 22 Namwe kwene mukukuulwa pamwi muli aliwe pakuti muye incende yakwe Leza iya kwikalamo ukupitila umu mupasi wakwe.

3 Ali mulandu kwene uno ne Paulo, umufungwa wakwe Klistu Yesu pa mulandu winu, mwe yantu ya mu nko— 2 muuvwa pa wangalizi wa cikuuku cakwe Leza icikulu icapeezilwe kuli nene pa mulandu winu, 3 Leza walenzile kuti imanye inkama yakwe ino wansokolwelile, wakwe vino imulembelapo panono. 4 Fwandi nga mwabelenga kalata wii, mungamanya ningo vino namanyile inkama yakwe Leza pali Klistu. 5 Umu nkulo zyuze inkama yii itamanyikwe uku yana ya yantu wakwe vino ndakai yasokololwa uku yatumwa yakwe amuzilo na kuli ya kasesema ukupitila umu mupasi, 6 nkama yii i yakuti, antu ya mu nko yalinzile ukuilunda uku mpyanyi nu ku vilundwa vya mwili nupya yalapokelela ivintu ivili vimwi naswe vino Leza watulaya. 7 Nizile inja umuomvi wa nkama yii ukulingana nu upe wa cikuuku cikulu cakwe Leza, icapeezilwe kuli nene ukupitila mu maka yakwe.

8 Icikuuku icikulu capeezilwe kuli nene ne muntu uwacepesya pa ya muzilo yonsi, pakuti nsimikile antu ya mu nko ilyasi lisuma pa mapaalo aingi aakafuma kuli Klistu aatanga yalondololwe 9 nu kulenga ali wensi ukulola vino inkama yakwe Leza iikaangalilwa ino Leza uwaumvile ivintu vyonsi wafisile apa nsita itali. 10 Cii cacitike pakuti ukupitila umu cilongano, mauteeko na ya kateeka ya mwi yulu yamanye amano yakwe Leza akalolekela umu nzila izingi. 11 Cacitika vivyo pa mulandu nu kulonda kwakwe Leza ukwa manda pe muli Klistu Yesu Mwene witu, 12 pa mulandu wakuti twataila aliwe, tukalanda ukwaula intete nupya tukaya nu untungwa uwa kupepa kuli Leza. 13 Fwandi nkumulenga ukuti mutatoovoka pa mulandu na macuzi yano nkapitamo pa mulandu winu, pano macuzi kwene yaa aakalenga ukuti mucindikwe.

14 Ali mulandu kwene uno nafukamila kuli Tata, 15 kuli wino indupwa zyonsi umwi yulu na pano nsi zikaamilwako izina. 16 Nkupepa ukuti vino Leza wakwata sana maka, amupeele amaka umu myenzo ukupitila umu mupasi wakwe, 17 nu kuti ukupitila umu utailo winu, Klistu aikale umu myenzo inu umu kutemwa. Mutwalilile ukuya azyansye pa mufula, wakwe vino imisisi ya muti ikazyansya, 18 pakuti mwemo na amuzilo yonsi mumanye vino icumi casalala, ukutalimpa, ukusanzama,* nu kuzika, 19 nu kuti mungamanya ukutemwa kwakwe Klistu, ukwacila pa kumanya konsi, pakuti muye ni miyele yonsi isuma iikafuma kuli Leza.

20 Lyene kuli Leza aakatupeela amaka, nupya aangacita ivintu vyonsi ukucila pali vino tungalenga nanti ukwelenganya, 21 kuli aliwe kuye ululumbi ukupitila umu cilongano alino nu kupitila muli Klistu Yesu ku nkulo zyonsi amanda pe. Ameni.

4 Fwandi ne mufungwa umu Mwene, nkumupaapata ukuti mwacita ivintu ukulingana na vino mwamilwe, 2 lyonsi mwaya aicefye nupya aafuuke, mwateeka imyenzo, mwateekelelana umu kutemwa, 3 umupasi wa muzilo walenga kuti muye alemane. Mwaezya na maka ukutwalilila ukuya alemane, ukupitila mu kuya nu mutende ku yauzo. 4 Kwaya umwili onga nu mupasi onga, wakwe vino kwaya upaalilo onga uno mwamilweko; 5 Umwene wenga, utailo onga, ulubatizyo longa; 6 Leza wenga nupya Isi wakwe yonsi, aakateeka pali yonsi nupya aakaomba muli yonsi na pali yonsi.

7 Swensi twapokelile icikuuku cikulu ukufuma kuli Leza, nupya Klistu u watupeezile cila muntu upe uu. 8 Pano Malembo yakati: “Lino wakwezile papela wasenzile aafungwa; wapeezile ivya upe umu yantu.” 9 Uzye izwi lyakuti “wakwezile” likalozya mwi? Likalozya umukuti wisile na pisika, kuli kuti pano nsi. 10 Uwisile ali wino wakwezile nu kupela ukucila ukwi yulu, pakuti afikilizye ivintu vyonsi.

11 Nupya wasoolwile yamwi ukuya atumwa, yamwi ukuya ya kasesema, yamwi ukuya ya kasimikila, yamwi ukuya ya kacema na ya kasambilizya, 12 pakuti yangaazwa antu ya muzilo ukuomba mulimo wa mu cilongano, ukukuula umwili wakwe Klistu, 13 ukufikila swensi tuye alemane umu utailo nu mu kumanya ningo Umwana wakwe Leza, pakuti tuye aikolo, wakwe viivi kwene vino Klistu waya. 14 Fwandi tutalinzile ukuya wa yana, nu kusendwa na maimbi ukuli konsi kupitila umu visambilizyo vya misango yonsi ivikafuma ku yantu ya usomvi, alino ni nzila zya yantu izya ucenjezi. 15 Lelo twalanda icumi, lekini ukutemwa kutulenge ukukula muli vyonsi, muli Klistu wino ali mutwe witu. 16 Umwili onsi walemana ningo muli aliwe nupya cila cilundwa cikaazwa icuze ukupeela umwili vino ukulondekwa. Ndi cakuti cila cilundwa cikuomba ningo, cikalenga umwili onsi ukukula pakuti uye ukome umu kutemwa.

17 Fwandi cino nkulandila nu kucitila unte umu Mwene i cakuti, mutaacita ivintu wakwe vino antu ya mu nsi yakacita pano yene yakaikala ukulingana ni myelenganyizizye yao iya sile sile. 18 Melenganyo yao yaya umu mfinzi nupya yataluka ku umi wakwe Leza, pano yatamanya nanti acimwi pa mulandu wakuti imyenzo yao yaya ikome. 19 Yaata ukuvwa insonyi, yakacita ivya winyi* nupya yakalondesya ukucita ivikowele ivya misango yonsi.

20 Lelo vivyo asi vino mwasambilile pali Klistu, 21 Yesu wasambilizye vino icumi caya nupya ndi cakuti muvwile nu kusambiliziwa kuli aliwe ale mumanyile ningo pa vintu vii. 22 Mwasambiliziwe ukuzuula untu wa mpiti, uukauvwana na vino mwacitanga mpiti nupya uukononeka kulingana nu lunkumbwa ulwipe ulukamuponzya. 23 Nupya mufwile ukutwalilila ukuya na melenganyo apya, 24 nupya mulinzile ukuzwala untu upya uwaumvilwe ukulingana nu kulonda kwakwe Leza umu ulungami wa cumi nupya umu cisinka.

25 Lyene vino mwata ukubepa, mwalanda icisinka uku yauzo, pano sweswe vilundwa vya mwili onga. 26 Ndi cakuti mwasoka, mutayembuka; mutaaleka ilanzi iliwa ala mucili asoke; 27 mutapeela Ciwa apa kwikala. 28 Lekini aakaiya ate ukwiya; lelo aombesya, aiombela umwineco, pakuti angakwata ivya kupeelako yauze aakulondekwa uwavwilizyo. 29 Mutaleka amazwi aole yafume umu tunwa twinu, suka sile amazwi asuma akukomelezya wakwe vino cingalondekwa, yano yangavwa aakuuvwa. 30 Nupya mutaalenga umupasi wa muzilo ukuya nu ulanda, pano ali cimanyililo cakuti mulakululwa ukupitila umwi lambo pa wanda wa kukululwa.

31 Tiini ukuya nu lupato, icipyu, ukusoka, ukukalipa, miponto kumwi na vyonsi iviipe. 32 Lelo muye ni cikuuku ku yauzo, nupya mwaya sana nu luse, mwaitemelwa ukwelelana wakwe vino na Leza waitemiilwe ukumwelela ukupitila muli Klistu.

5 Fwandi mwakolanya Leza, wa yana atemwikwa, 2 nupya mwatemwana, wakwe vino na Klistu watutemilwe nu kupeela umi wakwe pa mulandu witu ukuya ilambo ilinunkile kuli Leza.

3 Mutaezya ukulumbula uzelele* nu kukowela ukuli konsi nanti ukulondesya ukukwata ivingi, pano antu ya muzilo yatalinzile ukucita vivyo; 4 nupya mutaaya ni miyele ya nsonyi nanti imilandile ya uwelewele nanti imipuulwe iipe, ivintu vivyo vitaazipa, lelo mwataizya Leza; 5 pano mwamanya ukuti kacita wa uzelele nanti umuntu umukowele nanti aakalondesya ukukwata ivingi, kuli kuti kapepa wa vilubi, atanga aingile umu Wene wakwe Klistu na wakwe Leza.

6 Mutaleka umuntu umwi amubepe na mazwi ya uwelewele, pano pa mulandu ni vintu vivyo ukali wakwe Leza ukwiza pali ya cintuvwa. 7 Fwandi mutauvwana nayo; 8 pano pa nsita imwi mwali umu mfinzi nomba ndakai mwaya umu luswepo pa mulandu wa Mwene. Mwapita wa yana ya luswepo, 9 pano umu luswepo mukafuma ivintu ivisuma, nu ulungami ni cumi. 10 Lyonsi mwamanya ndi cakuti ivicitwa vinu vili ningo uku Mwene nanti foo; 11 mutaacitako imilimo ya mu mfinzi; lelo mwasokolola imilimo iiyo pakuti iyamanyikwa ukuti iipe. 12 Pano ivintu vino yakacita umu nkama i vya winyi na pa kuvilumbula. 13 Lyene ivintu vyonsi ivikasokoloka umu luswepo vikamanyikwa, nupya ivintu vyonsi ivikamanyikwa vikaya u luswepo. 14 Acino Malembo yakati: “Wemuno watulala zyuka, nupya katuka ukufuma uku yafwe, na Klistu alakupeela uluswepo.”

15 Acino cenjelini pakuti mutaapita wa yawelewele lelo mwapita wa yantu ya mano, 16 mwaomvya ningo insita pano manda yaa aipe. 17 Fwandi tiini ukuya awelewele, lelo mwailuka vino ukulonda kwakwe Yeova kwaya. 18 nupya mutaakoleka waini, pano ikalenga umuntu ukucita ivintu iviipisye, lelo mwaya sana nu mupasi wa muzilo. 19 Mwalanzyanya umu malumbo, ala mukulumbanya Leza, nu kwimba inyimbo zyakwe Leza, nupya mwaimbila Yeova inyimbo umu myenzo inu, 20 lyonsi mwataizya Leza witu nupya Tata muli vyonsi umwi zina lya Mwene witu Yesu Klistu.

21 Mwatontelana pa mulandu wa kutiina Klistu. 22 Lekini aci yatontela ya iya kwati yakutontela Umwene, 23 pano iya ali mutwe wa muci, wakwe vino Klistu nawe u mutwe wa cilongano, wene ali kapususya wa mwili uu. 24 Wakwe vino icilongano cikatontela Klistu, avino aci nayo yalinzile yatontela ya iya muli vyonsi. 25 Mwe ya iya twalililini ukutemwa aci inu wakwe vino na Klistu watemilwe cilongano nu kucifwila, 26 pakuti acisangulule, nu kuciswefya na manzi aya umwi zwi lyakwe Leza, 27 pakuti cilongano cingaya icisuma umu manso yakwe, icitakoweziwa ni cili consi nanti ukukwata imikunya, lelo ica muzilo nupya icaula indema.

28 Umu nzila ili yonga kwene, ya iya yalinzile ukutemwa aci yao wakwe vino yatemwa imili yao. Umonsi uwatemwa umuci wakwe ala waitemwa umwineco, 29 pano kutatala kwaya umuntu uwapata umwili wakwe, lelo akaulisya nu kuusakamala wakwe vino Klistu akasakamala icilongano, 30 pano sweswe vilundwa vya mwili wakwe. 31 “Ali mulandu uno umonsi alasiila isi na nyina nu kuilundanya* ku muci wakwe, nupya yoili yalaya umwili onga.” 32 Inkama yii yakwe Leza iikalamba. Lyene nkulanda pali Klistu ni cilongano. 33 Lelo cila muntu alinzile ukutemwa umuci wakwe wakwe vino waitemwa; umuci nawe alinzile ukucindika sana iya.

6 Mwe yana, mwauvwila avyazi inu wakwe vino Umwene akalonda, pano ukucita vivyo ali cisuma umu manso yakwe Leza. 2 “Uwacindika tata wako na mayo wako” lii ali sunde lya kutandikilako ilyaya umu ulayo uukati: 3 “Pakuti ivintu vikuzipile nupya uwikale amanda aingi pano nsi.” 4 Mwe ya isi, mutaasosya ana inu, lelo mwayasalapula nu kuyasambilizya ukulingana na vino Yeova akalanda.

5 Mwe yaomvi mwauvwila asambazi inu, mwayatiina nu kuyacindika ni myenzo inu yonsi, wakwe vino mungacita kuli Klistu, 6 mutacita sile vivyo lino antu yakumulola pakuti muyazanzye, lelo mwacita wa yaomvi yakwe Klistu akacita ukulonda kwakwe Leza ni myenzo yonsi. 7 Mwaomba nu mwenzo onsi kwati mukuombela Yeova, asi kwati mukuombela antu, 8 pano mwamanya ukuti icisuma consi cino umuntu ali wensi akucita, Yeova alamuwezezya, asi mulandu u muzya nanti umuntungwa. 9 Mwe yasambazi, namwe kwene mwacita vikwene uku yazya inu, mutayatiinya, pano mwamanya ukuti umusambazi wao nu musambazi winu waya ukwi yulu, nupya ataaya na kapaatulula.

10 Ica kusyalikizya i cakuti, twalililini ukukomeleka umu Mwene nu mu maka yakwe. 11 Zwalini ivyakuzwala vya mu ulwi vyakwe Leza ivikumanile pakuti muzyansye lino mukulwisya imicenjelo yakwe Ciwa; 12 pano tusilwisyanya nu wazi nu mwili, lelo tukalwisyanya na mauteeko, ya kateeka, intunguluzi zya mu nsi yii umwaya imfinzi, alino ni mipasi iipe iyaya umu lwelele. 13 Acino zwalini ivyakuzwala vya mu ulwi vyakwe Leza ivikumanile, pakuti muye na maka ya kucimvya umu wanda uwipe, nupya pa cisila ca kucita vii vyonsi, mwimilile ndi.

14 Fwandi imililini ndi, munyepe icumi umu misana inu wa musipi, muzwale ulungami uwaya kwati i ca kucinga icisao, 15 nupya muzwale insapato ukulangilila ukuti imuipekanya ukusimikila ilyasi lisuma ilya mutende. 16 Ukulunda pali vii vyonsi, sendini icisyangu icikulu ica utailo, umwa kuzimizya inceto zyonsi izya mwipe izikwaka wa moto. 17 Nupya zwalini icisote ci pusukilo, nu kusenda ulupanga lwa mupasi, kuli kuti izwi lyakwe Leza, 18 nupya mwapepa lyonsi mapepo ya misango yonsi na mapepo ya kupaapata umu mupasi wa muzilo. Muye aiteyanye, lyonsi mwapaapatilako antu ya muzilo yonsi. 19 Nani kwene mwampepelako, kuti napeelwa mazwi ya kulanda, pakuti nalanda nu kusipa lino nkulenga inkama yakwe Leza iyi lyasi lisuma ukumanyikwa, 20 Leza u wantuma kuti nsimikile ilyasi lisuma, ali mulandu uno nanyepelwa, mwampepelako kuli Leza pakuti nalanda ilyasi lisuma ukwaula intete, wakwe vino ndinzile ukulanda.

21 Lyene pakuti namwe mumanye pali nene alino na vino nkuomba, Tikikasi umwina umutemwikwe nupya umuomvi wa cumi umu Mwene, alamumanyisya vyonsi. 22 Ukwene uli mulandu uno nkumutumila kuli mwemwe, pakuti mumanye vino tuli na pakuti ateekezye imyenzo inu.

23 Si aina itu yonsi yaye nu mutende alino nu kutemwa pamwi nu utailo ivikafuma kuli Leza Tata nu ku Mwene Yesu Klistu. 24 Si cikuuku cikulu ciye pali yonsi aaya nu kutemwa kwa cumi uku Mwene witu Yesu Klistu.