KU INA FILIPI

1 Ne Paulo na Timoti swe yaomvi yakwe Klistu Yesu, twamulembela mwe ya muzilo mwensi muli Klistu Yesu mwemuno mukaikala umu Filipi, kumwi na angalizi alino na aomvi aakatumikila:

2 Icikuuku cikulu nu mutende ivikafuma kuli Leza Tata witu nu ku Mwene Yesu Klistu viye namwe.

3 Nkataizya Leza wane lyonsi lino namwiusya 4 umu mapepo ya kumupaapatilako mwensi. Nkapepa mapepo yayo ni nsansa, 5 pa mulandu na vino mwaipeelesya ukulundulula ilyasi lisuma kufuma pa wanda wa kutandikilako ukufika na ndakai kwene. 6 Pano insininkizya ukuti umuntu uwatandike umulimo usuma muli mwemwe, alaumalilila ukufika pa wanda wakwe Klistu Yesu. 7 Icilinga ukuti naelenganya vii pali mwemwe mwensi, pano mwaya umu mwenzo wane, mwemo nani ivintu vyatuzipila pa mulandu ni cikuuku cikulu cakwe Leza nupya mukangazwilizya lino indi umu cifungo alino nu mu kupoka insambu zya kusimikila ilyasi lisuma.

8 Pano Leza u wamanya vino nkamuluuka pa mulandu nu kutemwa kuno namutemwa wakwe vino na Klistu Yesu wamutemwa. 9 Ali cino nkamupepela ukuti, ukutemwa kwinu kwakulilako pamwi nu kumanya nu kwiluka; 10 pakuti mwamanya ivintu ivicindamisye, kuti mukazanikwe akaele nupya asisosya yauze ukufika pa wanda wakwe Klistu; 11 na pakuti muye ni miyele ya ulungami ikaizila muli Yesu Klistu, pakuti Leza acindikwe nu kulumbanyiziwa.

12 Inane nkulonda mumanye ukuti, ivikancitikila vyalenga umulimo wa kusimikila ilyasi lisuma ukulunduluka, 13 icakuti Alinzi ya Kwi Sano na antu yonsi iyamanya ukuti naya umu cifungo pa mulandu wakwe Klistu. 14 Nupya aina aingi aakaombela Umwene iyakomeleziwa pa mulandu wakuti naya umu cifungo, nupya yakulanda sana api izwi lyakwe Leza ukwaula intete.

15 I cacumi, yamwi yakasimikila pali Klistu pa mulandu wa muvimbila nu kucimvyanya, lelo yauze yene a pa mulandu wa kulonda ukucita ivisuma. 16 Aakalonda ukucita visuma yene yakasimikila pali Klistu pa mulandu nu kutemwa, pano yaamanya ukuti nasontwa ukuti nacingilila ilyasi lisuma; 17 lelo yauze yene yakacita vivyo pa mulandu wa kucimvyanya asi pa mulandu wa kulonda ukucita ivisuma, pano yakalonda ukuleta intazi na zyuze pali nene lino indi umu cifungo. 18 Uzye i vyani ivikacitika? Asi mulandu yakasimikila umu cumi nanti foo, yakasimikila pali Klistu, nkasansamuka pali cii. Nupya ndatwalilila ukusansamuka, 19 pano namanya ukuti cico cilalenga mpusuke pa mulandu na mapepo inu nu wazwilizyo uukafuma uku mupasi wakwe Yesu Klistu. 20 Nasininkizya nu kutaila ukuti ntaluvwa insonyi izili zyonsi, lelo vino ukufuma lyonsi nkalanda ukwaula intete pali Klistu, alalumbanyiziwa muli nene asi mulandu indi nu umi nanti foo.

21 Pano ndi cakuti indi nu umi nkauomvya uku kuombela Klistu, nupya nga nafwa ala uku usuma wane. 22 Lyene nga natwalilile ukuya nu umi pano nsi, ningaomba ivingi umu mulimo wane; lelo nga nali nu kusoolola cimwi, ntanga intemwe kuti cimanyikwe. 23 Ntamanya cino ningasoolola pa vintu vii viili, pano nkalondesya ukusapulwa alino nu kuya pamwi na Klistu, pano cikwene ali cintu icizipisye. 24 Lelo cingazipisya ndi cakuti natwalilile ukuya nu umi pano nsi pa mulandu winu. 25 Fwandi vino nasininkizya cii, nimanya ukuti nimatwalilila ukuya namwe mwensi pakuti mwalunduluka umu mulimo wakwe Leza na pakuti muye ni nsansa pa mulandu wa utailo, 26 pakuti insansa zino mwakwata pa mulandu wakuti mwemwe yasambi yakwe Klistu Yesu zikavulileko lino ndiza nupya.

27 Mwaikala ukulingana ni lyasi lisuma ilya pali Klistu, pakuti nga niza kuli mwemwe nanti foo, inkuvwe nu kumanya ukuti muli na melenganyo ali yamwi nu mwenzo onga lino mukwezya na maka ukuya nu utailo umwi lyasi lisuma, 28 nupya mutatiina alwani inu. Pano ivintu vii vikalangilila ukuti yene yalononwa, lelo mwemo mulapusuka; usininkizyo uu wafuma kuli Leza. 29 Pano mwapeelwa isyuko pa mulandu wakwe Klistu, ilya kumutaila nu kucula pa mulandu wakwe. 30 Pano mukapita umu ntazi izili zimwi na zino napisilemo, nupya zino ncili nkupitamo na ndakai kwene.

2 Ndi cakuti kwaya ukukomeleziwa ukuli konsi muli Klistu, nanti ukuteekeziwa umu kutemwa, nanti ukuombela pamwi muli vyakwe Leza, nanti ukutemwa nu uluse, 2 lekini inje sana ni nsansa lino mukulanga ukuti mwaya nu mwenzo onga nu kutemwa ukuli kumwi, kuya alemane, nu kuya na melenganyo ali yamwi. 3 Mutaacita icili consi pa mulandu nu kucimvyanya nanti cilumba, lelo muye aicefye nu kulola ukuti yauze yamucila, 4 mutalonda sile ivingamuzipila, lelo mwalonda ni vingazipila yauze.

5 Muye ni myelenganyizizye ino Klistu Yesu wali nayo, 6 wino nanti cakuti wali mu cata cakwe Leza atelenginyepo ukuti walingana nawe. 7 Wene wasile vyonsi vino wakweti nu kuya wa muzya nupya wizile aya u muntu. 8 Ukulunda pali cico, lino wizile wa muntu waicefizye nupya wizile aya ni cuvwila ukufika lino wafwile, kuli kuti imfwa ya pa cimuti ca kucuziwilwapo.* 9 Ukwene uli mulandu uno Leza wamucindamikiile nu kumupeela icifulo ca papela nupya wamupeezile izina ilyacila amazina yonsi, 10 pakuti yonsi yakafukame umwi zina lyakwe Yesu, kuli kuti aya umwi yulu na aya pano nsi na aya umu musili* 11 nupya yonsi yalalanda apaswe ukuti Yesu Klistu u Mwene, pakuti Leza Tata acindikwe.

12 Fwandi mwe yatemwikwa yane, wakwe vino mwaya ni cuvwila lyonsi asi sile lino indi namwe lelo na lino insi namwe, mwaombesya pakuti mukapusuke nupya mwacita vivyo nu mucinzi alino ni ntete. 13 Pano Leza akacita vino akulonda, aakamukomya ukupitila umu kumupeela amaka nu mwenzo wa kulondesya ukuomba. 14 Twalililini ukucita ivintu vyonsi ukwaula ukuilizyanya nanti ukupaazyanya, 15 pakuti mutaya nu mulandu lelo muye aakaele, ana yakwe Leza aatakoweziwa umu nkulo yii iipe nupya iisicita ivilungame, muno mukayengesa wa luswepo muno nsi, 16 mwalemasya izwi lya umi. Lyene ningakwata pa kusansamukila umu wanda wakwe Klistu, pano ukusimula kwane nu kuombesya kwane vitaali ivya sile sile. 17 Lelo nanti cakuti nkwitululwa wi lambo lya vyakumwa pa ulambo ukupitila umu kuomba umulimo wa muzilo, indi sana ni nsansa pamwi namwe mwensi, pano utailo winu walenga ukuti namwe kwene mwacita vii. 18 Umu musango uli umwi, namwe kwene mulinzile ukuya ni nsansa nu kusansamukila pamwi nani.

19 Nkutaila umu Mwene ukuti likwene nasya ince ntume Timoti kuli mwemwe, pakuti ince nkomeleziwe nga nuvwa pali mwemwe. 20 Pano ntakweti ali wensi uwaya wakwe aliwe aangamukomelezya monsi muno mukulondekwa. 21 Pano yonsi yakalonda ivingayazipila, asi vyakwe Klistu Yesu. 22 Lelo mwamanya usininkizyo uno walanzile, wa mwana aali pamwi na isi waombiile pamwi nani ku kulundulula ilyasi lisuma. 23 Fwandi ali wino nkutaila ukutuma nga nalola sile vino ivintu vyaya kuli nene. 24 Insininkizya mu Mwene ukuti nani kwene indi nu kwiza likwene.

25 Lelo ndakai nkulola ukuti cili ningo ukutuma Epaflodito kuli mwemwe, umwinane nupya umuomvi unji nupya musilika unji, nupya intumi inu, umuomvi aakansakamala muli vino nkalondekwa, 26 pano akulondesya ukumulola mwensi nupya ali nu ulanda pano muvwile ukuti walwile. 27 Walwile umupiipi nu kufwa; lelo Leza wamuvwilile luse, kumwi nani kwene, pakuti ntakwata ulanda na uze. 28 Acino nkumutuma zuwa sana, pakuti nga mwamulola mukaye ni nsansa nupya pakuti nani ntaasakamikwa sana. 29 Fwandi mukamupokelele ni nsansa wakwe vino mukapokelela alondezi ya Mwene, nupya mwacindika sana antu ya musango uwo, 30 pano wali umupiipi nu kufwa pa mulandu nu mulimo wakwe Klistu, wisile umi wakwe umu uzanzo pa kumbombela umulimo uno mwemo mutaali nu kumbombela.

3 Ni ca kusyalikizya inane, twalililini ukusansamukila umu Mwene. Nsikutonta ukumulembela ivintu ivili vimwi, lelo a pakuti mucingililwe.

2 Cenjelini uku yantu aaya wakwe ya simbwa; cenjelini kuli yano yakacita iviipe; nupya cenjelini uku yantu aakalonda ukuti muzembululwe.* 3 Pano Swemo twazembululwa umu cumi, swemuno tukaombela Leza ukupitila umu mupasi wakwe nupya tukayuvwila muli Klistu Yesu, tutataila umu vintu vya untunze, 4 ndi cakuti kuli ali wensi uwakwata ivyalenga ukuti ataile umu vintu vya untunze, a nene kwene.

Ndi cakuti umwi akaelenganyaa ukuti kwaya ivyalenga ataile umu vintu vya untunze, ale nemo nakwata ivingi ukumucila: 5 nazembulwilwe ala indi na manda 8, nene wa mu luko lwa ina Izlaeli, uwa mu mutundu wakwe Benjamini, nene Muebele uwavyaliilwe umu Yaebele; vino nali Umufaliseo, nalondelanga sana Masunde; 6 nali umucincile umu kucuzya icilongano; ukulozya uku ulungami wa masunde, nailolanga ukuti nene wa kaele. 7 Lelo ivintu vino nalonsile, nkavilola ukuti i vya sile sile pa mulandu wakwe Klistu. 8 Nupya nkalola ivintu vyonsi ukuti i vya sile sile pa mulandu wa kumanya Klistu Yesu Umwene wane. Pano nasya ivintu vyonsi pa mulandu wakwe Klistu nupya nkavilola ukuti i vikoona, pakuti inje umusambi wakwe Klistu 9 nu kuya pamwi nawe, asi kuti nene mulungami pa mulandu wa kulondela Masunde, lelo a pa mulandu nu ulungami uwaya umu kutaila muli Klistu, kuli kuti ulungami uukafuma kuli Leza uwasintilila pa utailo. 10 Cino nkalondesya u kumanya Klistu na maka yakwe aakutuutuluka nu kucula muli vino wacuzile, nu kufwa wakwe vino wafwile, 11 pakuti indole ndi cakuti ningaca inje pa kutuutuluka kwa yafwe ukwa kutandikilako.

12 Cisikupiliula ukuti napokelela mpiti icilambu nanti ukuti naya umumalilike, lelo nkaombesya pakuti indole ndi cakuti ningapeelwa icilambu cico cino Klistu Yesu wansoolwela. 13 Inane, nsilola kuti napoka mpiti icilambu; lelo icintu conga cino ningalanda i cakuti: Nilila ivintu vya ku cisila nu kwika mano pa vintu vya ku nkoleelo, 14 nkaombesya pakuti nkapoke icilambu ca mwi yulu cino Leza wangamilapo ukupitila muli Klistu Yesu. 15 Fwandi lekini swemuno twakoma muli vyakwe Leza tuye ni myelenganyizizye kwene yii, nupya ndi cakuti mukwelenganya umu nzila ipusaneko, Leza alasokolola imyelenganyizizye isuma kuli mwemwe. 16 Asi mulandu na pano twafika ukulunduluka, lekini tutwalilile ukulunduluka vikwene.

17 Inane, mwensi mwankolanya, nupya mwaika mano kuli yayo aakalondela vino twacitanga. 18 Pano kwaya aingi yano nalumbulanga sana, lelo ndakai nkayalumbula ala nkulila, pano lyene aalwani ya cimuti ca kucuziwilwapo* cakwe Klistu. 19 Impela yao u wononesi, inda zyao ali leza wao, nupya yakauvwila icilumba umu vintu vino yalinzile ukuvwilapo insonyi, nupya yakaika mano uku vintu vya pano nsi. 20 Lelo swemo uwikazi witu u wa kwi yulu, nupya tukaloleela sana kapususya ukufuma ukwi yulu, Umwene Yesu Klistu, 21 wene alasenula imili itu iitonte pakuti ikolane nu mwili wakwe uwa ucindami ukupitila umu maka yakwe aakalenga ukuti aatungulula ivintu vyonsi.

4 Acino inane mweyano natemwa nupya yano nkaluuka, mwe nsansa zyane nupya icisote cane ica ucindami, imililini ndi umu nzila kwene yii umu Mwene, mwe yatemwikwa yane.

2 Nkukomelezya Yuodia na Sintike ukuti yaya na melenganyo ali yamwi lino yakuombela Umwene. 3 Nkukulenga nawe kwene we muomvi munji uwa cumi, ukutwalilila ukwazwa anaci yaa aombesyanga pamwi nani umu kusimikila ilyasi lisuma, pamwi na Kilementi alino na yonsi aomvi yanji yano amazina yao yaya umwi buku lya umi.

4 Lyonsi mwasansamukila umu Mwene. Nupya kwene nkumunena ukuti, Mwasansamuka! 5 Lekini antu yonsi yailolela ukuti musiumilila sile pali vino mukwelenganya. Umwene ali apiipi. 6 Mutasakamikwa nanti acimwi, lelo lekini vyonsi vino mukulenga vimanyikwe kuli Leza ukupitila umwi pepo nu kupaapata pamwi nu kutaizya; 7 nupya umutende wakwe Leza, uwacila imyelenganyizizye yonsi iya yantu ulacingilila imyenzo inu na melenganyo inu ukupitila muli Klistu Yesu.

8 Ica kusyalikizya inane, twalililini ukwelenganya pa vintu vyonsi ivya cumi, ivintu vyonsi ivicindame, ivintu vyonsi ivilungame, ivintu vyonsi ivisanguluke, ivintu vyonsi ivyatemwikwa, ivintu vyonsi ivikalandwa ningo, ivintu vyonsi ivisuma, alino ni vintu vyonsi ivya kutaizya. 9 Ivintu vino mwasambilile nu kuzumila nu kuvwa nu kulola ukupitila muli nene, mwavicita, nupya Leza wa mutende alaya namwe.

10 Nkusansamukila sana umu Mwene pa mulandu wakuti lyene imutandika ukunsakamala nupya. Nanti cakuti mutaanjilile, mutazanyile inzila iya kungazwilamo. 11 Nsikulanda vii pa mulandu wakuti inulizya, pano nasambilila ivya kukwata vino nkulondekwa asi mulandu na vino nkupitamo. 12 Namanya ivya kwikala lino nkweti utunono na lino nkweti ivingi. Muli vyonsi ivikancitikila nasambilila inkama ya mikalile lino nkweti ivyakulya na lino indi ni nzala, namanya ni vya kucita lino nkweti ivingi na lino ntakweti. 13 Umu vintu vyonsi nakwata maka ukupitila muli wino akampeela maka.

14 Lelo mwacisile ningo ukuya nani umu ntazi zino napitangamo. 15 Nupya mwe ina Filipi mwamanya nu kuti pa cisila cakuti mwasambilila ilyasi lisuma, lino nafumile ku Makedoniya, kutaali icilongano icangazwilizye nanti ukuzumila uwazwilizyo wane, suka sile mwemwe. 16 pano lino nali umu Tesalonika, mwantumiile ivyalondekwanga, asi sile muku onga lelo imiku iili. 17 Nsikulanda vii pakuti mumpeele upe, lelo nkulonda ukuti mwacita ivintu ivisuma ivilamuletela umuzano. 18 Lelo inkwata vyonsi ivikulondekwa nu kucilapo. Pano napokelela vino mwatumile Epaflodito kuti andetele, ivyaya wi lambo ilinunkile ilikazanzya Leza. 19 Fwandi Leza wane uwakwata ivyuma ivingi ivicindame alamupeela vyonsi vino mukalondekwa ukupitila muli Klistu Yesu. 20 Lyene kuli Leza witu nupya Tata kuye umucinzi amanda pe. Ameni.

21 Mundamukile amuzilo yonsi aaya muli Klistu Yesu. Aina yano indi nayo yamulamuka. 22 Amuzilo yonsi, sana sana amu ng’anda yakwe Kaisale, yamulamuka.

23 Icikuuku cikulu ica Mwene Yesu Klistu ciye namwe lino mukulanga imiyele isuma.