KU INA KOLOSE

1 Ne Paulo, umutumwa wakwe Klistu Yesu pa mulandu nu kulonda kwakwe Leza, indi na Timoti umwina witu, 2 namulembela mwe ya muzilo na ina acumi aaya muli Klistu umu Kolose:

Cikuuku cikulu nu mutende ukufuma kuli Leza Tata witu viye namwe.

3 Lyonsi tukataizya Leza, Isi wa Mwene witu Yesu Klistu, lino tukumupepelako, 4 pano tuuvwa pa utailo uno mwakwata muli Klistu Yesu na vino mwatemwa amuzilo yonsi 5 pa mulandu nu upaalilo uno mwakwata pa vintu vino yamusungila umwi yulu. Muvwile pa upaalilo uu ukupitila umwi lyasi lisuma ilya cumi 6 ilyasimikiilwe kuli mwemwe. Wakwe viivi kwene vino ilyasi lisuma likaseeka ivizao nu kusalangana umu nsi yonsi, avino likaomba na muli mwemwe ukufuma pa wanda uno mwalyuvwile nu kumanya icikuuku cikulu cakwe Leza umu cumi. 7 Ali vino mwasambilile uku muomvi munji wino twatemwa Epafula, umuomvi wakwe Klistu uwa cisinka aakatwimililako. 8 Nupya wizile atuneena pa kutemwa kuno umupasi wakwe Leza wamuleenga ukukwata.

9 Ali cino ukufuma pa wanda uno tuvwile vivyo, tutaata ukumupepelako nu kumulengelako ukuti mwamanya ningo ukulonda kwakwe Leza umu mano yonsi nu kwiluka kuno umupasi wa muzilo ukapeela, 10 pakuti mwacita ivintu wa yantu aakapepa Yeova kuti mwamuzanzya lino mukuomba imilimo isuma nu kumanyilapo ivingi pali aliwe; 11 nupya amukomye na maka yonsi ukulingana na maka yakwe alulumbi pakuti mwazizimizya sana nu kuteeka umwenzo alino ni nsansa, 12 lino mukutaizya Tata uwalenzile ukuti muye alinge ukupokelela vino walavile amuzilo umu luswepo.

13 Watupuswisye ukufuma uku maka ya mfinzi nu kutuleta umu wene wa Mwanakwe umutemwikwe, 14 Umwanakwe kwene wii u watukulula ukuomvya ilambo, pakuti twelelwe imembu zitu. 15 Wene waya umu cata cakwe Leza aasiloleka, iiyeli pa viumbwa vyonsi; 16 pano muli aliwe amuno vyonsi ivyasyala vyaumbiilwe, ivya mwi yulu ni vya pano nsi, ivintu ivikaloleka ni vintu ivisiloleka, ivilimba vya wene nanti utunguluzi nanti mauteeko nanti ya kateeka. Ivintu vyonsi ivyasyala vyaumvilwe ukupitila muli aliwe nupya awino vyaumbiilwe. 17 Wene akuno wali lino ivintu vyonsi ivyasyala vitali viyeko, nupya vyonsi ivyasyala vizile iviyako ukupitila muli aliwe, 18 nupya ali mutwe wa mwili, kuli kuti icilongano. Ali wa kutandikilako, kuli kuti iyeli ukufuma uku yafwe, pakuti angiza aye uwa kutandikilako umu vintu vyonsi; 19 pano Leza watemilwe ukuti ivintu vyonsi viye ivimalilike ukupitila muli aliwe, 20 nupya ukupitila muli Klistu, kuli kuti umu wazi uno wazwisizye pa cimuti ca kucuziwilwapo,* Leza akawezya kuli aliwe ivintu vyonsi ivyasyala ivyaya umwi yulu na pano nsi.

21 I cumi mwemuno mwali ukutali na Leza nupya mwali alwani yakwe pa mulandu wakuti mwelenganyanga nu kucita iviipe, 22 wamuwezezya kuli aliwe ukupitila muli wiyo uwizile afwa pakuti muye amuzilo aula indema nupya aula umulandu pa manso yakwe Leza, 23 lelo mutwalilile ukuya nu utailo uwasimpwa pa mufula nupya ukome, mutaasendwa ukufuma uku upaalilo uno mwakwata api lyasi lisuma lino muvwile nupya ilyasimikilwe uku viumbwa vyonsi ivyaya pano nsi. Ne Paulo nizile inja umuomvi wi lyasi kwene lilyo ilisuma.

24 Ndakai lyene nkusansamuka pali vino nkucula pa mulandu winu. Nkuyuvwa ukuti vino nkucula pa mulandu wakuti nene cilundwa ca mwili wakwe Klistu vilinzile ukutwalilila. Ukucula kuu kulavwa umwili wakwe Klistu, kuli kuti icilongano. 25 Nizile inja umuomvi wa cilongano cii ukulingana nu wangalizi uno Leza wampeezile pa mulandu winu kuti nsimikile sana izwi lyakwe Leza, 26 kuli kuti inkama yakwe Leza iyafisilwe umu nsi* nu ku yantu aaliko mpiti. Lelo ndakai yasokololwa uku yantu yakwe amuzilo, 27 kufuma umu yantu ya mu nko, yano Leza waitemiilwe ukuti amanyisye ucindami wa nkama yakwe, inkama yii a Klistu uwaya muli mwemwe, wino mukapaalila ukuti mulacindamikilwa pamwi nawe. 28 Ali wino tukusimikilapo nu kukonkomezya antu yonsi nu kuyasambilizya mano ya cumi, pakuti tungazwa yonsi aaya muli Klistu kukula muli ukapepa nu kuyapalamika kuli Leza. 29 Acino nkuombesya nu kukomeleka pa mulandu na maka yakwe aakuomba muli nene.

2 Pano nkulonda mumanye vino nkaombesya sana pa mulandu winu na pa mulandu wa yantu ya mu Lodesiya alino na yonsi aatatala yandolapo. 2 Nkacita vii pakuti imyenzo yao iteekeziwe nu kuti yatemwane nupya yaye ni vyuma ivikafuma umu kwiluka, pakuti yamanye ningo inkama yakwe Leza, kuli kuti Klistu. 3 Muli aliwe u mwafiswa ivintu vya mutengo, kuli kuti amano nu kumanya. 4 Nkulanda vii pakuti ali wensi atamubepa uku milandile ya kutonsya. 5 Nanti cakuti insi namwe, uku mupasi indi namwe, nkusansamuka pa mulandu wakuti mutaaya ni cimvulunganya na pali vino mwaya nu utailo ukome muli Klistu.

6 Fwandi wakwe vino mwazumila Klistu Yesu Mwene, twalililini ukuya ni cuvwila kuli aliwe, 7 muye akomeleke muli aliwe nupya muye sana nu utailo wakwe vino mwasambiliziwe nupya mwataizya.

8 Cenjelini pakuti ali wensi atamulenga ukuya azya ku mano ya untunze nu ku ucenjezi, ukulingana ni ntambi zya yantu alino ni visambilizyo vya sile sile ivya muno nsi ivyapusana nu kulonda kwakwe Klistu. 9 Pano muli aliwe u mukalolekela ningo imiyele yonsi yakwe Leza. 10 Mwakwata vyonsi pa mulandu na aliwe, wene ali mutwe wa mauteeko yonsi alino na ya kateeka. 11 Nupya pa mulandu wa kuya ivyuza vyakwe, mutaazembulwilwe na antu lelo mwafumizye imiyele ya luyembu, kuli kuti ukuzembululwa ukukafuma kuli Klistu. 12 Pano mwazisilwe pamwi nawe umu lubatizyo lwakwe, nupya pa mulandu wa kuya ya cuza yakwe mwatuutulwilwe pamwi nawe ukupitila umu kutaila imilimo yakwe Leza iya maka, uwatuutulwile Klistu ukufuma uku yafwe.

13 Nupya nanti cakuti mwali afwe pa mulandu ni membu zinu nu kukanazembululwa umu miyele inu, Leza wamulenzile ukuya nu umi pamwi na Klistu. Welezile imembu zitu zyonsi 14 nupya wafuusile Masunde umwali ivya kulondela nupya aatulwisyanga. Wayafumizyepo ukupitila umu kuyapoopela pa cimuti ca kucuziwilwapo.* 15 Pa mulandu kwene uu wacimvizye mauteeko na ya kateeka nu kuyasenda wa yazya kuti yazewane paswe nu kulanga ukuti watayacimvya.

16 Acino mutaleka umuntu ali wensi amupingule pa vyakulya na pa vyakumwa nanti pa kuzevya kwa pa mwaka nanti pa kuzevya umwezi upya nanti api sabata. 17 Ivintu vivyo vyaya wa cinzingwa ca vintu iviliza, lelo Klistu ali wa cumi. 18 Mutaleka ali wensi amulenge ukukanapokelela icilambu, aakaipanga kwati umuicefye nupya aakapepa ya malaika, nupya aakaika mano uku vintu ivikaloleka. Wene akaitumika apaula ica kuitumikilapo pa mulandu ni myelenganyizizye ya untunze, 19 nupya asilondela umutwe* uukapeela umwili vino ukalondekwa nupya ukalemanya umwili ukuomvya ivilundwa muno amafupa yalemenkanila alino ni mikole. Wene ukalenga umwili ukukula ukufuma kuli Leza.

20 Ndi cakuti mwafwile pamwi na Klistu uku vintu vya muno nsi ivya sile sile, u mulandu ci uno mukwikala wa yantu amuno nsi ukupitila umu kulondela masunde aakalanda ukuti: 21 “Utaalya, utaika pa kanwa, utaalema,” 22 ukulozya uku vintu ivikaononeka nga vyaomviwa, ukulingana na masunde ni visambilizyo vya yantu? 23 Nanti cakuti ivintu vivyo vikaloleka ukuti i vya mano umu mipepele ya kuisoolwela nu mu kuicefya kwa ufi, nu kucuzya umwili, visiavwa umuntu ukucimvya ivilondwa vya mwili.

3 Ndi cakuti mwatuutulwilwe pamwi na Klistu, mwalonda ivintu vya kwi yulu, kuno Klistu wikala ukwi kasa li lunji lyakwe Leza. 2 Mwaika amano pa vintu vya kwi yulu, mutaika amano pa vintu vya pano nsi. 3 Pano mwafwile, nupya umi winu wafiswa pamwi na Klistu kulingana nu kulonda kwakwe Leza. 4 Lino Klistu, uwaya ali umi witu alasokololwa, lyene namwe kwene mulasokololwa pamwi nawe umu lulumbi.

5 Fwandi komini ivilundwa vya mili inu ivya pano nsi, kuli kuti, uzelele,* kukowela, insuna iyacila umu cipimo, kulondesya ukucita viipe, na ukaitemwe kuli kuti ukupepa ivilubi. 6 Ukali wakwe Leza ukwiza pa mulandu ni vintu kwene vii. 7 Namwe kwene vikwene avino mwacitanga mpiti. 8 Lelo mulinzile ukuta ukucita ivintu vii vyonsi: icipyu, ukali, iviipe, intusi, ni mivwangile ikowele. 9 Mutabepana. Zulini untu wa mpiti pamwi ni vicitwa vya uko, 10 nupya zwalini untu upya, uukalengwa ukuya upya ukupitila umu kumanya kwa cumi kulingana nu waupanzile, 11 umutaya Umugiliki nanti Umuyuda, muzembululwe nanti aatazembululwa, uwa ku mpanga yuze, umutuutu, umuzya nanti umuntungwa; lelo Klistu waya ivintu vyonsi nupya twaya muli aliwe.

12 Acino vino Leza wamusoolola mwe ya muzilo nupya atemwikwe, zwalini uluse, cikuuku, kuicefya, ufuuke nu kuteeka umwenzo. 13 Twalililini kuteekelelana nu kuitemelwa ukwelelana nanti cakuti umwi watakwata ica kuilizyanya pa muze. Wakwe vino Yeova waitemiilwe ukumwelela avino namwe kwene mwaitemelwa ukwelelana. 14 Ukulunda pa vintu vii vyonsi, zwalini ukutemwa, pano ukutemwa u kukalemanya ningo sana antu.

15 Nupya lekini umutende wakwe Klistu wateeka umu myenzo inu, pano mwamilwe uku mutende uwo pakuti muye umwili onga. Nupya mwalanga ukuti mukataizya. 16 Lekini izwi lyakwe Klistu liye muli mwemwe nu kumulenga ukuya na mano. Twalililini ukusambilizyanya nu kukomelezyanya umu malumbo, mwalumbanya Leza ni nyimbo zya kutaizya, mwaimbila Yeova umu myenzo inu. 17 Vyonsi vino mukulanda na vino mukucita, mwacitila vyonsi umwi zina lya Mwene Yesu ala mukutaizya Leza Tata ukupitila muli aliwe.

18 Mwe yaci mwatontela ya iya inu, pano ali vino Umwene akalonda. 19 Mwe ya iya twalililini ukutemwa aci inu nupya mutayasokela. 20 Mwe yana mwauvwila avyazi inu muli vyonsi, pano cii i cikazanzya Umwene. 21 Mwe ya isi mutaasosya ana inu, pakuti yataya nu ulanda. 22 Mwe yaomvi mwauvwila asambazi inu muli vyonsi, asi sile lino yakumulola, kwati mukulonda ukuzanzya antu, lelo mwacita vivyo nu mwenzo onsi nu kutiina Yeova. 23 Vyonsi vino mukucita mwaomba nu mwenzo onsi kwati mukuombela Yeova, asi kwati mukuombela antu, 24 pano mwamanya ukuti Yeova aliwe alamupeela icilambu ca upyanyi. Mwaombela Umwene, Klistu. 25 Aakacita iviipe alafululwa pa mulandu wa kucita iviipe, pano Leza ataya na kapaatulula.

4 Mwe yasambazi mwasunga ningo aomvi inu umu mulinganya, pano mwamanya ukuti namwe kwene mwakwata Umusambazi winu ukwi yulu.

2 Mwapepa nu mute; mutailila ukupepa, mwacita vivyo ala mukutaizya. 3 Pa nsita ili yonga kwene, mwatupepelako naswe kwene, pakuti Leza atupeele isyuko lya kusimikila izwi lyakwe na pa nkama ya pali Klistu, iyalenga ukuti inje mu cifungo, 4 alino na pakuti nsimikile ningo ukulingana na vino mfwile ukucita.

5 Twalililini ukuya na mano uku yantu ya kunzi, mwaomvya ningo insita inu. 6 Lekini amazwi inu yaye asuma, acemekwe nu musilya, pakuti mwamanya ivya kwasuka ningo umuntu ali wensi.

7 Tikikasi umwina wino natemwa, umuomvi uwa cumi nupya muzya munji umu Mwene, alamunena vyonsi pali nene. 8 Nkumutuma kuli mwemwe pakuti mumanye vino tuli na pakuti ateekezye imyenzo inu. 9 Aliza na Onesimasi umwinane uwa cumi nupya wino natemwa, uwafuma muli mwemwe kwene; yaliza yamunene vyonsi ivikucitika kuno.

10 Alisitaka umufungwa munji wamulamuka, pamwi na Mako umuvyala wakwe Banaba (wino namunenyilepo ukuti muce mumupokelele nga wiza kuli mwemwe), 11 alino na Yesu aakaamwa nu kuti Yusito uwaya pa yazembululwe nawe kwene wamulamuka. Yakwene sile ayano nkaomba nayo mu mulimo wa Wene wakwe Leza nupya aliyo yakankomelezya sana. 12 Epafula umuomvi wakwe Klistu Yesu uwafuma muli mwemwe, wamulamuka. Lyonsi aakamupepela sana, pakuti mwimilile ndi wa yantu aakula muli ukapepa nu kusininkizya vyonsi vino Leza akalonda. 13 Pano nene kambone pali vino akaombesya pa mulandu winu na pa yantu ya mu Lodesiya nu mu Helapolisi.

14 Luka, dokota umutemwikwe kumwi na Demasi yamulamuka. 15 Mundamukileko aina amu Lodesiya na nkazi Nimfa alino na akalonganila umu ng’anda yakwe. 16 Nupya nga mwaca mwabelenga kalata wii, muce mupekanye ukuti ikabelengwe nu ku cilongano ca ina Lodesiya nupya namwe muce mubelenge kalata iilafuma ku Lodesiya. 17 Nupya muce munene Akipasi ukuti: “Uwaika mano ku mulimo uno wapokelile ku Mwene, pakuti ukaumalilile ningo.”

18 Anene Paulo, namulembela ulamu uu ukuomvya ikasa lyane. Mwaiusya ukuti ncili umu cifungo. Icikuuku cikulu ciye namwe.