KALATA WA KUTANDIKILAKO KU INA TESALONIKA

1 Ne Paulo indi na Siluvano* na Timoti, nalembela mwe ya ku cilongano ca mu Tesalonika mwe yantu yakwe Leza Tata nu Mwene Yesu Klistu:

Icikuuku cikulu nu mutende viye namwe.

2 Lyonsi tukataizya Leza lino tukumulumbula mwensi umu mapepo, 3 pano tukaiusya imilimo inu iikafuma umu utailo, vino mukaombesya pa mulandu nu kutemwa, na vino mukazizimizya pa mulandu nu upaalilo uno mwakwata umu Mwene witu Yesu Klistu pa manso yakwe Leza witu nupya Tata. 4 Pano twamanya ukuti Leza wamusoolola mwe ina itu aatemwikwa kuli aliwe, 5 pano ilyasi lisuma lino tukasimikila litiizile kuli mwemwe umu mazwi yatupu, lelo lizile na maka nu mupasi wa muzilo alino nu usininkizyo ukome, wakwe vino mwamanya vino twacisile pa mulandu winu. 6 Nupya mwatandike ukutukolanya nu kukolanya Umwene pano mwazumile izwi lyakwe Leza ni insansa izikafuma uku mupasi wa muzilo nanti cakuti mwali sana ni ntazi, 7 nupya aina yonsi amu Makedoniya nu mu Akaya izile iyatandika ukumukolanya.

8 Icisinka i cakuti, asi mu Makedoniya mutupu nu mu Akaya muno mwasimikila izwi lyakwe Yeova, lelo utailo winu muli Leza wasalangana umu ncende zyonsi, nupya tutakweti na cino tungalanda. 9 Pano yakailandila aeneco vino cali lino twizile kuli mwemwe pa muku wa kutandikilako na vino mwatiile ukupepa ivilubi nu kutandika ukupepa Leza, pakuti mwaombela Leza wa umi nupya uwa cumi, 10 nu kuloleela Umwanakwe ukufuma ukwi yulu, wino watuutulwile ukufuma uku yafwe, kuli kuti Yesu aakatupususya ku ukali uukwiza.

2 Inane mwamanya ningo ukuti ukwiza kwitu kuli mwemwe kwafumilemo ivisuma. 2 Pano nanti cakuti twatazile twaculako nu kusaalulwa sana umu Filipi, wakwe vino mwamanya, twasifile pa mulandu wakwe Leza witu kuti tumunene ilyasi lisuma pali aliwe ala antu yakutukaanya sana. 3 Pano ukumukonkomezya kuno tukamukonkomezya kutasintilila pa viipe nupya kutaaya u kukowele nupya tusicita vivyo pakuti tumubepe, 4 lelo wakwe vino Leza watuzumilizya ukusimikila ilyasi lisuma, tukalanda pakuti tuzanzye Leza aakaceceta imyenzo itu, tusizanzya antu.

5 Nupya mwamanya ukuti tutalandanga ivya kuizifilizya nanti ukulanda ivya ufi pa mulandu wa lunkumbwa; Leza ali kambone! 6 Nupya tutalondanga ukucindikwa na antu, kuli kuti mwemwe nanti antu yauze, nanti cakuti twali nu kuya icisendo sana pa mulandu wakuti sweswe yatumwa yakwe Klistu. 7 Lelo twamuteekeliile wakwe vino nyina aakoonsya akasakamala ana yakwe. 8 Lyene pa mulandu wakuti twamutemilwe sana, twalondesyanga ukumusimikila ilyasi lisuma pali Leza alino nu kupeela maumi itu pakuti tumwavwe, pa mulandu wakuti mwizile imuya atemwikwe sana kuli sweswe.

9 Inane ukwaula nu kutwisika, mukwiusya umulimo witu alino na vino twaombesyanga. Twaombanga usiku nu musanya pakuti tutaya icisendo kuli ali wensi muli mwemwe, lino twamusimikilanga ilyasi lisuma pali Leza. 10 Mwemwe ya kambone itu, na Leza kwene a kambone witu, pali vino twali acumi, alungami nupya aula umulandu kuli mwemwe mwemuno mwataila. 11 Mwamanya ningo ukuti twatwalilile ukumukonkomezya nu kumuteekezya alino nu kumusimikila mwensi kwene, wakwe vino isi akacita uku yana yakwe, 12 pakuti mungatwalilila ukucita vino Leza akalonda, uwamwama umu Wene wakwe alino nu ku ucindami wakwe.

13 Ali mulandu uno tukataizizya Leza ukwaula ukuta, pano lino mwapokelile izwi lyakwe Leza lino muvwile kuli sweswe, mwalipokelile wi zwi lyakwe Leza, wakwe viivi kwene vino lyaya, mutalipokelile wi zwi lya yantu, nupya i likuomba muli mwemwe mwemuno mwataila. 14 Pano mwemo ina itu, mwakolanyanga ivilongano vyakwe Leza ivikaombela pamwi na Klistu Yesu ivyaya umu Yudeya, pano mwacuzile uku yantu amu mpanga inu wakwe vino nayo kwene yakucula uku Yayuda, 15 aakomile nu Mwene Yesu na ya kasesema nupya naswe kwene yatucuzizye. Vino yakacita visizanzya Leza, nupya visizanzya nu muntu ali wensi, 16 yakatulesya ukuomba umulimo wa kusimikila uku yantu amu nko ungalenga yakapusuke. Ukucita vivyo kukalenga imembu zyao zyavulilako. Lelo ukali wakwe Leza iiwiza pali aliyo.

17 Lelo lino twapatukiine namwe ina itu pa nsita inono (nanti cakuti tutamulolanga, twamwiusyanga), pa mulandu wakuti twalondesyanga ukumulola, twezizye na maka ukwiza kuli mwemwe pakuti twize tumulole. 18 Ali mulandu kwene uno twalondelanga ukwiza kuli mwemwe, ne Paulo, nezizye ukwiza kuli mwemwe asi muku onga sile lelo imiku iili; nomba Satana watucilikile pa nzila. 19 Uzye pa nsita ya kuyapo kwa Mwene Yesu, a weni aalaya upaalilo witu, insansa zitu ni cisote ca ucindami witu? Uzye asi mwemwe kwene? 20 Icumi mwemwe kwene muli ucindami witu ni nsansa zitu.

3 Fwandi lino twafizilwe ukuzizimizya, twelenginye ukuti cingazipa tutwalilile ukwikala swenga umu Atena; 2 nupya twatumile umwina witu Timoti nupya umuomvi wakwe Leza mu mulimo wa kusimikila ilyasi lisuma pali Klistu, pakuti aize amukomye nu kumuteekezya umu utailo winu, 3 pakuti kutaya nanti aumwi uwa kutenkaana pa mulandu na macuzi yaa. Pano mwamanya ukuti tutanga tuutuke ukucula ku macuzi yayo. 4 Pano lino twali namwe, twamunenelanga limwi ukuti tuli nu kucula, nupya vikwene i vyatucitikile, wakwe vino namwe kwene mwamanya. 5 Uli mulandu uno lino nafizilwe ukuzizimizya, natumile Timoti kuli mwemwe pakuti aize alole ucisinka winu, pano limwi Katunka angamwezya, nupya ukuombesya kwitu kungaya u kwa sile sile.

6 Lyene Timoti watawela ukufuma kuli mwemwe nupya watatunena ilyasi lisuma pali ucisinka winu nu kutemwa kwinu, nu kuti lyonsi mukatwiusya ni nsansa nupya mukulonda ukwiza tulola wakwe vino naswe tukulonda ukwizamulola. 7 Ina itu, uli mulandu kwene uno swemo tukateekeziwa umu ulanda nu mu macuzi itu yonsi, pa mulandu namwe alino na pali ucisinka winu. 8 Pano tukaya ni nsansa nga mwatwalilila ukukomeleka umu Mwene. 9 Pano uzye tungataizya uli Leza apa nsansa zino twakwata kuli Leza witu pa mulandu winu? 10 Usiku nu musanya tukaezya na maka ukupepa mapepo ya kupaapata pakuti tukalolane namwe nu kumulundilako ivikulondekwa pakuti utailo winu ukome.

11 Tukupepa ukuti Leza witu nupya Tata nu Mwene witu Yesu yace yaleke ukuti twize kuli mwemwe. 12 Nupya Umwene alenge ukuti ukutemwana kwinu nu kutemwa antu yonsi kwakulilako wakwe vino naswe twamutemwa, 13 nu kuti ace amukomye nu kumulenga ukuya akaele kuli Leza witu nupya Tata pa wanda wa kuyapo kwa Mwene witu Yesu pamwi na amuzilo yakwe yonsi.

4 Ica kusyalikizya inane, wakwe vino mwapokelile ivyeo kufuma kuli sweswe pali vino mulinzile ukuya pakuti mwazanzya Leza, wakwe vino mukucita ndakai, tukumulenga nu kumupaapata umu Mwene Yesu ukuti mutwalilile ukucita vivyo kwene nu kucilapo. 2 Pano mwamanya vino twamunenyile ukupitila umu Mwene Yesu.

3 Pano Leza akalonda ukuti muye amuzilo nu kutaluka uku uzelele.* 4 Cila muntu pali mwemwe alinzile ukumanya ivya kusunga umwili wakwe, ukuya uwa muzilo nupya uwa mucinzi, 5 asi kuya ni nsuna iyacila umu cipimo wakwe vino amu nsi aatamanya Leza yaya. 6 Kusi alinzile kucitila umwina iciipe icili consi nanti ukumupoka insambu pa mulandu uu, pano Yeova alapingula antu pa vintu vii vyonsi, wakwe viivi kwene vino twamunenyilepo nu kumucelula sana. 7 Pano Leza watwamile kuti tuye amuzilo, asi ukuya akowele. 8 Fwandi umuntu aakasuula vii ala asikusuula umuntu, lelo ala akusuula Leza aakalenga muye nu mupasi wakwe uwa muzilo.

9 Lelo ukulozya uku kutemwa aina, tutalinzile ukumulembela, pano Leza wamusambilizya ukuti mulinzile ukutemwana. 10 Nupya vikwene avino mukacita uku ina yonsi amu Makedoniya. Lelo ina itu, tukumukonkomezya ukuti mutwalilile ukucita vivyo kwene nu kucilapo. 11 Mwaezya na maka ukwikala mya nu kwika sile mano uku vintu ivimukumile nupya mwaiombela, wakwe vino twamunenyile, 12 pakuti antu ya kunzi yalola imiyele inu isuma nupya mutaulizya icili consi.

13 Nupya ina itu, tusikulonda ukuti mwikale ukwaula ukumanya pali yano yalaala umu tulo twa mfwa, pakuti mutaaya sana nu ulanda wakwe vino yonsi aatakwata upaalilo yakacita. 14 Pano ndi cakuti twakwata utailo wakuti Yesu wafwile nu kutuutululwa, ale Leza alatuutulula na alaala umu tulo twa mfwa ukupitila muli Yesu. 15 Pano vikwene avino tukamunena ukuomvya izwi lyakwe Yeova, ukuti swemuno tulaya nu umi mu kuyapo kwa Mwene tutalakolelela alaala umu tulo twa mfwa; 16 pano Umwene umwineco aliza ukufuma kwi yulu, ni izwi lyakwe ilya maka liluvwika, kuli kuti izwi lyakwe malaika mukalamba alino ni ciunda ci penga lyakwe Leza, nupya afwila muli Klistu yalatandikilapo ukutuutululwa. 17 Lyene pa cisila swemuno tulaya nu umi tulasendwa umu makumbi pamwi nayo, nu kuya mukukomaanya Umwene umu lwelele; nupya ukufuma papo tulatwalilila ukuya nu Mwene. 18 Fwandi twalililini ukuteekezyanya na mazwi kwene yaa.

5 Lyene inane ukulozya uku nsita izyasoololwa, citakulondekwa ukumulembela icili consi. 2 Pano mwamanya ningo sana ukuti uwanda wakwe Yeova uliza wakwe viivi kwene vino umupuupu akaiza usiku. 3 Lino yakulanda yakuti, “Lyene tukwikala umutende nupya acingililwe!” alino uwononesi wa kupumikizya uliza pali aliyo wakwe vino ukuwaika kukaiza pa mwanaci aali pa kupaapa, nupya yataluutuka. 4 Lelo mwemo inane musi umu mfinzi, icakuti uwanda ukamupumikizye wakwe vino cikaya uku yapuupu, 5 pano mwensi mwemwe yana ya luswepo nupya ana ya musanya. Tusi yana ya usiku nanti ana ya mfinzi.

6 Fwandi lekini tutalaala wakwe vino asyala yakacita, lelo lekini tutwalilile ukulola nu kuya na mano. 7 Pano yonsi aakalaala, yakalaala usiku, na yonsi aakakoleka, yakakoleka usiku. 8 Lelo swemuno sweswe yana ya musanya lekini tutwalilile ukuya na mano nu kuzwala ica kucinga icisao, kuli kuti utailo alino nu kuya nu kutemwa nu kuzwala icisote ci pusukilo, kuli kuti upaalilo 9 pano Leza ataatusoolwile pakuti tukafululwe, lelo a pakuti tukapusukile umu Mwene witu Yesu Klistu. 10 Yesu watufwilile pakuti nanti cakuti tukulola nanti twalala umu mfwa, tuye nu umi pamwi nawe. 11 Acino mwakomelezyanya nu kwazwana wakwe vino mukucita ndakai.

12 Lyene ina itu tukumulenga ukuti mwacindika yayo aakaombesya muli mwemwe nupya aakamutungulula umu Mwene nu kumupandako mano; 13 nupya mwayacindikisya umu kutemwa pa mulandu nu mulimo uno yakaomba. Mwaikala umu mutende na auzo. 14 Lelo ina itu tukumukonkomezya ukuti mwakalipila aataya ni cuvwila, mwateekezya aali nu ulanda, mwaavwa atonte, nupya mwateekelela antu yonsi. 15 Mwasininkizya ukuti kusi akuwezezya umuze uyi pa uyi, lelo lyonsi mwalondesya ukucitilana ivisuma alino nu kucita vivyo kuli yonsi.

16 Mwasansamuka lyonsi. 17 Mwapepa lyonsi. 18 Mwataizya pali vyonsi. Pano ali vino Leza akalonda ukuti mwacita muli Klistu Yesu. 19 Mutazimya umupasi wa muzilo muli mwemwe uwaya wa moto. 20 Mutasuula amazwi ya usesemo. 21 Mwasininkizya ivintu vyonsi; mwalemasya uku kucita icisuma. 22 Mwataluka uku viipe vyonsi.

23 Leza wa mutende amusangulule. Nupya imiyele inu yonsi, umi nu mwili vitwalilile ukuya ivya kaele ukufika pa wanda wa kuyapo kwa Mwene witu Yesu Klistu. 24 Uwamwamile u wa cumi, nupya alacita vivyo kwene.

25 Ina itu mwatupepelako.

26 Mulamuke aina yonsi nu kutonsolana kwa wina.

27 Nkumupaapata umwi zina lya Mwene ukuti muleke kalata yii ibelengwe uku ina yonsi.

28 Cikuuku cikulu ica Mwene Yesu Klistu ciye namwe.