KALATA WAKWE CIILI KU INA TESALONIKA

1 Ne Paulo indi na Siluvano* na Timoti, namulembela mwe ya mu cilongano ca mu Tesalonika mwe yantu yakwe Leza Tata nu Mwene Yesu Klistu:

2 Icikuuku cikulu nu mutende ivikafuma kuli Leza Tata nu Mwene Yesu Klistu viye namwe.

3 Tukataizya Leza lyonsi pali mwemwe mwe ina itu. Nupya calinga, pano utailo winu ukukulilako sana lyonsi nupya nu kutemwana kwinu kukukomelako. 4 Cii calenga twayuvwilapo icilumba pali mwemwe umu vilongano vyakwe Leza pa mulandu nu kuzizimizya kwinu nu utailo lino mukucuziwa na lino muli ni ntazi. 5 Cii cikalangilila ukuti Leza akapingula umu ulungami, nupya calenga kuti mulinge ukupokelela Uwene wakwe Leza uno mukaculila.

6 Pano caya icilungame kuli Leza ukuwezezya ucuzi kuli yano yakamucuzya. 7 Lelo mweyano mukacula mulakululwa pamwi naswe lino Umwene Yesu alasokololwa ukufuma ukwi yulu pamwi na ya malaika yakwe aamaka 8 umu cimbilimbili ca moto, lino alaleta icilanduzi pa yantu aatamanya Leza na pali yano yasiuvwila ilyasi lisuma pa Mwene witu Yesu. 9 Umwene alapingula antu yaa. Yalononwa manda pe, pakuti ataca ayalolepo nanti ukuyazwa ukuomvya amaka yakwe. 10 Lino Umwene aliza uku kucindamikwa pamwi na ina amuzilo, yonsi aaya nu utailo muli aliwe yalazunguka pa kumulola. Nupya pa mulandu wakuti mwazumiile ivintu vino twamunenyile, namwe kwene mulaya pamwi nawe.

11 Uli mulandu uno tukamupepelako lyonsi nu kuleenga ukuti Leza witu amulola ukuti mwaliinga ukwamwa, nu kuti angamucitila ivisuma vyonsi vino akalonda ukumucitila nupya mutwalilile ukuomba ningo imilimo ya utailo. 12 Caya vivyo pakuti izina lya Mwene witu Yesu licindikilwe muli mwemwe namwe mucindikilwe muli aliwe, ukulingana ni cikuuku cikulu cakwe Leza ni ca Mwene Yesu Klistu.

2 Lelo ina itu, ukulozya uku kuyapo kwa Mwene witu Yesu Klistu alino nu kukolonganikwa kwitu kuli aliwe, tukumunena ukuti 2 mutaleka melenganyo inu yavulungane zuwa nanti ukubepwa na mazwi aakaloleka kwati yafuma kuli Leza nanti avwanzilwe nanti aalemvilwe muli kalata aakaloleka kwati yafuma kuli sweswe, aakalanda ukuti uwanda wakwe Yeova iufika.

3 Mutaleka umwi amuponzye umu nzila ili yonsi, pano uwanda uwo utaliza kufikila lino usangu ulaloleka nu muntu mpulamasunde alasokololwa, umwana wa ononyi. 4 Wene akalwisya nu kuicindamika pali yonsi aakaamwa ukuti aa leza nanti icintu consi icikapepwa, nupya akaikala umwi tempele lyakwe Leza nu kuilanga paswe ukuti a leza. 5 Uzye musikwiusya ukuti lino nali namwe namunenanga pa vintu kwene vii?

6 Nupya ndakai mwamanya aakacilikila, pakuti ace asokololwe pa nsita yakwe iilinge. 7 I cacumi, ivicitwa vya muntu kwene wii umwipe ivyafisama akuno vyaya, lelo vilatwalilila ukuya inkama ukufikila lino aakacilikila alafumapo. 8 Lyene mpulamasunde alasokololwa lino Umwene Yesu alamufumyapo ukuomvya umupasi uukafuma umu kanwa kakwe nu kumonona umu kuyapo kwakwe. 9 Lelo ukuyapo kwakwe mpulamasunde kukalolekela umu vicitwa vyakwe Satana, kuli kuti imilimo ya maka ni vimanyililo vya ufi alino ni vizungusyo 10 nu kuomvya inzila zyonsi izitalungama pa kubepa yano yakononwa. Yalafululwa pa mulandu wakuti yakanyile icumi icali nu kuyapususya. 11 Uli mulandu uno Leza walesile ukuti yabepwe pakuti yazumile ufi, 12 pakuti yonsi yapingulwe pa mulandu wakuti yakanyile ukuzumila icumi lelo yatemilwe iviipe.

13 Lelo tukataizya Leza lyonsi pa mulandu winu, mwe ina atemwikwa kuli Yeova, pano ukufuma pa kutandika Leza wamusoolwile pakuti mukapusuke ukupitila umu kumusangulula nu mupasi wakwe alino na pa mulandu wakuti mwataile icumi. 14 Wamwamile kuli cii ukupitila umwi lyasi lisuma lino twamusimikile, pakuti mukacindamikwe wakwe vino Umwene witu Yesu Klistu wacindamikwa. 15 Fwandi inane imililini ndi nupya twalililini ukulondela vino mwasambiliziwe na vino twalanzile kuli mwemwe nanti vino twamulembiile umu makalata. 16 Nupya Umwene witu Yesu Klistu na Leza Tata witu, uwatutemilwe nu kututeekezya manda pe alino nu kutupeela upaalilo ukupitila umu cikuuku cikulu, 17 ateekezye imyenzo inu nu kumukomya pakuti lyonsi mwacita nu kulanda ivisuma.

3 Ica kusyalikizya ina itu, twalililini ukutupepelako pakuti izwi lyakwe Yeova lingatwalilila ukusalangana zuwa nu kucindikwa wakwe vino cili kuli mwemwe, 2 na pakuti tungapusuka ku yantu aunkalwe nupya aipe, pano asi antu yonsi aya nu utailo. 3 Lelo Umwene u wa cisinka, nupya alamukomya nu kumucingilila uku mwipe. 4 Nupya itutaila umu Mwene ukuti mukulondela vino twamunenyile nupya mulatwalilila ukuvilondela. 5 Si Umwene atwalilile ukutungulula imyenzo inu pakuti mwatemwa Leza nu kuzizimizya pa mulandu wakwe Klistu.

6 Lyene ina itu tukumupeela masunde umwi zina lya Mwene witu Yesu Klistu ukuti, mwataluka ku mwina ali wensi uwaya ni miyele iipe nupya aasilondela ivyeo vino mwapokelile ukufuma kuli sweswe. 7 Mweineco mwamanya vino mulinzile ukutukolanya, pano tutacitanga iviipe lino twali namwe, 8 nupya tutaliile ivyakulya ivya muntu ali wensi uwila. Lelo twaombesyanga umusanya nu usiku pakuti tutaya icisendo ku muntu ali wensi pali mwemwe. 9 Asi kuti tutakwata maka, lelo twalondanga ukuti mwatukolanya. 10 Nupya lino twali namwe, lyonsi twamunenanga ukuti: “Ndi cakuti umwi asikulonda ukuomba, nu kulya kwene ataalya.” 11 Pano tukuvwa ukuti yamwi pali mwemwe yali ni miyele iipe, yasiomba nanti a panono, lelo yakaika mano uku vintu ivitayakumile. 12 Antu ya musango uwo tukuyapeela isunde nu kuyakonkomezya umu Mwene Yesu Klistu ukuti yalinzile ukwika sile mano ku vintu ivyati viyakuma nu kulya ivyakulya vino yaiombela aineco.

13 Mwemo inane, mutata ukucita icisuma. 14 Lelo ndi cakuti umwi asikuvwila mazwi aali muli kalata wii, mulinzile ukumumanya nu kuta ukuvwana nawe, pakuti auvwe insonyi. 15 Lelo mutamulola wa mulwani, twalililini ukumukomelezya wa mwina.

16 Lyene Umwene wa mutende atwalilile ukumupeela umutende muli vyonsi. Si Umwene aye namwe mwensi.

17 Namulamuka, anene Paulo, nalemba kalata wii ni ikasa lyane wakwe vino nkacita lyonsi mu makalata.

18 Icikuuku cikulu ica Mwene witu Yesu Klistu ciye namwe mwensi.