KULI TITO

1 Ne Paulo, umuomvi wakwe Leza, nupya umutumwa wakwe Yesu Klistu ukulingana nu utailo uno antu yano Leza wasoolola yakwata alino ni cumi icikauvwana nu kupepa Leza, 2 ivyasintilila pa upaalilo wa umi wa pe uno Leza aatanga abepe, walavile mpiti sana; 3 lelo umu nsita yakwe ilinge, walenzile ukuti izwi lyakwe limanyikwe ukupitila umu mulimo wa kusimikila uno napeezilwe ukulingana ni sunde lyakwe Leza, Kapususya witu; 4 nalembela Tito, umwana wa cumi ukulingana nu utailo uno twakwata:

Icikuuku cikulu nu mutende ukufuma kuli Leza Tata na Klistu Yesu Kapususya witu viye naawe.

5 Nakusiile umu Kilete pakuti ulungike ivintu ivitaali ningo nu kusonta ya eluda umu misumba yonsi, wakwe vino nakunenyile ukuti: 6 eluda alinzile ukuya uwaula umulandu, umonsi uwakwata sile umuci wenga, uwakwata ana atanga yapeelwe umulandu wakwe ucintuvwa nanti wakwe ucipondoka. 7 Vino umwangalizi u muomvi wakwe Leza, afwile ukuya uwaula umulandu, aataaya ni cilumba, aasisoka zuwa, atalinzile ukuya cakolwa, atalinzile ukuya umunkalwe, atalinzile ukuya aakakwatila ivyuma umu ucenjezi, 8 lelo alinzile ukuya aakapokelela aenyi, uwatemwa usuma, uwa mano, umulungami, uwa cisinka, aakaikaanya, 9 aakalondela sana mazwi ya cumi umu misamblizizye yakwe, pakuti angaakomelezya ukupitila umu kusambilizya kusuma nu kusunda yayo aakapaazya.

10 Pano kwaya antu aingi aapondoka, aakalanda ivya cilandelande, na asomvi, sana sana yayo aakati ukuzembululwa kwacindama. 11 Uwaleka antu yayo yaikala mya, pano yakaonona utailo wa ndupwa ukupitila umu kusambilizya ivintu vino yatalinzile ukusambilizya pa mulandu wa kulonda ukukwata ivyuma umu ucenjezi. 12 Wenga pali aliyo, kasesema wao, walanzile ati: “Aina Kilete lyonsi yakabepa, yaya wa nyama izikalipe, nupya yapunuka.”

13 Unte uwo u wacumi. Fwandi pa mulandu kwene uwo, uwayasunda sana pakuti yakome umu utailo, 14 yataika mano uku malyasi ya kwelenganya sile aa Yayuda nu ku masunde ya yantu aafuma umu cumi. 15 Ivintu vyonsi vyasanguluka uku yantu asanguluke; lelo kuli yayo aakowela nupya aataaya nu utailo, kutaya icisanguluke, pano amelenganyo yao na ya kampingu yao vyakowela. 16 Yakalanda apaswe ukuti yaamanya Leza, lelo yamukana ukupitila umu milimo yao, pano antu yaa aawinyi nupya aacintuvwa nupya yatalinga ukuomba umulimo uli onsi usuma.

2 Lelo wemo twalilila ukulanda ivintu ivilingine ni visambilizyo ivisuma. 2 Aonsi aikolo yalinzile ukuya ni miyele isuma, aakaombesya, aamano, aa utailo ukome, aya nu kutemwa, nupya aakazizimizya. 3 Anaci aikolo nayo kwene yalinzile ukuya ni miyele isuma, yatalinzile ukuya nu lwambo nanti ukuteekwa uzya uku kumwesya waini, lelo yalinzile ukuya ya kasambilizya ya visuma, 4 pakuti yasambilizya akazyana ukutemwa ya iya, ukutemwa ana yao, 5 ukuya na mano, ukuya aasanguluke, ukusunga ningo mang’anda yao, ukucita ivisuma, nu kuvwila ya iya, pakuti izwi lyakwe Leza litaapontelwa.

6 Nupya uwakomelezya alumendo ukuya na mano, 7 uye icilangililo cisuma muli vyonsi vino ukucita. Uwasambilizya ivisanguluke nupya uwaikako sana mano, 8 uwaomvya mazwi asuma aatanga yasosye aakuvwa, pakuti aakakaanya yaye ni nsonyi, nupya yatakwata iciipe icili consi ica kulanda pali sweswe. 9 Uwanena azya ukuti yauvwila asambazi yao muli vyonsi, yaezya na maka ukuyazanzya, yataaya nu musaalula, 10 yataiya ivintu kuli aliyo, lelo yaya sana ni cisinka, pakuti ivisambilizyo vyakwe Leza, Kapususya witu vingacindamikwa mu nzila ili yonsi.

11 Pano icikuuku cakwe Leza icikulu casokololwa, nu kuleta ipusukilo uku yantu ya misango yonsi. 12 Cikatusambilizya ivya kukana imiyele iipe nu lunkumbwa lwa mu nsi pakuti tuye na mano, ulungami alino nu kuipeelesya uku kupepa Leza umu wikazi uu uwa ndakai,* 13 lino tukulolela ukufikiliziwa kwa vintu visuma vino tukapaalila nu kuloleka kwa lulumbi lwakwe Leza umukulu na Kapususya witu Yesu Klistu, 14 uwaipeezile pa mulandu witu pakuti atukulule kuli umpulamasunde nu kusangulula antu yakwe aaiyele, aacincila ukuomba imilimo isuma.

15 Utwalilile ukulanda ivintu vii nupya uwakonkomezya nu kusunda na maka yako yonsi. Utaleka ali wensi akusuule.

3 Uwayanena lyonsi ukuti yatontela nu kuvwila ya kateeka na alasi, yaipekanya ukuomba umulimo onsi usuma, 2 yatalanda iviipe uku muntu ali wensi, yataya nu lwete, yataumilila sile pali vino yakwelenganya, lelo yaya afuuke uku yantu yonsi. 3 Pano naswe kwene pa nsita imwi twali awelewele, ya cintuvwa, aaponge, twateesilwe uzya uku lunkumbwa nu ku vyakuizanzya, twacitanga iviipe, twali nu muvimbila, twali aipisye nupya twapatananga.

4 Lelo lino icikuuku cakwe Leza, Kapususya witu alino nu kutemwa kuno watemwa antu vyalolike 5 (asi pa mulandu wa milimo itu ilungame, lelo a pa mulandu nu luse lwakwe), watupuswisye ukupitila umu kutufula pakuti tuye nu umi nu kupitila umu kutulenga ukuya apya ukuomvya umupasi wa muzilo. 6 Watupongolwelile umupasi wa muzilo uwingi ukupitila muli Yesu Klistu Kapususya witu, 7 pakuti pa cisila ca kulungamikwa ukupitila umu cikuuku cakwe icikulu, tungaya impyanyi ukulingana nu upaalilo uno twakwata uwa kuya nu umi wa pe.

8 Amazwi yaa acumi, nupya nkulonda kuti uwalanda sana pa vintu vii, pakuti aataila Leza yangatwalilila ukwika amano ku milimo isuma. Ivintu vii i visuma nupya vikaazwa antu.

9 Lelo utaluke uku vikanza vya uwelewele, nu ku malyasi aakalanda pa vikolwe, nu ku kupaazyanya nu kulwa pa mulandu wa Masunde, pano vintu vivyo visiavwa nupya i vya sile sile. 10 Nomba ukulozya ku muntu aakupanga utumaumba, ulinzile ukumutaluka pa cisila ca kumucelula umuku wa kutandikilako na wakwe ciili, 11 pano ala wene wata ukulondela inzila ya cumi nupya akuyembuka nu kuipingula pa mulandu wa vicitwa vyakwe.

12 Lino ndatuma Atema nanti Tikikasi kuli wewe, uce uwezye na maka ukwiza uku Nikopoli, pano ali kuno ndikala umu nsita ya mpepo. 13 Uce upeele ivikulondekwa kuli Zenasi uwamanyikisya Masunde, na kuli Apolo pakuti yatakuulizye icili consi pa lwendo. 14 Lelo antu itu yafwile ukusambilila ukulaomba imilimo isuma pakuti yangaazwilizyako lino calondekwa, nu kuti yataya akasu.

15 Yonsi ali nani yakulamuka. Undamukile yonsi atutemwa nupya aaya umu utailo.

Icikuuku cikulu ciye namwe mwensi.