KU AEBELE

1 Mpiti Leza walandanga uku vikolwe vitu ukupitila muli ya kasesema pa miku iingi nupya umu nzila izingi. 2 Nomba ndakai akalanda kuli sweswe ukupitila umu Mwana, wino wasonta ukuya impyanyi pa vintu vyonsi, nupya walenga ukuti kuye uwikazi wa ndakai ukupitila muli aliwe. 3 Muli aliwe u mukalolekela ululumbi lwakwe Leza ni miyele yakwe, nupya akasakamala ivintu vyonsi ukuomvya izwi lyakwe ilya maka. Pa cisila ca kutusangulula uku membu, wikala papela ukwi kasa li lunji lyakwe Leza mukalamba. 4 Fwandi wacila ya malaika pano wapyana izina ilicindamisye ukucila mazina yao.

5 Uzye a malaika ci wino Leza watala wanena ukuti: “Wewe mwanane; ilelo natinja tata wako”? Nu kuti: “Ndaya isi, nupya nawe alaya umwanane”? 6 Nupya kwene pa nsita ino alatuma Iyeli lyakwe pano nsi, alalanda ati: “Lekini ya malaika yakwe Leza yonsi yamufukamile.”

7 Nupya pali ya malaika walanda ukuti: “Akalenga ya malaika yakwe ukuya sana na maka,* na aomvi yakwe ukuya icimbilimbili ca moto.” 8 Lelo pa Mwana pene walanda ukuti: “Leza ali cilimba cako ica wene amanda pe, ni ntuwa ya Wene wako iintuwa ya ulungami. 9 Wemo watemilwe ulungami nu kupata umpulamasunde. Ali Mulandu uno Leza wako, wakupakiile mafuta ya ucindami ukucila auzo.” 10 Nu kuti: “Pa kutandika we Mwene, wapanzile insi ni iyulu ukuomvya makasa yako. 11 Ivintu vivyo vilononeka, lelo wemo ulatwalilila ukuyako; nupya vilasila wakwe vino icakuzwala cikasila, 12 nupya ulavivunganya wa cakuzwala icitali, nu kuvisenula wa vyakuzwala. Lelo wemo usisenuka, nupya ulatwalilila ukuyako.”

13 Lelo a malaika ci wino watala wanenapo ati: “Ikala ukwi kasa lyane ili lunji ukufikila lino ndakupeela amaka pa yalwani yako”? 14 Uzye yonsi asi ya malaika* aakaomba umulimo wa muzilo, aakatumwa uku kuombela yayo aalapusuka?

2 Uli mulandu uno cikalondekwa ukuti twaikisyako mano uku vintu vino tuvwile, pakuti tutafuma umu utailo. 2 Pano ndi cakuti amazwi aavwanzilwe ukupitila muli ya malaika izile iyaya acumi, nupya yonsi aatalondelanga masunde na ya cintuvwa yafulwilwe ukulingana na vino yacitanga, 3 uzye tulapusuka uli nga twasuula ipusukilo lii ilikulu? Pano Umwene witu u watandikilepo ukulanda pa vintu vii nupya antu auvwileko yatunenyile, 4 Leza nawe wasimikile ukuomvya ivimanyililo ni vizungusyo alino ni milimo ipusanepusane iya maka nupya wapeezile umupasi wa muzilo ukulingana nu kulonda kwakwe.

5 Pano ya malaika asi yano wasoolola ukuti yace yateeka insi iiliza ino tukulandapo. 6 Lelo kambone umwi walanzile ati: “Uzye umuntu pali vino ali uwakuti uwaiusya, nanti uzye umwana wa muntu pali vino ali uwakuti uwasakamala? 7 Wemo wamucefizyeko panono pali ya malaika; wamupeezile ululumbi nu mucinzi nupya wamusonsile ukuti asakamala vino wapanga. 8 Wamupeela amaka pa vintu vyonsi.” Lino Leza wamupeezile amaka pa vintu vyonsi ataasiile nanti acimwi. Lelo tusilola kuno Yesu akutungulula ivintu vyonsi. 9 Nomba lyene tukalola Yesu uwacefiweko panono pali ya malaika ali nu lulumbi nu mucinzi pakuti ukupitila umu cikuuku cikulu cakwe Leza angafwila umuntu wensi.

10 Ivintu vyonsi vyayelako uku lulumbi lwakwe Leza na pa mulandu wakwe. Fwandi pakuti ana aingi yacindikwe, cali ningo ukuti aleke Umwimilizi Mukalamba aye umumalilike ukupitila umu kucula. Leza akayapususya ukupitila umu Mwimilizi kwene wiyo. 11 Pano aakasangulula na aakusangululwa yonsi yafuma muli wenga, nupya ukwene uli mulandu uno asiuvwila insonyi ukuyama ukuti aina yakwe, 12 pano walanda ukuti: “Ndamanyisya izina lyako uku ina yane nupya ndakulumbanya umu nyimbo umu cilongano.” 13 Nupya walanda wati: “Ndamutaila.” Walanda nu kuti: “Lolini! Indi na ana anono yano Yeova wampeela.”

14 Fwandi vino “ana anono” yakwata umwili, nawe kwene wizile aya umuntu uwali nu mwili, pakuti ukupitila umu mfwa yakwe, angonona uwaya na maka ya kuleta imfwa, kuli kuti Ciwa, 15 na pakuti akulule yonsi aali azya umi wao onsi pa mulandu wa kutiina imfwa. 16 Pano asi ya malaika yano akwazwa, lelo akwazwa ana yakwe Abulahamu. 17 Wali nu kuya wa “ina” yakwe muli vyonsi, pakuti aye simapepo mukalamba uwa luse nupya uwa cumi mu vintu vyakwe Leza, wapeezile ilambo pakuti afuute imembu zya yantu. 18 Vino wacuzile lino weziwanga, calenga ukuti aakwate amaka ya kwazwa aakweziwa.

3 Fwandi mwe ina ya muzilo, mweyano yaama ukwi yulu, mwaelenganya pa mutumwa nupya simapepo mukalamba wino twamanya, kuli kuti Yesu. 2 Wene wali uwa cumi kuli Leza uwamusonsile wakwe vino na Mose wali uwa cumi umu ng’anda yonsi yakwe Leza. 3 Pano Yesu wene waya sana nu lulumbi ukucila Mose, pa mulandu wakuti wino akakuula ing’anda wacindama ukucila ing’anda. 4 Ing’anda yonsi ikakuulwa nu muntu, lelo Leza u wapanzile ivintu vyonsi. 5 Mose wali u muomvi wa cumi umu ng’anda yonsi yakwe Leza, umulimo uno waombanga walangililanga ivintu ivyali nu kuvwangwa pa cisila, 6 lelo Klistu wali uwa cumi wa mwana aakaangalila ing’anda yakwe Leza. Sweswe ng’anda yakwe Leza ndi cakuti twatwalilila ukulanda ukwaula intete nu kuya nu upaalilo uno tukauvwilamo icilumba ukufika nu ku mpela.

7 Fwandi wakwe vino umupasi wa muzilo ukalanda ukuti, “Ilelo nga muvwa ukwi zwi lyakwe, 8 mutakomya imyenzo inu wakwe vino ivikolwe vinu ivyansosizye sana vyacisile pa wanda uno vyangezizye umu lwanga, 9 muno vyangezizye nanti cakuti vyaweni imilimo ino nacisile pa myaka 40. 10 Uli mulandu uno nasokiile inkulo yii nu kulanda ukuti: ‘Mu myenzo yao yasiuvwila vino nkulanda, nupya yatamanya vino naya.’ 11 Fwandi nalafile ala insoka inti: ‘Yatalingila umu kupuuza kwane.’”

12 Cenjelini inane pakuti umwi pali mwemwe ataya nu mwenzo uwipe uwaula utailo nu kufuma kuli Leza wa umi; 13 lelo mwakomelezyanya cila wanda lyonsi lino tukwikala umu wanda uno ukwamwa ukuti “Ilelo,” pakuti pali mwemwe pataya nanti a wenga uwakukoma umwenzo pa mulandu wa kubepwa ku maka ya luyembu. 14 Pano tulapokelela cino Klistu wapokelela ndi cakuti twatwalilila ukuya nu utailo uno twakweti pa kutandika kufika nu ku mpela. 15 Wakwe vino umupasi walanzile ukuti: “Ilelo nga muvwa ukwi zwi lyakwe, mutakomya imyenzo inu wakwe vino ivikolwe vinu ivyansosizye sana vyacisile.”

16 Uzye aaweni auvwile lelo alenzile kuti asoke sana? Uzye asi antu yonsi yano Mose watungulwile ukufuma umu Ejipti? 17 Nupya uzye aaweni alenzile Leza ukusoka pa myaka 40? Uzye asi antu aayembwike nu kufwila umu lwanga? 18 Nupya uzye akuli yaweni kuno walafile ukuti yatalingila umu kupuuza kwakwe? Uzye asi kuli yayo aataali ni cuvwila? 19 Fwandi twalola ukuti yatiingilemo pa mulandu wakuti yataakweti utailo.

4 Fwandi vino ulayo wa kwingila umu kupuuza kwakwe watwalilila ukuyako, lekini tucenjele pakuti umwi pali mwemwe atakafilwe ukwingilamo. 2 Pano naswe kwene yatusimikile ilyasi lisuma wakwe vino cali kuli aliyo; lelo vino yuvwile vitayazwile pano utailo wao utaali ukome wakwe yayo auvwilile. 3 Pano swemuno twaya nu utailo tukaingila umu kupuuza, wakwe vino walanzile ati: “Fwandi nalafile ala insoka inti, ‘Yatalingila umu kupuuza kwane,’” nanti cakuti imilimo yakwe yasizile ukufuma pa kutandika kwa nsi. 4 Pano api lembo limwi walanda pa wanda uwalenga 7 ukuti: “Nupya Leza wapuuzile uku milimo yakwe yonsi pa wanda uwalenga 7,” 5 nupya kwene paa walanda ukuti: “Yatalingila umu kupuuza kwane.”

6 Fwandi vino kucili isyuko lyakuti yamwi yangingilamo, nupya yayo aatandikilepo ukusimikilwa ilyasi lisuma yatiingilemo pa mulandu wa kukanaya ni cuvwila, 7 uli mulandu uno lino papisile insita itali, Leza walanzile umwi lumbo lyakwe Devedi wakwe vino icilumbulwa mpiti muli kalata wii ukuti, “Ilelo nga muvwa ukwi zwi lyakwe, mutakomya imyenzo inu.” Acino wasoolwile uwanda umwi ukaamwa ukuti, “Ilelo.” 8 Pano ndi cakuti Yoswa wayatungulwile umu cifulo ca kupuuzilamo, pa cisila Leza nga atizile alanda pa wanda na uze. 9 Fwandi kucili isabata lya kupuuza uku yantu yakwe Leza. 10 Pano umuntu uwingila umu kupuuza kwakwe Leza ala wapuuza nu ku milimo yakwe kwene, wakwe vino Leza wapuuzile uku milimo yakwe.

11 Lekini twaombesya pakuti tungingila umu kupuuza kuko, pakuti kutaya umwi angaya wakwe yano yataali ni cuvwila. 12 Pano izwi lyakwe Leza i lya umi nupya lyakwata amaka, lyakalipa ukucila ulupanga ulwanyolwa konsi koili nupya likaingila sana nu kusokolola vino muntu waya umukasi na vino waya ukunzi, likaingila na pakomanila amafupa ukufuma umu mimfyompo, nupya likamanya amelenganyo na mapange ya mu mwenzo. 13 Kutaya iciumbwa icafisama uku manso yakwe, lelo ivintu vyonsi vikaloleka nupya vyaya apaswe kuli wino alatupingula ukulingana ni milimo itu.

14 Fwandi vino twakwata simapepo mukalamba umucindamisye uwapita umwi yulu, Yesu Umwana wakwe Leza, lekini tutwalilile ukulanda apaswe apa utailo uno twakwata muli aliwe. 15 Pano twakwata simapepo mukalamba aakatulangulukilako umu utonte witu, wene weziwe muli vyonsi wakwe vino naswe tukaeziwa, lelo ataakweti uluyembu. 16 Lekini tupalame uku cilimba ca wene ica cikuuku cikulu lino tukuvwanga ukwaula intete, pakuti Leza atuyele uluse nu kutwazwa pa nsita ino tukulondekwa uwazwilizyo pa mulandu wa cikuuku cakwe icikulu.

5 Pano simapepo mukalamba wensi wino akasoololwa ukufuma umu yantu, akasontwa pa mulandu wao kuti aasakamala ivintu vyakwe Leza, pakuti aapeela ivya upe na malambo pa mulandu wa membu. 2 Akalangulukilako aakayembuka ukwaula ukumanya, pano nawe kwene wamanya ukuti wakwata utonte, 3 nupya pa mulandu kwene uwo alinzile ukupeela malambo pa mulandu wa membu zyakwe wakwe vino akacitila yauze.

4 Umuntu asyaisonta ukuomba umulimo uu ucindame, lelo akapeelwa umulimo uu ndi cakuti sile Leza wamwama, wakwe vino cali kuli Aloni. 5 Fwandi na Klistu kwene ataicindamike umwineco ukupitila umu kuika umwineco pali usimapepo ukalamba, lelo wacindamikwe na Leza uwalanzile kuli aliwe ati: “Wewe mwanane; ilelo natinja tata wako.” 6 Wakwe vino walanzile nu mwi lembo lyuze ati, “Wewe simapepo amanda pe wakwe vino Mekisedeki wali.”

7 Lino Klistu wali pano nsi, wapaapatanga nu kulenga ni izwi likalamba kuli wino wali nu kumupususya uku mfwa ala akuponya na minsozi, nupya mapepo yakwe yuvwisile pano watiinanga Leza. 8 Nanti cakuti wali umwana, wasambilile ukuya ni cuvwila uku vintu vino wacuzileko. 9 Nupya lino wizile aya umumalilike, wizile aya inzila ya kupusukilamo kuli yonsi aakamuvwila, 10 pano Leza wamusoolola ukuya simapepo mukalamba wakwe vino Mekisedeki wali.

11 Tukweti ivingi ivya kulanda pali aliwe, nupya i citale ukulondolola, pano mwatala ukuvwa. 12 Pano nanti cakuti ndakai mufwile ukuya ya kasambilizya, mucili mukulondekwa uwa kumusambilizya ukutandikila pa visambilizyo vya kutandikilako ivya mazwi yakwe Leza, nupya mwaswilila uku mukaka, mwata ukulya ivyakulya ivikome. 13 Wensi akatwalilila ukumwa umukaka ala atamanya izwi lyakwe Leza ilya ulungami, pano ala acili umwana umunono. 14 Lelo ivyakulya vikome i vya yantu aikolo, yano ukupitila umu kusambilizya amelenganyo yao, yaamanya ningo ukupusanya icisuma ni ciipe.

6 Lyene vino twafuma uku visambilizyo vya kutandikilako pali Klistu, lekini tutwalilile ukulunduluka, tutaakuula umufula nupya, kuli kuti ukutandika ukusambilila nupya pa kulapila uku milimo iya sile sile na pa kuya nu utailo muli Leza, 2 ukusambilila pa lubatizyo na pa kwika makasa pa yantu, pa kutuutululwa kwa yafwe na pa upinguzi wa pe. 3 Nupya tulatwalilila ukulunduluka nga Leza wazumilizya.

4 Pano yayo aapokelilepo uluswepo nupya aapeezilwe isyuko ilya kuya ukwi yulu nupya aapokelilepo umupasi wa muzilo, 5 auvwa mazwi yakwe Leza asuma nu kumanya ivintu vya maka ivya wikazi* uuliza, 6 lelo aata ukuya nu utailo, citanga cicitike ukuyazwa ukulapila nupya, pano nupya kwene yakapoopela Umwana wakwe Leza pa cimuti nu kumuzewanya apaswe. 7 Pano umusili ukapokelela ipaalo kufuma kuli Leza lino imvula ikutoonyelapo lyonsi nupya ukamezya ivilimwa ivikaavwa alimi. 8 Lelo nga wamezya imyunga ukaya uwa sile sile nupya ukaya apiipi nu kutiipwa, na pa kusyalikizya ulociwa.

9 Lelo mwemo ina aatemwikwa, twasininkizya ukuti mwemo ivintu vyaya ningo; mwakwata ivintu ivikamutungulula uku kupusuka nanti cakuti tukulanda umu nzila yii. 10 Pano Leza asi wa lufyengo uwakuti ailile umulimo winu nu kutemwa kuno mwalanzile api zina lyakwe pa kuombela antu amuzilo nupya mwatwalilila ukuyaombela. 11 Lelo tukulondesya ukuti wensi muli mwemwe aombesya pakuti aye sana nu upaalilo ukufika nu ku mpela, 12 pakuti mutaya akasu, lelo mwakolanya yano yapokelile vino Leza walavile pa mulandu wa utailo nu kuteeka imyenzo.

13 Pano lino Leza walavile ulayo kuli Abulahamu, walafile umwi zina lyakwe umwineco, pano kutaaya muze uwamucila, 14 watiile: “Ndakupaala nupya ndavuzya ana yako.” 15 Pa cisila ca kuteeka umwenzo, Abulahamu wapokelile ulayo uu. 16 Pano antu yakalapa ukuomvya izina lya muntu wino wayacila, nupya umulapo ukaya ali mpela ya vikanza vyonsi, pano ukaya ali usininkizyo kuli aliyo. 17 Mu musango uli umwi kwene, lino Leza walondanga ukulangilila ningo uku mpyanyi zya ulayo vino ukulonda kwakwe kusisenuka, wapeezile usininkizyo ukuomvya umulapo, 18 pakuti ukupitila umu vintu viili ivisisenuka ivikalangilila ukuti Leza atanga abepe, swemuno tuutukila kuli Leza kuti tucingililwe tungakomeleziwa sana nu kuya nu upaalilo umu vintu vino tukaloleela uku nkoleelo. 19 Tukweti upaalilo uu uwaya wa nanga apasintilila umi witu, nupya wasininkiziwa, nupya ukatutungulula ku nsizi yakwe ketani uwapatukanya imiputule yi tempele, 20 muno Yesu watukoleliile, uwaya simapepo mukalamba manda pe wakwe vino Mekisedeki wali.

7 Pano Mekisedeki wii, umwene uwa ku Salemu nupya simapepo wakwe Leza Uwa Papelapela, wakomenkinye Abulahamu ala akufuma umu kukoma ya mwene, nupya wamupaazile, 2 nawe Abulahamu wamupeezile icikumi ica pali vyonsi. Inkoleelo, izina lyakwe likapiliula ukuti “Umwene wa Ulungami,” nupya u mwene wa ku Salemu, kuli kuti, “Umwene wa Mutende.” 3 Pa mulandu wakuti atakwata ya isi, ya nyina, ivikolwe, nupya atakwata intandikilo ni mpelelekezyo, lelo waya wa mwana wakwe Leza, watwalilila ukuya simapepo lyonsi.

4 Lolini vino umuntu wii wali umucindame, wino Abulahamu icikolwe wapeezile icikumi pa vintu visuma sana vino waposile umu ulwi. 5 Ukulingana ni Sunde, ya mwana Levi apeelwanga umulimo wa usimapepo ayano yanenyile ukuti yaapoka icikumi uku yantu, kuli kuti uku ina yao, nanti cakuti yali amu lupwa lwakwe Abulahamu. 6 Lelo umuntu aatafumile nu mu lupwa lwakwe Levi u waposile icikumi kuli Abulahamu, nupya wapaazile Abulahamu wino Leza walavile malayo. 7 Kusi angakana ukuti umukalamba aakapaala umunono. 8 Antu aakapokelela ivikumi nu kufwa kwene aliyo yakafwa, lelo umuntu muze aakapokelela ivikumi ali wino Malembo yakalandapo ukuti ali nu umi. 9 Nupya tungati nanti sile a Levi aakapokelela ivikumi, nawe kwene wapeela ivikumi ukupitila muli Abulahamu, 10 pano walanga atali avyalwe kufuma muli Abulahamu icikolwe cakwe, lino Mekisedeki wamukomenkinye.

11 Ndi cakuti ukumalilika kwiziile muli usimapepo uwa ina Levi (pano naco kwene cali umu Masunde apeezilwe uku yantu), uzye kwalondekwanga ukuti simapepo muze aize uwali nu kuya wakwe Mekisedeki nupya aataali nu kuya wakwe Aloni? 12 Vino umulimo wa usimapepo ukusenuka, na Masunde kwene yalinzile ukusenuka. 13 Pano umuntu wino ivintu vii vyalanzilepo wafumile umu mutundu uze, umutatazile imuya nanti aumwi uwaombilepo pa ulambo. 14 Pano camanyikwa ningo ukuti Umwene witu wafumile muli Yuda, lelo Mose atalanzilepo ukuti ya simapepo yali nu kufuma umu mutundu uwo.

15 Lelo cico ciiza camanyikwa ningo lino kwaya simapepo muze uwaya wakwe Mekisedeki, 16 uwaya a simapepo, asi pa mulandu nu mutundu uno wafumilemo ukulingana na Masunde, lelo a pa mulandu wakuti wakwata maka akamulenga ukuya nu umi utanga ononwe. 17 Pano ilembo limwi lyalanda pali aliwe ukuti: “Wewe simapepo amanda pe wakwe vino Mekisedeki wali.”

18 Fwandi isunde lya mpiti lyafumiziwapo pa mulandu wakuti ilitonte nupya lyata ukuomba. 19 Pano kusi cino Masunde yalenzile ukuya icimalilike, lelo upaalilo usuma uno Leza watupeela, wene walenga ivintu ukuya ivimalilike nupya ukatupalamika kuli aliwe. 20 Nupya pa mulandu wakuti Leza walafile mulapo lino wasonsile Yesu ukuya simapepo 21 (pano kwaya antu aaya ya simapepo ukwaula ukulapa umulapo, lelo wii wene waya a simapepo ukupitila umu mulapo uno Leza walafile lino walanzile ati: “Yeova watalapa umulapo nupya atalasenula melenganyo yakwe, ‘Wewe simapepo amanda pe’”), 22 Yesu waya ali usininkizyo wa upangano usuma. 23 Nupya aingi yapyananga auze pali usimapepo, pano imfwa yalenganga ukuti yafilwa ukutwalilila pali usimapepo, 24 lelo pa mulandu wakuti wene watwalilila ukuya nu umi amanda pe, kusi angapyana usimapepo wakwe. 25 Nupya angapususya yayo aakapalama kuli Leza ukupitila muli aliwe, pano vino lyonsi waya uwa umi akayapaapatilako.

26 Pano icilinga kuli sweswe kuti tukwate simapepo mukalamba uwaya ni cisinka, uwa kaele, aatakowela, aataya wa yayembu nupya uwacindamikwa ukucila mayulu. 27 Wene wapusanako na ya simapepo akalamba yauze, asilondekwa ukupeela malambo cila wanda, kuli kuti kutandikilapo ukupeela malambo pa membu zyakwe alino nu kupeela malambo pa membu zya yantu, pano wacisile vivyo umuku sile onga lino waipeezile umwineco. 28 Pano Masunde yakasonta antu atonte ukuya ya simapepo akalamba, lelo umulapo uwalafilwe pa cisila ca Masunde wasonta umwana uwaya umumalilike amanda pe.

8 Icisinka cikalamba cino tukulandapo i cakuti: Twakwata simapepo mukalamba uwaya vikwene, nupya wikala ukwi kasa li lunji ilya cilimba cakwe Leza ica Wene ukwi yulu, 2 aakaombela mu ncende ya muzilo nu mwi tenti lya cumi ilitapangwa nu muntu lelo ilyapangwa na Yeova. 3 Pano simapepo mukalamba wensi akasontwa kuti aapeela ivya upe na malambo; fwandi cali ningo ukuti na wikwene akwate cimwi ica kupeela. 4 Ndi cakuti aya pano nsi, atanga aye simapepo, pano kwaya mpiti antu aakapeela ivya upe ukulingana na Masunde. 5 Antu yaa yakaombela Leza umu nzila ya unkolanya nupya cikalangilila ivintu vya mwi yulu; wakwe vino na Mose lino wali apiipi nu kukuula itenti, Leza wamunenyile ati: “Ukasininkizye ukuti wapanga ivintu vyonsi wakwe vino watulangililwa pa mwamba.” 6 Lelo ndakai Yesu wapeelwa umulimo usuma sana pano nupya ali kakundanya wa upangano usuma uwakolana nu waliko, uwasintilila pa malayo asuma.

7 Ndi cakuti upangano wa kutandikilako wali umalilike, upangano wakwe ciili utanga ulondekwe. 8 Pano Leza wazanyile umulandu umu yantu lino walanzile ati: “Yeova walanda wati, ‘Lolini! Manda yaliza, lino ndapangana upangano upya na amu ng’anda yakwe Izlaeli alino na amu ng’anda yakwe Yuda.’ 9 Nupya Yeova walanda wati, ‘Upangano uu utalaya wa upangano uno napangine ni vikolwe vyao pa wanda uno nayalemile ukwi kasa nu kuyafumya umu mpanga ya Ejipti, pa mulandu wakuti yatatwalilile ukusunga upangano wane, natiile ukuyasakamala.’

10 Yeova walanda wati: “‘Uu uli upangano uno ndapangana na amu ng’anda yakwe Izlaeli pa cisila ca manda yayo, ndika masunde yane umu melenganyo yao, nupya ndayalemba umu myenzo yao. Ndaya Leza wao, nayo yalaya antu yane.

11 “‘Nupya kusi aalasambilizya umuze nanti umwinakwe ukuti: “Manya Yeova!” Pano yonsi yalaamanya, ukutandikila pa munono ukufika uku mukalamba. 12 Pano ndayelela pa viipe vino yacisile, nupya ntalatala niusye imembu zyao.’”

13 Lino walanzile ati “upangano upya,” walesile kuti uwa mpiti ute ukuomba. Lyene icintu ca mpiti nga cata ukuomba nupya casila, cikaya apiipi nu kufumiziwapo.

9 Upangano wa mpiti wakweti masunde pa mulimo wakwe Leza ni cifulo ca muzilo pano nsi. 2 Umu muputule wa kutandikilako uwapekanyiziwe umwi tenti, mwayanga icakutekapo lampi, nupya mwayanga itebulo ni mikate ya muzilo; nupya umuputule uwo wamwanga ukuti Mwa Muzilo. 3 Lelo uku nsizi ya nsalu yakwe ciili, kwali umuputule uwamwanga ukuti Mwa Muzilo Sana. 4 Mwali icakocelapo ivinunkile cakwe goldi ni mbokosi ya upangano iyapanzilwe na goldi, umu mbokosi iiyo mwali insembo yakwe goldi iyakwetimo mana, mwali ni intuwa yakwe Aloni iwalule, alino ni vipampa vya mawe ya upangano; 5 nupya papela ya mbokosi pali ya kelubi ya lulumbi aakonzolweliile maapa yao pa mbokosi iyali pa ncende ya kwelelelapo imembu. Lelo yii asi insita ya kulondolola ivingi pa vintu vii.

6 Pa cisila ca kupekanya ivintu vii umu musango uu, ya simapepo iingilanga lyonsi umu muputule wa kutandikilako umwi tenti nu kuomba imilimo yakwe Leza; 7 lelo simapepo mukalamba wingilanga wenga umu muputule wakwe ciili umuku onga umu mwaka, ala ali nu wazi uno wapeelanga pa membu zyakwe na pa membu zino antu yacitanga umu kukanamanya. 8 Umupasi wa muzilo ukalangilila ningo ukuti inzila ya kwingilila umu ncende ya muzilo alanga itali isokololwe lino kwali itenti lya kutandikilako. 9 Itenti lii likalangilila insita ya ndakai, nupya ukulingana na mapekanyo yaa, ivya upe na malambo vikapeelwa. Lelo ivintu vivyo visilenga kampingu wa muntu aakuomba umulimo wakwe Leza ukuya umumalilike. 10 Ivya upe na malambo vyaomviwanga sile ku vyakulya nu ku vyakumwa nu ku ntambi izipusanepusane izya pa mifulalile. Vyali a masunde alandanga pa mwili nupya vyatwalilile ukuyako ukufika pa nsita iyasoolwilwe iya kulungika ivintu.

11 Lelo lino Klistu wizile nga simapepo mukalamba uwa vintu visuma ivyacitika mpiti, wapisile umwi tenti ilikalamba nupya ilicindame sana ilitapangwa na antu, kuli kuti ilitaya umu nsi yii. 12 Wingile umu ncende ya muzilo umuku onga sile, nomba ataali nu wazi wa mbuzi na wakwe ya cipambasi, lelo wali nu wazi wakwe, nupya watukulula amanda pe. 13 Pano ndi cakuti uwazi wa mbuzi na wakwe ya cipambasi alino ni itwi lya ndama vyasanswanga pali yayo aatiyakoweziwa pakuti yasangululwe, 14 uzye uwazi wakwe Klistu wino ukupitila umu mupasi wa manda pe waipeezile ukwaula uluyembu kuli Leza, utalacilapo ukusangulula ya kampingu itu ku milimo ifwe, pakuti twaombela Leza wa umi?

15 Uli mulandu uno wayela a kakundanya wa upangano upya. Wizile aya vivyo pakuti yayo yano yaama yangapokelela upyanyi wa manda pe uwalavilwe. Vyonsi vii vyacitike pa mulandu wa mfwa yakwe Yesu, iyalenzile yakululwe ku membu zyao zino yacisile umu upangano wa mpiti. 16 Pano ukuli upangano, kakundanya wa upangano afwile ukufwa, 17 upangano ukatandika ukuomba ndi cakuti kakundanya wafwa, pano usiyako lyonsi lino kakundanya umuntunze acili nu umi. 18 Nu upangano wa mpiti kwene utaatandike ukuomba ukwaula uwazi. 19 Lino Mose walanzile masunde uku yantu yonsi, watozile uwazi wakwe ya cipambasi nu wa mbuzi auminkanya na manzi nga alino atola mavumbu ayenzu, na kamuti kano yakaama ukuti isopu nga alino asansila uku lupapulo nu ku yantu yonsi, 20 nu kulanda ati: “Uwazi uu u wa upangano uno Leza wamunenyile ukuti mwasunga.” 21 Nupya wasansiile uwazi ukwi tenti nu ku viya vyonsi ivyaomviwanga umu mulimo wa muzilo. 22 Nupya ukulingana na Masunde, umupiipi ni vintu vyonsi vikasangululwa nu wazi, nupya uwazi nga utapongolwilwe kutanga kuye ukwelelwa.

23 Fwandi cali ningo ukuti vintu ivikaimililako ivya mwi yulu visangululwe umu nzila kwene yii, lelo ivintu vya kwi yulu vyene vikalondekwa malambo asuma sana. 24 Pano Klistu atiingile umu ncende ya muzilo iyapangwa na antu, iyaya sile uunkolanya wa vintu vya cumi, lelo wingile umwi yulu pakuti ndakai alolekele pa nkoleelo yakwe Leza pa mulandu witu. 25 Ataipeezile imiku iingi, wakwe vino simapepo mukalamba wingilanga umu ncende ya muzilo cila mwaka ala ali nu wazi uusi wakwe. 26 Nga cali vivyo, nga wali nu kucula imiku iingi ukufuma pa kutandika kwa nsi. Lelo ndakai waisokolola umwineco umuku sile onga ku mpelelekezyo ya wikazi wa ndakai* pakuti afumyepo uluyembu ukupitila umu kuipeela umwineco wi lambo. 27 Nupya wakwe vino umuntu wensi akafwa umuku onga sile, nu kuloleela ukupingulwa pa cisila, 28 avino na Klistu wapeezilwe umuku sile onga pakuti afumyepo imembu zya yantu aingi; nupya lino alaloleka umuku wakwe ciili ataliza umu kufumyapo imembu, lelo alalolekela kuli yayo aakamuloleela ukuti ace aize ayapususye.

10 Masunde yaya wa cinzingwa ca vintu ivisuma iviliza, nomba yene asi ali vintu kwene vivyo, yatanga yalenge antu aakapalama kuli Leza ukuya amalilike ukuomvya malambo ali yamwi kwene aakapeelwa cila mwaka. 2 Pano nga citali vivyo uzye malambo nga yatata ukupeelwa? Pano yayo aakaombela Leza aasangulwilwe umuku onga sile nga yasitwalilila ukuyuvwa amulandu pa membu zyao. 3 Lelo amalambo yayo yakaiusya antu pa membu zyao cila mwaka, 4 pano uwazi wakwe ya cipambasi nu wa mbuzi utanga ufumyepo imembu.

5 Fwandi lino wizile pano nsi walanzile ati: “‘Wemo utaalondanga ilambo nu upe, lelo wampekanyizizya umwili. 6 Utaatemilwe malambo ya koca na malambo ya pa membu.’ 7 Lyene nalanzile inti: ‘Lola! Niiza (wakwe vino calembwa pali nene umu lupapulo) umu kucita ukulonda kwako, we Leza.’” 8 Pa cisila ca kulanda ukuti: “Wemo utaalondanga nupya utaatemilwe amalambo ni vya upe, malambo ya koca na malambo ya pa membu,” kuli kuti malambo aakapeelwa ukulingana na Masunde, 9 nupya watiile: “Lola! Niiza umu kucita ukulonda kwako.” Wene wafumizyepo ica kutandikilapo pakuti aikepo cakwe ciili. 10 Pa mulandu nu “kulonda” kwene kuu twasangululwa ukupitila umu umwili wakwe Yesu Klistu uwapeezilwe umuku sile onga.

11 Nupya simapepo ali wensi akaomba umulimo wa muzilo cila wanda nu kupeela malambo ali yamwi kwene pa miku iingi, yano yatanga yafumyepo imembu. 12 Lelo umuntu wii wapeezile ilambo lyonga pa membu umuku onga sile nupya wikala ukwi kasa li lunji lyakwe Leza, 13 ukufuma lilyo kwene watwalilila ukuloleela ukufikila lino Leza alamupeela maka pa yalwani yakwe. 14 Pa mulandu ni lambo lyonga ilyapeezilwe walenga ukuti yayo aakusangululwa yaye amalilike manda yonsi. 15 Nupya umupasi wa muzilo ukatuyela unte, pano pa cisila cakuti walanda ukuti: 16 “Yeova walanda wati: ‘Uu uli upangano uno ndapangana nayo pa cisila ca manda yayo, ndika masunde yane umu myenzo yao, nupya ndayalemba umu melenganyo yao,’” 17 umupasi wa muzilo walanda nu kuti: “Ntalatala niusye imembu zyao ni viipe vino yacisile.” 18 Lyene kuno kuli ukwelelwa imembu, kusilondekwa ilambo lya pa membu nupya.

19 Fwandi inane, pa mulandu wa wazi wakwe Yesu, tutakwata intete zya kuomvya inzila ya kwingilila umu ncende ya muzilo, 20 ino watuyuliile iyaya inzila ipya iikatungulula uku umi ukupitila umu nsalu, kuli kuti umwili wakwe, 21 nupya vino twakwata simapepo mukalamba akaangalila ing’anda yakwe Leza, 22 lekini tupalame kuli Leza ni myenzo ya cisinka nu utailo ukome, vino imyenzo itu yasangululwa ukufuma kuli kampingu mwipe ni mili itu yafulwa umu manzi aaswepe. 23 Lekini tutwalilile ukulanda apaswe pa upaalilo witu ukwaula intete, pano uwatulaya u wa cumi. 24 Nupya lekini twasakamalana pakuti twacincizyanya umu kutemwa nu mu kuomba imilimo isuma, 25 tutaatazyela ukulongana kwitu, wakwe vino yamwi yakacita, lelo twakomelezyanya, sana sana lino tukulola uwanda wakwe Leza ukupalama.

26 Pano nga tukucita imembu uku mufulo sile pa cisila ca kumanya ningo icumi, kusi ilambo lyuze ilingapeelwa pa membu zitu, 27 lelo kwaya upinguzi uwa kutiinya uno tukaloleela nu ukali wakwe Leza uwaya wa moto uulonona akamukanya. 28 Umuntu ali wensi aakasuula Masunde yakwe Mose akafwa ukwaula uluse nga wasinilwa na ya kambone yaili nanti yatatu. 29 Uzye mukwelenganya ukuti cilaya uli uku muntu aakalyatola Umwana wakwe Leza? Nupya uzye cilaya uli kuli wino akalola uwazi uwa upangano uwalenzile ukuti asangululwe ukuti utacindama? Nupya uzye cilaya uli ku muntu aakasaalula umupasi umukalolekela icikuuku cakwe Leza icikulu? Alafululwa icipiisye. 30 Pano twamanya uwalanda ukuti: “Icilanduzi i cane; nene ndalandula.” Nupya walanda nu kuti “Yeova alapingula antu yakwe.” 31 I ca kutiinya ku muntu ukufululwa kuli Leza wa umi.

32 Lelo mwaiusya manda ya mpiti lino pa cisila ca kulola uluswepo, mwazizimizye ivintu ivingi nanti cakuti mwaculanga. 33 Pa nsita zimwi yamusaalulanga nu kumucuzya apaswe, nupya pa nsita zyuze mwaculilanga pamwi na yano ivya musango uu vyacitikilanga. 34 Pano mwalangizye uluse kuli yano yali umu cifungo nupya mwali ni nsansa lino yamuposile ivyuma vinu, pa kumanya ukuti mwakwata ivyuma ivisuma nupya ivisisila.

35 Fwandi mutata ukuya asipe, pano mulalambulwa sana. 36 Mulinzile ukuzizimizya, pakuti lino mwacita ukulonda kwakwe Leza, muce mupokelele amalayo. 37 Pano “kwasyala sile insita inono,” nupya “aakwiza alafika ukwaula ukucelwa.” 38 “Lelo umulungami alaya nu umi pa mulandu wa utailo,” nupya “nga waswilila icisila, ntalazangila muli aliwe.” 39 Swemo tusi yantu aakaswilila icisila uku ononesi, lelo twaya nu utailo uulalenga tuye nu umi.

11 Utailo u kuloleela ukwaula ukutwisika ukwa vintu vino tukapaalila ukuti vilacitika, nupya uli usininkizyo wakuti ivintu ivisyaloleka i vya cumi. 2 Pa mulandu wakuti antu ya mpiti* yaali nu utailo, yapokelile usininkizyo uwakuti Leza wayatemilwe.

3 Utailo ukalenga tumanye ukuti ivintu vya mwi yulu ni vya pano nsi* vyapekanyiziwe ukwi zwi lyakwe Leza, icakuti ivintu ivikaloleka vyafuma uku vintu ivisyaloleka.

4 Utailo u walenzile ukuti Abeli apeele ilambo ilicindame sana ukucila lyakwe Kaini, nupya utailo kwene uwo u walenzile apokelele usininkizyo uwakuti wali u mulungami, pano Leza wapokelile ivya upe vyakwe, nupya nanti cakuti wafwa, acili akavwanga pa mulandu nu utailo wakwe.

5 Utailo u walenzile ukuti Enoki asendwe pakuti atacula pa kufwa, nupya kutaali ukwakumuzana pano Leza wamusenzile; pano lino Leza atali amusende, wapokelile usininkizyo wakuti wazanzizye Leza. 6 Nupya ukwaula utailo kusi angazanzya Leza, pano wensi aakapalama kuli Leza alinzile ukuzumila ukuti akuno waya nu kuti akalambula yayo aakamulondesya.

7 Utailo u walenzile ukuti lino Nowa wacelulwa kuli Leza pa vintu ivyali nu kucitika, auvwile Leza nu kupanga iciwato ca kupusukilamo amu ng’anda yakwe; nupya pa mulandu nu utailo kwene uu walangilile ukuti insi yii yalinzile ukononwa, nupya wizile aya impyanyi ya ulungami pa mulandu nu utailo.

8 Utailo u walenzile ukuti lino Abulahamu wamilwe, auvwile nu kuya uku mpanga ino wali nu kupyana; wapisile nanti cakuti atamanyile kuno wayanga. 9 Utailo u walenzile ukuti aikale wa mwenyi umu mpanga ya ulayo kwati ali umu mpanga iyenyi, wikalanga umu matenti pamwi na Isaki na Yakobo, impyanyi zyuze izya ulayo uli umwi. 10 Pano waloleelanga umusumba uwakweti imifula ya cumi, uno Leza ali kapanga nupya kakuula.

11 Utailo u walenzile ukuti na Sala kwene apeelwe maka ya kukwata inda, nanti cakuti wali umukote, pano walolanga uwalavile ulayo ukuti u wa cumi. 12 Pa mulandu kwene uu, umu muntu wenga uwali wa mufwe, u mwaviilwe ana aingi wa ntanda zya mwi yulu nupya yavuzile wa mucanga wa mu mbali yakwe yemba.

13 Yonsi kwene yaa yaafwile nu utailo, nanti cakuti yatapokelile vino yalavilwe; lelo yaviloliile akatalamukila nu kuya ni nsansa nupya yalanzile apaswe ukuti yali aenyi nupya aikazi ya pa nsita inono umu mpanga ino ikalangamo. 14 Pano aakalanda umu musango uu yakalangilila ukuti yakalondesya icifulo icilaya icao. 15 Lelo ndi cakuti iyatwalilila ukwiusya icifulo cino yafumileko, nga yaswilile. 16 Lelo ndakai yakalondesya icifulo icisuma, kuli kuti, icaya ukwi yulu. Fwandi Leza ataaya ni nsonyi pali aliyo vino yakamwama ukuti a Leza wao, pano wayapekanyizizya umusumba.

17 Utailo u walenzile ukuti lino Abulahamu weziwe, ciye kwati wapeela Isaki wi lambo, umuntu uwapokelile malayo ni nsansa wakasi ukupeela umwanakwe uwaviilwe sile wenga 18 nanti cakuti Leza wamunenyile ukuti: “Aalamwa ukuti ana yako yalafuma muli Isaki.” 19 Lelo wamanyile ukuti Leza wali nu kutuutulula Isaki ukufuma uku yafwe, nupya Leza wamupuswisye uku mfwa, cico calangililanga icali nu kucitika uku nkoleelo.

20 Utailo u walenzile ukuti na Isaki apaale Yakobo na Esau ukulozya uku vintu ivyali nu kwiza.

21 Utailo u walenzile ukuti lino Yakobo wali apiipi nu kufwa, apaale ana aonsi yakwe Jozefu nupya wapefile ala watalemelela uku ntuwa yakwe.

22 Utailo u walenzile ukuti lino Jozefu wali apiipi nu kufwa, alande pa kufuma kwa yana yakwe Izlaeli umu Ejipti, nupya walanzile na vino yaali nu kucita uku mafupa yakwe.

23 Utailo u walenzile ukuti avyazi yakwe Mose yamufise pa myezi itatu pa cisila ca kuvyalwa, pano yaweni ukuti umwana wii wali umusuma nupya yatatiinyile isunde lya mwene. 24 Utailo u walenzile ukuti lino Mose wakuzile akane ukwamwa ukuti umwizikulu* wakwe Falao, 25 wasoolwilepo ukuculila pamwi na antu yakwe Leza ukucila ukuipakizya luyembu lwa pa nsita inono, 26 pano wamanyile ukuti ukuzewana pa mulandu wa kuya umupakwe* kwacindime ukucila ivyuma vya mu Ejipti, pano wisile sana mano uku kupoka icilambu. 27 Utailo u walenzile afume umu Ejipti, lelo atatiinyile ukali wa mwene, pano watwalilile ukukomeleka kwati akulola Leza asyaloleka. 28 Utailo u walenzile ukuti azevye Ucilo alino nu kusansa uwazi, pakuti malaika wakwe Leza atakoma mayeli yao.

29 Utailo u walenzile kuti yapite pali Yemba Muyenzu kwati yakupita pa musili uume, lelo lino aina Ejipti yezizye ukupitapo, yamwelile.

30 Utailo u walenzile iviumba vya musumba wa Yeliko ukupona pa cisila cakuti antu yauzinguluka pa manda 7. 31 Utailo u walenzile ukuti Lahabu cizelele atafwila pamwi na yauze ataali ni cuvwila pano wapokelile ningo inengu.

32 I vyani vyuze vino ningalandapo? Pano insita ingancepela nga natwalilila ukulanda pali Gidyoni, Baraki, Samusoni, Yefuta, Devedi na Samweli alino na ya kasesema yauze. 33 Utailo walenzile yacimvye mawene, yalete ulungami, yayalaye malayo, yacilike utunwa twakwe ya cisama, 34 yazimizye umoto uwipisye, yapuswike uku lupanga, lino yali atonte alino yapeezilwe sana amaka, izile iyaya na maka umu ulwi, nupya yacimvizye asilika aayazanzile. 35 Anaci yamwi yapokelile ya lupwa yao aatuutulwilwe, lelo antu yauze yene yayacuzizye pa mulandu wakuti yataatiile ukuya nu utailo pakuti sile yakululwe, yalondanga yace yatuutululwe ningo. 36 Yauze nayo yeziwe ukupitila umu kuyacuzya nu kuyuma ivikoti, ni vyacizilepo, yayanyefile umu maceni nu kuyayalila umu vifungo. 37 Yatamilwe na mawe, yeziwe, yaputwilwe pakasi, yakomilwe nu lupanga, yapisile ala yazwite impapa zya mfwele, ni mpapa zya mbuzi lino yulizye, umu macuzi, nu mukucuziwa; 38 nupya insi itayalingine ukwikalamo. Yapitananga umu lwanga nu mu myamba nu kufisama umu ninga nu mu viwina.

39 Nupya yonsi yaa, nanti cakuti Leza wayapeezile usininkizyo wakuti yamuzanzizye pa mulandu wa utailo wao, yatapokelile vino wayalavile, 40 pano Leza waloliile limwi icisuma cino wali nu kutucitila, pakuti yataya amalilike lino swemo tutatala twaya amalilike.

12 Fwandi lyene vino iumba* lyakwe ya kambone ilikalamba lyatuzinguluka, lekini tuzuule consi icinyome nu luyembu ulukatulema zuwa, nupya lekini tusimule nu kuzizimizya umu lwilo ululi inkoleelo itu, 2 lino tukwika amano pali Yesu, Umwimilizi Mukalamba nupya aakalenga utailo witu ukuya umalilike. Pa mulandu ni nsansa izyali pa nkoleelo yakwe, wazizimizye pa cimuti ca kucuziwilwapo,* ataasakamile pa kuzewana, nupya wikala ukwi kasa li lunji ilya cilimba cakwe Leza ica wene. 3 Pakuti mutatonta nu kutoovoka, mwaelenganya sana pali wino wazizimizye amazwi aipe ukufuma uku yantu ayembu yano umu kucita vivyo yaisinilanga aineco.

4 Nanti cakuti mukulwisyanya nu luyembu, mutaatala mwazizimizya ukufika uku mfwa. 5 Nupya imwilila ukukonkomezya ukwapeelwa kuli mwemwe wa yana ukwakuti: “Mwanane, utasuula ukusunda ukukafuma kuli Yeova, nupya utaatoovoka lino Leza akukulungika; 6 pano Yeova akasunda yano watemwa, nupya akaomvya umukota pa kusalapula wensi wino watemwa wa mwana.”

7 Mulinzile ukuzizimizya pakuti musundwe. Leza akamulola ukuti mwemwe yana. Uzye u mwana wa musango ci aasisundwa kuli isi? 8 Lelo ndi cakuti mwensi mutaasundwa umu musango uu ala asi mwemwe yana yakwe, mwemwe yana yakwe muze. 9 Nupya ya tata itu yatusundanga, naswe twayuvwilanga, uzye fwandi tutanga tucilepo ukutontela Tata aakatutungulula ukuomvya umupasi wakwe uwa muzilo pakuti tuye nu umi? 10 Pano yene yatusundanga pa nsita inono ukulingana na vino yalola ukuti vili ningo, lelo wene akatusunda pakuti ivintu vituzipile na pakuti tuye amuzilo wakwe vino waya. 11 I cacumi, kutaya ukusunda ukukauvwika ningo lilyo kwene, lelo kukauvwisya uyi; nomba pa cisila, kukaleta umutende nu ulungami kuli yayo aakasambililako.

12 Acino mukomye makasa na makokola atonte, 13 nupya mwaololola inzila umwakulyata ingazo zinu, pakuti icilundwa icilemale citafyutuka lelo cipoziwe. 14 Mwaezya na maka ukuya amutende uku yantu yonsi nu kuya asanguluke, pano ndi cakuti umuntu asi musanguluke atalalola Umwene. 15 Mwacenjela pakuti kutaya uwa kufilwa ukupokelela icikuuku cakwe Leza icikulu, na pakuti kutaya umusisi wakwe poizoni uungamela nu kuleta intazi nu kukowezya antu aingi; 16 nupya mwacenjela pakuti muli mwemwe mutaya kacita wa uzelele* nanti umuntu aatacindika ivya muzilo wakwe Esau, uwakawizye insambu zyakwe izya uyeli ni cakulya. 17 Pano mwamanya ukuti pa cisila lino walondanga ukupokelela ipaalo, ataazumiliziwe; pano nanti cakuti wezizye ukupaapata ala akulila pakuti isi asenule melenganyo, vitaomvile.

18 Mutaapalamile ku mwamba uno mungakumya nupya uwasontikwe nu moto, uwakweti ikumbi ilitifi, imfinzi ikalamba ni cimuza icipiisye, 19 nupya kuno ipenga lyalilanga, kwali ni ciunda ca mazwi nupya lino antu yuvwile amazwi yayo, yapaapasile ukuti yatatwalilila ukuvwika. 20 Pano yuvwile intete lino yuvwile isunde lyakuti: “Nanti sile i cinyama nga cakumya uku mwamba, cilinzile ukutamwa na mawe.” 21 Nupya icalolike catiinyanga icakuti Mose walanzile nu kuti: “Indi ni ntete nupya nkuzakaza.” 22 Lelo mwapalamila ku Mwamba wa Zioni nu ku musumba wakwe Leza wa umi, Yelusalemu wa kwi yulu, na kuli ya malaika imintapendwa 23 aakolongana umu maumba, nu ku cilongano ca mayeli alembwa umwi yulu, na kuli Leza Kapingula wakwe yonsi, nu ku yalungami aakaikala ukulingana nu mupasi wa muzilo nupya aalengwa ukuya amalilike, 24 na kuli Yesu kakundanya wa upangano upya, nu ku wazi uwasanswa pali sweswe uwacindama ukucila uwazi wakwe Abeli.

25 Mwacenjela pakuti mutaakana ukuvwa kuli wino akulanda. Pano ndi cakuti aakanyile ukuvwa uku mazwi yakwe Leza aakuyacelula pano nsi yataapuswike, fwandi ale swemo cilipisya ndi cakuti twakana ukuvwa kuli wino akulanda ukufuma umwi yulu. 26 Pa nsita iiya izwi lyakwe lyatensizye insi, lelo ndakai walaya ukuti: “Lyene ndatensya insi kumwi ni yulu kwene.” 27 Izwi lyakuti “lyene” likalangilila ukufumya ivintu ivyatensiwa, kuli kuti ivintu ivyapangwa, pakuti ivintu ivitatensiwa vitwalilile ukuyako. 28 Fwandi vino twamanya ukuti tulapokelela Uwene utanga utensiwe, lekini tutwalilile ukupokelela icikuuku cikulu icikalenga twaya na katiina nu mucinzi sana lino tukuombela Leza. 29 Pano Leza witu u moto ukaonona.

13 Twalililini ukutemwana wa ina. 2 Mutailila ukupokelela aenyi, pano mukucita vivyo yamwi yapokelile ya malaika ukwaula ukumanya. 3 Mwaiusya aya umu vifungo kwati mwanyepwa pamwi nayo, na yayo aakacuziwa, pano namwe kwene mwemwe vilundwa vya mwili.* 4 Icupo cilinzile ukucindikwa na antu yonsi nupya citalinzile ukuya icikowele, pano Leza alapingula aakacita uzelele* na acende. 5 Lekini uwikazi winu utaya uwa kutemwa impiya, lelo mwateeka umwenzo kuli vino mukweti. Pano walanda ukuti: “Ntalakusya, nupya ntalatala nkutazyele.” 6 Pakuti tungasipa nu kulanda ukuti: “Yeova ali kaazwa wane; ntalatiina. I cani cino umuntu angancita?”

7 Mwaiusya aakamutungulula, aakamusambilizya izwi lyakwe Leza, nupya lino mukwelenganya pa miyele yao isuma, mwakolanya utailo wao.

8 Yesu Klistu asisenuka, vino wali mutondo avino ali ni lelo nupya avino alaya manda pe.

9 Mutaleka ivisambilizyo ivipusanepusane nupya ivya ufi vimuponzye, pano cazipa ukukomeleziwa ni cikuuku icikulu ukucila uku vyakulya,* ivisiavwa yayo avisumbako sana mano.

10 Twakwata ulambo uno yayo aakaomba umulimo wa muzilo api tenti yatakwata insambu zya kuliilapo. 11 Pano inyama zino simapepo mukalamba akasenda uwazi nu kutwala umu ncende ya muzilo pakuti akapeele ilambo pa membu, zikaociwa ukunzi ya nkambi. 12 Acino na Yesu kwene waculiile ukunzi ya mpongolo ya musumba, pakuti asangulule antu ukuomvya uwazi wakwe. 13 Acino lekini tuye kuli aliwe kunzi ya nkambi nu kuzizimizya umuzewanya, wakwe vino wene wazizimizye, 14 pano tutakwata umusumba ungikalilila manda pe, lelo tukalondesya uuliza. 15 Ukupitila muli aliwe lekini lyonsi twapeela ilambo lya kulumbanya kuli Leza, kuli kuti ukuomvya imilomo itu lino tukulanda apaswe api zina lyakwe. 16 Nupya mutailila ukucita ivisuma nu kwankanyako yauze vino mukweti, pano Leza watemwa malambo ya musango uuwo.

17 Mwauvwila aakamutungulula nu kuyatontela, pano yakamusakamala nupya yalalondolola, pakuti yaomba ni nsansa, yataomba nu ulanda, pano nga caya vivyo ivintu vingamwipila.

18 Twalililini ukutupepelako, pano twasininkizya ukuti twaya na kampingu musuma, pano tukalonda ukuya aacisinka umu vintu vyonsi. 19 Lelo cino nkumukonkomezya sana i cakuti mwapepa pakuti ince mbwele zuwa kuli mwemwe.

20 Si Leza wa mutende uwatuutulwile Umwene witu Yesu, kacema umukalamba uwa mfwele, ukuomvya uwazi wa upangano wa pe, 21 amupeele ivisuma vyonsi pakuti mwacita ukulonda kwakwe, nupya atwazwe ukucita ivikamuzanzya ukupitila muli Yesu Klistu, kuli aliwe kuye ululumbi manda pe. Ameni.

22 Lyene nkumukonkomezya inane ukuti mwateeka umwenzo pa kukutika uku mazwi yaa akukomelezya, pano iimulembela kalata umwipi. 23 Nkulonda mumanye ukuti umwina witu Timoti yamufumya umu cifungo. Ndi cakuti wiza zuwa, ale tuliza pamwi nawe umu kumulola.

24 Mundamukile yonsi aakamutungulula na amuzilo yonsi. Aina Itali yamulamuka.

25 Icikuuku cikulu ciye namwe mwensi.