KALATA WAKWE YAKOBO

1 Ne Yakobo umuomvi wakwe Leza nu wa Mwene Yesu Klistu, nalembela imitundu 12 iyasalanganila konsi:

Namulamuka!

2 Inane, mwasansamuka lino mwaya na mezyo apusanepusane, 3 wakwe vino mwamanya, pa mulandu wakuti mukatwalilila ukuya nu utailo lino mweziwa, cikalenga mwazizimizya. 4 Lekini ukuzizimizya kumalilile umulimo uno kufwile ukuomba, pakuti mungaya amalilike nu kuya na mano muli vyonsi, ukwaula ukuulizya muli cimwi.

5 Ndi cakuti umwi muli mwemwe uulizya mano, lekini atwalilile ukulenga kuli Leza, pano wene akapeela kuli yonsi ukwaula ukukalipila, nupya Leza alamupeela mano. 6 Lelo lekini atwalilile ukuya nu utailo lino akulenga, atatwisika, pano aakatwisika waya wa maimbi aapali yemba aakasendwa nu muza nu kutwalwa konsi konsi. 7 Nupya umuntu wiyo atalinzile ukwenekela ukupokelela icili consi ukufuma kuli Yeova; 8 wene waya ni myenzo iili, akasenuka senuka muli vyonsi.

9 Lekini umwina umupiina asansamuke pa kucindamikwa kwakwe, 10 nu mukankala nawe pa kuzewana kwakwe, pano alalukuta wi luwa lya mu mpanga. 11 Pano ilanzi nga lyatunka, kasanya kakaoca icimelwa nu kulenga icuma, nupya iluwa likapona ilita nu kuloleka ningo, vikwene avino nu mukankala alafwa lino akulondelela ivyuma.

12 Uwa nsansa u muntu aakatwalilila ukuzizimizya uwezyo, pano pa cisila ca kuzumiliziwa alapokelela icilambu ca umi, cino Yeova walaya antu aakatwalilila ukumutemwa. 13 Lino umwi weziwa, atalinzile ukulanda ati: “Nkweziwa na Leza.” Pano Leza atanga aeziwe uku viipe, nupya asiezya ali wensi. 14 Lelo umuntu wensi akaeziwa nga watunkwa nu kulemwa nu lunkumbwa lwakwe. 15 Lyene ulunkumbwa nga lwakula, lukalenga umuntu ukuyembuka, nupya cico cikatungulula uku mfwa.

16 Mwe inane yano natemwa, mutabepwa. 17 Ica upe consi icisuma nupya icimalilike cikafuma ukwi yulu kuli Isi wa vintu vya mwi yulu ivikapeela uluswepo, aasisenuka wa cinzingwa. 18 Vino ali kulonda kwakwe, walenzile tuyeko ukuomvya izwi lyakwe ilya cumi, wacisile vivyo pakuti tuye ivizao vya nkoleelo pa viumbwa vyakwe.

19 Mwe inane yano natemwa, cino mufwile ukumanya aeci: Umuntu wensi alinzile ukuya aakauvwa zuwa, umuteekele pa kulanda, nupya aasisoka zuwa, 20 pano ukali usilenga umuntu ukucita ivintu ukulingana nu ulungami wakwe Leza. 21 Fwandi sumbini ukukowela konsi ni viipe vyonsi, nu kupokelela izwi lyakwe Leza ilingamupususya ni myenzo ifuuke.

22 Lelo mwacita vino izwi lyakwe Leza likalanda mutauvwa sile, pano nga mukuvwa sile ala mukuibepa. 23 Pano umuntu aakauvwa izwi lyakwe Leza ukwaula ukucita ivyayamo, waya wa muntu aakuilola pa manso muli miila. 24 Wene akailola nu kufumapo, nupya lilyo kwene akailila vino akaloleka. 25 Lelo umuntu aakalolekesya umu masunde amalilike aakatulenga ukuya antungwa nu kutwalilila ukuyalondela nupya asiilila vino akauvwa, lelo akacita vino akauvwa; wene alaya ni nsansa muli vino akacita.

26 Ndi cakuti umwi akwelenganya ukuti a kapepa wakwe Leza nomba asisunga ningo ululimi lwakwe, ala akuibepa umu mwenzo wakwe, nupya upefi wakwe ala u wa sile sile. 27 Upefi usanguluke nupya utakowela kuli Leza witu nupya Tata, aewu: ukusakamala ya mukamfwilwa na ana ya nsiwa lino yakucula, nu kukanaikowezya uku vya mu nsi.

2 Mwe inane, uzye mungaya nu utailo umu Mwene witu uwa lulumbi Yesu Klistu ndi cakuti muli na kapaatulula? 2 Pano ndi cakuti umwi aazwite imbalaminwe* yakwe goldi ni vyakuzwala ivisuma sana wiza pano imukolongana, alino nu mupiina aazwite ivyakuzwala ivikowele nawe kwene wiza, 3 uzye mukacindika uwatazwala ivyakuzwala ivisuma sana nu kumunena imuti, “Wemo ikala paa pa ncende isuma,” nu kunena umupiina imuti, “Wemo imilila” nanti, “Ikala pansi”? 4 Ndi cakuti ali vino mukacita, uzye ala musi na kapaatulula, nupya uzye ala musikupingula upinguzi uwiipe?

5 Uvwini mwe ina yano natemwa. Uzye Leza ataasoolwile antu yano amu nsi yakalola ukuti apiina kuti yaye aakankala umu utailo nu kuya impyanyi zya Wene uno walavile yayo amutemwa? 6 Nomba mukasaalula apiina. Uzye akankala asi yano yakamucuzya nu kumutwala uku vilye? 7 Uzye yasipontela ni zina lisuma lino mwamiilweko? 8 Fwandi lyene nga mukulondela isunde lya mwene ukulingana ni lembo ilikati, “Uwatemwa umuzo wakwe vino waitemwa,” ala mukucita ningo sana. 9 Lelo nga mwatwalilila ukuya na kapaatulula, ala mukucita uluyembu, nupya ala masunde yakumusinila ukuti mwemwe yayembu.

10 Pano ndi cakuti umwi akauvwila Masunde yonsi nomba watama isunde lyonga, ala watama Masunde yonsi. 11 Pano uwalanda ukuti, “Utaacita ucende,” walanda nu kuti, “Utaakoma.” Fwandi ndi cakuti usicita ucende nomba ukaakoma, ala usilondela masunde. 12 Mwalanda nu kucita ivintu wa yantu ali nu kupingulwa ni sunde ilikalenga antu ukuya antungwa. 13 Pano umuntu aataya nu luse alapingulwa ukwaula uluse. Uluse lukacimvya upinguzi.

14 Inane, uzye uusuma ci uno umuntu angazana nga walanda ukuti wakwata utailo lelo ataakwata imilimo? Uzye utailo uwo ungamupususya? 15 Ndi cakuti umwina nanti nkazi atakweti ivyakuzwala ni vyakulya pa wanda uwo, 16 alino umwi pali mwemwe wamunena ukuti, “Upite ningo; nupya uzane ivyakuzwala ni vyakulya,” ukwaula ukumupeela vino akulondekwa, uusuma ci uungayapo? 17 Avino nu utailo kwene uutakwata imilimo, wafwa.

18 Lelo umwi angalanda ukuti: “Wemo wakwata utailo, nani nakwata imilimo. Ndange utailo wako uwaula imilimo, nani namakulanga utailo wane uwakwata imilimo.” 19 Uzye wazumila ukuti kwaya Leza wenga? Ale cili ningo. Ni viwa kwene vyazumila nupya vikazakaza. 20 We muntu we, wemuno utamanya cimwi, uzye ukulonda ukumanya usininkizyo wakuti utailo uutakwata imilimo u wa sile sile? 21 Uzye Abulahamu icikolwe citu atalungamikilwe uku milimo pa cisila ca kupeela Isaki umwanakwe pa ulambo? 22 Fwandi mwalola ukuti utailo wakwe walolekelanga umu milimo yakwe nupya utailo wakwe wali umalilike pa mulandu ni milimo yakwe, 23 nupya ilembo lyafikiliziwe ilikati: “Abulahamu wataile Yeova, nupya wamilwe ukuti u mulungami,” nupya wizile aamwa ukuti a cuza wakwe Yeova.

24 Mwalola ukuti umuntu akaya umulungami pa mulandu wa milimo asi pa mulandu wa utailo utupu. 25 Umu nzila ili imwi kwene, uzye Lahabu cizelele nawe kwene ataamilwe ukuti u mulungami pa mulandu wa milimo pa cisila ca kupokelela ningo inkombe nu kuzinena ukuti zipite inzila yuze? 26 Wakwe viivi kwene vino umwili uwaula umupasi* waya uufwe, avino nu utailo uwaula imilimo wafwa.

3 Inane asi aingi pali mwemwe aafwile ukuya ya kasambilizya, pano mwamanya ukuti tulapokelela upinguzi uwipisye ukucila antu yauze. 2 Pano swensi tukaluvyanya imiku iingi. Ndi cakuti umwi asiluvyanya umu milandile, ala wene umumalilike, nupya ala angakanya nu mwili wakwe onsi. 3 Ndi cakuti twika ivyela umu milomo ya mfwalasi pakuti zyatuvwila, tukazitungulula konsi kuno tukulonda. 4 Elenganyini pa vimawato: Nanti cakuti vyaya ivikulu sana nupya vikasendwa ni cimuza icikome, kapisya wa wato akavitungulula konsi kuno akulonda ukuomvya kakufiilako mawato akanono sana.

5 Avino nu lulimi lwaya, nanti cakuti a kalundwa akanono aka ku mwili, kakayuvwa sana. Elenganyini pali vino akamoto akanono sile kakaoca impanga ikulu! 6 Ululimi nalo kwene lwaya wa moto. Pa vilundwa vyonsi ivyaya uku mwili, ululimi ali lwipisye, pano lukakowezya umwili onsi nu koca umi wa muntu onsi nupya lukapya umu Gehena.* 7 Pano imisango yonsi iya nyama zya mu mpanga ni vyunyi ni vikasela ni vyaya muli yemba, vikateekwa nupya vyateekwapo na antu. 8 Lelo kusi umuntu aangateeka ululimi. Lusitungululwa nupya ulwipe, lwakwatisya usungu ukakoma. 9 Uku lulimi akuno tukalumbanyizizya Yeova Tata witu, nupya uku lulimi kwene akuno tukatiipila antu aumvilwe “umu cata cakwe Leza.” 10 Umu kanwa akali kamwi kwene u mukafuma ipaalo ni citiipu.

Inane, vivyo asi vino cilinzile ukuya. 11 Uzye akafukoka kali kamwi kangafumya manzi asuma na manzi alule? 12 Inane, uzye umusamvu ungaseeka amaolivi, nanti umwangazi ukuseeka amasamvu? Avino na kafukoka ka manzi ya musilya katanga kafumye manzi asuma.

13 A weni uwaya na mano muli mwemwe nupya aakailuka? Lekini alange imiyele yakwe isuma ukupitila umu kuomba imilimo nu ufuuke uukaiza ukufuma uku mano. 14 Lelo ndi cakuti muli nu uzuwa uwipisye nu lwete* umu myenzo inu, mutaayuvwa, pano nga mukucita vivyo ala mukubepa. 15 Amano yayo yasifuma ukwi yulu; aapano nsi, aunyama, nupya auciwa. 16 Pano konsi ukuli uzuwa nu lwete,* kukaya icimvulunganya ni viipe ivya misango yonsi.

17 Lelo amano aakafuma ukwi yulu inkoleelo yakalenga umuntu ukuya umusanguluke, uwa mutende, asiumilila pali vino akwelenganya, ukuya sana nu luse, ni miyele isuma, ukukanaya na kapaatulula, alino nu kukanaya nu usomvi. 18 Nupya imiyele ya ulungami ikayapo lino kuli umutende kuli yayo aaya nu mutende.

4 Uzye ivikalenga ukuti mwapaazyanya nu kulwisyanya vikafuma kwi? Uzye visifuma kuli vino imili inu iikamulwisya ikalonda? 2 Mukalonda lelo mutakwata. Mukakoma nu kukumbwa, lelo musipoka ivili vyonsi. Mukalwa nupya mukacita kwati muli umu nkondo. Mutaakwata ivili vyonsi pa mulandu wakuti musilenga. 3 Nga mwalenga, musipeelwa pano mukalenga pa mulandu ni pange iliipe, pakuti muviomvye kuli vino imili inu ikulonda.

4 Mwe yacende,* uzye mutamanya ukuti ukuya cuza ni nsi uulwani kuli Leza? Acino wensi aakulonda ukuya cuza wa nsi, ala waipanga umulwani wakwe Leza. 5 Nanti uzye mukwelenganya ukuti ilembo i lya sile sile ilikalanda ukuti: “Imiyele ya muvimbila iyaya muli sweswe, lyonsi ikalondesya ivintu ivipusanepusane”? 6 Lelo icikuuku cino Leza akapeela i cikalamba. Acino ilembo likati: “Leza akakana acilumba lelo akapeela icikuuku cikulu kuli yano yaicefya.”

7 Fwandi mwauvwila Leza; lelo mwakaanya Ciwa, nawe alutuka ukufuma kuli mwemwe. 8 Palamini kuli Leza, nawe alapalama kuli mwemwe. Sangululini makasa inu mwe yayembu, nupya sangululini imyenzo inu mwe ya myenzo iili. 9 Muye nu ulanda nu kuloosya nu kulila. Lekini inseko zinu zisanguke ukuloosya ni nsansa zinu ziye ulanda. 10 Muicefye umu manso yakwe Yeova, nawe alamucindamika.

11 Mutalandilana iviipe inane. Wensi uwalanda iviipe pa mwina nanti ukumupingula ala wasaalula nu kupingula isunde. Nupya ndi cakuti ukupingula isunde, ala usikulondela isunde lelo ala wewe kapingula. 12 Kwaya sile Kapeela wa masunde wenga nupya Kapingula, uwakwata amaka ya kupususya nu konona. Lelo wemo, uzye wewe weni uwakuti uwapingula umuzo?

13 Mwe yamwi mukati: “Ilelo nanti mutondo tulaya uku musumba uuwa nu kuya ikalako umwaka onga, nupya tulaya tukacite uculuzi nu kupanga impiya,” 14 lelo musimanya vino umi winu ulaya mutondo. Pano mwaya wakwe kungwi aakaloleka pa nsita inono nu kufumapo. 15 Lelo mulinzile ukulanda ukuti: “Yeova nga watemwa, tulaya nu umi, nupya tulacita cii nanti ciica.” 16 Lelo mwemo mukayuvwa pa mulandu ni cilumba. Ukuyuvwa kwa musango uwo u kwipe. 17 Fwandi ndi cakuti umwi wamanya ivya kucita icisuma nomba asikucita, ala akuyembuka.

5 Uvwini lyene mwe yakankala, lilini nu kuloosya pa mulandu nu ulanda uukwiza pali mwemwe. 2 Ivyuma vinu iviola, ni vyakuzwala vinu iviliika ni vipepelya. 3 Goldi winu na siuva winu ivikwata ingalawa, nupya ingalawa zizyo zilaya unte pali mwemwe nupya zilalya imili iinu. Vino mwasunga vilaya wa moto umu manda ya kusyalikizya. 4 Lolini! Malipilo yano mutapeela aomvi aazombwile umu vyalo vinu yakulila impooma, nu kulila kwakwe ya kazombola ukwa kulenga uwavwilizyo ikuvwika kuli Yeova uwa maumba yakwe ya malaika. 5 Mukaikala imikalile ya ukankala nu kuipakizya ivya pano nsi. Imyenzo inu yaya wa nyama iziine ukufikila pa wanda wa kuzikoma. 6 Mwapingula; mwakoma umulungami. Uzye asimukaanya?

7 Inane mwateeka umwenzo ukufikila pa kuyapo kwa Mwene. Siulimi akatwalilila ukuloleela ivilimwa ivisuma ivya mu musili, akaviteekanyizizya ukufikila lino imvula ya kutandikilako ni ya kusyalikizya yatoonya. 8 Namwe kwene mwateeka imyenzo; lekini imyenzo inu ikomeleke, pano ukuyapo kwa Mwene iikupalama.

9 Mwe inane mutaasokelana pakuti mutapingulwa. Lolini! Kapingula ali umupiipi. 10 Inane mwakolanya ukuzizimizya nu kuteeka umwenzo kwakwe ya kasesema aalandiile umwi zina lyakwe Yeova. 11 Tukalola ukuti aakazizimizya yaya ni nsansa. Muuvwa vino Yobo wazizimizye nupya mwalola ivisuma vino Yeova wamucitiile, ivikalanga ukuti Yeova waya sana nu kutemwa nu luse.

12 Ni cikalamba pali vyonsi inane i cakuti, tiini ukulapa ukuomvya iyulu nanti insi nanti ukuomvya umulapo uli onsi. Lelo lekini “Ee” winu aye ee, na “Awe” winu aye awe, pakuti Leza ataca amupingule.

13 Uzye pali mwemwe pali umwi aakucula? Lekini atwalilile ukupepa. Uzye pali umwi aali ni nsansa? Lekini aimbe inyimbo zya malumbo. 14 Uzye pali mwemwe pali uwatalwala? Lekini aame ya eluda ya mu cilongano, nupya lekini yamupepeleko, yamupake na mafuta umwi zina lyakwe Yeova. 15 Nupya ipepo lya utailo lilapozya umulwale wiyo, na Yeova alamukatusya. Nupya ndi cakuti wacita imembu alelelwa.

16 Fwandi mwasokolwelana imembu nu kupepelana, pakuti mupoziwe. Ipepo lya kupaapata kwa mulungami lyakwata sana amaka. 17 Eliya wali u muntu wakwe sweswe kwene, lelo lino wapefile sana ukuti imvula itatoonya, itatoonyizye pa myaka itatu ni myezi 6. 18 Lyene wizile apepa nupya kwene, nupya imvula yatoonyizye icakuti nu mu mpanga imuya ivyakulya.

19 Inane ndi cakuti umwi wafuma umu cumi nupya umwi wamuwezya, 20 manyini ukuti uwawezya umuyembu ukufuma uku kuluvyanya kwakwe alamupususya uku mfwa nupya alaviimba pa membu izingi.