KALATA WAKWE CIILI WAKWE PETULO

1 Ne Simoni Petulo, umuomvi nupya umutumwa wakwe Yesu Klistu, nalembela aakwata utailo ucindame wakwe uno twakwata ukupitila umu ulungami wakwe Leza witu na Kapususya witu Yesu Klistu, ukuti:

2 Si cikuuku cikulu nu mutende vivule kuli mwemwe pa mulandu wa kumanya ningo Leza na Yesu Umwene witu, 3 pano maka yakwe Leza yatulenga ukukwata vyonsi ivikatwazwa ukuya nu umi nu kuombela Leza pa mulandu wa kumanya ningo uwatwamile uku lulumbi lwakwe nu ku usuma wakwe. 4 Ukupitila umu vintu kwene vii, watupeela malayo asuma sana, pakuti namwe mungaya wakwe vino Leza waya, pano mwafuma umu nsi umwaya imiyele iipe iyayako pa mulandu nu lunkumbwa.

5 Pa mulandu kwene uu, mwaombesya pakuti uku utailo winu mulundeko usuma, ku usuma winu mulundeko ukumanya, 6 ku kumanya mulundeko ukuikaanya, ku kuikaanya mulundeko ukuzizimizya, ku kuzizimizya mulundeko ukapepa, 7 kuli ukapepa mulundeko ukutemwa ina, nu ku kutemwa ina nako mulundeko ukutemwa antu yonsi. 8 Pano ndi cakuti ivintu vii vyaya muli mwemwe nu kuvulisya, vilalenga mutaya atonte nanti ukuya wa muti uusiseeka, ukulozya uku kumanya ningo Umwene witu Yesu Klistu.

9 Pano umuntu ali wensi aatakweti ivintu vii, wene iimpafu, akaayala manso yakwe ku luswepo, nupya ala wilila vino wasangulwilwe uku membu zyakwe izya mpiti. 10 Fwandi inane, mwaombesya pakuti musininkizye ukuti mwatwalilila ukuya acumi pakuti mutwalilile ukuya pali yano Leza wamile nu kusoolola, pano nga mwatwalilila ukucita ivintu vii, mutalatala mufilwe. 11 Nupya nga mukucita vivyo, cilalenga mwingile umu Wene wa manda pe uwa Mwene nupya Kapususya witu Yesu Klistu.

12 Pa mulandu kwene uu nkalonda ukuti namwiusya ivintu vii lyonsi nanti cakuti mwavimanya nupya mwazumila icumi cino mwasambilile. 13 Lelo umu milolele yane icilinga ukuti imwiusyeko nupya kwene pa vintu vii, lino ncili umu mwili uu,* 14 pano imanya ukuti umwili wane wasya ufumiziwepo, wakwe viivi kwene vino Umwene witu Yesu Klistu wanenyile. 15 Ndatwalilila ukuombesya lyonsi, pakuti nga naca napita muce mwaiusya ivintu vii mweineco.

16 Lino twamumanyisizye pa maka nu kuyapo kwa Mwene witu Yesu Klistu, tutaomvizye malyasi ya ufi, lelo twamunenyile vino twailoliile ululumbi lwakwe. 17 Pano Leza Isi uwaya sana nu lulumbi wacindamike Yesu nu kumupeela ululumbi, lino walanzile pali aliwe ukuti: “Wii u Mwanane umutemwikwe, wino nkazangilamo.” 18 Mazwi kwene yaa twayuvwile ukufuma kwi yulu lino twali nawe umu mwamba wa muzilo.

19 Uli mulandu uno twasininkizizya ukuti masesemo yalafikiliziwa nupya mukucita ningo ukuvwila masesemo yaa aya wakwe lampi aakapeela uluswepo umu mfinzi, kuli kuti umu myenzo inu, kufikila lino waca nu lutanda lwa katondo lwatunka. 20 Pano mwamanya ukuti, kutaya umuntu ali wensi aangalondolola usesemo wa mu Malembo pa lwakwe. 21 Pano usesemo utafumile uku yantu, lelo umupasi wa muzilo u walenzile antu yalande amazwi afumile kuli Leza.

2 Lelo kwali na ya kasesema ya ufi umu yantu, wakwe vino kulaya na ya kasambilizya ya ufi muli mwemwe. Antu yaa yalaapanga utumaumba umu umfisolo, nupya yalakana nu wayakazile kwene, nu kuiletela uwononesi zuwa. 2 Nupya antu aingi yalalondela ivicitwa vyao ivya winyi,* nupya pa mulandu na antu yayo icumi cilaapontelwa. 3 Nupya pa mulandu nu lunkumbwa lwao yalezya ukumuponzya ukuomvya mazwi ya ufi. Lelo upinguzi wao uwapingulwa mpiti sana, usiwayawaya, nu uwononesi wao uliza nanti ciye uli.

4 Mu cumi Leza ataakanyile ukufulula ya malaika ayembwike, lelo wayasumbiile umu Tatali* nu kuyanyepa na maceni umu mfinzi ikulu muno yakalolela upinguzi. 5 Nupya ataakanyile ukufulula antu ya mpiti aali umu nsi, lelo wacingilile Nowa kasimikila wa ulungami pamwi na yauze 7 lino waleesile mulamba pano nsi pa yantu aacitanga iviipe. 6 Nupya lino wapingwile imisumba ya Sodoma na Gomola, wayosile suka isanguka itwi, walangilile ivintu ivilacitikila antu aakacita iviipe. 7 Nupya wapuswisye Loti umulungami uuvwanga sana uyi pa vicitwa vya winyi* vino ya mpulamasunde yacitanga, 8 pano cila wanda umuntu wiyo umulungami wacululukanga sana pa viipe vino walolanga nu kuvwa lino wikalanga na antu yayo. 9 Fwandi Yeova wamanya ivya kupokolola ya kapepa yakwe umu wezyo, lelo antu aakacita iviipe yene yalononwa pa wanda wa upinguzi, 10 maka maka yayo aakalonda ukukowezya imili yakwe yauze nupya asuula utunguluzi.

Antu yayo aacilumba nupya yakaacita vino aineco yakulonda, yasiuvwa intete pa kupontela yano Leza wacindamika, 11 nomba nanti cakuti ya malaika yakwata sana amaka yasiomvya amazwi aipe pa kupeela ya kasambilizya ya ufi imilandu, pa mulandu wa kucindika Yeova. 12 Lelo antu yaa yaya wa nyama izisielenganya, izikavyalilwa ukulemwa nu kononwa, yakalanda iviipe pa vintu vino yatamanya. Yalacula uku wononesi uuliza pa mulandu ni vicitwa vyao iviipe, 13 nupya iviipe ivilayacitikila ali cilambu cao pa mulandu ni milimo yao iipe.

Yakalola ukuti caya ningo ukwikusya ulunkumbwa lwa mili yao, nanti sile a kasanya. Yaya wa vikwi ivikakowezya ivyakuzwala nupya yaya wa viyazi vya pa manso pano yakauvwa ningo sana lino yakusambilizya yauze umu ucenjezi nu kuliila pamwi namwe. 14 Yakaloleka nu mu manso ukuti aacende nupya yasiikanya uku luyembu, nupya yakatonsya aatakoma umu utailo. Yasambilizya imyenzo yao ukuya nu lunkumbwa. Aana atiipwa. 15 Yasya inzila ilungame, yaponziwa. Yalondela inzila yakwe Balamu mwana Beoli, uwatemilwe ukupeelwa icilambu mu kucita ivintu iviipe. 16 Lelo wakalipilwe pa mulandu wa kucita iviipe. Icinyama icisivwanga cavwanzile wa muntu nu kulesya kasesema ukucita ivya uwelewele.

17 Yaya wa tufukoka ututakwata manzi, wakwe kungwi aakasendwa ni cimuza, nupya yasungilwa imfinzi ikomesye. 18 Yakalanda ivintu ivikaloleka kwati i vicindame lelo ivya uwelewele. Yakaomvya ulunkumbwa lwa mwili ni vicitwa vya winyi* pa kutunka antu aitalusya kuli yano yakacita iviipe. 19 Yakayalaya untungwa lino yene aazya ya vintu iviipe; pano ndi cakuti umwi wacimviwa uku muntu umwi, akaya umuzya wa muntu wiyo.* 20 Ndi cakuti pa cisila ca kufuma uku vintu ivikakowezya ivya mu nsi pa mulandu wa kumanya ningo Umwene nupya Kapususya Yesu Klistu, yaswilila nupya uku vintu kwene vivyo nu kucimviwa, imiyele yao iya kusyalikizya ikaipisya ukucila iya pa kutandika. 21 Nga cali ningo iyakana ukumanya inzila ya ulungami ukucila ukuimanya alino pa cisila iiza iyasya masunde ya muzilo yano yapeezilwe. 22 Ivintu vino yacita avino ni pinda lya cumi likalanda ukuti: “Simbwa waswilila umu kulya malusi yakwe, na kapoli uwatafulwa waya umu kuivumvunya umu matipa.”

3 Mwe yatemwikwa, wii a kalata wakwe ciili wino nkumulembela wakwe vino namulembiile muli kalata wa kutandikilako, nkumukomelezya ukuti muye na melenganyo asuma ukupitila umu kumwiusya pa vintu vino mwamanya mpiti, 2 pakuti mungaiusya vino ya kasesema ya muzilo yalanzile mpiti ni visambilizyo vino Umwene nupya Kapususya walanzile ukupitila umu yatumwa atumilwe kuli mwemwe. 3 Ica kutandikilako pali vyonsi, manyini ukuti umu manda ya kusyalikizya, aamiponto yaliza ni miponto yao, yalaacita ivintu kulingana nu lunkumbwa lwao 4 nupya yalalanda iyati: “Uzye uwalavile ukuti aliza nu kuya pamwi naswe, ali kwi? Ukufuma pano ivikolwe vitu vyafwilile, ivintu vyonsi vyatwalilila ukuya viivi kwene vino vyali pa kutandika kwa uumbo.”

5 Pano yakasuula sile uku mufulo icisinka cakuti, mpiti sana kwali iyulu alino ni nsi iyapatwilwe uku manzi pa mulandu ni izwi lyakwe Leza, nupya yazingulwikwe na manzi; 6 nupya pa mulandu na vivyo antu aali mu nsi pa nsita iiya yononyilwe lino insi yaunzilwe na manzi. 7 Lelo ukwi zwi ilili limwi kwene amayulu ni nsi ivyayako ndakai vili nu kononwa nu moto nupya vyasungwa ukufikila pa wanda wa upinguzi alino na pa wanda wa konona antu aakacita iviipe.

8 Lelo mwe yatemwikwa mutailila icisinka cii icakuti, uwanda onga kuli Yeova waya wa myaka 1,000 ni myaka 1,000 yaya wa wanda onga. 9 Yeova asiwayawaya ukufikilizya ulayo wakwe, wakwe vino yamwi yakaelenganya ukuti akawayawaya, lelo wamuteekelela pano asilonda umuntu ali wensi akononwe lelo akalonda antu yonsi yalapile. 10 Lelo uwanda wakwe Yeova uliza wa mupuupu, lino mayulu yalapita ni cilulumo icikalamba, lelo ivintu vya mwi yulu ni vya pano nsi vilakaya nu kusunguluka, nupya insi ni milimo iyayamo vilasokololwa.

11 Fwandi vino ivintu vii vyonsi vilasunguluka umu musango uu, mwaelenganya pali vino mulinzile ukuya. Mulinzile ukuya antu aya ni miyele ya muzilo nupya aipeelesya umu kuombela Leza, 12 lino mukuloleela nu kwelenganya sana* pa kuyapo kwa wanda wakwe Yeova, uno mayulu yalononwa uku moto ni vintu ivyayamo vilasunguluka uku cikailila icipisye! 13 Lelo kuli amayulu apya ni nsi ipya vino tukaloleela kulingana nu ulayo wakwe Leza, nupya umu vintu kwene vii u mulaya ulungami.

14 Acino mwe yatemwikwa, vino mukalolela ivintu vii, mwaombesya pakuti akamuzane aasanguluke, aula umulandu nupya umu mutende. 15 Nupya mwalola ukuteekela kwa Mwene witu ukuti i pusukilo, wakwe vino nu mwina witu umutemwikwe Paulo nawe kwene wamulembiile ukulingana na mano yano wapeezilwe, 16 ivintu kwene vii ali vino walandapo umu makalata yakwe yonsi. Lelo vimwi ivyaya umu makalata yakwe vyatala ukuvwa, nupya antu aatamanya cimwi na atonta umu kwelenganya, yakanyonganya ivintu vii, wakwe vino yakacita nu ku Malembo yonsi aasyala, nupya yakailetela uwononesi aineco.

17 Acino mwe yatemwikwa, vino mwamanyila limwi ivintu vii, mucenjele pakuti mutapongela pamwi nayo pa mulandu wa kuluvyanya kwakwe ya mpulamasunde nu kuponzya utailo winu. 18 Lelo twalililini ukulunduluka umu cikuuku cikulu nu mu kumanya Umwene nupya Kapususya witu Yesu Klistu. Kuli aliwe kuye ululumbi ndakai na manda pe. Ameni.