KALATA WA KUTANDIKILAKO WAKWE YOANI

1 Twamulembela pali wino waliko ukufuma pa kutandika, wino tuvwilepo, wino twailoliile na manso itu, wino twalolekisye sana nu kumulemamo na makasa itu, nupya wino akaleta amazwi aakapeela umi, 2 (umi wa pe walolike kuli sweswe, nupya twauweni nupya sweswe nte pa umi uu nupya tukumunena pa umi uu. Umi uu uwa pe wafumile kuli Isi nupya wasokolwilwe kuli sweswe,) 3 ivintu vino twaweni nu kuvwa ali vino tukumunena, pakuti namwe kwene mwauvwana naswe. Nupya ukuvwana kwitu namwe kwaya wakwe vino Isi nu Mwanakwe Yesu Klistu yakauvwana. 4 Nupya tukumulembela ivintu vii pakuti tuye sana ni nsansa.

5 Amazwi yaa yano tuvwile kuli aliwe a yano tukumunena aakuti: Leza u luswepo, nupya muli aliwe mutaaya imfinzi. 6 Ndi cakuti tukulanda ukuti, “Tukauvwana nawe,” nomba tukupita umu mfinzi, ala tukubepa nupya ala tusiikala ukulingana ni cumi. 7 Lelo ndi cakuti tukupita umu luswepo wakwe vino wene waya umu luswepo, tukauvwana na anji, nupya uwazi wakwe Yesu Umwanakwe ukatusangulula uku membu zyonsi.

8 Ndi cakuti tukulanda ukuti, “Tutaya nu luyembu,” ala tukuiponzya sweineco nupya ala tutaya ni cumi. 9 Ndi cakuti twasokolola imembu zitu, wene uwa cumi nupya u mulungami, alatwelela imembu zitu nu kutusangulula uku viipe vyonsi. 10 Nga tukulanda ukuti, “Swemo tutayembukapo,” ala tukulanda ukuti wene u wa ufi, nupya ala tutataila mazwi yakwe.

2 Mwe yana yatemwikwe, nkumulembela ivintu vii pakuti mutaacita uluyembu. Nupya ndi cakuti umwi wacita uluyembu, tukweti kaazwa uwaya pamwi na Tata, kuli kuti Yesu Klistu umulungami. 2 Nupya wene waya ilambo ilya kwelela imembu zitu, nomba asi membu zitu zitupu lelo ni membu zyakwe yonsi aya umu nsi. 3 Nupya tukalanga ukuti twamumanya ndi cakuti tukulondela masunde yakwe. 4 Umuntu aakalanda ukuti, “Namumanya,” nomba asilondela masunde yakwe ala u wa ufi, nupya ni cumi ala citaya muli aliwe. 5 Lelo wensi aakalondela amazwi yakwe, ala ukutemwa kuno watemwa Leza kwaya u kumalilike. Kuli cikwene akuno tukamanyila ukuti tukaombela pamwi na Leza. 6 Wensi aakalanda ukuti akapita pamwi na Leza, alinzile ukucita ivintu wakwe vino Yesu wacitanga.

7 Mwe yatemwikwa, nsikumulembela api sunde lipya, lelo nkumulembela api sunde lino mwakwata ukufuma mpiti. Isunde lii ilya mpiti, iizwi lino muvwile. 8 Nupya kwene nkumulembela api sunde lipya ilyaya ilya cumi kuli Yesu na kuli mwemwe kwene, pano imfinzi ikupita nupya uluswepo lwa cumi lwatandika ukwaka.

9 Umuntu aakalanda ukuti waya umu luswepo nomba wapata umwinakwe ala acili umu mfinzi. 10 Umuntu uwatemwa umwinakwe waya umu luswepo, nupya kuli aliwe kutaya ica kupumikako. 11 Lelo uwapata umwinakwe waya umu mfinzi nupya akapita umu mfinzi, nupya asimanya kuno akuya, pano imfinzi yamupafuzya manso.

12 Nkumulembela mwe yana atemwikwe, pano imembu zinu zyelelwa pa mulandu wi zina lyakwe. 13 Nkumulembela mwe ya isi, pano mwamanya uwayako ukufuma pa kutandika. Nkumulembela mwe yalumendo pano mwacimvya umwipe. Nkumulembela mwe yana anono, pano mwamanya Tata. 14 Nkumulembela mwe ya isi, pano mwamanya uwayako ukufuma pa kutandika. Nkumulembela mwe yalumendo, pano mwemwe yakome nupya izwi lyakwe Leza lyaya muli mwemwe nupya mwacimvya umwipe.

15 Mutatemwa insi nanti ivintu ivyaya umu nsi. Ndi cakuti umwi watemwa insi ala atatemwa Tata; 16 pano vyonsi ivyaya umu nsi, kuli kuti ulunkumbwa lwa mwili, nu lunkumbwa lwa manso, nu kuitakizya pali vino umwi wakwata, visifuma kuli Tata lelo vikafuma pano nsi. 17 Nupya insi ikupita pamwi nu lunkumbwa ulwayamo, lelo aakacita vino Leza akalonda, akaikalilila manda pe.

18 Mwe yana, yii insita ya kusyalikizya, nupya wakwe vino muvwile ukuti umulwani wakwe Klistu akwiza, na ndakai kwene kuli alwani yakwe Klistu aingi, nupya cikwene acino tukumanyilako ukuti insita yii i ya kusyalikizya. 19 Yafumile muli sweswe, lelo yataali antu itu; pano ndi cakuti iyaya antu itu, nga yatwalilila ukuya naswe. Lelo yapisile pakuti cimanyikwe ukuti asi yonsi aaya muli sweswe. 20 Mwapakwa ukufuma uku wa muzilo, nupya mwensi mwamanya icumi. 21 Nkumulembela ivintu vii, asi pa mulandu wakuti mutamanya icumi, lelo a pa mulandu wakuti mwacimanya, na pa mulandu wakuti kutaya ufi uukafuma uku cumi.

22 Uzye uwa ufi nupya aakakana ukuti Yesu asi Klistu, a weni? Wikwene ali mulwani wakwe Klistu, aakakana Tata nu Mwana. 23 Wensi aakakana Umwana ala asi muomvi wakwe Tata. Lelo wensi aakazumila Umwana ala u muomvi wakwe Tata. 24 Lelo mwemo vino muvwile pa kutandika vilinzile ukuya muli mwemwe. Ndi cakuti vino muvwile pa kutandika vyatwalilila ukuya muli mwemwe, namwe kwene mulaombela pamwi nu Mwana nu kuombela pamwi na Tata. 25 Nupya umwineco watulaya umi wa pe.

26 Nkumulembela ivintu vii pa mulandu na yayo aakalonda ukumuponzya. 27 Nupya namwe, kupaka kuno wamupaka kutwalilile muli mwemwe, nupya musikulondekwa uwakuti amusambilizya; lelo ukupaka kuno wamupaka kukamusambilizya pa vintu vyonsi nupya u kwa cumi, kusi kwa ufi. Wakwe vino wamusambilizya, mutwalilile ukuombela pamwi nawe. 28 Fwandi mwe yana atemwikwe, twalililini ukuombela pamwi nawe pakuti lino alasokololwa tukaye nu untungwa wa kuvwanga, tutakuvwe insonyi pa kuyapo kwakwe. 29 Ndi cakuti mwamanya ukuti u mulungami, ale mwamanya nu kuti wensi aakacita ivilungame ala wavyalwa kuli aliwe.

3 Lolini vino Tata watutemwa, tukaamwa ukuti sweswe yana yakwe Leza! Nupya vivyo kwene avino twaya. Ali mulandu uno amu nsi yatatumanyila pano yatamumanya. 2 Mwe yatemwikwa, ndakai lyene sweswe yana yakwe Leza, lelo tutatala twamanya vino tulaya. Twamanya sile ukuti lino alaloleka tulaya wakwe aliwe, pano tulamulola wakwe viivi kwene vino waya. 3 Nupya ali wensi uwakwata upaalilo uu muli aliwe akaisangulula umwineco, wakwe viivi kwene vino wene waya u musanguluke.

4 Wensi aakacita uluyembu ala akatama na masunde kwene, nupya uluyembu a umpulamasunde. 5 Mwamanya nu kuti Yesu walolike pakuti afumyepo imembu zitu nupya muli aliwe mutaya uluyembu. 6 Wensi aakatwalilila ukuya pamwi nawe asicita uluyembu; lelo wensi aakacita uluyembu atamulolapo nanti ukumumanya. 7 Mwe yana atemwikwe, mutaleka umwi amuponzye; wensi aakacita ivilungame ala umulungami, wakwe viivi kwene vino wene waya umulungami. 8 Wensi aakacita uluyembu u wakwe Ciwa, pano Ciwa wene akayembuka ukufuma pa kutandika. Ukwene uli mulandu uno Umwana wakwe Leza wasokolwilwe pakuti aonone imilimo yakwe Ciwa.

9 Wensi uwavyalwa kuli Leza asicita uluyembu, pano umupasi* wakwe Leza waya muli aliwe, nupya atanga acite uluyembu, pano wavyalwa kuli Leza. 10 Ana yakwe Leza na ana yakwe Ciwa yakamanyikilwa kuli cii: Wensi asicita ivilungame ala asi wakwe Leza, kumwi sile na wensi aatatemwa umwinakwe. 11 Pano yaa ali mazwi yano muvwile pa kutandika, aakuti tulinzile ukutemwana; 12 tutalinzile ukuya wakwe Kaini, wene wali uwakwe Ciwa* nupya wakomile muto wakwe. I cani icalenzile ukuti amukome? Pano vicitwa vyakwe vyali iviipe, lelo imilimo ya muto wakwe yene yali ilungame.

13 Inane, mutaazunguka pali vino antu ya mu nsi yamupata. 14 Twamanya ukuti twafuma uku mfwa nu kwiza uku umi, pano twatemwa aina itu. Wensi aataya nu kutemwa akatwalilila ukuya umufwe. 15 Wensi uwapata umwinakwe wene iinkomi, nupya mwamanya ukuti inkomi yonsi italaya nu umi wa pe. 16 Cikwene icalenga kuti tumanye vino ukutemwa kwaya, pano Yesu Klistu wapeezile umi wakwe pa mulandu witu, nupya naswe tulinzile ukupeela umi witu pa mulandu na ina itu. 17 Nomba ndi cakuti umwi akweti ivyuma vya mu nsi yii nupya walola ukuti umwinakwe akulondekwa uwazwilizyo lelo wakana ukumwazwilizya, uzye ale umuntu wiyo watemwa Leza? 18 Mwe yana atemwikwe, tutalinzile ukulanga sile ukutemwa umu mazwi nanti uku lulimi, lelo kulinzile ukulolekela umu milimo nu mu cumi.

19 Cico cilalenga tumanye ukuti twamanya icumi, nupya tulasininkizya ukuti Leza watutemwa 20 nanti cakuti imyenzo itu ingatupingula muli vimwi, pano Leza waluta sana imyenzo itu nupya wamanya ivintu vyonsi. 21 Mwe yatemwikwa, ndi cakuti imyenzo itu isikutupeela imilandu, ala tukweti untungwa wa kulanda kuli Leza; 22 nupya consi cino twamulenga, akatupeela pano tukalondela masunde yakwe nu kucita ivikamuzanzya. 23 Mu cumi, isunde lyakwe i lyakuti: tukwate utailo umwi zina lya Mwanakwe Yesu Klistu, nupya tutemwane, wakwe viivi kwene vino watunenyile. 24 Nupya wensi aakalondela masunde yakwe Leza akatwalilila ukuya pamwi nawe, nupya Leza akaya nawe. Nupya ukupitila umu mupasi uno watupeela, twamanya ukuti Leza akatwalilila ukuya pamwi naswe.

4 Mwe yatemwikwa, mutazumila sile icisambilizyo icili consi cikuloleka kwati cafuma kuli Leza, lelo mwaezya ivisambilizyo ukulola ndi cakuti mu cumi vikufuma kuli Leza, pano ya kasesema ya ufi aingi yali umu nsi.

2 Ica kumanyilako ukuti icisambilizyo cafuma kuli Leza aeci: Icisambilizyo icili consi icikalanda ukuti Yesu Klistu wizile aya umuntu, cafuma kuli Leza. 3 Lelo icisambilizyo icili consi icikakana ukuti Yesu atizile aya umuntu citafuma kuli Leza. Nupya icisambilizyo cico cikafuma uku mulwani wakwe Klistu wino muvwile ukuti aliza, nupya ndakai waya mpiti umu nsi.

4 Mwe yana atemwikwe, mwemwe yakwe Leza, nupya mwacimvya ya kasesema ya ufi, pano uwaya pamwi namwe, u mukalamba ukucila uwaya pamwi na amu nsi. 5 Yafuma umu nsi; uli mulandu uno yakalandila ivya mu nsi nupya amu nsi yakauvwa kuli aliyo. 6 Swemo twafuma kuli Leza. Wensi uwamanya Leza akauvwa kuli sweswe; ali wensi aatafuma kuli Leza asiuvwa kuli sweswe. Cii i cikatwazwa ukumanya upusano uwaya pa cisambilizyo ca cumi ni cisambilizyo ca ufi.

7 Mwe yatemwikwa, lekini tutwalilile ukutemwana, pano ukutemwa kwafuma kuli Leza, nupya ali wensi uwaya nu kutemwa u mwana wakwe Leza nupya wamanya Leza. 8 Wensi aataya nu kutemwa atamanya Leza, pano Leza u kutemwa. 9 Kuli cii u kwalolekiile ukutemwa kwakwe Leza kuli sweswe, pano Leza watumile Umwanakwe uwavyalwa wenga ukwiza umu nsi pakuti tungaya nu umi ukupitila muli aliwe. 10 Leza watumile Umwanakwe ukuya ilambo lya kwelela imembu zitu. Wacisile vivyo pa mulandu wakuti watutemilwe asi pa mulandu wakuti sweswe twamutemilwe.

11 Mwe yatemwikwa, ndi cakuti vii avino Leza watutemilwe, naswe kwene tulinzile ukutemwana. 12 Kutaya uwatala walolapo Leza. Ndi cakuti twatwalilila ukutemwana, Leza akatwalilila ukuya naswe nupya ukutemwa kwakwe kukaya ukumalilike muli sweswe. 13 Kuli cikwene akuno tukamanyila ukuti twaya pamwi nawe, nawe waya pamwi naswe, pano watupeela umupasi wakwe. 14 Nupya twailolela sweineco nupya tukasimika unte wakuti Tata watumile Umwanakwe ukuya Kapususya uwa yantu ya mu nsi. 15 Wensi uwazumila ukuti Yesu u Mwana wakwe Leza, ala Leza waya pamwi nawe, nupya nawe ala waya pamwi na Leza. 16 Twamanya nu kusininkizya ukuti Leza watutemwa.

Leza u kutemwa, nupya wensi uwatwalilila ukwikala umu kutemwa akaya pamwi na Leza, na Leza akaya pamwi nawe. 17 Uli mulandu kwene uno ukutemwa kwayela ukumalilike muli sweswe, pakuti tukaye nu untungwa wa kulanda pa wanda wa upinguzi, pano wakwe viivi kwene vino Yesu Klistu waya, avino naswe kwene twaya umu nsi yii. 18 Umu kutemwa mutaya intete, lelo ukutemwa ukumalilike kukafumyapo intete, pano intete zikalenga twafilwa ukucita ivintu ivingi. Nupya wensi akauvwa intete atakwata ukutemwa ukumalilike. 19 Twaya nu kutemwa pano Leza u watandikilepo ukututemwa.

20 Ndi cakuti umwi walanda ukuti, “Natemwa Leza,” lelo wapata umwinakwe, ala u wa ufi. Pano aatatemwa umwinakwe wino akalola, atanga atemwe Leza, wino atalolapo. 21 Nupya twakwata isunde lii ilyafuma kuli aliwe ilyakuti, wensi uwatemwa Leza alinzile ukutemwa nu mwinakwe kwene.

5 Umuntu wensi uwazumila ukuti Yesu a Klistu ala u mwana wakwe Leza, nupya wensi uwatemwa Leza, watemwa ana yakwe Leza. 2 Nga twatemwa Leza nupya tukulondela masunde yakwe alino tukamanya ukuti twatemwa ana yakwe Leza, 3 Pano nga twatemwa Leza, tukauvwila masunde yakwe; nupya masunde yakwe yatatala, 4 pano umwana* wakwe Leza wensi akacimvya insi. Nupya utailo witu, uukacimvya insi.

5 A weni angacimvya insi? Uzye asi umuntu uwataila ukuti Yesu u Mwana wakwe Leza? 6 Yesu Klistu wizile na manzi nu wazi; atizile na manzi yatupu lelo wizile na manzi nu wazi. Nupya umupasi ukasimika unte, pano umupasi ali cumi. 7 Pano kwaya ya kambone yatatu: 8 umupasi, manzi nu wazi; nupya vyonsi vitatu vikazumilizyanya.

9 Ukambone wakwe Leza wacila ukambone wa yantu uno tukazumila, pano ukambone wakwe Leza u wakuti, wene wapeela unte pa Mwanakwe. 10 Umuntu uwataila Umwana wakwe Leza wene wakwata unte umu mwenzo wakwe. Umuntu aatataila Leza ala akuti Leza u wa ufi, pano ataataila ukambone uno Leza wapeezile pa Mwanakwe. 11 Nupya umi wa pe ali unte uno Leza watupeezile, umi uu waya umu Mwanakwe. 12 Wensi uwaya pamwi nu Mwana, wakwata umi uu; wensi aataya pamwi nu Mwana wakwe Leza, atakwata umi uu.

13 Namulembela ivintu vii pakuti mumanye ukuti mwaya nu umi wa pe, mweyano mwataila umwi zina lya Mwana wakwe Leza. 14 Nupya utailo* uno twakwata muli aliwe u wakuti, consi cino twamulenga icikuvwana nu kulonda kwakwe, akatuvwa. 15 Nupya vino twamanya ukuti akatuvwa pali consi cino twalenga, tukasininkizya ukuti tumapeelwa vino twamulenga.

16 Ndi cakuti umwi walola umwinakwe akucita uluyembu ulusitungulula ku mfwa, ace amupepele kuli Leza, Leza nawe alapeela umuntu wiyo umi, cii cikulozya sile kuli yayo aakacita luyembu ulusitungulula ku mfwa. Kwaya uluyembu ulukatungulula ku mfwa. Nupya nsikunena umwi ukupepela umuntu akucita uluyembu lwa musango uwo. 17 Ivicitwa vyonsi viipe u luyembu, lelo kwaya uluyembu ulusitungulula uku mfwa.

18 Twamanya ukuti umwana wakwe Leza wensi asicita uluyembu, lelo Umwana wakwe Leza* akamucingilila, nupya umwipe atanga amucite icili consi. 19 Twamanya ukuti sweswe yakwe Leza, lelo insi yonsi ikatungululwa nu mwipe. 20 Lelo twamanya ukuti Umwana wakwe Leza wiza, nupya watupeela mano pakuti tumanye uwa cumi. Nupya ukupitila muli Yesu Klistu Umwanakwe, twaya pamwi nu wa cumi. Leza kwene ali wa cumi nupya umi wa pe. 21 Mwe yana atemwikwe, mwataluka ku vilubi.