Mazwi ya Kuyulila

LEZA u walenzile ukuti Malembo ya Muzilo yalembwe umu Ciebele, Cialamaiki nu mu Cigiliki. Pakuti Izwi Lyakwe Leza lyazwe antu “amu nko zyonsi,” Malembo yalinzile ukusenulwa umu ndimi izingi. (Mateo 24:14) Mabuku 27 ukutandikila pali Mateo ukufika kuli Kusokolola yakaamwa ukuti “Malembo Aa Cigiliki Aa Ina Klistu” pano Aina Klistu yano Leza wapeezile umupasi wa muzilo, yatandikilepo ukulemba Malembo yaa umu Cigiliki mu nsita ya Ina Klistu aakutandikilako.

Malembo ya Nsi Ipya Aa Cigiliki Aa Ina Klistu yatandikilepo ukuyako umu Cizungu mu 1950. Yafuma uku vyeo vya Cigiliki ivyamanyikwa sana vyakwe Westcott na Hort ivyakolana ni vyalembwa vya mpiti ivingi ivya Cigiliki. Pa kusenula Baibo ya Malembo ya Nsi Ipya, kwali ukulondela sana vino ivyeo vya mu Cigiliki vyali. Baibo yii iya Cimambwe-Lungu yasenulwa ukufuma muli Baibo ya Cizungu iya mu 2013, nupya yasenulwa ukulingana na mazwi yaya kwene aayamo.

Izina lyakwe Leza ilyakuti Yeova, likazanwa imiku 237 umu Malembo ya Nsi Ipya Aa Cigiliki Aa Ina Klistu. Pa kulangilila vino izina lyakwe Leza lyaya ilya muzilo na vino lyacindama kuli yonsi pakuti yakapusuke, Baibo yii yaswilizya izina ilyakuti Yeova mumu kwene muno lyayelile umu Malembo ya Muzilo.​—Mateo 6:9; Loma 10:13.

Izina lyakuti, Malembo ya Nsi Ipya, lyafuma pa ulayo uno Leza walaya uwakuti kulaya insi ipya isuma umulikala antu yonsi. (2 Petulo 3:13) Ya kasenula aaomvile umulimo uu aatemwa Leza umwineco wa Malembo ya Muzilo, yaomvile umulimo uiyele uwa kusenula amelenganyo yakwe na mazwi yakwe, yezizye na maka pakuti yasenule ivyeo umu nzila ya cumi. Itutaila ukuti Baibo yii ilavwa sana ya kabelenga aaya ni myenzo ya ufumacumi aakalondesya “kumanya ningo icumi.”​—1 Timoti 2:4.