Leza Akumwama Kuti Muye Cuza Wakwe

Leza akalonda kuti muye cuza wakwe. Uzye mwatala mwelenganyapo ukuti namwe mungaya cuza wakwe Leza Mukulu? Ablahamu uwaliko mpiti wali a cuza wakwe Leza. (Yakobo 2:23) Kwaya na yauze aalembwa muli Baibolo yano yali yacuza yakwe Leza; kapya wayapoleliile cuze. Ni lelo kwene, kwaya yacuza yakwe Leza aingi umu nsi yonsi. Fwandi namwe kwene mungaya cuza wakwe Leza.

Ukuya cuza wakwe Leza cazipisya ukucila ukuya cuza wa muntu sile. Leza asilekelezya yacuza yakwe a cumi. (Masamu 18:25) Ukuya cuza wakwe Leza cacila na pa kukwata ivyuma. Uwa vyuma ndi wafwa, ala ni mpiya zyakwe kwene zimasyalila antu yauze. Nomba yacuza yakwe Leza yene, yaalonka ivyuma vino pasi angayapoka.—Mateo 6:19.

Antu yamwi yangalonda kuti mute ukusambilila pali Leza. Nanti sile anyonko kwene na yacuza inu yangalonda mute ukusambilila. (Mateo 10:36, 37) Ndi yamwi yakumuseka nanti yakumutiinya, muyuzye mweeneco mu mwenzo muti, ‘Uzye nkulonda ukuzanzya weni? Uzye antu nanti a Leza?’ Mutale mwelenganye pi uzyo lii: Uzye ndi ca kuti umwi wamunena wati mute ukulya, mungamuzumilizya vwilini? Mutanga mwezye nu kwezya! Pano umuntu atanga aye umupuma ndi asikulya. Nomba Leza wene angamupeela uumi wa manda pe! Acino fwandi, mutaleka umuntu nanti umwi amulesye ukumanya vino mungaya cuza wakwe Leza.—Yoane 17:3.