Amazwi ya Kutandikilako
CINO IBUKU LII LYAPANGILWA
Yeova Leza akakomelezya antu yakwe ukuti yaalondesya ukukwata amano aa kumanya ivintu nu kwiluka; na pakuti yaye vivyo, yafwile ukuombesya wa muntu aakulondesya “icuma cimwi cino yafisa.” (Mapi. 2:1-5) Fwandi tulinzile ukulemasya lino tukulondelezya amasuko amuli Baibo ku mauzyo yano twakwata. Fwandi Ibuku Lya Kwazwa Inte Zyakwe Yeova Ukulondelezya Ivyeo lyapangwa ukuti lyamwazwako lino mukulondelezya ivyeo.
Kwene umwi buuku lii musi malyasi yonsi kwene pano yapela aalembwa umu mpapulo zitu. Nomba api lyasi lyonga na lyonga ilyati-litantikwa, pali mpapulo izya mu Cimambwe-Lungu, izitandikiile umu mwaka wako 2014 ukuya inkoleelo, muno mungazana ivyeo ivingamwazwa.
VYA KUCITA PA KULONDA IVYEO
Mwalola pa Ivili Mwenemo api fwa ilyalondelelapo, alino mweineco imusoolola ilyasi ilikuloleka ukuti u mungaya ivyeo vino mukulonda. Pa kuzana ivyeo vino mukulonda, limwi cingalondekwa ukuti imulondelezya apa mitwe ya malyasi iingi. Tumitwe tunono tuno tuli apisika li lyasi lyonga na lyonga u twakumwazwa ukuzana zuwa ilyasi lino mukulonda.
Ndi mwazana umutwe wi lyasi lino mukulonda, lyene yangini api ifwa ilyati lilangililwa, alino muye api lyasi na kamutwe kanono kano imwasoolola. Lyene mufwile ukulola imitwe ya vipande ivyati vitantikwapo, musoololepo imitwe ino mungatemwa ukuwelenga. Ngi cakuti mukweti impapulo pa ng’anda, nanti pali kompyuta, nanti ku laibulale ya ku Ng’anda Iya Wene, mungalonda icipande icati cilembwapo. Mwaiusya ukuti nanti umutwe wa cipande usikuloleka ukuti iulingana ni lyasi lino imusoolola, mu cipande kwene cico ala u muli ivyeo vino mukulonda api lyasi lilyo.
Nga mukulonda ukuzana vino icikomo cimwi ca muli Baibo calondololwa, muye pa ciputulwa icikuti Malembelo Aalondololwa. Malembelo yamwi yamwi aalondololwa nanti a panono sile a yano mumazana iyatantikwa.
Mwaiusya ukuti ukulondelezya ‘icuma cino yafisa,’ kukalondeka insita nu kuombesya. Acino mufwile ukuteeka umwenzo lino mukulonda icasuko nanti ivili vyonsi vino mukulonda ukumanya ivya kucita. Ndi mukuomvya sana ibuuku lii, cilaamwangukila nupya mulauvwa na ningo lino mukulondelezya ivyeo. Yeova alamulambula pa kuombesya kwinu napya alamwazwa ukuzana amano nu kumanya.—Mapi. 2:6; 4:5.
MUNO IVIMANYILILO VILOZILE:
❐ = Vipande ivilondenkiine
§ = Kamutwe kanono nanti ciputulwa
¶ = Palagalafu (nanti mapalagalafu)
cipa. = Cipande
p. nanti pp. = ifwa nanti amafwa
Na. = Namba
12/2004 = Umwezi/Umwaka
2/1/2010 = Umwezi/Uwanda/Umwaka