Cipande ca Mauzyo
◼ Uzye ana yafwile ukusambilila vyani pakuti yalunduluke muli ukapepa?
Avyazi aina Klistu yakaombesya ukukuzya ana yao, “nu kuyasunda nu kuyasambilizya” vyakwe Yeova. (Efes. 6:4) Cintu cimwi cino avyazi yakacita u kulanzyana na ana yao api lembelo lya wanda lino yatatala yasalangana akatondo. Lino yali pa kupepa kwa lupwa, nanti apa nsita yuze, amu lupwa yangatambako vidyo pamwi, yangalanzyanya ivyeo ivyaya umwibuku lyakuti Abacaice Bepusha, nanti ukucita icangalo ca muli Baibo, nanti ukupitulula muli vino yangacita lino yafuma pa ng’anda. Lelo, pakuti ana ‘yaye apa nkoleelo’ nanti yaalunduluka, mufwile nu kuyasambilizya icumi ca muli Baibo.—Ayeb. 6:1.
Mwaiusya vino tukasambilizya antu yano tukazana umu cifulo citu. Lino twafika sile nanti lino twizatwaswililako, cino tukalondesya u kuyatandika isambililo ukuomvya ibuku lyakuti Uzye Baibo Ikasambilizya Ukuti Uli? Ndi twasambilila nu kumala ibuku lilyo, tukatandike ibuku lyakuti Ikalilileni mu Kutemwa kwa kwa Lesa.” Uzye i cani cino tukacitila vivyo? Pano ibuku lyakuti Baibo Ikasambilizya likaavwa umusambi ukuti amanye vino malembelo yakatunena. Nalyo ibuku lyakuti Ikalilileni likayasambilizya vino yangauvwila masunde ya muli Baibo umu umi wao. Ukusambilila umu mabuku yoili kukaavwa asambi “kwika misisi” muli Klistu nu kuya “akomeleke mu utailo.” (Kolo. 2:6, 7) Uzye ivyeo vii asi ali vino na ana itu yakalondekwa? Nayo kwene yakalondekwa ukuvwikisya vino imfwa yakwe Yesu yatukulwile, vino Uwene wakwe Leza waya, na vino afwe yaaya. Ance nayo yafwile ukumanya umulandu uno Leza walekela sile ucuzi ukuyako, na vino yangamanya ukuti tuli umu manda akusyalikizya. Yafwile ukusininkizya ukuti ya Nte yakwe Yeova aliyo yamanya icumi. Ance nayo kwene yafwile ukumanya masunde amuli Baibo, ni vyakucita pakuti ‘yasambiliziwe ningo vya kupalukanya visuma ni viipe.’ (Ayeb. 5:14) Ukuya kwene avyazi yalinzile ukulola ni misinku ya ana yao navino ana yayo yakasambilila zuwa nanti foo. Lelo kwene ana aingi yakasambilila zuwa ivisinka vyamuli Baibo nalino yacili anono sana.—Luke 2:42, 46, 47.
Pa jw.org lyene paaya ivingavwa avyazi ukusambilizya ana ivya mwibuku lyakuti Vino Baibo Ikasambilizya. Pa kuzana ivyeo vivyo mungayula pano pakuti AMASAMBILISHO YA MU BAIBOLO > IMISEPELA. Ku nkoleelo tulikapo ni vyeo vya mwibuuku lya kuti “Ikalilileni.” Lelo amabuku kwene yaa apulintwe mungayaomvya nayo kwene. Avyazi yangalola ndi cakuti yangaomvya ivyeo vivyo lino yali pa kupepa kwa lupwa, nanti lino yakusambilizya umwana wenga, nanti lino yakusambilizya umwana vino angaisambilizya Baibo.