Mu Mwezi Wakwe Ogasiti Tulaombesya Sana!

1. Uzye lino tukupalamila uku kukwanisya imyaka 100 kufuma pano Uwene watandikiile ukuteeka, u mulimo ci uiyeele uulaombwa umu nsi yonsi?

¹ Imyaka 100 iya kuteeka kwa Wene Wakwe Leza yasya ikwane likwene. Fwandi cilaziipa ukuti tukakosoole sana umu Ogasiti pakuti tukalange vino twacindika Yeova! Mu Mwezi uuwa, kulaya umulimo uiyeele ulaombwa umu nsi yonsi uwa kupeela antu akapepala ki landwe akapya akakuti Uzye Aekwi Kuno Tungazana Amasuko ku Mauzyo Acindame Sana? Akapepala kako kakukomelezya antu ukuti yawelenga Baibo pakuti yazana masuko ku mauzyo yano yakwata, nupya kakulondolola vino Webusaiti ya jw.org ingayazwa.

2. Uzye tungacita uli pakuti naswe tukapundeko ku kulumbanya Yeova umu Ogasiti?

² Kulaya Ukulumbanya Sana Leza: Pa kwavwa ya kasimikila ukuti yakakosoole sana, itutantika icintu cimwi icisuma sana ica kwazwa yonsi angatemwa ukuombako upainiya wa nsita inono umu Ogasiti. Mu mwezi uuwa, ya kasimikila aawatiziwe yalayazumilizya ukuombako upainiya wa nsita inono uwa maawazi 30. Mwezi wakwe Ogasiti ulaya na ya Cisano 5, Viwelusi 5, ni Milungu 5, fwandi ya kasimikila aakaya uku ncito nayo kwene yangaca yakwanisye ukuombako upainiya wa nsita inono. Na ya kasimikila aakaya uku sukulu nayo kwene yangaca yaombeko pano umu Ogasiti amasukulu yakalala. Ndi cakuti kwaya wino mukasambilizya Baibo aakulunduluka, nanti umwana winu aangatemwa ukuya kasimikila, mufwile ukunena kalemanya wa mwiumba lyakwe ya eluda lino insita itatala yasila. Tulakomeleziwa sana ukulola antu yaayo yaaya ya kasimikila umu mwezi uuwa lino kulaya ukuombesya! Ilingi ndi cafika umu Ogasiti, ya painiya ansita yonsi aingi yatemwa ukuya uku kutandala kumwi lino yakumanizya maawazi ya pa mwaka, nomba limwi umwezi uu wene yangatemwa ukuti yataca yafumepo pakuti yakaombesye sana pamwi na ya kasimikila yauze. Likwene alino yonsi amu ndupwa yalinzile ukulanzyanya pali vino nayo yalapundako uku kulumbanya Yeova umu Ogasiti.—Ezila 3:11; Mapi. 15:22.

3. Uzye tukulonda ukuti umulimo uiyeele uulaombwa umu Ogasiti ukaombwe uli?

³ Kwene i cacumi ukuti kukaya lino tukaomba umulimo uiyele wako uu, nomba cino tukulonda i cakuti kuomba kuno tulaomba umu mwezi wakwe Ogasiti kuce kulutepo icakuti antu yataca yilile. Lekini tuce tuombesye pakuti icipendo ca maawazi, cakwe ya kasimikila, na cakwe ya painiya ansita inono cice cikulileko sana! Lino tukumalilila umwaka wa mulimo uwa 2014, tukupepa ukuti Yeova alukupolelela umulimo wa yaomvi yakwe umu nsi yonsi pakuti tukaombesye sana ukuluta imyaka yonsi!—Mate. 24:14.