Vya Kucita pa Kwazwa Yano Cikatalila Ukuwelenga
1. I cani cino cikatalila ukusambilizya Baibo antu aatamanya sana ukuwelenga?
1 Antu yano tukasimikilako yano cikatalila ukuwelenga, ilingi yakalonda ukusambilila pali Leza, nomba limwi yangaatiina yati yatanga yakwanisye ukusambilila ibuku ilikulu wakwe Baibo nanti mabuku yauze. Fwandi ukuyanena ukuti twasambilila nayo umwibuku lyakuti Vino Baibo Ikasambilizya limwi pa kutandika yangakana. Uzye tungacita uli pakuti twavwe antu yaayo ukumanya Leza? Tuuzizye ya kasimikila amanya sana mulimo uu amu mpanga ukucila pali 20 kuti yalande vino yakacita. Yaalanzile ivikonsilepo.
2. I vyani vino tungaomvya pa kusambilizya umuntu aatamanya sana ukuwelenga?
2 Ndi cakuti umusambi wamanyako sile panono ukuwelenga nanti limwi atamanya nanti panono, limwi mungamusambilizya ukuomvya utumabuku utuli wakwe Mwauvwila Leza nanti Mwauvwila Leza Alino Mulikala Amanda Pe. Umwina witu umwi painiya uwa ku United States akalanga umuntu utumabuku kwene tuu twili nu kuzya umuntu ukusoolola kano angatemwapo ukusambililamo. Iofesi litu ilyayela uku Kenya lyatunenyile ukuti utumabuku tuu tukaomba ningo sana pano umu Africa antu yakasambilila ukupitila umu kuyasimikila malyasi, asi kuyuzya mauzyo pakuti aliyo yasuke. Umuntu umusambilile wene angazumila ukuti awelenga nu kumuzya mauzyo, lelo muntu muze aatasambilila atanga atemwe vivyo. Ndi cakuti umusambi wamanyako panono ukuwelenga, ya kasimikila aingi yatemwa ukutandikilapo nu tumabuku twakuti Lyasi Lisuma Lino Leza Akutunena! nanti Mungaya Cuza Wakwe Leza! nanti limwi ukuomvya ibuku lyakuti Ibuku Lyane Ilya Malyasi Amuli Baibo.
3. I vintu ci vino tufwile ukumanya pali yaayo aatamanya ukuwelenga ivingatwavwa ukuomba ningo?
3 Mwayataizya: Antu aatamanya ukuwelenga limwi yangauvwa insonyi, nupya aingi yangaalola nu kuti limwi yaazewana. Cino tufwile ukutandikilapo pakuti tuyasambilizye icumi, u kuyavwa ukuti yatauvwa insonyi. Antu aingi aatamanya ukuwelenga yaacenjela sana nupya yangasambilila ndi mwayavwa. Mwalanga ukuti imuyacindika, nupya kusi kuyasaalula. (1 Pet. 3:15) Ndi yakuvwa umu mwenzo ukuti yakuomba ningo nu kulunduluka, yalakomeleziwa nu kutwalilila ukusambilila. Fwandi mwayataizya pali vino yakuombesya.
Antu aatamanya ukuwelenga, limwi yangauvwa insonyi, nanti ukwelenganya ukuti limwi yazewana. Ukuyakomelezya ukuti yatauvwa insonyi ali ca kutandikilapo pakuti tuyasambilizye icumi
4. Uzye tungakomelezya uli asambi aatamanya sana ukuwelenga ukuti yaapekanya vino tulasambilila?
4 Nanti sile umuntu wamanyako sile panono ukuwelenga, mufwile ukumukomelezya ukuti aapekanya vino muliza musambilile. Ya kasimikila yamwi uku South Africa yakanena asambi ukuti yakuzye umwi pa ng’anda nanti muze sile uwamanya ningo ukuwelenga ukuti akayavwe. Kasimikila umwi uwa ku Britian pa kwavwa asambi ukuti yaapekanya, akatala ayapeela ibuku lyakwe lino yakusambilila pakuti iyalola vino cikaangupala ukuzana masuko ndi watuusila mwenemo. Umwina witu umwi uku India akanena asambi yakwe ukulola ivikope ivili umwisambililo ililondeliilepo nu kwelenganyapo sana pa vikope vivyo, kuli kupekanya.
5. Uzye tungalangizya uli ukuti tukuteeka umwenzo lino tukusambilizya umusambi?
5 Mwayateekela Umwenzo: Asi mulandu nu lupapulo luno mukuomvya, mwemo mufwile ukusumba amano pa visinka ivilimo, nu kwavwa umusambi ukuvwikisya ivisinka vivyo. Pa kutandika cikazipa ukuti mutatalimfya ilyasi, mungaalanzyanya pa mamineti limwi 10 kufika uku 15. Mutafwile ukulanda ivyeo ivingi ukuluta, mwasambilila utumapalagalafu tunono sile. Ndi umusambi asikukalauka pa kuwelenga, mwamuteekelela. Lino akuya akumanya ivingi pali Yeova alaalondesya ukumanya ningo ukuwelenga. Pa kwavwa umusambi ukucita vivyo, cikazipa ukuti imumwama pa kutandika kwene ukuti ace aize uku kulongana.
6. Tungacita uli pakuti twazwe umuntu ukumanya ukuwelenga?
6 Asambi ndi yamanya ukuwelenga, alino yalalunduluka sana muli vyakwe Leza. (Masa. 1:1-3) Ya kasimikila aingi yakati ndi yamala ukusambilila, yaomvya akasita akanono sile ukwazwa asambi yao ukuomvya kabuku kakuti Lemasyini Mumanye Ukuwelenga nu Kulemba. Ndi umusambi akulola ukuti atanga akwanisye, mungalumbula ivintu vimwi vino wakwanisya ukumanya, nu kumukomelezya ukuti atwalilile ukulemasya. Mwamunena ukuti Yeova alamwavwa ukusambilila, nu kuti apepa kuli Leza nu kulenga uwavwilizyo. (Mapi. 16:3; 1 Yoa. 5:14, 15) Ya kasimikila yamwi uku Britain yakanena asambi yao ukutantika vino yangasambilila panono-panono, wakwe ukutandikilapo ukumanya ivilembo vyakwe alufabeti, alino iyatandika ukuzana malembelo yamwi nu kuyawelenga, nga alino iiza yatandika ukuwelenga mabuku angupale ukuwelenga. Ukwazwa antu ukumanya ukuwelenga ilingi kukalondeka ukuyakomelezya ukuti yaalondesya ukucita vivyo, asi kulayasambilizya sile.
7. U mulandu ci uno tulinzile ukusambilizizya antu icumi nanti cakuti yatamanya ningo ukuwelenga?
7 Yeova asisuula antu aatasambilila sana. (Yobo 34:19) Yeova wene akalondesya ivyaya umu mwenzo wa muntu. (1 Mila. 28:9) Fwandi na yaaya kwene aakuti cikayatalila ukuwelenga, mufwile ukuyasambilizya icumi. Mwakwata iviombelo ivingi ivingamwazwa ukutandika ukucita vivyo. Wanda umwi mungasuka mwize mutandike nu kusambilila umwibuku lyakuti Vino Baibo Ikasambilizya pakuti umuntu asambilila nu kumanya sana Malembelo.