Mwakolanya Yakasesema—Zefaniya
1. Uzye ivintu vyali uli lino Zefaniya waali a kasesema, nupya tungamukolanya uli ndakai?
1 Lino kwasiile imyaka nalimwi 650 kuti Yesu avyalwe, kupepa Baali kwakomile sana umu Yuda. Amoni umwene umwipe ala yacimukomile, lyene alino Yosiya watandike ukuteka. (2 Mila. 33:21–34:1) Pa nsita kwene yii, Yeova watumile Zefaniya kuti aneene antu pa upinguzi wakwe. Nanti i cakuti Zefaniya waakumilweko uku wene wa ya Yuda, atafisile uukombe wa upinguzi uku ntunguluzi zya ya Yuda. (Zefa. 1:1; 3:1-4) Naswe kwene tukaezya ukukolanya ukusipa kwakwe Zefaniya, ukukaana ukuzumilizya yalupwa ukucilinganya ukupepa Yeova. (Mate. 10:34-37) Uzye ukombe ci uno Zefaniya wanenyile antu, nupya i vyani vyafumilemo?
2. I vyani vino tulinzile ukucita pakuti tukapusuke lino ukali wakwe Yeova uliiza?
2 Londini Yeova: Yeova sile aangapususya antu umu wanda wakwe wa ukali. Acino Zefaniya wanenyile antu aali umu Yuda ukulonda Yeova, nu kucita ivyawololoke, nu kuiceefya lino insita ya ukali wakwe Yeova itatala iiza. (Zefa. 2:2, 3) I cili cimwi na ndakai kwene. Wakwe vino Zefaniya wacisile, naswe tukakomelezya antu kulonda Yeova, napya tutafwile ukwikala sile, tulinzile ukutwalilila ukulonda Yeova aasi ‘kumufutatila’ foo. (Zefa. 1:6) Lelo, tukalonda Yeova ndi cakuti tukusambilila Baibo nu kupepa kuli aliwe kuti aatutungulula. Tukacita ivyawololoke ndi cakuti tukutaaluka ivingakowezya uumi witu. Alino tukalanga ukuti sweswe aiceefye, ndi tukuuvwila nu kulondela vino Yeova akututungulula ukuomvya iuvi lyakwe.
3. U mulandu ci uno tulinzile ukutwalilila nu mwenzo wa kusimikila?
3 Ivisuma Ivyafumilemo: Ukombe uno Zefaniya wanenyile antu walenzile ukuti antu yamwi mu Yuda yacitepo cimwi, maka-maka Yosiya uwatandike ukulondesya kuombela Yeova lino acili umwance. Lyene Yosiya wakatwisye umulimo uukalamba uwakoonona utuluwi umu mpanga ya Yuda. (2 Mila. 34:2-5) Ndakai nanti i cakuti imbezu zimwi izya Wene zikaponela umu mbali ya nzila, pali cilwala, nanti umu myunga, lelo kwaya zimwi izikaponela apa musili uvunde nu kutandika ukuseeka ivizao. (Mate. 13:18-23) Swemo, twataila ukuti Yeova alatwalilila ukutupolelela ngi cakuti tukuombesya umu mulimo wa kuta imbezu zya Wene.—Masa. 126:6.
4. U mulandu ci uno tulinzile ukutwalilila ‘ukulolela Yeova’?
4 Yamwi umu mpanga iya Yuda yalolanga kwati Yeova ataali nu kucitapo cimwi. Lelo Yeova wanenyile yonsi ukuti uwanda wakwe ukulu waali mupipi. (Zefa. 1:12, 14) Yeova waali nu kupususya sile aalililanga kuli aliwe kuti ayaazwe. (Zefa. 3:12, 17) Lino ‘tukulolela Yeova,’ lekini tutwalilile ukulaombela pamwi na yakapepa yakwe Leza witu mukulu umu nsansa!—Zefa. 3:8, 9.