Uzye Nkaloleka Uli Kuli Yeova?
1. Uzye Baibo yaakolana uli ni galasi?
1 Uzye i miku inga ino mukailola mwi galasi? Swe ingi tukailola cila-wanda pano igalasi likatwazwa ukumanya vino tukuloleka na pano tungaiziifya. Baibo yaaya kwati i galasi. Nga tukuwelenga Izwi Lyakwe Leza cingatwazwa ukumanya vino twaya fweineco, ndi vino Yeova akatulola. (1 Sam. 16:7; Yako. 1:22-24) Izwi Lyakwe Leza “likapingula vilondwa nu kwelenganya kwa mu mwenzo wa muntu.” (Ayeb. 4:12) Uzye nga tukuwelenga Baibo nu kwelenganyapo cila-wanda, cingatwazwa uli ukumanya umukulondeka ukuziifya pakuti twasimikila ningo?—Masa. 1:1-3.
2. Uzye Baibo ingatwazwa uli kuiceceta sweineco?
2 Mwaomvya Baibo Kwati Galasi: Malyasi aalembwa muli Baibo aakalanda pa yaomvi yakwe Yeova aacumi, yakatusambilizya imiyele isuma ino Yeova akalonda. Yalanda pali Davidi ukuti watemilwe sana izina lyakwe Leza. (1 Sam. 17:45, 46) Ezaya nawe waipeelisye ukusimikila mu ncende izitale. (Eza. 6:8, 9) Kutemwa kuno Yesu watemilwe Isi wa kwiyulu nako kwamulenzile ukuti atemwe umulimo wa kusimikila nu kuulola ukuti utaali utale. (Yoa. 4:34) Lyene yalanda na pa Ina Klistu akutandikilapo ukuti nayo yatemilwe sana ukusimikila, yasintililanga sana pali Yeova nupya yatwalilile ukwaula ukuta. (Mili. 5:41, 42; 2 Kol. 4:1; 2 Tim. 4:17) Ndi tukwelenganya pa malyasi yaa, cingatwazwa ukulola pano tungaziifya pakuti twaomba ningo umulimo wakwe Leza.
3. U mulandu ci uno tufwile ukuiziifya zuwa-zuwa ndi muli mumwi umukulondekwa?
3 Mwaziifya Umukulondekwa: Igalasi litanga likwate incito nga tukuilolamo, nupya itukaana ukuziifya apakulondekwa. Tungapepa kuli Yeova ukuti atwazwe ukulola ningo-ningo umukulondekwa ukuziifya nu kuti atwazwe ukuombelapo. (Masa. 139:23, 24; Luka 11:13) Tufwile ukwaluka zuwa-zuwa umukulondekwa pano insita iisile yaticepa, nupya maumi ya antu yali mu uzanzo.—1 Kol. 7:29; 1 Tim. 4:16.
4. Uzye i cani icingacitika uku muntu wino akuwelenga Izwi Lyakwe Leza nu kuziifya apakulondekwa?
4 Yeova wiikako sana amano kuli vino twaaya umu mwenzo, pano i vyacindama ukuluta vino tukaloleka ukunzi. (1 Pet. 3:3, 4) Uzye umuntu aakuwelenga Baibo nu kuziifya apakulondekwa angaya uli? ‘Ndi watwalilila ukusumba mano ku masunde kwaula kuvwa sile nu kwilila, lelo akacita vino yene yakulanda, umuntu wiyo Leza alamupolelela [alaya nu luzango, NW] muli vino akacita.’ (Yako. 1:25) Fwandi, tulaya nu luzango nupya tulaasimikila ningo pano ‘tulalanga ukuyengesa kwa lulumbi’ lwakwe Yeova.—2 Kol. 3:18.